1. Mang e yog Jesus ngak pi gachalpen u murung’agen e ngiyal’ nra yib e tomur? Mang e yog ngorad ni ngar rin’ed?

 IN E rran u m’on ni nge yim’ Jesus me fith aningeg i gachalpen ngak ni lungurad: “Mang e pow . . . ko ngiyal’ ni ke chugur nga tomuren e re m’ag ney?” (Matt. 24:3, NW) Dabisiy ni fan nra fithed e re deer ney e bochan ni yad baadag ni ngar nanged ko wuin e yira gothey yu Jerusalem nge fare tempel riy. Gathi kemus ni yog Jesus ngorad murung’agen e ngiyal’ ni yira gothey yu Jerusalem nge fare tempel riy, ya ki weliy murung’agen e “ngiyal’ ni ke chugur nga tomuren e re m’ag ney” ni gad bay riy e chiney. Baaray e n’en ni yog Jesus u murung’agen e ngiyal’ nra yib e tomur riy ni gaar: “Re rran nem ara re awa nem e dariy be’ ni manang e ngiyal’ nra taw riy ni mus ko pi engel ni yad bay u tharmiy ara en ni Fak Got, ya ke mus ni en ni Chitamangiy e manang.” Ngemu’ me yog ngak gubin i gachalpen ni ngar ‘tedan’rad.’​—Mark 13:32-37.

2. Mang nib ga’ fan ni nge tiyan’ e pi Kristiano ni ur moyed u nap’an e bin som’on e chibog?

² Pi Kristiano ni yad boch e Jew ni ur moyed ko bin som’on e chibog e thingar ra pared ni yad be tedan’rad ya nge yag nra ayuweged e yafos rorad. I yog Jesus ngak pi gachalpen e n’en ni ngar tedan’rad ngay ya nge yag nra nanged e ngiyal’ ni yira gothey yu Jerusalem nge fare tempel riy. I gaar: “Faanra mu guyed yu Jerusalem ni ke longobiy yu raba’ i salthaw, ma aram e kam nanged ndab ki n’uw nap’an min kirebnag.” Nap’an nra buch e re n’em, mab t’uf ni ngar folgad ko n’en ni yog Jesus mar “milgad nga daken e pi burey.” (Luke 21:20, 21) Piin nra tedan’rad ko n’en ni yog Jesus e ra mageygad ni yad ba fos u nap’an ni gothey piyu Roma yu Jerusalem.

3. Mang e gad ra weliy ko re article ney?

³ Ngiyal’ ney e gad be par u tungun e re m’ag nib kireb ney. Ere thingar da tedan’dad ma gad kol ayuw. Gad ra weliy ko re article ney rogon ni ngad kol ayuwgad u nap’an ni gad be yaliy e pi n’en  be buch u fayleng, nge rogon ni ngad kol ayuwgad ko n’en gad be rin’, nge rogon ni ngad maruwelgad nib fel’ rogon ko tayim ni ka bay.

4. Mang fan nsusun e ngad adaged ni ngad guyed rogon ni be lebguy e pi n’en be buch u fayleng e pi yiiy u Bible?

⁴ Bay fan ni gad baadag ni ngad guyed rogon ni be lebguy e pi n’en be buch u fayleng e pi yiiy u Bible. Bod ni bay boch ban’en ni yog Jesus nra buch nra ayuwegdad ni ngad nanged e ngiyal’ ni ke chugur nga tungun e re m’ag rok Satan ney. (Matt. 24:3-14) I pi’ apostal Peter e athamgil nga lanin’dad ni ngad tedan’dad nga rogon ni be lebug e pi yiiy ya nge yag ni par e michan’ rodad nib gel. (2 Pet. 1:19-21) Baaray e n’en nnog u tabolngin e ken tomur e babyor ko Bible ni be gaar: “U lan e re ke babyor ney e kan yoloy fapi n’em ngay ni fini dag Jesus Kristus nga ni guy. Pi n’ey e pi’ Got ngak John ni nge dag ngak e pi tapigpig rok Got e n’en nthingari m’ug ndab ki n’uw nap’an.” (Rev. 1:1) Ere ri gad baadag ni ngad nanged e n’en be buch u fayleng e chiney nge rogon nsana be lebguy e pi yiiy u Bible. Ku rayog nra bagadad ma baadag ni nge weliy murung’agen e pi n’ey ngak bagadad.

5. Mang e susun ni ngad siyeged, ma mang e susun ni ngad rin’ed? (Kum guy fapi sasing.)

⁵ Machane nap’an ni gad be weliy murung’agen e pi yiiy u Bible, ma susun e dab ud guyed rogon ni ngad sananaged e n’en bayi buch. Mang fan? Ya dubdad ni nga dogned ban’en nra ruw raba’nag e ulung. Bod nrayog ni ngad rung’aged ni be weliy e pi tayugang’ u fayleng rogon nrayog ni ngar pithiged reb e magawon mar ayuweged e fayleng ni nge gapas ndakuriy ban’en nra buch. Ba t’uf ni ngad nanged e pi n’en nib beech ni yibe tay nga lan e pi babyor rodad ko bin ni ngaud sananaged ni pi thin nem e be lebguy fare yiiy ni bay ko 1 Thessalonika 5:3. Faanra ba puluw e n’en gad ma weliy ko n’en ni bay ko pi babyor ni ke ngongliy e ulung rok Jehovah, ma aram e gad be ayuweg e ulung ni nge par ni bay e taareban’ riy ‘ma taa ban’en e yibe nameg.’​—1 Kor. 1:10; 4:6.

6. Mang boch ban’en nrayog ni ngad filed ko 2 Peter 3:11-13?

⁶ Mu beeg e 2 Peter 3:11-13. Ke ayuwegdad apostal Peter ni ngad lemnaged fan nsusun e ngaud fal’eged i yaliy e pi yiiy u Bible. I yog ni ngad ‘sonnaged e chirofen nem, ni ir e Rran rok Got, ma gad athamgil u rogon nrayog rodad nge papey nge taw ngay.’ Mang fan? Bochan ni gad baadag ni ngad fanayed e tayim ni ka bay ni nge par ‘pangidad nib thothup ma kad pied gadad nga pa’ Got,’ ma gathi bochan e gad be guy rogon ni ngad nanged e ‘re rran nge re awa’ nra yib e Armageddon riy. (Matt. 24:36; Luke 12:40) Be yip’ fan ni gad baadag ni nge par e ngongol rodad nib manigil, ma gad guy rogon ni ngad rin’ed urngin ban’en ni fan ngak Jehovah ni bochan e ba t’uf rodad. Ra ngad rin’ed e re n’ey, ma aram e thingar da kol ayuwgad ko n’en gad be rin’.

7. Uw rogon ni ngad daged ni gad be kol ayuw ko n’en gad be rin’? (Luke 21:34)

⁷ I yog Jesus ngak pi gachalpen ni gathi kemus ni ngar tedan’rad ko pi n’en be buch u fayleng, ya kub t’uf ni ngar kol ayuwgad ko n’en yad be rin’. Ireray e n’en kan tamilangnag ko Luke 21:34. (Mu beeg.) Mu tay fanam i yan ko n’en ni yog Jesus ni gaar: “Mu ayuwgad.” Be’ ni ma kol ayuw ko n’en ma rin’ e ma tiyan’ nga boch ban’en nrayog ni nge kirebnag e tha’ u thilrow Jehovah me guy rogon ni nge siyeg. Aray rogon ni ma par nib t’uf rok Got.​—Prov. 22:3; Jude 20, 21.

8. Mang e yog apostal Paul ko piin Kristiano ni ngar rin’ed?

⁸ I yog apostal Paul ko piin Kristiano ni ngar  kol ayuwgad ko n’en yad be rin’. Bod ni yog ngak e pi Kristiano u Efesus ni gaar: “Um ayuwgad u rogon e ngongol romed. Dab um ngongolgad ni bod e girdi’ ndawori tamilangan’rad, machane nguum ngongolgad ni bod rogon e girdi’ nib gonop.” (Efe. 5:15, 16) Gubin ngiyal’ ni be guy Satan rogon ni nge kirebnag e tha’ u thildad Jehovah. Ere aram fan ni be fonownagdad e Bible ni ‘ngad guyed rogon ngad nanged e n’en nib m’agan’ Somol ngay ni ngad rin’ed,’ ya nge yag nda ayuweged gadad ko cham ni be tay Satan ngodad.​—Efe. 5:17.

9. Uw rogon ni ngad nanged e n’en nib m’agan’ Jehovah ngay ni ngad rin’ed?

⁹ Der weliy e Bible urngin ban’en nrayog ni nge kirebnag e tha’ u thildad Jehovah. Ba ga’ nthingar da dugliyed e n’en ngad rin’ed nga boch ban’en ni gathi rib tamilang murung’agen u lan e Bible. Ere faanra ngad dugliyed boch ban’en u fithik’ e gonop, mab t’uf ni ngad guyed rogon ni ngad nanged e ‘n’en nib m’agan’ Somol ngay ni ngad rin’ed.’ Ra ngad rin’ed e re n’ey, mab t’uf ni ngaud filed e Thin rok Got ni gubin ngiyal’ ma gad be fal’eg i lemnag. Faanra ud guyed rogon ni ngad nanged e n’en nib m’agan’ Jehovah ngay me yag “laniyan’ Kristus” ngodad, ma aram e rayog ni ngaud ngongolgad ni “bod rogon e girdi’ nib gonop” ni yugu aram rogon ndariy boch e motochiyel ni be yog ngodad e n’en ngad rin’ed. (1 Kor. 2:14-16) Yu ngiyal’ e ba mom ni ngad nanged e n’en nthingar da siyeged ma yu ngiyal’ e danga’.

10. Mang boch ban’en nthingar da siyeged?

¹⁰ Boch ban’en nthingar da siyeged e ba muun ngay ni ngaun ngongol i dawol ngak be’, nge unum nib pag rogon, nge abich nib pag rogon, nge nga unog e thin nra kirebnag laniyan’ be’, nge ngaun yaliy yaan e cham nge ngongol ni puwlag, nge ku boch e ngongol ni aray rogon. (Ps. 101:3) Gubin ngiyal’ ni be guy Moonyan’ ni toogor rodad rogon ni nge kirebnag e tha’ u thildad Jehovah. (1 Pet. 5:8) Ere faanra dab da kol ayuwgad ma rayog ni nge yung Satan nga lanin’dad nge gum’ircha’dad boch e lem nib kireb ni bod e awan’, nge sasalap, nge chogow, nge fanenikan, nge tolangan’, nge damumuw. (Gal. 5:19-21) Som’on e sana gathi rib gel e pi lem ney rodad. Machane faanra dab da rin’ed ban’en ngay ni ka chingiyal’ nem, ma ra ulul ni nge ilal u lanin’dad ni bod ba woldug ni bay e yub riy me k’aring e magawon nga puluwdad.​—Jas. 1:14, 15.

11. Mang reb e ban’en ni gathi rib gagiyel nthingar da siyeged, ma mang fan?

¹¹ Reb e ban’en ni gathi rib gagiyel machane bay e riya’ riy e aram e ngaun chag ko girdi’ nib kireb e ngongol rok. Am lemnag e re n’ey. Gimew ma maruwel be’ u taabang nde taareb e michan’ romew. Ere ga ma gol ngak ma ga ma ayuweg ni bochan e ga baadag ni nga i lemnag boch ban’en nib fel’ u murung’agen e Pi Mich Rok Jehovah. Ku bayi n’en ma ga ma un ngak ngaum abichgow u taabang ko misiw’. De n’uw nap’an nga tomuren ma gubin ngiyal’ ni gimew ma abich u taabang. Yu ngiyal’ e bayi n’en me yog facha’ boch e thin nib puwlag. Ma som’on e ga ma guy rogon ni nge dab mmotoyil ngay. Machane faani munmun, me mecham fapi thin u telim ndakir magawonnag lanin’um. Me yan i reb e rran me piningem ni ngam marow nga bang u tomuren e maruwel ni ngam unumew ban’en, ma aram mag un ngak. Munmun ma aram mag tabab ni ngaum lem ni bod facha’ ni gimew nga maruwel. Ere ba mudugil ndabi n’uw nap’an ma ga ra tabab ni ngaum rin’ e pi n’en ma rin’. Riyul’ ni gad ma gol ngak gubin e girdi’ ma gad ma tay farad, machane thingar dab da paged talin ni faanra ud chaggad ngak be’ ni gubin ngiyal’ ma ra munmun ma gad bod facha’. (1 Kor. 15:33) Ere faanra gad ma kol ayuw ko n’en gad ma rin’ ni bod rogon ni yog Jesus ni ngad rin’ed, ma aram e gad ra siyeg ndab ud  chaggad ni yugu dariy rogon ngak e piin ndarur folgad ko pi motochiyel rok Jehovah. (2 Kor. 6:15) Gad ra guy e riya’ ni be yib ngodad ma gad siyeg.

12. Mang e thingari rin’ pi gachalpen Jesus u nap’an ni yad be sonnag e ngiyal’ ni yira gothey yu Jerusalem nge fare tempel riy?

¹² Nap’an ni be sonnag pi gachalpen Jesus e ngiyal’ ni yira gothey yu Jerusalem nge fare tempel riy ma gathi ngar pared ndariy ban’en ni yad be rin’. Ya bay e maruwel ni pi’ Jesus ni ngar rin’ed. I tay chilen ngorad ni ngar machibnaged fare thin nib fel’ u “lan yu Judea ni polo’, ngu lan yu Samaria, nge yan i mada’ ko yungi n’en ni yan i mus e fayleng ngay.” (Acts 1:6-8) Rib ga’ e maruwel ni pi’ Jesus ngak pi gachalpen ni ngar rin’ed! Ere faan yad ra tedan’rad ko maruwel ni kan pi’ ngorad, ma aram e yad be maruwel ko tayim rorad nib fel’ rogon.

13. Mang fan nib t’uf ni ngad maruwelgad ko tayim rodad nib fel’ rogon? (Kolose 4:5)

¹³ Mu beeg e Kolose 4:5. b Ra ngad kol ayuwgad ko n’en gad be rin’, mab t’uf ni ngad fal’eged i lemnag rogon ni gad ma maruwel ko tayim rodad. Demtrug bagadad nrayog ni nge buch boch ban’en rok “nde lemnag nra buch.” (Ekl. 9:11, NW) Rayog ni ngad m’ad nib tomgin.

14-15. Uw rogon nrayog ni ngad maruwelgad ko tayim rodad nib fel’ rogon? (Hebrews 6:11, 12) (Kum guy e sasing.)

 ¹⁴ Gad ra rin’ e n’en nib m’agan’ Jehovah ngay ma gad be guy rogon ni nge chugur e tha’ thildad, ma aram e rayog ni ngad maruwelgad ko tayim rodad nib fel’ rogon. (John 14:21) Ba t’uf ni ‘ngaud pired ni gad mmudugil. Gubin ngiyal’ ma ngaud muruwliyed e maruwel rodad ni fan ngak Somol.’ (1 Kor. 15:58) Faan gad ra rin’ e re n’ey, ma nap’an ni gad ra yim’ ara ke yib e tomur ko re m’ag nib kireb ney ma dariy ban’en ni gad ra kalngan’dad riy.​—Matt. 24:13; Rom. 14:8.

¹⁵ Ka be ulul Jesus ni nge pow’iy pi gachalpen e ngiyal’ ney u nap’an ni yad be machibnag murung’agen Gil’ilungun Got u ga’ngin yang e fayleng. Ke lebguy e n’en ke micheg. Ya be fanay e ulung rok Jehovah ni nge skulnagdad u rogon ni ngad machibgad, ma be pi’ boch e talin e maruwel nib t’uf rodad ya nge yag nda machibnaged fare thin nib fel’. (Matt. 28:18-20) Faan gad ra maruwel nib gel ni ngad machibnaged e girdi’, ma gad be fil e tin riyul’ ngorad ma gad be tedan’dad u nap’an ni gad be sonnag e ngiyal’ ni nge thang Jehovah e re m’ag ney, ma aram e gad be rin’ e n’en nib milfan ngodad. Ma faan gad ra fol ko fare fonow ni bay ko Hebrews 6:11, 12, ma aram e gad ra chichiiy pa’dad ko athap rodad “nge yan i taw ko tomur.”​—Mu beeg.

16. Mang e kad dugliyed u wan’dad ni ngad rin’ed?

¹⁶ Ke dugliy Jehovah e re rran nge re awa nra thang e re m’ag rok Satan ney riy. Ra taw ko rofen nem, ma ra lebguy Jehovah e pi yiiy ni ke tay nga lan e Thin rok. Yu ngiyal’ e rayog ni ngad lemnaged ni kab n’uw nap’an mfini yib e tomur. Machane “dabi sowath” e rran rok Jehovah! (Hab. 2:3) Ere manga yu gud dugliyed u wan’dad ni ngad ‘torgad ngak Somol’ mu ud pared ni ‘ke l’agan’dad ngak ma gad be sonnag, yi ir e bayi ayuwegdad.’​—Mik. 7:7.