1. Mang e thingar da rin’ed ya nge yag nda mageygad ni gad ba fos u nap’an fare rran rok Jehovah?

 NAP’AN nra weliy e Bible murung’agen e “Rran rok Somol,” ma be yip’ fan e ngiyal’ nra pufthinnag Jehovah e pi toogor rok me ayuweg e yafos ko girdi’ rok. Kakrom e immoy boch e nam ni gechignagrad Jehovah. (Isa. 13:1, 6; Ezek. 13:5; Zef. 1:8) Ngiyal’ ney ni gad bay riy e ra tabab e “Rran rok Somol” u nap’an ni yira thang fare Babylon nib Gilbuguwan me mus u nap’an fare mahl ni Armageddon. Ra ngad mageygad ni gad ba fos u nap’an e re “Rran” nem, mab t’uf ni ngad fal’eged rogodad e chiney. I yog Jesus ni gathi kemus ni ngad fal’eged rogodad ni fan ko fare “gafgow” nib ga’, ya thingar kud ‘fal’eged rogodad ngad pired.’​—Matt. 24:21; Luke 12:40.

2. Mang fan nrayog ni nge yib angin e thin ni bay ko 1 Thessalonika ngodad?

² U lan e gin som’on e babyor ni yoloy apostal Paul ngak piyu Thessalonika e weliy in e fanathin riy ni nge ayuweg e piin Kristiano ni ngar pared ni kar fal’eged rogorad ni fan ko fare rran ko pufthin rok Jehovah. Manang Paul ndabi yib e rran rok Jehovah ni ka chingiyal’ nem. (2 Thess. 2:1-3) Yugu aram rogon me tay ir ngak pi walagen ni ngar fal’eged rogorad ngar pared ni gowa bin migid e rran nga tomuren e ra yib e re rran nem, maku arrogodad nrayog ni ngad folgad ko fonow rok. Ere chiney e ngad weliyed rogon ni weliy dalip ban’en ni aram e: (1) rogon nra yib e rran rok Jehovah, (2) piin ndab ra mageygad ni yad ba fos u nap’an e re rran nem, nge (3) rogon nrayog ni ngad fal’eged rogodad ya nge yag nda mageygad ni gad ba fos.

3. Uw rogon nra yib e rran rok Jehovah ni bod be’ nib moro’ro’ ni yib nnep’? (Kum guy e sasing.)

³ “Bay taw ni bod be’ nib moro’ro’ ni yib nnep’.” (1 Thess. 5:2) Ireray e bin som’on u dalip e fanathin nni fanay ni nge weliy rogon nra yib e rran rok Jehovah. Moro’ro’ e ba ga’ ni ma rin’ ban’en nib gurgur maku ma yib nnep’ ko ngiyal’ nder lemnag e girdi’ nra yib  riy. Ku arrogon e rran rok Jehovah nra yib nib tomgin ma yooren e girdi’ e yad ra gin ngay. Mus ko tin riyul’ e Kristiano nsana yad ra gin nga feni papey nra buch boch ban’en. Machane dab da uned ko piin nib kireb ko magothgoth.

4. Uw rogon ni fare rran rok Jehovah e bod e amith ni ma yib ngak be’ ni ppin ni be n’en ni nge gargel?

⁴ “Bod e amith ni ma yib ngak be’ ni ppin ni be n’en ni nge gargel.” (1 Thess. 5:3) Be’ nib diyen e dabiyog ni nge nang e ngiyal’ nra yib e amith ngak ni nge gargel. Machane manang nra buch e re n’ey. Ma nap’an nra buch ma dabisiy nib tomgin, mab gel e amith riy, ma dabiyog i taleg. Ku arrogon ndad nanged e re rran nge re awa nra tabab fare rran rok Jehovah riy. Machane ba mich u wan’dad nra yib e re rran nem, mab tomgin nra pufthinnag Got e piin nib kireb ma dabiyog ni ngar thaygad riy.

5. Uw rogon ni fare gafgow nib ga’ e bod nap’an ni be puf e woch?

⁵ Bod nap’an ni be puf e woch. Bin dalip e fanathin ni weliy Paul e ku be weliy murung’agen e moro’ro’ ni yib nnep’. Machane yaney e bod ni be taarebrogonnag Paul e rran rok Jehovah nga nap’an ni be puf e woch. (1 Thess. 5:4) Moro’ro’ ni ma yib nnep’ e rayog ni ngar mitgad u boch ban’en ma dab ra nanged ni be yan e tayim. Rayog ni ngar da’da’gad ngay ni ke yib e yal’ nga lang min guyrad. Ere ku arrogon fare gafgow nib ga’ nra gagiyelnag e piin yad be ulul i rin’ e n’en nde m’agan’ Got ngay ni bod e moro’ro’. Machane gadad e rayog ni ngad fal’eged rogodad ni aram e ngad siyeged e pi ngongol nde m’agan’ Jehovah ngay ma gad nameg “urngin mit e fel’, nge mat’aw, nge tin riyul’.” (Efe. 5:8-12) Bin migid e fanay Paul l’agruw e fanathin ni be weliy murung’agen e piin ndab ra mageygad ni yad ba fos.

6. Uw rogon ni yooren e girdi’ e yad bod e girdi’ ni be mol? (1 Thessalonika 5:6, 7)

⁶ Piin yad be “mol.” (Mu beeg e 1 Thessalonika 5:6, 7.) I taarebrogonnag Paul e piin ndab ra  mageygad ni yad ba fos u nap’an e rran rok Jehovah ngak e girdi’ ni yad be mol. Dar nanged e n’en be buch u toobrad ara gin be yan e tayim ngay. Aram fan nnap’an nra buch ban’en nib ga’ fan ma dar nanged maku dariy ban’en nrayog ni ngar rin’ed ngay. Yooren e girdi’ e ngiyal’ ney e yad bod e girdi’ ni be mol. (Rom. 11:8) Der mich u wan’rad e pi n’en be buch ni be dag ni gad be par ko “tin tomur e rran,” ma dabki n’uw nap’an ma bayi yib fare gafgow nib ga’. Nap’an nra buch boch ban’en ni ke thilyeg rogon e par u fayleng, ma ma k’aring e re n’ey boch e girdi’ ni ngar adaged ni ngar motoyilgad ko fare thin ni murung’agen Gil’ilungun Got ni gad be machibnag. Machane boor e girdi’ ni yad ma sul ngaur ngongolgad ni bod e piin yad be mol ko bin ngar pared ni yad ba od. Mus ko piin nib mich u wan’rad ni bay borran ni yira pufthin riy ni yad ma lemnag ni kab palog e re rran nem. (2 Pet. 3:3, 4) Machane gadad e gad manang ni gubin e rran ni be yan ma ri be gel feni ga’ fan ni ngaud pared ni gad ba od.

7. Uw rogon ni piin nra thangrad Got e taareb rogorad ngak e piin kar chingawgad?

⁷ Piin yad ma ‘balyang ko rrum.’ I taarebrogonnag apostal Paul e piin nra thangrad Got ngak e piin kar chingawgad. Piin kar chingawgad e ra buch ban’en u toobrad ma dabiyog ni ngar rin’ed ban’en ngay nib papey, ma dabiyog ni ngar dugliyed ban’en nib fel’ rogon. Ku arrogon e piin nib kireb ndarur motoyilgad ko ginang rok Got. Kar mel’eged reb i kanawoen e yafos nra fekrad i yan ko magothgoth. Machane piin Kristiano e yibe yog ngorad ni ngar pared nib tamilangan’rad. (1 Thess. 5:6) I yog be’ ni boor ban’en u murung’agen e Bible ni manang ni be’ nib tamilangan’ e be par nib gapas, ma der wagagey laniyan’. Rayog ni nge lem nib fel’ rogon ya nge yag ni dugliy e n’en nib fel’ ni nge rin’. Mang fan nib t’uf ni ngad pared ni gad ba gapas ma dabi wagagey lanin’dad? Ya nge dab da uned i guy rogon ni ngad pithiged boch e magawon ko am ara boch e magawon ni be guy e girdi’ rogon ni ngar pithiged. Nap’an ni gad ra chugur i yan ko fare rran rok Jehovah, ma ra gel e mo’maw’ riy ni ngad pared u mathilin e pi ngongol ney. Machane dariy rogon ni nge magafan’dad ko re n’ey, ya rayog ni nge ayuwegdad gelngin Got nib thothup ni ngad pared ni gad ba gapas, ma dabi wagagey lanin’dad, ma gad dugliy e n’en nib fel’ ni ngad rin’ed.​—Luke 12:11, 12.

8. Uw rogon ni ke weliy e 1 Thessalonika 5:8 murung’agen e pi fel’ngin nra ayuwegdad ni ngad pared ni gad ba od mab tamilangan’dad? (Kum guy e sasing.)

⁸ “Thingar don’ed nga dakendad . . . fa gi wasey ni ma upunguy e salthaw ngorongoren ngay, nge . . . uruwach.” I taareb rogonnagdad Paul ngak e salthaw ni yad be tedan’rad ma ka ron’ed talin e cham rorad nga dakenrad. (Mu beeg e 1 Thessalonika 5:8.) Ra nap’an ni yibe mahl ma thingari par reb e salthaw ni ke fal’eg rogon ndemtrug e ngiyal’ nrayog ni nge un ko cham. Ere ku arrogodad ni gad ma par ni kad fal’eged rogodad ni fan ko rran rok Jehovah ni aram e ka don’ed nga dakendad fagi n’en ni ma upunguy e salthaw ngorongoren ngay ni be yip’ fan e michan’ nge t’ufeg rodad, ma kud ted e urwach rodad nga lolugdad ni be yip’ fan e athap rodad. Rra ayuwegdad e pi fel’ngin ney.

9. Uw rogon ni ma ayuwegdad e michan’ rodad?

⁹ Fagi n’en ni ma upunguy e salthaw ngorongoren ngay e ma ayuweg gum’irchaen. Michan’ nge t’ufeg e ma ayuweg lanin’dad. Ma ayuwegdad ni ngaud pigpiggad ngak Got ma gad be lek Jesus. Michan’ rodad e be micheg nga lanin’dad nra tow’athnagdad Jehovah ni bochan e gad be gay u polo’ i gum’ircha’dad. (Heb. 11:6) Aram e n’en nra k’aringdad ni ngad pared ni gad ba yul’yul’ ngak Jesus ni ir e En Ma Yog e Thin rodad ni yugu aram rogon ni gad ra mada’nag e magawon. Rayog ni ngad gelnaged e michan’ rodad ya nge yag nda athamgilgad u fithik’ e pi magawon ni  gad be mada’nag ni faan gad ra fil ban’en rok e pi walag e ngiyal’ ney ni kar pared ni yad ba yul’yul’ ni yugu aram rogon ni yibe gafgownagrad ara yad be magawon ko salpiy. Faan gad ra folwok rok e piin kar momnaged e par rorad ya nge yag nra m’oneged Gil’ilungun Got u lan e yafos rorad, ma aram e rayog ni ngad siyeged chogowen e salpiy nge chugum. b

10. Uw rogon ni ma ayuwegdad e t’ufeg rodad ngak Got nge girdi’ ni ngad athamgilgad?

¹⁰ Ra ngad pared ni gad ba od mab tamilangan’dad, ma kub ga’ fan ni nge yag e t’ufeg ngodad. (Matt. 22:37-39) T’ufeg rodad ngak Got e ma ayuwegdad ni ngad ululgad ko machib ni yugu demtrug e re miti magawon ni gad be mada’nag. (2 Tim. 1:7, 8) Bochan nib t’uf rodad e piin ndarur pigpiggad ngak Jehovah, ma aram fan ni gad be ulul ko machib maku gad be sul ngaud machibgad ko pi binaw ni gad ma machib riy ni kub muun ngay e machib u telefon nge pi babyor ni gad ma yoloy ngaud pied ko girdi’. Gad be athapeg ni nge yan i ba ngiyal’ mar thilyeged e ngongol rorad ngar rin’ed e tin nib fel’.​—Ezek. 18:27, 28.

11. Uw rogon nra ayuwegdad e t’ufeg rodad ngak pi walagdad? (1 Thessalonika 5:11)

¹¹ Kub t’uf pi walagdad rodad. Rogon ni gad ma dag e re t’ufeg ney e aram e ra ‘bagadad ma be pi’ e athamgil nga laniyan’ bagadad, ma ra bagadad ma be ayuweg bagadad.’ (Mu beeg e 1 Thessalonika 5:11.) Ra bagadad ma be pi’ e athamgil nga laniyan’ bagadad ni bod ba ulung i salthaw ni yad bay u taabang ni yad be cham ko toogor rorad. Riyul’ nrayog ni nge maad’ad reb e salthaw ngak yugu reb e salthaw ni yow nga bang u nap’an ni yibe mahl, machane dabi rin’ e re n’ey ni lem rok. Ere ku arrogon ndab da rin’ed ban’en nra kirebnag laniyan’ pi walagdad ni lem rodad ara da sulweged taban e kireb rorad. (1 Thess. 5:13, 15) Ku gad ma dag ni bay e t’ufeg rodad ni aram e gad ma tayfan e pi walag ni pumoon ni yad ma yog e thin u lan e ulung. (1 Thess. 5:12) Nap’an ni yoloy Paul e gi babyor ney ko fare ulung nu Thessalonika, ma dawori gaman reb e duw ni ke sum e re ulung ney. Piin piilal ko re ulung ney e dabisiy ni boor ban’en ndawor ra nanged rogon ni ngar rin’ed maku rayog ni ur olobochgad. Yugu aram rogon ma bay rogon ni ngan tay farad. Nap’an nra chugur ni nge tabab fare  gafgow nib ga’, ma rayog nib t’uf ni nge gel boch e taga’ ni ngad ted ko piin piilal ni nga rogned e n’en ngad rin’ed ni ke thil nga rogon ni gad be rin’ e chiney. Ku rayog ni nge taw ko ngiyal’ nem ma dabkiyog ni ngad nonad ko tochuch nge branch ofis rodad. Ere chiney e ireray e ngiyal’ nib ga’ fan ni ngad filed rogon ni ngaud t’ufeged ma gad be tayfan e piin piilal rodad. Demtrug e n’en nra buch ma ngad pared nib tamilangan’dad, ma dab ud pared ni gad be sap ko pi meewar rorad, ya ngad tedan’dad nga rogon ni be pow’iyrad Jehovah u daken Kristus.

12. Uw rogon ni ma ayuweg e athap rodad lanin’dad?

¹² Athap rodad e ma ayuweg lanin’dad ni bod e urwach ni ma ayuweg lolugen reb e salthaw. Bochan nib mudugil e athap rodad, ma aram fan ni gad manang ndariy gam’engin e pi n’en be ognag e re fayleng ney. (Fil. 3:8) Athap rodad e ma ayuwegdad ni ngad pared ni gad ba gapas ma dabi wagagey lanin’dad. Ireray e n’en ni guy Wallace nge Laurinda ni yow ma pigpig u Africa. Bagayow e yim’ e chitiningin ma bagayow e yim’ e chitamangin nde gaman dalip e wik nga thilin. Bochan fare m’ar ni COVID-19, ma aram e dabiyog ni nga ranow nga taferow ni ngar guyew chon e tabinaw rorow. I yoloy Wallace ni gaar: “Fare athap ko fos ko yam’ e ma ayuwegeg ni nggu lemnag rarogorow u lan e bin nib beech e fayleng ko bin ni nggu lemnag rarogorow u m’on ni ngar m’ow. Re athap ney e ma gapaseg lanin’ug u nap’an nra kireban’ug.”

13. Mang e rayog ni ngad rin’ed ya nge yag gelngin Got nib thothup ngodad?

¹³ “Dab mmagawonniged e maruwel ni be tay fare Kan ni Thothup [“gelngin Got nib thothup,” NW].” (1 Thess. 5:19) I yog Paul ni be maruwel gelngin Got nib thothup u fithik’dad. Ere faanra dab da magawonnaged rogon e maruwel ni be tay, ma aram e ra pasigan’dad ni ngad rin’ed e tin nib fel’, miki yib gelngidad ni ngad maruwelgad ni fan ngak Jehovah. (Rom. 12:11) Ere mang e rayog ni ngad rin’ed ya nge yag gelngin Got nib thothup ngodad? Rayog ni ngad yibilayed e re gelngin ney, ma gad fil e Thin rok Got, ma gad chag ko ulung rok ni be pow’iy gelngin nib thothup. Faan gad ra rin’ e re n’ey, ma aram e ra i m’ug “wom’engin gelngin Got nib thothup” rodad.​—Gal. 5:22, 23, NW.

14. Faanra nga i yag gelngin Got nib thothup ngodad, ma mang e thingar dab da rin’ed? (Kum guy e sasing.)

 ¹⁴ Tomuren ni ke pi’ Got gelngin nib thothup ngodad, ma thingar da kol ayuwgad ‘ndab da magawonniged e maruwel ni be tay.’ Ma pi’ Got gelngin nib thothup ngak e piin nib beech e lem nge ngongol rorad. Dabi ulul ni nge pi’ gelngin nib thothup ngodad ni faanra ka gad be ulul ni ngaud lemnaged boch e ngongol nib alit maku gad be rin’. (1 Thess. 4:7, 8) Maku reb e faanra nga i yag gelngin Got nib thothup ngodad, ma thingar dab da “darifanniged e thin ni be yog e Kan ni Thothup [“gelngin Got nib thothup,” NW] u l’ugun be’.” (1 Thess. 5:20) “Thin ni be yog” gelngin Got nib thothup u l’ugun be’ e be yip’ fan e thin ni be yog Jehovah ngodad u daken gelngin nib thothup nib muun ngay e tin be weliy u murung’agen e rran rok, nge rogon ni kar da chugurgad nga tungun e re m’ag ney. Darud lemnaged ndabi yib e rran rok Jehovah ara Armageddon u nap’an ni ka gad ba fos. Ya gad ma dag ni gad manang ni bayi yib e re rran nem ni aram e gad ma fanay e tayim rodad ni gubin e rran ni fan ko pi n’en gad ma rin’ ni be m’ug riy ni kad ‘pied gadad nga pa’ Got,’ maku gad be par nib beech e ngongol rodad.​—2 Pet. 3:11, 12.

15. Uw rogon ni nge dabi bannagdad boch ban’en nde riyul’ ni yima weliy nge ban rok e pi moonyan’? (1 Thessalonika 5:21)

¹⁵ Dabki n’uw nap’an ma bayi gaar e pi toogor rok Got: “Ke gapas ndariy ban’en nra buch.” (1 Thess. 5:3) Ra sug e re fayleng ney ko pi ban rok e pi moonyan’ ma ra bannag yooren e girdi’. (Rev. 16:13, 14) Machane uw rogodad? Dabiyog ni ngan bannagdad ni faanra ud “sikengniged urngin ban’en.” (Mu beeg e 1 Thessalonika 5:21.) Fare bugithin ni Greek ni kan pilyeg ni “sikengniged” e un fanay kakrom u nap’an ni yibe weliy murung’agen rogon ni ma skengnag e girdi’ boch e wasey ni bod e gol nge silber ni ngan nang ko ba riyul’ fa danga’. Ere ba t’uf ni ngad skengnaged e pi n’en gad ma rung’ag ara gad ma beeg ya ngad nanged ko ba riyul’ fa danga’. Ireray ban’en nib ga’ fan ni nge rin’ piyu Thessalonika, maku ra ga’ fan ni ngad rin’ed u nap’an ni gad ra chugur i yan ko fare gafgow nib ga’. Ere susun e ngad taareb rogonnaged e pi n’en gad be beeg ara gad be rung’ag ko n’en be yog e Bible nge ulung rok Jehovah ko bin nge mich u wan’dad urngin ban’en ni be yog e girdi’. Faan gad ra rin’ e re n’ey, ma aram e dabi mich u wan’dad e ban rok e pi moonyan’.​—Prov. 14:15; 1 Tim. 4:1.

16. Mang e athap ni bay rodad, ma mang e kad dugliyed u wan’dad ni ngad rin’ed?

¹⁶ Gad manang nra magey e pi tapigpig rok Got ni yad ba fos u nap’an fare gafgow nib ga’. Machane gadad ni be’ nge be’ e dad nanged e n’en nra buch rodad boch nga m’on. (Jas. 4:14) Demtrug ko gad ra magey ni gad ba fos u nap’an fare gafgow nib ga’ ara gad ra yim’ u m’on riy, ma faan gad ra par ni gad ba yul’yul’ ma yira tow’athnagdad ko yafos ndariy n’umngin nap’an. Piin kan dugliyrad e yad ra un ngak Kristus nga tharmiy, ma yugu boch e saf e yad ra par u paradis u fayleng. Ere manga yugu da pared ni gad be lemnag e athap rodad nrib manigil mu kud pared ni kad fal’eged rogodad ni fan ko rran rok Jehovah!