1-2. Uw rogon ni be pi’ e thin rok Jehovah ni bay ko Isaiah 65:16, 17 e athamgil nga lanin’dad ndabi mulan’dad?

KENGGIN fare regional convention nni tay ko duw ni 2017 e “Dabi Mulan’um!” Kad filed ko re muulung nem rogon ni ngad athamgilgad u fithik’ e pi magawon ni gad ma mada’nag. Ke yan aningeg e duw nap’an nni tay e re convention ney ma ka gad be athamgiliy rogon e par u lan e re fayleng nib kireb ney.

² Mang boch e magawon ni ke yib ngom? Gur, ke yim’ reb i girdien e tabinaw rom ara reb e fager rom nrib t’uf rom? Gur, ke yib ba mit e m’ar ngom nrayog ni nga mum’ riy? Fa be mo’maw’ rogon e par rom ni bochan e ga be pilibthir i yan? Gur, be yib e yoko’, ara durru’, ara yibe cham ko gin ga be par riy, fa ga be mada’nag e togopuluw? Fa gur, ga be gafgow ni bochan fare m’ar ni COVID-19? Ri gad be athapeg ni nge taw ko ngiyal’ nra chuw e tiney e magawon, min pagtalin ndab kun lemnag!​—Mu beeg e Isaiah 65:16, 17.

3. Mang e thingar da rin’ed e ngiyal’ ney, ma mang fan?

³ Ba mo’maw’ e par u lan e re m’ag ney, ma ra boch nga m’on maku rayog ni ngad mada’naged boch e magawon ni ke gel e mo’maw’ riy. (Matt. 24:21) Ere ba t’uf ni ngaud athamgilgad. Mang fan? Ya gaar Jesus: “En nra athamgil nge mada’ ko tomur e ra yog e yafos ngak.” (Matt. 24:13) Faan gad ra lemnag rogon e athamgil ni be tay boch e girdi’ u fithik’ boch e magawon ni bod rogon e tin gad be mada’nag, ma rayog ni ngki yib gelngidad ni ngkud athamgilgad.

4. Mang fan nrayog ni nga dogned ni Jehovah e ir e ke dag e bin th’abi fel’ e kanawo’ u rogon e k’adan’ ni be tay?

⁴ Mini’ e ke dag e bin th’abi fel’ e kanawo’ u rogon e k’adan’ ni be tay? Aram Jehovah Got. Ga be gin ko re n’ey, fa? Sana kam gin ngay. Machane ga ra fal’eg i lemnag ma ga ra nang fan. Re fayleng ney e ke suwey Moonyan’, ma ke sug ko magawon. Bay gelngin Jehovah ni nge chuweg e pi magawon ney ni ka chingiyal’ ney, machane  be sonnag ba ngiyal’ nib puluw ni nge rin’ riy boch nga m’on. (Rom. 9:22) Yugu aram rogon, ma ka be k’adan’ nge mada’ ko ngiyal’ nra thang e re fayleng ney. Chiney e ngad weliyed mereb ban’en ni be k’adan’ Jehovah riy.

5. Uw rogon ni kan darifannag fithingan Got? Uw rogon e re n’ey u wan’um?

⁵ Kan darifannag fithingan. Rib ga’ fan e ngachal rok Jehovah u wan’, ma baadag ni urngin e girdi’ ni ngar ted fan. (Isa. 42:8) Yugu aram rogon ma ke yan sogonap’an 6,000 e duw ni yibe darifannag e ngachal rok. (Ps. 74:10, 18, 23) I tabab e re n’ey u lan fare milay’ nu Eden u nap’an ni yog Moonyan’ (ni be yip’ fan “Be’ ni Ma T’ar e Thin nga Daken Be’”) ni bay ban’en ni be tel Got nder pi’ ngak Adam nge Efa nra yibnag e felfelan’ ngorow. (Gen. 3:1-5) Ka aram nap’an i yib ni yibe t’ar e thin nga daken Jehovah ni yibe yog ni bay ban’en nib t’uf ko girdi’ nder pi’ ngorad. I magafan’ Jesus ni bochan e yibe darifannag fithingan e Chitamangin. Aram fan ni fil ngak pi gachalpen ni ngaur meybilgad ni nge lungurad: “Chitamangimad ni ga bay u tharmiy: Ngan tay fan fithingam nib thothup.”​—Matt. 6:9.

6. Mang fan ni ke pag Jehovah ba ngiyal’ nib n’uw nap’an ni nge yan u m’on ni nge micheg ni ir e bay mat’awun ni nge gagiyegnag e tharmiy nge fayleng?

⁶ Yibe togopuluw nga mat’awun e gagiyeg rok. Yigoo Jehovah e bay mat’awun ni nge gagiyegnag e tharmiy nge fayleng, ma birok e gagiyeg e aram e bin th’abi fel’. (Rev. 4:11) Machane ke guy Moonyan’ rogon ni nge bannag boch e engel nge girdi’ ya ngar lemnaged ndariy mat’awun Got ni nge gagiyeg. Ere ba t’uf ba ngiyal’ ni nge m’ug e mich riy ni Jehovah e ir e bay mat’awun ni nge gagiyeg, maku ir e en th’abi fel’ ni nge gagiyeg. Ba gonop nga rogon ni ke pag e girdi’ ni ngar gagiyegnaged yad u lan ba ngiyal’ nib n’uw nap’an, ya nge yag nra guyed ndabiyog ni ngar gagiyegnaged yad nib fel’ rogon ni faanra dab ra folgad ko En Ke Sunmiy urngin ban’en. (Jer. 10:23) Bochan e gum’an’ ni be tay ma ra puf e biney e magawon ndab ki sum bayay. Gubin e girdi’ ni yad ra nang ni birok e gagiyeg e aram e bin th’abi fel’, ma yigoo Gil’ilungun e ra yibnag e bin riyul’ e gapas nge pagan’ nga fayleng.

7. Mini’ e piin kar togopuluwgad ngak Jehovah, ma mang e bayi rin’ ngorad?

⁷ Ke togopuluw boch i pi fak ngak. I sunmiy Jehovah e engel nge girdi’ ni yad ba flont. Machane me togopuluw reb e engel ni aram Satan (ni be yip’ fan e “Tatogopuluw”), me pingeg laniyan’ Adam nge Efa ni l’agruw e girdi’ ni yow ba flont ni ngar togopuluwgow ngak Jehovah. Ma aram miki un boch e engel nge girdi’ ko togopuluw nra ted. (Jude 6) Boch nga tomuren ma fare nam nu Israel ni ke mel’egrad Got ni ngar manged girdien e ra togopuluwgad ngak, mar tababgad ko liyor nga boch e got ni googsur. (Isa. 63:8, 10) Ri kireban’ Jehovah ko n’en kan rin’ ngak. Yugu aram rogon ma be k’adan’, maku ra ulul ni nge rin’ e re n’ey nge mada’ ko ngiyal’ ni ke thang urngin e piin yad be togopuluw ngak. Aram e ngiyal’ nra felfelan’ Jehovah nge piin yad ba yul’yul’ ngak ni bochan e dab kur k’adedan’rad ko kireb ni be buch u lan e re m’ag ney!

8-9. Mang boch e ban ni kan weliy u murung’agen Jehovah, ma mang e rayog ni ngad rin’ed ngay?

⁸ Pi ban rok Moonyan’. I t’ar Satan e thin nga daken Job nge urngin e tapigpig rok Jehovah ni yad ba yul’yul’ me yog ni fan ni yad be pigpig ngak e bochan e tin nib fel’ ni be yag riy ngorad. (Job 1:8-11; 2:3-5) Ka be ulul Moonyan’ i rin’ e re n’ey ke mada’ ko chiney. (Rev. 12:10) Faan gad ra athamgil u fithik’ e pi magawon rodad ma gad par ni gad ba yul’yul’ ngak Jehovah ni bochan e ba t’uf rodad, ma aram e rayog ni ngad micheged nde riyul’ e pi n’en be yog Satan. Faan gad ra rin’ ni aray rogon, ma ra tow’athnagdad Jehovah ni bod rogon ni tow’athnag Job.​—Jas. 5:11.

⁹ Ma fanay Satan e pi tayugang’ ko teliw ni googsur ni nga rogned nib kireb Jehovah ma ir e be k’aring e girdi’ ni ngar gafgowgad. Nap’an nra  yim’ reb e bitir ma ma yog boch e girdi’ ni ke fek Got nga tharmiy ni bochan e ba t’uf boch e engel u rom. Re n’ey e ri be darifannag Got! Ya gad manang ni ir e Chitamangidad ni gad ba t’uf rok. Nap’an nra yib ba mit e m’ar nib ubchiya’ ngodad ara yim’ be’ nib t’uf rodad, ma dab dogned ni Got e kireb rok. Ya ba mich u wan’dad nra yan i taw nga ba ngiyal’ ma ra golnag e piin nib m’ar me faseg e piin kar m’ad. Rayog ni nga dogned ngak e piin yad ra motoyil ni Jehovah e ir reb e Got ni ma t’ufegey, ma aram e bay e fulweg nra pi’ ngak e en be gathibthibnag.​—Prov. 27:11.

10. Mang e be yog e Psalm 22:23, 24 u murung’agen Jehovah?

¹⁰ Gafgow ni be tay e pi tapigpig rok ni yad ba t’uf rok. Jehovah e ir reb e Got ni ma runguyey. Ma kireban’ u nap’an nra guydad ni gad be gafgow ni bochan e togopuluw ni yibe tay ngodad, ara m’ar ni keb ngodad, ara rarogodad ndawor da flontgad. (Mu beeg e Psalm 22:23, 24.) Manang Jehovah gelngin e gafgow ni gad be yan u fithik’, ma baadag ni nge taleg, ma aram e n’en nra rin’. (Mu taarebrogonnag ko Exodus 3:7, 8; Isaiah 63:9.) Ra taw nga ba ngiyal’ ma ra ‘n’ag urngin e lu’ u owchedad. Ma aram e dab ku unim’, ma dab ki i kireban’uy, ma dab ku un yor, ma dab ku un amith.’​—Rev. 21:4.

11. Uw rogon u wan’ Jehovah e pi tapigpig rok ni kar m’ad ni yad ba yul’yul’ ngak?

¹¹ Pi fager rok ni kar m’ad. Uw rogon u wan’ Jehovah boch e girdi’ ni kar m’ad ni yad ba yul’yul’ ngak? Ri baadag ni ngki guyrad bayay! (Job 14:15) Am lemnag gelngin nri baadag Jehovah ni ngki guy Abraham ni fager rok bayay! (Jas. 2:23) Ara Moses ni ‘yow ma welthin ni bod rogon ruw i fager’! (Ex. 33:11) Ku dabisiy ni be athapeg ni ngki rung’ag laman David bayay nge boch e girdi’ nra yoloyed e psalm ni yad be yon’ boch e tang ni ngar pininged e sorok ngak! (Ps. 104:33) Yugu aram rogon ni ke yim’ e pi fager rok Got ney, machane dawori pag tilrad. (Isa. 49:15) Ka manang gubin ban’en u rarogorad. Be yog e  Bible ni rogon ni be guyrad Got e “yad urngin ni yad ba fos.” (Luke 20:38) Ra taw nga ba ngiyal’ ma ra fasegrad ko yam’, miki rung’ag bayay e meybil rorad, me m’agan’ ko liyor ni yad be tay ngak. Faanra ke yim’ be’ nib t’uf rom, ma pi thin ney e ra fal’eg lanin’um.

12. Mang boch ban’en ni ma buch e ngiyal’ ney ko tin tomuren e rran ni kari gel e kireb riy ni ma k’aring e kireban’ ngak Jehovah?

¹² Girdi’ ni kireb ni yad be gafgownag yugu boch e girdi’. Nap’an ni tabab e togopuluw u Eden, me nang Jehovah nra gel e kireb u gubin ban’en u m’on ni nge sul ngki fel’ bayay. Be fanenikan Jehovah e kireb, nge ngongol nde mat’aw, nge cham ni be guy ni be buch u fayleng e chiney. Ri ma runguy e piin yad ba meewar, ma dariy be’ nrayog ni nge ayuwegrad ni bod rogon e bitir ni ka nim’ rorad ara piin nib pin ni ke yim’ figirngirad. (Zek. 7:9, 10) Rib gel e kireban’ ni ma tay u nap’an nra guy ni yibe gafgownag e pi tapigpig rok ni yad ba yul’yul’ maku yibe yon’rad nga kalbus. Gad gubin e piin gad be un ngak ko k’adan’ ni be tay e rayog ni nge pagan’dad ngay ni gad ba t’uf rok.

13. Mang boch e ngongol ni golong ni be guy Got ni be rin’ e girdi’, ma mang e ra rin’ ngay?

¹³ Be elmerin e ngongol ndarngal ni be rin’ e girdi’. Kan sunmiy e girdi’ ni ngaur folwokgad rok Got, machane ri baadag Satan ni nge k’aringrad ni ngaur rin’ed e kireb. Nap’an ni guy Got ni “kari gel e kireb rok e girdi’” u nap’an Noah, “me taganan’ ngay ni ke sunumegrad ke ta’rad nga daken e fayleng. Me par ni kari kolngan’ riy.” (Gen. 6:5, 6, 11) Ke yag ni nge fel’ boch e par u fayleng nga tomuren keb i mada’ ko ngiyal’ ney, fa? Danga’! Rib felfelan’ Moonyan’ ni be guy urngin mit e ngongol ndarngal ni yibe rin’ nib muun ngay e tin be rin’ e pumoon nge ppin, nge pumoon nge pumoon, nge ppin nge ppin! (Efe. 4:18, 19) Ri kub gel e felfelan’ ni ma tay ni faanra yag rok ni nge waliy e piin yad ma pigpig ngak Jehovah ni ngar rin’ed boch e denen nib ubchiya’. Ra mus nap’an e gum’an’ ni be tay Jehovah, ma aram e ra dag ni be fanenikan e ngongol ndarngal ni yibe rin’ ni aram e ra thang urngin e piin yad be rin’ e pi ngongol ney ndubrad ni ngar thilgad.

14. Mang e be rin’ e girdi’ ko re fayleng ney nge gamanman ni bay riy?

¹⁴ Be kirebnag e girdi’ e fayleng ni ke sunmiy. Gathi kemus ni bay boch e girdi’ nib gel lungurad ni yad ‘be gafgownag e piin bay u tan pa’rad,’ ya ku darur ayuweged e fayleng nge gamanman ni ke pag Jehovah fan ngak e girdi’ ni ngar ayuweged. (Ekl. 8:9; Gen. 1:28) Be yog boch e girdi’ ni llowan’ ni ka in e duw ni ka bay ma reb e milyon mit e gamanman nge woldug ni bayi math mit ni bochan e n’en be rin’ e girdi’. Ere rayog ni ngad nanged fan ni be magafan’ e girdi’ ko n’en be buch ko pi n’en bay u toobdad! Machane gad be pining e magar ngak Jehovah ni bochan e ke micheg ni bayi “kirebnag e piin ni kar kirebniged e fayleng,” me paradisnag e fayleng.​—Rev. 11:18; Isa. 35:1.

15-16. Mang e susun nra k’aringdad ni ngad k’adedan’dad ni bod rogon Jehovah? Mu susunnag.

¹⁵ Am lemnag urngin e magawon ni ke k’adan’ e Chitamangidad ni bay u tharmiy riy ni ke yan bokum biyu’ e duw. (Mu guy fare kahol ni kenggin e “ N’en ni Be K’adan’ Jehovah Riy.”) Demtrug e ngiyal’ nrayog ni nge thang Jehovah e re m’ag nib kireb ney. Machane bochan e gum’an’ ni be tay, ma aram e boor angin ni be yib ngodad! Baaray rogon nrayog ni ngad susunnaged. Ka nog ngak ba wu’ i mabgol nnap’an nra gargel fare pin mab m’ar fakrow, ere ra mo’maw’ e par rok ma ra yim’ ni kab bitir. Machane yow ba felfelan’ u nap’an ni yira gargeleg fare tir ni yugu aram rogon nra mo’maw’ rogon ni ngar chuguliyew. Bochan nrib t’uf fare tir rorow, ma aram fan ndemtrug e magawon ni yow ra mada’nag, ma yow ra k’adan’ u fithik’ ya nge yag nra ayuwegew fare tir u rogon nrayog rorow.

 ¹⁶ Ku arrogon pi fak Adam nge Efa nnap’an ni yira gargelegrad ma dar flontgad. Yugu aram rogon ma yad ba t’uf rok Jehovah ma ma ayuwegrad. (1 John 4:19) Machane ba thil Jehovah ko fa gallabthir ni kan weliy murung’agrow, ya rayog rok ni nge chuweg pi fak u fithik’ e gafgow. Ke dugliy e ngiyal’ ni nge chuweg e girdi’ u fithik’ e gafgow rorad. (Matt. 24:36) Ere t’ufeg rok Jehovah e susun nra k’aringdad ni ngad k’adedan’dad u n’umngin nap’an nib t’uf ni ngad rin’ed riy.

17. Uw rogon ni n’en ni kan weliy u murung’agen Jesus ko Hebrews 12:2, 3 e ra pi’ e athamgil nga lanin’dad ni ngaud k’adedan’dad?

¹⁷ Ke dag Jehovah e bin th’abi fel’ e kanawo’ u rogon ni ngan k’adan’uy. I folwok Jesus u rogon e k’adan’ ni i tay e Chitamangin. Nap’an ni immoy u fayleng mi i k’adan’ u fithik’ e thin nib kireb ni unog ngak, nge tamra’ ni un tay ngak, nge gafgow ni tay u daken fare ley i gek’iy ni fan ngodad. (Mu beeg e Hebrews 12:2, 3.) Ba mudugil ni k’adan’ ni tay Jehovah e aram e n’en ni pi’ gelngin Jesus ni ngki k’adan’. Re n’ey e ku rayog ni nge pi’ gelngidad.

18. Uw rogon ni be ayuwegdad e 2 Peter 3:9 ni ngad nanged e n’en ke buch ni bochan e gum’an’ ni be tay Jehovah?

¹⁸ Mu beeg e 2 Peter 3:9. Manang Jehovah e ngiyal’ nib fel’ ni nge thang e re m’ag nib kireb ney. Bochan e gum’an’ ni be tay, ma ke yoor e girdi’ ni kar nanged murung’agen, ma chiney e bokum milyon e girdi’ ni kar manged bang ko fare ulung nib ga’ ni yad be liyor ngak. Yad gubin ni yad ba felfelan’ ni ke k’adan’ Jehovah ni kab kafram i yib ke yag ni ngan gargelegrad, mar filed rogon ni nge t’uf rorad, mi yad ognag e yafos rorad ngak. Nap’an nra k’adan’ bokum milyon e girdi’ nge mada’ ko tomur, ma aram e ra gagiyel nib puluw e n’en ni ke dugliy Jehovah ni aram e nge gum’an’ u puluwdad!

19. Mang e susun ni ngad dugliyed u wan’dad ni ngad rin’ed, ma mang tow’ath e ra yag ngodad?

¹⁹ Kad filed rok Jehovah rogon ni ngad k’adedan’dad u fithik’ e felfelan’. Yugu aram rogon ni boor e kireban’ nge gafgow ni be k’aring Satan, machane ka be par Jehovah ni ir “fare Got nib felfelan’.” (1 Tim. 1:11, NW) Ku arrogodad nrayog ni ngad pared ni gad ba felfelan’ u nap’an ni gad be sonnag Jehovah ni nge thothupnag fithingan, me gagiyelnag ni ir e bay mat’awun ni nge gagiyeg, me chuweg gubin e kireb nge magawon ni gad be mada’nag e chiney. Ere ngad dugliyed u wan’dad ni ngad k’adedan’dad ya gad manang ni ku aray e n’en ni be rin’ e Chitamangidad ni bay u tharmiy. Re n’ey e susun nra pi’ e athamgil nga lanin’dad. Faan gad ra rin’ ni aray rogon, ma rayog ni nge buch rodad e n’en be yog e re thin ni baaray ni be gaar: “Ba felan’ e en nra par nib yul’yul’ ngak Got ko ngiyal’ ni be yib e tin nib mo’maw’ riy ngak, ni aram e yibe sikengnag; ya ra athamgil ndabi mul ko re sikeng nem ma yira pi’ e yafos ngak, ni ereram fare puluwon ni ke yog Got nra pi’ ngak e piin nib t’uf Got rorad.”​—Jas. 1:12.