1. Susun nge uw rogon u wan’dad e re n’ey nrayog ni ngad meybilgad ngak Jehovah?

 BAY reb e tow’ath ni kan pi’ ngodad nrib manigil. Re tow’ath nem e aram e rayog ni ngaud nonad ngak e En Ke Sunmiy e tharmiy nge fayleng u daken e meybil. Am lemnag e re n’ey: Demtrug e ngiyal’ nge re thin nrayog ni ngad weliyed lanin’dad riy ngak Jehovah. Rayog ni ngad meybilgad ngak e Chitamangidad ni gad ba t’uf rok u nap’an ni ka nin’dad nga aspital ara kalbus, ya ba pagan’dad ngay nra motoyil ngodad. Ri gad be pining e magar ngak ko re tow’ath ney.

2. Uw rogon ni dag David ni Pilung nrib ga’ fan e meybil u wan’?

² Rib ga’ fan e meybil u wan’ David ni Pilung. I tangnag Jehovah ni gaar: “Nge fel’ u wun’um e meybil rog ni bod e incense.” (Ps. 141:1, 2, BT) Incense ni ma fanay e pi prist ni fan ko bin riyul’ e liyor u nap’an David e ban’en ni yima ngongliy nri yibe kol ayuw ngay ni nge yan i aw nga rogon. (Ex. 30:34, 35) Nap’an ni weliy David murung’agen e incense ma be dag ni baadag ni nge fal’eg i lemnag e n’en nge yog ngak e Chitamangin ni bay u tharmiy. Ku ireray e n’en gad baadag ni ngad rin’ed. Gad baadag ni nge fel’ e meybil rodad u wan’ Jehovah.

3. Nap’an ni gad ra meybil ngak Jehovah, ma uw rogon nsusun e ngad nonad ngak, ma mang fan?

³ Nap’an ni gad ra meybil ngak Jehovah, ma susun e ngad nonad u fithik’ e tayfan. Am lemnag e pi n’en nni pilyeg e changar rok Isaiah, nge Ezekiel, nge Daniel, nge John ngar guyed. Yugu aram rogon nib thilthil e n’en nra guyed, machane bay ban’en riy ni taareb rogon. Gubin ni be weliy murung’agen Jehovah ni ir e Pilung nth’abi tolang nib pag feni manigil rarogon. Isaiah e guy Jehovah ni “ke par nga tagil’ nib tolang nga lang.” (Isa. 6:1-3) Me Ezekiel e guy Jehovah ni bay u daken ba karrow ni ma girngiy e os ni bay u tharmiy, ma tooben e “be gal ramaen ni ba ga’ . . . [ni] gubin mit e reen ni bay u fithik’ e  ragim ni ba’ riy.” (Ezek. 1:26-28) Me Daniel e guy “faanem ni kab kakrom i yib ni immoy” ni ke yon’ e mad nib wechwech ma be yib e nifiy ni be daramram ko chiya rok. (Dan. 7:9, 10) Me John e guy Jehovah ni ke par nga tagil’ u tharmiy ni bay ba ragim nrib fel’ yaan ni ke liyeg ni bod raen ba malang ni emerald. (Rev. 4:2-4) Nap’an ni gad ra lemnag rogon feni manigil rarogon Jehovah ma be puguran ngodad nri gad ba tow’ath nrayog ni ngad meybilgad ngak ma rib ga’ fan ni ngad rin’ed e re n’ey u fithik’ e tayfan. Machane uw rogon nsusun e ngad meybilgad?

4. Mang e gad be fil ko tin som’on e thin ni yog Jesus ko fare kenggin e meybil ni bay ko Matthew 6:9, 10?

⁴ Mu beeg e Matthew 6:9, 10. Nap’an fare Welthin ni Pi’ Jesus u Daken e Burey, me fil ngak pi gachalpen rogon ni ngar meybilgad u reb e kanawo’ nib m’agan’ Got ngay. Tomuren ni gaar Jesus “baara’ rogon ni ngam meybilgad,” me weliy boch ban’en nib ga’ fan ni bay rogon ko n’en nib m’agan’ Jehovah ngay ni aram e: ngan tayfan fithingan; ma nge yib Gil’ilungun ni ir e ra thang urngin e toogor rok; nge pi n’en nib manigil nra rin’ ni fan ko fayleng nge girdi’ boch nga m’on. Gad ra uneg e pi n’ey u lan e meybil rodad, ma aram e gad be dag nib ga’ fan u wan’dad e n’en nib m’agan’ Got ngay.

5. Ba puluw ni ngad yibilayed boch ban’en ni bay rogon ngodad, fa?

⁵ Gin migid ko fare meybil e tamilangnag Jesus riy nib puluw ni ngad yibilayed boch ban’en ni bay rogon ngodad. Rayog ni nga dogned ngak Jehovah ni nge pi’ e ggan ni fan ngodad u reb e rran, me n’ag fan e denen rodad, me yororiydad u boch ban’en nra waliydad ko kireb, me ayuwegdad rok faanem nib kireb. (Matt. 6:11-13) Nap’an ni gad ra yibilay e pi n’ey ngak Jehovah, ma aram e gad be dag ngak ni gad manang nib t’uf ni nge ayuwegdad ma gad baadag ni ngad rin’ed e n’en nib m’agan’ ngay.

6. Kemus ni yigoo pi n’en bay u lan fare kenggin e meybil e ir e rayog ni ngad yibilayed murung’agen, fa? Mu tamilangnag.

⁶ De lemnag Jesus ni nga i yog pi gachalpen gubin bug e thin ko re meybil ney ni bod rogon ni fil. Ku bay boch e meybil ni tay Jesus ni i weliy riy yugu boch ban’en nib ga’ fan u wan’  e ngiyal’ nem. (Matt. 26:39, 42; John 17:1-26) Ere ku arrogodad demtrug e n’en bay u lanin’dad nrayog ni ngad yibilayed murung’agen. Faanra bay ban’en nib t’uf ni ngad dugliyed, ma rayog ni ngad yibilayed e gonop nge tamilangan’. (Ps. 119:33, 34) U m’on ni ngad tababgad i rin’ reb e maruwel nib mo’maw’ ni kan pi’ ngodad, ma rayog ni ngad meybilgad ni ngan ayuwegdad ngad nanged rogon ni ngad rin’ed e re maruwel nem. (Prov. 2:6) Piin gallabthir e rayog ni ngar yibilayed pi fakrad, ma piin bitir e rayog ni ngar yibilayed e gallabthir rorad, ma gad gubin nrayog ni ngad yibilayed e piin gad ma fil e Bible ngorad nge piin gad ma machibnagrad, maku ban’en nsusun e ngad rin’ed. Machane gathi kemus ni ngaud meybilgad ni ngaud ninged e ayuw.

7. Mang fan nsusun e ngaud pininged e sorok ngak Jehovah u lan e meybil rodad?

⁷ Susun e dab da paged talin ni ngaud pininged e sorok ngak Jehovah u lan e meybil rodad. Dariy be’ nga bang ni bay rogon ni ngad pininged e sorok ngak nge migid e Got rodad. ‘Ma n’ag fan u wan’ e kireb rodad,’ maku ‘ma runguy mab t’uf e girdi’ rok, gubin ngiyal’ nib gum’an’, gubin ngiyal’ nib gol mab yul’yul’.’ (Ps. 86:5, 15) Ere ri bay rogon ni ngan pining e sorok ngak Jehovah ni bochan rarogon nge n’en ma rin’.

8. Mang boch ban’en nrayog ni ngad pininged e magar riy ngak Jehovah? (Psalm 104:12-15, 24)

⁸ Gathi kemus ni gad ma pining e sorok ngak Jehovah u lan e meybil rodad, ya ku gad ma pining e magar ngak ko pi n’en nrib manigil ni ke pi’ ni fan ngodad. Bod nrayog ni ngad pininged e magar ngak ko pi floras ni ke ngongliy nrib fel’ raen, nge ggan nib thilthil nrib fel’ lamen, nge pi fager nib manigil. Chitamangidad ni gad ba t’uf rok e ma pi’ e pi n’ey ngodad nge ku yugu boch ban’en ni bochan e ngad felfelan’gad. (Mu beeg e Psalm 104:12-15, 24.) Ma bin kab ga’ fan riy e gad ma pining e magar ngak Jehovah ko pi ggan ni boor ni ke pi’ ni fan ko tirok ban’en, nge athap rodad boch nga m’on nrib manigil.

9. Mang e ra ayuwegdad ni nge dab da paged talin ni ngad pininged e magar ngak Jehovah? (1 Thessalonika 5:17, 18)

⁹ Rib mom ni ngad paged talin ni ngad pininged e magar ngak Jehovah nga urngin ban’en  ni ke rin’ ni fan ngodad. Ere mang e rayog ni nge ayuwegem ni nge dab mu pagtalin ni ngam rin’ e re n’ey? Rayog ni ngam yoloy nga but’ boch ban’en ni kam yibilay murung’agen, me boch nga tomuren mag sul ngam yaliy ya nge yag nim nang rogon ni ke fulweg Jehovah taban e pi meybil nem. Ngemu’ mag meybil ngam pining e magar ngak ni ke ayuwegem. (Mu beeg e 1 Thessalonika 5:17, 18.) Am lemnag e re n’ey: Ra i pining e girdi’ e magar ngodad, ma gad ra felfelan’ ma gad ra nang ni yibe t’ufegdad. Ere ku arrogon Jehovah ni ma felfelan’ u nap’an ni gad ra pining e magar ngak ni ke fulweg taban e meybil rodad. (Kol. 3:15) Machane, ku mang reb i fan nib ga’ fan ni ngad pininged e magar ngak e Got rodad?

10. Mang ni bay fan ni ngad pininged e magar ngak Jehovah ni ke pi’ Jesus ke yib nga fayleng nrogon ni be yog e 1 Peter 2:21?

¹⁰ Mu beeg e 1 Peter 2:21. Susun e ngad pininged e magar ngak Jehovah ni ke pi’ Fak nrib t’uf rok ni nge fil ban’en ngodad. Gad ra fil murung’agen Jesus, ma boor ban’en ni gad ra nang u murung’agen Jehovah nge rogon ni ngad felfelan’naged. Rayog ni nge chugur e tha’ u thildad Jehovah Got miki gapas thildad ni faan gad ra dag nib mich fare maligach ni pi’ Kristus u wan’dad.​—Rom. 5:1.

11. Mang fan ni gad ma meybil u daken fithingan Jesus?

¹¹ Gad be pining e magar ngak Jehovah nrayog ni ngad meybilgad ngak u daken Fak. Ma pi’ Jehovah e tin gad be ning ngak u daken Jesus. Ma motoyil Jehovah ko meybil ni gad ma tay ngak u daken Jesus ma ma fulweg taban. I weliy Jesus ni gaar: “Gu ra rin’ e pi n’en ni gimed ra ning nga fithingag; ya ngan ta’ fan e en ni Chitamangiy u daken e en ni Fak.”​—John 14:13, 14.

12. Ku mang reb i fan ni ngad pininged e magar ngak Jehovah ni ke pi’ Fak ni fan ngodad?

¹² Ma n’ag Jehovah fan e denen rodad u daken fare biyul ni maligach ni pi’ Jesus. Be yog e Bible ni Jesus e ir e “prist rodad nib th’abi tolang ni ke par nga but’ u ba’ ni mat’aw u tagil’ Got ni Pilung ni Th’abi tolang u tharmiy.” (Heb. 8:1) Ku ir e “ma wenignagdad ngak e en ni Chitamangiy.” (1 John 2:1) Ri gad be pining e magar ngak Jehovah ni ke pi’ reb e Prist Nth’abi Tolang ngodad ni manang fadad meewar ma ma “wenignagdad ngak Got!” (Rom. 8:34; Heb. 4:15) Dawor da flontgad, ere faan gomanga de pi’ Jesus fare biyul ma dabiyog ni ngad meybilgad ngak Jehovah. Dariy e maruwar riy nib puluw u wan’um ndabiyog ni ngad pininged e magar ngak Jehovah ni ke pi’ Fak ni fan ngodad ngari yan i aw nga rogon nsusun e ngad rin’ed!

13. Uw rogon ni dag Jesus nib t’uf pi gachalpen rok ko fare nep’ u m’on ni nge yim’?

¹³ Fare nep’ u m’on ni nge yim’ Jesus, mab n’uw nap’an ni yibilay pi gachalpen ngak e Chitamangin ni nge “ayuwegrad rok Faanem nib Kireb.” (John 17:15) Re n’ey e be dag gelngin nri yad ba t’uf rok Jesus! Yugu aram rogon ndab ki n’uw nap’an mab gel e gafgow ni yira tay ngak, machane ka be magafan’ ngak e pi apostal rok.

14. Uw rogon ni ngad daged nib t’uf pi walagdad rodad?

¹⁴ Ngad folwokgad rok Jesus ni gathi kemus ni yigoo tin nib t’uf rodad e ngaud lemnaged. Ya gubin ngiyal’ ni ngaud yibilayed pi walagdad. Faan gad ra rin’ e re n’ey, ma aram e gad be fol ko n’en ni tay Jesus chilen ni nge bagadad me t’uf rok bagadad maku gad be dag ngak Jehovah gelngin nrib t’uf pi walagdad rodad. (John 13:34) Gad ra yibilay pi walagdad ma ra ayuwegrad, ya be yog e Thin rok  Got ni “meybil rok be’ nib mat’aw e ba’ angin ni ba ga’.”​—Jas. 5:16.

15. Mang fan nib t’uf ni ngad yibilayed pi walagdad?

¹⁵ Ba t’uf ni ngad yibilayed pi walagdad ni bochan e boor e magawon ni yad be mada’nag. Rayog ni nga dogned ngak Jehovah ni nge ayuwegrad ni ngar athamgilgad u fithik’ e m’ar, ara yoko’ ara durru’ ara boch ban’en ni kar gafgowgad riy, ara cham ni yibe tay ko gin yad be par riy, ara gafgow ni yibe tay ngorad, ara yugu boch e magawon. Ku rayog ni ngad yibilayed pi walagdad nib gel e maruwel ni yad ma tay ni ngar ayuweged e piin ke t’uf e ayuw rorad. Rayog ni bay boch e pi girdi’ ney ni ga manangrad. Ere mang ndab mu uneg fithingrad u lan e meybil rom? Faan gad ra yog ngak Jehovah ni nge ayuwegrad ni ngar athamgilgad, ma aram e gad be dag nriyul’ nib t’uf pi walagdad rodad.

16. Mang fan nsusun e ngaud yibilayed e piin yad ma yog e thin rodad?

¹⁶ Piin yad ma yog e thin u lan e ulung e ba ga’ fan u wan’rad e meybil ni ma pi’ e pi walag ni fan ngorad maku ma yib angin ngorad. Ku aray rogon e lem rok apostal Paul. I yoloy ni gaar: “Ku er rogon gag ni nguum yibiliyed gag, nge yog ni pi’ Got ngog e tin ni ba adag ni nggu weliy, nge yog ni gu weliy ndab kug tamdag me yog ni gu tamilangnag fan e thin rok u wan’ e girdi’ nrogon.” (Efe. 6:19) Ku arrogon e ngiyal’ ney ni boor e walag ni pumoon ni yad ma yog e thin rodad nib gel e maruwel ni yad ma tay. Ere faan gad ra yog ngak Jehovah ni nge tow’athnagrad ko maruwel ni yad ma rin’, ma aram e gad be dag ni yad ba t’uf rodad.

17-18. Mingiyal’ e rayog ni nga nog ngodad ni ngad feked e meybil rodad yugu boch e girdi’, ma mang e susun ndab da paged talin?

¹⁷ Yu ngiyal’ e yima yog ngodad ni ngad feked e meybil rodad yugu boch e girdi’. Bod nrayog ni nge yog reb e walag nib pin ngak reb e walag nib pin ni ke un ngak ni ngar filew e Bible ku be’ ni nge fek e meybil. Fare walag nib pin ni ke un e rayog ni gathi ri manang facha’ ni yibe fil e Bible ngak nib fel’ rogon, ere sana ra yog ni nge mang ir e fek e meybil u tomuren ni kan mu’ ko fol Bible. Faanra aram rogon, ma rayog ni nge nang e n’en nge yog u nap’an ni be yibilay facha’ ni yibe fil e Bible ngak.

 ¹⁸ Rayog ni nga nog ngak reb e walag ni pumoon ni nge fek e meybil u tomuren ni kan yarmiy e machib ara nap’an e muulung. Pi walag ni yima yog ngorad ni ngar feked e meybil e susun e dab ra paged talin fan fare muulung ni kan tay. Nap’an nra fek be’ e meybil ma gathi aram e ngiyal’ ni nge fonownag e ulung ara i weliy boch ban’en ni nge nang e girdi’ murung’agen. Yooren e muulung ni gad ma tay e kemus ni lal e minit ni yima tay ni fan ko tang nge meybil. Ere fare walag ni nge fek e meybil e de t’uf ni nge ‘n’uw e meybil ni nge pi’,’ nib ga’ ni faanra nge meybil u m’on ni nge tabab e muulung.​—Matt. 6:7.

19. Mang e ra ayuwegdad ni ngad fal’eged rogodad ni fan ko rran ko pufthin rok Jehovah?

¹⁹ Chiney ni be chugur e rran ko pufthin rok Jehovah e ba t’uf ni ngari ga’ fan e meybil u wan’dad. I weliy Jesus murung’agen e re n’ey ni gaar: “Um pired ni kam fal’eged rogomed ma gimed be meybil ni gubin ngiyal’ nge yib gelngimed nge yog ni mmarod u fithik’ urngin e pi n’ey ni bayi m’ug ndabi buch ban’en romed.” (Luke 21:36) Arrogon, faanra ud meybilgad ni gubin ngiyal’ ma ra ayuwegdad ni ngad pared ni gad ba od ko tirok Got ban’en ya nge yib e rran rok ma kad fal’eged rogodad.

20. Uw rogon nrayog ni nge par e meybil rodad ni bod e incense nib fel’ bon?

²⁰ Mang e kad weliyed? Rib ga’ fan e meybil u wan’dad. Pi n’en bay rogon ko n’en nib m’agan’ Jehovah ngay e aram e n’en th’abi ga’ fan nsusun e ngaud yibilayed. Ku gad ma pining e magar ni bochan Fak Got, nge gagiyeg ni be tay Gil’ilungun, maku gad ma yibilay pi walagdad. Ku rayog ni ngad yibilayed e tin nib t’uf ko par rodad nge tin nib t’uf rodad ni fan ko tirok Got ban’en. Ra ud fal’eged i lemnag e n’en nga dogned u lan e meybil rodad, ma aram e gad be dag nib ga’ fan e re tow’ath ney nrib manigil u wan’dad. Thin rodad e ra par nib “fel’ u wan’” Jehovah ni bod e incense nib fel’ bon.​—Prov. 15:8.