1. Mang e rin’ ba welthin nni pi’ u nap’an reb e convention nni tay ko duw ni 1935 ngak be’ nib pagel?

KA FINI gaman 18 e duw ko re pagel nem u nap’an nni taufenag ko duw ni 1926. Gallabthir rok e yow l’agruw e Piin Ma Fil e Bible. Aram fithingan e Pi Mich Rok Jehovah ni un pining e ngiyal’ nem. Gali cha’ney e dalip e pagel ni fakrow nge l’agruw e ppin, mar filew ngorad ni ngar pigpiggad ngak Jehovah Got mar folwokgad rok Jesus Kristus. Re pagel ney ni ir be’ nib yul’yul’ e ma kay e flowa me unum e wain u gubin e duw u nap’an fare Abich ni Blayal’ rok Somol ni bod rogon ni i rin’ e tin ka bay e Piin Ma Fil e Bible e ngiyal’ nem. Machane, nap’an ni rung’ag ba welthin nni pi’ ni thin ni Meriken ni kenggin e “Fare Ulung nib Ga’,” ma aram mi ri thil rogon e athap rok ko pi n’en ni bay nga m’on. Re welthin ney e pi’ J. F. Rutherford u nap’an ba convention nni tay u Washington, D.C. u Meriken ko duw ni 1935. Mang e ni tamilangnag u nap’an e re convention nem?

2. Mang reb e ban’en nib riyul’ ni tamilangnag Brother Rutherford ko welthin rok?

² Nap’an e re welthin nem ni pi’ Brother Rutherford, me weliy ko mini’ fare ulung nib ga’ ara fapi girdi’ ni “ke muulung ni pire’ ni pire’” ni kan weliy murung’agrad ko Revelation 7:9. U m’on riy ngki yib i taw ko ngiyal’ nem, ma un lemnag ni fare ulung nib ga’ e aram ba ulung i girdi’ ni yad ra un ko yan nga tharmiy machane gathi ri yad ba yul’yul’ ni bod rogon e piin kan dugliyrad. I fanay Brother Rutherford e Bible ni nge tamilangnag ni fare ulung nib ga’ e gathi kan mel’egrad ni ngar uned ko par u tharmiy, ya yad  yugu boch e saf * rok Kristus ni yad ra magey ni yad ba fos u tomuren “fare gafgow ni ba ga’” mar pared u fayleng ndariy n’umngin nap’an. (Rev. 7:14) I micheg Jesus ni gaar: “Ba’ yugu boch e saf ni saf rog, machane dar moyed u fithik’ e tiney e saf. Ere thingar kug fekrad i yib; ya bay ra metelgad nga lungug, mi yad peth ko tiney ngar pired mi yad taab ran’ i saf ma taabe’ e be gafaliyrad.” (John 10:16) Pi girdi’ ney ni yad bod e saf e aram e Pi Mich Rok Jehovah ni yad ba yul’yul’ ni yad be athapeg e yafos ni manemus u Paradis u fayleng. (Matt. 25:31-33, 46) Ere ngad weliyed rogon ni thil e yafos rok boor e girdi’ rok Jehovah u nap’an ni tamilang e re machib nu Bible ney u wan’rad, ni kub muun ngay e re walag ney ni kab pagel ni 18 e duw rok.​—Ps. 97:11; Prov. 4:18.

3-4. Nap’an fare convention nni tay ko duw ni 1935, ma mang e tamilang u wan’ bokum biyu’ e walag, ma mang fan?

³ Rib gel e felfelan’ nni tay ko re convention nem u nap’an ni gaar e en be pi’ e welthin ko girdi’: “Rayog ni nge sak’iy urngin e piin yad be athapeg ni ngar pared ndariy n’umngin nap’an u fayleng?” Bay reb e walag ni immoy u rom ni yog nib pag baley ko fare 20,000 i girdi’ ni ur moyed u rom e goo ra sak’iygad nga lang. Ngemu’ me gaar Brother Rutherford: “Am sapgad! Ireray fare ulung nib ga’!” Tomuren ma urngin e girdi’ ni ur moyed u rom nra tolulniged e felfelan’. Urngin e piin nra sak’iygad nga lang e ra nanged ndawor ni mel’egrad ni ngar uned ko yan nga tharmiy. Ra nanged ndawor ni dugliyrad nga gelngin Got nib thothup. Faani bin migid e rran nga tomuren, ma 840 e girdi’ nni taufenagrad ni kar manged boch e Pi Mich, ma yooren i yad e yad ba muun nga yugu boch e saf.

⁴ Tomuren e re welthin nem, ma fare pagel ni faan kan weliy murung’agen nge bokum biyu’ e walag e ra talgad nda kur ked e flowa mar unumed e wain u nap’an fare Abich ni Blayal’ rok Somol. Bay reb e walag ni pumoon ni weliy u fithik’ e sobut’an’ rogon e lem rok boor e walag e ngiyal’ nem ni gaar: “Fare Puguran nni tay ko duw ni 1935 e aram e yay ntomur nug kay e flowa mug unum e wain. I tamilang u wan’ug ndawori fanay Jehovah gelngin nib thothup ni nge pi’ e bin baaram e athap ngog ko par u tharmiy, ya athap rog e nggu par u fayleng mug un i fal’eg e re fayleng ney nge mang paradis.” (Rom. 8:16, 17; 2 Kor. 1:21, 22) Ka aram nap’an i yib ni be yoor girdien fare ulung nib ga’ ma yad be maruwel e tin ka bay i girdien fachi ulung u taabang.

5. Uw rogon u wan’ Jehovah e piin kar talgad ndakurur ked e flowa mar unumed e wain u nap’an e Puguran?

⁵ Uw rogon u wan’ Jehovah e pi walag nra talgad nda kur ked e flowa mar unumed e wain u nap’an e Puguran u tomuren e duw ni 1935? Ma uw rogon ni faanra bay reb e Pi Mich e ngiyal’ ney ni kan taufenag ni be lemnag nsusun e nga i kay fare flowa me unum e wain u nap’an fare Abich ni Blayal’ rok Somol, machane me yan i boch nga tomuren me tamilang u wan’ ni gathi ir bagayad e piin kan dugliy nga gelngin Got nib thothup? (1 Kor. 11:28) Bay boch e girdi’ ni kar ked e flowa mar unumed e wain ni bochan e dawori tamilang u wan’rad e athap rorad. Machane faan yad ra tamilangnag ni kar olobochgad, mar talgad ndab kur rin’ed e re n’ey, mu kur ululgad ko pigpig ni yad be tay ngak Jehovah u fithik’ e yul’yul’, mab mudugil ni ku ra tayrad Jehovah ni yad ba muun nga yugu boch e saf. Yugu aram rogon ndakurur ked e flowa mar unumed e wain, machane ka yad be un ko fare Puguran ni bochan e rib ga’ fan u wan’rad e n’en ke rin’ Jehovah nge Jesus ni fan ngorad.

6. Mang e ke yog Jesus ngak e pi engel ni ngar rin’ed?

⁶ Bochan ni kari chugur fare gafgow nib ga’, mab fel’ ni ngad weliyed e n’en be yog e Revelation ko guruy ni 7 u murung’agen e pi Kristiano ni kan dugliyrad nge fare ulung nib ga’ ni yad yugu boch e saf. Ke yog Jesus ngak fapi engel ni ngar taleged fa aningeg i nifeng ko magothgoth. Thingar dab ra paged e re aningeg i nifeng nem ni nge yib nga daken e fayleng nge taw ko ngiyal’ ni kan tay e pow ngak urngin e pi Kristiano ni kan dugliyrad, ni aram e be yip’ fan ni ke dugliy Jehovah ni yad gubin ni kar pared ni yad ba yul’yul’ ngak. (Rev. 7:1-4) Bochan e yul’yul’ ni ke tay e pi walagen Kristus nem, ma aram e yira tow’athnagrad ni aram e ngar uned ngak ngar manged boch e pilung nge prist u tharmiy. (Rev. 20:6) Urngin e piin yad bang ko tabinaw rok Got u tharmiy e ri yad ra felfelan’ u nap’an ni yad ra guy e piin kan dugliyrad ni yad 144,000 u gubin ni ka ranod nga tharmiy ni aram e tow’ath rorad.

7. Mini’ e guy John u nap’an nni pilyeg e changar rok nrogon ni bay ko Revelation 7:9, 10, ma mang e yad be rin’? (Mu guy e sasing ni bay u wuru’ e re ke babyor ney.)

⁷ Tomuren ni weliy John murung’agen e pi pilung nge prist ney ni yad 144,000 u gubin, ma aram miki guy ban’en nrib gel e felfelan’ riy. I guy e “girdi’ ni ke muulung ni pire’ ni pire’” ni kar mageygad ni yad ba fos u nap’an e Armageddon. Re ulung ney e yad ba thil ko bin som’on e ulung ni bochan e yad boor ma dabiyog i theegrad. (Mu beeg e Revelation 7:9, 10.) “Ka ron’ed e mad nib wechwech” ni be dag ni kar pared nde ‘kirebnagrad’ e kireb ko re fayleng rok Satan ney, ma kur pared ni yad ba yul’yul’ ngak Got nge Kristus. (Jas. 1:27) Yad be non nib ga’ lamrad ni yad be yog ni kan ayuweg e yafos rorad ni bochan e n’en ke rin’ Jehovah nge Jesus ni fare Fak e Saf rok Got ni fan ngorad. Ku bay yuwan e fal’tir u pa’rad nre n’ey e be dag ni yad ba felfelan’ ngay ma ke m’agan’rad ngay ni Jesus e ir e en ke dugliy Jehovah ni nge mang Pilung.​—Mu taarebrogonnag ko John 12:12, 13.

8. Mang e be yog e Revelation 7:11, 12 ngodad u murung’agen chon e tabinaw rok Jehovah u tharmiy?

⁸ Mu beeg e Revelation 7:11, 12. Mang e rin’ e piin yad bay u tharmiy u nap’an nra guyed e re ulung nib ga’ ney? I guy John e piin yad bay u tharmiy ni kar ra felfelan’gad mar pininged e sorok ngak Got u nap’an nra guyed e re ulung nib ga’ ney. Rra felfelan’ chon e tabinaw rok Jehovah u tharmiy u nap’an ni yad ra guy ni ke lebug e re n’ey nni pilyeg e changar rok John nge guy ni aram e ke magey girdien fare ulung nib ga’ ni yad ba fos ma kar thapgad nga barba’ fare gafgow nib ga’.

9. Mang e be rin’ fare ulung nib ga’ e chiney nrogon ni bay ko Revelation 7:13-15?

⁹ Mu beeg e Revelation 7:13-15. I yoloy John ni girdien fare ulung nib ga’ e “kar lukniged e mad rorad kar wechwechniged nga rachaen fare Fak e Saf.” Re n’ey e be yip’ fan ni ke beech e nangan’ rorad ma kar fel’gad u wan’ Jehovah. (Isa. 1:18) Yad boch e Kristiano ni kar ognaged e yafos rorad ngak Jehovah kar uned ko taufe, ma rib mich fare maligach ni pi’ Jesus u wan’rad mab fel’ e tha’ u thilrad Jehovah. (John 3:36; 1 Pet. 3:21) Ere rayog ni ngar sak’iygad u m’on u tagil’ Got “ni yad be pigpig ngak ni rran nge nep’” u roy u fayleng. Mus ko ngiyal’ ney ni yad ba pasig ma yad e yad be rin’ e gin ga’ yang ko fare maruwel ni ngan machibnag murung’agen Gil’ilungun Got, min ayuweg e girdi’ ni ngar manged boch i gachalpen Jesus ni bochan e Gil’ilungun Got e aram e n’en th’abi ga’ fan u wan’rad.​—Matt. 6:33; 24:14; 28:19, 20.

10. Mang e ba pagan’ fare ulung nib ga’ ngay, ma mang reb e ban’en ni kan micheg ni yad ra guy ni ke lebug?

¹⁰ Girdien fare ulung nib ga’ ni yad ra magey ni yad ba fos u nap’an fare gafgow nib ga’ e ba pagan’rad ngay nra ulul Got nga i ayuwegrad ni bochan e “fa en ni ke par nga tagil’ e ir e ke yororiyrad ndabi buch ban’en rorad ni bochan e ba’ rorad.” Fare thin ni kan micheg ni ke n’uw nap’an ni be athapeg yugu boch e saf ni ngar guyed ni ke lebug e ra riyul’: “Bayi n’ag [Got] urngin e lu’ u owcherad. Ma aram e dab ku unim’, ma dab ki i  kireban’uy, ma dab ku un yor, ma dab ku un amith.”​—Rev. 21:3, 4.

11-12. (a) Mang boch e tow’ath ni bay nga m’on ni fan ngak fare ulung nib ga’ nrogon ni bay ko Revelation 7:16, 17? (b) Mang e rayog ni nge rin’ yugu boch e saf u nap’an fare Puguran, ma mang fan?

¹¹ Mu beeg e Revelation 7:16, 17. Chiney e bay boch e girdi’ rok Jehovah ni yad be yim’ ko bilig ni bochan e der gaman e salpiy rorad ni ngar chuw’iyed e ggan ngay, ara bochan boch e magawon ni be sum ko wagey ni be tay e girdi’ ko nam rorad, ara bochan e mahl ni yibe tay. Ku bay boch i yad ni kan kalbusnagrad ni bochan e michan’ rorad. Machane, ba felfelan’ girdien fare ulung nib ga’ ni bochan e yad manang nnap’an ni yad ra magey ni yad ba fos u tomuren ni kan thang e re fayleng nib kireb ney, ma gubin ngiyal’ ni yad ra par ni boor e ggan ni ngar ked maku be fonownagrad Jehovah. Nap’an yira thang e re m’ag rok Satan ney, ma ra thay girdien fare ulung nib ga’ ko damumuw rok Jehovah ni kan taarebrogonnag nga “gowelngin ban’en” ni yira yim’ riy. Nap’an nra mus fare gafgow nib ga’, ma piin kar mageygad ni yad ba fos u roy u fayleng e ra pow’iyrad Jesus ko “ran ko yafos [ni manemus].” Am lemnag e re n’ey: Rib manigil e athap ko piin yad bang ko fare ulung nib ga’. Yigoo yad u fithik’ bokum bilyon e girdi’ ni kar pared u roy u fayleng e rayog ni ngar pared ndab kur m’ad biid!​—John 11:26.

¹² Rib manigil e athap rok yugu boch e saf, ma ri yad be pining e magar ngak Jehovah nge Jesus ni bochan e re n’ey! Yugu aram rogon nde mel’egrad Jehovah ni ngar uned ko yan nga tharmiy, machane taareb rogon farad t’uf rok nga rogon feni t’uf rok e piin kan dugliyrad. Girdien e gal ulung ney e rayog ni ngar pininged e sorok ngak Got nge Kristus. Reb e kanawo’ ni yad ma rin’ e re n’ey riy e aram e yad ma un ko fare Abich ni Blayal’ rok Somol.

13-14. Mang fan nsusun e nge un urngin e girdi’ ko fare Puguran ko yam’ ni tay Kristus?

¹³ Nap’an e pi duw ni ka fini yan, ma sogonap’an 1 u fithik’ 1,000 e piin yad ma un ko fare Puguran e yad ma kay e flowa mar unumed e wain. Yooren e ulung e dariy be’ riy ni ma kay e flowa me unum e wain u nap’an e Puguran. Yooren e piin yad ma un ko fare Puguran e yad be athapeg e par u fayleng. Ere mang fan ni yad ma un ko fare Abich ni Blayal’ rok Somol? Taareb fan ni yad ma un ko re madnom ney nga fan ni ma un e girdi’ ko madnom ko m’agpa’ rok reb e fager rorad. Yad ma un ko fare madnom ni bochan e ngar daged nib t’uf rorad fagali cha’ ni ngar mabgolgow ma yad be tay langin e binem e  rran ni fan ngorow. Ere ku arrogon yugu boch e saf ni yad ma un ko fare Puguran ni bochan e yad baadag ni ngar daged nib t’uf Kristus rorad nge piin kan dugliyrad ma yad be ayuwegrad. Yugu boch e saf ni yad ma un ko re madnom ney e yad ma dag ni yad be pining e magar ko fare maligach ni pi’ Jesus, nre maligach ney e aram e n’en ke bing e kanawo’ ngorad nrayog ni ngar uned ko par u fayleng ndariy n’umngin nap’an.

¹⁴ Ku reb i fan nib ga’ fan ni ma un yugu boch e saf ko fare Puguran e bochan ni yad be fol ko n’en ni tay Jesus chilen. Nap’an ni tababnag Jesus fare Abich ni Blayal’ rok Somol ni yad e pi apostal rok ni yad ba yul’yul’ ngak, me gaar ngorad: “Um rin’ed ni aray rogon ngi i pugurag ngomed.” (1 Kor. 11:23-26) Ere n’umngin nap’an ni ka bay boch e piin kan dugliyrad u roy u fayleng ni ka yad ba fos, ma ra ulul yugu boch e saf ni ngar uned ko fare Abich ni Blayal’ rok Somol. Bin riyul’ riy e, yad ma pining urngin e girdi’ ni ngar uned ngorad i madnomnag fare Puguran.

15. Uw rogon ni ngad pininged e sorok ngak Got nge Kristus u nap’an fare Puguran?

¹⁵ Nap’an ni gad ra un ko fare Puguran, ma aram e rayog ni ngad pininged e sorok ngak Got nge Kristus u daken e tang nge meybil. Kenggin e welthin ni yira pi’ ko biney e duw e “Nge Ga’ Fan u Wan’um e N’en Ke Rin’ Got nge Kristus ni Fan Ngom!” Re welthin ney e rra ga’nag fan Jehovah nge Kristus u wan’dad. Nap’an yira pi’ fare flowa nge wain e rofen nem, ma gad gubin e piin kad uned ko re madnom nem e ra yib ngan’dad e n’en be yip’ fan e re flowa nge wain nem, ni aram e be yip’ fan downgin Jesus nge rachaen. Ra yib ngan’dad ni ke pag Jehovah Fak ni nge yim’ ni fan e ngki yag e yafos ngodad bayay. (Matt. 20:28) Urngin e piin nib t’uf rorad e Chitamangidad ni bay u tharmiy nge Fak e yad ra adag ni ngar uned ko fare Puguran.

16. Mang boch e kanawo’ ni taareb rogon e piin kan dugliyrad nge yugu boch e saf riy?

¹⁶ Bay boch e kanawo’ ni taareb rogon e piin kan dugliyrad nge yugu boch e saf riy. Gathi bay reb e gal ulung ney nrib t’uf rok Jehovah ma reb e gathi rib t’uf rok. L’agruw e gal ulung ney ni taareb feni ga’ fan u wan’. Bin riyul’ riy e, taab n’en e pi’ ni nge chuw’iy e piin kan dugliyrad nge yugu boch e saf. Re n’em e aram e yafos rok Fak nrib t’uf rok. N’en nib thil u thilin e gal ulung ney e athap rorad. Machane, yad gubin nthingar ra pared ni yad ba yul’yul’ ngak Got nge Kristus. (Ps. 31:23) Maku reb e, dab mu pagtalin nrayog ni nge maruwel gelngin Got nib thothup u dakendad ni taareb rogon. Re n’ey e be yip’ fan ni ma pi’ Jehovah gelngin nib thothup ngak be’ nge be’ ni be yan u rogon e n’en nib t’uf rok.

17. Mang e be athapeg e piin kan dugliyrad ni ka yad bay u fayleng?

¹⁷ Pi Kristiano ni kan dugliyrad e dan gargelegrad ni yad be athapeg e yan nga tharmiy. Ya Got e ir e ke pi’ e biney e athap ngorad. Yad ma lemnag e athap rorad, ma yad ma yibilay murung’agen,  maku yad be athapeg ni nge yag ngorad e tow’ath rorad ni aram e nga ranod nga tharmiy. Dar nanged rogon nra yan i par e dowef rorad u nap’an ni yad ra yan nga tharmiy. (Fil. 3:20, 21; 1 John 3:2) Yugu aram rogon, ma yad be athapeg ni nge taw ko ngiyal’ ni yad ra mada’ Jehovah, nge Jesus, nge pi engel, nge tin ka bay ko piin kan dugliyrad. Yad be athapeg ni ngar pared u taabang u Gil’ilungun Got u tharmiy.

18. Mang e be athapeg yugu boch e saf?

¹⁸ Yugu boch e saf e yad be athapeg ban’en nni sunmiy e girdi’ ni bay rorad, ni aram e ngar pared u fayleng ndariy n’umngin nap’an. Yad be athapeg ni nge taw ko ngiyal’ ni yira fal’eg e re fayleng ney nge mang paradis. Ri yad be yim’ ni bochan ni nge taw ko ngiyal’ nrayog ni ngar toyed e naun rorad, mar yunged e milay’ rorad, mar chuguliyed pi fakrad ni ke fel’ fithik’ i dowrad. (Isa. 65:21-23) Yad be athapeg ni nge taw ko ngiyal’ nrayog ni ngar milekaggad nga yu yang u fayleng ngar guyed e pi burey, nge lan e loway, nge day, mar filed murung’agen urngin ban’en ni ke sunmiy Jehovah. Machane bin th’abi fel’ riy e, yad ba felfelan’ ngay ni kar nanged nra taw ko ngiyal’ nem ma rra gel e chugur ko tha’ u thilrad Jehovah.

19. Mang e rayog ni nge bagadad me rin’ u nap’an fare Puguran? Wuin e yira tay e Puguran ko biney e duw?

¹⁹ Gubin e tapigpig rok Jehovah ni kar ognaged yad ngak nrib manigil e athap ni ke pi’ ni fan ngorad boch nga m’on. (Jer. 29:11) Fare Puguran ko yam’ ni tay Kristus e aram ba ngiyal’ nrayog ni nge bagadad me pining e sorok riy ngak Got nge Kristus ni bochan e n’en kar rin’ew ni fan ngodad ya nge yag e yafos ni manemus ngodad. Ere dariy e maruwar riy ni fare Puguran e aram e bin th’abi ga’ fan e muulung ni ma tay e tin riyul’ e Kristiano u gubin e duw. Biney e duw e yira tay u tomuren ni ke aw e yal’ ko Sabado ko March 27, 2021. Biney e duw e boor e girdi’ ni yad ra un ko re madnom ney ni yad ma par u boch e nam nib puf rogorad nrayog ni ngar uned ko re muulung ney. Ma boch e yad ra un ko re madnom ney ni yugu aram rogon ni yibe togopuluw ngorad. Ma boch e yad ra tay e re Puguran ney u kalbus. Ere yibe athapeg ni urngin e ulung nge girdi’ ma yad ra tay e re Puguran ney nrib fel’ rogon u nap’an ni be yaliydad Jehovah, nge Jesus, nge pi engel, nge piin kan dugliyrad ni ka ranod nga tharmiy!