1. Mang e rayog ni ngad rin’ed ya nge yag nda felfelan’naged Jehovah?

 MU SUSUNNAG ni kam pi’ ba tow’ath ngak be’ nib t’uf rom nrib manigil ma rayog ni nge maruwel ngay. Ra kireban’um ni faanra fek facha’ fare tow’ath nge yan i tay nga bang ma dabki lemnag murung’agen biid! Machane ba mudugil ni ga ra felfelan’ ni faanra i maruwel ko fare tow’ath ma be dag nib ga’ fan u wan’. Mang e be tamilangnag e re n’ey? Ke pi’ Jehovah Fak ni fan ngodad. Ere ba mudugil nra felfelan’ ni faan gad ra dag nib ga’ fan e re tow’ath nem u wan’dad nge t’ufeg rok ni aram e n’en ke k’aring ni nge pi’ fare biyul!​—John 3:16; Rom. 5:​7, 8.

2. Mang e gad ra weliy ko re article ney?

² Machane ra n’uw nap’an i yan ma rayog ni nge dabki ga’ fan fare biyul u wan’dad nni pi’ nib tow’ath. Rayog ni ngan susunnag ni kad feked e re tow’ath rok Got nem ka darod da ted nga bang. Gad ba felfelan’ ni bay rodad, machane kad ted nga bang ndakurud guyed ara da lemnaged murung’agen. Ere gubin ngiyal’ nib t’uf ni ngaud lemnaged e n’en ke rin’ Got nge Kristus ni fan ngodad, ya nge dabi buch e re n’ey. Re article ney e ra ayuwegdad ni ngad rin’ed e re n’ey. Gad ra weliy rogon nra yib angin fare biyul ngodad e chiney nge boch nga m’on. Ku gad ra weliy rogon nrayog ni ngad daged nib ga’ fan u wan’dad e t’ufeg rok Jehovah, nib ga’ nu m’on ngu tomuren fare Puguran.

ANGIN NGODAD E CHINEY

3. Mang reb e kanawo’ nrayog ni nge yib angin fare biyul ngodad riy e chiney?

³ Mus ko chiney ma be yib angin ngodad fare biyul ni maligach ni pi’ Kristus. Bod ni ke n’ag Jehovah fan e denen rodad u daken e re biyul nem. Dariy rogon ni nge rin’ e re n’ey, machane baadag ni nge rin’. I pining fare psalmist e magar ngak Jehovah ni bochan e ma n’ag fan e kireb. I yog ni gaar: “Gur e gab gol ngomad ma ga ma n’ag fan u wun’um e kireb romad.”​—Ps. 86:​5, BT; 103:​3, 10-13.

4. Mini’ e pi’ Jehovah fare biyul ni fan ngak? (Luke 5:32; 1 Timothy 1:15)

 ⁴ Bay boch e girdi’ nsana rayog ni ngar lemnaged ndariy rogon ni nge n’ag Jehovah fan e denen rorad. Bin riyul’ riy e gad gubin ndariy rogon ni ngan n’ag fan e denen rodad. Manang apostal Paul ‘ndariy rogon ni nga nog ni ir reb e apostel.’ Machane ki yog ni gaar: “Got e runguyeg nge ayuwegeg me pingegeg nggu par ni bod rogog e chiney.” (1 Kor. 15:​9, 10) Nap’an ni gad ra kalngan’dad ko denen rodad, ma ma n’ag Jehovah fan rodad. Mang fan? Gathi bochan e bay rogon ni nge rin’, ya bochan e gad ba t’uf rok. Faanra ma magawon lanin’um ni bochan e ga ma lemnag ndariy fam, ma dab mu pagtalin ni ke pi’ Jehovah fare biyul ni fan ko pi tadenen ni kar kalgadngan’rad, ma gathi girdi’ ndariy e denen rorad.​—Mu beeg e Luke 5:32; 1 Timothy 1:15.

5. Ba puluw ni nge lemnag bagadad ni bay rogon ni nge dag Jehovah e runguy ngak, fa? Mu tamilangnag.

⁵ Susun e dariy bagadad ni nge lemnag ni bay rogon ni nge dag Jehovah e runguy ngak ni mus ni faanra ke yoor e duw ni kad pigpiggad ngak. Riyul’ nib ga’ fan e yul’yul’ rodad u wan’ Jehovah. (Heb. 6:10) Ke pi’ Fak ngodad nib tow’ath ndariy puluwon, ma gathi bochan e pi n’en nib fel’ ni kad rin’ed ni fan ngak. Faanra ngad lemnaged ni bay rogon ni ngan dag e runguy ngodad ara ngan n’ag fan e denen rodad, ma aram e ra yan i aw ni gad be yog ndariy fan e yam’ ni ke tay Kristus.​—Mu taarebrogonnag ko Galatia 2:21.

6. Mang fan ni boor ban’en ni i rin’ Paul ni fan ko pigpig rok ngak Jehovah?

⁶ Manang Paul ni yugu demtrug urngin ban’en nra rin’ ni fan ngak Jehovah, maku dabi yib tapgin ni nge n’ag fan e denen rok. Ere mang fan ni boor ban’en ni i rin’ ni fan ko pigpig rok ngak Jehovah? Gathi bochan e nge dag ni bay tapgin ni ngan n’ag fan e denen rok, ya bochan e nge dag nib ga’ fan u wan’ e runguy ni ke dag Jehovah ngak. (Efe. 3:7) Gad be ulul ni ngad pigpiggad ngak Jehovah u fithik’ e pasig ni gathi bochan e nge yib tapgin ni nge runguydad, ya bochan e ngad daged nib ga’ fan u wan’dad e runguy ni ke dag ngodad ni bod Paul.

7. Ku mang reb e kanawo’ nra yib angin fare biyul riy ngodad e chiney? (Roma 5:1; James 2:23)

⁷ Ku reb e kanawo’ nra yib angin fare biyul riy ngodad e chiney e aram e rayog ni nge chugur e tha’ u thildad Jehovah. a Kan weliy ko fa binem e article nnap’an nni gargelegdad ma dariy e tha’ u thildad Got. Machane bochan fare biyul, ma rayog ni nge “aw e gapas u thildad Got” mu kud chugurgad ngak.​—Mu beeg e Roma 5:1; James 2:23.

8. Mang fan nsusun e ngad pininged e magar ngak Jehovah ni bochan e rayog ni ngad meybilgad ngak?

⁸ Am lemnag reb e ban’en nrayog ni ngad rin’ed ni bochan e ba fel’ e tha’ u thildad Jehovah. Re n’em e aram e rayog ni ngad meybilgad ngak. Gathi kemus ni ma rung’ag Jehovah e meybil ni ma tay e girdi’ rok ngak u nap’an ni kar muulunggad nga taabang, ya ku ma rung’ag e meybil ni yad ma tay ngak ni be’ nge be’. Meybil e rayog ni nge gapaseg lanin’dad nge tafinay rodad, machane gathi kemus angin e meybil ni gad ma tay. Ya ku rayog ni nge chugurnag e tha’ u thildad Got. (Ps. 65:2; Jas. 4:8; 1 John 5:14) Nap’an ni immoy Jesus u fayleng, mab ga’ ni i meybil ni bochan e manang ni be motoyil Jehovah ngak ma meybil nra i tay e ra ayuweg e tha’ u thilrow e Chitamangin ni nge par nib gel. (Luke 5:16) Ri gad be pining e magar nrayog ni ngad manged boch e fager rok Jehovah ma gad non ngak u daken e meybil ni bochan fare maligach ni pi’ Jesus!

ANGIN NRA YIB NGODAD BOCH NGA M’ON

9. Uw rogon nra yib angin fare biyul ngak e pi tapigpig rok Jehovah ni yad ba yul’yul’ boch nga m’on?

⁹ Uw rogon nra yib angin fare biyul ngak e pi tapigpig rok Jehovah ni yad ba yul’yul’ boch nga  m’on? Yira pi’ e yafos ni manemus ngorad. Boor e girdi’ ni yad ma lemnag ndabiyog ni nge buch e re n’ey ni bochan e ke yan bokum biyu’ e duw ni be yim’ e girdi’. Machane ba m’agan’ Jehovah ngay aram ko som’on ni nge par e girdi’ ni manemus. Faan gomanga de denen Adam, ma dariy be’ nra lemnag ndabiyog ni ngan par ni manemus. Ma yugu aram rogon nib mo’maw’ ni ngad lemnaged e chiney nrayog ni ngad pared ndariy n’umngin nap’an, machane rayog ni nge mich u wan’dad nra buch e re n’ey ni bochan e gad manang nrib tolang puluwon e n’en ni pi’ Jehovah ni aram e yafos rok Fak, ya nge yag e re yafos ney ngodad.​—Rom. 8:32.

10. Mang e be athapeg e piin kan dugliyrad nge yugu boch e saf?

¹⁰ Yugu aram rogon ni yafos ni manemus e ban’en ni fin nra yag ngodad boch nga m’on, machane baadag Jehovah ni ngaud lemnaged e chiney. Piin kan dugliyrad e yad be athapeg e yafos u tharmiy ni ngar uned ngak Kristus i gagiyegnag e fayleng. (Rev. 20:6) Yugu boch e saf e yad be athapeg e par u paradis u fayleng ndakuriy e amith nge kireban’. (Rev. 21:​3, 4) Gur bagayad e piin yad ba muun nga yugu boch e saf ni yad be athapeg e yafos ni manemus u fayleng, fa? Re n’ey e der yip’ fan ni kab fel’ e yafos u tharmiy ko biney e tow’ath! I sunmiy Jehovah e girdi’ ni ngar pared u fayleng, ere gad ra par u fayleng ndariy n’umngin nap’an ma ri gad ra felfelan’.

11-12. Mang boch e tow’ath nrayog ni ngad athapeged u Paradis? (Kum guy e sasing.)

¹¹ Am lemnag rogon e par rom u Paradis u fayleng boch nga m’on. Dabki magafan’um nrim m’ar ara mum’. (Isa. 25:8; 33:24) Ra pi’ Jehovah ngom urngin ban’en nib fel’ ni ga baadag ni nge yag ngom. Mang e ga baadag ni ngam fil murung’agen? Ga baadag ni ngkum fil boch murung’agen e gamanman, fa? Ga baadag ni ngam fil rogon i chubeg ba mit e talin e musik, fa? Ma ga baadag ni ngam fil rogon i yoloy yaan ban’en, fa? Dariy e maruwar riy nnap’an ni yira yan nga paradis, ma ra t’uf boch e girdi’ ni yad manang rogon i yoloy yaan e naun mar toyed. Ku ra t’uf boch e girdi’ ni ngar yunged e woldug ni nge yib  e ggan riy mu kur ngongliyed e ggan, nge boch e talin e maruwel, ma yad be ngongliy e milay’, mu kur ayuweged. (Isa. 35:1; 65:21) Nap’an ni ga ra par ndariy n’umngin nap’an, ma ra yib e tayim ni ngam rin’ e pi n’ey nge ku boor ban’en.

¹² Rib gel e felfelan’ ni gad ra tay u nap’an ni gad ra mada’ bayay e piin kan fasegrad ko yam’! (Acts 24:15) Kum lemnag rogon ni ga ra felfelan’ ni ngkum fil boch ban’en u murung’agen Jehovah ni aram e ngam fil murung’agen e pi n’en ke sunmiy. (Ps. 104:24; Isa. 11:9) Ma bin th’abi fel’ riy e ri gad ra felfelan’ ni ngad liyorgad ngak Jehovah ndakuriy ban’en ni be magawonnag lanin’dad! Gur, ga ra pag fan e pi tow’ath ney boch nga m’on ni bochan e ngam ‘felfelan’ nib ngoch nap’an ni ga be ngongliy e denen,’ fa? (Heb. 11:25) Ba mudugil ni danga’! Kab pag feni fel’ e yafos nra yag ngodad boch nga m’on ko n’en nra yag ngodad ko re fayleng ney e chiney. Dab mu pagtalin ni gathi gubin ngiyal’ nra ud athapeged e par u Paradis u fayleng, ya ra munmun ma ra riyul’ e re n’ey. Dariy reb e pi n’ey nra riyul’ ni faan gomanga de pi’ Jehovah Fak nib tow’ath ni bochan e ri gad ba t’uf rok!

MU DAG NIB GA’ FAN U WAN’UM E T’UFEG ROK JEHOVAH

13. Uw rogon nrayog ni ngad daged nib ga’ fan u wan’dad e t’ufeg rok Jehovah? (2 Korinth 6:1)

¹³ Uw rogon nrayog ni ngad daged nib ga’ fan u wan’dad fare biyul ni ke pi’ Jehovah ngodad? Aram e ngad m’oneged e maruwel rok u lan e yafos rodad. (Matt. 6:33) Bin riyul’ riy e yim’ Jesus “ni bochan e piin ni yad ba fos e nge dab ku ur ngongolgad ni yad be yan nga tabon lanin’rad, machane ngar ngongolgad ni yad be yan ngan’ faanem ni ir e ke yim’ ni fan ngorad ma kan faseg ko yam’ ni fan ngorad.” (2 Kor. 5:15) Ba mudugil ndubdad ni ngad paged talin fan e runguy ni ke dag Jehovah ngodad.​—Mu beeg e 2 Korinth 6:1.

14. Uw rogon nrayog ni ngad daged ni be pagan’dad ngak Jehovah ma gad be fol u rogon ni ma pow’iydad?

¹⁴ Ku rayog ni ngad daged nib ga’ fan u wan’dad e t’ufeg rok Jehovah ni aram e nge pagan’dad ngak ma gad fol u rogon ni ma pow’iydad. Ni uw rogon? Nap’an nra t’uf ni ngad dugliyed ban’en ni bod tolngin e skul ni ngad uned ngay ara re miti maruwel ni ngad uned ngay, ma thingar da lemnaged e n’en baadag Jehovah ni ngad rin’ed. (1 Kor. 10:31; 2 Kor. 5:7) Nap’an ni gad ra dugliy ban’en ni be tor nga daken e michan’ rodad ngak Jehovah, ma aram e ra gel e michan’ rodad ngak miki chugur e tha’ u thildad. Ku ra gel feni riyul’ u wan’dad e yafos ni manemus ni gad be athapeg.​—Rom. 5:​3-5; Jas. 2:​21, 22.

15. Uw rogon nrayog ni ngad daged nib ga’ fan u wan’dad e t’ufeg rok Jehovah u m’on ngu tomuren fare Puguran?

¹⁵ Ku bay reb e kanawo’ nrayog ni ngad daged riy nib ga’ fan u wan’dad e t’ufeg rok Jehovah. Aram e ngad rin’ed e tin nrayog rodad u m’on ngu tomuren fare Puguran ni ngad daged ngak Jehovah ni gad be pining e magar ngak ni bochan fare biyul. Gathi kemus ni ngad uned ko re madnom ney, ya ku rayog ni ngad pininged yugu boch e girdi’ ni ngar uned ngay. (1 Tim. 2:4) Mu weliy  ngak e piin kam piningrad e n’en yira rin’ u nap’an e Puguran. Rayog ni ngam dag ngorad fa gal video ni Ngaum Lemnag e Yam’ ni Tay Jesus nge Mang e Yima Rin’ ko Pi Tagil’ e Liyor Romad? ni bay ko jw.org. Piin piilal e susun e ngkur pininged e piin kar talgad ko muulung nge machib. Am lemnag gelngin e felfelan’ ni yira tay u tharmiy ngu fayleng ni faanra lemnag boch e saf rok Jehovah ni kar maloggad ni ngar sulod ko ulung rok! (Luke 15:​4-7) Ngad guyed rogon ni nge taw ko Puguran ma gathi kemus ni nge bagadad me pining e magar ngak bagadad, ya ngkud pininged e magar ngak e piin ka fin nra uned ara ke n’uw nap’an ndawor ra uned ko re madnom ney. Gad baadag ni ngar nanged ni kad felfelan’gad ngay ni kar bad!​—Rom. 12:13.

16. Mang fan nsusun e ngad yoornaged e tin gad be rin’ ni fan ko machib u m’on ngu tomuren fare Puguran?

¹⁶ Rayog ni ngam yoornag e tin ga be rin’ ni fan ko pigpig rom u m’on ngu tomuren fare Puguran, fa? Aram reb e kanawo’ nib manigil ni ngam dag riy nib ga’ fan u wan’um urngin ban’en ni ke rin’ Got nge Kristus ni fan ngodad. Gad ra yoornag e tayim rodad ni fan ko machib, ma aram e ra ud guyed rogon ni be ayuwegdad Jehovah ma ra gel e pagan’ rodad ngak. (1 Kor. 3:9) Ku dab mu pagtalin ni ngam beeg e thin nu Bible ni fan ko Puguran ni bay ko fare ke babyor ni Examining the Scriptures Daily nge fare chart ni bay u lan e babyor ko muulung ni yima tay u lan e wik. Ku rayog ni ngam mel’eg ni ngam fil murung’agen e n’en bay ko pi thin nu Bible ney u nap’an e fol Bible ni ga ma tay ni yigoo gur.

17. Mang e ma felfelan’nag Jehovah? (Kum guy fare kahol ni kenggin e “ Rogon ni Ngam Dag nib Ga’ Fan u Wan’um e T’ufeg rok Jehovah.”)

¹⁷ Riyul’ nsana dabiyog ni ngam rin’ urngin ban’en ni kan weliy ko re article ney ni bochan rarogom. Machane dab mu pagtalin nder ma taarebrogonnag Jehovah e tin ga ma rin’ ko ma rin’ yugu boch e girdi’, ya ma guy e n’en bay u gum’irchaem. Ma felfelan’ u nap’an nra guy nib ga’ fan u wan’um fare biyul ni ke pi’ nib tow’ath.​—1 Sam. 16:7; Mark 12:​41-44.

18. Mang fan ni gad be pining e magar ngak Jehovah Got nge Jesus Kristus?

¹⁸ Kemus ni bochan fare biyul ma ke yag ni ngan n’ag fan e denen rodad, ma ke fel’ e tha’ u thildad Jehovah, ma ke yag e athap ko yafos ni manemus ngodad. Manga yu gud daged ni gubin ngiyal’ ni gad be pining e magar ni bochan e t’ufeg rok Jehovah, ni aram e n’en ke k’aring ni nge pi’ e pi tow’ath ney ngodad. (1 John 4:19) Mu kud daged ni gad be pining e magar ngak Jesus ni ke yim’ ni fan ngodad ni bochan e ri gad ba t’uf rok!​—John 15:13.