1. Mang e ba ga’ fan u wan’ boor e girdi’ e ngiyal’ ney?

 KAM guy ni boor e girdi’ e ngiyal’ ney ni yigoo yad e yad ma lemnaged yad, fa? Bod ni bay boch e girdi’ ni yad ma fanay e yungi n’en bay ko Internet ni yima non riy ko girdi’ ni ngar weliyed murung’agrad nge tin yad be rin’ ni yad ba uf ngay. Machane ri in e girdi’ e ngiyal’ ney ni yad ma pining e sorok ngak Jehovah Got. Re article ney e gad ra weliy riy e n’en be yip’ fan ni ngan pining e sorok ngak Jehovah nge n’en nsusun e nge k’aringdad ni ngad rin’ed e re n’ey. Ku gad ra fil rogon nrayog ni ngad pininged e sorok ngak Got ni ban’en ni bay rogon ni ngad rin’ed, nge rogon nra micheg boch nga m’on ni ir e bay rogon ni ngan pining e sorok ngak.

MANG E BE YIP’ FAN NI NGAN PINING E SOROK NGAK JEHOVAH?

2. Uw rogon ni dag Jehovah feni gel gelngin ko fare Burey ni Sinai? (Kum guy e sasing.)

² Be yog e Bible ni Jehovah e ir reb e Got nrib manigil. De n’uw nap’an nga tomuren ni chuw fare nam nu Israel ko sib u Egypt, me dag Jehovah ngorad feni gel gelngin. Am lemnag e n’en ni buch: Bokum milyon e girdi’ nu Israel nra muulunggad nga enggin fare Burey ni Sinai ni ngar mada’gad e Got rorad. Bay bangi manileng nib dub’ag ni ke m’ag e re burey nem. Ka chingiyal’ nem me ing e ath fare burey ni ga’ngin, me rur e but’ nib gel, me mat e uluch, me chub e dirra’, me yan laman ba yabul ni yibe thoy nib ga’ laman. (Ex. 19:​16-18; 24:17; Ps. 68:8) Am lemnag rogon nri ngat piyu Israel u nap’an ni dag Jehovah ngorad feni gel gelngin.

3. Mang e be yip’ fan ni ngan pining e sorok ngak Jehovah?

³ Machane uw rogodad e girdi’? Rayog ni ngad pininged e sorok ngak Jehovah, fa? Arrogon, rayog. Reb e kanawo’ ni gad ma rin’ e re n’ey riy e aram e gad ma weliy murung’agen gelngin ni yira ngat ngay nge pi fel’ngin nrib manigil. Ku gad ma pining e sorok  ngak u nap’an ni gad ra n’uf ko pi n’en ke yag ni ngad rin’ed u daken gelngin. (Isa. 26:12) David ni Pilung e ir be’ ni i pining e sorok ngak Jehovah. Nap’an ni be meybil ngak Got u p’eowchen piyu Israel ni kar muulunggad, me yog ni gaar: “Ba gilbuguwam ma gab gel, mab sorom, ma dariy thibngim ma gil’ilungum e ba polo’ u fayleng. Gubin ban’en nu tharmiy ngu fayleng ni goo tirom.” Nap’an ni mu’ David ko meybil, ma “fa ulung i girdi’ ni gubin e ra pininged e sorok ngak Somol.”​—1 Kron. 29:​11, 20, BT.

4. Uw rogon ni i pining Jesus e sorok ngak Jehovah?

⁴ Nap’an ni immoy Jesus u fayleng, ma i pining e sorok ngak e Chitamangin ni aram e i yog ni Ir e Be Pi’ gelngin ni nge ngongliy e maang’ang. (Mark 5:​18-20) Ki pining e sorok ngak Jehovah u rogon ni i weliy murung’agen e Chitamangin nge rogon e ngongol rok ko girdi’. Immoy bayay ni i machib u tafen e muulung rok e pi Jew. Bagayad e piin ni i motoyil ngak e be’ nib pin ni ke ying ba moonyan’ ngak ni ke gaman 18 e duw. Ke tay e re moonyan’ nem nib m’ar ni ke bug nga m’on ndabkiyog ni nge k’iyag ir nga lang. Manang Jesus ni kari gafgow laniyan’ e re ppin ney ma baadag ni nge ayuweg. Ere yan nga tooben me non ngak u fithik’ e sumunguy ni gaar: “Ppin, kam dargow e m’ar rom!” Ngemu’ me tay pa’ nga daken fare pin ma ka chingiyal’ nem me k’iyag ir nga lang “me yog e sorok ngak Got” ni bochan e ke gol ko m’ar rok! (Luke 13:​10-13) Bay tapgin ni nge pining e re ppin ney e sorok ngak Jehovah, maku arrogodad.

MANG E MA K’ARINGDAD NI NGAD PININGED E SOROK NGAK JEHOVAH?

5. Mang boch i fan ni ngad ted fan Jehovah?

⁵ Gad ma pining e sorok ngak Jehovah ni bochan e ri gad be tayfan. Boor fan ni ngad ted fan Jehovah. Ir e gubin ma rayog rok, ma dariy e gin nra mus gelngin riy. (Ps. 96:​4-7) Rib gagiyel e gonop rok ko pi n’en ke sunmiy. Ir e ke pi’ e yafos ngodad nge urngin ban’en nib t’uf ko par rodad. (Rev. 4:11) Ba yul’yul’. (Rev. 15:4) Ma gubin ban’en ni ma rin’ ni ma yan i aw nib fel’ rogon, ma gubin ngiyal’ ni ma tay u gil’ e tin ke micheg. (Josh. 23:14) Aram fan ni weliy Jeremiah ni profet murung’agen Jehovah ni gaar: “Dariy be’ ni bod gur u fithik’ gubin e pumoon nib gonop ko pi nam fa fithik’ e pi pilung rorad”! (Jer. 10:​6, 7, BT) Ere rriyul’ ni boor fan ni ngad ted fan e Chitamangidad ni bay u tharmiy. Machane gathi kemus ni bay tapgin ni ngad ted fan Jehovah, ya kub t’uf rodad.

6. Mang fan nib t’uf Jehovah rodad?

⁶ Gad ma pining e sorok ngak Jehovah ni bochan e rib t’uf rodad. Am lemnag in i fel’ngin Jehovah ni ma k’aringdad ni ngad t’ufeged. Ma runguydad ma ma kireban’ ngodad. (Ps. 103:13; Isa. 49:15) Manang rogon lanin’dad, ya nap’an nra amith lanin’dad maku ma amith laniyan’. (Zek. 2:8) Ma ayuwegdad ni ngad nanged ma gad mang Fager rok. (Ps. 25:14; Acts 17:27) Kub sobut’an’, ya “ma lumel nga but’ nge guy e pi tharmiy nge fayleng. Me suwonnag e piin gafgow u fithik’ e ab.” (Ps. 113:​6, 7, BT) Bochan e pi n’ey ma gad baadag ni ngad pininged e sorok ngak e Got rodad nrib manigil.​—Ps. 86:12.

7. Mang e rayog ni ngad rin’ed?

⁷ Gad ma pining e sorok ngak Jehovah ni bochan e gad baadag ni nge nang yugu boch e girdi’ rarogon. Boor e girdi’ ndar nanged e tin riyul’ u murung’agen Jehovah. Mang fan? Ya ke wereg Satan boor e ban u murung’agen ma ke tay laniyan’ e girdi’ u fithik’ e lumor. (2 Kor. 4:4) Ke micheg Satan nga laniyan’ e girdi’ ni Jehovah e ir reb e Got nib damumuw, ma der ma lemnagdad, ma ir tapgin e gafgow ni be buch u fayleng. Machane gadad e gad manang e tin riyul’ u murung’agen e Got rodad! Rayog ni ngad weliyed ko girdi’ e bin riyul’ i rarogon ma gad ayuwegrad ni ngkur pininged e sorok ngak. (Isa. 43:10) Psalm 96 e be weliy rogon ni ngan pining e sorok ngak Jehovah. Nap’an ni gad be weliy boch e thin ni bay ko re tang ney, mag lemnag boch  e kanawo’ nrayog ni ngam pining e sorok riy ngak Jehovah ni ban’en ni bay rogon ni ngad rin’ed.

UW ROGON NRAYOG NI NGAD PININGED E SOROK NGAK JEHOVAH NI BAN’EN NI BAY ROGON NI NGAD RIN’ED?

8. Mang reb e kanawo’ nrayog ni ngad pininged e sorok riy ngak Jehovah? (Psalm 96:​1-3)

⁸ Mu beeg e Psalm 96:​1-3. Rayog ni ngad pininged e sorok ngak Jehovah ko n’en gad ma weliy u murung’agen. Be yog e pi thin ney ni ngad “tangniged Somol,” ma gad ‘pining e sorok’ nga fithingan, ma gad ‘weliy ngak e girdi’ fare thin nib fel’ ni murung’agen ni ke ayuwegdad,’ ma gad ‘weliy ngak e pi nam murung’agen gelngin.’ Ireray boch e kanawo’ nrayog ni ngad pininged e sorok riy ngak e Chitamangidad ni bay u tharmiy. Pi Jew ni yad ba yul’yul’ nge pi Kristiano ko bin som’on e chibog e da ur magagawongad ni ngar weliyed ko girdi’ e bin riyul’ i rarogon Jehovah nge urngin ban’en nib fel’ ni ke rin’ ni fan ngorad. (Dan. 3:​16-18; Acts 4:29) Uw rogon ni ku rayog ni ngad rin’ed e re n’ey?

9-10. Mang e ga be fil ko n’en ni buch rok Angelena? (Kum guy e sasing.)

⁹ Am lemnag e n’en ni buch rok Angelena a nreb e walag nib pin ni ma par u Meriken. De rus ni nge weliy murung’agen Jehovah u tabon e maruwel rok. Bochan ni ka fini tabab ko maruwel, ma aram min pining ni nge un nga reb e muulung ni bochan e ngar weliyed e piin ka fin nra tababgad ko maruwel boch ban’en u murung’agrad ngak e piin yad nga maruwel. Ere lemnag ni nge dag boch e sasing ngorad ni be dag gelngin e felfelan’ rok ni ir reb e Pi Mich Rok Jehovah. Machane u m’on ni nge non, ma bay be’ ni yow nga maruwel ni weliy boch ban’en u murung’agen nsom’on, me yog nni chuguliy ni ir reb e Pi Mich Rok Jehovah. I tabab ni nge weliy boch ban’en nib kireb u murung’agen e michan’ rodad. I gaar Angelena: “Ka rug rus. Machane me lungug u wan’ug: ‘Gur, nggu pag be’ ni nge weliy boch ban’en nde riyul’ u murung’agen Jehovah? Fa gag e nggu weliy e tin riyul’ u murung’agen?’”

¹⁰ Nap’an ni mu’ facha’ ni yow nga maruwel ko numon, me meybil Angelena u laniyan’. Ngemu’ me non ngak u fithik’ e sumunguy ni gaar: “Ku arrogog nni chuguliyeg ni gag reb e Pi Mich Rok Jehovah, ma ke mada’ ko chiney ni ka gag reb e Pi Mich.” Yugu aram rogon me par Angelena nib gapas. I dag boch e sasing ngak e piin yad nga maruwel ni yaarad e pi fager rok ni yad be pigpig ngak Jehovah u fithik’ e felfelan’, miki weliy  murung’agen e michan’ rok u fithik’ e tayfan. (1 Pet. 3:​15, 16) Mang angin ni yib riy? Nap’an ni mu’ Angelena ko numon ma ke gapas facha’ ni yow nga maruwel. Ki yog boch ban’en nib manigil ni i buch rok u nap’an ni yibe chuguliy ni ir reb e Pi Mich Rok Jehovah. I weliy Angelena ni gaar: “Bay rogon ni ngan weliy e tin riyul’ u murung’agen Jehovah. Ri gad ba tow’ath nrayog ni ngad weliyed e tin riyul’ u murung’agen.” Ku arrogodad ni gad ba tow’ath ni ngad pininged e sorok ngak Jehovah ngki mada’ ko ngiyal’ ni yibe darifannag.

11. Uw rogon ni kab kafram i yib ni ma fol e tin riyul’ e tapigpig rok Jehovah ko fare kenggin e motochiyel ni bay ko Psalm 96:8?

¹¹ Mu beeg e Psalm 96:8. Rayog ni ngad fanayed e tin bay rodad ni ngad pininged e sorok ngak Jehovah. Kab kafram i yib ni ireray e n’en ma rin’ e tin riyul’ e tapigpig rok Jehovah. (Prov. 3:9) Bod ni piyu Israel e ur pied boch ban’en ni bay rorad ni fan ko tempel ni ngan toy ma yibe ayuweg ndabi kireb. (2 Ki. 12:​4, 5; 1 Kron. 29:​3-9) Ku bay boch i gachalpen Kristus ni ur ayuweged nge pi apostal rok “ko tin ni nge yog ngorad.” (Luke 8:​1-3) Pi Kristiano ko bin som’on e chibog e kur pied e salpiy ni ayuw ni nge ayuweg e pi walagrad ni kar gafgowgad. (Acts 11:​27-29) Ku arrogon e ngiyal’ ney nrayog ni ngad pininged e sorok ngak Jehovah u daken e salpiy ni ayuw ni gad ma pi’.

12. Uw rogon nrayog ni ngad pininged e sorok ngak Jehovah u daken e salpiy ni ayuw ni gad ma pi’? (Kum guy e sasing.)

¹² Am lemnag ban’en ni buch ni be dag rogon ni gad ma pining e sorok ngak Jehovah u daken e salpiy ni ayuw ni gad ma pi’. Nap’an e duw ni 2020, mab n’uw nap’an ni par nde aw e n’uw u Zimbabwe. Bokum milyon e girdi’ ni ur m’ad ko bilig nib muun reb e walag nib pin ngay ni ka nog Prisca ngak. Yugu aram rogon nri mo’maw’ e par, machane i ulul Prisca ko machib ni ma tay ni gubin e Dalip Fen e Maruwel nge Biyernes ngki mada’ ko ngiyal’ ni yibe gi’ e but’ ni ngan woldugiy. I moningnag e piin buguli yoror rok ni bochan e be machib ma der maruwel u milay’ rok. I lungurad, “Nga mum’ ni bochan e bilig.” Ma fulweg Prisca lungurad u fithik’ e pagan’ ni ma gaar, “Dariy ba ngiyal’ ni ke digey Jehovah e pi tapigpig rok.” De n’uw nap’an nga tomuren, me pi’ e ulung rodad e ggan nge boch ban’en nib t’uf rok ni ayuw. I yag ni ngan pi’ e pi ayuw nem ni bochan e salpiy ni ayuw ni gad ma pi’. I ngat e piin buguli yoror rok Prisca ko re n’ey, ma aram me lungurad ngak, “Dariy ba ngiyal’ ni ke digeyem Got, ere gamad baadag ni ngkug filed boch ban’en u murung’agen.” Medlip e buguli  yoror rok nra tababgad ni ngaur uned ko muulung.

13. Uw rogon nrayog ni ngad pininged e sorok ngak Jehovah u daken e ngongol rodad? (Psalm 96:9)

¹³ Mu beeg e Psalm 96:9. Rayog ni ngad pininged e sorok ngak Jehovah u daken e ngongol rodad. Pi prist ni yad ma pigpig u tempel rok Jehovah e ba t’uf ni nge par e dowef rorad nib beech. (Ex. 40:​30-32) Ku arrogodad nthingar da beechgad ni aram e gathi kemus ni nga i par e dowef rodad nib beech, ya kub muun e ngongol rodad ngay. (Ps. 24:​3, 4; 1 Pet. 1:​15, 16) Ba t’uf ni ngad guyed rogon ni ngad chuweged u dakendad e ‘bin kakrom i gadad’ ni aram e lem nge ngongol nib kireb, ma gad yon’ nga dakendad e ‘bin nib beech i gadad’ ni aram rogon kanawoen e lem nge ngongol ni be m’ug riy pi fel’ngin Jehovah nrib manigil. (Kol. 3:​9, 10) Mus ko piin nrib kireb e ngongol rorad ma yad ba ta cham nrayog ni nge ayuwegrad Jehovah ni ngar thilyeged rarogorad ma ron’ed nga dakenrad e bin nib beech i yad.

14. Mang e ga be fil ko n’en ni buch rok Jack? (Kum guy e sasing.)

¹⁴ Am lemnag e n’en ni buch rok Jack ni be’ nib pumoon nib ta cham ma ir be’ nrib kireb ni ku yima pining Fare Moonyan’ ngak. Bochan e kireb ni i rin’, ma aram min dugliy ni ngan thang e fan rok. Machane nap’an ni be sonnag e ngiyal’ ni ngan thang e fan rok riy, me m’agan’ ngay ni ngar filew reb e walag ni pumoon e Bible ni i yib i machib ko re kalbus ni baaram ni bay riy. Yugu aram rogon urngin ban’en nib kireb ni ke rin’, machane me thilyeg e ngongol rok me munmun me bung rogon ni nge un ko taufe. Ri thil e ngongol rok Jack, ya nap’an e rofen ni ngan thang e fan rok ma bay boch e matanag ko re kalbus nem ni sugsug e lu’ nga owcherad u nap’an ni yad be fangich. Bay reb e pumoon ni ma maruwel u rom nib tolang e liw rok ni gaar: “Immoy ni Jack e ir reb e tin th’abi kireb e kalbus u roy. Ma chiney e ke mang be’ nrib manigil.” Re wik ni baaram u tomuren ni kan thang e fan rok Jack, ma pi walag ni pumoon ni baaram ni yad ma yan ko re kalbus nem ni ngar ted e muulung u rom u gubin e wik e ra mada’naged reb e kalbus ni aram e som’on ni ke yib i un ko muulung. Mang e k’aring ni nge yib i un ko muulung? Kari ngat nga rogon ni ke thil e ngongol rok Jack, ma baadag ni nge nang e n’en nib t’uf ni nge rin’ ya nge yag ni liyor ngak Jehovah. Ere ba tamilang nrayog ni ngad pininged e sorok ngak e Chitamangidad ni bay u tharmiy u daken e ngongol rodad!​—1 Pet. 2:12.

 UW ROGON NRA MICHEG JEHOVAH BOCH NGA M’ON NI IR E BAY ROGON NI NGAN PINING E SOROK NGAK?

15. Uw rogon nra micheg Jehovah boch nga m’on ni ir e bay rogon ni ngan pining e sorok ngak? (Psalm 96:​10-13)

¹⁵ Mu beeg e Psalm 96:​10-13. Tiney ni tomur e verse ko Psalm 96 e be yog ni Jehovah e ir reb e Tapufthin nge Pilung nib mat’aw. Uw rogon nra micheg Jehovah boch nga m’on ni ir e bay rogon ni ngan pining e sorok ngak? Ra rin’ u daken e pufthin nra tay. Dabki n’uw nap’an ma ra thang fare Babylon nib Gilbuguwan ni bochan e be darifannag fithingan nib thothup. (Rev. 17:​5, 16; 19:​1, 2) Bay boch e piin yad ra guy fare Babylon nib Gilbuguwan ni kan thang nsana yad ra un ngodad ko bin riyul’ e liyor. Ma nap’an e Armageddon, ma ra thang Jehovah e re m’ag rok Satan ney ni ga’ngin, me chuweg urngin e piin yad ma togopuluw ngak ma yad ma yog e tin nde riyul’ u murung’agen fithingan, me ayuweg e yafos rok e piin yad ma t’ufeg, ma yad ma fol rok, ma yad ba felfelan’ ngay ni ngar pininged e sorok ngak. (Mark 8:38; 2 Thess. 1:​6-10) Tomuren e bin tomur e skeng ni yira tay u tomuren fare Biyu’ i Duw Nra Gagiyeg Kristus riy, ma ke micheg Jehovah ni ir e bay rogon ni ngan liyor ngak. (Rev. 20:​7-10) Ra taw ko ngiyal’ nem ma “Flaab Rok Got nge gelngin e bayi tamilang an’uy riy u fayleng ni bod rogon lan e rigur ni ke sugnag e day.”​—Hab. 2:14.

16. Mang e kam dugliy u wan’um ni ngam rin’? (Kum guy e sasing.)

¹⁶ Rib gel e felfelan’ ni yira tay u nap’an nra pining urngin e girdi’ e sorok ngak Jehovah ni ban’en ni bay rogon ni ngad rin’ed! Machane chiney ndawori taw ko ngiyal’ nem e rayog ni ngad rin’ed e n’en nib milfan ngodad ni aram e ngad pininged e sorok ngak e Got rodad ni gubin ngiyal’. Bochan ni baadag fare Ulung ni Ma Pow’iyey ni ngar ayuweged gadad ni ngad tedan’dad ko re n’ey nib ga’ fan nib milfan ngodad, ma aram fan ni kar mel’eged fare thin ni bay ko Psalm 96:8 (BT) ni nge mang thin nu Bible ni fan ko duw ni 2025 ni be gaar: “Mu pininged e sorok nga feni maluplup’ fithingan [Jehovah].”