1. De n’uw nap’an nga tomuren ni denen Adam nge Efa, ma mang e rin’ Jehovah? (Genesis 3:15)

 DE N’UW nap’an nga tomuren ni denen Adam nge Efa, me yog Jehovah ban’en nra pi’ e l’agan’ ngak pi fakrow u daken ba yiiy nib ga’ fan. N’en ni yog e bay ko Genesis 3:15.​—Mu beeg.

2. Mang nib ga’ fan e re yiiy ney?

² Bay e re yiiy nem ko bin som’on e babyor u Bible. Machane gubin e tin ka bay e babyor u Bible ni bay rogon ko re yiiy ney. Fapi thin ni bay ko Genesis 3:15 e be puthuy e thin ni bay u urngin ken e babyor ko Bible nga taabang ke par nib taareb ni taab n’en e be yog, ni bod fagi n’en bay u keru’ e babyor ni be kol e page riy ndabi wer. Re thin nem e aram e ra pi’ Got be’ ni nge Thapeg e girdi’ ngak me thang Moonyan’ nge urngin e piin nib kireb ni yad ba muun ngak. * Rib manigil e re n’ey ni fan ngak e piin nib t’uf Jehovah rorad!

3. Mang e gad ra weliy ko re article ney?

³ U lan e re article ney e gad ra weliy riy e fulweg ko pi deer ni baaray ni murung’agen fare yiiy ni bay ko Genesis 3:15 ni aram e: Mini’ e piin kan weliy murung’agrad riy? Uw rogon nra lebug e re yiiy nem? Ma uw rogon ni be yib angin ngodad?

4. Mini’ “fare porchoyog,” ma uw rogon ni kad nanged e re n’ey?

⁴ Piin kan weliy murung’agrad ko Genesis 3:14, 15 (BT) e ba “porchoyog,” nge “pi fak” ara owchen fare porchoyog, nge be’ nib “pin,” nge “fak” ara owchen fare pin. Be ayuwegdad  e Bible ni ngad nanged ko mini’ e pi cha’ney. * Som’on e ngad weliyed murung’agen “fare porchoyog.” Dabiyog ni nge nang ba porchoyog fan e n’en ni yog Jehovah u lan fare milay’ nu Eden. Ere ba mudugil ni be non Jehovah ngak reb e engel. Mini’ e cha’nem? Be tamilangnag e Revelation 12:9 ko mini’ e re porchoyog nem. Be yog ni “fare porchoyog ni ke kakrom” e aram Satan ni Moonyan’. Machane mini’ pi fak ara owchen e re porchoyog nem?

5. Mini’ pi fak ara owchen fare porchoyog?

⁵ Yu ngiyal’ e ma fanay e Bible fare thin ni pi fak ara owchen ni nge yip’ fan e piin nri yad be folwok rok be’ ni gowa yad pi fak. Ere pi fak ara owchen fare porchoyog e aram e pi engel ndar yul’yul’gad nge girdi’ ndubrad ni ngar folgad rok Jehovah Got ma yad be togopuluw ko girdi’ rok ni bod Satan. Ba muun ngay e pi engel nra digeyed e maruwel rorad u tharmiy u nap’an Noah, nge girdi’ nib kireb ni yad ma ngongol ni bod Moonyan’ ni chitamangirad.​—Gen. 6:1, 2; John 8:44; 1 John 5:19; Jude 6.

6. Mang fan ni “fare pin” e dabiyog ni nge yip’ fan Efa?

⁶ Bin migid e ngad weliyed ko mini’ “fare pin.” Dabiyog ni nge yip’ fan Efa. Mang fan? Am lemnag reb i fan. Be yog fare yiiy ni fak ara owchen fare pin e ra “bilbilig” lolugen fare porchoyog. Kad weliyed ni fare porchoyog e aram Satan, ma dariy reb e girdi’ nde flont ni owchen Efa nrayog rok ni nge thang. Ere uw rogon ni ngan thang Satan?

7. Mini’ fare pin ni kan weliy murung’agen ko Genesis 3:15 nrogon ni be yog e Revelation 12:1, 2, 5, 10?

⁷ Kan tamilangnag ko mini’ fare pin ni kan weliy murung’agen ko Genesis 3:15 u lan e bin tomur e babyor ko Bible. (Mu beeg e  Revelation 12:1, 2, 5, 10.) Re ppin ney e gathi be’ nib pin u fayleng! Ya bay e pul u tan e rifrif u ay ma ke teeliyaw nga 12 i t’uf. Re ppin ney e gargeleg bbitir ni yugu ba thil, ni aram Gil’ilungun Got. Re Am ney e bay u tharmiy, ere ba mudugil nre ppin ney e ku bay u tharmiy. Be yip’ fan e ulung rok Jehovah ni bay u tharmiy nib muun ngay e pi engel rok ni yad ba yul’yul’.​—Gal. 4:26.

8. Mini’ e en som’on nra yib ni owchen fare pin, ma mingiyal’ e buch e re n’ey? (Genesis 22:15-18)

⁸ Ku be ayuwegdad e Thin rok Got ni ngad nanged ko mini’ e en som’on nra yib ni fak ara owchen fare pin. Cha’nem e ir reb i owchen Abraham. (Mu beeg e Genesis 22:15-18.) Jesus e ir reb i owchen e re pumoon nem nib yul’yul’ ni bod rogon ni kan weliy u lan e re yiiy ney. (Luke 3:23, 34) Machane cha’nem e ba t’uf ni nge gel gelngin ngak be’ nib girdi’ ni bochan e ir e ra thang Satan ni Moonyan’. Ere nap’an ni ke gaman sogonap’an 30 e duw rok Jesus, ma aram me dugliy Got nga gelngin nib thothup. Nap’an nni dugliy Jesus nga gelngin Got nib thothup, me mang e en som’on nra yib ni owchen fare pin. (Gal. 3:16) Tomuren ni yim’ min faseg ko yam’, ma aram me “flaabnag” Got me “ta’ fan” me “pag fan urngin ban’en [ngak] u tharmiy ngu but’” nib muun ngay ni pi’ mat’awun ni “nge kirebnag e maruwel rok” Moonyan’.​—Heb. 2:7; Matt. 28:18; 1 John 3:8.

9-10. (a) Mini’ e tin ka bay i owchen fare pin, ma mingiyal’ e ma buch e re n’ey? (b) Mang e ngad weliyed ni migid?

⁹ Machane ka bay yugu boch e girdi’ ni yad e tin ka bay i fak ara owchen fare pin. I tamilangnag apostal Paul ko mini’ e pi cha’ney u nap’an ni non ngak e pi Jew nge piin gathi yad e Jew ni yad e pi Kristiano ni kan dugliyrad ni gaar: “Faanra ke mil suwmed ngak Kristus, me ere kam manged pi owchen Abraham, ni aram e bay yog ngomed e tin ni ognag Got nra pi’.” (Gal. 3:28, 29) Nap’an nra dugliy Jehovah reb e Kristiano nga gelngin nib thothup, ma aram e ke mang facha’ bagayad e piin owchen fare pin. Ere Jesus Kristus nge fare 144,000 ni yad ra un ngak ko gagiyeg e yad fak ara owchen fare pin. (Rev. 14:1) Yad gubin ni yad ma guy rogon ni ngar lemgad mi yad ngongol ni bod Jehovah Got ni Chitamangirad.

¹⁰ Chiney ni kad nanged ko mini’ e piin kan weliy murung’agrad ko Genesis 3:15 e ngad weliyed murung’agen e n’en ke rin’ Jehovah ya nge yag ni lebug e re yiiy ney nge rogon ni be yib angin ngodad e ngiyal’ ney.

11. Uw rogon nni maad’ad nga “wurilen ay” fak ara owchen fare pin?

¹¹ Be yog fare yiiy ko Genesis 3:15 (BT) ni fare porchoyog e ra k’ad “wurilen ay” fak ara owchen fare pin. I lebug e re n’ey u nap’an ni fanay Satan e pi Jew nge piyu Roma ni ngar lied Fak Got nge yim’. (Luke 23:13, 20-24) Ra maad’ad wurilen ay be’, ma dabkiyog ni nge yan nib fel’ rogon u lan ba ngiyal’. Ere ku arrogon Jesus ni par ndaki yag ni nge rin’ ban’en u nap’an ni yim’ u lan dalip e rran.​—Matt. 16:21.

12. Uw rogon ni yira bilbilig lolugen fare porchoyog, ma mingiyal’ e ra buch e re n’ey?

¹² Ra nge lebug fare yiiy ko Genesis 3:15 ma dabiyog ni nge par Jesus u lan e low ko yam’ ndab ni faseg. Mang fan? Ya be yog fare yiiy ni fak ara owchen fare pin e ra bilbilig lolugen fare porchoyog. Re n’ey e be yip’ fan nib t’uf ni nge gol fagi maad’ad ni kan tay nga wurilen ay Jesus. Ma ireray e n’en ni buch!  Dalip e rran nga tomuren ni yim’, min faseg nge yan nga tharmiy min pi’ reb e dowef ngak ni gathi downgin e girdi’ ma dabki yim’ biid. Ra taw ko ngiyal’ ni ke dugliy Got, ma ra thang Jesus Satan. (Heb. 2:14) Piin yad ra un ngak Kristus ko gagiyeg e yad ra un ngak ngar thanged urngin e toogor rok Got u fayleng ni yad pi fak ara piin owchen fare porchoyog.​—Rev. 17:14; 20:4, 10. *

13. Uw rogon ni be yib angin ngodad rogon ni be lebug e re yiiy ney?

¹³ Faanra gur reb e tapigpig rok Got, ma be yib angin ngom rogon ni be lebug e re yiiy ney. I yib Jesus nga fayleng nib girdi’. Rib fel’ rogon ni m’ug rarogon e Chitamangin rok. (John 14:9) Ere ke yag ni ngad nanged Jehovah Got me t’uf rodad u daken Jesus. Ki yib angin ngodad e pi n’en i fil Jesus nge rogon ni be pow’iy e ulung ni Kristiano e ngiyal’ ney. Ke fil ngodad rogon ni ngad ngongolgad u reb e kanawo’ nra m’agan’ Jehovah ngay. Ma gad gubin nrayog ni nge yib angin ngodad e yam’ ni tay Jesus ara maad’ad nni tay nga wurilen ay. Ni uw rogon? Nap’an nni faseg Jesus ko yam’ me ognag fel’ngin rachaen ni ke pi’ ni maligach nib flont ni ir e ke “beechnagdad u urngin e denen rodad.”​—1 John 1:7.

14. Uw rogon ni kad nanged nde lebug fare yiiy ni yog Jehovah u Eden e ngiyal’ nem?

¹⁴ Ba tamilang ko fapi thin ni yog Jehovah u Eden nre yiiy nem e dabi lebug e ngiyal’ nem. Ba n’uw nap’an mfini yib fak ara owchen fare pin, ma kub t’uf ba ngiyal’ ni nge kunuy Moonyan’ e piin ngar manged ngak, nge ba ngiyal’ ni nge par e gal ulung ney ni yow ba toogor. Faanra tamilang e re yiiy ney u wan’dad, ma ra yib angin ngodad ni bochan e be yog nre fayleng ney ni Satan e ir e be gagiyegnag e ra fanenikay e pi tapigpig rok Jehovah. Ku ireray e n’en ni ginang Jesus pi gachalpen riy boch nga tomuren. (Mark 13:13; John 17:14) Kad guyed ni ke lebug e giney ko re yiiy ney nib ga’ nu nap’an fa 100 i duw ni ke yan. Ni uw rogon?

15. Mang fan ni kari gel e fanenikan ni be tay e re fayleng ney, ma mang fan ndariy rogon ni ngad rusgad ngak Satan?

¹⁵ De n’uw nap’an nga tomuren ni Pilung Jesus ko duw ni 1914, mi nin’ Satan nga wuru’ e tharmiy. Ka nin’ nga fayleng ni be sonnag e ngiyal’ ni ngan thang. (Rev. 12:9, 12) Machane ka aram nap’an i yib nib gel e maruwel ni be tay, ya kari damumuw ma be gafgownag e girdi’ rok Got. (Rev. 12:13, 17) Aram fan ni kari gel e fanenikan ni be tay e re fayleng ney ko girdi’ rok Got. Machane dariy rogon ni ngad rusgad ngak Satan nge piin yad ba mang ngak. Ya rayog ni nge pagan’dad ni bod apostal Paul ni yoloy ni gaar: “Faanra ba’ Got u ba’ rodad, me mini’ e rayog rok ni nge togopluw ngodad?” (Rom. 8:31) Rayog ni ngari pagan’dad ngak Jehovah ni bochan e gin ga’ yang ko fare yiiy ni bay ko Genesis 3:15 e ke lebug.

16-18. Mang angin ni ke yib ngak Curtis, nge Ursula, nge Jessica ni bochan e ke tamilang u wan’rad fare thin ni bay ko Genesis 3:15?

¹⁶ Rayog ni nge ayuwegdad e n’en ke micheg Jehovah ko Genesis 3:15 ni ngad athamgilgad u fithik’ urngin mit e skeng ni be yib ngodad. Curtis ni ir reb e missionary u Guam e yog ni gaar: “Bay yu ngiyal’ ni ke buch boch ban’en u lan e yafos rog ni mo’maw’nag ngog ni nggu par ni gub yul’yul’  ngak Jehovah. Machane bochan nug ma fal’eg i lemnag fare yiiy ko Genesis 3:15, ma aram e n’en ke ayuwegeg ni nggu par ni be pagan’ug ngak e Chitamag ni bay u tharmiy.” Be athapeg Curtis ni nge taw ko ngiyal’ nra chuweg Jehovah urngin e skeng ni gad be mada’nag.

¹⁷ Bay reb e walag nib pin ni ma par u Bavaria ni ka nog Ursula ngak ni yog ni bochan ke tamilang u wan’ fare thin ko Genesis 3:15, ma aram e n’en ke ayuweg ni nge mich u wan’ ni Bible e thin rok Got ni kan thagthagnag. Ke guy rogon nib peth e tin ka bay e yiiy ko re yiiy ney, ma re n’ey e ri ngat ngay. Ki gaar: “Nap’an nug fil ni ka chingiyal’ nem me rin’ Jehovah ban’en ni nge pi’ e l’agan’ ngodad, ma aram mi ri gel feni t’uf Jehovah rog.”

¹⁸ Jessica ni be’ nu Micronesia e yog ni gaar: “Ka be yib ngan’ug rogon e lem rog u nap’an nug nang ni kug pirieg e tin riyul’! Be lebug fare yiiy ko Genesis 3:15. Ke ayuwegeg ndab gu pagtalin nrogon e par rodad e chiney e gathi aram e bin riyul’ e yafos. Re yiiy ney e ki micheg nga lanin’ug ni faan gu ra pigpig ngak Jehovah, ma ra fel’ e par rog e chiney ma ra yan i boch nga m’on maku ra gel boch e fel’ riy.”

19. Mang fan nrayog ni nge pagan’dad nra lebug e gin ka bay ko re yiiy ney?

¹⁹ Ba tamilang ko n’en kad weliyed ni be lebug fare thin ko Genesis 3:15 e chiney. Ke tamilang ko mini’ pi fak ara owchen fare pin nge pi fak ara owchen fare porchoyog. I gol fagi maad’ad nni tay nga wurilen ay Jesus ni ir e en som’on ni yib ni owchen fare pin, ma chiney e ke mang Pilung nib gel gelngin ma dabki yim’ biid. Ke chugur ni nge gaman urngin e piin yibe mel’egrad ni ngar manged e tin ka bay i owchen e re ppin nem. Bochan ke lebug e gin som’on ko re yiiy ney, ma bay rogon ni nge pagan’dad ni ku ra lebug e gin ka bay riy ni aram e ngan bilbilig lolugen fare porchoyog. Rib gel e felfelan’ nra tay e pi tapigpig rok Got u nap’an yira thang Satan! Machane chiney ni gad be sonnag e re ngiyal’ i n’em e dabi mulan’um. Rayog ni nge pagan’uy ko Got rodad. Ra fanay fak ara owchen fare pin ni nge tow’athnag “urngin e nam nu fayleng.”​—Gen. 22:18.