1. Mang e nog ngak ba ulung i girdi’ ko bin som’on e chibog ni ngar rin’ed?

KE MUULUNG boor e pumoon nge ppin nga Jerusalem nib thilthil e nam nge thin rorad. Bay ban’en ni buch e rofen nem nrin ngat ngay. Bay boch e Jew nra tababgad ni ngar nonad ni thin ko nam ko pi girdi’ nem ni kar bad ngaram! Yugu aram rogon ni gin e pi girdi’ nem ko re n’ey, machane ri kur gingad ko n’en be yog e pi Jew nem ngorad nge n’en ni yog apostal Peter ko girdi’ u rom. Ra filed nra yag e yafos ngorad ni faan yad ra dag nib mich Jesus Kristus u wan’rad. Ri taw e re thin nem nga gum’ircha’rad, ma aram mar fithed ni lungurad: “Mang e nggu rin’ed?” Me gaar Peter ngorad: “Nge bigimed . . . min taufenag.”​—Acts 2:37, 38.

2. Mang e gad ra weliy ko re article ney? (Mu guy e sasing ni bay u wuru’ e re ke babyor ney.)

² Ri kun ngat ko n’en ni buch ni migid. Sogonap’an 3,000 e girdi’ nni taufenagrad e rofen nem ni kar manged boch i gachalpen Kristus. Aram e ngiyal’ ni tabab fare maruwel ni tay Jesus chilen ni aram e ngan pingeg e girdi’ ngar manged boch i gachalpen. Ka be rin’ pi gachalpen e re maruwel ney e ngiyal’ ney. Ngiyal’ ney e dabiyog ni ngad machibnaged be’ u lan in e awa, ma aram me bung rogon ni nge un ko taufe. Rayog ni nge yan in e pul, ara reb e duw, ara ba pag mfini yag ni nge un ko taufe. Boor ban’en nib t’uf ni ngan rin’ ni ngan ayuweg be’ ni nge mang reb i gachalpen Kristus. Faanra ga be fil e Bible ngak be’ e chiney, ma sana ga manang e re n’ey. Re article ney e gad ra weliy riy rogon nrayog ni ngam ayuweg e en ga be fil e Bible ngak ni nge un ko taufe.

3. Mang e be yog e Matthew 28:19, 20 nthingari rin’ be’ ni be fil e Bible ya nge yag ni un ko taufe?

³ U m’on ni nge un be’ ni be fil e Bible ko taufe, ma thingari fol ko n’en be fil. (Mu beeg e Matthew 28:19, 20.) Nap’an nra rin’ be’ ni be fil e Bible e re n’ey, ma ra bod fare moon “nib gonop” ni weliy Jesus murung’agen ko fanathin rok ni fuog e but’ nib toar nge yan i toy e naun rok nga daken e war. (Matt. 7:24, 25; Luke 6:47, 48) Uw rogon ni ngad ayuweged be’ ni be fil e Bible ni nge fol ko n’en be fil? Ngad weliyed dalip ban’en nrayog ni ngad rin’ed.

4. Uw rogon ni ngad ayuweged be’ ni be fil e Bible ni nge ulul ni nge mon’og ya nge yag ni un ko taufe? (Mu guy fare kahol ni kenggin e “ Mu Ayuweg e En Ga Be Fil e Bible Ngak ni Nge Nameg Boch Ban’en Me Rin’.”)

⁴ Mu ayuweg ni nge nameg boch ban’en. Mang fan nsusun e ngam rin’ e re n’ey? Mu susunnag ni ga be milekag u karrow nga bang nib palog. Dabisiy ni ga ra dugliy ni ngam tal u yu yang nib fel’ yaan ni ngam guy boch ban’en. Re n’ey e ra ayuwegem ni nge dabi chalbam ko milekag ni ga be tay nib palog. Ere ku arrogon be’ ni be fil e Bible ni faanra nameg boch ban’en ndabi n’uw nap’an me yag ni nge rin’, ma ra guy nrayog ni nge nameg ni nge un ko taufe. Mu fanay e n’en bay ko fare thin ni kenggin e “N’en Ngam Nameg” ni bay ko fare ke babyor ni Enjoy Life Forever! * ni ngam ayuweg ni nge mon’og. Nap’an ni gimew ra mu’nag reb e guruy, mi gimew weliy rogon nib peth e re n’ey ko n’en ni ka fini fil. Faanra bay yugu reb e ban’en nib thil ni ga be nameg ni nge rin’, mag yoloy nga tan fare thin ni “Yugu Boch Ban’en.” Um fanay e n’en bay ko gali n’ey ni ngam weliyew boch ban’en nrayog ni nge nameg ndabi n’uw nap’an me yag ni nge rin’, nge boch nib n’uw nap’an mfini yag ni nge rin’.

5. Mang e yog Jesus ngak fare moon ni boor ban’en rok ni nge rin’ nrogon ni bay ko Mark 10:17-22, ma mang fan?

 ⁵ Mu ayuweg ni nge thilyeg boch ban’en u rarogon. (Mu beeg e Mark 10:17-22.) Manang Jesus nib mo’maw’ ngak fare moon ni boor ban’en rok ni nge pi’ urngin ban’en ni bay rok ni chuway’. (Mark 10:23) Yugu aram rogon, me yog Jesus ngak ni nge rin’ e re n’ey. Mang fan? Bochan nib t’uf rok Jesus. Yu ngiyal’ e darud pied e athamgil ngak e en gad be fil e Bible ngak ni nge thilyeg ban’en u rarogon ni bochan e gad be lemnag ndawori bung rogon ni nge rin’ e re n’ey. Sana rayog nib n’uw nap’an mfini yag ni nge thilyeg be’ e ngongol rok. (Kol. 3:9, 10) Machane faan gad ra gur ngad weliyed e re n’ey ngak, ma aram e ra papey ni nge thilyeg e tin nib t’uf ni nge thilyeg ko ngongol rok. Ga ra rin’ e re n’ey, ma aram e ga be dag ngak nib t’uf rom.​—Ps. 141:5; Prov. 27:17.

6. Mang fan nsusun e ngaud fithed ngak e en gad be fil e Bible ko uw rogon laniyan’ u boch ban’en?

⁶ Ba ga’ fan ni ngaud fithed ngak e en gad be fil e Bible ko uw rogon laniyan’ u boch ban’en. Re n’ey e ra ayuwegem ni ngam nang e n’en ni ke nang fan ma ke mich u wan’. Ra um rin’ e re n’ey, ma ra mom ni ngam weliyew boch ban’en nsana ba mo’maw’ ni nge m’agan’ ngay. Boor e deer ni aray rogon u lan fare ke babyor ni Enjoy Life Forever! Bod ni guruy ni 04 e bay ba deer riy ni be gaar: “Ga be lemnag ma uw rogon u wan’ Jehovah ni faanra u mog fithingan?” Ma guruy ni 09 e bay ba deer riy ni be gaar: “Mang boch ban’en ni ga baadag ni ngam yibilay murung’agen?” Som’on e sana rayog nib mo’maw’ ni nge pi’ e fulweg ko pi deer ney. Ere rayog ni ngam ayuweg ni nge fal’eg i lemnag e pi thin nu Bible nge sasing ni bay ko re ke babyor ney.

7. Uw rogon ni ngad weliyed e n’en ke buch rok boch e girdi’ u reb e kanawo’ nra yib angin?

⁷ Nap’an nra nang e en ga be fil e Bible ngak e n’en nib t’uf ni nge rin’, mag weliy e n’en ke buch rok boch e girdi’ nrayog ni nge pi’ e athamgil ngak ni nge rin’ e re n’ey. Bod ni faanra be mo’maw’ ngak ni nga i un ko muulung, ma rayog ni ngam dag fare video ngak ni Jehovah Cared for Me ni bay ko guruy ni 14 u tan fare thin ni “Mu Gay Murung’agen.” Boor e guruy ko fare ke babyor ni Enjoy Life Forever! ni ga ra yan ko fa gal thin riy ni “Mu Fal’eg i Gay” nge “Mu Gay Murung’agen,” ma ga ra pirieg murung’agen boch e girdi’ riy ni aray rogon. * Mu guy rogon ndab um taarebrogonnag e en gimew be fil e Bible ngak yugu be’, ni bod ni nge lungum ngak, “Faanra rayog rok me ere ku rayog rom.” Mu pag nge mang ir rok e nang nrayog rok. Ya n’en ngam rin’ e ngam weliy ngak e n’en ni ke ayuweg e en kan weliy murung’agen ko fare video ni nge fol ko n’en be yog e Bible. Sana rayog ni nga mog reb e thin nu Bible ara ban’en ni kan rin’ ni bay ko fare video ni ke yib angin. Ngiyal’ nrayog, mag tamilangnag rogon ni ke ayuweg Jehovah facha’ ko fare video.

8. Uw rogon ni ngam ayuweg e en ga be fil e Bible ngak ni nge t’uf Jehovah rok?

⁸ Mu ayuweg ni nge t’uf Jehovah rok. Ni uw rogon? Mu gay boch e kanawo’ nrayog ni ngam weliy murung’agen pi fel’ngin Jehovah riy. Mu ayuweg ni nge nang ni Jehovah e ir reb e Got nib felfelan’, ma ma ayuweg e piin nib t’uf rorad. (1 Tim. 1:11; Heb. 11:6) Mu dag ngak ni faanra fol ko pi n’en be fil ma ra yib angin ngak. Mu weliy ngak ni angin e pi n’ey nra yib ngak e be dag nib t’uf rok Jehovah. (Isa. 48:17, 18) Ra gel feni t’uf Jehovah rok,  ma aram e ra adag ni nge thilyeg e tin nib t’uf ni nge thilyeg u rarogon.​—1 John 5:3.

9. Mang e ra ayuweg be’ ni nge pag fan boch ban’en ya nge yag ni un ko taufe nrogon nib puluw ko Mark 10:29, 30?

⁹ Ra nge mon’og be’ ni be fil e Bible nge un ko taufe, ma bay boch ban’en nib t’uf ni nge pag fan. Bay boch i yad nib t’uf ni nge pag fan e chugum nge boch ban’en nib ga’ fan u wan’ ni bod fare moon nib pire’ ban’en rok ni faan kan weliy murung’agen. Sana rayog nib t’uf ni ngar thilyeged e maruwel rorad ni faanra bin yad be un ngay e ba togopuluw ko pi kenggin e motochiyel u Bible. Sana boor i yad e ba t’uf ni nge tal ndab ki chag nga boch e fager nde t’uf Jehovah rorad. Ma boch i yad e sana rayog ni nge n’agrad chon e tabinaw rorad ndubrad daken e Pi Mich Rok Jehovah. I yog Jesus nsana bay boch e girdi’ nra mo’maw’ ngorad ni ngar rin’ed e pi n’ey. Machane ki micheg ni piin yad ra mang boch i gachalpen e dab ra kalgadngan’rad. Ya ra tow’athnagrad Jehovah me pi’ boch e girdi’ u lan e ulung rok ni ngar manged chon e tabinaw rorad. (Mu beeg e Mark 10:29, 30.) Ere uw rogon ni ngam ayuweg e en gimew be fil e Bible ni nge yib angin e biney e tow’ath ngak?

10. Mang e kam fil ko n’en ni yog Manuel?

¹⁰ Mm’ag fager ngak. Ba t’uf ni ngam dag ngak nib ga’ fan u wan’um. Mang fan? Mu tay fanam i yan ko n’en ni yog Manuel ni ma par u Mexico. I weliy rogon nni ayuweg u nap’an ni be fil e Bible ni gaar: “U m’on ni nggu tababgow e en ma fil e Bible ngog ko fol Bible, ma ma fith ko ke uw rogog. Ma guy rogon ni nge dab gu magagawon ni nggu weliy boch ban’en ngak. Rayog ni ngguy nib ga’ fag u wan’.”

11. Faanra ud chaggad e en gad be fil e Bible u taabang, ma mang angin nra yib ngak?

¹¹ Mu rin’ew boch ban’en u taabang ni bod ni i rin’ Jesus nge pi gachalpen. (John 3:22) Faanra ga be guy ni be thilyeg boch ban’en u rarogon, ma rayog ni ngam pining nga tabinaw rom ni ngam unumew e coffee, ara mu  abichgow, ara mu yaliyew e broadcast. Sana ra adag ni ngam pining nga tabinaw rom ko ngiyal’ ni yigoo ir ya be madnomnag e pi fager rok nge chon e tabinaw rok reb e madnom ko fayleng. Kazibwe ni ma par u Uganda e yog ni gaar: “Gu be lemnag ni taab urngin e tin ug fil u murung’agen Jehovah u nap’an ni gamow be chag e en i fil e Bible ngog ko tin ug fil u nap’an e fol Bible romow. Ug guy gelngin nri ma t’ufeg Jehovah e girdi’ rok nge rogon feni ri yad ba felfelan’. Ma aram e n’en nug baadag.”

12. Mang fan nsusun e ngad pininged boch e walag nib thilthil ni nge un ko fol Bible ni gad be tay be’?

¹² Mu pining boch e walag nib thilthil ko fol Bible ni gimew ma tay. Yu ngiyal’ e rayog ni ngad lemnaged ni kab mom ni faanra nga darod da guyed e en gad be fil e Bible ngak ni goo gadad ara yugu taabe’ e be un ngodad. Machane kab ga’ e ayuw ni yira pi’ ngak ni faanra un boch e walag nib thilthil ko fol Bible ni gad be tay. Dmitrii ni ma par u Moldova e yog ni gaar: “Gubin e walag ni yad ma un ko fol Bible ni ug tay e ba thilthil rogon ni yad ma weliy boch ban’en. Re n’ey e ma ayuwegeg ni nggu lemnag boch e kanawo’ nib thilthil nrayog ni nggu fol ko tin gu be fil. Bochan ni boor e walag ni kug mada’nag, ma aram me yag ni nge war e tamra’ rog u nap’an e yay nsom’on nug un ko muulung.”

13. Mang fan nthingar da ayuweged e en gad be fil e Bible ngak ni nge un ko muulung?

¹³ Mu ayuweg ni nge un ko muulung. Mang fan? Bochan ni ke tay Jehovah chilen ko pi tapigpig rok ni ngaur muulunggad nga taabang, ya aram bang ko liyor rodad ngak. (Heb. 10:24, 25) Maku reb e, pi walagdad u lan e ulung e yad bod e tabinaw ngodad. Ra gad bay u taabang u nap’an e muulung, ma bod ni gad be abich u taabang. Ere nap’an ni ga ra ayuweg e en ga be fil e Bible ngak ni nge un ko muulung, ma aram e ga be ayuweg ni nge rin’ ban’en nib ga’ fan ya nge yag ni un ko taufe. Machane sana rayog nib mo’maw’ ngak ni nge un ko muulung. Ere uw rogon nra ayuweg fare ke babyor ni Enjoy Life Forever! ni nge gel nga boch e magawon ni be taleg ndabi un ko muulung?

14. Uw rogon ni ngad ayuweged e en gad be fil e Bible ngak ni nge adag ni nge un ko muulung?

¹⁴ Mu fanay e guruy ni 10 ko fare ke babyor ni Enjoy Life Forever! ni ngam ayuweg ni nge adag ni nge un ko muulung. U m’on ni nge m’ay e re ke babyor ney mi nog ngak boch e walag ni ngar filed e re guruy ney ngak e piin yad be fil e Bible ngorad, ma aram ma rogned nrib ga’ angin ma ke ayuwegrad ni ngar uned ko muulung. Machane dab mu son ngam tawgow ko guruy ni 10 mfin mu pining ni nge un ko muulung. Mu rin’ u rogon feni papey nrayog, mu um par ma ga be rin’ e re n’ey. Ba thilthil e magawon ni ma mada’nag e piin gad ma fil e Bible ngak. Mu guy rogon ni ngam nang e n’en nib t’uf rok, mag guy rogon ngam ayuweg. Dabi mulan’um ni faanra ba n’uw nap’an mfini yag ni nge un ko muulung. Mu gum’an’nagem, machane dab mu tal i pining.

15. Mang boch ban’en nrayog ni nge rus e piin yad ma fil e Bible ngay?

¹⁵ Gur um rus ni ngam mang reb e Pi Mich Rok Jehovah, fa? Sana um lemnag ndabiyog ni ngam un ko machib u mit e tabinaw. Fa reb e um rus nri chey me togopuluw chon e tabinaw rom ara pi fager rom ngom. Faanra arrogon me ere rayog ni ngam nang rogon laniyan’ e en ga be fil e Bible ngak. I yog Jesus ni ireray boch ban’en nra i rus e girdi’ ngay. Machane, i yog ngak pi gachalpen ndab ra paged e marus rorad ni nge talegrad ndab ra pigpiggad ngak Jehovah. (Matt. 10:16, 17, 27, 28)  Ere uw rogon ni ayuweg Jesus pi gachalpen ni ngar gelgad ko re n’ey? Ma uw rogon nrayog ni ngam folwok rok?

16. Uw rogon ni ngad ayuweged e en gad be fil e Bible ngak ni nge nang rogon ni nge weliy e michan’ rok?

¹⁶ Mu ayuweg ni nge nang rogon ni nge weliy e michan’ rok. Nap’an ni l’og Jesus pi gachalpen ni nga ranod ko machib, ma rayog ni ur rusgad. Machane i yog ngorad e gin ngar machibgad riy nge n’en ngar machibnaged ya nge ayuwegrad. (Matt. 10:5-7) Ere uw rogon ni ngam folwok rok Jesus? Mu ayuweg e en ga be fil e Bible ngak ni nge nang e ngiyal’ nrayog ni nge machib riy. Rayog ni ngam fith ko bay be’ ni manang nrayog ni nge yib angin reb e machib u Bible ngak fa. Ngemu’ mag dag ngak rogon nib mom nrayog ni nge weliy e pi n’em ngak e cha’nem. Ma faanra ba puluw ni ngam rin’, mag fanay e n’en bay ko fa gal thin ni “Ma Gaar Boch e Girdi’” nge “Rayog ni Nge Gaar Be’” ni bay ko fare ke babyor ni Enjoy Life Forever!, mag fil ngak rogon ni nge fanay e Bible ni nge pi’ e fulweg nib mom ni ngan nang fan u fithik’ e gonop.

17. Uw rogon nrayog ni ngad fanayed e Matthew 10:19, 20, 29-31 ni ngad ayuweged e en gad be fil e Bible ngak ni nge pagan’ ngak Jehovah?

¹⁷ Mu ayuweg ni nge pagan’ ngak Jehovah. I yog Jesus ngak pi gachalpen nra ayuwegrad Jehovah ni bochan e yad ba t’uf rok. (Mu beeg e Matthew 10:19, 20, 29-31.) Ere mu puguran ngak ni ku ra ayuweg Jehovah. Rayog ni ngam ayuweg ni nge taga’ ngak Jehovah ni aram e ngam yibilayew e pi n’en be nameg u taabang. Franciszek ni ma par u Poland e yog ni gaar: “Nap’an nra meybil e en gamow ma fil e Bible, ma ma weliy murung’agen e pi n’en gu be nameg u lan e meybil rok. Ere nap’an nug guy ni ke fulweg Jehovah taban e meybil rok, ma aram mu kug tabab ni ngaug meybil. Rayog ni ngguy ni be ayuwegeg Jehovah u nap’an nra t’uf ni nggu ning e matal rog ko bin baaram e maruwel ni ka fin gu un ngay ya nge yag nug un ko muulung nge convention.”

18. Uw rogon u wan’ Jehovah e maruwel ni be rin’ e piin Kristiano?

¹⁸ Rib t’uf rok Jehovah e piin gad ma fil e Bible ngorad. Manang gelngin e maruwel ni ma tay e piin Kristiano ni ngar ayuweged e girdi’ ni ngar chugurgad ngak, ma yad ba t’uf rok ni bochan e re n’ey. (Isa. 52:7) Faanra dariy be’ ni ga be fil e Bible ngak e chiney, ma ka rayog ni ngam ayuweg e piin yad be fil e Bible ni ngar mon’oggad ngar uned ko taufe ni aram e ngam un ngak boch e walag u nap’an ni nga ranod ra guyed be’ ni ngar filed e Bible ngak.