1. Mang fan ni bay yu ngiyal’ nrayog ni ngaud rusgad?

 GUBIN e girdi’ ni bay ba ngiyal’ nra taw ngay ma yad ma rus. Riyul’ ndakurud rusgad ko piin kar m’ad, ara pi moonyan’, ara n’en nra buch boch nga m’on ni bochan e kad filed e Bible. Machane ka gad be par u ba ngiyal’ ni be buch boch ban’en ‘nib gel e marus ni yibe tay riy’ ni bod e mahl, nge kireb ni yibe rin’ nib togopuluw ko motochiyel, nge m’ar. (Luke 21:11) Ku rayog ni ngad rusgad ko girdi’ nib muun ngay e pi am ni ma togopuluw ngodad ara girdien e tabinaw rodad ni ma togopuluw ko bin riyul’ e liyor. Ku bay boch e girdi’ ni ma magafan’rad ni bochan e yad be lemnag ndabiyog ni ngar athamgilgad u fithik’ reb e magawon ni yad be mada’nag e chiney ara reb nrayog ni ngar mada’naged boch nga m’on.

2. Mu weliy e n’en ni buch rok David u nap’an ni bay u Gath.

² Bay yu ngiyal’ ni i rus David. Bod nnap’an ni be gay Saul ni Pilung ni be guy rogon ni nge thang e fan rok, ma aram me dugliy ni nge mil nga Gath nreb e mach nib milfan ngak e pi Filistine. De n’uw nap’an nga tomuren, me nang Akish ni pilung nu Gath ni David e ir faen ni un tangnag ni bochan e ke thang e fan rok “yu ragag e biyu’” e pi Filistine. Ere “ri gel e marus rok” David. (1 Sam. 21:​10-12, BT) I magafan’ ko n’en nra rin’ Akish ngak. Ere mang e ayuweg David ni nge dabki rus?

3. Mang e ayuweg David ni nge dabki rus nrogon ni be yog e Psalm 56:​1-3, 11?

³ I weliy David rogon laniyan’ u nap’an ni immoy u Gath ko Psalm 56. Re tang nem e ri be tamilangnag e pi n’en ni i rus David ngay, machane ku be tamilangnag e n’en ni ayuweg ni nge dabki rus. Nap’an ni rus me pagan’ ngak Jehovah. (Mu beeg e Psalm 56:​1-3, 11.) Bay tapgin ni nge pagan’ David ngak Jehovah. I ayuweg Jehovah ni nge rin’ ban’en ni yugu ba thil machane ra yib angin. N’en ni rin’ e i dake aliliynag ir! Bochan e re n’ey, ma aram me adag Akish ni nge chuw David u rom ko bin  nge thang e fan rok. Ere yag ni nge mil David nge chuw u rom.​—1 Sam. 21:13–22:1.

4. Uw rogon nrayog ni ngari pagan’dad ngak Jehovah? Mu susunnag.

⁴ Ku arrogodad nrayog ni nge dab kud rusgad ni faanra pagan’dad ngak Jehovah. Machane uw rogon ni ngari pagan’dad ngak Jehovah nib ga’ ni faanra gad be rus? Baaray rogon nrayog ni ngan susunnag. Faanra kam nang ni bay ba mit e m’ar rom, ma som’on e sana ga ra rus. Machane rayog ni nge war e marus rom ni faanra be pagan’um ko togta rom. Rayog ni boor e girdi’ ni bay e re miti m’ar ney rorad ni ka i tafalaynagrad. Sana ra fal’eg e motoyil u nap’an ni ga be weliy salpem, ma re n’ey e ra micheg ngom nri manang rogon lanin’um. Ku rayog ni nge yog ni ngam un ngab mit e tafalay ni ke yag ni ngki yib angin ngak yugu boch e girdi’. Ku arrogodad nrayog ni ngari pagan’dad ngak Jehovah ni faan gad ra lemnag e n’en ke rin’, nge n’en be rin’ e chiney, nge n’en bayi rin’ ni fan ngodad boch nga m’on. Ireray e n’en ni rin’ David. Ere nap’an ni gad be weliy murung’agen boch e thin ni thagthagnag Jehovah ni bay ko Psalm 56, mag lemnag rogon nrayog ni ngari pagan’um ngak ma dab kum rus nga boch ban’en.

MANG E KE RIN’ JEHOVAH?

5. Mang e i fal’eg David i lemnag ya nge dabki rus? (Psalm 56:​12, 13)

⁵ Nap’an ni ka bay e yafos rok David u thatharen e riya’, ma i par ni be lemnag e n’en ke rin’ Jehovah. (Mu beeg e Psalm 56:​12, 13.) Aram e n’en ni i rin’ u n’umngin nap’an e yafos rok. Bod ni yu ngiyal’ e ma fal’eg i lemnag e tin ke sunmiy Jehovah, ma re n’ey e ma puguran ngak ni Jehovah e rib gel gelngin ma ri ma lemnag e girdi’. (Ps. 65:​6-9) Ku ma fal’eg i lemnag e n’en ke rin’ Jehovah ni fan ngak boch e girdi’. (Ps. 31:19; 37:​25, 26) Machane n’en nri ma fal’eg i lemnag e aram e pi n’en ke rin’ Jehovah ni fan ngak. Ka nap’an ni kab bitir David ni i ayuweg Jehovah ma be yoror rok ndabi buch ban’en rok. (Ps. 22:​9, 10) Ere dariy e maruwar riy ni pi n’ey ni i lemnag e ayuweg ni ngari pagan’ ngak Jehovah!

6. Mang e ra ayuwegdad ni nge pagan’dad ngak Jehovah u nap’an ni gad be rus?

⁶ Nap’an ni ga ra rus, mag fithem ni nge lungum, ‘Mang boch ban’en ni ke rin’ Jehovah?’ Mu lemnag e n’en ke sunmiy. Bod nnap’an ni gad ra ‘guy’ rogon ni ma ayuweg e arche’ nge pi floras, ni boch ban’en nde sunmiy ni bod yaan  maku dabiyog ni ngar liyorgad ngak, ma ma ayuwegdad ni ngari pagan’dad ni ku ra ayuwegdad. (Matt. 6:​25-32) Kum lemnag e n’en ke rin’ ni fan ko pi tapigpig rok. Sana rayog ni ngam fil murung’agen be’ u Bible ni dag nrib gel e michan’ rok, ara mu beeg murung’agen reb e tapigpig rok Jehovah e ngiyal’ ney. a Maku reb e ngkum fal’eg i lemnag rogon ni ke ayuwegem Jehovah. Uw rogon ni pow’iyem ko tin riyul’? (John 6:44) Uw rogon ni ke fulweg taban e meybil ni ga ma tay? (1 John 5:14) Ma uw rogon ni be yib angin ngom e maligach ni pi’ Fak nib t’uf rok ni gubin e rran?​—Efe. 1:7; Heb. 4:​14-16.

7. Uw rogon ni ayuweg e n’en ni buch rok Daniel ni profet Vanessa ni nge dabki rus?

⁷ Bay reb e walag nib pin u Haiti ni ka nog Vanessa b ngak ni mada’nag reb e magawon ni k’aring e marus ngak. Bay reb e pumoon ko gin ma par riy ni yugu ma callnag maku be yoloy e message nga i pi’ ngak ni gubin e rran ni be yog ngak ni nge fel’ e thin rorow. Machane ri yog Vanessa ngak nib tamilang ndabun ni nge rin’ ban’en ni aram rogon. Yugu aram rogon ma de tal, maku be guy rogon ni nge k’aring e marus ngak Vanessa. I yog Vanessa ni gaar: “I yib e marus ngog.” Ere mang e rin’ ya nge dabki rus? I rin’ boch ban’en ni nge ayuweg ir ndabi buch ban’en rok. Miki ayuweg reb e piilal ni nge non ko polis. Machane ki par ni be lemnag rogon ni i yororiy Jehovah e pi tapigpig rok kakrom. I yog ni gaar: “Cha’ nsom’on ni yib ngan’ug e Daniel ni profet. Non’ nga lan ba low nib sug e layon riy ni kar m’ad ko bilig ni yugu aram rogon ndawori bucheg ban’en. Machane me ayuweg Jehovah nde buch ban’en rok. Ere gog ngak Jehovah ni nge rin’ ban’en ko re magawon ney. Tomuren ma aram e da kug rus.”​—Dan. 6:​12-22.

MANG E BE RIN’ JEHOVAH E CHINEY?

8. Mang e ba mich u wan’ David? (Psalm 56:8)

⁸ Yugu aram rogon ni par e yafos rok David nga thatharen e riya’ u nap’an ni immoy u Gath, machane de pag ir ko pi n’en ni i rus ngay. Ya mel’eg ni nge lemnag e n’en be rin’ Jehovah ni fan ngak e ngiyal’ nem. Rayog ni nge guy David ni be pow’iy Jehovah, ma be yororiy, maku manang rogon laniyan’. (Mu beeg e Psalm 56:8) Ku bay boch e fager rok ni ur pied e athamgil nga laniyan’ ma yad be ayuweg ni bod Jonathan nge Ahimelek nreb e Prist nib Tolang. (1 Sam. 20:​41, 42; 21:​6, 8, 9) Ma yugu aram rogon ni baadag Saul ni Pilung ni nge thang e fan rok, machane me yag ni nge mil nge chuw rok. Ba mich u wan’ ni manang Jehovah e magawon rok nge rogon laniyan’ riy.

9. Mang e ma yaliy Jehovah u rarogodad ni be’ nge be’?

⁹ Faanra ga be mada’nag reb e magawon ni be k’aring e marus ngom, ma dab mu pagtalin ni manang Jehovah e magawon rom nge rogon lanin’um riy. Bod ni gathi kemus ni i guy gelngin e kireb ni un rin’ ngak piyu Israel u Egypt, ya ku manang “gelngin e gafgow ni yad be tay.” (Ex. 3:7) I tang David ni be yog ni be guy Jehovah gelngin e “gafgow” nge “kireban’” ni be tay. (Ps. 31:​7, NW) Ma nap’an ni be gafgow e girdi’ rok Got ni bochan boch ban’en nde fel’ nra dugliyed, ma aram miki “gafgow laniyan’.” (Isa. 63:​9, NW) Nap’an ni ga ra rus, ma manang Jehovah rogon lanin’um ma baadag ni nge ayuwegem ni nge dab kum rus.

10. Mang fan nib mich u wan’um ni ma lemnagem Jehovah ma ra ayuwegem ni ngam athamgil u fithik’ e magawon ni ke yib ngom?

¹⁰ Machane faanra ga be mada’nag reb e magawon ni be k’aring e marus ngom, ma rayog ni  ngaum lemnag ko uw rogon ni be lemnagem Jehovah. Ere mog ngak ni nge ayuwegem ya nge yag nim guy rogon e ayuw ni be pi’ ngom. (2 Ki. 6:​15-17) Ngemu’ mag lemnag e pi n’ey: Bay reb e welthin ara fulweg ni kan pi’ u nap’an e muulung ni ke pi’ gelngim, fa? Bay ba ken e babyor rodad, ara reb e video, ara reb e tang ni ke pi’ e athamgil nga lanin’um, fa? Bay be’ ni ke weliy ban’en ngom ara ke beeg reb e thin nu Bible ni ke pi’ e pagan’ ngom, fa? Ba mom nrayog ni ngad paged talin angin ni ke yib ngodad ni bochan e t’ufeg ni ma dag e pi walag ngodad nge rogon ni ma pi’ e Thin rok Got e athamgil nga lanin’dad. Machane ireray boch e tow’ath nrib manigil ni ke yib rok Jehovah. (Isa. 65:13; Mark 10:​29, 30) Be micheg ni ma lemnagem. (Isa. 49:​14-16) Maku be micheg ni bay rogon ni nge pagan’um ngak.

11. Mang e ayuweg Aida ni nge dabki rus?

¹¹ Aida ni ma par u Senegal e guy rogon ni ayuweg Jehovah u nap’an ni mada’nag reb e magawon. Bochan ni ir e th’abi ilal u fithik’ pi walagen, ma aram mi i lemnag e gallabthir rok ni ir e nge yognag e salpiy nib gaman ni fan ngak ni ku yow ba muun ngay. Machane tomuren ni momnag e par rok ya nge yag ni un ko pioneer, ma aram me tabab ni nge magawon ko salpiy. Ere damumuw chon e tabinaw rok ngak mu ur gathibthibnaged. I yog ni gaar: “Gu magar nri chey ma dabiyog ni nggu ayuweg e gallabthir rog me dabuy gubin e girdi’ dakenag. Ngemu’ mu ku gon’ e kireb nga daken Jehovah ni ke pag e magawon rog ke ga’.” Tomuren me rung’ag ba welthin nni pi’ u nap’an e muulung. Ki yog ni gaar: “I puguran e en ni pi’ e re welthin nem ngomad ndemtrug e n’en be k’aring e magafan’ ara marus ngodad, ma gubin ni manang Jehovah. Ere buchuuw ma buchuuw me yag ni ngki pagan’ug bayay ni gub t’uf rok Jehovah u daken e fonow ni i pi’ e piin piilal nge yugu boch e girdi’ ngog. Nap’an nug meybil ngak Jehovah ma aram me pagan’ug ngay bayay nra ayuwegeg, ma nap’an nug guy rogon ni be fulweg taban e meybil rog, ma aram mu kug thamiy ni ke gapas lanin’ug.” Munmun me pirieg Aida reb e maruwel nib gaman e salpiy nra yag riy ngak ni nge ayuweg ko pioneer ni be tay, me yag ni ngki ayuweg e gallabthir rok nge yugu boch e girdi’. I yog ni gaar: “Kug fil rogon ni ngari pagan’ug ngak Jehovah. Chiney e nap’an nug ra meybil, mab ga’ ni ma chuw e marus rog.”

 MANG E BAYI RIN’ JEHOVAH BOCH NGA M’ON?

12. Mang e ba pagan’ David ngay nrogon ni be yog e Psalm 56:9?

¹² Mu beeg e Psalm 56:9. Re verse ney e be tamilangnag yugu reb e ban’en ni ayuweg David ni nge dabki rus. Yugu aram rogon ni bay e yafos rok u thatharen e riya’, me fal’eg i lemnag e n’en nra rin’ Jehovah ni fan ngak boch nga m’on. Manang David nra ayuweg Jehovah ko ngiyal’ nib puluw ni nge rin’ riy. Bin riyul’ riy e ke yog Jehovah ni David e ra mang e bin migid e pilung u Israel. (1 Sam. 16:​1, 13) Mab mich u wan’ nra riyul’ gubin ban’en ni ke micheg Jehovah.

13. Mang e ba pagan’dad ngay nrayog ni nge rin’ Jehovah?

¹³ Mang e ke micheg Jehovah nra rin’ ni fan ngom? Darud lemnaged ni nge yororiydad ndabi yib e magawon ngodad. c Yugu aram rogon ma demtrug e re miti magawon nra yib ngom u lan e re m’ag ney, ma gubin nra chuweg Jehovah u lan e bin nib beech e fayleng. (Isa. 25:​7-9) Ba gel gelngin e En Ke Sunmiydad nrayog ni nge faseg e piin kar m’ad, me golnag fithik’ i dowdad nge lanin’dad, miki chuweg gubin e toogor rodad.​—1 John 4:4.

14. Mang e rayog ni ngad fal’eged i lemnag?

¹⁴ Nap’an ni ga ra rus, mag fal’eg i lemnag e n’en nra rin’ Jehovah boch nga m’on. Mu lemnag rogon lanin’um ndaki moy Satan, ma kan thang e piin nib kireb ma yigoo piin yad ba mat’aw e kar mageygad, ma gubin e rran ni gad be flont i yan. Bay ban’en nni yan u yaan u nap’an fare regional convention nni tay ko duw ni 2014 nni tamilangnag riy rogon nrayog ni ngad fal’eged i lemnag e athap rodad. I weliy reb e matam ngak chon e tabinaw rok rogon nrayog ni nge thil fapi thin ko 2 Timothy 3:​1-5 ni faanra be weliy rogon e par u Paradis. I gaar: “Yira yan nga lan e bin nib beech e fayleng ma rib gel e felfelan’ ni yira tay. Ya bayi par e girdi’ nra bagayad ma be lemnag bagayad, mab t’uf e tirok Got ban’en rorad, ma yad manang e gin ngar musgad riy, mab sobut’an’rad, ma yad ma n’uf Got, ma yad ma fol ko gallabthir rorad, ma yad ma pining e magar, ma yad ba yul’yul’, ma yad ma t’ufeg girdien e tabinaw rorad, ma yad ma pag lanin’rad, ma gubin ngiyal’ ni yad ma weliy fel’ngin e girdi’, ma yad ma t’ar lanin’rad, ma yad ba sumunguy, ma yad baadag e tin nib fel’, ma rayog ni nge pagan’uy ngorad, ma darur rin’ed boch ban’en nib pag rogon, mab t’uf Got rorad mab tomur e fafel u wan’rad, ma yad ma liyor ngak Got u fithik’ e yul’yul’; mu chugurnagem ko pi girdi’ ney.” Gimed ma weliy chon e tabinaw rom ara pi walag rogon e par romed u lan e bin nib beech e fayleng, fa?

15. Yugu aram rogon ni rus Tanja, machane mang e ayuweg ni nge par nib yul’yul’?

¹⁵ Bay reb e walag nib pin u North Macedonia ni ka nog Tanja ngak ni yag ni nge tal ndaki rus ni bochan e i fal’eg i lemnag e pi tow’ath nra yag ngak boch nga m’on. Ba gel e togopuluw ni i tay e gallabthir rok ngak ni bochan e be fil e Bible. I yog ni gaar: “Bay boch ban’en ni ug rusnag nri buch rog ni aram e n’en ni buch. Gubin yay nug ra yan ko muulung nggu sul me lieg e chitinag. Ki yog e gallabthir rog ngog ni yow ra thang e fan rog ni faan gu ra mang reb e Pi Mich Rok Jehovah.” Tomur riy mar tulufew Tanja nge chuw u tafen. Ere mang e rin’? I yog ni gaar: “Ug par nug be lemnag gelngin e felfelan’ nug ra tay ndariy n’umngin nap’an ni faan gu ra mel’eg ni nggu par ni gub yul’yul’. Kug lemnag rogon nra tow’athnageg Jehovah u lan e bin nib beech e fayleng ni yugu aram rogon ni bay boch ban’en nrayog ni nge mul u paag u lan e biney e m’ag, nge rogon ni yira pagtalin urngin ban’en nib kireb.” Ere par Tanja nib yul’yul’, me ayuweg Jehovah ni nge pirieg bang ni nge par riy. Chiney e ke leay Tanja reb e walag ni pumoon nib yul’yul’  ma yow ba felfelan’ ko pigpig ni yow ma tay u taabang u polo’ e tayim rorow.

MU GELNAG E PAGAN’ ROM E CHINEY

16. Mang e ra ayuwegdad ni ngad pared ndab da rusgad u nap’an ni gad ra guy ni ke buch fapi n’em ni kan yiiynag ko Luke 21:​26-28?

¹⁶ Nap’an nra yib fare gafgow nib ga’, ma ra “aw e girdi’ nga but’ ko marus.” Machane girdi’ rok Got e yad ra par ni yad ba mudugil ndab rrusgad. (Mu beeg e Luke 21:​26-28.) Mang fan ndab da rusgad? Ya kad filed rogon ni nge pagan’dad ngak Jehovah. Tanja ni faan kan weliy murung’agen e ke yog ni pi n’en ni i buch rok e be ayuweg u fithik’ boch e magawon ni be mada’nag e chiney nib mo’maw’. I yog ni gaar: “Kug fil ni gubin mit e magawon ni gad ra mada’nag nrayog ni nge ayuwegdad Jehovah ni ngad athamgilgad u fithik’ miki tow’athnagdad. Bay yu ngiyal’ nrayog ni ngad lemnaged ni yugu boch e girdi’ e yad be gagiyegnag rogon e n’en be buch rodad, machane bin riyul’ riy e kab gel Jehovah ngorad. Ma yugu aram rogon nib gel e magawon ni gad be mada’nag, machane bay ba ngiyal’ nra taw ngay me mus.”

17. Uw rogon nra ayuwegdad e thin nu Bible ni fan ko duw ni 2024? (Mu guy e sasing ni bay u wuru’.)

¹⁷ Boor ban’en e ngiyal’ ney ni ma k’aring e marus ngodad. Machane rayog ni ngad siyeged ndab da paged e marus ni nge mang ir e i gagiyegnagdad ni bod e n’en ni rin’ David. Thin nu Bible ni fan ko duw ni 2024 e aram e meybil rok David ngak Jehovah ni gaar: “Nap’an nra yib e marus ngog, me gur e pagan’ rog.” (Ps. 56:​3, BT) I weliy be’ ni boor ban’en u murung’agen e Bible ni manang murung’agen e re verse ney ni gaar: “Da i par David ni be lemnag e pi n’en ni i k’aring e marus ngak ara magawon rok. Ya i par ni be lemnag e En Nra Ayuweg u fithik’ e pi magawon rok.” Ere um lemnag e thin nu Bible ni fan ko re duw ney u nap’an e tin bay yib e pul nga m’on, nib ga’ nu nap’an ni kam mada’nag boch ban’en nra k’aring e marus ngom. Mu tay e tayim ni ngam lemnag e n’en ni i rin’ Jehovah kakrom, nge n’en be rin’ e chiney, nge n’en bayi rin’ boch nga m’on. Faan ga ra rin’ e re n’ey, ma aram e rayog ni nga mog fapi thin ni yog David ni faani gaar: “Be pagan’ug ngak Got ma da gur tamdag.”​—Ps. 56:​4, BT.