1. Mang fan ni Jehovah e der ma taareb rogonnagdad ngak yugu boch e girdi’?

DABUN Jehovah ni nge taareb rogon urngin ban’en nge urngin e girdi’. Ke m’ug e re n’ey ko pi n’en ni sunmiy nib muun e girdi’ ngay. Ra bagadad ma rarogon. Ere Jehovah e der ma taareb rogonnagem ngak yugu boch e girdi’. Manang e bin riyul’ i rarogom. (1 Sam. 16:7) Ku manang e n’en nrayog rom, nge n’en ndabiyog rom, nge rogon nni chuguliyem. Ma dabi yog ngom ni ngam rin’ ban’en ndabiyog rom. Ere thingar ud lemnaged gadad ni bod rogon ni ma lemnagdad Jehovah. Faan gad ra rin’ ni aray rogon, ma aram e rayog ni ngad ‘gonopiyed’ rogon e lem rodad ma dab ud lemnaged rarogodad nib pag rogon, ara da lemnaged ndariy fadad.​—Rom. 12:3.

2. Mang fan nde fel’ ni ngad taareb rogonnaged gadad ngak yugu boch e girdi’?

² Rayog ni ngad filed ban’en nib fel’ rok boch e girdi’. Bod nsana gad manang reb e walag nrib salap ko machib. (Heb. 13:7) Ere rayog ni ngad filed rok rogon ni ngad mon’oggad ko machib ni gad be tay. (Fil. 3:17) Machane ba thil e bin ni ngam folwok ko n’en nib fel’ ni ke rin’ be’ ko bin ni ngam taareb rogonnagem ngak. Faan ga ra taareb rogonnagem ngak be’, ma rayog ni nga i awan’um ngak, ara mulan’um, ara mu lemnag nde ga’ fam. Maku reb e, faan ga ra guy rogon ni nge m’ug ni ka gab fel’ ko tin ka bay e walag, ma ra magawon e tha’ u thilmew Jehovah ni bod rogon ni kad weliyed ko fa binem e article. Aram fan ni be fonownagdad Jehovah ni be gaar: “Ra be’ ma nge mang ir e changar ngak nge fal’eg i yaliy e ngongol rok ara pangin. Ma faanra ba fel’ e ngongol rok, me ere rayog ni nge felfelan’ ko ngongol ni ke rin’, me siy i puluwnag e ngongol rok ko ngongol ni ke rin’ yugu be’.”​—Gal. 6:4.

3. Mang boch ban’en ni kam mon’og riy ko pigpig rom ngak Jehovah ni ke yibnag e felfelan’ ngom?

 ³ Baadag Jehovah ni ngam felfelan’ nga rogon e mon’og ni ga be tay ko pigpig rom ngak. Bod ni faanra kam un ko taufe, ma susun e ngam felfelan’ ya ke yag ni ngam rin’ e re n’ey! Gur rom e kam dugliy ni ngam rin’ e re n’ey ni bochan e ba t’uf Got rom. Am lemnag rogon e mon’og ni kam tay ni ka nap’an e ngiyal’ nem ke yib i mada’ ko chiney. Bod nsana ke mon’og rogon e beeg Bible ni ga ma tay nge fol Bible ni ga ma tay ni goo gur. Fa reb e ke yag ni ngarim weliy lanin’um u nap’an ni ga be meybil. (Ps. 141:2) Rayog ni kam mon’og u rogon ni ngam tababnag e numon ngak be’ u nap’an e machib, ara ke mom ni ngam fanay e pi n’en ni kan ngongliy ni fan ko machib. Ma faanra bay e tabinaw rom, ma rayog ni ke ayuwegem Jehovah kam mang reb i figirngiy, ara leengiy, ara reb e gallabthir nib manigil. Rayog ni ngarim felfelan’ nga urngin e pi n’ey ni kam mon’og riy.

4. Mang e gad ra weliy ko re article ney?

⁴ Rayog ni ngad ayuweged yugu boch e girdi’ ni ngar felfelan’gad nga rogon e mon’og ni kar ted. Ku rayog ni ngad ayuweged yad ni nge dab ur taareb rogonnaged yad ngak yugu boch e girdi’. Gad ra weliy ko re article ney rogon nrayog ni nge ayuweg e piin gallabthir pi fakrad, nge rogon nrayog ni nge ayuweg ba wu’ i mabgol yow, nge rogon nrayog ni nge ayuweg e piin piilal nge yugu boch e walag e pi walag u lan e ulung. Ku gad ra weliy boch i kenggin e motochiyel nra ayuwegdad ni ngad nameged boch ban’en nrayog ni ngad rin’ed.

5. Mang e susun ni nge siyeg e piin gallabthir nrogon ni be yog e Efesus 6:4?

⁵ Susun ni nge kol ayuw e piin gallabthir ndab ur taareb rogonnaged reb i fakrad nga reb, ara ra lemnaged ni nge rin’ bagayad ban’en ndabiyog rok. Faanra ur rin’ed e re n’ey, ma rayog ni ngar muleged laniyan’ pi fakrad. (Mu beeg e Efesus 6:4.) I yog Sachiko * nreb e walag nib pin ni gaar: “Baadag e sensey rog ni nggu cheg ko tin ka bay e bitir ni gamad nga skul. Ma chitinag e baadag ni nge fel’ e skul rog ya nge fel’ e girdi’ rok Jehovah u wan’ e sensey rog nge chitamag ndawori nang e tin riyul’. Bin riyul’ riy e, baadag ni gubin e skeng rog u skul ni nge yan ndariy reb ni bay e oloboch riy ni ban’en ndabiyog rog. Ke yoor e duw ni kug chuw u skul, machane yu ngiyal’ e gu ma lemnag nde fel’ u wan’ Jehovah e tin gu be rin’ ni yugu aram rogon ni gu be rin’ e tin rayog rog.”

6. Mang e rayog ni nge fil e piin gallabthir ko Psalm 131:1, 2?

 ⁶ Bay ban’en nib ga’ fan nrayog ni nge fil e piin gallabthir ko Psalm 131:1, 2, BT. (Mu beeg.) I yog David ni Pilung nder ma nameg e tin “kaygi ga” ban’en, ara lemnag ni nge rin’ boch ban’en nib mo’maw’ ngak. Bochan nib sobut’an’ ma aram fan nib fel’ u wan’ e tin bay rok mab gapas laniyan’. Ere mang e rayog ni nge fil e piin gallabthir ko n’en ni yog David? Thingar dab ra lemnaged boch ban’en ndabiyog rorad ara dabiyog rok pi fakrad ni ngar rin’ed ya nge yag nra pared nib sobut’an’rad. Rayog ni nge ayuweg e gallabthir pi fakrad ni nge ga’ farad u wan’rad ni aram e ngar nanged e tin rayog rorad nge tin dabiyog rorad, mar ayuweged yad ni ngar nameged boch ban’en nrayog ni ngar rin’ed. Marina nreb e walag nib pin e yog ni gaar: “Chitinag e der ma taareb rogonnageg ngak pi walageg ara yugu boch e bitir. I fil ngog nra be’ mab thil e salap rok, ma gad gubin nib ga’ fadad u wan’ Jehovah. Bochan e re n’ey, ma aram fan ni gathi rug ma taareb rogonnageg ngak yugu boch e girdi’.”

7-8. Uw rogon nrayog ni nge tay reb i figirngiy fan leengin?

⁷ Reb i figirngiy ni Kristiano e thingari tayfan leengin. (1 Pet. 3:7) Ra ngam tayfan be’ ma aram e ngaum tay e tayim ni fan ngak. Bod nreb i figirngiy ni ma tayfan leengin e ma dag ngak ni ir be’ nib ga’ fan. Ere dabi yog ngak ni nge rin’ ban’en ndabiyog rok. Ma der ma taarebrogonnag leengin ngak yugu boch e ppin. Mang e rayog ni nge buch rok leengin ni faanra i taarebrogonnag ngak yugu boch e ppin? Bay reb e walag nib pin ni ka nog Rosa ngak ni pumoon rok e de nang e tin riyul’ ma ma taarebrogonnag ngak yugu boch e ppin. Thin nib kireb ni ma yog ngak Rosa e ma k’aring ni nge lemnag ndariy fan, ma sana ku dariy be’ nib t’uf rok. I gaar, “Ba t’uf ni ngaun puguran ngog nib ga’ fag u wan’ Jehovah.” Machane reb i figirngiy ni Kristiano e ma tayfan leengin. Manang nra rin’ e re n’ey, ma rayog ni nge par e tha’ u thilrow e en mabgol rok nge Jehovah nib fel’. *

⁸ Reb i figirngiy ni ma tayfan leengin e ma weliy fel’ngin leengin ngak yugu boch e girdi’, ma ma yog ngak nib t’uf rok mab ga’ fan. (Prov. 31:28) Ireray e n’en ni rin’ figirngin Katerina ni faan ni kan weliy murung’agen ko fa binem e article ya nge ayuweg ndab ki lemnag ndariy fan. Nap’an ni kab bitir Katerina, ma chitiningin e ma gathibthibnag, ma ma taarebrogonnag ngak yugu boch e bitir nib muun e pi fager rok ngay. Bochan e re n’ey, ma aram me tabab ni nga i taarebrogonnag ir ngak yugu boch e girdi’ ngki mada’ nga tomuren ni ke nang e tin riyul’! Machane ke yag ni nge ayuweg figirngin ni nge tal i rin’ e re n’ey, me puluw rogon ni nga i lemnag ir. I gaar: “Gub t’uf rok ma ma pining e magar ngog ko tin nib fel’ ni gu ma rin’, ma ma pi’ e meybil rog. Ku ma puguran ngog pi fel’ngin Jehovah nib manigil miki ayuwegeg ni nggu yal’uweg rogon e lem nde puluw ni gu ma tay.”

9-10. Uw rogon ni ayuweg e piin piilal reb e walag nib pin ni nge dabki taarebrogonnag ir ngak yugu boch e girdi’?

⁹ Uw rogon nrayog ni nge ayuweg e piin piilal e piin yad ma taareb rogonnaged yad ngak yugu boch e girdi’? Am lemnag e n’en ni buch rok reb e walag nib pin ni ka nog Hanuni ngak. Nap’an ni kab bitir ma gathi ri yima yog fel’ngin e tin nib fel’ ni ma rin’. I gaar: “I gag be’ ni gub tamra’ ma gu ma lemnag ni kab fel’ e tin ka bay e bitir ngog. Ka nap’an ni ku gub bitir ni gu ma taareb rogonnageg ngak yugu boch e girdi’.” Mus nga tomuren ni nang e tin riyul’, maku ma taarebrogonnag ir ngak yugu boch e girdi’. Bochan e re n’ey, me lemnag nde ga’ fan u lan e ulung. Machane chiney e be pigpig ni ir reb e pioneer nib felfelan’. Ere mang e ayuweg ni nge thilyeg e lem rok?

 ¹⁰ I yog Hanuni ni piin piilal e ra ayuweged. U rogned ngak nib ga’ fan u lan e ulung, mu kur pininged e magar ngak ko pi n’en nib fel’ ni ma rin’. I yoloy ni gaar: “Yu ngiyal’ e ma yog e piin piilal ngog ni nggu pi’ e athamgil nga laniyan’ boch e walag nib pin nib t’uf e ayuw rorad. Re n’ey e ma k’aringeg ni nggu lemnag nib ga’ fag. Ke yib ngan’ug ba ngiyal’ ni pining e piin piilal e magar ngog ko athamgil nug pi’ nga laniyan’ boch e walag nib pin ni gub ilal ngorad. Ngemu’ mar beeged ngog fare thin ko 1 Thessalonika 1:2, 3. Re n’ey e ri k’aring e felfelan’ ngog! Bochan e ayuw ni ke pi’ e piin piilal ngog, ma chiney e kug nang nib ga’ fag u lan e ulung.”

11. Uw rogon nrayog ni ngad ayuweged e piin “ke mulan’rad” ma dakuriy ban’en ni be l’agan’rad ngay nrogon ni be yog e Psalm 34:18?

¹¹ Mu beeg e Psalm 34:18. Ri ma lemnag Jehovah e piin “ke mulan’rad” ma dakuriy ban’en ni be l’agan’rad ngay. Gad gubin nrayog ni ngad pied e athamgil nga laniyan’ e pi walag ni aray rogon ma gathi kemus ni piin piilal. Reb e kanawo’ ni ngad rin’ed e re n’ey riy e aram e ngad daged ngorad nri gad be lemnagrad. Baadag Jehovah ni ngad daged ngorad gelngin nri yad ba t’uf rok. (Prov. 19:17) Ku rayog ni ngad ayuweged yad ni aram e ngad sobut’naged lanin’dad ma dab ud ufgad ko pi n’en gad ba salap riy. Dab ud guyed rogon ni ngan pining e sorok ngodad ni bochan e dubdad ni nge awan’ boch e girdi’ ngodad. Ya gad baadag ni ngad pied e athamgil nga laniyan’ e pi walag u daken e thin nge ngongol rodad.​—1 Pet. 4:10, 11.

12. Mang fan ni baadag e piin ma lemnag e girdi’ nde ga’ farad ni ngar chaggad ngak Jesus? (Mu guy e sasing ni bay u wuru’ e re ke babyor ney.)

¹² Boor ban’en nrayog ni ngad filed u rogon ni ngad ngongolgad ngak yugu boch e girdi’ ni faan gad ra lemnag rogon e ngongol rok Jesus ngak pi gachalpen. Jesus e ir e bin th’abi fel’ e moon ni immoy u fayleng. Yugu aram rogon mab ‘munguy mab sobut’an’.’ (Matt. 11:28-30) Da i uf nga urngin ban’en ni manang. Nap’an ni i fil ban’en ko girdi’, ma ma non ngorad u reb e kanawo’ nrayog ni ngar nanged fan, miki fanay boch e fanathin nib mom ni ngar nanged fan. Pi n’en ni fil e taw nga gum’irchaen e piin ma lemnag e girdi’ nde ga’ farad. (Luke 10:21) Ba thil Jesus ko pi tayugang’ ko teliw ni yad ba ufanthin, ya gubin ngiyal’ ni ma ayuweg e girdi’ ni ngar nanged nib ga’ farad u wan’ Got. (John 6:37) Ma tayfan e piin ma lemnag e girdi’ nde ga’ farad.

13. Uw rogon ni dag Jesus e sumunguy nge t’ufeg ngak pi gachalpen?

¹³ I m’ug e sumunguy nge t’ufeg rok Jesus u rogon ni i ngongol ngak pi gachalpen. Manang nra bagayad mab thilthil e n’en nrayog ni nge rin’ ma kub thilthil rarogorad. Manang ni gathi yad gubin ni taareb urngin e maruwel nrayog ni ngar rin’ed ma kub thilthil e n’en nrayog ni ngar rin’ed u nap’an e machib. Machane ba felfelan’ ngay nra bagayad ma be rin’ e tin rayog rok. I tamilangnag Jesus e re n’ey u lan fare fanathin ni yog ni murung’agen fapi salpiy. I weliy ko re fanathin nem ni pi’ fare masta e maruwel ngak e pi tapigpig rok nra bagayad ma ‘rogon e maruwel nrayog rok.’ Bay l’agruw i yad nib gel e maruwel nra tew, machane bay bagayow ni boor ban’en ni yognag ngak bagayow. Yugu aram rogon ma yow l’agruw ni pining fare masta e magar ngorow, ma ra bagayow me gaar ngak: “Ri gab manigil, gur reb e tapigpig ni gab fel’ ma gab yul’yul’!”​—Matt. 25:14-23.

14. Uw rogon nrayog ni ngad folwokgad u rogon ni ma ngongol Jesus ngak e girdi’?

¹⁴ Gubin ngiyal’ ni ma dag Jesus e sumunguy nge t’ufeg ngodad. Manang nra bagadad mab thilthil e n’en nrayog ni nge rin’ nge rarogon, mab felfelan’ ngay ni faan gad ra rin’ e tin rayog rodad. Ere susun e ngad folwokgad rok. Susun e dab da k’aringed reb e walag ni nge lemnag ndariy fan, ara tamra’ ngay ndabiyog ni nge rin’ urngin e tin be yag ni nge rin’ boch e walag. Susun  e gubin ngiyal’ ni ngad pininged e magar ko pi walag ni bochan e yad be rin’ e tin rayog rorad ni fan ko pigpig rorad ngak Jehovah.

15-16. Bochan ni nameg reb e walag nib pin boch ban’en nrayog ni nge rin’, ma uw rogon ni yib angin ngak?

¹⁵ Nap’an ni gad ra nameg boch ban’en ni fan ko pigpig rodad ngak Jehovah, ma ra yib fan e yafos rodad. Machane thingar da nameged boch ban’en nrayog ni ngad rin’ed. De t’uf ni nge taareb rogon e n’en ni gad be nameg ngak yugu boch e girdi’. Ya faan gad ra rin’ ni aray rogon, ma aram e rayog ni nge kireban’dad miki mulan’dad. (Luke 14:28) Am lemnag e n’en ni buch rok Midori nreb e walag nib pin nib pioneer.

¹⁶ Nap’an ni kab bitir Midori, ma ma yog e chitamangin ngak ni kab fel’ e gal ni baaram i walagen ngak nge pi bitir ni yad nga skul. I gaar, “Ug lemnag ndariy fag.” Machane nap’an ni ilal boch me tabab ni nge yib fan u wan’. I gaar, “Gubin e rran ni gu ma beeg e Bible ni bochan e ma ayuwegeg ni nggu nang ni gub t’uf rok Jehovah.” Miki nameg boch ban’en nrayog ni nge rin’, me ning e ayuw ngak Jehovah ya nge yag ni rin’ e pi n’em. Re n’ey e ayuweg Midori ni nge felfelan’ ko tin be yag ni nge rin’ ni fan ngak Jehovah.

17. Mang e rayog ni nge ayuwegdad ni ngad thilyeged rogon ni gad ma lemnag rarogodad, ma mang angin nra yib riy?

¹⁷ Rayog nib n’uw nap’an mfini yag ni ngad thilyeged rogon ni gad ma lemnag rarogodad. Aram fan ni ke fonownagdad Jehovah ni be gaar: “Gum’ircha’med nge lanin’med e thingari pig ni polo’ nge beech.” (Efe. 4:23, 24) Ere faanra nge yag ni ngad rin’ed e re n’ey, mab t’uf ni ngad meybilgad ni gubin ngiyal’, ma gad be fil e Thin rok Got, ma gad be fal’eg i lemnag. Mu ulul ni ngam rin’ e pi n’ey, mag ning e ayuw ngak  Jehovah ni nge pi’ gelngim. Ra ayuwegem gelngin nib thothup ni nge dab um taareb rogonnagem ngak yugu boch e girdi’. Ku ra ayuwegem Jehovah ni ngam nang e ngiyal’ ni ke tabab ni nga i awan’um ara ngaum ufanthin, ma aram e ra ayuwegem ni ngam thilyeg rarogom nib papey.

18. Uw rogon nrayog ni nge fal’eg fapi thin ni bay ko 2 Kronicles 6:29, 30 lanin’um?

¹⁸ Mu beeg e 2 Kronicles 6:29, 30. Manang Jehovah rogon lanin’dad. Ku manang gelngin ni gad be siyeg e lem nge ngongol nib kireb ko re fayleng ney, nge rogon ni gad be athamgil ni ngad gelgad ko pi meewar rodad. Nap’an nra guy gelngin e athamgil ni gad be tay ni ngad gelgad ko pi n’ey, ma ri ma gel e t’ufeg rok ngodad.

19. Uw rogon ni ke dag Jehovah rogon ni ma lemnagdad?

¹⁹ Ke fanay Jehovah e tha’ u thilin ba matin nge fak ni nge dag rogon ni ma lemnagdad. (Isa. 49:15) Am lemnag e n’en ni buch rok reb e matin ni ka nog Rachel ngak. I gaar: “Stephanie ni fakag e ni gargeleg ndawori taw nga pulan. Som’on nug guy e rib achig ndariy gelngin ni nge mithmith. Machane i pageg e togta ni ngaug dibey ni gubin e rran u aspital u lan e bin som’on e pul ni kan gargeleg riy. Nap’an e re ngiyal’ i n’em me chugur e tha’ u thilmow. Chiney e ke gaman nel’ e duw rok ma kab achig ko pi taab yangar rok. Yugu aram rogon ma rib t’uf rog ya gu manang gelngin e athamgil ni i tay ni nge par nib fos, mab gel e felfelan’ ni ke yibnag nga lan e yafos rog!” Gad ba felfelan’ ni gad manang nri gad ba t’uf rok Jehovah u nap’an nra guy gelngin e athamgil ni gad be tay ni ngad pigpiggad ngak u rogon nrayog rodad!

20. Mang fan nrayog ni ngam felfelan’ ni gur reb e tapigpig rok Jehovah?

²⁰ Bochan ni gur reb e tapigpig rok Jehovah, ma kam mang reb i girdien e tabinaw rok ndariy be’ ni taareb rogomew. De pow’iyem Jehovah ngak ni bochan e ka gab fel’ ko tin ka bay e girdi’. Ya ke rin’ ni bochan e ke guy ni gur be’ ni gab sobut’an’ mab m’agan’um ngay ni ngam fil ban’en rok mag thilyeg rarogom. (Ps. 25:9) Rayog ni nge pagan’um ngay ni ma felfelan’ u nap’an ni ga ra pigpig ngak u rogon nrayog rom. Athamgil ni ga be tay nge yul’yul’ rom ngak e be m’ug riy ni gur be’ nib fel’ gum’irchaem. (Luke 8:15) Ere gubin ngiyal’ ni ngam rin’ e tin rayog rom ni fan ngak Jehovah. Faan ga ra rin’ e re n’ey, ma ga ra felfelan’ ko “ngongol ni [kam] rin’.”