1. Uw feni ga’ fan e yafos rodad u wan’ Jehovah?

 MU SUSUNNAG ni ke pi’ ba fager rom reb e naun ngom ni ngam par riy. Bay yu yang ko fare naun ni ke mulmul e maachaw riy ma be lul’. Yugu aram rogon, ma re naun nem e yira pi’ nchuway’ ma bokum milyon e dolla nra yag riy. Ere ba mudugil nra ga’ fan e re naun ney u wan’um ma ra um ayuweg. Ku arrogon ni bay reb e tow’ath nrib tolang puluwon ni ke pi’ Jehovah ngodad ni aram e yafos rodad. Bin riyul’ riy e, ke dag Jehovah feni ga’ fan e yafos rodad u wan’ ni aram e ke pi’ Fak ni nge biyuliydad.​—John 3:16.

2. Mang e baadag Jehovah ni ngad rin’ed nrogon ni be yog e 2 Korinth 7:1?

² Jehovah e ir Enggin gubin e yafos. (Ps. 36:9) Ku ireray e n’en ni yog apostal Paul u nap’an ni gaar: “Fithik’ Got e gadad be par riy ma gadad be mithmith riy ma gadad ba’ riy.” (Acts 17:25, 28) Ere ba puluw ni nga dogned ni yafos rodad e ba tow’ath ni ke yib rok Got. Ma pi’ e tin nib t’uf rodad ya nge yag nda pared ni gad ba fos. (Acts 14:15-17) Machane der ma taydad Jehovah ni gad ba fos u daken e maang’ang. Ya baadag ni ngad rin’ed urngin e tin nrayog rodad ni ngad pared nib fel’ fithik’ i dowdad ma gad ulul ko pigpig ni gad be tay ngak. (Mu beeg e 2 Korinth 7:1.) Ere mang fan nsusun e ngad rin’ed urngin e tin nrayog rodad ni ngad pared nib fel’ fithik’ i dowdad ma gad ba fos, ma uw rogon nrayog ni ngad rin’ed e re n’ey?

3. Mang reb i fan nsusun e ngad guyed rogon ni ngad pared nib fel’ fithik’ i dowdad?

³ Reb i fan nsusun e ngad guyed rogon ni ngad pared nib fel’ fithik’ i dowdad e bochan ni aram rogon nrayog ni ngad pigpiggad ngak Jehovah nib fel’ rogon. (Mark 12:30) Gad baadag ni ngad ‘manged maligach nib fos ngak Got, ni kad pied gadad ko maruwel  rok ma gad ba fel’ u wan’.’ Ere aram fan ndarud rin’ed boch ban’en ni gad manang nra k’aring e m’ar ngodad. (Rom. 12:1) Riyul’ ndemtrug e n’en gad ra rin’ ni ngad pared nib fel’ fithik’ i dowdad, ma ka rayog ni ngad m’argad. Machane gad ma rin’ e tin nrayog rodad ni ngad pared nib fel’ fithik’ i dowdad ni bochan e gad baadag ni ngad daged ngak e Chitamangidad ni bay u tharmiy nib ga’ fan u wan’dad e yafos rodad ni ke pi’ nib tow’ath.

4. Mang e baadag David ni Pilung ni nge rin’?

⁴ I weliy David ni Pilung fan nib ga’ fan u wan’ e yafos ni ke pi’ Got nib tow’ath u nap’an ni gaar: “Mang e rayog ngom ko yam’ ni gu ra tay? Mang e ra fel’ ngom ni faan gu ra yan nga low? Gur rayog ni nge pining e piin kar m’ad e sorok ngom? Rayog nra weliyed fanam gol ndar ma yoyowol?” (Ps. 30:9, BT) Rayog ni yoloy David e pi thin ney u nap’an ni ke chugur nga tungun e yafos rok. Yugu aram rogon, ma baadag ni nge par nib fos mab fel’ fithik’ i dow u n’umngin nap’an nrayog rok ya nge yag ni ulul ko pigpig ni be tay ngak Jehovah. Dariy e maruwar riy ni gad gubin ni ku ireray e n’en gad baadag ni ngad rin’ed.

5. Mang e rayog ni ngad rin’ed ni yugu demtrug fadad pilibthir nge fadad m’ar?

⁵ Nap’an ni gad ra m’ar ara kad pilibthirgad, ma rayog ni boor ban’en ni ud rin’ed kafram ndabkiyog ni ngad rin’ed. Ere rayog ni nga i kankanan’dad mi i kireban’dad. Machane susun e dabi mulan’dad nge dab kud ayuweged fithik’ i dowdad. Mang fan? Ya demtrug fadad pilibthir nge fadad m’ar ma ka rayog ni ngad pininged e sorok ngak Jehovah ni bod ni rin’ David ni Pilung. Ri ma yib e athamgil nga lanin’dad ni kad nanged nrib ga’ fadad u wan’ e Got rodad ni yugu aram rogon ndawor da flontgad! (Matt. 10:29-31) Mus ni faanra kad m’ad, ma baadag ni nge fasegdad ko yam’. (Job 14:14, 15) Machane chiney ni ka gad ba fos e gad baadag ni ngad rin’ed e tin nrayog rodad ni ngad ayuweged fithik’ i dowdad nge yafos rodad.

6. Mang e baadag Jehovah ni ngad rin’ed ni bay rogon ko abich nge garbod ni gad ma tay?

⁶ Yugu aram rogon ni Bible e gathi ba ke babyor ni be weliy rogon ni ngaum ayuweg fithik’ i dowam ara be yog e re miti ggan ni ngaum kay, machane boor ban’en ni kan weliy riy ni be yog ngodad rogon e gali n’ey u wan’ Jehovah. Bod ni be yog ni ngad paged e pi n’en ma “k’ar amith” ngodad nrayog ni nge kirebnag e dowef rodad. (Ekl. 11:10, BT) Be yog e Bible nib kireb e abich nge muun rrum nib pag rogon, ma gali n’ey e rayog ni nge k’aring e m’ar mu ku nim’ riy. (Prov. 23:20) Baadag Jehovah ni ngaud t’ared lanin’dad u nap’an ni gad be dugliy e re miti ggan ni ngaud ked, nge n’en gad be garbod ngay, nge urngin e pi n’ey ni gad be fek nga fithik’ i dowdad.​—1 Kor. 6:12; 9:25.

7. Uw rogon ni be ayuwegdad fare fonow ni bay ko Proverbs 2:11 ni ngad dugliyed boch ban’en nib manigil ni bay rogon nga fithik’ i dowdad?

⁷ Gad ra maruwel ko tamilangan’ ni bay rodad, ma aram e rayog ni ngad dugliyed boch ban’en nra m’ug riy nib ga’ fan u wan’dad e yafos rodad ni ke pi’ Got nib tow’ath. (Ps. 119:99, 100; mu beeg e Proverbs 2:11.) Bod ni gad ma gonopiy rogon e re miti ggan ni gad ma kay. Faanra bay ba mit e ggan ni gad baadag ni gad ma kay machane gad manang ni ma k’aring e m’ar ngodad, ma aram e gad ra guy rogon ndab kud ked. Ku ra m’ug riy nib tamilangan’dad ni faanra i gaman e mol rodad, ma gad be mithmith ni gubin ngiyal’, ma gad be guy rogon ni nga i par dowdad nge naun rodad nib beech.

8. Mang e be fil e Bible ngodad u murung’agen feni ga’ fan u wan’ Jehovah ni ngad pared ndabi buch ban’en rodad ni gad ra maad’ad riy?

⁸ I pi’ Jehovah boch e motochiyel ngak piyu Israel ni be weliy rogon ni ngar ayuweged yad ni nge dab ra maad’adgad u tabinaw ngu nap’an ni  yad be maruwel. (Ex. 21:28, 29; Deut. 22:8) Faanra thang be’ e fan rok be’ ni ke kal riy, ma rayog ni nge yib wenegan ngak. (Deut. 19:4, 5) Ku be yog e Motochiyel ni faanra bit be’ ngak be’ nib pin nib diyen nge buch ban’en rok fak u meyal ma yira gechignag. (Ex. 21:22, 23) Be tamilangnag e Bible ni baadag Jehovah ni ngad guyed rogon ndab da maad’adgad.

9. Mang e rayog ni ngad rin’ed ya nge dab da maad’adgad ara maad’ad yugu boch e girdi’? (Kum guy fapi sasing.)

⁹ Ra m’ug nib ga’ fan e yafos rodad u wan’dad ni ke pi’ Got nib tow’ath ni faan gad ra guy rogon ndab da maad’adgad u tabinaw ngu tabon e maruwel. Bod ni faanra ke t’uf ni ngad n’aged ban’en nib m’uth, ara ban’en ni bay e yub riy, ara ngad n’aged e falay, ma gad ma rin’ u reb e kanawo’ ndabi gafgownag yugu boch e girdi’, maku gad ma guy rogon ni ngad n’aged e pi n’ey nga bang ndabi pirieg e bitir. Gad ma kol ayuw u nap’an ni kad k’eged e nifiy, ngu nap’an ni gad be lith e ran ni gowel, ngu nap’an ni gad be fanay boch e talin e maruwel ni ma fanay e gamig, ma darud digeyed e pi n’ey u but’ ndariy be’ ni be yaliy. Darud koled e yap’ ko karrow ni faanra kad unumed e falay nra k’aring e chuchuw ngodad, ara ka ud unumed e alkul, ara de fel’ e mol rodad, maku darud yaliyed e cell phone rodad u nap’an ni gad be kol e yap’ ko karrow.

10. Mang e rayog ni ngad rin’ed u m’on ngu nap’an ni ke buch ban’en nrayog ni nge tay e yafos rodad nga thatharen e riya’?

¹⁰ Yu ngiyal’ e dabiyog ni ngad taleged boch ban’en ndabi buch nrayog ni nge tay e yafos rodad nga thatharen e riya’, ni bod boch ban’en ni ma buch ni yira gafgow riy, nge ba mit e m’ar ni ke garer, nge cham ni yibe tay. Machane nap’an nra buch boch ban’en ni aray rogon, ma aram e gad ma fol u nap’an ni yira yog ngodad ni ngad chuwgad ko gin gad ma par riy ara da folgad ko n’en ke yog e am ni ngan rin’, ya nge yag nda pared ndabi buch ban’en rodad ma gad palog ko gin bay e riya’ riy. (Rom. 13:1, 5-7) Bay boch ban’en ni ma buch ni bay e riya’ riy nrayog ni ngad fal’eged rogodad u m’on riy, ere susun e ngad folgad ko n’en ke yog e am ni ngad rin’ed nra ayuwegdad ni ngad fal’eged rogodad u m’on ni nge buch ban’en ni yira gafgow riy. Bod nsana ba t’uf ni ngad ted boch e ran nge ggan nga bang nib mo’maw’ ni nge kireb, nge boch ban’en nrayog ni ngad tafalaynaged e maad’ad ngay.

11. Mang e susun ni nge m’agan’dad ngay ni ngad rin’ed u nap’an ni ke garer ba mit e m’ar ko gin gad ma par riy nib mom ni nge af?

¹¹ Mang e susun ni ngad rin’ed ni faanra ke garer ba mit e m’ar ko gin gad ma par riy nib mom ni nge af? Susun e ngad folgad u boch e motochiyel ni ke ngongliy e am ni ngan fol riy ni bod ni ngaun luknag paay, ma dab kun chuchugur nga taabang, ma yibe upunguy langay, min par ndab ku nib nga fithik’ e girdi’ u nap’an ni kan m’ar. Gad ra rin’ e pi n’ey, ma aram e gad be dag nib ga’ fan u wan’dad e yafos rodad ni ke pi’ Got nib tow’ath.

12. Uw rogon ni be ayuwegdad fare kenggin e motochiyel ni bay ko Proverbs 14:15 ni ngad dugliyed e pi n’en ni ngad motoyilgad ngay u nap’an ni ke buch ban’en ni kan gafgow riy?

¹² Nap’an nra buch ban’en ni kan gafgow riy, ma bay yu ngiyal’ ni gad ma rung’ag boch ban’en ko news, ara pi fager rodad, ara piin buguli yoror rodad nde riyul’. Susun ni ngad motoyilgad ko tin nib puluw e thin ni be yib ko am nge pi togta ko bin “yug demtrug ban’en” ni ngad rung’aged me mich u wan’dad. (Mu beeg e Proverbs 14:15, BT.) Fare Ulung ni Ma Pow’iyey nge pi branch ofis e yad ma athamgil u rogon nrayog rorad ni ngar nanged e tin nib puluw u murung’agen ban’en ni ke buch u m’on ni ngar yarmiyed boch ban’en ni bay rogon ko muulung nge machib ni yibe tay. (Heb. 13:17) Ere faan gad ra fol ko pi yaram ney, ma aram e rayog ni ngad ayuweged gadad ndabi buch ban’en rodad nge yugu boch e girdi’. Re n’ey e ku ra fal’eg thin e ulung u wan’ e girdi’.​—1 Pet. 2:12.

13. Uw rogon ni gad ma dag nib ga’ fan u wan’dad e yafos rodad ni ke pi’ Got nib tow’ath u nap’an nra yib nga boch ban’en ni bay rogon ko racha’ ni yima fanay?

¹³ Boor e girdi’ ni yad manang ni Pi Mich Rok Jehovah e ba mich u wan’rad ni racha’ e ban’en nib thothup. Rogon ni gad ma fol ko motochiyel rok Jehovah u murung’agen e racha’ e aram e gad ma siyeg ndab ni pi’ e racha’ ngodad ngki mada’ ko ngiyal’ ni kad m’argad ara kad maad’adgad nib tomgin. (Acts 15:28, 29) Machane re n’ey e gathi be yip’ fan ni gad baadag ni ngad m’ad. Ya ba ga’ fan u wan’dad e yafos rodad ni ke pi’ Got nib tow’ath. Gad ma ning e ayuw ngak boch e togta nib m’agan’rad ngay ni ngar tafalaynaged gadad nib fel’ rogon u boch e kanawo’ nde t’uf ni ngan fanay e racha’ riy.

14. Mang e gad ra rin’ ma aram e sana dabi t’uf ni ngan seydad ara da uned ngab mit e tafalay ni ma un e girdi’ ngay ni ke yib ba mit e m’ar ngorad nib ubchiya’?

¹⁴ Faan gad ra ayuweg fithik’ i dowdad ni aram e ngad rin’ed e pi n’en kad weliyed u lan e re article ney, ma aram e sana dabi t’uf ni ngan seydad ara da uned ngab mit e tafalay ni ma un e girdi’ ngay ni ke yib ba mit e m’ar ngorad nib ubchiya’. Faanra gad be ayuweg fithik’ i dowdad, ma faanra ke t’uf ni ngan seydad ma rayog ni ngad golgad nib papey. Maku reb e faan gad ra chuweg  boch ban’en u tabinaw rodad ara tabon e maruwel rodad nrayog ni ngan maad’ad ngay ma gad be fol ko motochiyel u rogon e yan u karrow, ma aram e rayog ni nge dab da maad’adgad nib tomgin nib t’uf ni ngan seydad.

15. (a) Mang nib ga’ fan ni ngad guyed rogon ni nge fel’ rogon gubin ban’en u daken e gi rodad e babyor ko racha’? (Kum guy e sasing.) (b) Uw rogon nrayog ni ngad dugliyed boch ban’en nib fel’ rogon ni bay rogon ko racha’ ni yima fanay ko tafalay nrogon ni kan dag ko fare video?

¹⁵ Bochan nib ga’ fan u wan’dad e yafos rodad ni kan pi’ nib tow’ath, ma aram fan ni gad ma ngongliy bang fare babyor ngodad ni ka nog e durable power of attorney (advance health-care directive) ngay ma gubin ngiyal’ ni bay rodad. b Gi babyor ney e bay riy e n’en kad dugliyed u murung’agen e racha’ ni yima fanay nge boch e tafalay ni yima un ngay. Ba fel’ rogon gubin ban’en u daken e gi rom e babyor ko racha’, fa? Faanra ba t’uf ni ngam ngongliy bang ngom ara ba t’uf ni ngam thilyeg boch ban’en u daken e gi rom e babyor, ma dab mu son nge n’uw nap’an. Ba tamilang ni faan gad ra yoloy nga babyor rogon e tafalay ni gad baadag ni ngad uned ngay, ma aram e gad ra siyeg boch ban’en nrayog ni nge sagaalnag rogon e tafalay ni yibe tay ngodad. Re n’ey e ku ra ayuweg e pi togta nge kangof ndab ra tafalaynaged gadad, ara ra pied ba mit e falay ngodad nrayog ni ngad m’ad riy. c

16. Mang e rayog ni ngad rin’ed ni faanra gathi ri gad manang rogon ni ngad ngongliyed bang e babyor ko racha’ ngodad?

 ¹⁶ Demtrug fadad bitir ara rogon feni fel’ fithik’ i dowdad, ma gad gubin nrayog ni ngad maad’adgad ara da m’argad. (Jas. 4:14) Aram fan nib fel’ ni ngad ngongliyed bang e babyor ko racha’ ngodad. Faanra gathi ri ga manang rogon ni ngam ngongliy bang e gi babyor ney, mag ning e ayuw ko piin piilal u lan e ulung rom. Yad ma guy rogon ni ngar nanged rogon ni ngan ngongliy e re gi babyor ney, machane dab ra dugliyed e n’en ni ngam rin’ ya gur e ba milfan ngom ni ngam rin’ e re n’ey. (Gal. 6:4, 5) Machane rayog ni ngar ayuweged gur u rogon ni ngam ngongliy e gi rom e babyor.

17. Uw rogon ni ngad daged nib puluw rogon ni gad ma lemnag rarogon fithik’ i dowdad?

¹⁷ Boor ban’en ni gad ma dugliy ni bay rogon nga fithik’ i dowdad nge rogon e tafalay ni gad ma un ngay ni be tor nga daken e nangan’ rodad ni kan skulnag ko thin nu Bible. (Acts 24:16; 1 Tim. 3:9) Nap’an ni gad be dugliy e n’en ngad rin’ed ngu nap’an ni gad be weliy ko girdi’ e n’en kad dugliyed, mab fel’ ni ngad folgad ko fare kenggin e motochiyel ni bay ko Filippi 4:5 (NW) ni be gaar: “Mu daged ngak urngin e girdi’ nib puluw rogon ni gimed ma lemnag boch ban’en.” Faanra ba puluw rogon ni gad ma lemnag boch ban’en ma aram e dab da lemnaged rarogon fithik’ i dowdad nge pag rogon ara da towasariyed yugu boch e girdi’ ni ngar lemgad ni bod gadad. Mus ni faanra ba thil e n’en ke dugliy pi walagdad, ma ka gad ma t’ufegrad ma gad ma tay farad.​—Rom. 14:10-12.

18. Uw rogon ni ngad daged ni gad be pining e magar ko yafos rodad ni kan pi’ nib tow’ath?

¹⁸ Gad ma dag ni gad be pining e magar ngak Jehovah ni ir Enggin gubin e yafos u rogon ni gad ma ayuweg e yafos rodad ma gad be pi’ e tin th’abi fel’ rodad ngak. (Rev. 4:11) Chiney e ka gad ma m’ar maku gad ma mada’nag e gafgow. Machane gathi aray rogon ni baadag e En ni Sunmiydad ni ngad pared. Dabki n’uw nap’an ma ra pi’ e yafos ndariy n’umngin nap’an ngodad ndakuriy e amith nge yam’ riy. (Rev. 21:4) Machane chiney ni ka gad be sonnag e re ngiyal’ i n’em e ri gad ba felfelan’ ni ka gad be par ni gad ba fos, ma gad be pigpig ngak Jehovah ni Chitamangidad ni bay u tharmiy ni gad ba t’uf rok!