1. Mang e ma ayuweg e girdi’ rok Jehovah ni ngar ululgad ko liyor ni yad be tay ngak ni yugu aram rogon ni yad be mada’nag boch e magawon?

 BE YOG e Bible ni gad be par u ba ngiyal’ ni ke “mo’maw’ ni ngan par nrogon e tin riyul’ ni girdien Kristus.” (2 Tim. 3:1) Girdi’ rok Jehovah e yad ma mada’nag e togopuluw nge gafgow ni kub muun ngay e pi magawon ni ma mada’nag e girdi’ ni yad be par u lan e re m’ag ney. Mang e ma ayuwegdad ni ngad ululgad ko liyor ni gad be tay ngak Jehovah ni yugu aram rogon ni gad be mada’nag e pi magawon ney? Reb e ban’en nib ga’ fan e aram e kad nanged Jehovah ma kud nanged ni ir “fare Got nib fos.”​—Jer. 10:​10, BT; 2 Tim. 1:12.

2. Uw rogon ni Jehovah e ir fare Got nib fos?

² Jehovah e ir Be’ nib riyul’, ma ma guy e pi magawon ni gad ma mada’nag ma baadag ni nge ayuwegdad. (2 Kron. 16:9; Ps. 23:4) Faanra ud lemnaged ni ir fare Got nib fos ma rayog ni nge ayuwegdad ni ngad athamgilgad u fithik’ urngin mit e skeng ni ma yib ngodad. Am lemnag rogon ni buch e re n’ey rok David ni Pilung.

3. Mang e be yip’ David fan u nap’an ni yog ni Jehovah e “bay nib fos”?

³ Manang David Jehovah ma i taga’ ngak. Nap’an ni be lol’og e pi toogor rok ni yad be guy rogon ni ngar thanged e fan rok nib muun Saul ni Pilung ngay, me meybil ngak Jehovah ni nge ayuweg. (Ps. 18:6) Tomuren ni fulweg Got taban e meybil rok nge ayuweg, me yog ni gaar: “I Somol e bay nib fos!” (Ps. 18:​46, BT) Pi thin ney ni yog David e gathi kemus ni be yip’ fan ni bay Got. Ya be yog reb e babyor ni be weliy David u roy rogon e pagan’ rok ngak Jehovah “ni ir reb e got nib fos ni gubin ngiyal’ ni ma ayuweg e girdi’ rok.” Arrogon, manang David ko pi n’en ni i buch rok nib fos e Got rok, ma re n’ey e k’aring ni nge dugliy u wan’ ni nge pigpig ngak Jehovah me pining e sorok ngak.​—Ps. 18:​28, 29, 49.

4. Mang angin nra yib ngodad ni faanra ud ted ni Jehovah e ir fare Got nib fos?

 ⁴ Faanra ba mich u wan’dad ni Jehovah e ir fare Got nib fos, ma rayog ni nge ayuwegdad ni ngad pigpiggad ngak u fithik’ e pasig. Ra yib gelngidad ni ngad athamgilgad u fithik’ e pi magawon ni ma yib ngodad me k’aringdad ni ngad ululgad ko maruwel nib gel ni fan ko pigpig rodad ngak. Ku gad ra dugliy u wan’dad ni ngad pared ni gad ba chugur ngak Jehovah.

FARE GOT NIB FOS E RA PI’ GELNGIM

5. Mang e rayog ni nge pi’ e pagan’ ngodad u nap’an ni gad be mada’nag e magawon? (Filippi 2:13)

⁵ Faanra dab da paged talin nib fos Jehovah ma gubin ngiyal’ ni bay ni nge ayuwegdad, ma aram e rayog ni ngad athamgilgad u fithik’ urngin mit e magawon ni ma yib ngodad ndemtrug ko ba ga’ fa ba achichig. Bin riyul’ riy e dariy reb e magawon ni gad ra mada’nag ndabiyog rok e Got rodad ni nge pithig. Ir e Gubin Ma Rayog Rok ma rayog ni nge pi’ gelngidad ni ngad athamgilgad. (Mu beeg e Filippi 2:13.) Re n’ey e ma pi’ e pagan’ ngodad u nap’an ni gad ma mada’nag e magawon. Gad ra guy rogon ni be ayuwegdad Jehovah u nap’an ni gad be mada’nag boch e magawon nib achig, ma aram e ra micheg nga lanin’dad ni ku ra ayuwegdad u nap’an ni kad mada’naged boch e magawon nib ga’.

6. Mang boch ban’en ni buch rok David u nap’an ni kab fel’ yangaren ni gelnag e pagan’ rok ngak Jehovah?

⁶ Am lemnag l’agruw ban’en ni buch rok David ni gelnag e pagan’ rok ngak Jehovah. Nap’an ni i gafaliy e saf ko ngiyal’ ni kab pagel ma bay bayay ni yib reb e bear i k’ad reb i pi fak e saf rok e chitamangin nge fek, ma bayay e ba layon. De rus David ni nge lol’og e gal gamanman ney me ayuweg e yafos rok fa gal saf. Machane de yog ni ke rin’ e re n’ey u gelngin, ya manang ni Jehovah e ke pi’ gelngin ni nge rin’. (1 Sam. 17:​34-37) Dariy ba ngiyal’ ni pag David talin e pi n’ey ni buch rok. Bochan ni i fal’eg i lemnag e pi n’ey, ma aram me pagan’ ngay nra pi’ fare Got nib fos gelngin boch nga m’on.

7. Bochan nib puluw rogon e lem ni i tay David, ma uw rogon ni ayuweg ni nge cham ngak Goliath?

⁷ Boch nga tomuren u nap’an ni kab fel’ yangaren me yan ko gin bay e pi salthaw nu Israel riy. I guy ni ke rus e pi salthaw nem ni bochan e ke yib Goliath ni be’ nu Filistine ko gin yad bay riy be moningnag e pi “salthaw nu Israel.” (1 Sam. 17:​10, 11) I rus e pi salthaw nem ni bochan e ur pared ngaur yaliyed ga’ngin e re pumoon nem ma yad be lemnag e n’en be yog ngorad. (1 Sam. 17:​24, 25) Machane David e ba thil e n’en be lemnag. Manang nnap’an ni be moningnag Goliath e pi salthaw nu Israel ma bin riyul’ riy e be moningnag “Got, ni be’ ni be par nib fos.” (1 Sam. 17:26) Ngiyal’ nem e be lemnag David Jehovah. Ba pagan’ ngay ni fare Got ni i ayuweg u nap’an ni i gafaliy e saf e ku ra ayuweg bayay. Bochan nib mich u wan’ nra ayuweg Got, ma aram me cham ngak Goliath nge gel!​—1 Sam. 17:​45-51.

8. Uw rogon nrayog ni ngaud pared ni gad be lemnag Jehovah u nap’an ni gad be mada’nag boch e magawon? (Kum guy e sasing.)

⁸ Ku arrogodad nrayog ni ngad athamgilgad u fithik’ e pi magawon ni gad ma mada’nag ni faanra dab da paged talin ni fare Got nib fos e gubin ngiyal’ ni ke fal’eg rogon ni nge ayuwegdad. (Ps. 118:6) Faanra ud lemnaged e pi n’en ni i rin’ kakrom, ma aram e rayog ni ngari pagan’dad ngak. Mu beeg boch ban’en u Bible ni be puguran ngom rogon ni i ayuweg Jehovah e yafos ko pi tapigpig rok. (Isa. 37:​17, 33-37) Kum beeg ara mu yaliy boch ban’en ni bay ko fare website rodad ni jw.org ni be weliy rogon ni ma ayuweg e pi walagdad e ngiyal’ ney. Maku reb e ngam lemnag yu ngiyal’ ni ke rin’ Jehovah boch ban’en ni fan ngom. Dabi magafan’um ni faanra der yib ngan’um ban’en ni ke rin’ ni fan ngom ni yira ngat ngay ni bod ni ke ayuweg e yafos rom u pa’ ba layon ara reb e bear. Mang fan? Ya  bin riyul’ riy e boor ban’en ni ke rin’ Jehovah ni fan ngom! Ke ayuwegem ni nge fel’ e tha’ u thilmew. (John 6:44) Mus ko chiney ni ka ga bay ko tin riyul’ ni bochan e be ayuwegem. Ere mang ndab mog ngak ni nge ayuwegem ni nge yib ngan’um yu ngiyal’ ni ke fulweg taban e meybil rom, ara yu ngiyal’ ni ke ayuwegem ko ngiyal’ nib puluw ni nge rin’ riy, ara ngiyal’ ni ke ayuwegem u nap’an ni ga be mada’nag reb e magawon nib mo’maw’? Ra um lemnag e pi n’ey ma ra ayuwegem ni ngari mich u wan’um nra ulul Jehovah ni nge ayuwegem.

9. Uw rogon ni ngaud lemnaged e pi magawon rodad? (Proverbs 27:11)

⁹ Faanra ud lemnaged Jehovah ni Be’ nib fos, ma aram e ra puluw rogon ni ngad lemnaged e pi magawon rodad. Ni uw rogon? Nap’an ni gad ra mada’nag e magawon ma ba t’uf ni ngad lemnaged e n’en th’abi ga’ fan. Be yog Moonyan’ nnap’an ni gad ra mada’nag e magawon, ma aram e gad ra pag Jehovah. Ere n’en gad ra rin’ u nap’an ni gad ra mada’nag e magawon e ra felfelan’nag Jehovah ara kirebnag laniyan’. (Job 1:​10, 11; mu beeg e Proverbs 27:11.) Nap’an ni gad ra par ni gad ba yul’yul’ ngak Jehovah ni yugu aram rogon ni gad be mada’nag e magawon, ma aram e gad be dag nib t’uf rodad ma gad be micheg ni Moonyan’ e ba malulfith l’igin. Be togopuluw e am ngom, ara ga be magawon ko salpiy, ara yibe togopuluw ngom u nap’an e machib, ara ga be mada’nag yugu reb e magawon, fa? Faanra arrogon, ma dab mu pagtalin ni magawon ni ga be mada’nag e rayog ni nge bing e kanawo’ ngom ni ngam felfelan’nag Jehovah. Ku dab mu pagtalin ndabi pag boch e skeng ni nge yib ngom nib pag rogon ndabkiyog ni ngam par ni gab yul’yul’ riy. (1 Kor. 10:13) Ra pi’ gelngim ni ngam athamgil.

RA TOW’ATHNAGEM FARE GOT NIB FOS

10. Mang e ra rin’ fare Got nib fos ni fan ko piin yad ma liyor ngak?

¹⁰ Jehovah e Ir e Ma Tow’athnag e piin yad ma liyor ngak. (Heb. 11:6) Ma pi’ e gapas nge felfelan’ ngodad e chiney ma ra pi’ e yafos ni manemus ngodad boch nga m’on. Rayog ni nge l’agan’dad ngak Jehovah ni bochan e ba mich u wan’dad ni baadag maku bay gelngin ni nge tow’athnagdad.  Aram fan ni boor ban’en ni gad ma rin’ ni fan ko liyor rodad ngak ni bod e n’en ni i rin’ e pi tapigpig rok ni yad ba yul’yul’ kakrom. Ireray e n’en ni rin’ Timothy ko bin som’on e chibog.​—Heb. 6:​10-12.

11. Mang fan nib gel e maruwel ni i tay Timothy u lan e ulung? (1 Timothy 4:10)

¹¹ Mu beeg e 1 Timothy 4:10. I par Timothy ni be l’agan’ ko fare Got nib fos. Aram fan ni i athamgil mab gel e maruwel ni be tay. Ni uw rogon? I pi’ apostal Paul e athamgil nga laniyan’ ni nge mon’og u rogon ni be fil ban’en ko girdi’ nge rogon ni ma welthin u fithik’ey. Ku nog ngak ni nge dag e kanawo’ nib manigil nrayog ni nge folwok e piin taareb e michan’ rorad riy nib muun ngay e piin ka yad bbitir nge piin kar pilibthirgad. Kun pi’ boch e maruwel ngak ni nge rin’ nib mo’maw’ nib muun ngay ni nge pi’ e fonow nib gel ngak e piin nib t’uf ni ngan fonownagrad, machane nge rin’ u fithik’ e t’ufeg. (1 Tim. 4:​11-16; 2 Tim. 4:​1-5) Rayog ni nge pagan’ Timothy ngay nra tow’athnag Jehovah ni mus ni faanra bay yu ngiyal’ nder guy e girdi’ e maruwel ni be rin’ ara darur pininged e magar riy ngak.​—Rom. 2:​6, 7.

12. Mang fan nib gel e maruwel ni ma tay e piin piilal u lan e ulung? (Kum guy e sasing.)

¹² Ku arrogon e piin piilal e ngiyal’ ney nrayog ni nge pagan’rad ngay ni ma guy Jehovah e maruwel ni yad ma rin’ mab ga’ fan u wan’. Boor e piilal ni yad ma pi’ e ayuw u nap’an ni yibe toy boch e naun rodad ngu nap’an ni ke buch ban’en ni ke gafgow boch e walag riy, maku yad ma pi’ e athamgil nga laniyan’ e pi walag, maku yad ma fil ban’en ngorad, maku yad ma machib. Ku bay boch i yad ni ir reb i girdien fapi Patient Visitation Group ara Hospital Liaison Committee. Manang e piin piilal ni Jehovah e ba milfan e ulung ngak, ma gathi girdi’. Aram fan nib gel e maruwel ni yad ma rin’ u lan e ulung ma rib pagan’rad ngay nra tow’athnagrad Got ko tin yad be rin’.​—Kol. 3:​23, 24.

13. Uw rogon u wan’ Jehovah e tin gad ma rin’ ni fan ngak?

¹³ Gathi gad gubin nrayog ni ngad manged piilal. Machane gad gubin ni bay ban’en nrayog ni  ngad pied ngak Jehovah. Ma felfelan’ e Got rodad u nap’an ni gad ra athamgil u rogon nrayog rodad ni ngad pigpiggad ngak. Ma guy e salpiy ni ayuw ni gad ma pi’ ni fan ko maruwel ni yima rin’ u ga’ngin yang e fayleng ni yugu aram rogon nib achig. Ma felfelan’ u nap’an ni gad ra athamgil ni ngad pied e fulweg ni yugu aram rogon ni gad be tamra’ mu kud n’aged fan e kireb ni ke rin’ be’ ngodad. Mus ni faanra ga be lemnag ndabkiyog ni ngam rin’ urngin e tin ga baadag ni ngam rin’ ni fan ngak Jehovah, ma nge pagan’um ngay nib ga’ fan u wan’ e tin nrayog ni ngam rin’. Gab t’uf rok ni bochan e tin ga be rin’, ma ra tow’athnagem.​—Luke 21:​1-4.

MU PAR NI GAB CHUGUR KO FARE GOT NIB FOS

14. Faan gad ra par ni gad ba chugur ngak Jehovah, ma uw rogon nra ayuwegdad ni ngad pared ni gad ba yul’yul’? (Kum guy e sasing.)

¹⁴ Faanra ba riyul’ Jehovah u wan’dad, ma aram e ra mom boch ngodad ni ngad pared ni gad ba yul’yul’ ngak. Aram e n’en ni rin’ Josef. I siyeg ni nge un ko ngongol ndarngal. Ba riyul’ Got u wan’, ma dabun ni nge kirebnag laniyan’. (Gen. 39:9) Faanra nge riyul’ Jehovah u wan’dad mab t’uf ni ngaud ted e tayim ni ngad meybilgad ngak ma gad be fil e Thin rok. Gad ra rin’ e re n’ey, ma aram e ra chugur e tha’ u thildad. Faanra ba chugur e tha’ u thildad Jehovah ni bod Josef, ma aram e gad ra dabuy ni ngad rin’ed ban’en nra kirebnag laniyan’.​—Jas. 4:8.

15. Mang e rayog ni ngad filed ko n’en ni buch rok piyu Israel u nap’an ni ur moyed u daken e ted? (Hebrews 3:12)

¹⁵ Piin yad ra pagtalin ni Jehovah e ir fare Got nib fos e rib mom ni ngar paloggad rok. Am lemnag e n’en ni buch rok piyu Israel u nap’an ni ur moyed u daken e ted. Yad manang ni bay Jehovah, machane i tabab ni nge maruwar u wan’rad ko ra pi’ e tin nib t’uf rorad fa danga’. Kur fithed ni lungurad: “Gur bay Somol rodad fa de moy?” (Ex. 17:​2, 7, BT) Bochan e re n’ey, ma aram mar togopuluwgad ngak Got. Ba mudugil ndubdad ni ngad folwokgad ko n’en nib kireb nrin’ed.​—Mu beeg e Hebrews 3:12.

16. Mang e rayog ni nge skengnag e michan’ rodad?

 ¹⁶ Ma mo’maw’nag e re fayleng ney ngodad ni ngad pared ni gad ba chugur ngak Jehovah. Boor e girdi’ nde mich u wan’rad ni bay Got. Ba ga’ ni yigoo piin ndarur folgad ko n’en be yog Jehovah e bod nib fel’ e par rorad. Re n’ey e rayog ni nge skengnag e michan’ rodad. Yugu aram rogon nib mich u wan’dad ni bay Got, machane rayog ni nge tabab ni nge maruwar u wan’dad ko ra ayuwegdad fa danga’. Ku aram e n’en ni lemnag e en ni yoloy e Psalm 73. I guy ni piin ndarur folgad ko motochiyel rok Got e ba fel’ e par rorad. Bochan e re n’ey, ma aram me tabab ni nge maruwar u wan’ ko bay fel’ngin e pigpig ni be tay ngak Got fa danga’.​—Ps. 73:​11-13.

17. Mang e ra ayuwegdad ni ngad pared ni gad ba chugur ngak Jehovah?

¹⁷ Mang e ayuweg faen ni yoloy e Psalm ni nge yal’uweg e lem rok? I fal’eg i lemnag e n’en nra buch rok e piin yad ra pagtalin Jehovah. (Ps. 73:​18, 19, 27) Ki lemnag angin nra yib ngak e piin yad ra pigpig ngak Got. (Ps. 73:24) Ku arrogodad nrayog ni ngaud lemnaged e pi tow’ath ni ke pi’ Jehovah ngodad. Ma gad lemnag rogon feni thil e par rodad ni faanra darud pigpiggad ngak Jehovah. Faan gad ra rin’ e re n’ey, ma aram e rayog ni ngad pared ni gad ba yul’yul’ ma gad yog fapi thin ni yog faen ni yoloy e Psalm ni faani gaar: “Gag e kari felan’ug, ya gu be par u tooben Got!”​—Ps. 73:28.

18. Mang fan ndariy rogon ni ngad rusgad ko n’en nra buch boch nga m’on?

¹⁸ Demtrug e re miti magawon ni gad ra mada’nag e ngiyal’ ney ko tin tomuren e rran ma rayog ni nga darod u fithik’ ni bochan e gad be “pigpig ko bin nriyul’ e Got ni ir e be par nib fos.” (1 Thess. 1:9) Got rodad e ir Be’ nib riyul’ ma ma ayuweg e piin yad ma liyor ngak. I ayuweg e pi tapigpig rok kakrom maku ra ayuwegdad e ngiyal’ ney. Dabki n’uw nap’an ma ra yib e bin th’abi ga’ e gafgow nra yib nga fayleng. Machane dab darod u fithik’ ni yigoo gadad, ya ra ayuwegdad Jehovah. (Isa. 41:10) Ere “dab kud tamdaggad ma nge lungudad, I Somol e ir e be ayuwegeg, ere dab gu tamdag!”​—Heb. 13:​5, 6.