1. Uw rogon u wan’um e tin riyul’?

 BA GA’ fan u wan’ e girdi’ rok Jehovah e tin riyul’ ni bay u lan e Thin rok Got. Aram e n’en be tor e michan’ rodad nga daken. (Rom. 10:17) Ke mich u wan’dad ni ke sunmiy Jehovah e ulung ni Kristiano ni “ir e duga’ me ir e be dunubiy fare thin nib riyul’.” (1 Tim. 3:15) Ma gad ba felfelan’ ngay ni ngad folgad ko “piin ni yad be yog e thin” rodad u nap’an ni yad be weliy e tin riyul’ ni bay u Bible ma yad be yog e n’en ngad rin’ed nib puluw ko n’en nib m’agan’ Got ngay.​—Heb. 13:17.

2. Mang e rayog ni nge buch rodad u tomuren ni kad filed e tin riyul’ nrogon ni be yog e James 5:19?

² Machane tomuren ni ke m’agan’dad ko tin riyul’ ma kki m’agan’dad ngay nib t’uf ni ngad folgad ko fonow ni be yib ko ulung rok Got, maku rayog ni ngad maloggad riy nga orel. (Mu beeg e James 5:19.) Ri baadag Satan ni nge dabki pagan’dad ko Bible ara fonow ni be yib ko ulung rok Got.​—Efe. 4:14.

3. Mang fan nib t’uf ni ngad chichiiyed pa’dad ko tin riyul’? (Efesus 6:​13, 14)

³ Mu beeg e Efesus 6:​13, 14. Dabki n’uw nap’an ma ra fanay Moonyan’ boch e ban ni nge k’aring e pi nam ni ngar togopuluwgad ngak Jehovah. (Rev. 16:​13, 14) Ku gad manang nri ku ra guy Satan rogon ni nge bannag e girdi’ rok Jehovah. (Rev. 12:9) Aram fan nib t’uf ni ngad filed rogon ni ngad nanged e n’en nib thil u thilin e tin riyul’ nge tin nde riyul’ ma gad fol ko tin riyul’. (Rom. 6:17; 1 Pet. 1:22) Ba t’uf ni ngad rin’ed e re n’ey, ya nge yag nda mageygad ni gad ba fos u nap’an fare gafgow nib ga’!

4. Mang e gad ra weliy ko re article ney?

 ⁴ Gad ra weliy l’agruw e fel’ngin ko re article ney nib t’uf ni nge yag ngodad ya nge yag nda nanged e tin riyul’ ni kan fek u Bible, me m’agan’dad ko fonow ni be yib ko ulung rok Got. Ngemu’ ma gad weliy dalip ban’en nthingar da rin’ed ya nge yag nda chichiiyed pa’dad ko tin riyul’.

L’AGRUW E FEL’NGIN NRA AYUWEGDAD NI NGAD NANGED E TIN RIYUL’

5. Faanra bay madgun Jehovah u wan’dad, ma uw rogon nra ayuwegdad ni ngad nanged e tin riyul’?

⁵ Madgun Jehovah. Ra bay madgun Jehovah u wan’dad ma be yip’ fan nrib t’uf rodad ma dubdad ni ngad rin’ed ban’en nra kirebnag laniyan’. Gad baadag ni ngad nanged e n’en nib thil u thilin e tin nib fel’ nge tin nib kireb, nge tin riyul’ nge tin nde riyul’, ya nge yag nda fel’gad u wan’ Jehovah. (Prov. 2:​3-6; Heb. 5:14) Thingar dab da paged e marus ni gad ma tay ko girdi’ ni nge gel ko t’ufeg rodad ngak Jehovah, ya ba ga’ nde m’agan’ Jehovah ko tin nib fel’ u wan’ e girdi’.

6. Uw rogon ni k’aring e marus ko girdi’ fa ragag i pumoon ni yad lolugen e pi ganong nu Israel ni nga rogned boch ban’en nde riyul’?

⁶ Faanra gel e marus rodad ko girdi’ me war madgun Got u wan’dad, ma aram e rayog ni ngad maloggad nga orel ko tin riyul’. Am lemnag e n’en ni buch rok fa 12 i pumoon ni yad lolugen e pi ganong nu Israel nni l’ograd ni ngar damitnaged fare nam ni ke micheg Jehovah nra pi’ ngak piyu Israel. Ragag i yad e kab gel e marus rorad ngak piyu Kanaan ko t’ufeg rorad ngak Jehovah. I lungurad ngak piyu Israel: “Dabiyog ni ngad m’aged e mahl ngorad ya gadad mmeewar; ya ba gel e mal’af riy ni yad ba gel ngodad.” (Num. 13:​27-31) Rogon u wan’ e girdi’ e kab gel piyu Kanaan ngak piyu Israel. Machane en nra yog ndabiyog ni nge gel piyu Israel ko pi toogor rorad e der lemnag Jehovah. Susun e nge lemnag fa ragag i damit e n’en baadag Jehovah ni nge rin’ piyu Israel, mu kur  fal’eged i lemnag e n’en ni i rin’ ni fan ngorad u m’on riy. Faan yad ra rin’ e re n’ey, ma aram e yad ra nang ndabi chugur ni nge taareb rogon gelngin piyu Kanaan ngak Jehovah nrib gel gelngin. Ba thil Joshua nge Kaleb ngak fapi damit ndariy e michan’ rorad, ya yow baadag ni ngar fel’gow u wan’ Jehovah. Ere lungurow ko fapi girdi’: “Ra gadad ba fel’ u wan’ Somol, ma ra fekdad ngay me pi’ ngodad e re nam nem.”​—Num. 14:​6-9.

7. Uw rogon nrayog ni ngari yib madgun Jehovah u wan’dad? (Kum guy e sasing.)

⁷ Ra ngari yib madgun Jehovah u wan’dad, mab t’uf ni ngaud lemnaged e n’en nib m’agan’ ngay u nap’an ni ngad dugliyed ban’en. (Ps. 16:8) Nap’an ni ga be beeg murung’agen boch ban’en u Bible mag fithem ni nge lungum, ‘Faan gomanga gag e ke buch e re n’ey rog, ma mang e gu ra dugliy ni nggu rin’?’ Bod nrayog ni ngam susunnag ni ga be motoyil u nap’an ni be yog fa ragag i pumoon ni yad lolugen e pi ganong nu Israel ndabiyog ni nge gel piyu Israel ngak piyu Kanaan. Gur, ra mich u wan’um e n’en nrogned mag pagem ko marus ko girdi’, fa kab gel e t’ufeg rom ngak Jehovah ma ga baadag ni ngam rin’ e n’en nib m’agan’ ngay? Ga’ngin e re mfen nem nu Israel nde mich u wan’rad ni be yog Joshua nge Kaleb e tin riyul’. Aram fan ndan pagrad ni nga ranod nga lan fare Nam ni Kan Micheg.​—Num. 14:​10, 22, 23.

8. Mang fel’ngin e thingar da maruweliyed, ma mang fan?

⁸ Sobut’an’. Ma dag Jehovah e tin riyul’ ngak e piin nib sobut’an’rad. (Matt. 11:25) Kad sobut’naged lanin’dad ke m’agan’dad ngay ni ngan ayuwegdad ni ngad nanged e tin riyul’. (Acts 8:​30, 31) Yugu aram rogon ma thingar da kol ayuwgad ndabi tolangan’dad. Faanra ba tolangan’dad ma rayog ni nge k’aringdad ni ngad lemnaged ni yugu aram rogon nib puluw e pi kenggin e motochiyel u Bible nge fonow ni be yib ko ulung rok Jehovah, machane kub puluw e n’en gad be lemnag.

9. Uw rogon nrayog ni ngad pared nib sobut’an’dad?

⁹ Ra ngad pared nib sobut’an’dad, mab t’uf ndab da paged talin ni faanra ngan taareb rogonnagdad ngak Jehovah ma kab gel fadad sobut’. (Ps. 8:​3, 4) Ku rayog ni ngad yibilayed ni ngan ayuwegdad ni ngad maruweliyed e sobut’an’ me mom ni ngan fil ban’en ngodad. Ra ayuwegdad Jehovah ni nge ga’ fan e lem rok u wan’dad ni ma tamilangnag ngodad u daken e Thin nge ulung rok, mfini migid e n’en gad be lemnag. Nap’an ni ga be beeg e Bible mag yaliy boch ban’en riy ni be micheg ni baadag Jehovah e sobut’an’ mab fanenikan e tolangan’. Ma thingar mu kol ayuw ndabi tolangan’um ni faanra kan pi’ reb e maruwel ngom u lan e ulung ni be pi’ mat’awum ni nga u mog e thin u boch ban’en ara mu gagiyel riy.

ROGON NI NGAD CHICHIIYED PA’DAD KO TIN RIYUL’

10. Mini’ e ke fanayrad Jehovah ni nga u rogned e n’en nge rin’ e girdi’ rok?

¹⁰ Mu ulul ni nge pagan’um ko fonow ni be yib ko ulung rodad. Kakrom u nap’an piyu Israel me fanay Jehovah Moses, me boch nga tomuren miki fanay Joshua ni nga u rognew e n’en nge rin’ e girdi’ rok. (Josh. 1:​16, 17) Nap’an ni i tay piyu Israel ni gal pumoon ney e yow owchen Jehovah Got, ma aram mu un tow’athnagrad. Boch e chibog nga tomuren u nap’an ni ke sum e ulung ni Kristiano ma fa 12 i apostal e u rogned e n’en ngan rin’. (Acts 8:​14, 15) Boch nga tomuren me un boch e piilal u Jerusalem ngorad. Bochan ni i fol e ulung ko fonow ni i pi’ e pi pumoon ney ni yad ba yul’yul’, ma aram “mi i gel i yan e michan’ rok girdien e galesiya ma yad be yoor i yan ni gubin e rran.” (Acts 16:​4, 5) Ku arrogon e ngiyal’ ney nnap’an ni gad ra fol ko fonow ni ke yib ko ulung rok  Jehovah maku yima tow’athnagdad. Machane uw rogon u wan’ Jehovah ni faanra dab ud ted fan e piin ke tayrad ni nga u rogned e thin rodad? Rayog ni ngad nanged e fulweg ko re deer ney ni faan gad ra lemnag e n’en ni buch rok piyu Israel u nap’an ni yad be yan i yan ko fare Nam ni Kan Micheg.

11. Mang e buch rok boch e girdi’ nu Israel nra togopuluwgad ngak Moses ni ir e mel’eg Got ni nga i yog e thin rorad? (Kum guy e sasing.)

¹¹ Nap’an ni be milekag piyu Israel i yan ko fare Nam ni Kan Micheg, me togopuluw boch e pumoon ngak Moses nge maruwel ni ke pi’ Jehovah ngak ni nge rin’. I lungurad: “Gubin e girdi’ nu Israel [gathi kemus ni yigoo Moses] nib mil farad ngak Somol, ma bay Somol rodad ni gadad gubin.” (Num. 16:​1-3, BT) Yugu aram rogon ni “gubin e girdi’ nu Israel” nib mil farad ngak Jehovah, machane ke dugliy Moses ni ir e nge yog e thin ko girdi’ rok. (Num. 16:28) Nap’an ni gathibthibnag e pi cha’nem Moses, ma bin riyul’ riy e yad be gathibthibnag Jehovah. Dar lemnaged e n’en ni baadag Jehovah ya ra lemnaged e n’en yad baadag ni aram e nge gel lungurad mar gagiyelgad u boch ban’en. I thang Got e piin nra tababnaged e re togopuluw nem nge bokum biyu’ e girdi’ nra manged ngorad. (Num. 16:​30-35, 41, 49) Ngiyal’ ney e ku gad manang nde m’agan’ Jehovah ko piin yad ma darifannag e yaram ni ke yib ko ulung rok.

12. Mang fan nrayog ni ngad pared nib pagan’dad ko ulung rok Jehovah?

¹² Rayog ni ngad pared nib pagan’dad ko ulung rok Jehovah. Nap’an nra tamilang nib t’uf ni ngad thilyeged rogon ni ke tamilang reb e machib u Bible u wan’dad ara rogon ni yibe yarmiy e maruwel ni gad be rin’ ni fan nga Gil’ilungun Got, ma piin yad ma yog e thin rodad e darur tuntungad ni ngar thilyeged e pi n’ey. (Prov. 4:18) Yad ma rin’ e re n’ey ni bochan e yad baadag ni ngar felfelan’naged Jehovah. Ku yad ma athamgil u rogon nrayog rorad ni nge puluw e tin yad be dugliy ko Thin rok Got ni  aram e tin riyul’ nthingari fol urngin e girdi’ rok Jehovah riy.

13. Mang ‘fapi thin nib riyul’ ni ir e nguun fol riy,’ ma mang e thingar da rin’ed ngay?

¹³ “Dab mpag fapi thin nib riyul’ ni . . . ir e nguum fol riy.” (2 Tim. 1:13) ‘Fapi thin nib riyul’ ni ir e nguun fol riy’ e be yip’ fan e pi machib ko Kristiano ni bay u lan e Bible. (John 17:17) Pi machib ney e aram e n’en be tor urngin ban’en nib mich u wan’dad nga daken. Ke fil e ulung rok Jehovah ngodad ni ngad guyed rogon ni nge puluw e michan’ rodad ko pi thin nem nib riyul’. Faan gad ra rin’ e re n’ey, ma aram e yira tow’athnagdad.

14. Uw rogon ni malog boch e Kristiano ko ‘fapi thin nib riyul’ ni ir e nguun fol riy’?

¹⁴ Mang e rayog ni nge buch ni faan gad ra malog ko ‘fapi thin nib riyul’ ni ir e nguun fol riy’? Am lemnag ban’en ni buch. Nap’an e bin som’on e chibog, ma immoy boch e Kristiano ni ur wereged boch ban’en nde riyul’ ni yad be yog ni ke taw fare rran rok Jehovah. Rayog ni immoy bangi babyor ni lemnag e girdi’ ni apostal Paul e ke yoloy ni bay e re thin ney riy. Bay boch e Kristiano u Thessalonika ni mich e re thin ney u wan’rad mu kur uned i weliy ngak yugu boch e girdi’ ndar ted e tayim ni ngar gayed murung’agen ngar nanged ko ba riyul’ fa danga’. Faan gomanga dar paged talin e pi n’en ni i fil Paul ngorad u nap’an ni immoy rorad, ma aram e dabiyog ni ngan bannagrad. (2 Thess. 2:​1-5) I fonownag Paul pi walagen ndabi mich u wan’rad urngin ban’en ni kar rung’aged. I yog boch e thin u tungun e gin l’agruw e babyor ni yoloy nge yan ngak piyu Thessalonika ni nge ayuwegrad boch nga m’on ni gaar: “‘I gag Paul.’ Erera’ rogon ni gu ma sayinnag urngin yang e babyor; ma erera’ rogon ni gu ma yol.”​—2 Thess. 3:17.

15. Uw rogon nrayog ni ngad ayuweged gadad u boch e ban ni yima weliy nrayog ni ngan lemnag nib riyul’? Mu weliy reb e kanawo’. (Kum guy e sasing.)

¹⁵ Mang e rayog ni ngad filed ko fapi thin ni yog Paul ngak piyu Thessalonika? Nap’an ni gad ra rung’ag ban’en nde puluw ko n’en kad filed u Bible ara kad rung’aged ban’en ni kan weliy u murung’agdad ni yira gin ngay, mab t’uf ni ngad maruwelgad ko gonop rodad. Nap’an e  Soviet Union ma bay bangi babyor ni pi’ e pi toogor rodad ngak e pi walag ni yad be yog ni ke yib ko tochuch rodad. Nog ngak boch e walag u lan e gi babyor nem ni ngar ngongliyed reb e ulung nib ki’ ko ulung rodad. Gowa bod nib riyul’ e thin ko re gi babyor nem. Machane pi walag ni yad ba yul’yul’ e de yag ni ngan bannagrad. Ya ra nanged nde puluw e thin ko gi babyor nem ko n’en kan fil ngorad. Ngiyal’ ney e bay yu ngiyal’ ni ma fanay e piin yad ma togopuluw ko tin riyul’ e Internet ni ngar guyed rogon ni ngar balyangnaged lanin’dad mu kur ruw raba’naged gadad. Ere rayog ni ngad ayuweged gadad ni aram e ngad lemnaged ko ba puluw e n’en kad rung’aged ara kad beeged ko tin riyul’ ni kad filed fa danga’, ko bin ni ngad ‘gurgad nge wagagey lanin’dad nga rogon e lem ni gad be tay.’​—2 Thess. 2:2; 1 John 4:1.

16. Mang e susun ni ngad rin’ed ni faanra ke tabab boch e girdi’ ni ngar weliyed boch ban’en nib togopuluw ko tin riyul’ nrogon ni be yog e Roma 16:​17, 18?

¹⁶ Nge taareban’med e piin yad ba yul’yul’ ngak Jehovah. Baadag Got ni ngad liyorgad ngak nib taareban’dad. Gad ra par nib taareban’dad ni faan gad ra guy rogon ni nge puluw e michan’ rodad ko tin riyul’. En nra weliy boch ban’en nib togopuluw ko tin riyul’ e be ruw raba’nag e ulung, ma ke yog Got ngodad ni ngad ‘tiyed gadad u urel rorad.’ Ya faanra danga’ maku rayog ni ngad maloggad ko tin riyul’.​—Mu beeg e Roma 16:​17, 18.

17. Mang angin nra yib ngodad ni faan gad ra nang e tin riyul’ ma gad chichiiy pa’dad riy?

¹⁷ Nap’an ni gad ra nang e tin riyul’ ma gad chichiiy pa’dad riy, ma aram e gad ra par ni gad ba chugur ngak Jehovah mab gel e michan’ rodad. (Efe. 4:​15, 16) Ku dabi bannagdad e pi machib nde riyul’ ni ma wereg Satan nge pi ban rok, ma ra ayuwegdad Jehovah ndabi buch ban’en rodad u nap’an fare gafgow nib ga’. Ere mu chichiiy paam ko tin riyul’, ma ‘Got ni ir e be pi’ e gapas nga lanin’dad e bay i par rom.’​—Fil. 4:​8, 9.