1. Mang angin ni ma yib ngodad ni bochan e gad ma un ko fare Puguran ko yam’ ni tay Kristus ni gubin e duw?

 BA MUDUGIL nib m’agan’um ngay ni fare biyul e aram reb e tow’ath nrib ga’ fan! (2 Kor. 9:15) Rayog ni nge chugur e tha’ u thilmew Jehovah Got ni bochan e pi’ Jesus e yafos rok ni maligach. Ku rayog ni nge yag e athap ko yafos ni manemus ngom. Ere rib puluw ni ngad pininged e magar ngak Jehovah ni ir e ke pi’ fare biyul ni bochan e ri gad ba t’uf rok! (Rom. 5:8) I tababnag Jesus fare Puguran ko yam’ ni tay ni yima tay u gubin e duw ya ngaud pininged e magar ni bochan fare biyul, ma dab da paged talin e n’en kar rin’ew Jehovah ni fan ngodad.​—Luke 22:​19, 20.

2. Mang e gad ra weliy ko re article ney?

² Biney e duw e yira madnomnag e Puguran ko rofen ni Sabado ko April 12, 2025. Dariy e maruwar riy ni gad gubin ni gad be lemnag ni ngad uned ko re madnom ney. Ba ga’ angin nra yib ngodad ni faan gad ra tay e tayim u m’on ngu tomuren e Puguran ni ngad fal’eged i lemnag e n’en ke rin’ Jehovah nge Fak ni fan ngodad. Gad ra weliy ko re article ney e n’en be fil fare biyul ngodad u murung’agen Jehovah nge Fak. Ma bin migid e article e ra ayuwegdad ni ngad nanged rogon nra yib angin fare biyul ngodad nge rogon ni ngad daged nib ga’ fan u wan’dad.

N’EN BE FIL FARE BIYUL NGODAD U MURUNG’AGEN JEHOVAH

3. Uw rogon nrayog ni nge chuw bokum milyon e girdi’ u tan gelngin e denen nge yam’ ni bochan e yam’ ni tay taabe’? (Kum guy e sasing.)

³ Fare biyul e be fil ngodad ni Jehovah e ir reb e Got ni baadag e tin nib mat’aw ban’en. (Deut. 32:4) Ni uw rogon? Am lemnag e re n’ey: Bochan nde fol Adam, ma ke af e denen ngodad ni ma fekey i yan ko yam’. (Rom. 5:12) Ere l’og Jehovah Jesus ni nge pi’  fare biyul ya nge yag ni chuwegdad u tan gelngin e denen nge yam’. Machane uw rogon nrayog ni nge chuw boor e girdi’ u tan gelngin e denen nge yam’ ni bochan e yam’ ni tay taabe’ nib flont? I weliy apostal Paul ni gaar: “Rogon ni boor e girdi’ ni yan i par ni yad e tadenen ni bochan e taareb e girdi’ nde fol [ni aram e Adam], e ku aram rogon ni boor e girdi’ ni bayi mat’awnagrad Got ngak ni bochan taabe’ ni ke fol [ni aram Jesus].” (Rom. 5:19; 1 Tim. 2:6) Be yog Paul u roy ni gubin e girdi’ ni yad bogi tadenen, ma thingar ra m’ad ni bochan taabe’ nib flont nde fol rok Got. Ere bochan taabe’ nib flont ni fol, ma aram me yag ni ngad chuwgad u tan gelngin e denen nge yam’.

4. Mang fan ni yugu de pag Jehovah pi fak Adam ni yad ba yul’yul’ ni ngar pared ndariy n’umngin nap’an?

⁴ Rib t’uf ni nge yim’ Jesus ni fan ngodad, fa? Gur, dabiyog ni nga yigi pag Jehovah pi fak Adam ni yad ba yul’yul’ ni ngar pared ndariy n’umngin nap’an? Girdi’ ndawor ra flontgad e sana yad ra lemnag ni ireray e n’en nib puluw ni ngan rin’. Machane de mat’aw u wan’ Jehovah ni ngan rin’ e re n’ey. Ya faan yira rin’, ma ra yan i bod nde rin’ Adam e re denen ney nib ubchiya’ ma pi fak e gathi yad boch e tadenen. Machane gad manang nde riyul’ e re n’ey.

5. Mang fan nrayog ni nge pagan’dad ngay ni gubin ngiyal’ nra rin’ Jehovah e tin nib mat’aw?

⁵ Machane uw rogon ni faanra de pi’ Jehovah fare biyul, me togopuluw ko pi motochiyel rok u murung’agen e tin nib fel’ nge tin nib kireb ni aram e pag pi fak Adam ndar flontgad ni ngar pared ndariy n’umngin nap’an? Dabisiy nra lemnag e girdi’ ni ku rayog ni nge togopuluw ko pi motochiyel rok ni bay rogon nga yugu boch ban’en. Bod nrayog ni nge maruwar u wan’rad ko ra tay u gil’ gubin ban’en ni ke micheg fa danga’. Machane de t’uf ni nge magafan’dad nri buch e re n’ey. Bochan ni rin’ Jehovah e n’en nib mat’aw ni nge rin’ ni aram e pi’ Fak nib t’uf rok ni maligach, mab pagan’dad ngay ni gubin ngiyal’ nra rin’ e tin nib mat’aw.

6. Mang reb e kanawo’ ni be m’ug e t’ufeg rok Jehovah u daken fare biyul? (1 John 4:​9, 10)

⁶ Yugu aram rogon ni be ayuwegdad fare biyul ni ngad nanged ni Jehovah e ir reb e Got nib mat’aw, machane ri ku be ayuwegdad ni ngad nanged gelngin e t’ufeg rok ngodad. (John 3:16; mu beeg e 1 John 4:​9, 10.) Fare biyul e be fil ngodad ni gathi kemus ni baadag Jehovah ni nge yag e yafos ni manemus ngodad, ya ku baadag ni ngad manged bang ko tabinaw rok. Am lemnag e re n’ey: Nap’an ni denen Adam, me chuweg Jehovah u lan e tabinaw rok. Bochan e re n’ey, ma aram fan ni gad gubin nni gargelegdad ni gathi gad bang ko tabinaw rok Got. Machane bochan fare biyul ma ke n’ag Jehovah fan e denen rodad, ma ra munmun ma urngin e piin yad ra maruweliy e michan’ rorad ngak mar folgad rok e yad ra mang bang ko tabinaw rok. Mus ko chiney nrayog ni nge fel’ thildad Jehovah nge pi  walagdad. Riyul’ nri gad ba t’uf rok Jehovah!​—Rom. 5:​10, 11.

7. Uw rogon ni be ayuwegdad e gafgow ni tay Jesus ni nanged gelngin nri gad ba t’uf rok Jehovah?

⁷ Rayog ni ngad nanged gelngin nri gad ba t’uf rok Jehovah ni faan gad ra lemnag e n’en ni pag fan ya nge yag ni pi’ fare biyul. Ma yog Satan ndariy reb e tapigpig rok Got nra par nib yul’yul’ ngak u nap’an nra mo’maw’ ngak ni nge rin’ e re n’ey. Ere pag Jehovah Jesus ni nge gafgow u m’on ni nge yim’ ya nge micheg nde riyul’ e n’en be yog Satan. (Job 2:​1-5; 1 Pet. 2:21) I guy Jehovah e girdi’ ni ur moningnaged Jesus, nge pi salthaw ni ur toyed, ngemu’ min richibiy nga ba ley i gek’iy. Ki guy Fak ni yim’ nib gel e amith ko yam’ ni tay. (Matt. 27:​28-31, 39) Bay gelngin Jehovah ni nge taleg urngin e pi n’ey ndabi buch. Bod nnap’an ni gaar e girdi’: “Mu songad ngad guyed ko ra yib Got i ayuweg e chiney fa,” ma rayog ni nge rin’ Jehovah e re n’ey. (Matt. 27:​42, 43) Machane faan gomanga rin’ ban’en e ngiyal’ nem, ma dabiyog ni ngan pi’ fare biyul maku gad ra par ndariy e athap rodad. Ere pag Jehovah Fak ni nge gafgow nge mada’ ko ngiyal’ ni yim’ riy.

8. Gur, ri kireban’ Jehovah u nap’an ni guy Fak ni be gafgow, fa? Mu tamilangnag. (Kum guy e sasing.)

⁸ Bochan ni Got e gubin ma rayog rok, ma susun e dab da lemnaged nder ma thamiy e damumuw, ara felfelan’, ara kireban’! Kan sunmiydad ni gad bod yaan nrayog ni ngad damumuwgad, ara da felfelan’gad, ara kireban’dad, ere ba puluw ni ngad lemnaged ni ku aram rogon Jehovah. Be yog e Bible ni ma ‘kireb laniyan’’ maku ma ‘amith laniyan’.’ (Ps. 78:​40, 41) Kum lemnag e n’en ni buch rok Abraham nge Isak. I yog Jehovah ngak Abraham ni nge pi’ e taare pagel ni fak ni maligach. (Gen. 22:​9-12; Heb. 11:​17-19) Am lemnag gelngin e kireban’ nge gafgow ni tay laniyan’ Abraham u nap’an ni be fal’eg rogon ni nge li’ fak. Ere kum lemnag feni gel boch e kireban’ ni tay Jehovah u nap’an ni guy e girdi’ nri yad be gafgownag Fak ngemu’ mar thanged e fan rok!​—Mu guy fare video ni Imitate Their Faith​—Abraham, Part 2 ni bay ko jw.org.

9. Mang e rayog ni ngam fil u murung’agen e t’ufeg rok Jehovah ko Roma 8:​32, 38, 39?

⁹ Be fil fare biyul ngodad ndariy be’ ni gad ba t’uf rok ni bod gelngin nri gad ba t’uf rok Jehovah ni kub muun ngay e girdi’ rodad nri gad ba chugur ara bin th’abi fel’ e fager rodad. (Mu beeg e Roma 8:​32, 38, 39.) Dariy e maruwar riy ni kab gel fadad t’uf rok Jehovah nga rogon ni gad ma t’ufeged gadad. Ga baadag ni ngam par ndariy n’umngin nap’an, fa? Ri kab gel feni ri baadag Jehovah e re n’ey ni fan ngom. Ga baadag ni ngan n’ag fan e denen rom, fa? Ri kab gel feni ri baadag Jehovah e re n’ey ni fan ngom. Kemus nn’en ni baadag ni ngad rin’ed e ngad daged ni gad be pining e magar ko fare biyul ni ke pi’ nib tow’ath, me mich u wan’dad, ma gad fol rok. Fare biyul e aram reb e tow’ath nrib ga’ fan ni be  dag gelngin nri gad ba t’uf rok Jehovah. Ma nap’an ni gad ra yan nga lan e bin nib beech e fayleng, maku gad ra fil boch ban’en u murung’agen e t’ufeg rok Jehovah.​—Ekl. 3:11.

N’EN BE FIL FARE BIYUL NGODAD U MURUNG’AGEN JESUS

10. (a) Mang fan nri kireban’ Jesus ko yam’ nra tay? (b) Mang boch e kanawo’ ni micheg Jesus riy nde riyul’ e pi ban ni ke yog Satan u murung’agen Jehovah? (Kum guy fare kahol ni kenggin e “ Yul’yul’ ni Tay Jesus e Micheg ni Be Ban Satan.”)

¹⁰ Rib ga’ fan u wan’ Jesus rogon thin e Chitamangin. (John 14:31) Ri kireban’ ya re n’ey ni ka nog ni ke togopuluw ngak Got nge am e rayog ni nge kirebnag thin e Chitamangin. Aram fan ni meybil ni gaar: “Chitamag, faanra yog ma ga fek e re kap ney ngam chuweg rog!” (Matt. 26:39) Bochan ni par Jesus nib yul’yul’ ngak Jehovah nge mada’ ko yam’, ma aram mi ri micheg nde riyul’ e pi ban ni ke yog Satan u murung’agen e Chitamangin.

11. Uw rogon ni dag Jesus nrib t’uf e girdi’ rok? (John 13:1)

¹¹ Ku be fil fare biyul ngodad nri ma lemnag Jesus e girdi’, nib ga’ ni pi gachalpen e ri ma lemnagrad. (Prov. 8:31; mu beeg e John 13:1.) Bod ni manang ni bay boch ban’en u rogon e maruwel nra rin’ u fayleng nib gel e mo’maw’ riy, nib ga’ ni yam’ nra tay nib gel e amith riy. Machane i rin’ urngin e pi n’ey ni yugu aram rogon nib mo’maw’ ni gathi kemus ni bochan e aram e maruwel ni ke pi’ Jehovah ngak ni nge rin’, ya ri bochan e ba t’uf e girdi’ rok. I dag nrib t’uf e girdi’ rok ni aram e i machibnagrad, ma be fil boch ban’en ngorad, ma be ayuwegrad. Mus ko rofen ni yim’ riy, me maluknag rifrifen ay e pi apostal rok me yog boch e thin ngorad nra fal’eg lanin’rad miki fil boch ban’en ngorad. (John 13:​12-15) Ma nap’an ni kan tining ko fare ley i gek’iy me yog boch e thin ngak be’ nib pumoon nib kireb ni kun tining nga ba ley i gek’iy u tooben nra pi’ e athap ngak, miki yog ngak be’ ni nge ayuweg e  chitiningin. (Luke 23:​42, 43; John 19:​26, 27) Ere gathi kemus ni m’ug e t’ufeg rok Jesus u daken e yam’ ni tay, ya ki m’ug u n’umngin nap’an e yafos rok u fayleng.

12. Uw rogon ni ka be ulul Jesus ni nge rin’ boch ban’en ni fan ngodad?

¹² Yugu aram rogon ni gathi bay ki yim’ Kristus “biid,” machane ka be rin’ boch ban’en ni fan ngodad. (Rom. 6:10) Ni uw rogon? Ka be ulul ni nge maruwel ni nge pi’ boor ban’en nib manigil ngodad ni ke mab kanawoen u daken fare biyul. Am lemnag e n’en be rin’ e ngiyal’ ney. Ir e Pilung rodad, nge Prist Nth’abi Tolang, nge lolugen e ulung. (1 Kor. 15:25; Efe. 5:23; Heb. 2:17) Ir e be yarmiy fare maruwel ni yibe rin’ ni aram e yibe kunuy e piin kan dugliyrad nge fare ulung nib ga’, nre maruwel ney e yira mu’nag u m’on ni nge mus fare gafgow nib ga’. a (Matt. 25:32; Mark 13:27) Ku be guy rogon ni nge yag e tin nib t’uf ko pi tapigpig rok ni yad ba yul’yul’ ni fan ko tirok Got ban’en e ngiyal’ ney ko tin tomuren e rran. (Matt. 24:45) Ma nap’an e Gagiyeg Nra Tay u Lan Fare Biyu’ i Duw, maku ra ulul ni nge rin’ boch ban’en ni fan ngodad. Ere riyul’ ni ke pi’ Jehovah Fak ni fan ngodad!

UM FIL BOCH BAN’EN NIB BEECH

13. Faanra um fal’eg i lemnag boch ban’en, ma uw rogon nra ayuwegem ni ngam ulul i fil murung’agen rogon ni ma t’ufegdad Got nge Kristus?

¹³ Rayog ni ngam ulul i fil murung’agen rogon ni ma t’ufegdad Jehovah Got nge Kristus Jesus ni faanra um fal’eg i lemnag murung’agen e re n’ey. Sana rayog ni ngam fal’eg i beeg murung’agen e n’en bay u reb ara in fapi Gospel u m’on ngu tomuren e Puguran ko re duw ney. Dab mu guy rogon ni ngam beeg boor e guruy taab yay. Ya ngam beeg nib sagaal mu kum yaliy boch i fan nsusun e ngad t’ufeged Jehovah nge Jesus. Ngemu’ mag weliy e n’en kam fil riy ngak yugu boch e girdi’.

14. Faan gad ra gay murung’agen boch ban’en, ma uw rogon nra ayuwegdad ni ngad ululgad i fil murung’agen fare biyul nge ku boch e machib nrogon nib puluw ko Psalm 119:97? (Kum guy e sasing.)

¹⁴ Faanra ke yoor e duw ni kam un ko tin riyul’ ma sana rayog ni ngam lemnag ko ka bay boch ban’en nib beech nrayog ni ngam fil u murung’agen rogon ni baadag Got e tin nib mat’aw ban’en, nge t’ufeg rok, nge fare biyul fa dariy. Bin riyul’ riy e gubin ngiyal’ ni bay boch ban’en nib beech nrayog ni ngad filed u murung’agen e pi n’ey nge yugu boch ban’en. Ere mang e rayog ni ngam rin’? Mu beeg ma ga be fil boch ban’en ni bay u lan e pi babyor rodad. Faan ga ra pirieg  reb e thin nu Bible ni gathi ri ga be nang fan, mag gay murung’agen. Ngemu’ mag fal’eg i lemnag e n’en kam pirieg riy u lan reb e rran nge n’en be yog ngom u murung’agen Jehovah, nge Fak, nge rogon ni gab t’uf rorow.​—Mu beeg e Psalm 119:97.

15. Mang fan nsusun e ngad ululgad i fil boch ban’en nib beech u Bible?

¹⁵ Faanra de yag ni ngam pirieg ban’en nib beech ara ban’en ni ga baadag ni ngam fil murung’agen u gubin yay ni ga ra beeg e Bible ara mu gay murung’agen ban’en, ma dabi mulan’um. Mu susunnag ni gur be’ ni ga be gay e gol. Ba ga’ ni be’ ni ma gay e gol e ba t’uf ni nge magow u lan boor e awa ara rran u m’on ni nge pirieg boch e gol. Yugu aram rogon ma dabi mulan’ maku ra ulul ko magow ni bochan e urngin yang e gol nra pirieg ni mus ni faanra rib achig, ma rib ga’ fan u wan’. Ere gubin ban’en nib beech ni gad ra fil u Bible e kab ga’ fan ko gol! (Ps. 119:127; Prov. 8:10) Mu ulul i beeg e Bible mag gay murung’agen boch ban’en nib beech nrayog ni ngam fil riy.​—Ps. 1:2.

16. Uw rogon nrayog ni ngad folwokgad rok Jehovah nge Jesus?

¹⁶ Nap’an ni ga be fil e Bible rom, mag lemnag boch e kanawo’ nrayog ni ngam fol ko n’en kam fil riy. Bod nrayog ni ngam folwok u rogon ni ma rin’ Jehovah boch ban’en nib mat’aw ni aram e nge taareb rogon e ngongol rom ngak urngin e girdi’. Mu folwok u rogon ni t’ufeg Jesus e Chitamangin nge girdi’, ni aram e nge m’agan’um ngay ni ngam gafgow ni fan nga fithingan Jehovah mu kum pag fam ni fan ngak pi walagem. Kum folwok rok Jesus ni aram e ngam machibnag e girdi’ ya nge yag ni mab e kanawo’ ngorad ni ngki m’agan’rad ko fare tow’ath nrib manigil ni ke pi’ Jehovah ndabiyog puluwon rodad.

17. Mang e gad ra weliy ko bin migid e article?

¹⁷ Faan gad ra ulul i fil murung’agen fare biyul, ma aram e ra i gel i yan e t’ufeg rodad ngak Jehovah nge Jesus. Ma angin nra yib riy e ku ra gel e t’ufeg rorow ngodad. (John 14:21; Jas. 4:8) Ere ngad ululgad ni ngad maruwelgad nga urngin ban’en ni ke pi’ Jehovah ngodad ya nge yag ni ngaud filed murung’agen fare biyul. Bin migid e article e gad ra weliy riy boch e kanawo’ nrayog ni nge yib angin fare biyul riy ngodad nge rogon nrayog ni ngad daged ni gad be pining e magar ko t’ufeg ni ke dag Jehovah ngodad.