ARTICLE NI NGAN FIL 30
Nga i Gel e T’ufeg Rom i Yan
“Gadad ra ilal u gubin e kanawo’ [u fithik’ e t’ufeg].”—EFE. 4:15.
TANG 2 Fithingam e Jehovah
TIN YIRA WELIY a
1. Mang boch ban’en nib riyul’ nim fil u nap’an nim tabab i fil e Bible?
KA BE yib ngan’um e ngiyal’ ni baaram nim tabab i fil e Bible, fa? Sana rayog nim gin u nap’an nim nang ni bay fithingan Got. Sana ku rayog nim felfelan’ u nap’an nim nang nder ma gafgownag Got e girdi’ u fithik’ e nifiy u infierno. Ku dabisiy nim felfelan’ u nap’an nim nang ni ku rayog ni ngam guy bayay e piin nib t’uf rom ni kar m’ad mi gimed par u taabang u paradis u fayleng.
2. Nap’an nim fil e tin riyul’ u Bible, ma mang boch ban’en ni kum mon’og riy? (Efesus 5:1, 2)
2 Nap’an ni yoor ban’en nim fil ko Thin rok Got, ma aram mi ri gel feni t’uf Jehovah rom. Re t’ufeg nem e k’aringem ni ngam fol ko tin kam fil. Angin ni yib riy e yag ni ngam dugliy boch ban’en nib fel’ rogon ma kub puluw ko pi kenggin e motochiyel u Bible. Kum thilyeg rogon e lem nge ngongol rom ni bochan e ga baadag ni ngam felfelan’nag Got. Ere um folwok rok e Chitamangidad ni bay u tharmiy ni bod rogon reb e bitir ni be folwok ko gallabthir rok.—Mu beeg e Efesus 5:1, 2.
3. Mang l’agruw e deer nrayog ni ngad fithed gadad riy?
3 Rayog ni ngad fithed gadad ni nge lungudad: ‘Ke gel feni t’uf Jehovah rog e chiney ni ke thil ko ngiyal’ ni baaram ni ka fin gu mang reb e Kristiano, fa? Ke yag ni nggu folwok rok Jehovah u tomuren ni kug un ko taufe ni aram e gu ma t’ufeg pi walageg, fa?’ Dabi mulan’um ni faanra kam guy ni ke war e t’ufeg ni immoy rom “ko som’on.” Ku aray e n’en ni buch ko pi Kristiano ko bin som’on e chibog. Machane de mulan’ Jesus u puluwrad, maku arrogodad nder ma mulan’ u puluwdad. (Rev. 2:4, 7) Manang nrayog ni ngkud gelnaged fare t’ufeg ni immoy rodad u nap’an ni ka fin da filed e tin riyul’.
4. Mang e gad ra weliy ko re article ney?
4 Gad ra weliy ko re article ney rogon nrayog ni nga i gel e t’ufeg rodad ngak Jehovah nge yugu boch e girdi’. Ku gad ra weliy murung’agen boch e tow’ath nra yag ngodad nge yugu boch e girdi’ ni faan gad ra rin’ e re n’ey.
NGE GEL FENI T’UF JEHOVAH ROM
5-6. Mang boch e magawon ni i mada’nag apostal Paul u nap’an e machib ni i tay? Mang e k’aring ni nge ulul ko pigpig ni i tay ngak Jehovah?
5 Ba felfelan’ apostal Paul ko pigpig ni i tay ngak Jehovah, machane ku boor e magawon ni i mada’nag. Ba ga’ nib n’uw yang e gin ma milekag riy, maku de mom e milekag ni yima tay e ngiyal’ nem. Nap’an ni i milekag ma immoy yu ngiyal’ ‘ni chugur ni nge yim’ ko ran ni sugubur e lul’ nge yib nga daken e binaw’ nge “moro’ro’ ni ma fek ban’en u fithik’ e yargel.” Ku immoy yu ngiyal’ ni ki chel e pi toogor rok ngaur gafgownaged. (2 Kor. 11:23-27) Maku gathi gubin ngiyal’ ni i dag e pi walagen ni Kristiano nib ga’ fan u wan’rad e pi n’en ni i rin’ ni nge ayuwegrad.—2 Kor. 10:10; Fil. 4:15.
6 Ere mang e ayuweg Paul ni nge ulul ko pigpig ni i tay ngak Jehovah? Boor ban’en ni fil u rarogon Jehovah u lan fare Babyor nib Thothup nge pi n’en ni i buch rok. I mich u wan’ nib t’uf rok Jehovah Got. (Rom. 8:38, 39; Efe. 2:4, 5) Maku arrogon ir nri ki gel feni t’uf Jehovah rok. I dag e re n’ey u daken e ‘ayuw ni i pi’ ma ka be pi’ ngak e piin ni yad ni girdien Kristus.’—Heb. 6:10.
7. Mang reb e kanawo’ nrayog ni nge gel feni t’uf Jehovah rodad riy?
7 Rayog ni nge gel feni t’uf Got rodad ni faanra ud fal’eged i fil e Thin rok. Nap’an ni ga be beeg e Bible, mag guy rogon ni ngam nang e n’en be tamilangnag u murung’agen Jehovah. Mu fithem ni nge lungum: ‘Uw rogon ni be dag e re thin ney ni gub t’uf rok Jehovah? Ma mang boch i fan ni bay rogon ni nge t’uf Jehovah rog nrogon ni be tamilangnag e re thin ney?’
8. Uw rogon nrayog ni nge ayuwegdad e meybil ni nge gel feni t’uf Got rodad?
8 Ku rayog ni nge gel feni t’uf Jehovah rodad ni faanra ud weliyed lanin’dad ngak u daken e meybil ni gubin ngiyal’. (Ps. 25:4, 5) Gad ra rin’ e re n’ey, ma ra fulweg Jehovah taban e meybil rodad. (1 John 3:21, 22) Khanh nreb e walag nib pin u Asia e yog ni gaar: “Som’on e ug t’ufeg Jehovah ni bochan e n’en kug fil u murung’agen. Machane nap’an nug guy rogon ni be fulweg taban e meybil rog, ma aram mi ri gel feni t’uf rog. Re n’ey e k’aringeg ni nggu adag ni nggu rin’ e tin nib m’agan’ ngay.” b
NGE GEL FENI T’UF E GIRDI’ ROM
9. Uw rogon ni dag Timothy ni be mon’og u rogon ni i dag e t’ufeg?
9 Boch e duw nga tomuren ni mang Paul reb e Kristiano, me mada’nag be’ nib pagel ni ka nog Timothy ngak. Timothy e ba t’uf Jehovah nge girdi’ rok. I yog Paul ngak piyu Filippi ni gaar: “Ke mus ni go [Timothy e] ir e ba taareb lanin’mow ngomed, me ir e cha’ nri ba adag ni nge ayuwegmed.” (Fil. 2:20) Gathi be weliy Paul u roy murung’agen rogon feni salap Timothy ni nge yarmiy ban’en ara nge pi’ e welthin ni fan ko yoor, ya ba tamilang ni ke ngat nga rogon feni t’uf e pi walag rok. Dariy e maruwar riy ni pi ulung ni i lekag Timothy e ur athapeged e ngiyal’ nra yan i guyrad.—1 Kor. 4:17.
10. Uw rogon ni dag Anna nge figirngin nib t’uf e pi walag rorow?
10 Ku arrogodad ni gad ma gay boch e kanawo’ ni ngad ayuweged pi walagdad riy. (Heb. 13:16) Am lemnag e n’en ni buch rok Anna ni kan weliy murung’agen ko fa binem e article ni ke yan. Tomuren ni yib bangi lang nib gel, ma ranow figirngin ni ngar nangew salpen ba tabinaw ni yad boch e Pi Mich, ma aram mar guyew ni ke muchubu’ e chig ko naun rorad nga langgin. Ere dakuriy e mad nib beech nrayog ni ngar chuwgad ngay. I yog Anna ni gaar: “Gu fekew e mad rorad nggu maluknagew, ma gamow sulweg ngorad ni kan irongnag ma kan t’et’ar. Re n’em nug rin’ew e gamow ra lemnag ma gathi ban’en nrib ga’, machane aram e n’en ni bing e kanawo’ ngomad ni ngari fel’ e thin romad ke mada’ ko chiney.” T’ufeg rok Anna nge figirngin ngak e pi walag e aram e n’en ni k’aringrow ni ngar ayuwegew yad ko tin nib t’uf rorad.—1 John 3:17, 18.
11. (a) Uw rogon u wan’ e girdi’ e t’ufeg ni gad ma dag ngorad? (b) Mang e ra rin’ Jehovah u nap’an ni gad ra dag e t’ufeg nrogon ni be yog e Proverbs 19:17?
11 Nap’an ni gad ra gol ngak yugu boch e girdi’ ma gad dag e t’ufeg ngorad, ma aram e rayog ni ngar guyed ni gad be guy rogon ni ngad folwokgad rok Jehovah. Gol ni gad ma dag ngorad e dabiyog ni ngad nanged gelngin feni ga’ fan u wan’rad. Khanh ni faan kan weliy murung’agen e der ma pagtalin e piin ur ayuweged. I yog ni gaar: “Rug be pining e magar ko pi walag nib pin ni ur feked gag ko machib. Yad ma yib ra feked gag, ma yad ma piningeg ni nggu abichgad u taabang, maku yad ma guy rogon ni nggu sul nga tabinaw ndariy ban’en ni ke buch rog. Chiney e kug nang nde mom e pi n’em ni ur rin’ed, machane ur rin’ed ni bochan e gub t’uf rorad.” Bin riyul’ riy e gathi gubin e girdi’ ni yad ra pining e magar ngodad ko n’en gad ma rin’ ni fan ngorad. Baaray e n’en ni yog Khanh u murung’agen e piin ur ayuweged ni gaar: “Gu ma athapeg ni manga yigi yag ni nggu sulweg puluwon urngin ban’en ni kar rin’ed ni fan ngog, machane dag nang e gin yad ma par riy e chiney. Machane Jehovah e manang, ma gu be meybil ni nge sulweg puluwon ngorad ni fan ngog.” Ba puluw e n’en ke yog Khanh. Ma guy Jehovah urngin ban’en ni gad ma rin’ ni fan ngak yugu boch e girdi’ ngki mada’ ko tin nrib achig ban’en. Ma sap ngay ni aram reb e maligach ni kad pied ngak nib ga’ fan, ma ban’en nra sulweg puluwon ngodad.—Mu beeg e Proverbs 19:17.
Nap’an nra mon’og be’ ko tirok Got ban’en, ma aram e ma gay boch e kanawo’ ni nge ayuweg e girdi’ riy (Mu guy e paragraph 12)
12. Uw rogon nrayog ni nge dag e pi walag ni pumoon nib t’uf e ulung rorad? (Kum guy e sasing.)
12 Faanra gur reb e walag ni pumoon, ma uw rogon ni ngaum t’ufeg yugu boch e girdi’ ma ga be ayuwegrad? Bay reb e walag ni kab pagel ni ka nog Jordan ngak ni fith reb e piilal ko uw rogon nrayog ni nge yoornag e ayuw ni be pi’ u lan e ulung. Ere yog fare piilal ngak fel’ngin e mon’og ni ke tay, ngemu’ miki yog ngak rogon nrayog ni nge yoornag e tin be rin’. Bod ni yog ngak ni nga i yib nga Tagil’ e Liyor nib papey, me yan i non ko girdi’ ni kar bad, ma be pi’ e fulweg u nap’an e muulung, ma be un ko machib ni gubin ngiyal’, maku be gay boch e kanawo’ nrayog ni nge ayuweg yugu boch e girdi’ riy. Nap’an ni fol Jordan ko re fonow ney, ma aram e gathi kemus ni be fil boch ban’en nib beech, ya ku be gel e t’ufeg rok ngak e pi walag. I nang Jordan nnap’an nra mang reb e walag ni pumoon reb e ministerial servant, ma gathi fin aram e ngiyal’ nra tabab i ayuweg e girdi’, ya aram e be ulul ni nga i ayuwegrad.—1 Tim. 3:8-10, 13.
13. Uw rogon ni k’aring e t’ufeg reb e walag ni ka nog Christian ngak ni ngki mang reb e piilal bayay?
13 Uw rogon ni faanra um moy ni gur reb e ministerial servant ara piilal? Dawori pag Jehovah talin e maruwel ni um rin’ kafram nge rogon ni k’aringem e t’ufeg ni ngam rin’ e re n’ey. (1 Kor. 15:58) Ku be guy e t’ufeg ni ga be ulul ni ngam dag. Bay reb e walag ni pumoon ni ka nog Christian ngak ni kireban’ u nap’an nni chuweg ndaki mang reb e piilal. Machane i yog ni gaar, “Gu dugliy ni nggu rin’ urngin e tin rayog rog ni nggu pigpig ngak Jehovah ndemtrug ko gag reb e piilal fa danga’.” Munmun mu kun dugliy bayay ni nge mang reb e piilal. I yog Christian ni gaar: “Gu rus ni ngkug mang reb e piilal bayay. Machane gu dugliy ni faanra ke runguyeg Jehovah ke pageg ni ngkug mang reb e piilal bayay, ma gu ra rin’ ni bochan e ba t’uf rog maku arrogon pi walageg ni ku yad ba t’uf rog.”
14. Mang e kam fil ko n’en ni yog reb e walag nib pin ni ma par u Georgia?
14 Ku ma dag e pi tapigpig rok Jehovah nib t’uf rorad e piin nib migid ngorad. (Matt. 22:37-39) Bay reb e walag nib pin ni ka nog Elena ngak ni ma par u Georgia ni yog ni gaar: “Som’on e ug machib ni bochan e ba t’uf Jehovah rog. Machane nap’an ni gel feni t’uf rog e Chitamag ni bay u tharmiy, ma aram miki gel feni t’uf e girdi’ rog. Gu ma guy rogon ni nggu lemnag e pi magawon ni yad be mada’nag nge n’en yad baadag ni ngan weliy murung’agen. Pi n’ey ni ug lemnag u rarogorad e k’aringeg ni nggu adag ni nggu ayuwegrad.”—Rom. 10:13-15.
ANGIN NI FAANRA UD T’UFEGED YUGU BOCH E GIRDI’
Taa ban’en ni ga ra rin’ u fithik’ e t’ufeg me yib angin ngak boor e girdi’ (Mu guy e paragraph 15-16)
15-16. Mang boch e tow’ath ni ma yag ngodad u nap’an ni gad ra t’ufeg yugu boch e girdi’ nrogon ni kan susunnag yaan ko sasing?
15 Nap’an ni gad ra t’ufeg pi walagdad ma gathi kemus ni yigoo yad e ma yib angin ngorad. Tomuren ni tabab fare m’ar ni COVID-19, ma bay reb e walag ni pumoon ni ka nog Paolo ngak nge leengin ni boor e walag nib pin ni kar pilibthirgad nra filew ngorad rogon ni ngar fanayed e cell phone, ara tablet, ara computer rorad ni ngar machibgad. Bay reb e walag nib pin nsom’on e ba mo’maw’ ngak ni nge rin’ e re n’ey, machane munmun me mit ngak. I yag ni nge fanay e pi n’ey ni nge pining e girdi’ rok ko Puguran, ma 60 i yad e un ko re muulung ney u online! N’en ni rin’ Paolo nge leengin e yib angin ko re walag ney nge girdi’ rok. Boch nga tomuren me yol ngak Paolo me gaar: “Kammagar ni ga be skulnagmad e piin pilibthir. Dab gu pagtalin gelngin nri ma lemnagmad Jehovah nge gelngin e maruwel ni kam tay ni ngam ayuwegmad.”
16 Bay ban’en nib ga’ fan ni fil Paolo ko re n’ey ni buch. I puguran ngak ni kab ga’ fan e t’ufeg ko tamilangan’ ara salap ni bay rodad. I yog ni gaar: “Kafram e ug lekag e ulung. Ma chiney e kug nang ni yugu aram rogon nrayog ni ke pag e pi walag talin e pi welthin ni ug pi’, machane dawor ra paged talin e ayuw ni ug pi’ ngorad.”
17. Nap’an ni gad ra dag e t’ufeg, ma mini’ e ku ra yib angin ngak?
17 Nap’an ni gad ra t’ufeg yugu boch e girdi’, maku bay boch e kanawo’ nra yib angin riy ngodad ndad lemnaged. Ireray e n’en ni yog Jonathan ni ma par u New Zealand. Immoy reb e Sabado nib gel e gowel ni guy reb e pioneer ni be machib u marichlen e kanawo’. Ere dugliy ni nga i Sabado ni mithigyal’ mar machibgow e re pioneer nem. Ngiyal’ nem e de lemnag rogon angin e re n’ey nra yib ngak. I yog ni gaar: “Ngiyal’ nem e gathi rug baadag e machib. Machane nap’an nug guy rogon ni ma fil e re walag nem ban’en ko girdi’ nge rogon angin e machib ni ma tay, ma aram mug tabab ni nggu adag e machib. Ki yag reb e fager ngog ni ir e ayuwegeg ni nggu ilal ko tirok Got ban’en, mug adag e machib, miki chugur e tha’ u thilmow Jehovah.”
18. Mang e baadag Jehovah ni ngad rin’ed?
18 Baadag Jehovah ni ngari gel e t’ufeg rodad ngak nge yugu boch e girdi’. Kad filed nrayog ni ngari t’uf Jehovah rodad ni faanra ud beeged e Thin rok, ma gad be fal’eg i lemnag, ma gad be meybil ngak ni gubin ngiyal’. Rayog ni ngari t’uf pi walagdad rodad ni faanra ud ayuweged yad ko tin nib t’uf rorad. Nap’an nra gel feni t’uf Jehovah nge pi walag rodad, ma aram e ri gad ra chugur ngorad. Ma ireray boch e fager nra yag ngodad me par ni manemus!
TANG 109 Nguud T’ufeged Gadad u Polo’ i Lanin’dad
a Demtrug ko ka fin da uned ko tin riyul’ ara ke yoor e duw ni kad pigpiggad ngak Jehovah, ma gad gubin nrayog ni ngad ululgad ni ngad mon’oggad. Gad ra weliy ko re article ney reb e kanawo’ nib ga’ fan nrayog ni ngad rin’ed e re n’ey riy ni aram e: nge gel feni t’uf Jehovah nge girdi’ rodad. Nap’an ni ga be fal’eg i lemnag e n’en bay ko re article ney, mag lemnag rogon e mon’og ni kam tay nge tin nrayog ni ngkum mon’og riy.
b Kan thilyeg fithingan boch e girdi’ u roy.