1. Mang fan ni bay yu ngiyal’ nrayog ni nga i kireban’ e pi tapigpig rok Jehovah?

YOOREN i gadad e ma kireban’ yu ngiyal’ ni bochan e yigoo ir. Bay boch e girdi’ nra munmun me chuw e biney e kireban’ rorad. Ma boch e rayog ni nge par nib n’uw nap’an. Rayog ni ngaud lemgad ni aray rogon ni yugu aram rogon ni gad bay u fithik’ e girdi’ ni boor. Ku bay boch e walag ni yad ra yan nga reb e ulung nib beech mab mo’maw’ rogon ni nge yag boch e fager ngorad. Ma boch e walag e boor ban’en ni yad ma rin’ chon e tabinaw rorad u taabang. Ere nap’an ni yad ra yan ra pared nga bang nib palog ko tabinaw rorad, ma ma kireban’rad ni yigoo yad. Ma boch e ma kireban’rad ya ke yim’ be’ nib t’uf rorad, ma dabkiyog ni ngar rin’ed boch ban’en u taabang. Ku bay boch e walag nib ga’ ni piin ka fin ra bad ko tin riyul’ ni yad ma lemnag ndariy be’ ni be lemnagrad u nap’an nra togopuluw chon e tabinaw nge pi fager rorad ngorad ndar nanged e tin riyul’.

2. Mang deer e gad ra weliy e fulweg riy?

² Manang Jehovah gubin ban’en u rarogodad. Ere nap’an nra kireban’dad ni bochan e yigoo gadad, ma manang rogon e lem rodad, ma baadag ni nge ayuwegdad. Uw rogon ni ma ayuwegdad Jehovah? Ma uw rogon ni ngad ayuweged gadad? Uw rogon ni ngad ayuweged e pi walag u lan e ulung ni ma kireban’rad ya yigoo yad? Ngad weliyed e fulweg ko pi deer ney.

3. Uw rogon ni dag Jehovah ni be lemnag Elijah?

³ Baadag Jehovah ni nga i par e pi tapigpig rok ni yad ba felfelan’. Bay nib chugur ngodad, ma manang e ngiyal’ ni ke kireban’dad ara ke mulan’dad. (Ps. 145:18, 19) Am lemnag rogon nri i lemnag Jehovah Elijah ni profet rok. Immoy e re moon ney u ba ngiyal’ nrib mo’maw’ e par u Israel. Rib gel e gafgow  ni un tay ko pi tapigpig rok Jehovah, ma Elijah e ri baadag e pi toogor rok Got nib gel lungurad ni ngar thanged e fan rok. (1 Ki. 19:1, 2) Maku reb e, rayog nri ki mulan’ Elijah ni bochan e be lemnag ni yigoo ir e profet ni ka bay ni be pigpig ngak Jehovah. (1 Ki. 19:10) Ere ka chingiyal’ nem me rin’ Got ban’en ni nge ayuweg. I l’og ba engel ni nge pi’ e pagan’ nga laniyan’ ni gathi yigoo ir e be pigpig ngak Jehovah e ngiyal’ nem, ya ka bay boor e girdi’ nu Israel ni yad be pigpig ngak u fithik’ e yul’yul’!​—1 Ki. 19:5, 18.

4. Uw rogon ni be tamilangnag e Mark 10:29, 30 rogon nri ma lemnag Jehovah e piin ndakir ayuwegrad chon e tabinaw rorad ara pi fager rorad?

⁴ Manang Jehovah ni bay boch i gadad nthingari pag fan boor ban’en ya nge yag ni pigpig ngak. Re n’ey e rayog nib muun ngay e ayuw ni i pi’ chon e tabinaw nge pi fager rodad ngodad ndarur pigpiggad ngak Jehovah. Immoy ba ngiyal’ ni fith apostal Peter ba deer ngak Jesus nsana bochan e be magafan’. I gaar: ‘Kug paged gubin ban’en kug uned ngom. Ere mang e bay yog ngomad?’ (Matt. 19:27) I yog Jesus ngak pi gachalpen ni pi walag u lan e ulung e yad ra bod ba tabinaw ngorad. (Mu beeg e Mark 10:29, 30.) Ma ke micheg Jehovah ni Chitamangidad ni bay u tharmiy nra ayuweg e piin yad baadag ni ngar pigpiggad ngak. (Ps. 9:10) Baaray boch ban’en nrayog ni ngam rin’ ya nge yag ni ayuwegem Jehovah ni nge dabki kireban’um ni bochan e ga be lemnag ni yigoo gur.

5. Mang fan nib fel’ ni ngaum lemnag rogon ni be ayuwegem Jehovah?

⁵ Mu lemnag rogon ni be ayuwegem Jehovah. (Ps. 55:22) Re n’ey e ra ayuwegem ni ngam nang ni gathi yigoo gur ni ga bay. Carol * nreb e walag nib pin nib muchugbil ma der un girdien e tabinaw rok ko tin riyul’ e gaar: “Gu ra lemnag rogon ni ke ayuwegeg Jehovah u fithik’ e pi magawon rog, ma ma ayuwegeg ni nggu nang ni gathi yigoo gag ni gu bay. Ku be micheg ngog ni gubin ngiyal’ nra i ayuwegeg Jehovah.”

6. Uw rogon nrayog ni nge pi’ e 1 Peter 5:9, 10 e athamgil nga laniyan’ e piin be kireban’rad ya yad be lemnag ni yigoo yad?

⁶ Mu lemnag rogon ni be ayuweg Jehovah e pi  walag ni be kireban’rad ya yad be lemnag ni yigoo yad. (Mu beeg e 1 Peter 5:9, 10.) Hiroshi nreb e walag ni pumoon ni ke yoor e duw ni kemus ni goo ir e Pi Mich u lan e tabinaw rok e yog ni gaar: “Ba mom ni ngan guy ni gubin e girdi’ u lan e ulung nra be’ ma bay e magawon rok. Gad manang ni gad gubin nra bagadad ma be athamgil u rogon nrayog rok ni nge pigpig ngak Jehovah. Ere re n’ey e rayog ni nge pi’ e athamgil nga laniyan’ e piin ndariy be’ u lan e tabinaw rok ni be un ko tin riyul’.”

7. Uw rogon ni ma ayuwegem e meybil?

⁷ Um rin’ e pi n’en ga ma rin’ ni fan ko pigpig rom ngak Jehovah. Re n’ey e ba muun ngay ni ngaum weliy gubin ban’en ni bay u lanin’um ngak Jehovah. (1 Pet. 5:7) I gaar Massiel: “Meybil ni ug tay ngak Jehovah e aram reb e ban’en ni ayuwegeg ni nge dabki kireban’ug ni bochan e gu be lemnag ni yigoo gag.” I kireban’ e re walag nib pin ney, ya nap’an ni dugliy ni nge pigpig ngak Jehovah ma dariy be’ u lan e tabinaw rok ni ku be pigpig ngak Jehovah. Ki gaar: “Ke mang reb e Matam ngog ni boor yay ni gu ma meybil ngak ni gubin e rran ni gu be weliy rogon lanin’ug ngak.”

8. Faan ga ra beeg e Thin rok Got ma ga be fal’eg i lemnag, ma uw rogon nra ayuwegem?

⁸ Mu beeg e Thin rok Got ni gubin e rran, ma ga be fal’eg i lemnag boch ban’en riy ni be micheg ni gab t’uf rok. Bianca nreb e walag nib pin ni ma yog chon e tabinaw rok boch e thin ngak ni ma muleg laniyan’ e yog ni gaar: “Nap’an nug ra beeg ma gu be fal’eg i lemnag murung’agen boch e girdi’ u Bible nge boch e tapigpig rok Jehovah ni ke yag ni ngar athamgilgad u fithik’ boch e magawon ni bod e magawon rog, ma rib ga’ e ayuw ni ma pi’ ngog.” Bay boch e Kristiano ni kar filed ke mit ngorad boch e thin nu Bible ni ma fal’eg lanin’rad ni bod e Psalm 27:10 nge Isaiah 41:10. Ma boch e yad ma motoyil ko audio recording u nap’an ni yad be fal’eg rogorad ni fan ko muulung ara nap’an ni yad be beeg e Bible rorad. Ma ka rogned nre n’ey e ma warnag e kireban’ rorad.

9. Uw rogon ni ma ayuwegem e muulung ni ga ma un ngay?

⁹ Mu athamgil u rogon nrayog rom ngaum un ko muulung ni gubin ngiyal’. Pi n’en ga ra fil riy e ra pi’ e athamgil nga lanin’um, me chugurnagem ngak e pi walag. (Heb. 10:24, 25) Massiel ni faan kan weliy murung’agen e yog ni gaar: “Yugu aram rogon ni gub tamra’, machane gu dugliy ndab gu pag e muulung ma ngaug pi’ e fulweg. Re n’ey e ayuwegeg ni nggu chugur ko pi walag u lan e ulung.”

10. Mang nib ga’ fan ni ngad m’ag fagergad ko pi Kristiano ni yad ba yul’yul’?

¹⁰ Mm’ag fager ko pi Kristiano ni yad ba yul’yul’. Mu gay boch e fager u lan e ulung nrayog ni ngam fil ban’en rorad, nib muun ngay e piin  nib thil yangarmed ara yalen romed. Be yog e Bible ni bay e gonop rok e “piin ke ilal.” (Job 12:12, BT) Piin yad ba ilal boch e boor ban’en nrayog ni ngar filed rok e piin yad bbitir ngorad. Ba gel e bitir rok David ngak Jonathan, machane de talegrow e re n’ey ndab ra mangew fager. (1 Sam. 18:1) Ur ayuwegew yow ni ngar pigpiggow ngak Jehovah ni yugu aram rogon ni yow be mada’nag boch e magawon nib ga’. (1 Sam. 23:16-18) Irina nreb e walag nib pin ni yigoo ir u lan e tabinaw rok e ir reb e Pi Mich e yog ni gaar: “Pi walag u lan e ulung e rayog ni ngar manged chon e tabinaw rodad. Rayog ni nge fanayrad Jehovah ni ngar pied e tin nib t’uf rodad.”

11. Mang e thingar mu rin’ me yag boch e fager ngom nib chugur e tha’ u thilmed?

¹¹ Faanra gur be’ ni gab tamra’, ma sana ba mo’maw’ ni ngam pirieg boch e fager nib beech. Ratna nreb e walag nib pin nib tamra’ e yag ni nge un ko tin riyul’ ni yugu aram rogon ni un togopuluw ngak. I gaar, “Gu nang nib t’uf ni nge ayuwegeg e pi walag u lan e ulung.” Rayog nib mo’maw’ ni ngam weliy lanin’um ngak be’, machane nap’an ni ga ra rin’ ma ra chugur e tha’ u thilmew. Baadag e pi fager rom ni ngar pied e athamgil nga lanin’um mi yad ayuwegem, machane ba t’uf ni nga mog ngorad rogon ni ngar rin’ed e re n’ey.

12. Uw rogon nra ayuwegdad e machib ni gad ma un ngay ni ngad pirieged boch e fager nib manigil?

¹² Reb e kanawo’ nib manigil nrayog ni nge yag boch e fager riy ngodad e aram e ngaud machibgad yugu boch e walag u taabang. Carol ni faan kan weliy murung’agen e yog ni gaar: “Boor e fager nib manigil ni ke yag ngog ni bochan e gu ma chag ko pi walag u nap’an e machib, maku gamad ma rin’ boch ban’en u taabang ni fan ko pigpig romad ngak Jehovah. Ke ayuwegeg Jehovah u daken e pi fager ney u lan e pi duw ni ke yan.” Faanra ud m’ag fagergad ko pi walag u lan e ulung, ma gubin ngiyal’ nra i yib fel’ngin ngodad. Ya ra fanayrad Jehovah ni ngar pied e athamgil ngodad u nap’an ni ke mulan’dad ni bod rogon e ngiyal’ ni ke kireban’dad ya yigoo gadad.​—Prov. 17:17.

13. Mang e ba milfan ngak urngin e girdi’ u lan e ulung?

¹³ Gubin e girdi’ u lan e ulung nib milfan ngorad ni ngar ted e ulung ni bay e gapas nge t’ufeg riy, ya nge yag ni ngaud pared ma dariy be’ ni be kireban’ ni bochan e be lemnag ndariy be’ ni be lemnag. (John 13:35) Rayog ni ngad pied e athamgil nga laniyan’ yugu boch e girdi’ u daken e thin nge ngongol rodad! I yog reb e walag nib pin ni gaar: “Nap’an nug fil e tin riyul’, ma pi walag u lan e ulung e ra manged chon e tabinaw rog. Faan gomanga dar ayuweged gag, ma dabiyog ni nggu mang reb e Pi Mich Rok Jehovah.” Ere uw rogon ni ngam ayuweg e piin ndariy be’ u lan e tabinaw rorad ni be un ko tin riyul’ ni ngar nanged ni yad bang ko ulung?

14. Uw rogon ni ngam m’ag fager ngak e piin ka yad bbeech?

¹⁴ Mm’ag fager ngak e piin ka yad bbeech. Rogon ni ngad rin’ed e re n’ey e aram e ngad daged e t’ufeg ko piin ka yad bbeech ko ulung. (Rom. 15:7) Machane gathi kemus ni nga darod da pininged e magar ngorad, ya gad baadag ni ngad guyed rogon ni ngad manged fager rorad. Mu dag e sumunguy ngorad, mag guy rogon ni ngar nanged nriyul’ ni ga be lemnagrad. Mu guy rogon ni ngam nang e magawon rorad, machane dab mu fith boch e deer nra k’aring e tamra’ ngorad. Sana bay boch e girdi’ nib mo’maw’ ni ngaur weliyed lanin’rad, ere mu guy rogon ndab mu towasariyrad ni nga rogned boch ban’en ngom. Mu gonopiy rogon e deer ni ga be fith ngorad ya nge yag  nim nang e n’en bay u lanin’rad, mag gum’an’nagem ngam motoyil ko fulweg rorad. Bod nrayog ni ngam fith ngorad ko uw rogon ni kar nanged e tin riyul’.

15. Uw rogon nrayog ni nge ayuweg e pi walag ni kar ilalgad ko tirok Got ban’en e girdi’ u lan e ulung?

¹⁵ Ba ga’ ni piin piilal nge pi walag ni kar ilalgad ko tirok Got ban’en e faanra ur daged ni yad be lemnag e girdi’ u lan e ulung, ma aram e rayog ni nge gel e michan’ rok urngin e girdi’ u lan e ulung. Melissa ni chitiningin e ir e fil e tin riyul’ ngak e yog ni gaar: “Gu be pining e magar ko pi walag ni pumoon ni kar manged matam ngog, ya yad ma tay e tayim ni fan ngog maku yad ma dag ngog nib ga’ fag u wan’rad. Ra t’uf be’ ni nggu weliy lanin’ug ngak, ma yad bay ni ngar motoyilgad ngog.” Mauricio nreb e walag ni kab pagel e kireban’ u nap’an ni chuw e en ma fil e Bible ngak ko tin riyul’. I gaar: “I dag e piin piilal ni yad be lemnageg, ma rib ga’ e ayuw ni pi’ e re n’ey ngog. Gubin ngiyal’ ni yad ma non ngog, ma gamad ma machib u taabang, ma yad ma weliy ngog boch ban’en ni kar filed u Bible, ma gamad ma rin’ boch ban’en u taabang ni nge yibnag e felfelan’ ngomad.” Chiney e ma pigpig Melissa nge Mauricio ngak Jehovah u polo’ e tayim rorow.

16-17. Mang boch e kanawo’ nrayog ni ngad ayuweged boch e girdi’ riy?

¹⁶ Mu rin’ boch ban’en ni ngam ayuweg be’. (Gal. 6:10) Leo ni ma missionary u reb e nam nib palog ko gin ma par chon e tabinaw rok riy e yog ni gaar: “Ra rin’ be’ bochi ban’en nib achig ni fan ngom ko ngiyal’ nib puluw ni nge rin’ riy, ma rib ga’ angin nra yib ngom. Keb ngan’ug borran nug accident u karrow, ma nap’an nug taw nga tabinaw ma rug be mochuch nib gel. Machane bay ba wu’ i mabgol nra piningew gag nga tabinaw rorow ko abich. Dakir yib ngan’ug e n’en nug wed e rofen nem, machane ka be yib ngan’ug nra motoyilgow ngog. Tomur riy ma aram me fel’ boch e tafinay rog!”

¹⁷ Gad ma felfelan’ u nap’an ni gad ra un ko pi assembly nge convention ni gad ma tay, ya aram e ngiyal’ nrayog ni ngad chaggad e pi walag u taabang, ma gad weliy murung’agen e pi welthin ni kad rung’aged. Machane Carol ni faan kan weliy murung’agen e yog ni gaar, “Ma kireban’ug u nap’an nra gu un ko pi assembly  nge convention.” Mang fan? I gaar: “Yugu aram rogon ni boor e walag u toobeg, machane ra bagayad ma bay ko gin bay chon e tabinaw rok riy. Nap’an nug ra guyrad, ma ri ma kireban’ug ni bochan e yigoo gag.” Bay boch e walag nib mo’maw’ ni ngar uned ko convention ara assembly u tomuren ni ka fini yim’ e en mabgol rorad. Ga manang be’ ni aray rogon e magawon rok, fa? Faanra ga manang, me ere mu pining ni nge un ngomed chon e tabinaw rom ko bin migid e convention ara assembly.

18. Uw rogon nrayog ni ngad folgad ko fare thin ko 2 Korinth 6:11-13 u nap’an ni gad be pining e girdi’ nga tabinaw rodad?

¹⁸ Mu rin’ed boch ban’en u taabang. Mu chag ko pi walag nib thilthil, nib ga’ ni piin yigoo yad. Ireray e piin gad baadag ni ngad daged rogon lanin’dad ngorad. (Mu beeg e 2 Korinth 6:11-13.) Melissa ni faan kan weliy murung’agen e yog ni gaar: “Gamow ma felfelan’ u nap’an nra piningmow boch e walag nga tabinaw rorad ni nggu rin’ed boch ban’en u taabang, ara nggu warod ko milekag u taabang.” Bay be’ u lan e ulung rom nrayog ni ngam rin’ e re n’ey ngak, fa?

19. Mingiyal’ e rayog nib t’uf ni ngad chaggad boch e walag u taabang?

¹⁹ Bay yu ngiyal’ nra felfelan’ e pi walag ni faan gad ra chag ngorad. Bay boch i yad nib mo’maw’ ngorad ni ngar pared u fithik’ chon e tabinaw rorad ni gathi yad boch e Pi Mich Rok Jehovah u nap’an ni yad be madnomnag boch e madnom ko fayleng. Ma boch i yad e rib gel e kireban’ ni yad ma tay u nap’an nra taw ko rofen ni yim’ be’ nib t’uf rorad. Nap’an ni gad ra chag e pi walag ney u taabang, ma aram e gad be dag “nri” gad be lemnagrad.​—Fil. 2:20.

20. Uw rogon nra ayuwegdad fapi thin ni yog Jesus ni bay ko Matthew 12:48-50 u nap’an ni be kireban’dad ya yigoo gadad?

²⁰ Boor fan nrayog ni nga i kireban’ boch e Kristiano ngaur lemnaged ni yigoo yad. Machane dab da paged talin ni manang Jehovah rogon lanin’dad. Ba ga’ ni ma fanay pi walagdad ni ngar pied e tin nib t’uf rodad. (Mu beeg e Matthew 12:48-50.) Ere faanra ud athamgilgad u rogon nrayog rodad ni ngad ayuweged pi walagdad, ma aram e gad be dag ngak Jehovah nib ga’ fan e ulung rok u wan’dad. Sana rayog ni nga i kireban’dad yu ngiyal’, machane dab da lemnaged ni yigoo gadad, ya gubin ngiyal’ ni bay Jehovah rodad!