1. Mang deer e rayog ni nge fith boch i gadad ni bod rogon David ni Pilung?

GAD gubin ni gad baadag ni ngad pared u fithik’ e gapas ndabi wagagey lanin’dad. Dariy be’ ni baadag ni nga i par ni be magafan’. Machane, bay yu ngiyal’ nrayog ni nga i magafan’dad nib gel. Bin riyul’ riy e, bay boch e tapigpig rok Jehovah nrayog ni ngar fithed fare deer ni fith David ni Pilung ngak Jehovah ni faani gaar: “Uw n’umngin nap’an nthingar gu lubeg e gafgow [“nthingari magafan’ug,” NW]? Uw n’umngin nap’an ni nge suguy e kireban’ lanin’ug ni rran nge nep’?”​—Ps. 13:2, BT.

2. Mang e gad ra weliy ko re article ney?

² Yugu aram rogon ndabiyog ni ngad pared ndab ki magafan’dad, machane bay boch ban’en nrayog ni ngad rin’ed ni nge war e magafan’ rodad. Re article ney e gad ra weliy riy boch ban’en nrayog ni nga i k’aring e magafan’ ngodad. Ngemu’ ma gad weliy nel’ ban’en nrayog ni ngad rin’ed nra ayuwegdad ni ngad pared nib gapas lanin’dad u nap’an ni kad mada’naged boch e magawon.

3. Mang boch ban’en ni ma buch ni ma k’aring e magafan’ ngodad? Rayog ni ngad taleged e pi n’ey ndab ki buch, fa?

³ Bay boch ban’en ni ma buch rodad ni ma k’aring e magafan’ ngodad ndabiyog ni ngad rin’ed ban’en ngay ni nge tal. Bod ndabiyog ni ngad gagiyegnaged tolngin puluwon e ggan, nge mad, nge naun ni be thilthil u gubin e duw. Ku dabiyog ni ngad gagiyegnaged urngin yay nra i guy e piin gadad nga skul ara girdi’ u tabon e maruwel rodad rogon ni ngar waliyed gadad ni ngaud bangad u boch ban’en ara da uned ko ngongol ndarngal. Ku dabiyog ni ngad taleged e girdi’ ko gin gad ma par riy ndab kur rin’ed boch e kireb nib togopuluw ko motochiyel ko am. Fan ni gad ma mada’nag e pi magawon ney e bochan ni gad be par u ba fayleng ni yooren e girdi’ riy e darur dugliyed boch ban’en nib puluw ko pi kenggin e motochiyel  u Bible. Satan ni ir e got ko re fayleng ney e manang ni bay boch e girdi’ ni yad ra pag e “magafan’ rorad” ko tin nu fayleng ban’en ni nge talegrad ndab ra pigpiggad ngak Jehovah. (Matt. 13:22; 1 John 5:19) Ere aram fan nib sug boor e magawon u lan e re fayleng ney ni ma k’aring e magafan’ ko girdi’!

4. Mang e rayog ni nge buch ni faanra yigi pag rogon e magafan’ rodad ko pi magawon ni gad be mada’nag?

⁴ Rayog ni nge pag rogon e magafan’ rodad ko pi magawon ni gad be mada’nag ndabkiyog ni ngad lemnaged yugu ban’en. Bod nrayog ni ngad pared ni be magafan’dad nga rogon ni ngad yognaged e salpiy nib gaman ni fan ko tin nib t’uf rodad, fa reb e i magafan’dad nri chey mad m’argad ndabkiyog ni nga darod ko maruwel, fa reb e nn’agdad ko maruwel ni bochan e re n’ey. Ku rayog ni nga i magafan’dad nri chey ma gad th’ab reb e motochiyel rok Got u nap’an ni keb e lumel ngodad. Dabki n’uw nap’an ma bayi k’aring Satan e piin yad bay u tan e gagiyeg rok ni ngar chamgad ko girdi’ rok Got, ere ku rayog ni nga i magafan’dad nga rogon e n’en gad ra rin’ u nap’an nra buch e re n’ey. Ere sana rayog ni nga i lungudad u wan’dad, ‘Gur, ba kireb ni nga i magafan’ug nga boch ban’en ni aray rogon?’

5. Mang e be yip’ Jesus fan u nap’an ni gaar: “Dabi magafan’med”?

⁵ Gad manang ni gaar Jesus ngak pi gachalpen: “Dabi magafan’med.” (Matt. 6:25) Ere gur, be yip’ Jesus fan u roy nsusun e dariy ban’en ni nga i magafan’dad ngay? Danga’! Ya bin riyul’ riy e, immoy boch e tapigpig rok Jehovah kakrom ni i magafan’rad, machane kur pared ni yad ba fel’ u wan’ Jehovah. * (1 Ki. 19:4; Ps. 6:3) Ere n’en be rin’ Jesus u roy e be guy rogon ni nge fal’eg lanin’dad, ya dabun ni nge pag rogon e magafan’ rodad nga rogon ni ngad yognaged e tin nib t’uf rodad, ma dab kud tedan’dad ko pigpig rodad ngak Got. Ere mang boch ban’en nrayog ni ngad rin’ed u nap’an ni ke magafan’dad?​—Mu guy fare kahol ni kenggin e “ Rogon ni Ngam Rin’.”

6. Mang e rayog ni nge pi’ e gapas nga lanin’dad nrogon ni bay ko Filippi 4:6, 7?

⁶ (1) Um par ni ga be meybil. Nap’an nra magafan’um nga reb e magawon, ma rayog ni ngam ning e ayuw ngak Jehovah u daken e meybil. (1 Pet. 5:7) Ma rayog ni nge fulweg Jehovah taban e meybil rom ni aram e nge pi’ e gapas rok ngom “ndabi chuchugur ni nge nang e girdi’ fan.” (Mu beeg e Filippi 4:6, 7.) Rayog ni nge pi’ Jehovah e gapas nga lanin’dad u daken gelngin nib thothup ni aram fare gelngin nth’abi gel.​—Gal. 5:22.

7. Mang e susun ndab da paged talin u nap’an ni gad be meybil ngak Got?

⁷ Nap’an ni ga ra meybil ngak Jehovah, ma ngam weliy ngak urngin ban’en ni bay u lanin’um. Mog e magawon rom ngak, mag weliy rogon lanin’um riy ngak. Faanra rayog ni nge puf fare magawon, mag ning e gonop rok ya nge yag nim nang e n’en ngam rin’ miki pi’ gelngim ni ngam rin’ e re n’em. Faanra dabiyog ni ngam pithig fare magawon, ma gog ngak Jehovah ni nge ayuwegem ni nge dabki magafan’um ngay nib pag rogon. Faan ga ra weliy e magawon rom ngak Jehovah nge rogon lanin’um riy u nap’an ni ga be meybil, ma aram e rayog ni ngam guy rogon nra fulweg taban e meybil rom. Dabi mulan’um ni faanra de fulweg taban e meybil rom nib papey. Gathi kemus ni baadag Jehovah ni ngam weliy e magawon rom ngak nge rogon lanin’um riy, ya ku baadag ni ngam ulul ni ngaum meybil ngak.​—Luke 11:8-10.

8. Mang e susun ni nga dogned u lan e meybil rodad?

⁸ Nap’an ni ga be weliy e pi magafan’ rom ngak Jehovah u daken e meybil, ma dab mu pagtalin ni ngkum pining e magar ngak. Ba fel’ ni ngad  lemnaged urngin e tin nib fel’ ban’en ni bay rodad ni mus ni faanra boor e magawon ni gad be mada’nag. Machane, mang e susun ni ngam rin’ ni faanra dam nang rogon ni ngam weliy rogon lanin’um ngak Jehovah? Dab mu pagtalin nra fulweg Jehovah taban e meybil rom ni mus ni faanra kemus ni n’en nrayog ni nga mog ngak e, ‘Wenig ngom mu ayuwegeg!’​—2 Kron. 18:31; Rom. 8:26.

9. Mang e susun ni ngad rin’ed u nap’an ni kad rusgad?

⁹ (2) Mu taga’ ko gonop rok Jehovah, ma gathi gonop rom. Nap’an Isaiah ni profet, me rus e girdi’ nu Judah ni bochan e be guy piyu Assyria rogon ni ngar chamgad ngorad. Bochan ndubrad ni nge gel piyu Assyria ngorad, ma aram mar man ayuwgad ngak piyu Egypt. (Isa. 30:1, 2) I yog Jehovah ngorad nib gel e gafgow ni yad ra tay ni bochan e ke pagan’rad ngak piyu Egypt. (Isa. 30:7, 12, 13) Ere yog Jehovah ko girdi’ rok u daken Isaiah rogon nrayog ni ngar pirieged e bin riyul’ e pagan’. I yog ngorad ni nge pagan’rad ngak Jehovah ‘mi yad par ndakir wagageyan’rad. Ma aram e yad ra par ni yad ba gel.’​—Isa. 30:15b.

10. Mang boch ban’en ni ma buch nrayog ni ngad daged riy ni be pagan’dad ngak Jehovah?

¹⁰ Uw rogon nrayog ni ngad daged ni be pagan’dad ngak Jehovah? Am lemnag boch e kanawo’ nrayog ni ngad rin’ed e re n’ey riy. Susun e kan ognag reb e maruwel ngom nib fel’ puluwon, machane ra ngam un ngay ma aram e thingar um maruwel ni boor e awa maku ra magawonnag e tin ga be rin’ ni fan ko pigpig rom ngak Jehovah. Fa reb e susun e bay reb e pumoon ara reb e ppin u tabon e maruwel rom ni baadag ni nge fel’ e thin romew, machane gathi ir reb e tapigpig rok Got ni ke un ko taufe. Fa reb e mang e ga ra rin’ ni faanra ke yog reb i girdien e tabinaw rom nib t’uf rom ni faanra ngam ulul ko pigpig ngak Jehovah, ma aram e ngam math’gow? Gubin e pi n’ey nib mo’maw’ rogon ni ngam dugliy e n’en ngam rin’ ngay, machane ra pi’ Jehovah ngom e n’en nib t’uf rom ni nge pow’iyem. (Matt. 6:33; 10:37; 1 Kor. 7:39) Machane deer ni bay e, Gur, ra pagan’um ngak Jehovah mag fol ko fonow rok, fa?

11. Mini’ boch e girdi’ nrayog ni ngad filed murung’agrad u Bible ya nge yag ni ayuwegdad ni ngad pared ni gad ba gapas u nap’an ni ke yib e togopuluw ngodad?

¹¹ (3) Mu fil ban’en rok e piin nra folgad nge piin dar folgad. Boor e girdi’ ni be weliy e Bible murung’agrad ni be tamilangnag feni ga’ fan ni ngad pared ni gad ba gapas me pagan’dad ngak Jehovah. Nap’an ni ga be fil e pi n’ey, mag tay fanam i yan ko n’en ni ayuweg e pi tapigpig rok Got ni ngar pared nib gapas lanin’rad u nap’an ni be togopuluw boch e girdi’ ngorad. Bod nnap’an ni yog e bin nib tolang e tagil’ e puf oloboch ko pi Jew ngak e pi apostal ndab kur machibgad, ma dar paged e re n’ey ni nge k’aring e marus ngorad. Ya ra nonad ndar rusgad ni lungurad: “Thingar gu folgad rok Got ko bin ni nggu folgad rok e girdi’.” (Acts 5:29) Mus nga tomuren nni toyrad, ma de wagagey lanin’rad. Mang fan? Bochan e yad manang ni be ayuwegrad Jehovah, ma yad ba fel’ u wan’. Ere kur ululgad i machibnag fare thin nib fel’. (Acts 5:40-42) Ku arrogon nnap’an ni yibe n’en ni ngan thang e fan rok Stephen nreb i gachalpen Jesus, me par nrib gapas ni yira guy owchen ma ke “bod rogon owchen ba engel.” (Acts 6:12-15) Mang fan? Bochan e manang ni be par nib fel’ u wan’ Jehovah.

12. Mang fan nrayog ni ngad felfelan’gad u nap’an yibe gafgownagdad nrogon ni bay ko 1 Peter 3:14 nge 4:14?

¹² Rib gagiyel e mich riy ni immoy Jehovah rok e pi apostal. Ke pi’ gelngirad ni ngar ngongliyed boch e maang’ang. (Acts 5:12-16; 6:8) Machane, gathi aram rogodad e ngiyal’ ney. Yugu aram rogon, ma be yog Jehovah ngodad u daken e Thin rok ni faanra yibe gafgownagdad ni bochan e gad be rin’ e tin nib mat’aw, mab felfelan’ ngodad ma bay gelngin ni be ayuwegdad. (Mu beeg e 1 Peter 3:14; 4:14.) Ere susun e dabi magafan’dad ko n’en ni ngad rin’ed ni faanra kan gafgownagdad boch nga m’on, ya susun e ngad athamgilgad u  rogon nrayog rodad ngad gelnaged e pagan’ rodad ngak Jehovah nra ayuwegdad me chuwegdad u fithik’ e gafgow. Thingar da folwokgad ko tin som’on i gachalpen Jesus ni aram e nge pagan’dad ko n’en ni micheg ni faani gaar: “Bay gu pi’ e thin ni nga mogned nge gonop romed ndariy reb e pi toogor romed nrayog rok ni nge togopluw ngay ara yog nde riyul’.” Ere ke micheg Jesus ngodad ni ke gaar: “Mpired ni gimed mmudugil, ya ereray rogon me yog e yafos ngomed.” (Luke 21:12-19) Maku reb e, dab mu pagtalin ni ki mada’ ko tin th’abi achig ban’en u rarogon e pi tapigpig rok Jehovah ni yad ba yul’yul’ ni kar m’ad ni ma tay u laniyan’. Bochan e re n’ey, ma aram fan nra fasegrad ko yam’.

13. Mang angin nra yib ngodad ni faan gad ra fil murung’agen boch e girdi’ ndar pared ni yad ba gapas me pagan’rad ngak Jehovah?

¹³ Ku rayog ni ngad filed ban’en ko n’en ni buch rok boch e girdi’ nde yag ni ngar pared nib gapas lanin’rad me pagan’rad ngak Jehovah. Faan gad ra fil murung’agen e pi girdi’ ney, ma ra ayuwegdad ni nge dab da rin’ed boch e oloboch ni bod ni buch rorad. Bod nu tabolngin e gagiyeg ni tay Asa ni Pilung nu Judah, me taga’ ngak Jehovah u nap’an ni yib barba’ i salthaw nib ga’ ni ngar chamgad ngak, ma aram me tow’athnag Jehovah ni aram e ayuweg ni nge gel ko re cham nem. (2 Kron. 14:9-12) Machane, boch nga tomuren u nap’an ni yib Baasha ni Pilung nu Israel ni nge cham ngak Asa ni ke un barba’ i salthaw ngak ni gathi rib ga’ ni bod ga’ngin e ba’ ni baaram e salthaw nra m’aged e mahl ngak ko som’on, ma aram me pi’ puluwon piyu Syria ni ngar ayuweged ko bin ni nge sap ngak Jehovah ni nge ayuweg ni bod rogon ni rin’ u m’on riy. (2 Kron. 16:1-3) Ku nap’an ni m’ar nrib ubchiya’, ma de taga’ ngak Jehovah ni nge ayuweg.​—2 Kron. 16:12.

14. Mang e rayog ni ngad filed ko oloboch ni rin’ Asa?

¹⁴ Som’on e i sap Asa ngak Jehovah u nap’an ni mada’nag e magawon. Machane boch nga tomuren ma de sap ngak e Got rok ni nge ayuweg, ya guy rogon ni nge pithig e magawon rok ni yigoo ir. Som’on e gowa bod ni yib angin e n’en ni rin’ Asa ni aram e ning e ayuw ngak piyu Syria ni ngar ayuweged ni nge cham ngak piyu Israel. Machane, de yag ni nge par nib gapas nib n’uw nap’an. I non Jehovah ngak u daken reb e profet ni gaar: “Bochan e fare pilung nu Syria e kam gif ngak ma gathi Somol ni Got rom, ma aram e ke mil rom fare raba’ i salthaw rok fare pilung nu Israel.” (2 Kron. 16:7, BT) Susun e ngad kol ayuwgad ndab da lemnaged nrayog ni ngad pithiged e magawon rodad ni goo gadad, ma dab dogned ngak Jehovah ni nge pow’iydad u daken e Thin rok. Mus ni faanra ba t’uf ni ngad dugliyed ban’en nib gur, ma susun e ngad pared ni gad ba gapas ma gad taga’ ngak Jehovah, ma aram e ra ayuwegdad ni ngad dugliyed ban’en nib fel’ rogon.

15. Mang e rayog ni ngad rin’ed u nap’an ni gad be beeg e Bible?

¹⁵ (4) Mu fil boch e thin nu Bible nge mit ngom. Nap’an ni ga ra beeg boch e thin nu Bible ni be tamilangnag feni ga’ fan ni ngam par nib gapas lanin’um me pagan’um ngak Jehovah, mag guy rogon ni ngam fil e pi thin nem nge mit ngom. N’en nrayog ni ngam rin’ e ngam beeg e pi thin nem nib ga’ lamam, ara mu yoloy nga but’ mu um sul ngaum beeg ni boor yay. I yog Jehovah ngak Joshua ni nga i beeg fare babyor ko Motochiyel ni gubin e rran nib ga’ laman ni fan e nge yag ni ngongol u fithik’ e gonop. N’en nra beeg u lan e Motochiyel e ku ra ayuweg ni nge dabi rus me par nib m’uthan’ u nap’an ni be pow’iy e girdi’ rok Got. (Josh. 1:8, 9) Boor e thin nu Bible nrayog ni nge ayuwegem ni nge gapas lanin’um u nap’an ni kam mada’nag boch ban’en ni be k’aring e magafan’ ara marus ngom.​—Ps. 27:1-3; Prov. 3:25, 26.

16. Uw rogon ni ma fanay Jehovah e ulung rok ni nge ayuwegdad ni ngad pared nib gapas lanin’dad ma be pagan’dad ngak?

¹⁶ (5) Um chag ko girdi’ rok Got. Ma fanay Jehovah  e pi walag ni ngar ayuweged gadad ni ngad pared nib gapas lanin’dad ma be pagan’dad ngak. Nap’an ni gad ra un ko muulung, ma ma yib angin ngodad e pi n’en gad ma rung’ag ko pi welthin ni yima pi’, nge fulweg ni ma pi’ e piin kar uned ko muulung, nge pi n’en ni gad ma weliy e pi walag u taabang ni ma pi’ e athamgil nga lanin’dad. (Heb. 10:24, 25) Ku rayog ni ngar ni pi’ e athamgil nga lanin’dad u nap’an ni gad ra weliy lanin’dad ngak e pi fager rodad u lan e ulung nib pagan’dad ngorad. “Thin nib fel’” ni ke yog reb e fager ngodad e rayog ni nge warnag e magafan’ rodad.​—Prov. 12:25, BT.

17. Uw rogon nrayog ni nge ayuwegdad e pi n’en gad be athapeg nra yibnag Gil’ilungun Got ni ngad pared nib gapas lanin’dad u nap’an ni kad mada’naged e magawon nrogon nib puluw ko Hebrews 6:19?

¹⁷ (6) Dabi maruwar e athap rom u wan’um. Pi n’en gad be athapeg nra yibnag Gil’ilungun Got e “ke mang angkar rok lanin’dad” ni be ayuwegdad ni ngad pared ni gad ba mudugil ni yugu aram rogon ni gad be mada’nag boch e magawon ara be magafan’dad. (Mu beeg e Hebrews 6:19.) Mu lemnag e pi n’en ke micheg Jehovah ni fan ngodad boch nga m’on. Ra taw ko ngiyal’ nem ma dakuriy be’ nra i magafan’ nga ban’en. (Isa. 65:17) Mu susunnag ni ga bay u lan e bin beech e fayleng ni ke gapas, ma dakuriy e kireb riy. (Mik. 4:4) Ku rayog ni ngari mudugil e athap rom u wan’um ni faanra um weliy ngak yugu boch e girdi’. Mu rin’ urngin e tin nrayog rom ni fan ko fare maruwel ni machib nge ngan ayuweg boch e girdi’ ni ngar manged boch i gachalpen Jesus. Faan ga ra rin’ ni aray rogon, ma rayog ni nge ‘yib i m’ug nib riyul’ e pi n’en ni ir e be l’agan’um ngay.’​—Heb. 6:11.

18. Mang e rayog ni nge buch boch nga m’on, ma uw rogon ni ngad athamgilgad u fithik’ e pi n’ey?

¹⁸ Chiney nri gad be chugur nga tungun e re m’ag ney e boor e magawon nra ud mada’naged nra i k’aring e magafan’ ngodad. Thin nu Bible ni fan ko duw ni 2021 e rayog ni nge ayuwegdad u rogon ni ngad athamgilgad u fithik’ e pi magawon ney mad pared nib gapas lanin’dad u daken e pagan’ rodad ngak Jehovah ma gathi bochan gelngidad. U lan e re duw ney e ngad daged u daken e ngongol rodad nib mich u wan’dad fapi thin ni ke micheg Jehovah ni ke gaar: “Ngam pagedan’med ngog mi gimed par ndakir wagageyan’med. Ma aram e gimed ra par ni gimed ba gel.”​—Isa. 30:15.