1-3. Mang boch ban’en ni ma k’aringdad ni ngad yorgad?

WUIN e tomur nim yor? Yu ngiyal’ e gad ma yor ni bochan e kad felfelan’gad. Machane ba ga’ ni gad ma yor ni bochan e ke kireban’dad. Bod nrayog ni ngad yorgad u nap’an ni ke yim’ be’ nib t’uf rodad. Lorilei nreb e walag nib pin ni ma par u Meriken e gaar: “Yu ngiyal’ e rib gel e kireban’ nug ma tay ni bochan e ke yim’ be’ nib pin ni fakag ma bod ndariy ban’en nra fal’eg lanin’ug. Nap’an nra buch e re n’ey, ma gu ma lemnag ndabiyog ni nggu athamgil u fithik’ e kireban’ rog.” *

² Ku bay boch i fan nrayog ni ngad yorgad. Hiromi nreb e pioneer u Sapan e yog ni gaar: “Yu ngiyal’ e ma kireban’ug ni bochan ni girdi’ nug ma machibnagrad e dubrad ni ngar motoyilgad ko n’en be yog e Bible. Yu ngiyal’ e gu ma meybil ngak Jehovah nug be yor ni nge ayuwegeg ni nggu pirieg be’ ni baadag ni nge nang e tin riyul’.”

³ Bay yu ngiyal’ ni ga ma lem ni bod rogon e gal walag ney, fa? Dabisiy ni boor i gadad e ma lem ni aray rogon. (1 Pet. 5:9) Gad baadag ni ngad pigpiggad ngak Jehovah “u fithik’ e felfelan’,” machane yu ngiyal’ e gad ma yor ni bochan e ke yim’ be’ nib t’uf rodad, ara ke kireban’dad, ara gad be mada’nag reb e magawon ni be skengnag rogon e yul’yul’ rodad ngak Got. (Ps. 6:6; 100:2) Ere uw rogon ni ngad athamgilgad u fithik’ e pi n’ey?

4. Mang e gad ra weliy ko re article ney?

⁴ Rayog ni ngad filed ban’en rok Jesus. Yu ngiyal’ e i buch boch ban’en rok ni k’aring ni nge “yor.” (John 11:35; Luke 19:41; 22:44; Heb. 5:7) Ngad weliyed e pi n’ey ma gad guy e n’en be fil ngodad u murung’agen Jesus nge Jehovah ni Chitamangin. Ku gad ra weliy e n’en nrayog ni ngad rin’ed u nap’an nra buch boch ban’en rodad nra k’aringdad ni ngad yorgad.

5. Mang e gad be fil u murung’agen Jesus ko John 11:32-36?

⁵ Bang u tungun e duw ni 32 C.E., me m’ar Lazarus ni fager rok Jesus nge yim’. (John 11:3, 14) Re moon ney e bay l’agruw i ppin ni walagen ni ka nog Maria nge Martha ngorow, ma ri yad ba t’uf rok Jesus. Rib gel e kireban’ ni tay e gal ppin ney u nap’an ni yim’ walagrow ni pumoon. Tomuren ni yim’ Lazarus me milekag Jesus nga Bethany ni aram e gin ma par Maria nge Martha riy. Nap’an ni rung’ag Martha ni ke yan Jesus ngaram me gurnag ir nge yan ni ngar mada’gow. Am lemnag gelngin e kireban’ ni ke tay u nap’an ni gaar: “Somol, faan mang e um moy u roy, ma dawori yim’ walageg!” (John 11:21) Ma de n’uw nap’an nga tomuren u nap’an ni guy Jesus Maria nge yugu boch e girdi’ ni yad be yor miki “yor.”​—Mu beeg e John 11:32-36.

6. Mang fan ni yor Jesus?

⁶ Ere mang fan ni yor Jesus? Be gaar fare Insight on the Scriptures: “Yam’ ni tay Lazarus ni fager rok Jesus nge kireban’ ni tay fa gal ppin ni walagen e aram e n’en ni k’aring Jesus ni ngari ‘taganan’ me yor.’” * Rayog ni i lemnag Jesus gelngin e amith ni i tay Lazarus ni bochan e m’ar rok, nge rogon laniyan’ u nap’an ni nang ni aram e be n’en ni nge yim’. Ku rayog ni yor Jesus u nap’an ni guy gelngin e kireban’ ni tay Maria nge Martha ni bochan e ke yim’ walagrow. Faanra ke yim’ reb e fager rom nrib pach e thin romew ara reb i girdien e tabinaw rom, ma dabisiy ni kub gel e kireban’ nim tay. Ere ngad weliyed dalip ban’en nrayog ni ngam fil ko re n’ey ni buch.

7. Mang e gad be fil u murung’agen Jehovah u nap’an ni yornag Jesus e pi fager rok?

⁷Manang Jehovah rogon lanin’um. Jesus e “ri taareb rogorow” e Chitamangin. (Heb. 1:3) Nap’an ni yor Jesus, me dag rogon laniyan’ Jehovah u nap’an nra yim’ be’ nib t’uf rodad. (John 14:9) Faanra ke yim’ be’ nib t’uf rom, ma rayog ni nge pagan’um ngay ni manang Jehovah gelngin e kireban’ ni ga be tay  maku be kireban’ ngom. Ma baadag ni nge fal’eg lanin’um.​—Ps. 34:18; 147:3.

8. Mang fan nrayog ni nge pagan’dad ngay nra faseg Jesus e piin nib t’uf rodad ni kar m’ad?

⁸Baadag Jesus ni nge faseg e piin nib t’uf rom ni kar m’ad. De n’uw nap’an u m’on ni nge yor Jesus, me micheg ngak Martha ni gaar: “Bay ni faseg walagem ko yam’.” Ba mich e n’en ni yog Jesus u wan’ Martha. (John 11:23-27) Bochan ni ma pigpig Martha ngak Jehovah, ma aram fan ni manang ni i faseg Elijah nge Elisha ni profet boch e girdi’ kakrom. (1 Ki. 17:17-24; 2 Ki. 4:32-37) Maku rayog ni ke rung’ag murung’agen e piin ke fasegrad Jesus ko yam’. (Luke 7:11-15; 8:41, 42, 49-56) Ku arrogom nrayog ni nge pagan’um ngay ni ga ra guy bayay e piin nib t’uf rom ni kar m’ad. Meyor ni tay Jesus u nap’an ni be fal’eg laniyan’ e pi fager rok ni ke kireban’rad e be micheg nri baadag ni nge faseg e piin kar m’ad!

9. Uw rogon ni ngam ayuweg e piin ke kireban’rad ni bod ni rin’ Jesus? Mu weliy ban’en ni ke buch.

⁹Rayog ni ngam ayuweg e piin ke kireban’rad. Gathi kemus ni un Jesus ngak Martha nge Maria ko meyor, ya ki motoyil ngorow me fal’eg lanin’row. Ku rayog ni ngad rin’ed e re n’ey ngak e piin ke kireban’rad. Dan nreb e piilal ni ma par u Australia e gaar: “Ri t’uf e ayuw rog u tomuren ni yim’ e ppin rog. Bay yu wu’ i mabgol ni gubin ngiyal’ ni ur ted e tayim ni ngar motoyilgad ngog. Ra paged gag ni nggu weliy rogon e kireban’ rog, ma dar magagawongad u nap’an nug ra yor. Kur ayuweged gag u boch ban’en ni bod ni yad ma maluknag e karrow rog, mar chuw’iyed boch e ggan ni nggu way, mu kur lumgad ni fan ngog u nap’an nra mo’maw’ ni nggu rin’ e pi n’ey. Kub ga’ ni gamad ma meybil u taabang. Ra micheged ni yad e tin riyul’ e fager ni yad ma pi’ e ayuw ko ngiyal’ ni ke yib e ‘gafgow’ ngog.”​—Prov. 17:17, BT.

10. Mang e n’en ni buch ni be weliy e Luke 19:36-40 murung’agen?

¹⁰ I taw Jesus nga Jerusalem ko rofen ni Nisan 9 ko duw ni 33 C.E. Nap’an ni chuchugur ngaram, ma aram me yib e girdi’ ra filathed wuru’ e mad rorad nga daken e kanawo’ ni ngar daged ni ke m’agan’rad ngay ni nge mang Pilung rorad. Ba gel e felfelan’ nni tay e ngiyal’ nem. (Mu beeg e Luke 19:36-40.) Ere rayog ni gin pi gachalpen ko n’en ni buch ni migid. Nap’an ni “chuchugur [Jesus] i yib ko fare binaw, ma faani guy me yornag.” Ma aram me yiiynag e pi n’en nib kireb nra buch rok e girdi’ u Jerusalem.​—Luke 19:41-44.

11. Mang fan ni yornag Jesus e girdi’ u Jerusalem?

¹¹ I kireban’ Jesus ni bochan e manang ni yooren e pi Jew e dab ra motoyilgad ko fare thin nib fel’ ni murung’agen Gil’ilungun Got. Bochan e re n’ey, ma yira gothey yu Jerusalem ma pi Jew ni yad ra magey ni yad ba fos e yira fekrad ni ngar manged sib. (Luke 21:20-24) Ba gel e kireban’ riy ya yooren e girdi’ e ngiyal’ nem e dar motoyilgad ngak Jesus ni bod rogon ni yog u m’on riy. Ere uw rogon e girdi’ ko gin ga ma par riy? Yad ma motoyil ko fare thin nib fel’ ni murung’agen Gil’ilungun Got, fa? Faanra buchuuw e girdi’ ni ma motoyil ngom, ma mang e rayog ni ngam fil ko meyor ni tay Jesus? Ngkud weliyed dalip ban’en nrayog ni ngan fil ko re n’ey.

12. Mang e gad be fil u murung’agen Jehovah u nap’an ni yornag Jesus e piin i machibnagrad?

¹²Ma lemnag Jehovah e girdi’. Meyor ni tay Jesus e be puguran ngodad gelngin nri ma lemnag Jehovah e girdi’. “Dabun ni nge n’ag be’, ya ba adag ni nge urngin e girdi’ mi yad pi’ keru’rad ko urngin e denen ni yad be rin’.” (2 Pet. 3:9)  Ngiyal’ ney e gad ma dag nib t’uf e girdi’ rodad ni aram e gad ma guy rogon ni ngad ayuweged yad ni ngar nanged fare thin nib fel’ ni murung’agen Gil’ilungun Got.​—Matt. 22:39. *

13-14. Uw rogon ni dag Jesus ni be runguy e girdi’, ma uw rogon nrayog ni nge m’ug e re fel’ngin ney rodad?

¹³Ba gel e athamgil ni i tay Jesus u nap’an e machib. I dag nib t’uf e girdi’ rok ni aram e ulul ni nge machibnagrad u nap’an nra mab e kanawo’ ngak. (Luke 19:47, 48) Mang e k’aring ni nge rin’ e re n’ey? Bochan ni be runguyrad. Yu ngiyal’ e der yag ni ngar “abichgad” pi gachalpen ni bochan e boor e girdi’ ni yad baadag ni ngar motoyilgad ngak. (Mark 3:20) Ma nap’an ni yib be’ nib moon nnep’ ni baadag ni ngar nonow, me m’agan’ ngay ni ngar mada’gow. (John 3:1, 2) Yooren e piin nra motoyilgad ngak Jesus e dar manged boch i gachalpen. Machane urngin e piin nra motoyilgad ngak e machibnagrad nib fel’ rogon. Ku arrogon e ngiyal’ ney ni gad baadag ni nge urngin e girdi’ me rung’ag fare thin nib fel’. (Acts 10:42) Ra nge yag ni ngad rin’ed e re n’ey, ma sana ra t’uf ni ngad thilyeg rogon e machib ni gad be tay.

¹⁴Nge m’agan’um ngay ni ngam thilyeg rogon e machib ni ngam tay. Faanra dab da thilyeged e ngiyal’ ni gad ma machib riy, ma rayog ni bay boch e girdi’ ni baadag ni nge nang fare thin nib fel’ ndabiyog ni ngad machibnaged. I yog Matilda nreb e pioneer ni gaar: “Gamow ma guy rogon e pumoon rog ni ngaug thilyegew e ngiyal’ ni gamow ma machib riy. Ra kakadbul ma gamow ma machib ko yungi n’en ni bay e siyobay riy. Ma ra misiw’ ma gamow ma fanay e cart ni nggu machibnagew e girdi’ ni be yan u kanawo’. Ma ra blayal’ ma boor e girdi’ ni gamow ma piriegrad u tabinaw rorad.” Susun ni nge m’agan’dad ngay ni ngad thilyeged e ngiyal’ ni gad ma machib riy ni nge puluw ko ngiyal’ nrayog ni ngad mada’naged e girdi’ riy, ko bin ni kemus ni ngad machibgad ko ngiyal’ nib m’ag ngodad. Faan gad ra rin’ e re n’ey, ma rayog ni nge pagan’dad ngay nra felfelan’ Jehovah.

15. Mang e buch ko fare nep’ u m’on ni nge yim’ Jesus nrogon ni bay ko Luke 22:39-44?

¹⁵ Nap’an ni ke n’uw e nep’ ko rofen ni Nisan 14 ko duw ni 33 C.E., ma aram me yan Jesus nga lan fare milay’ nu Gethsemane nge meybil ngak Jehovah ni be weliy rogon laniyan’ ngak. (Mu beeg e Luke 22:39-44.) Aram e ngiyal’ ni “meybil . . . ni ba ga’ laman u fithik’ e lu’.” (Heb. 5:7) Mang e yibilay Jesus ko re nep’ i n’em u m’on ni nge yim’? I yibilay ni ngan pi’ gelngin ni nge par nib yul’yul’ ngak Jehovah me rin’ e n’en nib m’agan’ ngay. I rung’ag Jehovah e meybil ni tay Fak u polo’ i gum’irchaen, ma aram me l’og ba engel ni nge pi’ gelngin.

16. Mang fan ni i magafan’ Jesus u nap’an ni be meybil u lan fare milay’ nu Gethsemane?

¹⁶ Dabisiy ni i yor Jesus u nap’an ni be meybil u lan fare milay’ nu Gethsemane ni bochan e be magafan’ nra lemnag e girdi’ ni ke darifannag fithingan Got. Ku manang feni ga’ fan ni nge par nib yul’yul’ ya nge yag ni thothupnag fithingan e Chitamangin. Ere faanra ga be mada’nag reb e magawon ni be skengnag e yul’yul’ rom ngak Jehovah, ma mang e rayog ni ngam fil ko meyor ni tay Jesus? Ngkud weliyed dalip ban’en nrayog ni ngan fil riy.

17. Mang e rayog ni ngad filed u murung’agen Jehovah u rogon ni fulweg taban e meybil ni tay Jesus?

¹⁷Ma motoyil Jehovah ko meybil rom. I motoyil Jehovah ko meybil ni tay Jesus. Mang fan? Ya n’en nth’abi ga’ fan u wan’ Jesus e nge par nib yul’yul’ ngak e Chitamangin me thothupnag fithingan. Ere faanra n’en nth’abi ga’ fan u wan’dad e ngad pared ni gad ba yul’yul’ ngak Jehovah ma gad thothupnag fithingan, ma aram e ra fulweg taban e meybil rodad.​—Ps. 145:18, 19.

18. Uw rogon ni Jesus e bod reb e fager ni manang rogon lanin’dad?

¹⁸Manang Jesus rogon lanin’um. Nap’an nra magafan’dad ma gad ma felfelan’ ngay ni bay reb e fager rodad ni manang rogon lanin’dad, nib ga’ ni faanra ir be’ ni ke mada’nag e magawon ni gad be mada’nag. Jesus e re fager nem. Manang rarogon be’ ni ke meewar nib t’uf e ayuw rok. Ku manang e pi meewar rodad ma ra guy rogon ni ngan ayuwegdad “ko  ngiyal’ ndabi siy” ni ngan rin’ riy. (Heb. 4:15, 16) Susun ni nge m’agan’dad ko ayuw ni be pi’ Jehovah ngodad ndemtrug ko ke yib u daken reb e babyor rodad, ara reb e video, ara reb e welthin, ara ke yib reb e piilal ara reb e walag ni nge pi’ e athamgil nga lanin’dad ni bod rogon ni m’agan’ Jesus ko ayuw ni pi’ fare engel ngak u lan fare milay’ nu Gethsemane.

19. Uw rogon ni nge yib gelngim u nap’an ni ga ra mada’nag reb e magawon ni be skengnag e yul’yul’ rom ngak Got? Mu weliy ban’en ni ke buch.

¹⁹Ra pi’ Jehovah e “gapas rok” ngom. Uw rogon nra pi’ Jehovah gelngidad? Nap’an ni gad ra meybil ma ra yag fare ‘gapas rok Got ngodad ndabi chuchugur ni nge nang e girdi’ fan.’ (Fil. 4:6, 7) Fare gapas ni ma pi’ Jehovah ngodad e ma gapaseg lanin’dad me ayuwegdad ni nge puluw rogon e lem rodad. Aram e n’en ni buch rok reb e walag nib pin ni ka nog Luz ngak. I gaar: “Ba ga’ ni ma kireban’ug ni bochan e yigoo gag. Yu ngiyal’ e ma k’aringeg e re n’ey ni nggu lemnag ndag t’uf rok Jehovah. Machane nap’an nra buch e re n’ey, ma ka chingiyal’ nem mug weliy rogon lanin’ug ngak. Meybil e ma ayuwegeg ni nge fel’ lanin’ug.” Ere rayog ni nge gapas lanin’dad u daken e meybil ni bod e n’en ke buch ko re walag ney.

20. Mang e kad filed ko meyor ni tay Jesus?

²⁰ Boor ban’en nrayog ni ngad filed ko meyor ni tay Jesus nra fal’eg lanin’dad! Kan puguran ngodad ni ngad ayuweged e pi fager rodad ni ke kireban’rad, ma nge pagan’dad ngak Jehovah nge Jesus ni yow ra ayuwegdad u nap’an nra yim’ be’ nib t’uf rodad. Kun pi’ e athamgil nga lanin’dad ni ngad machibgad ma gad fil e Bible ko girdi’ u fithik’ e runguy ni bochan e ma dag Jehovah Got nge Jesus Kristus e re fel’ngin ney nrib manigil. Ma kki fel’ lanin’dad ni kad nanged ni manang Jehovah nge Fak rogon lanin’dad, nge pi meewar rodad, ma yow baadag ni ngar ayuwegew gadad ni ngad athamgilgad. Ere manga yugu da ululgad ni ngad folgad ko pi n’en kad filed nge mada’ ko ngiyal’ nra lebguy Jehovah e n’en ke micheg ni aram e nge ‘n’ag urngin e lu’ u owchedad’!​—Rev. 21:4.