1. Mang e be dag nib ga’ fan u wan’ Jesus e thin ni bay u lan fare Babyor nib Thothup?

 MU SUSUNNAG rogon laniyan’ e piin ur motoyilgad ngak Jesus ni be machib. Ba ga’ ni i sul u daken e thin ni bay u lan fare Babyor nib Thothup ni bay u laniyan’! I sul u daken e n’en ni bay u lan e Babyor nib Thothup u nap’an ni be yog e tin som’on e thin ni yog u tomuren ni kan taufenag ngu nap’an ni be yog boch e tin tomur e thin ni yog u m’on ni nge yim’. b (Deut. 8:3; Ps. 31:5; Luke 4:4; 23:46) Mu nap’an fare dalip nge baley e duw u thilin e ngiyal’ nni taufenag nge ngiyal’ ni yim’ riy, mab ga’ ni i beeg, ma be sul u daken e n’en ni bay u lan fare Babyor nib Thothup, ma be weliy fan u fithik’ e girdi’ ni yoor.​—Matt. 5:17, 18, 21, 22, 27, 28; Luke 4:16-20.

2. Nap’an ni be ilal Jesus, ma mang e ayuweg ni nge nang e n’en bay u lan fare Babyor nib Thothup nib fel’ rogon? (Mu guy e sasing ni bay u wuru’ e re ke babyor ney.)

² Boor e duw u m’on ni nge tabab Jesus ko machib, ma boor yay ni i beeg ma be rung’ag e Thin rok Got. Ra bay u tabinaw, ma dariy e maruwar riy ni ma rung’ag ni ma sul Maria nge Josef u daken e thin ni bay u lan fare Babyor nib Thothup u nap’an ni yad be sabethin u reb e rran ngu reb. c (Deut. 6:6, 7) Ku gad manang ni gubin e Sabbath ni ma un Jesus ngak chon e tabinaw rok nga ranod nga lan tafen e muulung. (Luke 4:16) Nap’an nra yan ngaram, mab mudugil ni ma fal’eg e motoyil u nap’an ni yibe beeg e thin ni bay u lan fare Babyor nib Thothup. Munmun me fil rogon ni nga i beeg e pi thin nem rok ni yigoo ir. Ere angin ni yib riy e gathi kemus ni nang e n’en bay u lan fare Babyor nib Thothup nib fel’ rogon, ya ki ga’ fan u wan’, miki pag ni nge gagiyegnag e ngongol rok. Am lemnag e n’en ni buch u tempel u nap’an ni ka fini gaman 12 e duw rok. Fapi tamachib  ko motochiyel nri yad manang fare Motochiyel rok Moses nib fel’ rogon e “ra gingad nga feni llowan’ ko thin ni ur fithed ngak ngi i fulweg.”​—Luke 2:46, 47, 52.

3. Mang e gad ra weliy ko re article ney?

³ Ku arrogodad nrayog ni ngad nanged e Thin rok Got miki ga’ fan u wan’dad ni faanra ud beeged e Bible ni gubin e rran. Ere uw rogon nrayog ni ngari yib angin ngodad e n’en gad ma beeg? Rayog ni ngad filed ban’en ko n’en ni yog Jesus ngak e piin yad manang fare Motochiyel nib muun ngay e pi tamachib ko motochiyel, nge pi Farise, nge pi Sadduse. Pi tayugang’ ko teliw nem e gubin ngiyal’ ni yad ma beeg e thin ni bay u lan fare Babyor nib Thothup, machane der yib angin ngorad e n’en yad ma beeg. I tamilangnag Jesus dalip e kanawo’ nda i yib angin e thin ni bay u lan e Babyor nib Thothup riy ngak e pi pumoon ney. Thin ni yog ngorad e ra ayuwegdad ni ngad mon’oggad u (1) rogon ni gad be nang fan e n’en gad ma beeg, (2) rogon ni gad ma gay boch ban’en u lan e Thin rok Got nrayog ni ngad filed ban’en riy, nge (3) rogon ni gad ma pag e Thin rok Got ni nge yal’uwegdad.

4. Mang e be fil e Luke 10:25-29 ngodad u murung’agen e Thin rok Got ni gad ma beeg?

⁴ Gad baadag ni ngad nanged fan e n’en gad ma beeg u lan e Thin rok Got, ya ra danga’ ma dabiyog ni ngari yib angin ngodad. Am lemnag e n’en ni weliy Jesus nge “be’ ni ir reb e tamachib ko Motochiyel.” (Mu beeg e Luke 10:25-29.) Nap’an ni fith ko mang e ba t’uf ni nge rin’ ya nge yag e yafos ndariy n’umngin nap’an ngak, me pow’iy Jesus nga lan e Thin rok Got ni aram e fith ngak ni gaar: “Mang e ke yog e babyor nib thothup? Ba uw rogon ni kam beeg?” I yag ni nge pi’ facha’ e fulweg nib puluw ko fare deer ni aram e sul u daken e n’en be yog fare babyor nib thothup u murung’agen rogon ni nge t’uf Got rom nge en nib migid ngom. (Lev. 19:18; Deut. 6:5) Machane mu tay fanam i yan ko n’en ni yog ni migid ni gaar: “Mini’ e en ni ir e mmigid ngog?” I tamilang ko thin rok e re pumoon ney ndawori tamilang u wan’ fan e n’en ke beeg. Bochan e re n’ey, ma de nang rogon ni nge fol riy.

5. Faan gad ra meybil ma gad beeg e Bible rodad nib sagaal, ma uw rogon nra ayuwegdad ni nge tamilang boch fan u wan’dad e n’en gad be beeg?

⁵ Rayog ni nge tamilang boch fan e Thin rok Got u wan’dad ni faan gad ra guy rogon ni ngad mon’oggad u rogon ni gad ma beeg e babyor. Baaray boch ban’en nrayog ni nge ayuwegem. Mmeybil u m’on ni ngam tabab. Ba t’uf ni nge ayuwegdad Jehovah ni ngad nanged fan e n’en ni bay u Bible, ere rayog ni ngad ninged gelngin nib thothup ni nge ayuwegdad ni ngad tedan’dad ko n’en gad be beeg. Tomuren ma gad beeg nib sagaal. Re n’ey e ra ayuwegem ni ngam nang fan e n’en ga be beeg. Sana ka ga ra guy nib fel’ ni ngam beeg fapi thin nib ga’ lamam ara mmotoyil ko audio recording riy ma ga be yaliy u Bible rom. Ga ra rung’ag e n’en ga be beeg, ma rayog ni nge ayuwegem ni ngam nang fan e n’en ga be beeg u lan e Thin rok Got, me par u lanin’um, mu kum fil ban’en riy. (Josh. 1:8) Nap’an ni ga ra mu’ i beeg e Bible rom, mu kum meybil ngak Jehovah bayay ngam pining e magar ngak ko Thin rok ni ke pi’ nib tow’ath, mu ku mog ngak ni nge ayuwegem ni ngam fol ko n’en kam beeg.

6. Faan ga ra lemnag boch e deer mag yoloy boch ban’en nga but’, ma uw rogon nra ayuwegem u nap’an ni ga be beeg e Bible? (Kum guy e sasing.)

⁶ Baaray l’agruw ban’en nra ayuwegem ni nge tamilang boch fan e thin nu Bible u wan’um. Mu lemnag boch e deer ni bay rogon ko n’en ga be beeg. Nap’an ni ga be beeg bang u Bible, mag fithem ni nge lungum: ‘Mini’ e piin yibe weliy murung’agrad? Mini’ e be non? Mini’ e be non ngak, ma mang fan? Uw e be buch e re n’ey riy, ma  mingiyal’ e be buch?’ Pi deer ney e ra ayuwegem ni ngam lemnag e n’en ga be beeg mu kum nang e tin nib ga’ fan riy. Kum yoloy boch ban’en nga but’ u nap’an ni ga be beeg e Bible. Ga ra yoloy nga but’ e n’en kam beeg, ma aram e rayog ni ngam lemnag fapi n’em ma re n’ey e ra ayuwegem ni nge tamilang boch fan u wan’um e n’en ga be beeg. Ka ga ra yoloy nga but’ e n’en kam beeg ma ra ayuwegem ndab mu pagtalin. Rayog ni ngam yoloy boch e deer nga but’, ara n’en kam pirieg u nap’an ni ga be gay murung’agen ban’en, ara boch ban’en nib ga’ fan, ara rogon nrayog ni ngam fanay e n’en kam beeg, ara rogon fapi n’em u wan’um. Sana ga ra pirieg ni faan ga ra yoloy e pi n’ey nga but’, ma rayog ni nge ayuwegem ni ngaum tay e Bible ni aram e thin rok Got ni fan ngom.

7. Mang fel’ngin e ba t’uf ni nge yag ngodad u nap’an ni gad be beeg e Bible, ma mang fan? (Matthew 24:15)

⁷ I weliy Jesus murung’agen reb e fel’ngin nib ga’ fan ni nge yag ngodad ni faanra ngad nanged fan e n’en gad be beeg u lan e Thin rok Got. Re n’ey e aram e tamilangan’. (Mu beeg e Matthew 24:15.) Uw rogon be’ nib tamilangan’? Be’ nib tamilangan’ e ke nang rogon nib peth reb e ban’en nga reb, nge rogon nib thil reb e ban’en nga reb, maku rayog rok ni nge nang fan boch ban’en ni gathi rib tamilang rogon ni kan weliy. Ki tamilangnag Jesus nib t’uf e tamilangan’ rodad ya nge yag nda nanged boch ban’en ni be buch ni be lebguy e pi yiiy u Bible. Kub t’uf e re fel’ngin ney rodad ya nge yag ni ngari yib angin ngodad urngin ban’en ni gad be beeg u Bible.

8. Uw rogon ni ngad beeged e Bible u fithik’ e tamilangan’?

⁸ Ma pi’ Jehovah e tamilangan’ ko pi tapigpig rok. Ere mmeybil ma gog ngak ni nge ayuwegem ni ngam maruweliy e re fel’ngin ney. (Prov. 2:6) Uw rogon ni ngam ngongol nib puluw ko n’en ga be yibilay? Mu fal’eg i yaliy e n’en ga be beeg, mag guy rogon nib peth nga boch ban’en ni ga manang. Mu fanay boch e babyor rodad ni bod fare Research Guide for Jehovah’s Witnesses ni nge ayuwegem. Yu ke babyor ney e ra ayuwegem ni ngam nang fan boch e thin nu Bible mu kum nang  rogon ni ngam fol riy. (Heb. 5:14) Ga ra beeg e Bible u fithik’ e tamilangan’, ma aram e rayog ni nge yoor ban’en riy nim nang fan.

9. Mang reb e machib ni bay u lan e Babyor nib Thothup nib ga’ fan nde tiyan’ e pi Sadduse ngay?

⁹ Pi Sadduse e ri yad manang e n’en bay u lan fa lal ken nsom’on e babyor ko Bible nni Yoloy Nsom’on ni Thin ni Hebrew, machane bay boch ban’en riy nib ga’ fan ndar tedan’rad ngay. Am lemnag e n’en ni yog Jesus u nap’an nra fithed ngak murung’agen e fos ko yam’. I fithrad ni gaar: “Kaam beeged fa dawor u lan e babyor ku Moses ko fa gin’em ni ba’ fare thal i yol riy ni murung’agen fachi ke gek’iy ni be daramram? Ya ba’ riy ni gaar Got ngak Moses, I gag e Got rok Abraham, nge Got rok Isak, nge Got rok Jakob.” (Mark 12:18, 26) Yugu aram rogon ni boor yay ni kar beeged e re thin ney, machane ba tamilang ko deer ni fith Jesus ngorad ni bay reb e machib u lan e Babyor nib Thothup nib ga’ fan ndar tedan’rad ngay, ni aram fare machib ni murung’agen e fos ko yam’.​—Mark 12:27; Luke 20:38. d

10. Mang e susun ni ngad tedan’dad ngay u nap’an ni gad be beeg e Bible?

¹⁰ Mang e rayog ni ngad filed ko re n’ey? Nap’an ni gad be beeg e Bible, ma gad baadag ni ngad tedan’dad nga urngin ban’en nrayog ni ngad filed riy. Gathi kemus ni gad baadag ni ngad nanged e pi kenggin e machib riy, ya ku gad baadag ni ngad pirieged boch ban’en nib riyul’ nge boch i kenggin e motochiyel nde gagiyel.

11. Uw rogon nrayog ni ngam pirieg boch ban’en nrayog ni ngam fil ban’en riy u Bible nrogon nib puluw ko 2 Timothy 3:16, 17?

¹¹ Uw rogon nrayog ni ngam pirieg boch ban’en nrayog ni ngam fil ban’en riy u nap’an ni ga be beeg e Bible? Am lemnag e n’en be yog e 2 Timothy 3:16, 17. (Mu beeg.) Be yog e re thin ney ni “urngin e thin ni bay u lan e babyor nib thothup . . . e ba ga’ fan” ya (1) ma fil e tin nib riyul’ ngodad, (2) ma yal’uwegdad, (3) ma fulwegdad ko ngongol nib fel’, ma (4) ma fonownagdad. Rayog ni nge ayuwegem e re aningeg i n’ey ni yugu aram rogon ni ga be beeg boch e babyor ko Bible ni gathi ri ga ma beeg. Mu fal’eg i yaliy fare thin nu Bible mag guy e n’en be fil ngom u murung’agen Jehovah, ara n’en nib m’agan’ ngay, ara pi kenggin e motochiyel rok. Mu lemnag rogon nrayog ni nge yal’uwegem, ni aram e ngam guy rogon ni be ayuwegem e pi thin nem ni ngam nang mag siyeg boch e lem nde puluw mag par ni gab yul’yul’ ngak Jehovah. Mu fal’eg i yaliy rogon nrayog ni ngam fanay fare thin ni ngam fulweg be’ ko bin nib puluw e machib. Bod nrayog ni ngam lemnag rogon nrayog ni ngam fanay e re thin nem ni ngam yal’uweg e lem rok be’ ni ke yog ban’en nde puluw u nap’an e machib. Kum gay boch e fonow ko re thin nem nra ayuwegem ni ngaum lem ni bod Jehovah. Ra um lemnag e re aningeg i n’ey, ma ra ayuwegem ni ngam pirieg boch ban’en nrayog ni ngam fil ban’en riy nra ayuwegem ni nge yib angin ngom e beeg Bible ni ga ma tay.

12. Mang fan ni fith Jesus e pi Farise ni gaar, “Dawor mbeeged?”

¹² Ki fith Jesus fare deer ni be gaar, “Dawor mbeeged?” ni fan e nge tamilangnag nde puluw rogon e lem rok e pi Farise u murung’agen e n’en ni yad be beeg u lan e Babyor nib Thothup. (Matt. 12:1-7) e Ngiyal’ nem e be yog e pi Farise ni ke th’ab pi gachalpen Jesus e motochiyel ko Sabbath. I weliy Jesus l’agruw ban’en ni bay murung’agen u lan e Babyor nib Thothup me sul u daken ba thin ni bay ko Hosea ni nge dag nde nang e pi Farise fan ni kan ngongliy fare motochiyel ko Sabbath, ma darur daged e runguy ko girdi’. Mang fan nda i pag e pi pumoon ney e n’en ur beeged u lan e Thin rok Got ni nge yal’uwegrad? Bochan nib tolangan’rad ma ur beeged e thin rok Got ni yad be guy rogon ni ngar pirieged ban’en riy nrayog ni ngar fanayed ni ngaur gathibthibnaged e girdi’. Bochan e re n’ey, ma aram fan nde yag ni ngaur nanged fan e n’en ni yad be beeg.​—Matt. 23:23; John 5:39, 40.

13. Susun nge uw rogon e lem rodad u nap’an ni gad be beeg e Bible, ma mang fan?

¹³ Gad be fil ko n’en ni yog Jesus nib t’uf ni nge puluw e lem rodad u nap’an ni gad be beeg e Bible. Dab da boded e pi Farise, ya thingar da sobut’naged lanin’dad me m’agan’dad ngay ni ngan fil ban’en ngodad. Thingar da “munguynaged lanin’dad nge m’agan’dad ko thin rok ni ke yung nga lanin’dad.” (Jas. 1:21, NW) Faanra ba munguy lanin’dad, ma aram e gad ra pag e Thin rok Got ni nge rich nga gum’ircha’dad. Faan gad ra sobut’nag lanin’dad ma dab ud beeged e Bible ni gad be guy rogon ni ngad pirieged ban’en riy nrayog ni ngad fanayed ni ngaud gathibthibnaged e girdi’, ma aram e rayog ni ngad paged e pi n’en kad filed riy u murung’agen e runguy nge t’ufeg ni nge thilyeg e ngongol rodad.

14. Uw rogon nrayog ni ngad nanged ko gad be pag e Thin rok Got ni nge yal’uwegdad fa danga’? (Kum guy fa gal sasing.)

¹⁴ Rogon e ngongol rodad ko girdi’ e rayog ni nge m’ug riy ko gad be pag e Thin rok Got ni nge  yal’uwegdad fa danga’. Bochan nda i pag e pi Farise e Thin rok Got ni nge rich nga gum’ircha’rad, ma aram fan ni ur “turguyed e kireb nga daken bogi ni’ ndar kirebgad.” (Matt. 12:7) Ere ku arrogodad nrogon ni gad ma lemnag e girdi’ nge rogon e ngongol rodad ngorad e be m’ug riy ko gad be pag e Thin rok Got ni nge yal’uwegdad fa danga’. Bod nib ga’ ni gad ma weliy fel’ngin yugu boch e girdi’, fa ba’ ga ni yigoo thibngirad e gad ma weliy murung’agen? Gad ma runguy e girdi’ mab mom ni gad ma n’ag fan e kireb rorad, fa gad ma gathibthibnagrad mad pared ni gad ba damumuw ngorad u nap’an ni yad ra rin’ ban’en ndubdad? Fulweg rodad ko gal deer ney e ra m’ug riy ko gad be pag e n’en gad be beeg ni nge yal’uweg rogon e lem nge ngongol rodad fa danga’.​—1 Tim. 4:12, 15; Heb. 4:12.

15. Uw rogon u wan’ Jesus e thin u lan fare Babyor nib Thothup?

¹⁵ Ba ga’ fan e thin u lan fare Babyor nib Thothup u wan’ Jesus, ma kan yiiynag rogon e thin rok Got u wan’ ko Psalm 40:8 ni kan gaar: “Got rog, ri gub adag ni nggu rin’ e tin nib m’agan’um ngay! Thin rom e be par u fithik’ i lanin’ug.” Bochan e re n’ey, ma aram fan ni i par nib felfelan’ ma be ulul ko pigpig ni i tay ngak Jehovah. Ku arrogodad ni faanra ud beeged e Thin rok Got me ga’ fan u wan’dad, ma aram e rayog ni ngad pared ni gad ba felfelan’ mu kud ululgad ko pigpig ni gad be tay ngak Jehovah.​—Ps. 1:1-3.

16. Mang e ga ra rin’ ya nge yag ni ngari yib angin ngom e beeg Bible ni ga ma tay? (Mu guy fare kahol ni kenggin e “ Rayog ni Nge Ayuwegem e Thin rok Jesus ni Ngam Nang Fan e N’en Ga Be Beeg.”)

¹⁶ Ere ngad mon’oggad ko beeg Bible ni gad ma tay nrogon nib puluw ko n’en ni yog Jesus nge n’en ni i rin’. Rayog ni nge tamilang boch fan e Thin rok Got u wan’dad ni faan gad ra meybil, ma gad beeg nib sagaal, ma gad lemnag boch e deer, ma gad yoloy boch ban’en nga but’. Rayog ni ngad fanayed e tamilangan’ ni bay rodad ni aram e ngad fanayed boch e babyor nib puluw e thin riy ko Bible ni ngad fal’eged i yaliy e n’en gad be beeg. Rayog ni ngad filed rogon ni ngad mon’oggad u rogon ni gad ma fanay e thin nu Bible nib muun ngay boch e thin ni gathi ri gad ma beeg ni aram e ngad gayed boch ban’en ko pi thin ney nrayog ni ngad filed ban’en riy. Ku rayog ni ngad paged e Thin rok Got ni nge yal’uwegdad ni aram e ngad guyed rogon ni nge puluw e lem rodad u nap’an ni gad be beeg. Faan gad ra rin’ e pi n’ey, ma aram e rayog ni ngari yib angin ngodad e beeg Bible ni gad ma tay me gel e chugur ko tha’ u thildad Jehovah.​—Ps. 119:17, 18; Jas. 4:8.