1-2. Uw e be pining Jehovah e pi tapigpig rok nib yul’yul’ ngay?

 FAANRA fithem be’ ni gaar, ‘Mini’ Jehovah?’, ma mang e ga ra yog? Sana ra lungum, ‘Jehovah e Chitamag, nge Got rog, nge Fager rog.’ Ku bay boch e liw nrayog ni ngam fanay ni fan ngak Jehovah. Machane gur, ka ga ma tay ni ir Faen be piningem nga lan e tent rok, fa?

² I taarebrogonnag David ni Pilung Jehovah ngak be’ ni ke pining boch e girdi’ nga tafen, me taarebrogonnag e pi tapigpig rok ni yad ba yul’yul’ ngak e piin ka ranod nga tafen facha’. I fith ni gaar: “Somol, mini’ e rayog ni nge par u lan e tempel [ara tent] rom? Mini’ e ra par u Zion, ni fare burey rom nib thothup?” (Ps. 15:1) Gad be fil ko pi thin ney nrayog ni nga darod nga lan e tent rok Jehovah ara ngad manged fager rok. Rib manigil e biney e tow’ath!

BAADAG JEHOVAH NI NGAD UNED NGA LAN E TENT ROK

3. Mini’ e som’on nni pining nga lan e tent rok Jehovah? Uw rogon e cha’nem u wan’ Jehovah, ma uw rogon Jehovah u wan’ e cha’nem?

³ U m’on ni nge sunmiy Jehovah urngin ban’en ma yigoo ir ni immoy. Machane yan i taw nga ba ngiyal’ me pining e bin nganni’ i Fak nga lan e tent rok. Ri felfelan’ Jehovah ko re n’ey. Be yog e Bible nrib “felfelan’” Jehovah ngak Fak. Ma Fak e ‘gubin ngiyal’ ni i par rok nib felfelan’.’​—Prov. 8:30.

4. Mini’ e piin ni piningrad Jehovah nga lan e tent rok boch nga tomuren?

 ⁴ Tomuren miki sunmiy Jehovah boch e engel miki piningrad nga lan e tent rok. Be yog e Bible ni pi engel e yad “pi fak Got” ma yad ba felfelan’ ni yad ma par rok Jehovah. (Job 38:7; Dan. 7:10) Boor e duw ni kemus ni yigoo piin ur moyed rok Got u tharmiy e yad e pi fager rok. Boch nga tomuren miki pag e girdi’ ni ngar bad nga lan e tent rok. Boch e pi girdi’ nem e aram Enok, nge Noah, nge Abraham, nge Job. Pi cha’nem e yima yog ni yad e fager rok Got ara piin yad ma “fol rok Got.”​—Gen. 5:​24, BT; 6:9; Job 29:4; Isa. 41:8.

5. Mang e rayog ni ngad filed ko fare yiiy ni bay ko Ezekiel 37:​26, 27?

⁵ Kab kafram i yib ni be ulul Jehovah ni nge pining e pi fager rok nga lan e tent rok. (Mu beeg e Ezekiel 37:​26, 27.) Bod ni kad filed ko yiiy rok Ezekiel nri baadag Got ni nge fel’ e tha’ u thilrad e pi tapigpig rok ni yad ba yul’yul’. Ke micheg ni nge ngongliy ‘ba m’ag u thilrad.’ Re yiiy ney e be weliy murung’agen ba ngiyal’ nra par e piin yad be athapeg e yan nga tharmiy nge piin yad be athapeg e par u fayleng ni yad “taab ran’ i saf” nib taareban’rad u lan e tent rok Jehovah nib fanathin. (John 10:16) Be buch e re n’ey e chiney!

DEMTRUG E GIN GAD BAY RIY MA MA AYUWEGDAD GOT

6. Uw rogon ni yima pining be’ nga lan e tent rok Jehovah? Uw e bay e re tent rok nem riy?

⁶ Kakrom e tent rok be’ e aram e gin yima toffan riy min naf ngay ko n’uw nge nifeng nib gel. Be’ ni kan pining nga lan fare tent e rayog ni nge lemnag nib fel’ rogon ni yira ayuweg. Nap’an ni gad ra ognag e yafos rodad ngak Jehovah, ma aram e kan piningdad nga lan e tent rok nib fanathin. (Ps. 61:4) Boor e ggan ni fan ko tirok Got ban’en u rom, maku aram e gin bay boch e girdi’ riy ni kki piningrad Jehovah. Tent rok Jehovah nib fanathin e gathi kemus ni yigoo taabang i ban’en e bay riy. Sana rayog ni kam milekag nga reb e nam ni ngam un nga reb e convention ma kam mada’nag boch e girdi’ ni yad be par u lan e tent rok Got. Re tent ney e rayog ni ngan pirieg ko gin bay e pi tapigpig rok Got riy ni yad ba yul’yul’.​—Rev. 21:3.

7. Mang fan nrayog ni nga dogned ni piin yad ba yul’yul’ ni kar m’ad e ka yad bay u lan e tent rok Jehovah? (Kum guy e sasing.)

⁷ Uw rogon e piin yad ba yul’yul’ ni kar m’ad? Rayog ni nga dogned ni ka yad bay u lan e tent rok Jehovah, fa? Arrogon! Mang fan? Ya dawori pag Jehovah tilrad. I weliy Jesus ni gaar: “Moses e ri micheg nib tamilang ni bay ni faseg ko yam’ e piin ni kar m’ad, ni be yog  ko fa gin’en ni ba’ fare thal i yol riy ni murung’agen fachi ke gek’iy ni be daramram ni be weliy murung’agen Somol riy ni ir e Got rok Abraham, me ir e Got rok Isak, me ir e Got rok Jakob. Fan e re n’ey e ir e Got rok e girdi’ nib fos, ma gathi Got rok e girdi’ nib yam’​—ya rogon ni be guy Got e girdi’ e yad urngin ni yad ba fos.”​—Luke 20:​37, 38.

RA YIB ANGIN NGODAD MACHANE KUB MILFAN BOCH BAN’EN NGODAD

8. Piin yad bay u lan e tent rok Jehovah e mang angin ni be yib ngorad?

⁸ Tent rok Jehovah e ma yororiy e piin yad bay u langgin ko pi n’en nra kirebnag e tha’ u thilrad Got me pi’ e bin riyul’ e athap ngorad ni ka bay nga m’on ni bod e yugu tent ni yima toffan riy min naf ngay ko n’uw nge nifeng nib gel. Faan gad ra par ni gad ba chugur ngak Jehovah, ma dariy ban’en nrayog ni nge rin’ Satan ngodad ni gad ra gafgow riy ndariy n’umngin nap’an. (Ps. 31:23; 1 John 3:8) Nap’an ni gad ra yan nga lan e bin nib beech e fayleng, ma gathi kemus nra ulul Jehovah ni nge yororiy e pi fager rok ni yad ba yul’yul’ u boch ban’en nra kirebnag e tha’ u thilrad ya ku ra yororiyrad ko yam’.​—Rev. 21:4.

9. Uw rogon e ngongol ni baadag Jehovah ni nga i rin’ e piin yad bay u lan e tent rok?

⁹ Ba tow’ath e piin ke piningrad Jehovah nga lan e tent rok, ya rayog ni ngar manged fager rok nib chugur thilrad ndariy n’umngin nap’an. Ere uw rogon nsusun e ngaud ngongolgad ni faanra gad baadag ni ngad ululgad ni ngaud pared u lan e tent rok? Faanra ke piningem be’ nga tafen, ma dabisiy ni ga baadag ni ngam nang rogon e re miti ngongol ni baadag ni ngaun rin’ u tafen. Bod nsana baadag ni ngam luf e sus rom u m’on ni ngam man nga naun, ma aram e n’en ga ra rin’. Ku arrogon ni gad baadag ni ngad nanged e n’en baadag Jehovah ni nge rin’ e piin yad baadag ni ngar ululgad ni ngar pared u lan e tent rok. T’ufeg rodad ngak Jehovah e ma k’aringdad ni ngad rin’ed urngin e tin rayog rodad ni ngad “rin’ed e tin nib m’agan’ ngay ni gubin ngiyal’.” (Kol. 1:10) Ma yugu aram rogon ni gad ma tay ni Jehovah e ir e Fager rodad, machane ku gad manang ni ir e Got rodad nge Chitamangidad ni bay rogon ni ngaud ted fan. (Ps. 25:14) Ere susun e dab da paged talin e re n’ey, ma gubin ngiyal’ ni ngar ud ted fan. Re n’ey e ra ayuwegdad ni ngad siyeged e ngongol nra kirebnag laniyan’. Gubin ngiyal’ ni gad baadag ni ngaud folgad ko Got rodad u “fithik’ e sobut’an’.”​—Mik. 6:8.

DA I LANIYAN’ JEHOVAH NGAK PIYU ISRAEL

10-11. Uw rogon ni m’ug ko ngongol rok Jehovah ngak piyu Israel u nap’an ni ur moyed u daken e ted u Sinai nde laniyan’?

¹⁰ Der ma laniyan’ Jehovah ko piin yad bay u lan e tent rok. (Rom. 2:11) Rayog ni ngad nanged e re n’ey u rogon e ngongol rok ngak piyu Israel u nap’an ni ur moyed u daken e ted u Sinai.

¹¹ Tomuren ni chuweg e girdi’ rok ko sib u Egypt, me mel’eg e piin ngar manged prist ni ngaur pigpiggad ko fare tabernacle. Nni tay e pi Levite ni yad e ngaur rin’ed e maruwel u rom. Ere gur kab fel’ rogon ni i ayuweg Jehovah e piin ur pigpiggad ko fare tabernacle ara piin yad ma par nib chugur ngaram nga rogon ni i ayuweg e tin ka bay e girdi’? Danga’, ya Jehovah e der ma laniyan’.

12. Uw rogon ni i m’ug ko ngongol rok Jehovah ngak piyu Israel ni ir be’ nder ma laniyan’? (Exodus 40:38) (Kum guy e sasing.)

¹² Gubin e girdi’ nu Israel nrayog ni ngar manged fager rok Jehovah nib chugur thilrad ndemtrug ko yad ma pigpig u tabernacle ara yad ma par nib chugur ngaram fa danga’. Bod  ni n’igin Jehovah ni nge par fagi manileng nib k’iy nga lang nge fare nifiy ni be yik’ u puluwon fare tabernacle nga lang ya nge yag ni guy fare nam ni ga’ngin. (Mu beeg e Exodus 40:38.) Nap’an nra tabab ni nge mithmith fagi manileng, ma mus ngak e piin kar n’ufed e tent rorad nth’abi palog ko fare tabernacle nrayog ni ngar guyed ma aram mar kunuyed e chugum rorad, mu kur puged e tent rorad ngar uned ko tin ka bay e girdi’ ko milekag. (Num. 9:​15-23) Gubin e girdi’ nrayog ni ngar rung’aged lingan fa gal yabul ni kan ngongliy ko silber ni yima thoy ni nge dag nib t’uf ni nge mithmith gubin e girdi’. (Num. 10:2) Ere ba tamilang nra be par be’ nib chugur ko fare tabernacle ma gathi aram e be yip’ fan nib chugur e tha’ u thilrow Jehovah. Ya gubin e girdi’ nu Israel nrayog ni ngar uned nga lan e tent rok Jehovah, mi i pow’iyrad, ma be yororiyrad. Ku arrogon e ngiyal’ ney ndemtrug e gin gad be par riy u fayleng nrayog ni nga i t’ufegdad Jehovah, ma be ayuwegdad, ma be yororiydad.

DER MA LANIYAN’ JEHOVAH E NGIYAL’ NEY

13. Mang reb e kanawo’ ni ma dag Jehovah riy e ngiyal’ ney nder ma laniyan’?

¹³ Bay boch e girdi’ rok Got ni yad ma par ni yad ba chugur ko pi tochuch rodad ara reb e branch ofis ko Pi Mich Rok Jehovah. Ku bay boch e girdi’ ni yad ma pigpig u rom. Bochan e re n’ey, ma boor ban’en ni yima rin’ u rom nrayog ni ngar uned ngay maku yad be chag ko piin yad ma pigpig u rom ni yad ma yog e thin rodad. Ku bay boch e walag ni yad ma lekag e ulung ara yad ma pigpig u polo’ e tayim rorad u yugu boch e kanawo’. Faanra gur bagayad e piin nder yag ni ngam un i rin’ reb e pi n’ey, ma nge pagan’um ngay ni Jehovah ni ir e En Ke Piningdad nga lan e tent rok e ma t’ufeg gubin e piin yad bay u rom. Ma yad gubin nib fel’ rogon ni ma ayuwegrad. (1 Pet. 5:7) Gubin e girdi’ rok Got ni ma pi’ e ggan ngorad ni fan ko tirok ban’en, ma ma pow’iyrad, maku be yororiyrad.

14. Ku mang reb e kanawo’ ni ma dag Jehovah riy nder ma laniyan’?

 ¹⁴ Ku reb e kanawo’ ni ma m’ug riy nder ma laniyan’ Jehovah e aram e ke ngongliy e Bible ni gubin e girdi’ u ga’ngin yang e fayleng nrayog ni ngar beeged. Som’on e ni yoloy e thin u lan e Babyor nib Thothup ko thin ni Hebrew, nge Aramaic, nge Greek. Ere gur, piin nrayog ni ngar beeged e Bible ko pi thin ney e kab chugur e tha’ u thilrad Jehovah ko tha’ u thilin Jehovah nge piin ndabiyog ni ngar beeged, fa? Danga’.​—Matt. 11:25.

15. Mang e be micheg nder ma laniyan’ Jehovah? (Kum guy e sasing.)

¹⁵ Rogon ni gad ma par ni gad ba fel’ u wan’ Jehovah e der yan u rogon tolngin e skul rodad ara urngin mit e thin ni gad manang. Gathi kemus ni yigoo piin nib tolang e skul rorad e ma pi’ Jehovah e gonop ngorad, ya ma pi’ ko girdi’ u ga’ngin yang e fayleng. Kan pilyeg e Thin rok ni aram e Bible nga bokum biyu’ mit e thin. Ere gubin e girdi’ u ga’ngin yang e fayleng nrayog ni nge yib angin ngorad e pi machib ni bay riy mar filed rogon ni ngar manged fager rok.​—2 Tim. 3:​16, 17.

MU PAR NI GAB “FEL’ U WAN’” JEHOVAH

16. Uw rogon nrayog ni ngad pared ni gad ba fel’ u wan’ Jehovah nrogon ni be yog e Acts 10:​34, 35?

¹⁶ Ri gad ba tow’ath ni ke pagdad Jehovah ni ngad uned nga lan e tent rok nib fanathin. Rib sumunguy, ma ri ma t’ufegdad ma rib gol ngodad. Maku reb e der ma laniyan’, ma be piningdad ni ngad bad nga lan e tent rok ni yugu demtrug e gin gad bay riy, ara gin kad bad riy, ara tolngin e skul rodad, ara ramaen dowdad, ara ganong ni kad bad riy, ara yangarrad, ara gadad e pumoon ara ppin. Machane kemus ni yigoo piin yad ma fol ko pi motochiyel rok e ra pagrad ni ngar pared u lan e tent rok.​—Mu beeg e Acts 10:​34, 35.

17. Uw e rayog ni ngkud pirieged boch ban’en riy ni be weliy rogon nrayog ni ngad pared u lan e tent rok Jehovah?

¹⁷ I fith David ko Psalm 15:1 ni gaar: “Somol, mini’ e rayog ni nge par u lan e tempel [ara tent] rom? Mini’ e ra par u Zion, ni fare burey rom nib thothup?” Nni thagthagnag nga laniyan’ David ni nge yog e fulweg ko gal deer ney. Gad ra weliy ko bin migid e article boch ban’en nthingar da rin’ed ya nge yag nda pared ni gad ba fel’ u wan’ Jehovah.