ARTICLE NI NGAN FIL 31
“Um Pired ni Gimed Mmudugil”
“Pi walageg ni girdien Kristus, um pired ni gimed mmudugil.”—1 KOR. 15:58.
TANG 122 Ngad Pired ni Gad Ba Mudugil!
TIN YIRA WELIY a
1-2. Uw rogon nrayog ni ngan taarebrogonnag reb e Kristiano ngab naun nib tolang? (1 Korinth 15:58)
NAP’AN e duw ni 1978, min toy ba naun nib tolang u Tokyo ni bay u Sapan. I lemnag e girdi’ ko uw rogon nrayog ni nge par e re naun nem ndabi puth ni bochan e boor e durru’ ni ma aw ko re mach nem. Ere uw rogon nni ngongliy e re naun nem ndabi puth u nap’an e durru’? Ni ngongliy nib gel maku rayog ni nge par nib mudugil ndabi puth ko ngiyal’ ni be rur e but’ u nap’an ni ke yib e durru’. Piin Kristiano e yad bod e re naun nem. Ni uw rogon?
2 Reb e Kristiano e thingari par nib mudugil ma kub puluw rogon ni ma lemnag boch ban’en. Ba t’uf ni nge par nib mudugil miki dugliy u wan’ ni gubin ngiyal’ ni nga i fol ko pi motochiyel rok Jehovah nge rogon nib m’agan’ ngay ni ngan rin’ ban’en. (Mu beeg e 1 Korinth 15:58.) Ba “m’agan’ ngay ni nge fol” ma ra par nib yul’yul’. Machane ba t’uf ni nge “puluw rogon ni nga i lemnag boch ban’en” ara nga i pag laniyan’ ko ngiyal’ nrayog ara ba t’uf ni nge rin’ riy. (Jas. 3:17, NW) Reb e Kristiano ni ke fil rogon ni nga i lem ni aray rogon e gathi ir be’ nrogon ni ke lemnag ni ngan rin’ ban’en e thingari par riy ni aram rogon ndabi thil ara yugu demtrug ban’en ni ma pag ni ngan rin’. Re article ney e gad ra weliy riy rogon nrayog ni ngad pared ni gad ba mudugil. Ku gad ra weliy lal e kanawo’ ni ma guy Satan rogon ni nge mo’maw’nag ngodad ni ngad pared ni gad ba mudugil nge rogon ni ngad siyeged e pi n’ey.
UW ROGON NRAYOG NI NGAD PARED NI GAD BA MUDUGIL?
3. Mang boch e motochiyel ni ke pi’ e En Ma Pi’ e Motochiyel ngodad Nth’abi Tolang ni bay ko Acts 15:28, 29?
3 Bochan ni Jehovah e ir e En Ma Pi’ e Motochiyel ngodad Nth’abi Tolang, ma gubin ngiyal’ nib tamilang rogon ni ma weliy e pi motochiyel rok ko girdi’. (Jas. 4:12) Bod nnap’an e bin som’on e chibog me yog fare ulung ni ma pow’iyey dalip e kanawo’ nthingari par e piin Kristiano riy ni yad ba mudugil ni aram: (1) dab ra uned ko meybil ko liyos ma kemus ni yigoo Jehovah e ngar liyorgad ngak, (2) ngar folgad ko motochiyel rok Jehovah ni be yog nib thothup e racha’, ma (3) ngar folgad ko motochiyel u Bible ni be yog ndabin un ko ngongol ndarngal. (Mu beeg e Acts 15:28, 29.) Uw rogon nrayog ni nge fol e piin Kristiano ko re dalip i n’ey e ngiyal’ ney?
4. Uw rogon ni kemus ni yigoo Jehovah e ir e ngad liyorgad ngak? (Revelation 4:11)
4 Darud uned ko meybil ko liyos ma kemus ni yigoo Jehovah e gad ma liyor ngak. I yog Jehovah ngak piyu Israel ni kemus ni yigoo ir e ngar liyorgad ngak. (Deut. 5:6-10) Ma nap’an ni yib Moonyan’ i waliy Jesus, me yog Jesus ni kemus ni yigoo Jehovah e thingar da liyorgad ngak. (Matt. 4:8-10) Aram fan ndarud meybilgad ko liyos. Ku darud liyorgad ngak boch e girdi’ mu ud ted ni gowa yad ba thil ko tin ka bay e girdi’ ndemtrug ko yad boch e tayugang’ ko teliw, ara tayugang’ ko am, ara piin nib gilbuguwrad u boch e gosgos, ara piin yima pag yaarad ko kachido, ara girdien e musik. Gad ma par u ba’ rok Jehovah ma kemus ni yigoo en ke “sunumiy urngin ban’en” e ir e gad ma liyor ngak.—Mu beeg e Revelation 4:11.
5. Mang fan ni gad ma fol ko motochiyel rok Jehovah ni be yog nib thothup e yafos nge racha’?
5 Gad ma fol ko motochiyel rok Jehovah ni be yog nib thothup e yafos nge racha’. Mang fan? Ya bochan ni ke yog Jehovah ni racha’ e be yip’ fan e yafos ni aram reb e tow’ath ni ke yib rok nrib ga’ fan. (Lev. 17:14) Nap’an ni pag Jehovah e girdi’ ni ngar ked ufin e gamanman ko yay nsom’on, me yog ngorad ndab ra ked e racha’ riy. (Gen. 9:4) Ki sul bayay u daken e re thin ney u nap’an ni pi’ fare Motochiyel rok Moses ngak piyu Israel. (Lev. 17:10) Ki pow’iy fare ulung ni ma pow’iyey ko bin som’on e chibog ni nga rogned ngak urngin e Kristiano ‘ndab ra ked e racha’.’ (Acts 15:28, 29) Ri gad ma fol ko re motochiyel ney u nap’an ni gad be dugliy boch ban’en ni bay rogon ko re miti tafalay ni ngad uned ngay. b
6. Mang e gad ma rin’ ya nge yag nda folgad ko motochiyel rok Jehovah ni be yog ndabin un ko ngongol ndarngal?
6 Gad ma fol ko motochiyel rok Jehovah ni be yog ndabin un ko ngongol ndarngal. (Heb. 13:4) I yog apostal Paul ni ngad “lied ngem’” e ar’ar nib kireb ni be maruwel u fithik’ i dowdad ni aram e be yip’ fan ni ngad athamgilgad u rogon nrayog rodad ni ngad chuweged urngin mit e ar’ar nib kireb ni bay rodad. Darud sapgad nga ban’en ara da rin’ed ban’en nra waliydad i yan ko ngongol ndarngal. (Kol. 3:5; Job 31:1) Nap’an nra yib e lumel ngodad, ma gad ma siyeg boch e lem nge ngongol nrayog ni nge kirebnag e tha’ u thildad Got ni ka chingiyal’ nem.
7. Mang e susun ni ngad dugliyed u wan’dad ni ngad rin’ed, ma mang fan?
7 Baadag Jehovah ni ngad ‘folgad’ u polo’ i gum’ircha’dad. (Rom. 6:17) Pi n’en ma yog ni ngad rin’ed e gubin ngiyal’ nib fel’ ngodad, ma dabiyog ni ngad thilyeged e pi motochiyel rok. (Isa. 48:17, 18; 1 Kor. 6:9, 10) Gad ma athamgil u rogon nrayog rodad ni ngad rin’ed e n’en nib m’agan’ Jehovah ngay ma gad ma lem ni bod fare psalmist ni faani gaar: “Kug dugliy u wun’ug ni nguug fol ko tin ni kam dugliy u lan e motochiyel rom, nge mada’ ko rofen ni bay gum’.” (Ps. 119:112) Machane ra guy Satan rogon ni nge mo’maw’nag ngodad ni ngad pared ni gad ba mudugil. Mang boch ban’en ni ma fanay?
UW ROGON NI MA MO’MAW’NAG SATAN NGODAD NI NGAD PARED NI GAD BA MUDUGIL?
8. Uw rogon ni ma fanay Satan e gafgow ni yima tay ngodad ni nge mo’maw’nag ngodad ni ngad pared ni gad ba mudugil?
8 Gafgow. Ma fanay Moonyan’ e cham nge pi n’en ma magafan’dad ngay ni nge mo’maw’nag ngodad ni ngad pared ni gad ba mudugil. Be nameg ni nge ‘longuydad’ ni aram e be yip’ fan ni be guy rogon ni nge kirebnag e tha’ u thildad Jehovah. (1 Pet. 5:8) Pi Kristiano ko bin som’on e chibog e un guy rogon ni ngan k’aring e marus ngorad, ma yibe toyrad, ma kun li’ boch i yad ni bochan e kar dugliyed ni ngar pared ni yad ba mudugil. (Acts 5:27, 28, 40; 7:54-60) Ka be ulul Satan ni nga i gafgownagdad e ngiyal’ ney. Be m’ug e re n’ey ko gafgow ni yibe tay ngak pi walagdad u Russia nge yugu boch e nam nge togopuluw ni yibe tay ko pi walag u yugu boch e kanawo’.
9. Mu weliy ban’en ni buch ni be dag fan nib t’uf ni ngad nanged boch e kanawo’ ni ma cham Satan riy ngodad nib mo’maw’ ni ngan nang.
9 Ma cham ngodad u boch e kanawo’ nib mo’maw’ rogon ni ngad nanged. Ma fanay Satan e “pi ban” nge gafgow ni yima tay ngodad. (Efe. 6:11) Am lemnag e n’en ni buch rok reb e walag ni pumoon ni ka nog Bob ngak nnon’ nga aspital ni bochan e ba t’uf ni ngan sey. I yog ngak urngin e togta rok ndariy e n’en nra rin’ me fanay e racha’. Ma aram me m’agan’ fare togta nra sey ngay ndabi pi’ e racha’ ngak. Machane re nep’ ni baaram u m’on ni ngan sey, ma aram me yib yugu reb e togta i guy u tomuren ni ke chuw chon e tabinaw rok. I yog ngak Bob nsana dabi t’uf ni ngan fanay e racha’ u nap’an ni yira sey, machane yugu bay ni tay nga bang ni bochan e nge t’uf ma bay. Sana lemnag e re togta nem nra thilyeg Bob e lem rok ni faanra de moy chon e tabinaw rok u rom. Machane i par Bob nib mudugil, me yog ndariy e n’en nra rin’ me fanay e racha’.
10. Mang fan ni bay e riya’ ko lem rok e piin ndarur folgad ko pi motochiyel rok Jehovah? (1 Korinth 3:19, 20)
10 Lem ko piin ndarur folgad ko pi motochiyel rok Jehovah. Faanra ud lemgad ni bod e piin ndarur folgad ko pi motochiyel rok Jehovah, ma aram e rayog ni nge dab kud folgad rok Jehovah nge pi motochiyel rok. (Mu beeg e 1 Korinth 3:19, 20.) “N’en ni be tafinaynag e piin nib mil farad ko re fayleng ney ni aram e gonop” e ba ga’ ni ma k’aring e girdi’ ni nge dab kur folgad rok Got. Immoy in e Kristiano u Pergamum nge Thyatira ni af ngorad e lem rok e piin yad ma meybil ko liyos nge piin yad ma un ko ngongol ndarngal ni yad ma par ko gal mach nem. Ba gel e fonow ni pi’ Jesus ko gal ulung ney ni bochan e yow be pag ni ngaun rin’ e ngongol ndarngal. (Rev. 2:14, 20) Ngiyal’ ney e rayog ni nga i guy e girdi’ u toobdad rogon ni nge m’agan’dad nga boch e lem nde puluw. Rayog ni nge guy chon e tabinaw rodad nge piin gad manang rogon ni ngar micheged nga lanin’dad ni kaygi yoor ban’en ni gad be taleged gadad riy ma susun e ngad th’abed e pi motochiyel rok Jehovah. Bod nrayog ni nga rogned nde ga’ fan ni ngad pared nib beech e ngongol rodad ma pi motochiyel u Bible e daki m’ag ngodad e ngiyal’ ney.
11. Mang e thingar da siyeged u nap’an ni gad be guy rogon ni ngad pared ni gad ba mudugil?
11 Yu ngiyal’ e rayog ni ngad lemnaged ni gathi rib tamilang e pi fonow ni be pi’ Jehovah ngodad. Ku rayog ni nge k’aringdad e re n’ey ni ngad lemnaged ni ngad ‘thum’gad nga wuru’’ e pi n’en bay u Bible. (2 John 9) Ireray reb e denen ni i rin’ e pi tayugang’ ko teliw u nap’an Jesus. Ur puthuyed yugu boch e motochiyel ko fare Motochiyel mar mo’maw’naged ko girdi’ ni ngar folgad riy. (Matt. 23:4) Ba tamilang e fonow ni ma pi’ Jehovah ngodad u daken e Thin rok nge ulung rok. Ere dariy rogon ni ngad puthuyed boch ko fonow ni be pi’ ngodad. (Prov. 3:5-7) Darud thum’gad nga wuru’ e pi n’en bay u Bible ara da ngongliyed boch e motochiyel ni nge fol e pi walag riy ni bay rogon nga boch ban’en nra be’ ma ir rok e nge dugliy.
12. Uw rogon ni ma fanay Satan e pi “sabanban ndariy rogon nga bayang”?
12 Pi ban. Ma fanay Satan e pi “sabanban ndariy rogon nga bayang” nge “machib ni sum rok e girdi’” ni nge bannag e girdi’ me ruw raba’nagrad. (Kol. 2:8) Nap’an e bin som’on e chibog, ma pi ban ney e ba muun ngay boch e llowan’ ni ke sum ko girdi’, nge pi machib rok e pi Jew nde puluw ko n’en bay u lan fare Babyor nib Thothup, nge fare machib nthingari fol e piin Kristiano ko fare Motochiyel rok Moses. Pi machib ney e goo bogi ban ni bochan e i chafeg laniyan’ e girdi’ nga orel rok Jehovah ni Ir e Ke Yib e gonop rok. Ngiyal’ ney e ma fanay Satan e news nge yu yang ko Internet ni yima non riy ko girdi’ ni nge garereg boch e thin ndariy e mich riy ara boch ban’en nde riyul’ ni be weliy e pi tayugang’ ko am. Boor e pi n’ey nda guyed ni buch u nap’an fare m’ar ni COVID-19. c Pi Mich Rok Jehovah ni ur folgad ko fonow ni i yib ko ulung rodad e yag ni ngar siyeged e magafan’ ni i tay e piin ni ur motoyilgad nga boch ban’en ni un weliy nde puluw.—Matt. 24:45.
13. Mang fan nthingar da kol ayuwgad u boch ban’en nra magawonnagdad?
13 Boch ban’en nra magawonnagdad. Thingar dab da paged talin e “tin ir e th’abi ga’ fan.” (Fil. 1:9, 10, NW) Faanra bay boch ban’en ni be magawonnagdad, ma rayog ni ngad adbeyed e tayim rodad nge gelngidad. Pi n’en nib ga’ ni gad ma rin’ ni bod e abich, nge garbod, nge pi n’en gad ma rin’ ni ngad felfelan’gad ngay, nge maruwel ni gad ma un ngay e rayog ni nge magawonnagdad ni faan gad ra m’oneg u lan e yafos rodad. (Luke 21:34, 35) Maku reb e gubin e rran ni gad ma rung’ag ma gad be beeg murung’agen e togopuluw ni yibe tay ko am nge boch ban’en ni yibe luag e thin riy ni bay rogon ko am. Thingar da guyed rogon ndab da paged e pi n’ey ni nge magawonnagdad. Ya faanra danga’ ma rayog ni nge dab kud pared u mathilin ngongolen e am. Gubin e pi n’ey ni kan weliy u roy e ma fanay Satan ni nge guy rogon ni nge k’aringdad ni nge dab kud rin’ed e tin nib fel’. Ere chiney e ngad guyed rogon nrayog ni ngad gelgad ngak ma gad par ni gad ba mudugil.
UW ROGON NRAYOG NI NGAD PARED NI GAD BA MUDUGIL?
Ra ngam par ni gab mudugil, ma ngam lemnag fan ni kam ognagem kam un ko taufe, mu um fil e Thin rok Got ma ga be fal’eg i lemnag, mag dugliy u wan’um ni ngam par ni gab mudugil, me pagan’um ngak Jehovah (Mu guy e paragraph 14-18)
14. Mang reb e ban’en nrayog ni nge ayuwegdad ni ngad pared ni gad ba mudugil u ba’ rok Jehovah?
14 Mu lemnag fan ni kam ognag e yafos rom ngak Jehovah kam un ko taufe. Kam rin’ e gali n’ey ni bochan e ga baadag ni ngam un ko ba’ rok Jehovah. Am lemnag e n’en ni ayuwegem ni ngari mich u wan’um ni kam pirieg e tin riyul’. Kam fil e tin riyul’ u murung’agen Jehovah, ma aram mag tabab ni ngaum tayfan me t’uf rom ni ir e Chitamam ni bay u tharmiy. I gel e michan’ rom me k’aringem ni ngam kalngan’um ko kireb rom. Kum tal i rin’ boch e ngongol nib fanenikan Jehovah mag tabab i rin’ e tin nib m’agan’ ngay. I yag ni nge fel’ lanin’um u nap’an nim nang ni ke n’ag Got fan e kireb rom. (Ps. 32:1, 2) Kum un ko muulung mu kum tabab i weliy ko girdi’ e pi n’en nrib manigil ni kam fil. Ma chiney ni kam ognag e yafos rom ngak Jehovah kam un ko taufe e ga be lek fare pa’ i kanawo’ ni be sor ko yafos, ma kam dugliy u wan’um ndab mu chuw ko re pa’ i kanawo’ nem.—Matt. 7:13, 14.
15. Mang fan nib ga’ angin e fol Bible ma gad be fal’eg i lemnag?
15 Um fil e Thin rok Got ma ga be fal’eg i lemnag. Rayog ni ngad pared ni gad ba mudugil ni faanra rib mich e Thin rok Got u wan’dad ni bod rogon ba ke gek’iy nrayog ni nge par ndabi thig ni faanra ba toar lik’ngin nga fithik’ e but’. Ra be ilal ba ke gek’iy, ma aram e be toar lik’ngin maku be n’uw yang e gin be yan riy. Nap’an ni gad ra fil e Thin rok Got ma gad fal’eg i lemnag, ma aram e gad be gelnag e michan’ rodad maku gad be micheg nga lanin’dad ni birok Got e kanawo’ e aram e bin th’abi fel’. (Kol. 2:6, 7) Mu lemnag rogon ni i ayuweg Jehovah e pi tapigpig rok kakrom u daken e pi fonow ni i pi’ ngorad nge rogon ni be yororiyrad. Bod nri tiyan’ Ezekiel nge fal’eg i yaliy ba engel u nap’an ni be foleg fare tempel nni pilyeg e changar rok nge guy. Re n’ey nni pilyeg e changar rok Ezekiel nge guy e pi’ gelngin, maku gad be fil boch ban’en riy u rogon nrayog ni ngad folgad ko pi motochiyel rok Jehovah ni bay rogon ko bin riyul’ e liyor. d (Ezek. 40:1-4; 43:10-12) Ere ku arrogodad ni faanra ud ted e tayim ni ngad filed boch ban’en nib toar fan u lan e Thin rok Got ma gad be fal’eg i lemnag, maku ra yib angin ngodad.
16. Bochan ni par Bob nib mudugil, ma uw rogon ni ayuweg e re n’ey? (Psalm 112:7)
16 Mu dugliy u wan’um ni ngam par ni gab mudugil. I yog David ni Pilung ndariy ba ngiyal’ nra war e t’ufeg rok ngak Jehovah u nap’an ni tang ni gaar: “A Got, rib pagan’ug ngom [“gu be par ni gub mudugil,” NW].” (Ps. 57:7, BT) Ku arrogodad nrayog ni ngad pared ni gad ba mudugil ma rib pagan’dad ngak Jehovah. (Mu beeg e Psalm 112:7. e) Am lemnag rogon ni ayuweg e re n’ey Bob ni faan kan weliy murung’agen. Nap’an nnog ngak ni yugu bay ni tay e racha’ nga bang ni bochan e nge t’uf ma bay, ma aram me yog ni faanra ngan pi’ e racha’ ngak ma nge chuw u aspital ni ka chingiyal’ nem. Faani boch nga tomuren me gaar Bob, “Dariy ba ngiyal’ ni maruwar u wan’ug ko mang e nggu rin’, maku de magafan’ug ko n’en nra buch rog.”
Ra ba gel e michan’ rodad, ma demtrug e re miti skeng nra yib ngodad ma gad ra par ni gad ba mudugil (Mu guy e paragraph 17)
17. Mang e rayog ni ngad filed ko n’en ni buch rok Bob? (Kum guy e sasing.)
17 I par Bob nib yul’yul’ ni bochan e kab n’uw nap’an u m’on ni nge yan nga aspital me dugliy u wan’ nra par nib mudugil. Som’on e baadag ni nge felfelan’nag Jehovah. Bin l’agruw e i fal’eg i fil e n’en be yog e Bible nge pi babyor rodad u murung’agen feni thothup e yafos nge racha’. Ma bin dalip e ba mich u wan’ ni faanra fol ko pi fonow rok Jehovah ma ra yib angin ngak ndariy n’umngin nap’an. Ku arrogodad ndemtrug e re miti skeng ni gad ra mada’nag, ma rayog ni ngad pared ni gad ba mudugil.
De rus Barak nge pi salthaw rok ni ngar lol’oged Sisera nge pi salthaw rok (Mu guy e paragraph 18)
18. Uw rogon ni be ayuwegdad e n’en ni rin’ Barak ni nge pagan’dad ngak Jehovah? (Mu guy e sasing ni bay u wuru’ e re ke babyor ney.)
18 Nge pagan’um ngak Jehovah. Am lemnag rogon ni gel Barak ni bochan e pagan’ ko fonow ni pi’ Jehovah ngak. Ngiyal’ nem e dawori fal’eg piyu Israel rogorad ni fan ko mahl. Mus ko talin e cham ma dariy rorad. Machane me yog Jehovah ngak Barak ni nge yan i cham ngak Sisera ni ir e be tay murung’agen e salthaw nu Kanaan nge pi salthaw rok ni boor talin e cham rorad. (Judg. 5:8) I yog Deborah nreb e profet nib pin ngak Barak ni nge yan ko gin nib tagapas ni ngar chamgow Sisera nge fa 900 i karrow rok ni ma girngiy e os. Yugu aram rogon nra mo’maw’ ngak piyu Israel ni ngar chamgad ko pi karrow nem ni ma girngiy e os ko gin nib tagapas, machane me fol Barak ko n’en ka nog ngak. Ere nap’an ni be yan fapi salthaw u daken e Burey ni Tabor nga p’ening, ma aram me k’aring Jehovah bangi n’uw ni nge aw nib ga’ yang me mit fapi karrow rok Sisera u fithik’ e bar, me ayuweg Jehovah Barak ni nge gel ko mahl. (Judg. 4:1-7, 10, 13-16) Ku arrogodad nra ayuwegdad Jehovah ni faanra pagan’dad ngak miki pagan’dad ko pi fonow ni be pi’ ngodad u daken e ulung rok.—Deut. 31:6.
MU DUGLIY U WAN’UM NI NGAM PAR NI GAB MUDUGIL
19. Mang fan ni ga baadag ni ngam par ni gab mudugil?
19 N’umngin nap’an ni gad be par u lan e re m’ag ney mab t’uf ni ngad ululgad i guy rogon ni ngad pared ni gad ba mudugil. (1 Tim. 6:11, 12; 2 Pet. 3:17) Ere manga yu gud dugliyed u wan’dad ndab da paged e gafgow, nge cham ni ma tay Satan ngodad u boch e kanawo’ nib mo’maw’ rogon ni ngad nanged, nge lem ko piin ndarur folgad ko pi motochiyel rok Jehovah, nge pi ban, nge boch ban’en nra magawonnagdad ni nge mo’maw’nag ngodad ni ngad pared ni gad ba mudugil. (Efe. 4:14) Ya n’en ngad rin’ed e ngad pared ni gad ba mudugil u rogon e yul’yul’ rodad ngak Jehovah ma gubin ngiyal’ ni gad be fol ko pi motochiyel rok. Machane kub t’uf ni nge puluw rogon ni ngaud lemnaged boch ban’en. Bin migid e article e gad ra weliy riy rogon ni ke dag Jehovah nge Jesus e bin th’abi fel’ e kanawo’ u rogon ni nge puluw rogon ni ngaun lemnag boch ban’en.
TANG 129 Gubin Ngiyal’ Nra Ud Athamgilgad
a Ka nap’an Adam nge Efa ni be guy Satan rogon ni nge micheg nga laniyan’ e girdi’ ni yad e susun e ngar dugliyed ko mang e ba fel’ ma mang e ba kireb. Ku aray rogon ni baadag ni ngaud lemnaged e pi motochiyel rok Jehovah nge pi fonow ni be yib ngodad u daken e ulung rok. Re article ney e ra ayuwegdad ni ngad guyed rogon ndab da darifannaged e pi motochiyel rok Jehovah ni bod ni ma rin’ e piin yad ma folwok rok Satan, nge rogon ni ngaud folgad rok Jehovah ni gubin ngiyal’.
b Mu guy e guruy ni 39 ko fare ke babyor ni Mu Par Ndariy N’umngin Nap’an ni Gab Felfelan’! ni be weliy rogon nrayog ni nge fol reb e Kristiano ko motochiyel rok Got u murung’agen e racha’.
c Mu guy fare article ni “Protect Yourself From Misinformation” ni bay ko jw.org.
d Ra ngkum nang boch ban’en u murung’agen e re n’ey, mag guy fare ke babyor ni Pure Worship of Jehovah—Restored At Last! ko guruy ni 13 nge 14.
e Psalm 112:7 (NW): “Der ma rus nra rung’ag e tin nib kireb ni ke buch. Be par nib mudugil mab pagan’ ngak Jehovah.”