Ra ngad fel’gad u wan’ Jehovah ma thingari yag e michan’ ngodad. Machane be yog e Bible ni “gathi urngin e girdi’” ni bay e michan’ rorad. (2 Thess. 3:2) Be weliy apostal Paul u roy murung’agen e piin yad be gafgownag ara “piin nib tagan e lem rorad nge girdi’ nib kireb” ni aram e piin nib t’uf ni ngan ayuweg u pa’rad. Machane n’en ni weliy u murung’agen e michan’ e ku bay rogon ngak yugu boch e girdi’. Bay boch e girdi’ ndubrad ni nge mich u wan’rad ni bay ba Got ni ke sunmiy urngin ban’en. (Rom. 1:20) Bay boch e girdi’ nsana nrayog ni nga rogned nib mich Got u wan’rad. Machane de gaman e re n’ey ni nge ayuwegdad ni ngad fel’gad u wan’ Jehovah.

Ba t’uf ni nge mich u wan’dad ni bay Jehovah ma ir e ma “tow’athnag” e piin bay e bin riyul’ e michan’ rorad. (Heb. 11:6) Michan’ e aram bang u wom’engin gelngin Got nib thothup. Ere faanra meybil be’ ngak Jehovah, ma rayog ni nge yag gelngin Got nib thothup ngak. (Luke 11:​9, 10, 13) Ku reb e ban’en nib ga’ fan nra ayuwegdad ni nge yag e re gelngin nem ngodad e aram e ngaud beeged e Thin rok Got ni kan thagthagnag. Ngemu’ ma gad fal’eg i lemnag ma gad guy rogon ni ngad folgad riy. Faan gad ra rin’ e re n’ey, ma aram e rayog ni nge maruwel gelngin Got nib thothup u lan e yafos rodad me yag e michan’ ngodad nra ayuwegdad ni ngad fel’gad u wan’ Got.