1. Mang e ke rin’ Jehovah ni fan ngodad?

KE POW’IYDAD Jehovah ngak. (John 6:44) Am lemnag e re n’ey. Ke par Jehovah ke fal’eg i yaliy bokum bilyon e girdi’ u lan e re fayleng ney, ma ke guy ni gur bagayad ni gab yul’yul’ ma rayog ni nge t’uf rom. Re n’ey e ban’en nib ga’ fan u wan’. (1 Kron. 28:9) Manang rarogom ma gab t’uf rok. Re n’ey e be pi’ e athamgil nga lanin’dad!

2. Uw rogon ni ke ayuwegdad Jesus ni ngad nanged feni ga’ fadad u wan’ Jehovah?

² Rib ga’ fam u wan’ Jehovah, maku arrogon pi walagem u lan e ulung. I taarebrogonnag Jesus Jehovah ngak be’ ni ma gafaliy e saf ya nge ayuwegdad ni ngad nanged fan e re n’ey. Faanra bay raay e saf rok be’ ni ma gafaliy e saf me malog taareb u fithik’, ma mang e ra rin’? “Ra digey fa mereb i ragag nge mereb nem ni yad be kay e pan u sigreen e burey me yan nge gay fa binem ni ke yan nga bang.” Nap’an nra pirieg fare saf ma dabi damumuw ngak ni ke chuw u fithik’ fa tin baaram e saf, ya ra felfelan’ ni ke pirieg. Mang e gad be fil ko re n’ey? Gad be fil riy ni urngin e saf nib ga’ fan u wan’ Jehovah. I gaar Jesus: “Ku er rogon e Chitamangimed nu tharmiy nde adag bagayad e nochi tir ney ni nge malog.”​—Matt. 18:12-14.

3. Mang e gad ra weliy ko re article ney?

³ Dubdad ni ngad rin’ed ban’en nra muleg laniyan’ reb e walag u lan e ulung. Uw rogon ndab da magawonnaged laniyan’ yugu boch e girdi’? Ma mang e ngad rin’ed ni faanra ke rin’ be’ ban’en ni ke kirebnag lanin’dad? Gad ra weliy e fulweg ko gal deer ney ko re article ney. Machane som’on e ngad weliyed murung’agen e piin kan taareb rogonnagrad nga “nochi tir” ni bay ko Matthew ko guruy ni 18.

4. Mini’ e be yip’ fan fa “nochi tir”?

⁴ Fapi cha’ ni kan taareb rogonnagrad nga “nochi tir” e be yip’ fan pi gachalpen Jesus. Yugu aram rogon nib thilthil yangarrad, ma kan taareb rogonnagrad nga “nochi tir” ni bochan e ba m’agan’rad ngay ni nge fil Jesus ban’en ngorad. (Matt. 18:3) Yad gubin ni ke mich Kristus u wan’rad ni yugu aram rogon nib thilthil e gin kar bad riy, nge yalen rorad, nge rarogorad. Ma ri yad ba t’uf rok Kristus.​—Matt. 18:6; John 1:12.

5. Uw rogon u wan’ Jehovah u nap’an nra magawonnag be’ laniyan’ reb e girdi’ rok ara kirebnag laniyan’?

⁵ Gubin e “nochi tir” nem nib ga’ farad u wan’ Jehovah. Ra ngad nanged rogon laniyan’, ma ngad lemnaged rogon e piin bitir u wan’dad. Ba ga’ farad u wan’dad. Gad baadag ni ngad ayuweged yad ndabi buch ban’en rorad ni bochan e yad ba meewar, ma de yoor ban’en ni yad manang, ma de ga’ e gonop rorad ni bod rogon e piin kar ilalgad. Dubdad ni ngad guyed be’ ni be gafgownag yugu be’, machane ri ku ma gel e damumuw rodad u nap’an ni gad ra guy be’ ni be gafgownag bochi tir. Ere ku arrogon Jehovah ni baadag ni nge ayuwegdad ndabi buch ban’en rodad, ma ri ma damumuw u nap’an nra magawonnag be’ laniyan’ reb e girdi’ rok ara kirebnag laniyan’!​—Ex. 3:7; Mark 9:42.

6. Uw rogon pi gachalpen Jesus u wan’ e girdi’ nu fayleng nrogon ni be yog e 1 Korinth 1:26-29?

⁶ Uw rogon ni ku rayog ni ngan taarebrogonnag pi gachalpen Jesus nga “nochi tir”? Mini’ e piin ma lemnag e girdi’ nu fayleng nib ga’ farad? Piin nib flaab, nge piin nib gilbuguwrad, nge piin nib ga’ lungurad. Machane pi gachalpen Jesus e ba ga’ ni gathi aram rogorad. Ere de ga’ farad u wan’ e girdi’ nu fayleng ni bod “nochi tir.” (Mu beeg e 1 Korinth 1:26-29.) Machane gathi aram rogorad u wan’ Jehovah.

7. Uw rogon ni baadag Jehovah ni ngaud lemnaged e pi walagdad u lan e ulung?

⁷ Gubin e tapigpig rok Jehovah ni yad ba t’uf rok ndemtrug ko ke yoor e duw ni kar pigpiggad ngak ara ka yad bbeech ko tin riyul’. Gubin e walag u lan e ulung nib ga’ farad u wan’ Jehovah, ere susun e ngki ga’ farad u wan’dad. Gad baadag ni ngad t’ufeged urngin e ‘pi cha’ ni gadad ni ke mich Got u wun’rad,’ ma gathi kemus ni boch i yad. (1 Pet. 2:17) Susun e nge m’agan’dad ngay ni ngad ayuweged yad u rogon nrayog rodad. Faanra kad nanged ni kad rin’ed ban’en ni ke kirebnag laniyan’ be’, ma susun e dab da ngongolgad ni gowa dariy ban’en ni ke buch, ma gad lemnag ni facha’ e ir e ba t’uf ni nge n’ag fan ndab ki lemnag. Mang fan ni ma aw boch ban’en nga laniyan’ boch e girdi’? Bay boch e walag ni yad ma lemnag ndariy farad ni bochan rogon e chugol nni tay ngorad. Ma boch e walag e ka fin ra uned ko tin riyul’; ere dawor ra nanged rogon ni ngaur n’aged fan e kireb rok yugu boch e girdi’. Demtrug rogon, ma susun e ngad guyed rogon ni nge aw e gapas. Maku reb e, be’ nib mom ni ma aw ban’en nga laniyan’ e ba t’uf ni nge nang ni aram ban’en u rarogon nde fel’ nib t’uf ni nge thilyeg. Ba t’uf ni nge rin’ e re n’ey ya nge yag ni gapas laniyan’ miki fel’ thilrad pi walagen.

8. Mang lem e immoy ko girdi’ u nap’an Jesus ni ki af ngak pi gachalpen?

⁸ Mang fan ni weliy Jesus murung’agen fa “nochi tir”? Bay ba deer ni ke fith pi gachalpen ni ke lungurad: “Mini’ e en nth’abi tolang ko gagiyeg nu tharmiy?” (Matt. 18:1) Boor e Jew e ngiyal’ nem ni yad baadag ni nge lemnag e girdi’ nib ga’ farad. I yog be’ nib llowan’ ni gaar: “N’en nrib ga’ fan u wan’rad e nge tay e girdi’ farad me gilbuguwrad.”

9. Mang e thingari rin’ pi gachalpen Jesus?

⁹ Manang Jesus ni boor e Jew ni yad ma guy rogon ni nge m’ug ni ka yad ba fel’ ko tin ka bay e girdi’. Ere thingari guy pi gachalpen rogon  ni ngar chuweged e biney e lem rorad. I gaar ngorad: “En ni ir e th’abi tolang u fithik’med e thingari par ni bod rogon e en nth’abi bitir u fithik’med, ma cha’ ni ir e ngi i yog e thin romed e thingari par ni bod rogon e en ntapigpig.” (Luke 22:26) Faanra ‘dab ud fineyed ni kab sorodad ngak e tin ni ka bay e girdi’,’ ma aram e gad be ngongol ni bod rogon e “en nth’abi bitir” u fithik’dad. (Fil. 2:3) Faanra ud guyed rogon ni ngaud lemgad ni aray rogon, ma aram e dab da magawonnaged laniyan’ boch e girdi’.

10. Mang e fonow ni pi’ Paul nsusun e ngad folgad riy?

¹⁰ Gubin pi walagdad nra bagayad ma bay ban’en ni yad ba salap riy ngodad. Ra mom ni ngad lemnaged e re n’ey ni faanra ud sapgad nga fel’ngirad. Susun e ngad folgad ko fare fonow ni pi’ apostal Paul ngak piyu Korinth ni faani gaar: “Mini’ e cha’ ni ke ta’med ni gimed ba tolang ngak e tin ni ka ba’ e girdi’? Gathi urngin ban’en ni ba’ romed me Got e ke pi’? Ere ra diin mi gimed yog ni gimed e soromed ni gowa tin ni ba’ romed ban’en e gathi ni pi’ ngomed nib tow’ath?” (1 Kor. 4:7) Ere susun e dab ud rin’ed boch ban’en ni ngad m’uggad riy ara ngaud lemnaged ni gad ba fel’ ko tin ka bay e girdi’. Faanra bay reb e walag ni pumoon nib fel’ e welthin ni ma pi’ ara reb e walag nib pin nib salap i tababnag e fol Bible ko girdi’, ma susun e ngar guyew rogon ni Jehovah e ngan pining e sorok ngak ko tin be yag ni ngar rin’ew.

11. Mang e gad be fil ko fare fanathin rok Jesus ni murung’agen fare pilung nge fare tapigpig rok?

¹¹ Tomuren ni yog Jesus ngak pi gachalpen ndab ra magawonnaged laniyan’ boch e girdi’, me weliy ba fanathin ni murung’agen ba pilung nge ba tapigpig rok. I n’ag fare pilung fan e malfith rok fare tapigpig u wan’ ya dabiyog ni nge sulweg. Boch nga tomuren ma de m’agan’ fare tapigpig ngay ni nge n’ag fan u wan’ e malfith rorow yugu reb e tapigpig nib achig ko malfith rorow fare masta. Tomur riy me yon’ fare pilung fare tapigpig nga kalbus. Ere mang e gad be fil riy? I gaar Jesus: “Ereram rogon e n’en nra rin’ e Chitamag nu tharmiy ngomed ni faanra dabi bigimed me n’ag fan u wan’ e n’en nib kireb ni ke rin’ reb i walagen ngak.”​—Matt. 18:21-35.

12. Uw rogon nrayog ni ngad gafgownaged boch e girdi’ ni faanra dubdad ni ngad n’aged fan e kireb?

¹² N’en ni rin’ fare tapigpig e gathi yigoo ir e yib wenegan ngak, ya ki yib wenegan ngak yugu boch e girdi’. Som’on e de runguy fare tapigpig ni yow “me yog ni ngan kol nga nin’ nga kalbus nge yan i mada’ ko ngiyal’ nra thang e malfith rok riy.” Bin migid e “faani guy e tin ni ka bay e tapigpig e n’en ni ke rin’ faanem, me ri taganan’rad.” Ere ku arrogon e n’en gad ma rin’ nrayog ni nge magawonnag boch e girdi’. Mang e rayog ni nge buch ni faanra ke rin’ be’ ban’en nib kireb ngodad, ma dubdad ni ngad n’aged fan? Som’on e gad ra gafgownag facha’ ni bochan e gad be siyeg ni ngad n’aged fan e kireb rok, ma darud nonad ngak, maku darud daged e t’ufeg ngak. Bin migid e ra magagawon e girdi’ u lan e ulung u nap’an ni yad ra guy ni bay e magawon u thildad facha’.

13. Mang e kam fil ko n’en ni buch rok reb e pioneer?

¹³ Nap’an ni gad ra n’ag fan e kireb ni ke rin’ pi walagdad, ma ra baud lanin’dad, miki baud laniyan’ yugu boch e girdi’. Aram e n’en ni buch rok reb e pioneer ni ka nog Crystal ngak. Bay reb e walag nib pin u lan e ulung ni rin’ ban’en ni kirebnag laniyan’. I gaar Crystal: “Yu ngiyal’ e ra non ngog mab kireb e thin ni ma yog nra gu lemnag ma bod ni yibe th’eth’ab dowag ko yar. Ma yira yan ko machib ma dabug ni nggu warow u taab karrow. Ere mulan’ug ni kug dabuy ni nggu un ko machib.” I lemnag Crystal ni bay tapgin ni nge damumuw. Machane de par nib damumuw ko fare walag ara par ni yigoo ir e be lemnag ir. Ya sobut’nag laniyan’ nge fol ko fonow u Bible ni bay ko fare article ni kenggin e “Mu  N’ag Fan U Wan’um E Kireb Ni Ke Rin’ Be’ Ngom” ni bay ko Fare Wulyang Ntagil’ E Damit ko May 1, 2000. Ere n’ag fan u wan’ e kireb ni ke rin’ fare walag. I gaar Crystal: “Kug nang ni gad gubin ni gad be guy rogon ni ngad thilyeged boch ban’en u rarogodad, mab m’agan’ Jehovah ngay ni nge n’ag fan e kireb rodad ni gubin e rran. Ke baud lanin’ug ma kug felfelan’ bayay.”

14. Mang e magawon nrayog ni immoy rok apostal Peter, ma mang e ga be fil ko n’en ni yog Jesus ngak nrogon ni bay ko Matthew 18:21, 22?

¹⁴ Gad manang nsusun e ngaud n’aged fan e kireb, ya aram e n’en nib fel’ ni ngad rin’ed. Machane rayog nib mo’maw’ ni ngad rin’ed e re n’ey. Rayog ni boor yay ni i lem apostal Peter ni aray rogon. (Mu beeg e Matthew 18:21, 22.) Ere mang e rayog ni nge ayuwegdad? Som’on e ngam fal’eg i lemnag urngin yay ni ke n’ag Jehovah fan e kireb rom. (Matt. 18:32, 33) Dariy rogon ni nge n’ag Jehovah fan e kireb rodad, machane ma rin’. (Ps. 103:8-10) Maku reb e, “susun e nge bagadad me t’uf rok bagadad.” Ere dabiyog ni ngad dugliyed ko ngad n’aged fan e kireb ni kan rin’ ngodad fa danga’, ya ban’en nthingar da rin’ed. Ba milfan ngodad ni ngad n’aged fan e kireb rok pi walagdad. (1 John 4:11) Bin migid e ngam fal’eg i lemnag angin nra yib riy ni faan gad ra n’ag fan e kireb. Rayog ni ngad ayuweged e en ke rin’ e kireb ngodad, ma gad yibnag e taareban’ nga lan e ulung, ma gad ayuweg e tha’ u thildad Jehovah, me baud lanin’dad. (2 Kor. 2:7; Kol. 3:14) Bin tomur e ngam meybil ko En be yog ngodad ni ngaud n’aged fan e kireb. Dab mu pag Satan ni nge kirebnag e tha’ u thilmed e pi walag. (Efe. 4:26, 27) Faanra nge par e gapas u lan e ulung, mab t’uf ni nge ayuwegdad Jehovah.

15. Mang e rayog ni ngad rin’ed ni faanra ke rin’ reb e walag ban’en ni ke kirebnag lanin’dad nrogon nib puluw ko Kolose 3:13?

¹⁵ Uw rogon ni faanra ke rin’ reb e walag ban’en ni ke kirebnag lanin’um? Mang e susun ni  ngam rin’? Mu guy rogon ni nge par ni bay e gapas u thilmew. Mmeybil ngak Jehovah, mag wenig ngak ni nge ayuweg facha’ ni ke kirebnag lanin’um, miki ayuwegem ni ngam sap ko pi fel’ngin ni ku be guy rok. (Luke 6:28) Faanra dabiyog ni ngam tal i lemnag e n’en ke rin’ walagem ngom, mag lemnag rogon nib fel’ ni ngam non ngak. Kab fel’ ni ngam lemnag ni gathi lem rok fare walag ni nge kirebnag lanin’um. (Matt. 5:23, 24; 1 Kor. 13:7) Nap’an ni ga ra yan mu non ngak, ma ngam lemnag ni ku arrogon ir ni baadag ni nge aw e gapas. Machane uw rogon ni faanra dabun ni nge aw e gapas? Mu ‘n’ag fan u wan’um’ e n’en ni manga ke kirebnag u lanin’um, mu um gum’an’nagem u puluwon walagem. (Mu beeg e Kolose 3:13.) Ma bin th’abi ga’ fan riy e, dab mu par ni gab damumuw ngak ya rayog ni nge kirebnag e tha’ u thilmew Jehovah. Dab mu pag ban’en ni nge magawonnag lanin’um. Faan ga ra rin’ e re n’ey, ma aram e ga be micheg ni kab gel feni t’uf Jehovah rom nga rogon nib t’uf yugu boch ban’en rom.​—Ps. 119:165.

16. Ra bagadad ma mang e ba milfan ngak?

¹⁶ Rib ga’ fan u wan’dad e pigpig ni gad be tay pi walagdad ngak Jehovah u taabang ni gad ‘taab ran’ i saf ma taabe’ e be gafaliydad’! (John 10:16) Be gaar fare ke babyor ni Organized to Do Jehovah’s Will ko page 165: “Faanra nge yib angin e re taareban’ ney ngom, ma ngkum rin’ e n’en nib milfan ngom ya nge yag ni par ni bay e taareban’.” Ere ba t’uf ni “ngad lemnaged pi walagdad ni bod rogon ni ma lemnagrad Jehovah.” Gad gubin ni gad bod nochi tir nib ga’ fadad u wan’ Jehovah. Ere aram rogon ni ga ma lemnag pi walagem, fa? Ma guy Jehovah urngin ban’en ni ga ma rin’ ni ngam ayuweg pi walagem, mab ga’ fan u wan’.​—Matt. 10:42.

17. Mang e kad dugliyed ni ngad rin’ed?

¹⁷ Ba t’uf pi walagdad rodad. Ere kad ‘turguyed ni nge dab da rin’ed ban’en nra waliy be’ ni walagdad nge tun ay ara mul nga fithik’ e denen.’ (Rom. 14:13) Darud lemnaged ni ka gad ba fel’ ngak pi walagdad, ma gad baadag ni ngaud n’aged fan e kireb rorad. Manga yugu dab da paged be’ ni nge magawonnag lanin’dad, ya ngad “nameged e pi n’en ni ma fek e gapas i yib, nge pi n’en ni ma gelnagdad.”​—Rom. 14:19.