Baadag Jehovah nnap’an nra mabgol l’agruw ni’, ma ngar parew ni yow ba felfelan’ ma dabi kireb e mabgol rorow. (Matt. 19:4-6) Faanra ga baadag ni ngam un ko mabgol, ma uw rogon ni ngam pirieg be’ nib fel’ ni ngam leay? Bochan ni Jehovah e ir e En Ke Sunmiydad, ma manang e n’en nib t’uf ni ngad rin’ed ya nge par e mabgol rodad ni bay e felfelan’ riy. Ere faan ga ra fol ko pi kenggin e motochiyel ni ke pi’ ngodad, ma ga ra pirieg e felfelan’. Am lemnag boch e pi kenggin e motochiyel nem.

Bin som’on e baaray ban’en nib t’uf ni ngad nanged u rarogon gum’ircha’dad: “Dakuriy yugu reb e ban’en ni aram feni sasaliyeb; ke pag rogon feni m’ar ndab ki gol.” (Jer. 17:9, BT) Nap’an nra mada’ l’agruw ni’ ni yow baadag ni ngar mabgolgow me fel’ e thin rorow, ma rib papey nrayog ni nge gel e adag rorow ngorow, me mo’maw’ ni ngar dugliyew boch ban’en u fithik’ e gonop. Faanra dugliy l’agruw ni’ ni ngar mabgolgow ni kemus ni bochan e yow baadagew yow, ma rayog ni nge boch nga tomuren me kireban’row u nap’an nde buch boch ban’en ni bod rogon nra lemnagew. (Prov. 28:26) Aram fan nde fel’ ni nge weliy l’agruw ni’ murung’agen e adag rorow ngorow, ara ra michegew boch ban’en ngorow ndawor ra nangew rarogorow nib fel’ rogon.

Be gaar e Proverbs 22:3: “Be’ nib gonop e ra guy e oloboch ni be yib me pilo’ riy, machane piin nib balyang e darir pilo’gad riy, me yan i tomur mi yad kolngan’rad.” Mang riy’en ni faanra u darod nga boch e website nrayog ni nge yan be’ ngay ni nge pirieg be’ ni ngar mabgolgow? Bay boch e girdi’ ni kar mada’gad boch e girdi’ u online ndar nanged yad me fel’ e thin rorad, me boch nga tomuren mar nanged ni kan bannagrad. Bay boch e girdi’ nib sasalap ni yad ma ngongliy boch e account ni goo bogi ban’en ya ngar bannaged e girdi’ mar feked e salpiy rorad. Bay boch e pi girdi’ ney ni yad ma yog ni yad e Pi Mich.

Kum lemnag yugu reb i riy’en e re n’ey. Bay boch e pi website ney ni yad ma fanay boch e program ni ngan m’ag l’agruw ni’ nga taabang nsusun e rayog ni nge fel’ e thin rorow. Machane dariy ban’en ni kan pirieg ni be micheg ni ma yib angin e re n’ey. De fel’ ni ngad taga’gad nga boch e program ni ke ngongliy e girdi’ u nap’an ni gad be dugliy ban’en nib ga’ fan ni bod rogon e en nib fel’ ni ngad leayed. Pi program ney e dabiyog ni ngad taga’gad ngay ni bod rogon e pi kenggin e motochiyel u Bible.​—Prov. 1:7; 3:5-7.

Bay reb i kenggin e motochiyel ko Proverbs 14:15 (BT) ni be gaar: “Be’ nib balyang e yug demtrug  ban’en ma ra mich u wan’; ma girdi’ nib tamilangan’ e ri ma fal’eg i yaliy ban’en.” U m’on ni ngam dugliy ko ba fel’ ni ngam mabgolgow be’ fa danga’, mab t’uf ni ngarim nang rarogon nib fel’ rogon. Machane ba mo’maw’ ni ngam rin’ e re n’ey ni faanra kam mada’gow u online. Mus ni faanra rayog ni ngam guyew boch ban’en u murung’agmew u online ara boor e tayim ni gimew ma non riy ngomew, ma dabiyog ni nga mog ni ga manang e bin riyul’ i rarogon e cha’nem. Bay boch e girdi’ ni yad ma lemnag ni aram e kar pirieged e en nri yad baadag, ma nap’an ni yad ra mada’ ma ri yad ma gin ko n’en ni yad ra nang u rarogon facha’.

I gaar fare psalmist: “Dagur ma chagil ko piin ndariy rogorad nga bang [“piin nib sasalap,” NW]; dariy rogog ko piin yad ma dake modingniged yad.” (Ps. 26:4, BT) Boor e girdi’ ni yad ma lemnag ni ka ban’en ni yima rin’ ni aram e nge ban be’ u nap’an ni be weliy boch ban’en u murung’agen u online ya nge k’aring be’ ni nge adag. Rayog ni ngar mithaged boch ban’en nib kireb u rarogorad, fa reb e dab rogned u nap’an ni yad be non be’ u online. Yugu aram rogon ni bay boch e girdi’ ni yad ma yog ni yad boch e Pi Mich Rok Jehovah, machane gur, riyul’ ni kar uned ko taufe? Ba chugur e tha’ u thilrad Jehovah, fa? Ba fel’ thirad u lan e ulung? Fa gathi rib fel’ e ngongol rorad ara de fel’ ni ngaun ‘chag’ ngorad? (1 Kor. 15:33; 2 Tim. 2:20, 21) Maku reb e gur, ba puf rogorad nrayog ni ngar uned ko mabgol nrogon nib puluw ko pi kenggin e motochiyel u Bible? Ireray boch e deer nib t’uf ni ngam nang e fulweg riy, machane dabiyog ni ngam nang ni faanra dab mu non ngak yugu boch e Pi Mich ni yad manang facha’ nib fel’ rogon. (Prov. 15:22) Reb e tapigpig rok Jehovah nib yul’yul’ e susun e dariy ba ngiyal’ ni nge lemnag ni ngar ‘pachgow’ be’ nde taareb e michan’ rorow mar mabgolgow.​—2 Kor. 6:14; 1 Kor. 7:39.

Bochan ni bay e riya’ ko pi website ney, ma aram fan ni bay boch e kanawo’ ni kab fel’ boch nrayog ni ngam gay be’ riy ni ngam mabgolgow mu kum nang boch ban’en u rarogon. Uw e rayog ni ngam pirieg be’ riy nra fel’ ni ngam mabgolgow? Nap’an nra yag ni ngkud mada’gad bayay nga taabang, ma aram e rayog ni ngad nanged boch e Pi Mich Rok Jehovah u nap’an e muulung, nge assembly, nge convention, nge yugu boch e muulung ni gad ma tay.

Ra dabiyog ni ngad muulunggad nga taabang, ni bod u nap’an fare m’ar ni COVID-19 ma gad ma fanay boch ban’en u online ya nge yag nda uned ko muulung. Aram e gin nrayog ni ngad nanged boch e Pi Mich riy ndawor ra uned ko mabgol. Rayog ni ngam guy rogon e welthin ni yad ma pi’ u nap’an e muulung nge rogon ni yad ma weliy e michan’ rorad u daken e fulweg ni yad ma pi’. (1 Tim. 6:11, 12) Sana rayog ni ngam nonad u tomuren e muulung. Nap’an ni gimed be sabethin boch e Pi Mich u online, ma rayog ni ngam guy rogon e ngongol rorad ngak yugu boch e girdi’. Aray rogon nrayog ni ngam nang e bin riyul’ i rarogon be’. (1 Pet. 3:4) Ra munmun ni kam nang facha’ nib fel’ rogon, ma aram e rayog ni ngam nang ko taareb rogon e pi n’en gimew be nameg, ma gimew ra m’ag ni ngam mabgolgow fa danga’.

Nap’an nra fanay e piin dawor ra uned ko mabgol e pi kenggin e motochiyel u Bible ni nge ayuwegrad ni ngar pirieged be’ ni ngar mabgolgad, ma rayog ni ngar guyed nib riyul’ fapi thin ko Proverbs ni be gaar: “Ga ra pirieg reb e ppin [ara pumoon] ni ngam leengiy ma aram ban’en nib fel’ ni kam pirieg; ma be dag ni Somol e ba gol ngom.”​—Prov. 18:22, BT.