Gad gubin nib mudugil urngin e tayim nrayog ni ngad ted ni fan ko fol Bible ni yigoo gadad. Ere uw rogon ni ngad fanayed e re tayim ney nib fel’ rogon? Som’on e ngam fek e tayim rom ngam beeg boch ban’en. Ba ga’ angin nra yib ngom ni faan ga ra fal’eg i fil buchuuw ban’en nib fel’ rogon ko bin ngam gurnagem ngam man u daken boor ban’en taab yay.

Ngemu’ mag dugliy e n’en ni nge par nib ga’ fan. (Efe. 5:15, 16) Baaray boch ban’en nra ayuwegem:

• Um beeg e Bible ni gubin e rran. (Ps. 1:2) Rayog ni ngam tabab i beeg e pi thin nu Bible ni kan dugliy ni ngad beeged ni fan ko muulung ni yima tay u lan e wik.

• Mu fal’eg rogom ni fan ko Fol Wulyang ko Damit nge muulung ni yima tay u lan e wik. Mu fal’eg rogom nib fel’ rogon ya nge yag nim pi’ reb e fulweg.​—Ps. 22:22.

• Kum guy rogon ni ngam beeg mag be yaliy yugu boch ban’en ni kan ngongliy ni bod e pi magazine ni yima wereg ko girdi’ ni yoor, nge video, nge boch ban’en ni bay ko jw.org.

• Mu gay murung’agen ban’en ni ga baadag ni ngam nang. Rayog ni ngam gay murung’agen reb e magawon ni ga be mada’nag, ara reb e deer ni ga baadag ni ngam nang e fulweg riy, ara ban’en ni bay u Bible ni ga baadag ni nge tamilang u wan’um. Ra ngam nang boch ban’en nra ayuwegem, mag yan ko fare thin ni “Bible Study Activities” ni bay ko jw.org.