1. Uw rogon ni ngad ted e tayim ni fan ngak Jehovah?

GAD baadag ni gad ma rin’ e piin nib t’uf rodad boch ban’en u taabang. Ba wu’ e mabgol e yow baadag ni yow ma rin’ boch ban’en u taabang. Piin fel’ yangaren e yad baadag ni yad ma chag ko pi fager rorad. Ma gad gubin ni gad baadag ni gad ma chag pi walagdad u taabang. Machane bin nth’abi ga’ fan e, gad baadag ni gad ma tay e tayim ni fan ko Got rodad. Gad ma rin’ e re n’ey u nap’an ni gad ra meybil ngak, ngu nap’an ni gad be beeg e Thin rok, ma gad be fal’eg i lemnag e n’en nib m’agan’ ngay nge pi fel’ngin nib manigil. Rib ga’ fan e tayim ni gad ma tay ni fan ngak Jehovah!​—Ps. 139:17.

2. Mang e de mom ni ngad rin’ed?

² Yugu aram rogon ni gad baadag ni ngad ted e tayim ni fan ngak Jehovah, machane gathi gubin ngiyal’ nib mom ni ngad rin’ed e re n’ey. Bochan ni boor pa’ u puluwdad, ma rayog ni nge mo’maw’ ngodad ni ngad ted e tayim ni fan ko liyor rodad ngak Jehovah. Bochan e maruwel ni gad ma un ngay, nge pi n’en nib milfan ngodad u lan e tabinaw, nge yugu boch ban’en ma rayog ni ngad lemnaged ni kaygi yoor pa’ u puluwdad ndakuriy e tayim ni fan ko meybil, ara fol Bible, ara ngad fal’eged i lemnag e n’en gad be fil.

3. Ku mang reb e ban’en nrayog ni ngaud n’aged e tayim rodad ngay?

³ Ku bay ban’en nrayog ni ngaud n’aged e tayim rodad ngay. Faanra dab da kol ayuwgad ma rayog ni ngad n’aged e tayim rodad nga boch ban’en ni gad ma rin’ nde kireb, me yan i aw ndakuriy e tayim rodad ni ngad chugurnaged e tha’ u thildad Jehovah. Ba t’uf ni ngad ted ba ngiyal’ ni ngad rin’ed boch ban’en ni ngad felfelan’gad ngay. Machane mus ni faanra de kireb e pi n’em, maku rayog ni ngad n’aged boor e tayim ngay me yan i aw  ndakuriy e tayim rodad ni fan ko liyor rodad ngak Jehovah. Ere ba t’uf ndab da paged talin ni pi n’en gad ma rin’ ni ngad felfelan’gad ngay e gathi aram e n’en nth’abi ga’ fan.​—Prov. 25:27; 1 Tim. 4:8.

4. Mang e ngad weliyed e chiney?

⁴ Gad ra weliy ko re article ney fan nib t’uf ni ngad dugliyed e n’en nth’abi ga’ fan u lan e yafos rodad. Ku gad ra weliy rogon nrayog ni ngad maruwelgad ko tayim ni gad ma tay ni fan ngak Jehovah nib fel’ rogon, nge rogon angin nra yib ngodad.

5. Faanra fal’eg reb e fel’ yangaren i lemnag fare fonow ni bay ko Efesus 5:15-17, ma uw rogon nra ayuweg ni nge mel’eg e n’en nth’abi fel’ ni nge rin’ ko yafos rok?

⁵Mmel’eg e n’en nth’abi fel’ ni ngam rin’ ko yafos rom. Piin fel’ yangaren e ba ga’ ni yad ma lemnag e n’en nth’abi fel’ nrayog ni ngar rin’ed ko yafos rorad. Machane rayog ni nga i yog e sensey rorad nge girdi’ u lan e tabinaw rorad ni gathi yad boch e Pi Mich Rok Jehovah ni ngar guyed rogon ni ngar uned nga reb e skul nib tolang, ya nge yag nra uned nga reb e maruwel nib tolang puluwon miki yag e salpiy ngorad ni boor. Skul ni aray rogon e rayog ni nge fek boor e tayim rorad. Machane piin gallabthir nge pi fager u lan e ulung e rayog ni ngar pied e athamgil nga laniyan’ e piin fel’ yangaren ni ngar fanayed e yafos rorad ni fan ngak Jehovah. Ere mang e rayog ni nge ayuweg reb e fel’ yangaren nib t’uf Jehovah rok ni nge dugliy e n’en nth’abi fel’ ni nge rin’? Ba fel’ ni nge beeg e Efesus 5:15-17 * me fal’eg i lemnag. (Mu beeg.) Tomuren ni ke beeg e pi verse ney, ma rayog ni nge fith ir ni gaar: ‘Mang e “n’en nib m’agan’ Jehovah ngay”? Mang e gu ra dugliy ni nggu rin’ ma ra m’agan’ ngay? Ma mang e gu ra dugliy ni nggu rin’ ma ra ayuwegeg ni nggu maruwel ko tayim rog nib fel’ rogon?’ Dab mu pagtalin ni “tiney e rran e mmo’maw’,” ma dabki n’uw nap’an ma bay ni thang e re m’ag ney ni be gagiyegnag Satan. Ere gad ba gonop ni faan gad ra fanay e tayim rodad ni ngad rin’ed boch ban’en nra felfelan’nag Jehovah.

6. Mang e mel’eg Maria ni nge rin’, ma mang fan nib gonop ko n’en ni mel’eg?

⁶Mu dugliy e n’en nth’abi ga’ fan u lan e yafos rom. Yu ngiyal’ e faanra ngad maruwelgad ko tayim rodad nib fel’ rogon, mab t’uf ni ngad dugliyed ko bin ngan u l’agruw ban’en ni gad ma rin’ nde kireb e ir e ngad m’oneged. Rayog ni ngad guyed e re n’ey ko n’en ni buch u nap’an ni yan Jesus i guy Maria nge Martha. Dabisiy ni kari felfelan’ Martha ni ke yan Jesus nga tafen, ere ngongliy rogon e ggan ni boor ni fan ngak. Machane Maria e yan i par nga but’ nga charen Jesus nga i motoyil ko n’en be yog. De kireb e n’en ni rin’ Martha, machane i yog Jesus ni Maria e “ke mel’eg e bin ni ir.” (Luke 10:38-42) Dabisiy ni yan i boch nga tomuren me pag Maria talin e re miti ggan nni kay e rofen nem, machane ba pagan’dad ngay nde pagtalin e n’en ni fil rok Jesus. Ku arrogodad nib ga’ fan u wan’dad e tayim ni gad ma tay ni fan ngak Jehovah ni bod Maria nrib ga’ fan u wan’ e tayim ni tay ni nge motoyil ngak Jesus. Ere uw rogon nrayog ni ngad maruwelgad ko tayim ni gad ma tay ni fan ngak Jehovah nib fel’ rogon?

7. Mang nrib ga’ fan e meybil, nge fol Bible, ma gad be fal’eg i lemnag e tin kad filed?

⁷Ngam nang ni meybil, nge fol Bible, nge pi n’en gad ma fal’eg i lemnag ko tin kad filed e aram bang ko liyor rodad. Nap’an ni gad ra meybil, ma aram e gad be non ngak e Chitamangidad ni bay u tharmiy ni gad ba t’uf rok. (Ps. 5:7) Nap’an ni gad ra fil e Bible, ma aram e gad be fil “murung’agen Got” ni ir e En nth’abi gonop ni bay. (Prov. 2:1-5, BT) Ma nap’an ni gad ra fal’eg i lemnag e n’en gad be fil, ma aram e gad be lemnag pi fel’ngin Jehovah nge pi n’en nib fel’ ni baadag ni nge rin’ ni fan ngodad nge tin ka bay e girdi’. Ireray e bin nth’abi fel’ e kanawo’ ni ngad maruwelgad riy ko tayim rodad. Machane mang e ra ayuwegdad ni ngad rin’ed e re n’ey?

8. Mang e rayog ni ngad filed u rogon ni fanay Jesus e tayim rok u nap’an ni bay u daken e ted?

⁸Faanra rayog mag yan mu par nga bang ni yigoo gur. Am lemnag e n’en ni rin’ Jesus. U m’on ni nge tabab ko machib ni i tay, me yan i par nga daken e ted u lan 40 e rran. (Luke 4:1, 2) Bochan ni yan i par nga bang ni yigoo ir, ma aram me yag ni nge meybil ngak Jehovah me fal’eg i lemnag e n’en nib m’agan’ e Chitamangin ngay ni nge rin’. Re n’ey e ayuweg Jesus ni nge fal’eg rogon ni fan ko pi skeng nra mada’nag nga tomuren e re ngiyal’ i n’em. Ere uw rogon nrayog ni nge yib angin ngom e n’en ni rin’ Jesus? Faanra boor e girdi’ ni ma par u tabinaw rom, ma rayog nib mo’maw’ ni ngam pirieg bang ni ngam man mu par ngay ni yigoo gur. Ere rayog ni ngam gay bang u wen nrayog ni ngam man mu par ngay. Ireray e n’en ma rin’ Julie u nap’an ni baadag ni nge meybil ngak Jehovah nib n’uw nap’an. Yow ma par e pumoon rok u France u reb e naun nib achichig, ere ba mo’maw’ ni nge yan i par nga bang ni yigoo ir ndabin magawonnag. I yog Julie ni gaar, “Ere gubin e rran nug ma yan nga park ya aram e gin nrayog ni nggu par riy ni yigoo gag, mug fal’eg i lemnag e n’en ni nggog ngak Jehovah, mug weliy lanin’ug ngak nrib fel’ rogon.”

9. Uw rogon ni dag Jesus nib ga’ fan u wan’ e tha’ u thilrow Jehovah ni yugu aram rogon ni boor pa’ u puluwon?

⁹ Ri boor pa’ u puluwon Jesus. Nap’an ni i machib ma boor e girdi’ ni ur leked u reb e binaw nga reb, ya dubrad ni ngar digeyed. Immoy bayay ni ‘muulung gothon bbinaw nga mit e naun u wen,’ ya yad baadag ni ngar guyed Jesus. Yugu aram rogon, me tay e tayim ni nge meybil ngak Jehovah. Tanirran ni kab nep’ me yan “nga bangi n’en ndariy e girdi’ riy” nge meybil ngak e Chitamangin ni yigoo ir.​—Mark 1:32-35.

10-11. Mang e tay Jesus ir ngak pi gachalpen ni ngar rin’ed u nap’an ni yad bay u lan fare milay’ nu Gethsemane nrogon ni bay ko Matthew 26:40, 41, machane mang e buch?

¹⁰ Nap’an e bin tomur e nep’ ko yafos rok u fayleng ni aram e be yan ni nge mus nap’an e machib ni i tay, miki gay bang nrayog ni nge yan ngay ndariy be’ riy ni nge fal’eg i lemnag boch ban’en me meybil. I pirieg e gin’ey u lan fare milay’ nu Gethsemane. (Matt. 26:36) Aram e ngiyal’ ni weliy ban’en nrib ga’ fan ngak pi gachalpen u murung’agen e meybil.

¹¹ Am lemnag e n’en ni buch. Nap’an nra tawgad  nga lan fare milay’ nu Gethsemane, ma sana rayog ni ke pag e lukngun e nep’. Ere yog Jesus ngak e pi apostal rok ni ngar ‘uned ngak ko mood,’ me yan buchuuw nga orel ni nge meybil. (Matt. 26:37-39) Machane nap’an ni be meybil, ma aram mar molod. Nap’an ni yib i piriegrad ni yad be mol, ma aram me tay ir ngorad bayay ni ngar ‘odgad nguur meybilgad ngak Got.’ (Mu beeg e Matthew 26:40, 41.) Manang nib gel e mochuch ni yad be tay ma ke aw parowrad. Ere runguyrad me yog ni “dowef e mmeewar.” Yugu aram rogon, ma l’agruw yay ni ki yan nga orel ni nge meybil, ma nap’an ni sul me piriegrad ni yad be mol ko bin ni ngar meybilgad.​—Matt. 26:42-45.

12. Mang e rayog ni ngad rin’ed ni faanra bay yu ngiyal’ nib gel e mochuch ni gad be tay ara ke aw parowdad ni ngad meybilgad?

¹²Mmel’eg ba ngiyal’ nib fel’ ni ngam rin’ riy. Yu ngiyal’ e rayog nib gel e mochuch ni gad be tay ara ke aw parowdad ni ngad meybilgad. Faanra ke buch e re n’ey rom, ma ngam nang ni ku bay boch e girdi’ ni ma buch e re n’ey rorad. Ere mang e rayog ni ngam rin’? Bay boch e girdi’ nib ga’ ni yad ma meybil ngak Jehovah ni blayal’ ni kar nanged nib fel’ ni ngar meybilgad ni kab kamningel’ ndawori yib e chuchuw ngorad. Ku bay boch e girdi’ ni kar pirieged nrogon ni kar pared u nap’an ni yad be meybil e ku rayog ni nge ayuwegrad ko meybil ni yad be tay. Machane uw rogon ni faanra ri be magafan’um ara kari mulan’um ndabkiyog ni ngam meybil? Mu weliy rogon lanin’um ngak Jehovah. Ya rayog ni nge pagan’um ngay ni Chitamangidad ni ma runguydad e ra nang fan rogon lanin’um.​—Ps. 139:4.

13. Uw rogon nrayog ni nge magawonnagdad e cellphone ara tablet rodad u nap’an ni gad be rin’ boch ban’en ni fan ko liyor rodad ngak Jehovah?

¹³Dab mu pag boch ban’en ni nge magawonnagem u nap’an e fol Bible. Gathi kemus ni yigoo meybil e ma gelnag e tha’ u thildad Jehovah. Thin rok Got ni gad ma fil nge muulung ni gad ma un ngay e ku rayog ni nge chugurnag e tha’ u thildad Got. Ere gur, bay ban’en nrayog ni ngam rin’ ya nge yag nim maruwel ko tayim rom nib fel’ rogon u nap’an ni ga be fol Bible ngu nap’an ni ga be un ko muulung, fa? Mu fithem ni nge lungum, ‘Mang e ba ga’ ni ma magawonnageg u nap’an e muulung ara nap’an nug be fil e Bible rog?’ Gur, rayog ni be callnagem be’, ara kan pi’ reb e email, ara text ko cellphone ara tablet rom, fa? Ngiyal’ ney e bokum bilyon e girdi’ ni bay e cellphone ara tablet  rorad. Bay boch e girdi’ ni yad ma gay murung’agen boch ban’en ni ka rogned ni faanra bay e cellphone u toobdad ma ke mo’maw’ rogon ni ngad tedan’dad ko n’en gad be rin’. I yog be’ nib llowan’ ni gaar, “Damur tiyan’um ko n’en ga be rin’, ya bay lanin’um u bang.” U m’on ni nge tabab e assembly nge convention, mab ga’ ni yima yog ngodad ni ngad achignaged lingan e cellphone ara tablet rodad ya nge dabi magawonnag yugu boch e girdi’. Ere gur, rayog ni ngkud rin’ed e re n’ey u nap’an ni gad be rin’ boch ban’en ni yigoo gadad ni fan ko liyor rodad ngak Jehovah, ya nge dabi magawonnagdad e cellphone ara tablet rodad, fa?

14. Uw rogon nra ayuwegdad Jehovah ni ngad tedan’dad ko n’en gad be rin’ nrogon ni bay ko Filippi 4:6, 7?

¹⁴Mog ngak Jehovah ni nge ayuwegem ni ngam tiyan’um ko n’en ga be rin’. Nap’an ni ga ra nang ni be tabab ni nge yan yan e lem rom u nap’an ni ga be fil e Bible ni yigoo gur ara nap’an e muulung, ma gog ngak Jehovah ni nge ayuwegem. Faanra be magafan’um nga boch ban’en, ma rayog nib mo’maw’ ni ngam tal i lemnag e pi n’en be magafan’um ngay mag tiyan’um ko n’en ga be fil ko Thin rok Got, machane rib ga’ fan ni ngam rin’ e re n’ey. Mu yibilay fare gapas nra yororiy gum’irchaem nge “tafinay” rom.​—Mu beeg e Filippi 4:6, 7.

15. Mang reb i angin nra yib ngom ni faanra ga ma tay e tayim ni fan ngak Jehovah?

¹⁵ Faanra ga ma tay e tayim ni ngam non ngak Jehovah, mag motoyil ngak, mag lemnag murung’agen, ma boor angin nra yib ngom. Ni uw rogon? Som’on e ra ayuwegem ni ngam dugliy boch ban’en nib fel’ rogon. Be micheg e Bible ngodad ni faan ga ra ‘pachegem ngak e piin ni yad ba gonop me yog e gonop ngom.’ (Prov. 13:20) Ere ga ra tay e tayim ni fan ngak Jehovah ni ir e En nth’abi gonop ni bay, ma ra ga’ e gonop rom. Ga ra nang rogon ni ngam felfelan’nag nge rogon ni ngam siyeg boch ban’en nra kirebnag laniyan’.

16. Faanra ud ted e tayim ni fan ngak Jehovah, ma uw rogon nra mon’ognag rogon ni gad ma fil ban’en ngak be’?

¹⁶ Bin migid e ga ra mon’og u rogon ni ngam fil ban’en ngak be’. Nap’an ni gad be fil e Bible ngak be’, ma reb e ban’en nib ga’ fan ni gad ma nameg e aram e ngad ayuweged ni nge chugur ngak Jehovah. Faanra ba ga’ e tayim ni gad ma meybil ngak Jehovah ma gad be fil murung’agen, ma aram e rayog ni nge gel e t’ufeg rodad ngak me bung rogodad ni ngad filed ngak e en gad be fil e Bible ngak ni ngki t’uf Jehovah rok. Aram e n’en ni rin’ Jesus. I weliy murung’agen Jehovah ngak pi gachalpen u fithik’ e t’ufeg, ma aram e n’en ni ayuwegrad ni ngki t’uf Jehovah rorad.​—John 17:25, 26.

17. Mang fan ni ma ayuwegdad e meybil nge fol Bible ni nge gel e michan’ rodad?

¹⁷ Bin dalip e ra gel e michan’ rom. Am lemnag  e n’en ma buch u nap’an ni ga ra yog ngak Got ni nge pow’iyem, ara nge fal’eg lanin’um, ara nge ayuwegem. Urngin yay nra fulweg Jehovah taban e meybil rom, ma ra gel e michan’ rom ngak. (1 John 5:15) Mang ban’en ni ku ra gelnag e michan’ rom? Fol Bible ni ga ma tay ni yigoo gur. Dab mu pagtalin ni thin rok Got ni “yibe rung’ag e be yognag e michan’ ngak e girdi’.” (Rom. 10:17) Machane ra nge gel e michan’ rodad, ma de gaman ni kemus ni ngad filed e thin rok Got. Mang e kub t’uf ni ngad rin’ed?

18. Mu weliy ban’en ni ke buch ni be tamilangnag fan nib t’uf ni ngaud fal’eged i lemnag e n’en gad be fil.

¹⁸ Ba t’uf ni ngad fal’eged i lemnag e n’en gad be fil. Am lemnag e n’en ni buch rok e en ni yoloy e Psalm 77. I kireban’ ni bochan e be lemnag nda kur fel’gad piyu Israel u wan’ Jehovah. Bochan gelngin e magafan’ rok, ma aram e daki yag ni nga i mol nnep’. (Verse 2-8) Ere mang e rin’? I gaar ngak Jehovah: “Bay gu lemnag murung’agen urngin e tin kam rin’; bay gu par ma gu be tafinaynag urngin e tin kam rin’ nrib th’abi fel’.” (Verse 12, BT) Manang e pi n’en ni i rin’ Jehovah ni fan ko girdi’ rok kakrom, machane yugu aram rogon me gaar u wan’: “Gur, ke pag Got talin ni nge runguydad? Gur, damumuw e ke yon’ luwan e runguy rok?” (Verse 9, BT) I fal’eg i lemnag e pi n’en ni i rin’ Jehovah nge rogon ni i dag e runguy rok kafram. (Verse 11) Ere mang angin ni yib riy? I mich u wan’ ndabi digey Jehovah e girdi’ rok. (Verse 15) Ku arrogom nra gel e michan’ rom ni faan ga ra fal’eg i lemnag e n’en ke rin’ Jehovah ni fan ko girdi’ rok nge n’en ke rin’ ni fan ngom.

19. Ku mang reb i angin nra yib ngodad ni faan gad ra tay e tayim ni fan ngak Jehovah?

¹⁹ Bin aningeg maku aram e bin nth’abi ga’ fan e rra gel feni t’uf Jehovah rom. T’ufeg e aram e re fel’ngin nra k’aringem ni ngam fol rok Jehovah, mag pag fan boch ban’en ya nge yag nim felfelan’nag, mag athamgil u fithik’ urngin mit e skeng nra yib ngom. (Matt. 22:37-39; 1 Kor. 13:4, 7; 1 John 5:3) Dakuriy ban’en nib ga’ fan nge migid e bin ngari chugur e tha’ u thilmew Jehovah!​—Ps. 63:1-8.

20. Uw rogon ni kam lemnag ni ngam maruwel ko tayim rom ni fan ngak Jehovah nib fel’ rogon?

²⁰ Dab mu pagtalin ni meybil, nge fol Bible, nge ngad fal’eged i lemnag e n’en gad be fil e aram bang ko liyor rodad. Mu gay bang nrayog ni ngam man mu par ngay ni yigoo gur ni ngam rin’ boch ban’en ni fan ngak Jehovah ni bod ni i rin’ Jesus. Dab mu pag boch ban’en nde ga’ fan ni nge magawonnagem. Ma ngku mog ngak Jehovah ni nge ayuwegem ni ngam tiyan’um u nap’an ni ga be rin’ boch ban’en ni fan ko liyor rom ngak. Faan ga ra maruwel ko tayim rom nib fel’ rogon e chiney, ma ra pi’ Jehovah e yafos ni manemus ngom u lan e bin nib beech e fayleng rok.​—Mark 4:24.