1. Mang fan nrayog ni nge yib angin e Psalm 15:​1-5 ngodad?

 KAD filed ko fa binem e article ni pi tapigpig rok Jehovah ni kar ognaged yad ngak mab chugur e tha’ u thilrad e rayog ni ngar uned nga lan e tent rok nib fanathin. Machane mang e ba t’uf ni ngad rin’ed ya nge yag nda uned nga lan e tent rok? Be weliy e Psalm 15 murung’agen e re n’ey. (Mu beeg e Psalm 15:​1-5.) Bay boch ban’en nrayog ni ngad filed ko re thin ney nrayog ni nge ayuwegdad ni ngad chugurgad ngak Got.

2. Mang e rayog ni be lemnag David ni ir e yoloy e Psalm u nap’an ni weliy murung’agen fare tent rok Jehovah?

² Tin som’on e thin ko Psalm 15 e be gaar: “Somol, mini’ e rayog ni nge par u lan e tempel [ara tent] rom? Mini’ e ra par u Zion, ni fare burey rom nib thothup?” (Ps. 15:1) Nap’an ni weliy David ni ir e yoloy e Psalm murung’agen fare “tent” rok Jehovah, ma rayog ni be lemnag fare tabernacle ni immoy ba ngiyal’ u Gibeon. Ki weliy David murung’agen fare ‘burey rok Got nib thothup,’ nsana be yip’ fan fare Burey ni Zion ni bay u Jerusalem. Aram e gin ni pag David bangi tent riy nge fek fare kahol ko m’ag nge yan i tay ngay nge taw ko ngiyal’ ni kan toy fare tempel, ma re gin’em e sogonap’an in e mayel ko yimuch u Gibeon.​—2 Sam. 6:17.

3. Mang fan nsusun e ngad adaged ni ngad nanged e n’en bay ko Psalm 15? (Kum guy e sasing.)

³ Riyul’ ni yooren piyu Israel e dabiyog ni ngar pigpiggad u tabernacle ara ranod nga lan fare tent ni bay fare kahol ko m’ag riy. Machane gubin e tapigpig rok Jehovah ni yad ba yul’yul’ nrayog ni ngar uned nga lan e tent rok nib fanathin ni aram e ngar manged fager rok mar guyed rogon ni ngaur pared nib fel’ e tha’ u thilrad. Gad gubin ni ireray e n’en gad baadag. Be weliy e Psalm  15 boch ban’en nib t’uf ni ngad rin’ed ya nge yag nda pared ni gadad boch e fager rok Jehovah.

UM FOL U FITHIK’ URNGIN BAN’EN MA GA BE RIN’ E TIN NIB MAT’AW

4. Uw rogon ni kad nanged ni gathi yigoo taufe e ba m’agan’ Jehovah ngay ni ngad rin’ed? (Isaiah 48:1)

⁴ Be yog e Psalm 15:2 ni be’ ni ir e fager rok Got e “ma fol rok Got u fithik’ urngin ban’en, ma gubin ngiyal’ ni ma rin’ e tin nib mat’aw.” Ireray ban’en nthingar ud rin’ed ni gubin ngiyal’. Machane gur, rayog ni ngaud ‘folgad rok Got u fithik’ urngin ban’en’? Arrogon. Yugu aram rogon ndariy be’ nib flont, ma faan gad ra athamgil u rogon nrayog rodad ni ngaud folgad rok Jehovah, ma aram e ra i sap ngay ni gad be ‘fol rok u fithik’ urngin ban’en.’ Nap’an ni gad ra ognaged gadad ngak Got ngad uned ko taufe, ma aram tabolngin e pigpig rodad ngak. Mu tay fanam i yan riy ni kakrom e faanra ke yib be’ ko fare nam nu Israel ma aram e gathi be yip’ fan ni bay u lan fare tent rok Jehovah. Immoy boch i yad ni i yog ni be liyor ngak Got machane da i rin’ “u fithik’ e yul’yul’ nge tin nib mat’aw.” (Mu beeg e Isaiah 48:​1, NW. a) Piyu Israel ni yad ba yul’yul’ e ba t’uf ni ngar filed e pi motochiyel rok Jehovah mar folgad riy. Ku arrogon e ngiyal’ ney ni faanra ngad fel’gad u wan’ Got, ma de gaman ni kemus ni ngad uned ko taufe mu ud chaggad ko ulung ni Kristiano, ya gubin ngiyal’ nthingar ud ‘rin’ed e tin nib mat’aw.’ Uw rogon nrayog ni ngad rin’ed e re n’ey?

5. Mang e be yip’ fan ni ngaud folgad rok Jehovah u fithik’ urngin ban’en?

⁵ Rogon u wan’ Jehovah e faanra ngaud ‘folgad rok u fithik’ urngin ban’en’ ma gad be “rin’ e tin nib mat’aw,” ma aram e gathi kemus ni be yip’ fan ni ngaud uned ko muulung u Tagil’ e Liyor ni gubin ngiyal’. (1 Sam. 15:22) Ya thingar da guyed rogon ni ngaud folgad rok Got u gubin ban’en ni gad ma rin’, ngki mada’ ko ngiyal’ ni yigoo gadad. (Prov. 3:6; Ekl. 12:​13, 14) Rib ga’  fan ni ngad guyed rogon ni ngad folgad rok Jehovah u gubin ban’en ni kub muun ngay e tin gad be lemnag ni gathi rib ga’ fan. Gad ra rin’ e re n’ey ma aram e gad be dag nriyul’ nib t’uf rodad, ma aram e n’en ma k’aring ni ngari t’ufegdad.​—John 14:23; 1 John 5:3.

6. Mang e kab ga’ fan ko tin nib fel’ ni ud rin’ed kafram nrogon ni be yog e Hebrews 6:​10-12?

⁶ Rib ga’ fan u wan’ Jehovah e n’en ud rin’ed ni fan ngak kafram. Machane bochan ni ud rin’ed boch ban’en nib fel’ kafram, ma gathi aram e be yip’ fan nra ud pared u lan e tent rok Jehovah ndab da chuwgad. Ireray e n’en kan tamilangnag ko Hebrews 6:​10-12. (Mu beeg.) Der ma pag Jehovah talin e tin nib fel’ ni ud rin’ed kafram. Machane baadag ni ngaud pigpiggad ngak u polo’ i gum’ircha’dad “nge yan i taw ko tomur.” “Faanra dab da paged gadad,” ma aram e ra par ni ir e fager rodad ndariy n’umngin nap’an.​—Gal. 6:9.

MOG E THIN NIB RIYUL’ MAG YUL’YUL’

7. Mang e ba muun ngay ni nge riyul’ e thin ni gad ma yog ma gad yul’yul’?

⁷ Be’ ni baadag ni nge par u lan e tent rok Jehovah e thingari “riyul’ e thin ni ma yog ma ba yul’yul’.” (Ps. 15:2) Re n’ey e gathi kemus ni be yip’ fan ndab un ban. Ya baadag Jehovah ni ngad yul’yul’gad ko thin nge ngongol rodad. (Heb. 13:18) Ba ga’ fan e re n’ey ya Jehovah e “ba fanenikan e girdi’ ni ma rin’ e kireb, machane ma fek e girdi’ nib mat’aw ngar manged tafager rok.”​—Prov. 3:​32, BT.

8. Ba miti mang ngongol e ba t’uf ni ngad siyeged?

⁸ Piin ‘nriyul’ e thin ni yad ma yog ma yad ba yul’yul’’ e faanra yad bay u fithik’ yugu boch e girdi’ ma darur yad ma dake yad be fol, machane mar th’abed e pi motochiyel rok Got u nap’an nder guyrad be’. (Isa. 29:13) Darur sasalapgad. Be’ nib sasalap e rayog ni nge tabab ni nge lemnag ni gathi gubin ngiyal’ nib fel’ e pi motochiyel rok Jehovah. (Jas. 1:​5-8) Sana rayog ndabi fol rok Jehovah u boch ban’en ni be lemnag ni gathi rib ga’ fan. Ma faanra be m’ug ndariy ban’en nib kireb ni be buch rok u nap’an nder fol, ma aram e rayog ni nge tabab ni nge rin’ boch ban’en nib gel e kireb riy. Ere mus ni faanra be lemnag ni be pigpig ngak Jehovah, machane dabi m’agan’ ko liyor ni be tay ngak. (Ekl. 8:11) Machane gadad e gad baadag ni ngad yul’yul’gad u gubin ban’en.

9. Mang e rayog ni ngad filed ko yay nsom’on ni mada’nag Jesus Nathanael? (Kum guy e sasing.)

 ⁹ Rayog ni ngad filed feni ga’ fan e yul’yul’ ko yay nsom’on ni mada’nag Jesus Nathanael. Nap’an ni pining Filip Nathanael ni fager rok ni ngar mada’gow Jesus, me buch ban’en ni yira ngat ngay. Yugu aram rogon ndawori mada’ Jesus nge Nathanael ba ngiyal’ u m’on riy, machane me gaar Jesus: “Cha’ney e riyul’ ni ir be’ u Israel, ni be’ nrib yul’yul’!” (John 1:47) Ba mudugil ni ma lemnag Jesus nib yul’yul’ e tin ka bay i gachalpen, machane i guy ni Nathanael e ri kab gel e yul’yul’ rok. Nathanael e ir be’ ndawori flont ni bod gadad, machane gathi ir be’ ni ma dake modingnag ir ya ba yul’yul’ u gubin ban’en. Baadag Jesus e re fel’ngin nem ni immoy rok me yog nib fel’ e n’en be rin’. Ri gad ba tow’ath ni faanra yog Jesus ban’en ni aray rogon u murung’agdad!

10. Mang fan nsusun e ngaud kol ayuwgad ko n’en gad ma yog? (James 1:26)

¹⁰ Yooren ban’en ni kan weliy ko Psalm 15 e bay rogon ko ngongol rodad ko girdi’. Be yog e Psalm 15:3 ni be’ ni bay u lan e tent rok Jehovah e ‘der t’ar e thin nga daken e girdi’. Der rin’ ban’en nib kireb ko pi fager rok, ma der thibthibnag e piin yad bbuguli yoror.’ Faanra ud t’ared e thin nga daken yugu boch e girdi’ ma rayog ni ngar da kirebnaged lanin’rad, ma aram e dabkiyog ni ngad pared u lan e tent rok Jehovah.​—Mu beeg e James 1:26.

11. Uw rogon ni nge t’ar be’ e thin nga daken be’? Mang e yima rin’ ngak e piin yad ma t’ar e thin nga daken e girdi’ ndarur kalgadngan’rad?

¹¹ I weliy fare psalmist murung’agen be’ ni be t’ar e thin nga daken be’. Mang e re n’ey ni nge t’ar be’ e thin nga daken be’? Ra t’ar be’ e thin nga daken be’, ma aram e ke yog ban’en nde riyul’ u murung’agen facha’ ni nge kirebnag thin. Piin yad ma t’ar e thin nga daken e girdi’ ndarur kalgadngan’rad e yima chuwegrad ko ulung ni Kristiano.​—Jer. 17:10.

12-13. Mang boch ban’en ni ma buch nrayog ni ngad gathibthibnaged e pi fager rodad riy ndab da nanged? (Kum guy e sasing.)

¹² Ku be puguran e Psalm 15:3 ngodad ni piin  yad bay u lan e tent rok Jehovah e darur rin’ed ban’en nib kireb ko piin yad bbuguli yoror maku darur gathibthibnaged e pi fager rorad. Uw rogon nrayog ni nge buch e re n’ey?

¹³ Rayog ni ngaud gathibthibnaged be’ ndarud nanged ni faanra ud weliyed boch ban’en nib kireb u murung’agen. Am lemnag boch ban’en nrayog ni nge buch: (1) ke tal reb e walag nib pin ko pigpig u polo’ e tayim, (2) ke tal ba wu’ e mabgol ko pigpig u Bethel, ara (3) bay reb e walag ni pumoon ni gathi ka ir reb e piilal ara ministerial servant. Gur, ba puluw ni ngad sananaged fan ni ke buch e pi n’ey ma gad weliy e n’en gad be lemnag ngak yugu boch e girdi’, fa? Rayog ni bay fan ni ke buch e pi n’ey ndad nanged. Maku reb e be’ ni bay u lan e tent rok Jehovah e ‘der rin’ ban’en nib kireb ko pi fager rok, ma der thibthibnag e piin yad bbuguli yoror.’

MU TAYFAN E PIIN YAD MA FOL ROK JEHOVAH

14. Mu weliy rogon ni ma palog e piin yad bay u lan e tent rok Jehovah rok e “piin ni yad ba kireb u wan’ Got.”

¹⁴ Be yog e Psalm 15:4 ni fager rok Jehovah e “dabun e piin ni yad ba kireb u wan’ Got.” Uw rogon ma gad nang nib kireb be’ u wan’ Got? Gadad e girdi’ ndawor da flontgad e de bung rogodad ni ngad dugliyed ko ba kireb be’ u wan’ Got fa danga’. Mang fan? Ya rayog ni bay boch e girdi’ ni gad baadag daken ni bochan boch ban’en u rarogorad ma boch e yad ma k’aring e kankanan’ ngodad. Aram fan nsusun e yigoo piin yad ba “kireb” u wan’ Jehovah e ngad paloggad rorad. (1 Kor. 5:11) Pi cha’ney e ba muun ngay e piin yad ma rin’ boch e ngongol nib kireb ndarur kalgadngan’rad, ara yad ma darifannag e michan’ rodad, ara yad ma guy rogon ni ngar kirebnaged e tha’ u thildad Jehovah.​—Prov. 13:20.

15. Mang reb e kanawo’ ni ngad ted fan e “piin ni yad ma fol rok Somol” riy?

¹⁵ Be yog e Psalm 15:4 ngodad ni ngad ted fan e “piin ni yad ma fol rok Somol.” Ere gad ma gay boch e kanawo’ nrayog ni ngad daged e sumunguy nge tayfan riy ko pi fager rok Jehovah. (Rom. 12:10) Ni uw rogon? Reb e kanawo’ ni kan weliy murung’agen ko Psalm 15:4 e be yog ni be’ ni bay u lan e tent rok Jehovah e “gubin ngiyal’ ni ma rin’ e tin ni ke micheg ngak be’ nra rin’, ndemturug gelngin e gafgow nra tay riy.” Faanra dab da ted u gil’ e n’en kad micheged, ma rayog ni ngad kirebnaged laniyan’ yugu boch e girdi’. (Matt. 5:37) Bod ni baadag Jehovah ni piin yad bay u lan e tent rok e ngar ted u gil’ e n’en kar micheged u lan e mabgol rorad. Ku ma felfelan’ u nap’an nra athamgil e piin gallabthir u rogon nrayog rorad ni ngar ted u gil’ e n’en kar micheged ngak pi fakrad. T’ufeg rodad ngak Got nge girdi’ e ra k’aringdad ni ngad ted u gil’ e n’en kad micheged u rogon nrayog rodad.

16. Ku mang reb e kanawo’ ni ngad ted fan e pi fager rok Jehovah riy?

¹⁶ Ku reb e kanawo’ ni ngad ted fan e pi fager rok Got riy e aram e ngaud golgad. (Rom. 12:13) Faanra ud rin’ed e pi walag boch ban’en u taabang ni ngad felfelan’gad, ma aram e ra chugur e tha’ u thildad mu kud chugurgad ngak Jehovah. Maku reb e faanra ud golgad ngorad, ma aram e gad be folwok rok Jehovah.

DABI PAG FENI GA’ FAN E SALPIY U WAN’UM

17. Mang fan ni kan weliy murung’agen e salpiy ko Psalm 15?

¹⁷ Kad beeged u Bible ni be’ ni bay u lan e tent rok Jehovah e ‘ma pi’ e salpiy . . . ni der yin’ e win rok ngay, ma der fek puluwon e sasalap ni fan e nge micheg ban’en nib togopuluw ngak be’ nib fel’ e rok.’ (Ps. 15:5) Mang fan ni kan weliy murung’agen e salpiy ko re thin ney? Ya faanra yigi pag feni ga’ fan e salpiy u wan’dad, ma aram e rayog ni nge tomur e girdi’ nge Got u wan’dad. (1 Tim. 6:10) Kakrom e immoy boch e girdi’ ni ur sasalapgad ngak pi walagrad ni aram e u ron’ed e win rorad ko salpiy ni kar pied ngorad ni ka yad ra fulweg. Ku immoy boch e tapuf oloboch  ni ur feked puluwon e sasalap mar micheged boch ban’en nib togopuluw ngak e piin nib fel’ e rorad. Ba fanenikan Jehovah e mit ney e ngongol.​—Ezek. 22:12.

18. Mang boch e deer nrayog ni nge ayuwegdad ni ngad fal’eged i lemnag rogon e salpiy u wan’dad? (Hebrews 13:5)

¹⁸ Ba fel’ ni ngad fal’eged i lemnag rogon e salpiy u wan’dad. Mu fithem ni nge lungum: ‘Ba ga’ nug ma lemnag e salpiy nge n’en nrayog ni nggu chuw’iy ngay, fa? Faanra kug ning e salpiy ngak be’ ni kug ra sulweg, mab n’uw nap’an mfin gu sulweg ni bochan e gu be lemnag ni faen ke pi’ fare salpiy ngog e de t’uf rok, fa? Faanra bay e salpiy rog, ma gu ma lemnag nib ga’ fag mab mo’maw’ ngog ni nggu gol ko girdi’, fa? Gu ma lemnag ni pi walag ni boor e salpiy rorad e ba m’on e salpiy u wan’rad, fa? Gu ma m’ag fager ko piin boor ban’en rorad ma da gur chag ko piin yad ba gafgow, fa?’ Kan pagdad ni ngad uned nga lan e tent rok Jehovah. Ere rayog ni ngad ayuweged e biney e tow’ath ni kan pi’ ngodad ni faanra dabi pag feni ga’ fan e salpiy u wan’dad. Faan gad ra rin’ e re n’ey, ma aram e dariy ba ngiyal’ nra pagdad Jehovah!​—Mu beeg e Hebrews 13:5.

MA T’UFEG JEHOVAH E PI FAGER ROK

19. Mang fan ni baadag Jehovah ni ngad rin’ed fapi n’em ni kan weliy murung’agen ko Psalm 15?

¹⁹ Baaray e n’en kan micheg u tungun e Psalm 15 ni kan gaar: “Cha’ ni ma rin’ e pi n’ey e ba mudugil u but’ ni dariy ban’en nra buch rok.” (Ps. 15:​5, BT) Ke weliy fare psalmist u roy fan ni baadag Jehovah ni ngad rin’ed e pi n’ey. Baadag ni ngad felfelan’gad. Ere ma pi’ e fonow ngodad ni faan gad ra fol riy ma ra tow’athnagdad me yororiydad ndabi buch ban’en rodad.​—Isa. 48:17.

20. Mang e rayog ni nge athapeg e piin yad bay u lan e tent rok Jehovah?

²⁰ Piin yad bay u lan e tent rok Jehovah e rayog ni ngar athapeged boch ban’en nib manigil ni ka bay nga m’on. Piin kan dugliyrad ni yad ba yul’yul’ e yad ra un nga lan fapi “singgil” ni ke ngongliy Jesus ni fan ngorad u tharmiy. (John 14:2) Piin yad be athapeg e par u fayleng e yad be sonnag e n’en ke micheg e Revelation 21:3. Ba mudugil ni gad gubin nib ga’ fan u wan’dad e tow’ath ni ke pi’ Jehovah ngodad ni ngad manged fager rok ma gad par u lan e tent rok ndariy n’umngin nap’an!