1. Mang tow’ath e bay rok e piin piilal nrogon ni be yog e 1 Peter 5:2?

 PIIN piilal e ba milfan ngorad ni ngar ayuweged e pi saf rok Jehovah. Pi pumoon ney ni yad ba yul’yul’ e ba ga’ fan u wan’rad e biney e tow’ath ni ngar pigpiggad ni fan ngak pi walagrad, ma yad ma maruwel nib gel ni ngar “ayuweged yad.” (Jer. 23:4; mu beeg e 1 Peter 5:2.) Ri gad be pining e magar ni bay e pi pumoon ney u lan e ulung rodad!

2. Mang boch e magawon nrayog ni nge mada’nag boch e piilal?

² Boor e magawon ni ma mada’nag e piin piilal u nap’an ni yad be rin’ e maruwel rorad. Boor e maruwel nib t’uf ni nge rin’ e piin piilal u nap’an ni yad be ayuweg reb e ulung. Tony nreb e piilal u Meriken e ba t’uf ni nge fil rogon ni nge nang e gin nge mus riy u rogon urngin e maruwel ni ma rin’. I yog ni gaar: “Nap’an ni tabab fare m’ar ni COVID-19, ma aram mug guy rogon ni nggu yoornag e maruwel nug be rin’ ni nggu yarmiy rogon e muulung nge machib ni ngan tay. Machane yugu demtrug urngin e maruwel ni ug rin’, ma gubin ngiyal’ nder m’ay e maruwel. Ere munmun ma dakuriy e tayim rog ni fan ko beeg Bible, nge fol Bible nug ma tay ni yigoo gag, nge meybil.” Ilir nreb e piilal u Kosovo e ba thil e magawon ni mada’nag. Nap’an ni immoy u bang ni yibe mahl riy, me guy nib mo’maw’ ni nge fol ko yaram ni be yib ko ulung. I yog ni gaar: “I mo’maw’ ni nggu par ndab gu rus u nap’an ni pi’ e branch ofis reb e maruwel ngog ni nggu wan gu ayuweg e pi walag ni yad be par u bang ni bay e riya’ riy. Ya bin riyul’ riy e gu be rus ma bod nde puluw e n’en yad be yog ni nggu rin’.” Tim nreb e missionary u Asia e nang nib mo’maw’ ni nge rin’ urngin ban’en nib t’uf ni nge rin’ u reb e rran ngu reb. I yog ni gaar: “Yu ngiyal’ e ma aw parwog ndabkiyog ni nggu ayuweg e pi walag.” Ere mang e rayog ni nge ayuweg e piin piilal ni yad be mada’nag boch e magawon ni aray rogon?

3. Faan gad ra lemnag e n’en ni rin’ Gideon, ma uw rogon nra yib angin ngodad?

³ Rayog ni nge fil e piin piilal ban’en rok Gideon. (Heb. 6:12; 11: 32) Gideon e ma yororiy e girdi’ rok Got ma ma ayuwegrad. (Judg. 2:16; 1 Kron. 17:6) Kan dugliy e piin piilal ni ngar ayuweged e girdi’ rok Got u ba ngiyal’ ni kari mo’maw’ e par riy ni bod Gideon. (Acts 20:28; 2 Tim. 3:1) Rayog ni ngad filed ban’en rok Gideon u rogon ni manang e gin nge mus riy, mab sobut’an’, ma ma fol. I mo’maw’ ni nge athamgil u nap’an ni be rin’ e maruwel rok. Ere demtrug ko gad boch e piilal fa danga’, ma rayog ni ngad guyed rogon ni nge ga’ fan e piin piilal u wan’dad. Ku rayog ni ngad ayuweged e pi walag ni pumoon ney nib gel e maruwel ni yad ma tay.​—Heb. 13:17.

4. Uw rogon ni dag Gideon ni manang e gin nge mus riy mab sobut’an’?

⁴ Gideon e ir be’ ni manang e gin nge mus riy mab sobut’an’. b Nap’an ni yog e engel rok Jehovah ngak ni kan mel’eg ni nge ayuweg piyu Israel u pa’ piyu Midian, me yog ni gaar: “Ba’ rog e girdi’ e ir e th’abi meewar u fithik’ girdien e ganong rok Manasseh, mi gag e th’abi sobut’ u fithik’ e girdi’ ko birog e tabinaw.” (Judg. 6:15) I lemnag nde bung rogon ni nge rin’ e re maruwel nem, machane manang Jehovah nrayog rok. I ayuweg Jehovah Gideon ni nge mu’nag e maruwel rok nib fel’ rogon.

5. Mingiyal’ e rayog ni nge mo’maw’ ngak reb e piilal ni nge par nib sobut’an’ miki nang e gin nge mus riy?

⁵ Ma athamgil e piin piilal u rogon nrayog rorad ni ngar daged ni yad manang e gin ngar musgad riy mab sobut’an’rad u gubin ban’en ni yad ma rin’. (Mik. 6:8; Acts 20:18, 19) Darur ufgad ko tin nrayog rorad ara tin ke yag ni ngar rin’ed, maku darur lemnaged ndariy farad ni bochan e pi oloboch ni kar rin’ed. Machane yu ngiyal’ e ba mo’maw’ ngak reb e piilal ni nge par nib sobut’an’ miki nang e gin nge mus riy. Bod nrayog ni nge m’agan’ ngay ni nge rin’ boor e maruwel me yan i boch nga tomuren me guy nib mo’maw’ ngak ni nge rin’ ni gubin. Fa reb e rayog ni ngan n’uf u rogon ni ke rin’ reb e maruwel ara ni gathibthibnag u rogon ni ke rin’ yugu reb e maruwel. Ere mang e rayog ni nge fil e piin piilal rok Gideon nra ayuwegrad u nap’an nra buch e pi n’ey rorad?

6. Mang e rayog ni nge fil e piin piilal rok Gideon u murung’agen rogon ni ngar nanged e gin ngar musgad riy? (Kum guy e sasing.)

⁶ Mu ning e ayuw. Be’ ni manang e gin nge mus riy e manang ni bay boch ban’en ndabiyog rok. I dag Gideon ni manang e gin nge mus riy ni bochan e ning e ayuw ngak yugu boch e girdi’.  (Judg. 6:27, 35; 7:24) Ku aray e n’en ma rin’ e piin piilal ni yad ba gonop. Tony ni faan kan weliy murung’agen e yog ni gaar: “Bochan rogon nni chuguliyeg, ma aram fan nib ga’ ni ma m’agan’ug ngay ni nggu rin’ boor e maruwel nge pag nga urngin e tin nrayog rog. Ere gu dugliy ni nggu weliyed murung’agen rogon ni ngan nang e gin ngan mus riy u nap’an e fol Bible ni tabinaw romad mu kug fith rogon laniyan’ leengig ko re n’ey. Kug sul nggu yaliy fare video ni Train, Trust, and Empower Others, as Jesus Does ni bay ko jw.org.” Ere tabab Tony ni nge yog ngak boch e girdi’ ni ngar ayuweged ko maruwel rok. Mang angin ni yib riy? I gaar: “Be yag ni ngan rin’ e maruwel u lan e ulung, ma ke ga’ e tayim nrayog ni nggu gelnageg ko tirok Got ban’en.”

7. Uw rogon nrayog ni nge folwok e piin piilal rok Gideon ni faanra kan gathibthibnagrad? (James 3:13)

⁷ Mu non u fithik’ e sumunguy u nap’an ni kan gathibthibnagem. Nap’an ni yira gathibthibnag e piin piilal maku aram reb e skeng ngorad. Ere ku rayog ni nge ayuwegrad e n’en ni rin’ Gideon. Nap’an ni gathibthibnag piyu Efraim me non ngorad u fithik’ e sumunguy ya manang ni ku arrogon ir ndawori flont. (Judg. 8:1-3) De non ngorad u fithik’ e damumuw. I dag nib sobut’an’ ni aram e motoyil u nap’an ni yad be weliy e n’en kar dabuyed me non ngorad u fithik’ e sumunguy. Aray rogon ni m’ay e damumuw rorad. Ere piin piilal ni yad ba gonop e yad ma folwok rok Gideon ni aram e yad ma motoyil u nap’an ni yira gathibthibnagrad mar nonad u fithik’ e sumunguy. (Mu beeg e James 3:13.) Re n’ey e ma ayuweg e ulung ni nge par ni bay e gapas riy.

8. Mang e susun ni nge rin’ e piin piilal u nap’an ni yira n’ufrad nga lang? Mu weliy ban’en ni ke buch.

⁸ Jehovah e ir e ngam pining e sorok ngak. Nap’an nni pining e sorok ngak Gideon ni bochan e ke gel ngak piyu Midian, ma aram me yog ni Jehovah e ir e ngan pining e sorok ngak. (Judg. 8:22, 23) Ere uw rogon nrayog ni nge folwok e piin piilal rok Gideon? Rayog ni ngar pininged e sorok ngak Jehovah ko pi n’en be yag ni ngar rin’ed. (1 Kor. 4:6, 7) Bod ni faanra ka nog ngak reb e piilal nib salap u rogon ni ma fil ban’en ko girdi’, ma rayog ni nge yog ni pi fonow nem e ke yib ko Thin rok Got ma ulung rok Jehovah e ir e be skulnagdad. Ku rayog ni nge lemnag e piin piilal ko yad be fil ban’en ko girdi’ u reb e kanawo’ ni yira pining e sorok riy ngak Jehovah, fa yad be rin’ e pi n’em ni bochan e yad baadag ni nge yog e girdi’ e sorok ngorad. Am lemnag e n’en ni rin’ reb e piilal ni ka nog Timothy ngak. Nap’an ni ka fini mang reb e piilal, ma ri baadag ni ma pi’ e welthin ni fan ko yoor. I yog ni gaar: “Bayi n’en mu ug weliy bogi ban’en ni boor u tabolngin e welthin rog maku gu be yog bogi fanathin. Ere ba ga’ ni ma n’ufeg e girdi’ ni bochan e re n’ey. Machane aram e gag e yibe pining e sorok ngog ko bin ni nga nog fel’ngin e Bible ara Jehovah.” Munmun me guy Timothy nib t’uf ni nge thilyeg rogon ni be fil ban’en ko girdi’ ya nge dabki mang ir e ni pining e sorok ngak. Ere mang angin ni yib riy? I yog ni gaar: “Chiney e ma yog e pi walag ngog rogon ni ke ayuwegrad e welthin rog ni ngar gelgad nga reb e magawon, ara skeng ni ke yib ngorad, ara rogon ni ke chugurnagrad ngak Jehovah. Ba gel e felfelan’ nug ma tay u nap’an nug ra rung’ag e pi n’ey ni ma yog e pi walag ko felfelan’ ni ug tay u nap’an ni ur n’ufed gag.”

9. Mang e mo’maw’nag ngak Gideon ni nge fol me par ndabi rus? (Mu guy e sasing ni bay u wuru’ e re ke babyor ney.)

⁹ Tomuren nni dugliy Gideon ni nge pow’iy fare nam nu Israel, ma aram me t’uf ni nge fol miki par ndabi rus. Nog ngak ni nge buthug fare altar ni ke ngongliy e chitamangin ni fan ngak Baal. (Judg. 6:25, 26) Boch nga tomuren u nap’an ni kunuy boch e salthaw ngak, ma l’agruw yay ni yog Jehovah ngak ni nge lichnag urngin e salthaw rok. (Judg. 7:2-7) Tomur riy mi nog ngak ni nge yan i og ngak e pi toogor rok u lukngun e nep’.​—Judg. 7:9-11.

10. Uw rogon nrayog ni nge mo’maw’ ngak reb e piilal ni nge fol?

 ¹⁰ Piin piilal e susun ni nge m’agan’rad ngay ni ngaur “folgad.” (Acts 5:29) Reb e piilal ni ma fol e ba m’agan’ ngay ni nge rin’ e n’en be yog e Bible miki fol ko yaram ni be yib ko ulung rok Got. Ere ma dag e kanawo’ nrayog ni nge folwok yugu boch e girdi’ riy. Machane ku rayog ni nge mo’maw’ ngak ni nge fol. Bod nsana rayog ni boor ban’en ni yibe yog ngak ni nge rin’ ara yugu be thil boch ban’en nib papey mab mo’maw’ ni nge fol riy. Ma yu ngiyal’ e rayog ni nge lemnag ko rib puluw ara ba fel’ ni ngan rin’ e pi n’em fa danga’. Fa reb e rayog ni nga nog ngak ni nge rin’ reb e maruwel nrayog ni ngan kalbusnag riy. Ere uw rogon nrayog ni nge folwok e piin piilal rok Gideon u nap’an nra buch e pi n’ey rorad?

11. Mang e rayog ni nge ayuweg e piin piilal ni ngar folgad?

¹¹ Mu fal’eg e motoyil ko fonow ni yibe pi’ mag fol riy. I yog Got ngak Gideon rogon ni nge kirebnag fare altar ni ke ngongliy e chitamangin, nge gin ni nge ngongliy reb e altar riy nib beech ni fan ngak Jehovah, nge rogon e gamanman ni nge pi’ ni maligach. De maruwar u wan’ Gideon e n’en ka nog ngak. Kemus ni rin’ e n’en ke yog Jehovah ngak ni nge rin’. Ngiyal’ ney e ma pi’ e ulung rok Jehovah boch e fonow ngak e piin piilal u daken boch e babyor ni yima yoloy ngan pi’ ngorad, nge boch e announcement, nge boch e babyor ni kan ngongliy ni bay e fonow riy nra ayuwegdad ni ngad pared ndabi buch ban’en rodad ma gad ba chugur ngak Jehovah. Ba t’uf e piin piilal rodad ni bochan e yad ma fol ko pi yaram ney u fithik’ e yul’yul’. Ere gubin e girdi’ u lan e ulung ni ma yib angin e pi n’ey ngorad.​—Ps. 119:112.

12. Faanra ke thilyeg e ulung rogon ni yibe rin’ boch ban’en, ma uw rogon nrayog ni nge fol e piin piilal ko fare thin ni bay ko Hebrews 13:17?

¹² Nge m’agan’um ngay ni ngam fol ko pi n’en kan thilyeg. Dab mu pagtalin ni yog Jehovah ngak Gideon ni nge yog ngak yooren e salthaw rok ni ngar sulod nga taferad. (Judg. 7:8) Ere rayog ni nge gaar u wan’: ‘Gur, rib t’uf ni ngan rin’ e re n’ey? Ma gur, ra yib angin?’ Yugu aram rogon me fol Gideon. Ere ku arrogon e piin piilal e ngiyal’ ney ni yad ma folwok rok Gideon ni aram e yad ma fol u nap’an nra yog e ulung ngorad ni ngar rin’ed ban’en nib thil. (Mu beeg e Hebrews 13:17.) Bod nnap’an e duw ni 2014, me thilyeg fare Ulung ni Ma Pow’iyey rogon ni yibe pi’ puluwon Tagil’ e Liyor nge pi Assembly Hall ni yibe ngongliy. (2 Kor. 8:12-14) Kafram e ma pi’ e ulung rodad e salpiy ko pi ulung ni ngar toyed Tagil’ e Liyor rorad, ngemu’ mar sulweged e re salpiy nem. Machane chiney e ma fanay e ulung rodad e salpiy ni ayuw ni be pi’ e pi ulung u ga’ngin yang e fayleng ni ngar toyed e pi Tagil’ e Liyor nge Assembly Hall ko yungi n’en nib t’uf riy ni yugu aram rogon ni buchuuw e salpiy ni ayuw nrayog ni nge pi’ reb e ulung. Nap’an ni rung’ag José murung’agen e re n’ey me lemnag nsana dabi yib angin, ma aram me gaar u wan’: ‘Dariy taareb e Tagil’ e Liyor nrayog ni ngan toy. Gathi aray rogon ni yima rin’ boch ban’en u roy.’ Ere mang e ayuweg José ni nge fol ko re yaram ney? I yog ni gaar: “I puguran fapi thin ni bay ko  Proverbs 3:5, 6 ngog ni nge pagan’ug ngak Jehovah. Ma rib ga’ angin ni ke yib riy ya gathi kemus ni ke yag ni ngan toy boor e Tagil’ e Liyor, ya kki yag ni nggu pied e ayuw u boor e kanawo’ ya nge yan i aw nib mat’aw ngak urngin e pi walag.”

13. (a) Mang e mich u wan’ Gideon? (b) Uw rogon nrayog ni nge folwok e piin piilal rok? (Kum guy e sasing.)

¹³ Dab mu rus ni ngam rin’ e n’en nib m’agan’ Jehovah ngay. I fol Gideon rok Jehovah ni yugu aram rogon ni be rus ma bay e riya’ ko maruwel ni kan pi’ ngak. (Judg. 9:17) Tomuren ni pi’ Jehovah e pagan’ ngak mi ri mich u wan’ nra pi’ Got gelngin u nap’an ni be ayuweg e girdi’ rok. Piin piilal ni yad ma par ko pi nam ni kan taleg e maruwel rodad riy e yad ma folwok rok Gideon. Darur rusgad ni ngar uned ko muulung nge machib ni yibe tay ni yugu aram rogon ni yad manang ni yira kolrad, ara ni fithfith boch e deer ngorad, ara nn’agrad ko maruwel, ara nni li’rad. c Nap’an fare gafgow nib ga’ ma ra t’uf ni nge dabi rus e piin piilal ni ngar folgad ko n’en yira yog ngorad ni ngar rin’ed, ni yugu aram rogon ni bay e riya’ riy. Re n’ey e rayog nib muun ngay rogon ni ngan machibnag fare thin ni murung’agen e pufthin nge rogon ni ngad mageygad ni gad ba fos u nap’an nra cham Gog nu Magog ngodad.​—Ezek. 38:18; Rev. 16:21.

14. Uw rogon ni mo’maw’ ngak Gideon ni nge athamgil?

¹⁴ Ba t’uf ni nge maruwel Gideon nib gel ni nge pow’iy fare nam nu Israel. Nap’an ni mil piyu Midian rok Gideon u nap’an ni yad be cham nnep’, me lol’ograd u lan fare Loway ni Jezreel nga ranod ra mada’gad ko fare Lul’ ni Jordan ni bangi ban’en nib sug e gek’iy riy. (Judg. 7:22) Ere gur, i tal Gideon u rom? Danga’! Yugu aram rogon ni ke aw parowrad fa 300 i pumoon ni salthaw rok, mar milgad ngar th’abed fare lul’ nga barba’ mu kur ululgad i lol’og e pi toogor rorad. Tomur riy mar tawgad ko gin ke taw piyu Midian ngay, ma aram mar chamgad ngorad ngar gelgad.​—Judg. 8:4-12.

15. Mingiyal’ e rayog ni nge mo’maw’ ngak reb e piilal ni nge athamgil?

¹⁵ Yu ngiyal’ e rayog ni nge aw parwon reb e piilal ni bochan e be ayuweg e ulung nge chon e tabinaw rok. Ere uw rogon nrayog ni nge folwok e piin piilal rok Gideon?

16-17. Mang e ayuweg Gideon ni nge athamgil, ma mang e rayog ni nge pagan’ e piin piilal ngay? (Isaiah 40:28-31) (Kum guy e sasing.)

 ¹⁶ Nge pagan’um nra pi’ Jehovah gelngim. Ba pagan’ Gideon ngay nra pi’ Jehovah gelngin, ma aram e n’en ni buch. (Judg. 6:14, 34) Bay ba ngiyal’ ni lol’og Gideon nge fapi pumoon l’agruw i pilung rok piyu Midian ni yad e yad be mil u but’, ma gal pilung nem e kar afgow nga daken e kamel. (Judg. 8:12, 21) Yugu aram rogon me ayuweg Got piyu Israel ni ngar gelgad ngorow. Ere ku arrogon e piin piilal nrayog ni ngar taga’gad ngak Jehovah ni ir faen “der ma yib e magar ngak ma der m’ay gelngin.” Ra pi’ gelngirad ko ngiyal’ nib t’uf ni nge pi’ riy.​—Mu beeg e Isaiah 40:28-31.

¹⁷ Am lemnag e n’en ni buch rok Matthew ni ir reb i girdien e Hospital Liaison Committee. Mang e ma ayuweg ni nge athamgil? I yog ni gaar: “Gu nang nib riyul’ fapi thin ni bay ko Filippi 4:13. Boor yay ni bayi n’en ma kari aw parawog ndabkiyog ni nggu ulul ko n’en nug be rin’, ma aram mug meybil nug be wenig ngak Got ni nge pi’ gelngig ya nge yag nug ayuweg pi walageg. Yu ngiyal’ i n’em e gu ma thamiy ni ke pi’ gelngin Jehovah nib thothup gelngig, miki ayuwegeg ni nggu athamgil.” Piin piilal e yad bod Gideon ni yad ma athamgil nib gel ni ngar ayuweged e girdi’ rok Jehovah ni yugu aram rogon ni gathi gubin ngiyal’ nib mom ni ngar rin’ed e re n’ey. Yugu aram rogon ma susun e ngar nanged e gin ngar musgad riy, ma ngkur nanged ni gathi gubin ngiyal’ nrayog ni ngar rin’ed gubin ban’en ni yad baadag ni ngar rin’ed. Machane rayog ni nge pagan’rad nnap’an ni yad ra ning e ayuw ngak Jehovah, ma ra rung’ag lamrad miki pi’ gelngirad ni ngar athamgilgad.​—Ps. 116:1; Fil. 2:13.

18. Uw rogon nrayog ni nge folwok e piin piilal rok Gideon?

¹⁸ Boor ban’en nrayog ni nge fil e piin piilal rok Gideon. Thingar ra daged ni yad manang e gin ngar musgad riy ma kub sobut’an’rad u rogon urngin e maruwel ni ma m’agan’rad ngay ni ngar rin’ed ngu nap’an nra n’ufrad e girdi’ nga lang ara ni gathibthibnagrad. Chiney ni be chugur tungun e re m’ag ney e thingar ra folgad mar daged ndarur rusgad. Ba t’uf ni nge pagan’rad ndemtrug e re miti magawon ni yad ra mada’nag, ma rayog ni nge pi’ Got gelngirad. Arrogon, ba ga’ fan u wan’dad e piin piilal nib gel e maruwel ni yad ma tay ma “ba’ rogon ni ngan pining e magar ngorad.”​—1 Kor. 16:18.