1-2. (a) Uw rogon lanin’dad u nap’an ni gad ra lemnag e pi n’en ni i rin’ Jesus nge machib ni i tay? (b) Mang e gad ra weliy ko re article ney?

 NAP’AN nra yim’ be’ nib t’uf rodad, ma ri gad ma tawrengnag nib gel! Som’on e sana rra amith lanin’dad u nap’an ni gad ra lemnag e pi rran u m’on ni nge yim’, nib ga’ ni faanra rib gel e gafgow ni i tay. Machane ra munmun ma rayog ni ngkud felfelan’gad bayay u nap’an ni gad ra lemnag ban’en ni fil ngodad, ara ban’en ni rin’ ara yog ni nge pi’ e athamgil nga lanin’dad ara nge yibnag e felfelan’ ngodad.

² Ku arrogon e gafgow nge yam’ ni tay Jesus nnap’an ni gad ra beeg murung’agen, ma ma k’aring e kireban’ ngodad. Ba ga’ nu m’on ngu tomuren e Puguran e ri gad ma tay e tayim ni ngad fal’eged i lemnag feni ga’ fan fare biyul ni maligach ni pi’. (1 Kor. 11:24, 25) Machane kub gel e felfelan’ ni gad ma tay u nap’an ni gad ra lemnag urngin e pi n’en ni i yog ma be rin’ u nap’an ni immoy u fayleng. Ku ma yib e athamgil nga lanin’dad u nap’an ni gad ra lemnag e n’en be rin’ e chiney nge n’en nra rin’ ni fan ngodad boch nga m’on. Gad ra fal’eg i lemnag e pi n’ey nge rogon e t’ufeg ni ke dag ngodad, ma ra k’aringdad ni ngad daged nib ga’ fan e pi n’ey u wan’dad. Ireray e n’en gad ra weliy ko re article ney.

3. Mang boch i fan ni gad be pining e magar u lanin’dad ni bochan fare biyul?

³ Nap’an ni gad ra lemnag e pi n’en ni i rin’ Jesus nge yam’ ni tay, ma ri gad ma pining e magar u lanin’dad. Nap’an ni immoy u fayleng ma i fil ko girdi’ murung’agen e pi tow’ath nra yibnag Gil’ilungun Got. Rib ga’ fan u wan’dad e pi n’ey ni i machibnag u murung’agen Gil’ilungun Got. Ba ga’ fan fare biyul u wan’dad  ni bochan e aram e n’en ke bing e kanawo’ ngodad ni nge fel’ e tha’ u thildad Jehovah nge Jesus. Piin yad ra dag nib mich Jesus u wan’rad e ku ra yag e athap ko yafos ni manemus ngorad mu kur guyed bayay e piin nib t’uf rorad ni kar m’ad. (John 5:28, 29; Rom. 6:23) Dariy rogon ni ngan pi’ e pi tow’ath ney ngodad, maku dabiyog ni ngad sulweged puluwon e n’en ke rin’ Got nge Kristus ni fan ngodad. (Rom. 5:8, 20, 21) Machane rayog ni ngad daged ngorow nri gad be pining e magar u lanin’dad. Ni uw rogon?

4. Uw rogon ni dag Maria Magdalene nib ga’ fan u wan’ e n’en ke rin’ Jesus ni fan ngak? (Mu guy e sasing.)

⁴ Am lemnag e n’en ni rin’ reb e ppin nib Jew ni ka nog Maria Magdalene ngak. Rib gel e gafgow ni i tay ni bochan e medlip e moonyan’ ni ke yib i ying ngak. Dabisiy ni i lemnag ndariy be’ nrayog ni nge ayuweg. Ere mu lemnag gelngin e felfelan’ ni tay u nap’an ni tuluf Jesus e pi moonyan’ nem ngar chuwgad rok! Ireray e n’en ni k’aring ni nge mang reb i gachalpen Jesus me fanay e tayim rok, nge gelngin, nge pi n’en ni bay rok ni nge ayuweg ko machib ni i tay. (Luke 8:1-3) Yugu aram rogon nrib ga’ fan u wan’ e n’en ni rin’ Jesus ni fan ngak, machane rayog nde nang ni bay reb e tow’ath ni kab gel boch e fel’ riy ni bayi pi’ boch nga tomuren. Re n’em e aram e nge yim’ ni fan ko girdi’ ya nge yag e yafos ni manemus ngak “urngin e piin ni michan’rad ngak.” (John 3:16) Yugu aram rogon, me dag Maria nib ga’ fan u wan’ e n’en ke rin’ Jesus ni aram e par nib yul’yul’. Nap’an ni be gafgow Jesus u daken fare ley i gek’iy, ma bay Maria nib sak’iy u tooben ni be pi’ e athamgil nga laniyan’ nge piin ku yad bay u rom. (John 19:25) Tomuren ni yim’ Jesus, me yan Maria nge l’agruw e ppin ko gin ngan chibgiliy riy ni kar feked e florida ni ngar liyfed nga downgin. (Mark 16:1, 2) Rin tow’athnag Maria ko yul’yul’ ni tay. Ir bagayad e piin ni mada’nag Jesus u nap’an nni faseg ko yam’ miki non ngak. Re n’ey e ri in i gachalpen e yag ni ngar rin’ed.—John 20:11-18.

5. Uw rogon nrayog ni ngad daged nib ga’ fan u wan’dad urngin ban’en ni ke rin’ Jehovah nge Jesus ni fan ngodad?

⁵ Ku rayog ni ngad daged nib ga’ fan u wan’dad  urngin ban’en ni ke rin’ Jehovah nge Jesus ni fan ngodad ni aram e ngad fanayed e tayim rodad, nge gelngidad, nge salpiy rodad ni fan ko pigpig rodad ngak Jehovah. Bod nrayog ni ngad pied e ayuw i toy boch e naun ni fan ko bin riyul’ e liyor ma gad un i ngongliy e yungin ke kireb riy. 

6. Mang fan nrayog ni nga dogned ni fare biyul e ba tow’ath ni fan ngodad ni be’ nge be’?

⁶ Nap’an ni gad ra lemnag gelngin nri gad ba t’uf rok Jehovah nge Jesus, ma ra k’aringdad ni ngad daged ni yow ba t’uf rodad. (1 John 4:10, 19) Nap’an nra tamilang u wan’dad ni ke yim’ Jesus ni fan ngodad ni be’ nge be’, ma ri ku ma gel e re t’ufeg ney rodad. Nap’an ni yol apostal Paul ngak piyu Galatia, ma ireray e n’en ni tamilangnag miki yog nib ga’ fan u wan’. I gaar: “En ni Fak Got . . . e gub t’uf rok ma ke pi’ e pogofan rok ni fan ngog.” (Gal. 2:20) Ke pow’iyem Jehovah ngak u daken fare biyul ya nge yag nim mang fager rok. (John 6:44) Ba mudugil ni gab felfelan’ ngay ni kam nang ni ke guy Jehovah ban’en rom nib manigil, ma rib tolang puluwon e n’en ke pi’ ya nge yag nim mang fager rok. Kub mudugil ni ku ra gel feni t’uf Jehovah nge Jesus rom. Ere ba fel’ ni nge bagadad me fith ir ni gaar, ‘Mang e ra k’aringeg e re t’ufeg nem ni nggu rin’?’

7. Uw rogon nrayog ni ngad daged nib t’uf Jehovah nge Jesus rodad nrogon ni be m’ug ko sasing? (2 Korinth 5:14, 15; 6:1, 2)

⁷ T’ufeg rodad ngak Got nge Kristus e ra k’aringdad ni ngkud t’ufeged yugu boch e girdi’. (Mu beeg e 2 Korinth 5:14, 15; 6:1, 2.) Reb e kanawo’ ni gad ma dag e re t’ufeg ney riy e aram e gad ma rin’ fare maruwel ni machib u fithik’ e pasig. Gad ma machibnag urngin e girdi’ ni gad ma mada’nag. Darud laniyan’gad ko girdi’ ni bochan ramaen dowrad, ara urngin e salpiy ni bay rorad, ara tolngin e skul rorad. Gad ra machibnag urngin e girdi’ ni kad mada’naged,  ma aram e gad be rin’ e n’en nib m’agan’ Jehovah ngay ni ir e “ba adag urngin e girdi’ ni ngar thapgad ngak ma ngar nanged e tin nib riyul’.”—1 Tim. 2:4.

8. Uw rogon ni ngad t’ufeged pi walagdad?

⁸ Ku gad ma dag nib t’uf Got nge Kristus rodad ni aram e gad ma t’ufeg pi walagdad. (1 John 4:21) Ri gad ma lemnag e tin nib t’uf rorad ma gad ma ayuwegrad u nap’an ni ke yib e magawon ngorad. Gad ma fal’eg lanin’rad u nap’an nra yim’ be’ nib t’uf rorad, ma nap’an ni yad ra m’ar ma gad ma yan nda guyed yad, maku gad ma rin’ e tin rayog rodad ni ngad pied e athamgil nga lanin’rad u nap’an ni ke mulan’rad. (2 Kor. 1:3-7; 1 Thess. 5:11, 14) Gubin ngiyal’ ni gad ma pi’ e meybil rorad ni bochan e gad manang ni “meybil rok be’ nib mat’aw e ba’ angin ni ba ga’.”—Jas. 5:16.

9. Ku mang reb e kanawo’ nrayog ni ngad t’ufeged pi walagdad riy?

⁹ Ku gad ma t’ufeg pi walagdad u nap’an ni gad ra guy rogon ni nga i par ni bay e gapas u thildad. Gad ma guy rogon ni ngad folwokgad rok Jehovah u rogon ni ma n’ag fan e kireb. Faanra ke m’agan’ Jehovah ngay ni nge pag Fak ni nge yim’ ni fan ko denen rodad, me ere susun e ngki m’agan’dad ngay ni ngad n’aged fan e kireb rok pi walagdad u nap’an ni yad ra denen nib togopuluw ngodad. Dubdad ni ngad boded fare tapigpig nib kireb ni weliy Jesus murung’agen u lan reb e fanathin rok. Yugu aram rogon ni n’ag e masta rok fan u wan’ e malfith rok nrib ga’, machane de n’ag fan u wan’ e malfith rorow yugu reb e tapigpig nib achig. (Matt. 18:23-35) Faanra ke sum e magawon u thilmew be’ u lan e ulung, ma rayog ni nge mang gur e mman mu guy ngam awnag e gapas u thilmew u m’on ni ngam un ko Puguran, fa? (Matt. 5:23, 24) Faan ga ra rin’ e re n’ey, ma aram e ga be dag nrib t’uf Jehovah nge Jesus rom.

10-11. Uw rogon nrayog ni nge dag e piin piilal nib t’uf Jehovah nge Jesus rorad? (1 Peter 5:1, 2)

¹⁰ Uw rogon nrayog ni nge dag e piin piilal nib t’uf Jehovah nge Jesus rorad? Reb e kanawo’ nib ga’ fan nrayog ni ngar rin’ed e re n’ey riy e aram e ngar ayuweged e pi saf rok Jesus ko tin nib t’uf rorad. (Mu beeg e 1 Peter 5:1, 2.) Aram e n’en ni tamilangnag Jesus ngak apostal Peter. Bochan ni dalip yay ni yog Peter nde nang Jesus, ma dabisiy nri baadag ni nge micheg nib t’uf Jesus rok. Ere tomuren nni faseg Jesus ko yam’, me fith ngak ni gaar: “Simon, ni fak John gur, gub t’uf rom?” Rayog ni nge pagan’dad ngay ndemtrug ban’en nra rin’ Peter ya nge yag ni micheg nib t’uf rok e Masta rok. I gaar Jesus ngak: “Mu gafaliy e saf rog.” (John 21:15-17) Ere micheg Peter nib t’uf Jesus rok ni aram e ayuweg e pi saf rok u n’umngin nap’an e yafos rok.

¹¹ Gimed e piin piilal e uw rogon nrayog ni ngam daged nib ga’ fan u wan’med fapi thin ni yog Jesus ngak Peter u m’on ngu tomuren e Puguran? Rayog ni ngam daged gelngin nib t’uf Jehovah nge Jesus romed ni aram e ngaum ted e tayim ni ngam pied e athamgil nga laniyan’ e pi walag ni gubin ngiyal’ mu kum yoornaged e tin gimed be rin’ ni ngam ayuweged e piin ndakurur pigpiggad ngak Jehovah ni ngar sulod ngak. (Ezek. 34:11, 12) Ku rayog ni ngam guyed rogon ni ngam pied e athamgil nga laniyan’ e piin yad ma fil e Bible nge piin ni fin aram e som’on ni kar uned ko Puguran, mi gimed guy rogon ni ngar nanged ni yib felfelan’ ngay ni kar bad ya gad be athapeg ni ngkur manged boch i gachalpen Jesus.

12. Mang fan ni faan gad ra lemnag fapi thin ni yog Jesus ko fare nep’ u m’on ni nge yim’ ma ra ayuwegdad ndab da rusgad? (John 16:32, 33)

¹² Fare nep’ u m’on ni yim’ Jesus me gaar ngak pi gachalpen: “Bayi gafgownagmed e fayleng.  Machane dab mu rusgad! Ya kug gel ko fayleng!” (Mu beeg e John 16:32, 33.) Mang e ayuweg Jesus ni nge dabi rus ko pi toogor rok me par nib yul’yul’ nge mada’ ko yam’? I taga’ ngak Jehovah. I yog ngak Jehovah ni nge yororiy pi gachalpen ni bochan e manang ni yad ra mada’nag boch e skeng ni bod e tin ni i mada’nag. (John 17:11) Mang fan ni be ayuwegdad e re n’ey ndab da rusgad? Bochan ni kab gel Jehovah ko pi toogor rodad. (Jas. 4:7) Gubin ban’en ni ma guy Jehovah. Ere ba mich u wan’dad ni faan gad ra taga’ ngak, ma rayog ni nge ayuwegdad ni ngad gelgad ko pi n’en ni gad be rus ngay.

13. Uw rogon ni dag Josef ni be’ nu Arimathea nder rus?

¹³ Am lemnag e n’en ni buch rok Josef ni be’ nu Arimathea. Pi Jew e ri yad ma tayfan e re pumoon ney. Ir reb i girdien fare Sanhedrin ni aram e bin th’abi tolang e tagil’ e puf oloboch rok e pi Jew. Machane nap’an ni i machib Jesus u fayleng ma ir be’ ni ma rus ko girdi’. I yog John ni “ir reb i gachalpen Jesus, machane be mithag, ni bochan e be tamdag ngak piyu Israel.” (John 19:38) Yugu aram rogon ni baadag fare thin ni murung’agen Gil’ilungun Got, machane i mithag nib mich Jesus u wan’. Dariy e maruwar riy ni i rus nri chey ma daki tay e girdi’ fan ni bochan e re n’ey. Demtrug rogon, ma be yog e Bible nu tomuren ni yim’ Jesus, “me athamgil Josef nge yan i ning downgin Jesus ngak Pilate.” (Mark 15:42, 43) Ere daki guy rogon ni nge mithag ni ir reb i gachalpen Jesus.

14. Mang e susun ni ngam rin’ ni faanra ga ma rus ko girdi’?

¹⁴ Ga ma rus ko girdi’ ni bod Josef, fa? Bay yu ngiyal’ ni ga ma tamra’ ni nga mog ko girdi’ ni gur reb e Pi Mich Rok Jehovah u skul ara tabon e maruwel, fa? Damur un ko machib ara taufe ni bochan e be magafan’um ko n’en nrayog ni nge lemnag e girdi’ u murung’agem, fa? Dab mu pag e pi n’ey ni nge talegem ndab mu rin’ e n’en ni ga manang nib fel’. Mmeybil ngak Jehovah u fithik’ e yul’yul’ ma gog ngak ni nge ayuwegem ni nge dab mu rus ni ngam rin’ e n’en nib m’agan’ ngay. Nap’an ni ga ra guy rogon ni be fulweg taban e meybil rom, ma aram e ra yib gelngim me yag ni ngam par ndab mu rus.—Isa. 41:10, 13.

15. Tomuren ni m’ug Jesus ngak pi gachalpen, ma mang e rrin’ed ni bochan e kar felfelan’gad? (Luke 24:52, 53)

¹⁵ Nap’an ni yim’ Jesus mi ri kireban’ pi gachalpen. Am susunnag ni gur bagayad. Gathi kemus ni ke yim’ reb e fager rorad nib t’uf rorad, ya ku daki moy e en be l’agan’rad ngak. (Luke 24:17-21) Machane nap’an ni yib i m’ug Jesus ngorad, me tay e tayim ni nge ayuwegrad ni ngar nanged rogon ni ke lebguy e yiiy u Bible.  Ngemu’ miki pi’ ba maruwel nib ga’ fan ni ngar rin’ed. (Luke 24:26, 27, 45-48) Nap’an ni sul Jesus nga tharmiy 40 e rran nga tomuren, ma daki kireban’rad ya ra felfelan’gad ni bochan e yad manang ni ke fos e Masta rorad ma ra ayuwegrad ni ngar rin’ed e maruwel ni ke tay chilen ngorad. Felfelan’ nra ted e k’aringrad ni ngar pininged e sorok ngak Jehovah ni gubin ngiyal’.—Mu beeg e Luke 24:52, 53; Acts 5:42.

16. Uw rogon nrayog ni ngad folwokgad rok pi gachalpen Jesus?

¹⁶ Uw rogon nrayog ni ngad folwokgad rok pi gachalpen Jesus? Gathi kemus nu m’on ngu tomuren e Puguran e rayog ni ngad liyorgad ngak Jehovah u fithik’ e felfelan’, ya ku rayog ni ngad rin’ed e re n’ey ni gubin ngiyal’. Ere ba t’uf ni ngad m’oneged Gil’ilungun Got u lan e yafos rodad. Bod ni boor e walag ni kar thilyeged e ngiyal’ ni yad ma maruwel riy ya nge yag nra uned ko machib, nge muulung, ma yad be tay chon e tabinaw rorad e fol Bible ni tabinaw ni gubin ngiyal’. Ku bay boch e walag ni kar dugliyed ndab ra yognaged boch e chugum ni ma lemnag boch e girdi’ nib t’uf, ya nge yag nra yoornaged e tin yad be rin’ u lan e ulung fa ranod ra pied e ayuw ko gin nib t’uf boch e tamachib riy. Yugu aram rogon nib t’uf ni ngad athamgilgad ya nge yag nda ululgad ko pigpig ni gad be tay ngak Jehovah, ma ke micheg nib ga’ e tow’ath nra pi’ ngodad ni faan gad ra m’oneg Gil’ilungun u lan e yafos rodad.—Prov. 10:22; Matt. 6:32, 33.

17. Mang e kam dugliy ni ngam rin’ u m’on ngu tomuren e Puguran ni yira tay ko biney e duw? (Mu guy e sasing.)

¹⁷ Gad be felfelan’ ni ngad madnomnaged e Puguran ko L’agruw Fen e Maruwel ko April 4. Machane dab mu son nga fini taw ko rofen nem mfin mu lemnag e pi n’en ni i rin’ Jesus nge yam’ ni tay nge t’ufeg ni kar dagew Jehovah ngodad. Ya ngam guy rogon ni ngaum par ni ga be lemnag e pi n’ey u m’on ngu tomuren e Puguran. Mu tay e tayim ni ngam beeg ma ga be fal’eg i lemnag e n’en ni bay ko fare chart ni kenggin e “Bin Tomur e Wik ko Yafos rok Jesus u Fayleng” ni bay ko fare babyor ni Tin Ma Rin’ e Piin Kristiano nge Machib ni Yad Ma Tay—Babyor ni Fan ko Muulung ko April 2019 ko page 4. Nap’an ni ga be beeg e pi thin nu Bible nem ni murung’agen Jesus, mag yaliy boch ban’en riy nra ayuwegem ni ngam pining e magar u lanin’um, me gelnag e t’ufeg nge felfelan’ rom, miki ayuwegem ni ngam par ndab mu rus. Ngemu’ mag lemnag boch e kanawo’ nrayog ni ngam dag riy nib ga’ fan u wan’um e n’en ke rin’ Jesus ni fan ngodad. Rayog ni nge pagan’um ngay nib ga’ fan u wan’ Jesus urngin ban’en ni ga ra rin’ u m’on ngu tomuren e Puguran ni yira tay ko biney e duw ni ngam lemnag e yam’ ni tay.—Rev. 2:19.