Kam beeg e pi Wulyang ko Damit ni fan ko re duw ney nib fel’ rogon, fa? Mu guy ko rayog ni ngam pi’ e fulweg ko pi deer ni baaray fa dabiyog:

Mang kanawo’ e ke dag Jehovah nrayog ni ngan folwok riy u rogon e ngongol rok ko piin nib pin?

Der ma laniyan’ ngorad, maku der ma tay ni kab fel’ e piin pumoon ko piin nib pin. Ma motoyil Got ko piin nib pin, ma ma lemnag rogon lanin’rad nge pi magafan’ rorad. Ba pagan’ ngorad nrayog ni ngar rin’ed e maruwel rok.​—w24.01, pp. 15-16.

Uw rogon nrayog ni ngad folgad ko fare thin ni bay ko Efesus 5:7 ni be gaar: “Dab um chaggad ngak e mit i girdi’ nem”?

Be yog apostal Paul ndab ud chaggad ngak e piin yad ra mo’maw’nag ngodad ni ngad folgad ko pi motochiyel rok Got. Re n’ey e ba muun ngay e piin gad ma chag u taabang nge piin gad ma non ngorad ko yungi n’en bay ko Internet ni yima non riy ngak yugu boch e girdi’.​—w24.03, pp. 22-23.

Mang boch ban’en ni yima weliy nde riyul’ nib t’uf ni ngad kol ayuwgad riy?

Ba t’uf ni ngad kol ayuwgad u boch ban’en ni ma weliy e pi walag ndariy e mich riy, nge boch e email ni ke pi’ boch e girdi’ ngodad ndad nanged yad, nge piin kar digeyed e tin riyul’ ma kar chelgad yad be togopuluw ngay ni yad ma dake yad baadag ni ngar nanged e tin riyul’.​—w24.04, p. 12.

Mang e gad manang, ma mang e dad nanged u murung’agen rogon nra pufthinnag Jehovah Solomon ni Pilung, nge piin nra m’ad u Sodom nge Gomorrah, ngu nap’an fare Ran ni Tharey e Fayleng?

Ri dad nanged ko ke dugliy Jehovah ni nge thangrad ndariy n’umngin nap’an fa danga’. Machane gad manang ni ir e manang gubin ban’en ma ri ma runguyey.​—w24.05, pp. 3-4.

Bochan ni be yog e Bible ni Got e bod bangi “malang,” ma mang e be micheg e re n’ey nga lanin’dad? (Deut. 32:4)

Rayog ni ngad ted Jehovah ni ir e manaf rodad. Rayog ni ngad taga’gad ngak, ya gubin ngiyal’ ni ma tay u gil’ e tin ke micheg. Ku dabi thil. Dabi thil rarogon nge n’en nib m’agan’ ngay.​—w24.06, pp. 26-28.

Mang e rayog ni nge ayuwegem ni ngam mecham nga reb e ulung ni kam man ngay nib beech?

Mu taga’ ngak Jehovah, ya ra ayuwegem ni bod ni i ayuweg e pi tapigpig rok kakrom. Dab um taarebrogonnag boch ban’en ko bin nib beech e ulung ni kam man ngay ko bin um moy riy e ulung. Mu yoornag e tin ga be rin’ u lan e bin nib beech e ulung ni kam man ngay, mag yognag boch e fager ngom nib beech.​—w24.07, pp. 26-28.

Mang e yira fil ko fa dalip i fanathin ni bay murung’agen ko Matthew ko guruy ni 25?

Fare fanathin ni murung’agen fapi saf nge kaming e be tamilangnag feni ga’ fan ni ngan par ni yib yul’yul’. Fare fanathin ni murung’agen fapi rugod ni yad ba gonop nge fapi rugod ni yad bbalyang e be tamilangnag feni ga’ fan ni ngan fal’eg rogoy min tiyan’uy. Ma fare fanathin ni murung’agen fapi salpiy e be tamilangnag feni ga’ fan e maruwel nib gel.​—w24.09, pp. 20-24.

Uw tolngin fare beranda ko tempel rok Solomon?

Bay yu ken e Bible ni ka nog riy ko 2 Kronicles 3:4 nre beranda nem e “120 e cubit” tolngin. Ra aram rogon, me ere be yip’ fan ni 175 e fit tolngin! Machane bay yu ken nrayog ni ngan pagan’uy ko thin riy ni ka nog riy ni “reliw’ e cubit tolngin” ara sogonap’an 30 e fit. Re n’ey e ba puluw nga rogon dub’agin e rungrung ko re tempel nem.​—w24.10, p. 31.

Mang e be yip’ fan nreb e ministerial servant e “thingari par ni taareb e ppin rok”? (1 Tim. 3:12)

Be yip’ fan ni nge par ni taareb e ppin rok ma susun e dabi un ko ngongol ndarngal. Susun e dariy ba ngiyal’ ni nge adag yugu reb e ppin.​—w24.11, p. 19.

Mang fan nrayog ni nga nog ni fare thin ko John 6:53 e der weliy e n’en nra buch u nap’an fare Abich ni Blayal’ rok Somol?

Be yog e John 6:53 nib t’uf ni ngan kay e ufin u dow Jesus min unum rachaen. I yog Jesus e pi thin ney ko duw ni 32 C.E. u Galile ngak e pi Jew ni kab t’uf ni nge mich u wan’rad. Machane reb e duw nga tomuren min tababnag fare Abich ni Blayal’ rok Somol u Jerusalem. U rom e i non Jesus riy ngak e piin yad ra un ko gagiyeg u tharmiy.​—w24.12, pp. 10-11.