1-2. Mang boch e magawon nrayog ni nge mada’nag e pi tapigpig rok Jehovah ni yad ba yul’yul’?

 NAP’AN nra buch ban’en nib kireb rodad, ma rayog ni nge thil e par rodad nib tomgin ma sana dabki sul nga rogon ni immoy kafram. Bod ni bay reb e walag ni pumoon nib yul’yul’ ni ka nog Luis a ngak ni yib ba mit e cancer ngak. I yog e togta ngak nri in e pul ni ka bay me yim’. Monika nge figirngin e boor ban’en ni ur rin’ew ni fan ko pigpig rorow ngak Jehovah. Me yan i borran me nang Monika ni ke yoor e duw ni be mith figirngin ni ir reb e piilal nga i rin’ boch e ngongol nib kireb. Olivia nreb e walag nib pin nib muchugbil e thingari chuw u tafen ya bay bangi yoko’ nib gel ni be yib i yib ngaram. Nap’an ni sul me guy ni ke kirebnag e yoko’ e naun rok. Pi cha’ney e ri thil e par rorad nib tomgin u lan taaboch ngiyal’. Me gur, ke buch ban’en rom ni aray rogon, fa? Bay ban’en ni ke buch u lan e yafos rom nib tomgin ni kari thilyeg rogon e par rom, fa?

² Gadad e pi tapigpig rok Jehovah ni gad ba yul’yul’ e gad ma mada’nag e magawon maku gad ma m’ar ni bod e tin ka bay e girdi’. Ku rayog nib t’uf ni ngad athamgilgad u fithik’ e togopuluw ara gafgow ni be tay e girdi’ ngodad ni yad ma fanenikay e girdi’ rok Got. Der ma yororiydad Jehovah ndabi yib e pi magawon ney ngodad, machane ke micheg nra ayuwegdad. (Isa. 41:10) Faanra ayuwegdad, ma rayog ni ngad pared ni gad ba felfelan’, ma gad dugliy boch ban’en nib fel’ rogon, ma gad par ni gad ba yul’yul’ ngak u fithik’ e tin th’abi mo’maw’ e magawon ni gad ma mada’nag. Gad ra weliy ko re article ney aningeg e kanawo’ ni ma ayuwegdad Jehovah riy u nap’an nra buch boch ban’en rodad nrib gel e kireb riy. Ku gad ra weliy e n’en nib t’uf ni ngad rin’ed ya nge yag ni yib angin ngodad e ayuw ni ma pi’.

 RA YORORIYEM JEHOVAH

3. Mang e rayog ni nge mo’maw’ ngodad ni ngad rin’ed u nap’an nra buch ban’en rodad nrib gel e kireb riy?

³ Magawon. Nap’an nra buch ban’en rodad nrib gel e kireb riy, ma rayog ni nge mo’maw’ ni ngad lemgad ma gad dugliy ban’en nib fel’ rogon. Mang fan? Ya rayog ni bochan e ri be mooch’och lanin’dad. Rayog ni nga i magafan’dad nib pag rogon. Ku rayog ni ngad lemnaged ni gowa gad be deraw u bangi ban’en nib taath’ath ndad nanged e gin ngad sorgad ngay. Mu tay fanam i yan ko n’en ni lemnag fa gal walag nib pin ni kan weliy murung’agrow u nap’an ni yib e magawon ngorow. I yog Olivia ni gaar: “Tomuren ni kireb e naun rog u tan e yoko’, mug par nda kug nang e n’en ni nggu rin’ ma kari tomal lanin’ug.” Me Monika e weliy murung’agen e n’en ni rin’ figirngin nri kirebnag laniyan’ ni gaar: “Gathi kemus ni kireban’ug, ya gu lemnag ni gowa ke rugoy be’ ban’en nga gum’irchaeg. Da kug nang rogon ni nggu rin’ e pi n’en nug ma rin’ u reb e rran ngu reb. Dag lemnag nra buch ban’en rog ni aray rogon.” Ere uw rogon ni ke micheg Jehovah nra ayuwegdad u nap’an nri be tomal lanin’dad?

4. Mang e ke micheg Jehovah ngodad nrogon nib puluw ko Filippi 4:​6, 7?

⁴ N’en ma rin’ Jehovah. Ke micheg nra pi’ e “gapas rok” ngodad ni bod ni be yog e Bible. (Mu beeg e Filippi 4:​6, 7.) Re gapas ney e be yip’ fan e gapas ni ma tay lanin’dad nge gum’ircha’dad ni bochan e ba fel’ e tha’ u thildad Jehovah. Re gapas ney e ‘dabi chuchugur ni nge nang e girdi’ fan’ ni aram e be yip’ fan ni kab pag feni fel’ ndabi chugur ni nge taw rogon e lem rodad ngay. Bay ba ngiyal’ ni kam gin ngay ni ke gapas lanin’um u tomuren ni kam meybil nib gel ngak Jehovah, fa? Re gapas nem ni kam thamiy e aram e “gapas rok Got.”

5. Uw rogon ni ma yororiy e gapas rok Got lanin’dad nge gum’ircha’dad?

⁵ Ku be yog e re thin nu Bible ney nre gapas rok Got nem e “ra yororiy” ara ayuweg ‘gum’irchaem nge tafinay rom.’ Fare bugithin ni Greek ni kan pilyeg ni “yororiy” e bbugithin ni yima fanay ni nge sor fan ngab ulung i salthaw ni kan tayrad ni ngar yororiyed reb e mach ndabi cham e pi toogor ngay. Girdi’ ni yad ma par ko re mach nem e yad ma mol u fithik’ e gapas ya yad manang ni kan tay e salthaw ko pi garog riy. Ere ku arrogon nap’an nra yororiy e gapas rok Got gum’ircha’dad nge lanin’dad, ma rayog ni ngad pared nib gapas lanin’dad ya gad manang ndabi buch ban’en rodad. (Ps. 4:8) Mus ni faanra dabi chuw e magawon rodad nib papey, ma ka rayog ni ngad pared nib gapas lanin’dad ni bod Hannah. (1 Sam. 1:​16-18) Mab ga’ ni faanra ba gapas lanin’dad, ma aram e ba mom ni ngad lemgad nib fel’ rogon ma gad dugliy ban’en u fithik’ e gonop.

6. Mang e rayog ni ngad rin’ed ya nge yag ni yib angin e gapas rok Got ngodad? (Kum guy e sasing.)

⁶ N’en nib t’uf ni ngad rin’ed. Nap’an ni ga ra mada’nag e magawon, ma rayog ni nga mog ngak Jehovah ni nge yororiyem ni bod e piin yad be par ko fare mach ni yad ra pining e pi matanag riy  ni nge ayuwegrad. Ni uw rogon? Aram e ngam meybil nge mada’ ko ngiyal’ ni kam thamiy e gapas rok Got. (Luke 11:9; 1 Thess. 5:17) Luis ni faan kan weliy murung’agen e weliy rogon ni yag ni ngar athamgilgow Ana ni leengin u nap’an nra nangew nri ka in e pul ni ka bay me yim’. I yog ni gaar: “Nap’an nra buch ban’en ni aray rogon, ma rayog ni ngari mo’maw’ ni ngan dugliy boch ban’en ni bay rogon ko tafalay nge yugu boch ban’en. Machane meybil e aram e n’en ni kari pi’ e gapas nga lanin’mow u fithik’ e magawon romow.” I yog Luis nge leengin nib gel e meybil ni ur tew maku boor yay ni ur meybilgow ni yow be yog ngak Jehovah ni nge pi’ e gapas nga lanin’row, me ayuwegrow ndab ki wagagey lanin’row, miki pi’ e gonop ngorow ya nge yag nra dugliyew boch ban’en nib fel’ rogon. Ma kar guyew ni ke ayuwegrow. Faanra be buch ban’en rom nrib gel e kireb riy ma dab mu tal ko meybil, ya faanra um meybil ma ga ra thamiy e gapas rok Got ni be yororiy gum’irchaem nge lanin’um.​—Rom. 12:12.

RA TEM JEHOVAH NI GAB DUGIL

7. Mang e rayog ni ngad lemnaged u nap’an ni gad ra mada’nag reb e magawon nib mo’maw’?

⁷ Magawon. Nap’an ni gad ra mada’nag reb e magawon nib mo’maw’, ma rayog ni nge dab kud lemgad ma gad be ngongol ni bod ni gad ma rin’. Ku rayog ni nga i thilthil rogon lanin’dad ni bod bbarkow ni be yon’ e n’ew u maday i yan u nap’an ni ke yib bangi lang. Ana ni faan kan weliy murung’agen e yog ni boor rogon e lem ni i tay u tomuren ni yim’ Luis. I yog ni gaar: “Nap’an nra kireban’ug nib gel, ma aram me tabab ni nge kireban’ug ngog. Kug ma damumuw ni bochan e daki moy.” Ku bay yu ngiyal’ ni kireban’ Ana ni yigoo ir maku ma kankanan’ ni bochan e thingari dugliy e n’en ngan rin’ nga boch ban’en ni Luis e i rin’ nrib fel’ rogon. Yu ngiyal’ e ma lemnag ni gowa bay u maday u nap’an ni ke yib bangi lang. Ere uw rogon ni ma ayuwegdad Jehovah u nap’an nra tomal lanin’dad ni bochan e pi n’en gad be lemnag?

8. Mang e ke micheg Jehovah ngodad nrogon ni be yog e Isaiah 33:6?

⁸ N’en ma rin’ Jehovah. Ke micheg nra taydad ni gad ba dugil. (Mu beeg e Isaiah 33:6.) Nap’an nra yan bbarkow nga fithik’ bangi lang u maday ma rayog ni nge tabab ni nge thigthig. Ere boor e barkow ni kan ngongliy ni bay l’agruw ban’en u t’ay ni bod e fins nra reb ma bay u barba’ ni ma ayuweg fare barkow ni nge par nib dugil u maday. Gali n’ey e ma ayuweg e barkow ndabi thigthig nib gel ya nge yag ni par e girdi’ u daken ndabi buch ban’en rorad mar milekaggad nib fel’ rogon. Machane rayog ni nge maruwel e gali n’ey nib fel’ rogon u nap’an ni be yan fare barkow nga m’on. Ere ku arrogon Jehovah nra taydad ni gad ba dugil ni faan gad ra ulul ni ngad pigpiggad ngak u fithik’ e yul’yul’ u nap’an ni gad be mada’nag e magawon.

9. Uw rogon nrayog ni nge ayuwegdad e pi n’en kan ngongliy ni gad ma gay murung’agen ban’en riy ni ngad pared ni gad ba dugil? (Kum guy e sasing.)

⁹ N’en nib t’uf ni ngad rin’ed. Nap’an ni be tomal  lanin’um, mag athamgil u rogon nrayog rom ni ngam ulul ko meybil, ma ga be un ko muulung, nge machib. Sana rayog ni boor ban’en ndabkiyog ni ngam rin’ ni bod kafram, machane dab mu pagtalin ni Jehovah e der ma lemnag ni ngam rin’ boch ban’en ndabiyog rom. (Mu taarebrogonnag ko Luke 21:​1-4.) Kum tay e tayim ni fan ko fol Bible ni yigoo gur ma ga be fal’eg i lemnag. Mang fan? Ya boor ban’en ni ke pi’ Jehovah u daken e ulung rok nib puluw e thin riy ko Bible nrayog ni nge ayuwegdad ni ngad pared ni gad ba dugil. Ra ngam pirieg e n’en nib t’uf rom, ma rayog ni ngam fanay boch ban’en ni kan ngongliy ko thin rom nrayog ni ngan gay murung’agen ban’en riy ni bod fare JW Library^® app, nge Watch Tower Publications Index, nge Research Guide for Jehovah’s Witnesses. Monika ni faan kan weliy murung’agen e yog nnap’an nra tabab ni nge kireban’ nib gel, me fanay e pi n’en yima gay murung’agen ban’en riy ni nge gay boch e fonow riy. Bod ni ma gay murung’agen fare bugithin ni “damumuw.” Ma yu ngiyal’ e ma gay murung’agen fare thin ni “be’ ni ke chel be’ nib t’uf rok ke kirebnag laniyan’” ara fare bugithin ni “yul’yul’.” Ngemu’ me beeg e n’en bay riy nge taw ko ngiyal’ ni ke fel’ boch laniyan’. I yog ni gaar: “Nap’an nug ra tabab i gay murung’agen boch ban’en, ma rib gel e magafan’ nug be tay. Machane nap’an nug ra ulul i beeg e n’en bay riy, ma gowa bod ni ke yib Jehovah i gumuchmuch ngog. Nap’an ni ug beeg e pi n’em, ma aram mug nang ni manang Jehovah fan nug be lem ni aram rogon ma be ayuwegeg.” Biney e ayuw ni ma pi’ Jehovah e ku rayog ni nge ayuwegem ni ngam par ni gab dugil nge mada’ ko ngiyal’ ni ke gapas boch lanin’um.​—Ps. 119:​143, 144.

RA AYUWEGEM JEHOVAH

10. Mang e rayog ni ngad lemnaged u tomuren ni ke buch ban’en rodad nrib gel e kireb riy?

¹⁰ Magawon. Tomuren nra buch ban’en rodad nrib gel e kireb riy, ma bay boch e rran nrayog ni ngaud pared ndariy gelngidad ma be meewar lanin’dad. Rayog ni ngad pared ni kad boded be’ ni ma un ngab mit e gosgos ni ke maad’ad ni immoy ni ma mil nib papey ma chiney e be yan ni be sarap. Rayog ni bay boch ban’en nib mom ngodad ni ngaud rin’ed kafram ni ke mo’maw’ ni ngad rin’ed e chiney, fa reb e rayog ni kad dabuyed ni ngad rin’ed boch ban’en ni gad baadag ni gad ma rin’ kafram. Rayog ni gad baadag ni ngaud pared ni gad be mol ni bod e n’en ni buch rok Elijah. (1 Ki. 19:​5-7) Ere mang e ke micheg Jehovah nra rin’ u nap’an ni kad meewargad?

11. Ku mang reb e kanawo’ ni ma ayuwegdad Jehovah riy? (Psalm 94:18)

¹¹ N’en ma rin’ Jehovah. Ke micheg nra ayuwegdad. (Mu beeg e Psalm 94:18.) Rayog nib t’uf  ni ngan ayuwegdad ni ngad ululgad ko pi n’en gad ma rin’ ni fan ko pigpig rodad ngak Jehovah ni bod facha’ ni ma un ngab mit e gosgos ni ke maad’ad nib t’uf ban’en ni nge ayuweg u nap’an ni nge yan nga bang. Aram e ngiyal’ ni ke micheg Jehovah ni ke gaar: “I gag e Somol ni Got rom; i gag e gu ma pi’ gelngim ma be lungug ngom, Dab mu rus; ya bay gu ayuwegem.” (Isa. 41:13) Aray rogon ni ayuweg Jehovah David ni Pilung. Nap’an ni be mada’nag e magawon maku be magawonnag e pi toogor rok, me gaar ngak Jehovah: “Ga ma ayuwegneg.” (Ps. 18:​35, BT) Machane uw rogon ni ma ayuwegdad Jehovah?

12. Mini’ e rayog ni nge fanay Jehovah ni nge ayuwegdad u nap’an ni ke meewar lanin’dad?

¹² Rogon ni ma ayuwegdad Jehovah e aram e ba ga’ ni ma k’aring yugu boch e girdi’ ni ngar ayuweged gadad. Bod ni immoy bayay ni meewar laniyan’ David me yib Jonathan ni fager rok i guy ni nge pi’ e athamgil nga laniyan’. (1 Sam. 23:​16, 17) Ki mel’eg Jehovah Elisha ni nge ayuweg Elijah ko tin nib t’uf rok. (1 Ki. 19:​16, 21; 2 Ki. 2:2) Ngiyal’ ney e rayog ni nge fanay Jehovah chon e tabinaw rodad, ara pi fager rodad, ara piin piilal ni ngar ayuweged gadad. Machane nap’an nra kireban’dad ma rayog ni ngad adaged ni ngad paloggad ko girdi’ ni bochan e gad baadag ni ngad pared ni yigoo gadad. Re n’ey e ka ban’en ni ma buch. Ere mang e rayog ni ngad rin’ed ya nge yag ni ayuwegdad Jehovah?

13. Mang e ba t’uf ni ngad rin’ed ya nge yag ni ayuwegdad Jehovah? (Kum guy e sasing.)

¹³ N’en nib t’uf ni ngad rin’ed. Mu athamgil u rogon nrayog rom ndab mu palognagem ko girdi’. Nap’an ni gad ra palognaged gadad ko girdi’, ma aram e rayog ni ngaud pared ni yigoo gadad nge magawon rodad e gad be lemnag. Mit ney e lem e rayog ni nge magawonnag e pi n’en gad ma dugliy. (Prov. 18:1) Riyul’ ni gad gubin nib t’uf e tayim ni ngad pared ni yigoo gadad, nib ga’ nu nap’an ni ke buch ban’en rodad nrib gel e kireb riy. Machane faanra yigi pag n’umngin nap’an nda palognaged gadad ko girdi’, ma rayog ni ngad siyeged e n’en be fanay Jehovah ni nge ayuwegdad. Ere yugu aram rogon nrib mo’maw’ ni ngam rin’ e re n’ey, machane ngam pag chon e tabinaw rom, nge pi fager rom, nge piin piilal ni ngar ayuweged gur. Mu sap ngay ni aram rogon ni be ayuwegem Jehovah.​—Prov. 17:17; Isa. 32:​1, 2. 

RA FAL’EG JEHOVAH LANIN’UM

14. Mang boch ban’en nrayog ni nge buch rodad nra k’aring e marus ngodad?

¹⁴ Magawon. Bay yu ngiyal’ nrayog ni ngaud rusgad. Bay boch e tapigpig rok Got ni yad ba yul’yul’ u Bible ni ur weliyed murung’agen yu ngiyal’ ni ur mochuchgad ma yad be rus ni bochan e pi toogor rorad ara yugu boch e magawon ni ur mada’naged. (Ps. 18:4; 55:​1, 5) Ku arrogodad nrayog ni gad be mada’nag e togopuluw u  skul, ara tabon e maruwel, ara lan e tabinaw, ara togopuluw ni be yib ko am. Ku rayog ni gad be rus ni ngad m’ad ni bochan ba mit e m’ar ni bay rodad. Nap’an nra buch e pi n’ey, ma rayog ni ngad lemnaged ni gad bod bochi tir ndabiyog ni nge ayuweg ir. Ere uw rogon ni ma ayuwegdad Jehovah u nap’an nra buch boch ban’en ni aray rogon?

15. Mang e ra rin’ Jehovah ni fan ngodad nrogon ni be yog e Psalm 94:19?

¹⁵ N’en ma rin’ Jehovah. Ma fal’eg lanin’dad. (Mu beeg e Psalm 94:19.) Re tang ney e rayog ni nge yibnag ngan’dad bochi buliyel ni ke rus ndabkiyog ni nge mol ni bochan e be aw e n’uw nib gel ma be chub e dirra’ nib ga’ lingan. Rayog ni ngad susunnaged ni ke yib e chitamangin nga singgil rok, keb i chibiy ke fek, me dibey nge mada’ ko ngiyal’ ni ke mol. Yugu aram rogon ni ka be cham fagi lang, machane ke pagan’ fare tir ni bochan e be dibey e chitamangin. Nap’an ni gad ra mada’nag boch e magawon ni be k’aring e marus ngodad, ma rayog nib t’uf ni ngad lemnaged ni gowa be dibeydad e Chitamangidad ni bay u tharmiy nge mada’ ko ngiyal’ ni ke gapas boch lanin’dad. Ere uw rogon nrayog ni nge fal’eg Jehovah lanin’dad ni aray rogon?

16. Mang e rayog ni ngad rin’ed ya nge yag ni fal’eg Jehovah lanin’dad? (Kum guy e sasing.)

¹⁶ N’en nib t’uf ni ngad rin’ed. Um tay e tayim ni fan ngak Jehovah ni gubin ngiyal’ ni aram e ngaum meybil ngak ma ga be beeg e Thin rok. (Ps. 77:​1, 12-14) Faan ga ra rin’ e re n’ey, ma nap’an ni ga ra mochuch ma n’en nsom’on nsana ra yib ngan’um e aram e ngam ning e ayuw ngak e Chitamam ni bay u tharmiy. Mu weliy ngak Jehovah e n’en be k’aring e marus nge magafan’ ngom. Mu pag ni nge non ngom me fal’eg lanin’um u daken e thin nu Bible. (Ps. 119:28) Rayog ni ngam pirieg yu yang u lan e Bible nrayog ni nge fal’eg lanin’um u nap’an ni ga be rus. Bod nrayog ni nge pi’ fare babyor ni Job, nge Psalms, nge Proverbs, nge fapi thin ni yog Jesus ni bay ko Matthew ko guruy ni 6 e athamgil nga lanin’um. Nap’an ni ga ra meybil ngak Jehovah mag beeg e Thin rok, ma ga ra thamiy ni be fal’eg lanin’um.

17. Mang e rayog ni nge pagan’dad ngay?

¹⁷ Rayog ni nge pagan’dad ngay nra ayuwegdad Jehovah u nap’an ni ke buch boch ban’en rodad nrib gel e kireb riy. Dariy ba ngiyal’ ni gad ra par ni yigoo gadad. (Ps. 23:4; 94:14) Ke micheg Jehovah nra yororiydad, me taydad ni gad ba dugil, me ayuwegdad, me fal’eg lanin’dad. Be weliy e Isaiah 26:3 (BT) murung’agen Jehovah ni be gaar: “I gur, Somol, e ngam pi’ e gapas nib manigil ngak e piin nib mudugil lanin’rad ma gur e ma l’agan’rad ngom.” Ere nge pagan’um ngak Jehovah mag rin’ urngin e tin nrayog rom ya nge yag ni ayuwegem. Faan ga ra rin’, ma aram e ra yib gelngim ngki mada’ ko ngiyal’ ni ga be mada’nag e magawon.