1. Mang reb e ban’en nib mo’maw’ nthingar da rin’ed ni gad gubin?

 GUBIN e rran nib t’uf ni ngad dugliyed boch ban’en. Bay boch ko pi n’ey nib mom ni ngan dugliy ni bod e n’en ngam kay ni kakadbul ara ngiyal’ ni ngam mol ko blayal’. Bay yugu boch ban’en nib mo’maw’ ni ngan dugliy. Pi n’ey e sana bay rogon nga fithik’ i dowdad, ara felfelan’ rodad, ara piin nib t’uf rodad, ara liyor rodad. Gad baadag ni nge yib angin e tin gad ma dugliy ngodad nge chon e tabinaw rodad. Ma bin th’abi ga’ fan riy e gad be athapeg nra fel’ u wan’ Jehovah.​—Rom. 12:​1, 2.

2. Mang boch ban’en nra ayuwegem ni ngam dugliy ban’en nib fel’ rogon?

² Dabisiy ni ga ra dugliy ban’en nib fel’ rogon ni faan ga ra (1) guy rogon ni ngam nang e tin riyul’ u murung’agen, (2) mu lemnag rogon laniyan’ Jehovah ko fare n’em, mag (3) fal’eg i lemnag e pi n’en nrayog ni ngam mel’eg ni ngam rin’. Ireray e n’en gad ra weliy ko re article ney, maku ra ayuwegdad ni ngad filed rogon ni ngad nanged e tin nib mat’aw ko tin nde mat’aw.​—Prov. 2:11.

MU GUY ROGON NI NGAM NANG E TIN RIYUL’ U MURUNG’AGEN

3. Mu susunnag fan nib t’uf ni ngam guy rogon ni ngam nang e tin riyul’ u murung’agen ban’en u m’on ni ngam dugliy e n’en ngam rin’.

³ N’en som’on nthingar mu rin’ ya nge yag nim dugliy ban’en nib fel’ rogon e aram e ngam guy rogon ni ngam nang e tin riyul’ u murung’agen. Mang nib ga’ fan e re n’ey? Mu susunnag ni ke yan be’ i guy reb e togta ni bochan e ke m’ar nib ubchiya’. Gur, ra dugliy fare togta e re miti tafalay ni ngan tay ngak facha’ u m’on ni nge skengnag ara fith boch e deer ngak, fa? Danga’. Ere ku arrogon nrayog ni ngam dugliy ban’en nib fel’ rogon ni faan ga ra guy rogon ni ngam nang e tin riyul’ u murung’agen fare n’em ni bay rogon ko n’en ngam dugliy. Uw rogon nrayog ni ngam rin’ e re n’ey?

4. Uw rogon nrayog ni ngam nang e tin riyul’ u murung’agen ban’en nrogon nib puluw ko Proverbs 18:13? (Kum guy e sasing.)

⁴ Ba ga’ nrayog ni ngam nang e tin riyul’ u murung’agen ban’en  ni faan ga ra fith boch e deer. Susun e kan piningem nga reb e abich. Ere gur, ga ra un? Faanra dam nang e en ke yarmiy fare abich ara n’en ke lemnag ni ngan rin’, mab t’uf ni ngam fith boch e deer ngak ni bod ni nge lungum: “Uw e ngan tay e re abich ney riy, ma wuin e yira tay? Uw urngin e girdi’ nra un ngay? Mini’ e ra yaliy rogon e n’en nra un rin’ riy? Mini’ e ra un ngay? Mang e yira rin’ riy? Yira pi’ e alkul riy fa danga’?” Fulweg ko pi deer ney e ra ayuwegem ni ngam dugliy e n’en nib fel’ ni ngam rin’.​—Mu beeg e Proverbs 18:13. a

5. Mang e susun ni ngam rin’ u tomuren ni kam nang e tin riyul’ u murung’agen ban’en?

⁵ Bin migid e tomuren ni kam nang e tin riyul’ u murung’agen fare n’em, mag fal’eg i lemnag urngin ban’en ni bay rogon ngay. Bod ni, uw rogon ni faanra kam nang ni bay boch e girdi’ ni yad ra un ko fare abich ndariy fan e pi kenggin e motochiyel u Bible u wan’rad, ara yira pi’ e alkul riy machane dariy be’ ni kan tay ni nga i yaliy e girdi’ ni nge dabin unum nib pag rogon? Ga be lemnag nrayog ni nge sum e wagey ko re abich ney? (1 Pet. 4:3) Maku reb e, uw rogon ni faanra magawon e ngiyal’ ni yira tay e re abich ney riy ko ngiyal’ ni ga ma un ko muulung ara machib? Nap’an ni ga ra nang urngin ban’en ni bay rogon ko re n’ey, ma ra mom ni ngam dugliy e n’en nib fel’ ni ngam rin’. Machane ku bay ban’en nsusun e ngam rin’. Ga manang rogon lanin’um ko re n’ey; machane uw rogon laniyan’ Jehovah riy?​—Prov. 2:6.

MU LEMNAG ROGON LANIYAN’ JEHOVAH RIY

6. Mang fan nsusun e ngad yibilayed e ayuw rok Jehovah nrogon ni be yog e James 1:5?

⁶ Mog ngak Jehovah ni nge ayuwegem ni ngam nang rogon laniyan’ ko fare n’em. Ke micheg nra  pi’ e gonop ngodad ni ngad nanged ko ra m’agan’ ko n’en gad ra dugliy fa danga’. Ra pi’ e re gonop ney ngak “urngin e girdi’.”​—Mu beeg e James 1:5.

7. Uw rogon nrayog ni ngam nang rogon laniyan’ Jehovah u ban’en? Mu susunnag.

⁷ Tomuren ni kam meybil ngak Jehovah ni nge pow’iyem, mag tiyan’um nga rogon nra fulweg taban e meybil rom. Baaray rogon nrayog ni ngan susunnag: Faanra kam malog u nap’an ni ga be milekag, ma sana ga ra ning e ayuw ngak be’ ni ma par ko gin’em. Machane gur, ga ra pi’ keruum ngam man u m’on ni nge yog ban’en, fa? Danga’, ya ga ra motoyil nib fel’ rogon ni nge yog ngom e gin ngam sor ngay. Ere ku arrogon nu tomuren ni kam meybil ngak Jehovah ni nge pi’ e gonop ngom, mag guy rogon ni ngam nang rogon nra fulweg taban e meybil rom ni aram e ngam guy ko tin ngan e motochiyel nge kenggin e motochiyel u Bible e bay rogon ko n’en ngam dugliy. Bod nnap’an ni ga be dugliy ko ngam un ara dab mu un ko fare abich ni faan kan weliy murung’agen, ma rayog ni ngam lemnag e n’en be yog e Bible u murung’agen e madnom ni yima muun rrum riy, nge piin nib kireb e ngongol rorad ndab un chag ngorad, nge fan nib t’uf ni ngam m’oneg Gil’ilungun Got mfini migid e n’en ga baadag ni ngam rin’.​—Matt. 6:33; Rom. 13:13; 1 Kor. 15:33.

8. Mang e rayog ni ngam rin’ ni faanra ba t’uf e ayuw rom ni ngam pirieg murung’agen e n’en ga be gay? (Kum guy e sasing.)

⁸ Yugu aram rogon, ma rayog ni bay yu ngiyal’ ni kab t’uf e ayuw rom ni ngam pirieg murung’agen e n’en ga be gay. Ere rayog ni ngam ning e ayuw ngak reb e walag ni ke ilal ko tirok Got ban’en. Machane ku rayog ni ngam gay murung’agen boch ban’en ni gur rom. Boor murung’agen boch ban’en u lan e pi n’en gad ma fanay ko fol Bible ni bod fare Research Guide for Jehovah’s Witnesses nge Scriptures for Christian Living. Dab mu pagtalin ni n’en ga be nameg e  aram e ngam dugliy ban’en nra m’agan’ Jehovah ngay.

9. Uw rogon me yag ni ngad nanged nra m’agan’ Jehovah ko n’en gad ra dugliy? (Efesus 5:17)

⁹ Uw rogon me yag ni ngad nanged nra m’agan’ Jehovah ko n’en gad ra dugliy? Som’on e ba t’uf ni ngad nanged Jehovah nib fel’ rogon. Be yog e Bible ni “faanra ga manang Faanem nib Thothup, ma aram e ba tamilang lanin’um.” (Prov. 9:​10, BT) Arrogon, ra yag e bin riyul’ e tamilangan’ ngodad ni faan gad ra nang pi fel’ngin Jehovah, nge n’en nib m’agan’ ngay, nge n’en baadag ara n’en nib fanenikan. Mu fithem ni nge lungum, ‘Mang e rayog ni nggu dugliy nra m’agan’ Jehovah ngay nrogon nib puluw ko n’en gu manang u murung’agen?’​—Mu beeg e Efesus 5:17.

10. Mang ni kab ga’ fan e pi kenggin e motochiyel u Bible ko yalen ko tabinaw rodad ara nam rodad?

¹⁰ Bay yu ngiyal’ nib t’uf ndab darod nga laniyan’ e piin yad ba chugur ngodad ya nge yag nda rin’ed e n’en nib m’agan’ Jehovah ngay. Bod ni bay boch e gallabthir ni yad baadag ni ngar ayuweged pi fakrad nrayog ni ngar towasariyed reb e ppin ni fakrad ni nge leay reb e pumoon ni boor salpiyen ni yugu aram rogon nde m’on u wan’ e tha’ u thilrow Jehovah. Riyul’ ni yad baadag ni ngar ayuweged fakrad ni nge fel’ e par rorad, machane mini’ e ra ayuweg ni nge mon’og ko tirok Got ban’en? Uw rogon e re n’ey u wan’ Jehovah? Bay e fulweg riy ko Matthew 6:33. Be pi’ e re thin ney e athamgil nga laniyan’ e piin Kristiano ni ngar ‘m’oneged u wun’rad e gagiyeg rok Got.’ Yugu aram rogon ni gad ma tayfan e gallabthir rodad nge girdi’ u lan binaw rodad, machane n’en th’abi ga’ fan u wan’dad e ngad felfelan’naged Jehovah.

MU FAL’EG I LEMNAG E PI N’EN NRAYOG NI NGAM MEL’EG NI NGAM RIN’

11. Mang fel’ngin e kan weliy murung’agen ko Filippi 1:​9, 10 nra ayuwegem ni ngam fal’eg i lemnag e pi n’en nrayog ni ngam mel’eg ni ngam rin’?

¹¹ Tomuren ni kam fal’eg i lemnag e pi kenggin e motochiyel ni bay rogon ko n’en ngam dugliy, mab t’uf ni ngam fal’eg i lemnag e pi n’en nrayog ni ngam mel’eg ni ngam rin’. (Mu beeg e Filippi 1:​9, 10 b; mu guy e study note ko fare thin ni “full discernment.”) Faanra ga manang e n’en nib thil u thilin e tin nib mat’aw nge tin nde mat’aw, ma ra ayuwegem ni ngam lemnag u m’on riy e n’en nrayog ni nge buch ni bochan e n’en kam mel’eg ni ngam rin’. Bay yu ngiyal’ nib mom ni ngam dugliy e n’en ngam rin’. Machane gathi gubin ngiyal’ nib mom ni ngam nang e n’en ngam dugliy. Ere re fel’ngin ney e ra ayuwegem ni ngam dugliy ban’en nib fel’ rogon ngki mada’ ko ngiyal’ ni kam mada’nag ban’en nib mo’maw’.

12-13. Faanra ga manang e n’en nib thil u thilin e tin nib mat’aw nge tin nde mat’aw, ma uw rogon nra ayuwegem ni ngam dugliy ban’en nib fel’ rogon ni bay rogon ko maruwel ni yima un ngay?

¹² Am lemnag e re n’ey. Ga be gay barba’ e maruwel ni ngam un ngay ya nge yag nim ayuweg e tabinaw rom. Ma l’agruw e maruwel ni bay nrayog ni ngam un ngay. Ere kam guy rogon ni ngam nang gubin ban’en u murung’agen fare maruwel ni bod e re miti n’en ni ngam rin’, nge rofen ni ngam maruwel riy, nge n’umngin nap’an ni ngam milekag ngaram, nge ku boch ban’en. Gal maruwel ney e der togopuluw ko Bible. Sana bay reb riy ni ga baadag ni bochan e re miti maruwel ni ngam rin’ ara bochan nib tolang puluwom riy. Machane ku bay boch ban’en nib t’uf ni ngam lemnag u m’on ni ngam dugliy e n’en ngam rin’.

¹³ Bod ni, bay reb ko gal maruwel ney nra magawon ko rofen ni ga ma un riy ko muulung, fa? Ma bay reb nra magawonnag e ngiyal’ nib t’uf ni ngam ayuweg e tabinaw rom ni ngar pared nib pagan’rad, ma yad ba felfelan’, ma yad ba chugur ngak Jehovah, fa? Ga ra fith boch e deer ni bod e gal deer ney ma ra ayuwegem ni ngam m’oneg e “tin ir e th’abi ga’ fan,” ni aram e liyor rom nge tin nib t’uf ko tabinaw rom mfini migid e salpiy.  Ga ra rin’ e re n’ey, ma rayog ni ngam dugliy ban’en nra tow’athnagem Jehovah riy.

14. Faanra gad manang e n’en nib thil u thilin e tin nib mat’aw nge tin nde mat’aw ma gad ma dag e t’ufeg, ma uw rogon nra ayuwegdad ndab da magawonnaged laniyan’ yugu boch e girdi’?

¹⁴ Faanra gad manang e n’en nib thil u thilin e tin nib mat’aw nge tin nde mat’aw, ma ra k’aringdad ni ngad lemnaged e n’en nra rin’ e n’en gad ra dugliy ngak yugu boch e girdi’ ya nge dab da ‘magawonnaged laniyan’ be’.’ (Fil. 1:10) Ba ga’ fan e re n’ey u nap’an ni gad be dugliy e re miti mad ni ngad chuwgad ngay nge rogon ni ngad fal’eged yaadad. Bod nrayog ni bay ba mit e mad ni gad baadag ni gad ma chuw ngay ara bay rogon ni gad baadag ni gad ma fal’eg yaadad. Machane uw rogon ni faanra magawon laniyan’ boch e girdi’ u lan e ulung ara wuru’ e ulung ni bochan e re n’ey? Faanra gad manang e n’en nib thil u thilin e tin nib mat’aw nge tin nde mat’aw, ma ra ayuwegdad ni ngad ted fan rogon lanin’rad. T’ufeg e ra k’aringdad ni ngad tafinaynaged e tin nib fel’ ngak yugu “boch e girdi’,” ma gad nang e gin ngad musgad riy. (1 Kor. 10:​23, 24, 32; 1 Tim. 2: 9, 10) Faan gad ra rin’ e re n’ey, ma aram e gad ra dugliy ban’en nra m’ug riy nib t’uf e girdi’ rodad ma gad be tay farad.

15. Mang e susun ni ngam lemnag u m’on ni ngam rin’ ban’en nib ga’ fan ni kam dugliy?

¹⁵ Faanra ba t’uf ni ngam dugliy ban’en nib ga’ fan, mag lemnag e n’en nib t’uf ni ngam rin’ ni bochan e n’en kam dugliy. I yog Jesus ngodad ni ngad ‘tafinaynaged rogon puluwon’ e n’en gad be lemnag ni ngad rin’ed. (Luke 14:28) Ere mu lemnag urngin e tayim, nge chugum, nge athamgil nib t’uf ni ngam tay ya nge yag nim rin’ e n’en kam dugliy. Bay yu ngiyal’ nrayog ni ngam non ngak chon e tabinaw rom ya nge yag nim nang e n’en nib t’uf ni nge rin’ be’ nge be’, ya nge yag nra ayuweged gur ni nge yib angin e n’en kam dugliy. Mang nib ga’ fan e re n’ey? Ya rayog ni nge m’ug riy ni bay boch ban’en nib t’uf ni ngam thilyeg ko n’en kam dugliy ara bay ban’en nrayog ni ngam rin’ ni kab fel’ boch. Ma nap’an ni ga ra uneg chon e tabinaw rom ko n’en ngam dugliy mag motoyil ngorad ni ngar weliyed lanin’rad riy, ma aram e ra m’agan’rad ngay ni ngar ayuweged gur ni nge yib angin e n’en kam dugliy.​—Prov. 15:22.

MU DUGLIY BAN’EN NRA YIB ANGIN

16. Mang boch ban’en nra ayuwegem ni ngam dugliy ban’en nra yib angin? (Kum guy fare kahol ni kenggin e “ Rogon ni Ngam Dugliy Ban’en nib Fel’ Rogon.”)

¹⁶ Faanra kam rin’ gubin fapi n’en kad weliyed murung’agen, ma aram e ke bung rogom ni ngam dugliy ban’en nib fel’ rogon. Kam guy rogon ni ngam nang e tin riyul’ u murung’agen fare n’em, ma kam yaliy boch i kenggin e motochiyel nra ayuwegem ni ngam dugliy ban’en nra m’agan’ Jehovah ngay. Ere chiney e rayog ni nga mog ngak ni nge ayuwegem ni nge yib angin e n’en kam dugliy.

17. Mang e ra ayuwegem ni ngam dugliy boch ban’en nib fel’ rogon?

¹⁷ Mus ni faanra boor ban’en ni um dugliy kafram ni ke yib angin, ma dab mu pagtalin ni n’en nra ayuwegem ni ngam dugliy boch ban’en nib fel’ rogon e aram e ngam taga’ ko gonop rok Jehovah, ma gathi llowan’ rom ara n’en ke buch rom. Kemus ni yigoo ir e rayog ni nge pi’ e bin riyul’ e tamilangan’ ngom, me ayuwegem ni ngam nang fan ban’en, mag nang e n’en nib thil u thilin e tin nib mat’aw nge tin nde mat’aw. Pi n’ey e gubin nib ga’ fan ni faanra nge yag e gonop ngodad. (Prov. 2:​1-5) Rayog ni nge ayuwegem Jehovah ni ngam dugliy boch ban’en nra m’agan’ ngay.​—Ps. 23:​2, 3.