1. Mang e taarebrogonnag David Jehovah ngay nrogon ni bay ko Psalm 18:46?

 GAD be par u ba fayleng ni gad ma mada’nag e magawon riy nrayog ni nge mo’maw’nag ara thilyeg rogon e par rodad. Gad ba felfelan’ ngay nrayog ni ngad sapgad ngak Jehovah Got ni nge ayuwegdad! Kan puguran ngodad ko fa binem e article ni Jehovah e ir fare Got nib fos ma gubin ngiyal’ ni ke fal’eg rogon ni nge ayuwegdad. Nap’an nra ayuwegdad, ma ma micheg e re n’ey nga lanin’dad ni “Jehovah e bay nib fos!” (Mu beeg e Psalm 18:​46, NW. a) Tomuren ni yog David e re n’ey, me yog ni Got e “bod bangi Malang” u puluwon. Mang fan ni taarebrogonnag Jehovah ni ir fare Got nib fos nga bangi malang ndariy e yafos riy?

2. Mang e gad ra weliy ko re article ney?

² Gad ra weliy ko re article ney fan ni yima yog ni Jehovah e bod bangi malang nge n’en be fil e re n’ey ngodad u murung’agen. Ku gad ra fil rogon ni ngaud ted ni bod bangi Malang u puluwdad. Ngemu’ ma gad weliy boch e kanawo’ nrayog ni nge m’ug pi fel’ngin Jehovah rodad.

FAN NI YIMA YOG NI JEHOVAH E BOD BANGI MALANG

3. Uw rogon nib ga’ ni ma fanay e Bible fare bugithin ni “malang”? (Kum guy e sasing.)

³ Ma fanay e Bible fare bugithin ni “malang” ni nge ayuwegdad ni nge tamilang u wan’dad boch i fel’ngin Jehovah. Ba ga’ ni yima fanay e re bugithin ney u boch e thin nu Bible ni be pining e sorok ngak ni ir fare Got ndariy reb e got ni taareb rogon ngak. Yay nsom’on ni ka nog ni Jehovah e “ba gel [ara bod bangi Malang]” e bay ko Deuteronomy 32:4. Me Hannah e yog u lan e meybil rok ni “dariy reb e malang ni bod e Got rodad.” (1 Sam. 2:2) Habakkuk e yog ni Jehovah e “yoror” rok ara bod bangi Malang u puluwon. (Hab. 1:12) Ma en ni yoloy e Psalm 73 e yog ni Got e ‘ir gelngin’ ara bod  bangi malang ni be par u gum’irchaen. (Ps. 73:26) Mus ngak Jehovah me yog ni ir e bod bangi malang. (Isa. 44:8) Ere chiney e ngad weliyed dalip e fel’ngin ni bay rok Jehovah ni aram fan nrayog ni ngan taarebrogonnag nga bangi malang nge rogon nrayog ni ngaud ted ni ir e “bod bangi Malang u puluwdad.”​—Deut. 32:​31, NW.

4. Uw rogon ni Jehovah e ir e manaf rodad? (Psalm 94:22)

⁴ Jehovah e ir e manaf rodad. Ma ayuwegdad ndabi buch ban’en rodad u nap’an ni kad mada’naged reb e magawon nib mo’maw’ ni bod bangi malang nib ga’ yang nrayog ni nge mith be’ nga fon u tan bangi lang. (Mu beeg e Psalm 94:22.) Ma taydad ndabi buch ban’en rodad miki ayuwegdad u boch ban’en nrayog ni ngad gafgowgad riy ndariy n’umngin nap’an. Ki micheg nra munmun me chuweg urngin ban’en ni be magawonnag e gapas nge pagan’ rodad.​—Ezek. 34:​25, 26.

5. Uw rogon nrayog ni ngad ted Jehovah ni ir e Manaf rodad?

⁵ Reb e kanawo’ nrayog ni ngad ted Jehovah ni ir e Manaf rodad e aram e ngaud meybilgad ngak. Nap’an ni gad ra meybil, ma ma pi’ e “gapas rok” ngodad ni ir e ma yororiy gum’ircha’dad nge tafinay rodad. (Fil. 4:​6, 7) Am lemnag e n’en ni buch rok Artem nreb e walag ni pumoon nni kalbusnag ni bochan e michan’ rok. Boor yay ni i fith reb e polis boch e deer ngak nib gel e thin rok ni i gafgownag ma be guy rogon ni nge k’aring e marus ngak. I yog Artem ni gaar: “Nap’an nra piningeg ni nggu wan gguy, ma ri ma magafan’ug nib gel. . . . Gubin ngiyal’ nug ma meybil ngak Jehovah. Gu ma yog ngak ni nge gapaseg lanin’ug me pi’ e gonop ngog. Ug par ni gub gapas ni yugu aram rogon ni i gafgownageg. . . . Bochan ni ayuwegeg Jehovah mug par ni gowa bod ni gub sak’iy u fon ba yoror ni kan ngongliy ko malang.”

6. Mang fan ni gubin ngiyal’ nrayog ni ngad taga’gad ngak Jehovah? (Isaiah 26:​3, 4)

⁶ Rayog ni ngad taga’gad ngak Jehovah. Gubin ngiyal’ ni bay Jehovah ni nge ayuwegdad ni bod ba malang ndabiyog ni ngan mithmitheg. Rayog ni nge pagan’dad ngak ni bochan e “gubin ngiyal’ ni bay i yoror rodad.” (Mu beeg e Isaiah 26:​3, 4, BT.) Gubin ngiyal’ ni be par nib fos ma ra tay u gil’ e tin ke micheg, me rung’ag e meybil rodad, me ayuwegdad. Ku rayog ni ngad taga’gad ngak ni bochan e ba yul’yul’ ngak e piin yad ma pigpig ngak. (2 Sam. 22:26) Dariy ba ngiyal’ nra pagtalin e tin gad ma rin’, ma gubin ngiyal’ nra tow’athnagdad.​—Heb. 6:10; 11:6.

7. Nap’an ni gad ra taga’ ngak Jehovah, ma mang e ra buch rodad? (Kum guy e sasing.)

⁷ Nap’an ni gad ra taga’ ngak Jehovah u polo’ i gum’ircha’dad, ma aram e gad be tay ni bod bangi Malang u puluwdad. Ba pagan’dad ni faan gad ra fol rok ngki mada’ ko ngiyal’ nib mo’maw’, ma ra yib angin ngodad. (Isa. 48:​17, 18) Nap’an ni gad ra guy rogon ni be ayuwegdad, ma aram e ra gel e pagan’ rodad ngak me yag nda athamgilgad u fithik’ boch e magawon ni yigoo ir e rayog ni nge ayuwegdad u fithik’. Ba ga’ ni gad ma nang gelngin nrayog ni ngad taga’gad ngak Jehovah u nap’an ni kad mada’naged boch e magawon ndariy be’ nrayog ni nge ayuwegdad riy. I yog Vladimir ni gaar: “Nap’an nni yan teg nga bangi ban’en ndabkiyog ni nggu wan nga bang, ma aram e ngiyal’ nug thamiy ni kar gu chugur ngak Jehovah. Gu fil rogon ni ngari pagan’ug ngak  Jehovah ni bochan e yigoo gag u rom ma dariy ban’en nrayog ni nggu rin’.”

8. (a) Mang fan nrayog ni nga dogned ni Jehovah e dabi thil? (b) Mang angin nra yib ngodad ni faanra par Got ni bod bangi Malang u puluwdad? (Psalm 62:​6, 7)

⁸ Jehovah e dabi thil. Jehovah e ma par nib mudugil ndabi thil ni bod bangi malang nib ga’ yang. Dabi thil rarogon nge n’en nib m’agan’ ngay. (Mal. 3:6) Nap’an nni togopuluw ngak u Eden ma de thilyeg e n’en nib m’agan’ ngay ni fan ko girdi’. I yoloy apostal Paul ni Jehovah e “dabiyog ni nge thiliyeg rogon ni ir Got.” (2 Tim. 2:13) Re n’ey e be yip’ fan ndemtrug e n’en nra buch ara rin’ yugu boch e girdi’, ma dabi thilyeg Jehovah rarogon, ara n’en nib m’agan’ ngay, ara pi motochiyel rok. Bochan nib pagan’dad ko Got rodad ndabi thil, ma aram fan nrayog ni nge pagan’dad ngak ni nge ayuweg e yafos rodad me ayuwegdad u nap’an ni gad be mada’nag boch e magawon nib mo’maw’.​—Mu beeg e Psalm 62:​6, 7. 

9. Mang e kam fil ko n’en ni buch rok Tatyana?

⁹ Gad ra tay Jehovah ni bod bangi Malang u puluwdad ni faanra ud lemnaged pi fel’ngin nge n’en nib m’agan’ ngay. Gad ra rin’ e re n’ey, ma aram e rayog ni ngad pared nib gapas lanin’dad ma gad ba yul’yul’ ngak u nap’an ni gad be mada’nag e magawon. (Ps. 16:8) Ireray e n’en ni buch rok reb e walag nib pin ni ka nog Tatyana ngak nni kalbusnag u tafen ndabkiyog ni nge yan nga bang ni bochan e michan’ rok. I yog ni gaar: “Yigoo gag ni ug par. Som’on e ba mo’maw’ mab ga’ ni i mulan’ug.” Machane nap’an ni guy ni skeng ni be mada’nag e bay rogon ngak Jehovah nge n’en nib m’agan’ ngay, ma aram me yag ni nge athamgil miki yib gelngin bayay. I yog ni gaar: “Bochan ni gu manang fan ni be buch e re n’ey ma aram e n’en ni ayuwegeg ni nge dab gu pagtalin ni fan nug be mada’nag e pi magawon ney e bochan Jehovah. Aram e n’en ke ayuwegeg ni nge dab kug par ni yigoo gag e gu be lemnageg.”

10. Uw rogon nrayog ni nge par Jehovah ni bod bangi Malang u puluwdad e chiney?

¹⁰ Bay boch e skeng ni gad ra mada’nag boch nga m’on nra t’uf ni ngar da taga’gad riy ngak Jehovah. Ere ireray e ngiyal’ ni ngad gelnaged e pagan’ rodad ngak nra pi’ e tin nib t’uf rodad ya nge yag nda pared ni gad ba yul’yul’ ngak. Uw rogon nrayog ni ngam rin’ e re n’ey? Aram e ngaum beeg murung’agen boch e girdi’ u Bible nge boch e Pi Mich e ngiyal’ ney, mag lemnag rogon ni ke ayuweg Got e pi tapigpig rok. Mu fal’eg i lemnag e pi n’ey. Ga ra rin’, ma aram e rayog ni nge ayuwegem ni ngam tay Jehovah ni bod bangi Malang u puluwom.

NGE M’UG PI FEL’NGIN JEHOVAH ROM

11. Mang fan ni gad baadag ni nge m’ug pi fel’ngin Jehovah rodad? (Kum guy fare kahol ni kenggin e “ Ban’en ni Nge Nameg e Pi Walag ni Ka Yad Ba Pagel.”)

¹¹ Kad weliyed boch e fel’ngin ni ke m’ug riy ni Jehovah e taareb rogon nga bangi malang. Ere chiney e ngad weliyed rogon nrayog ni nge m’ug e pi fel’ngin nem rodad. Faan gad ra athamgil u rogon nrayog rodad ni nge m’ug e pi fel’ngin ney rodad, ma aram e rayog ni ngad gelnaged e ulung rodad. Bod ni tunguy Jesus Cephas (ni kan pilyeg ni “Peter”) ngak Simon, ni be yip’ fan “Bangi Malang.” (John 1:​42, NW) Re n’ey e be dag nra i fal’eg Peter laniyan’ e ulung ma be gelnag e michan’  rorad. Be yog e Bible ni piin piilal e yad e “tagalul’ u ba war ni ba ga’ ni ba ga’.” Re n’ey e be yip’ fan ni yad ma ayuweg e girdi’ u lan e ulung ndabi buch ban’en rorad. (Isa. 32:2) Machane rayog ni nge bagadad me pi’ e athamgil nga laniyan’ bagadad ni faan gad ra guy rogon ni nge m’ug pi fel’ngin Jehovah rodad.​—Efe. 5:1.

12. Mu weliy boch e kanawo’ nrayog ni ngad manged manaf rok yugu boch e girdi’ riy.

¹² Ngam mang manaf rok yugu boch e girdi’. Yu ngiyal’ e rayog ni ngad pied bang ni nge naf pi walagdad ngay u nap’an ni ke buch ban’en ni kan gafgow riy, ara nap’an e wagey ni be tay e girdi’, ara mahl. Chiney ni be gel e kireb ko “tin tomren e rran” e dariy e maruwar riy ni boor e kanawo’ nra mab ngodad ni ngaud ayuweged gadad riy. (2 Tim. 3:1) Ku rayog ni ngaud fal’eged laniyan’ pi walagdad ma gad be t’ufegrad. Reb e kanawo’ nrayog ni ngad rin’ed e re n’ey riy e aram e ngaud nonad ngorad u nap’an ni yad ra yib ko muulung ma gad fal’eg lanin’rad. Gad baadag ni nge par e ulung rodad ni aram bang ni bay e t’ufeg riy ma yima pi’ e athamgil riy nga laniyan’ e girdi’. Gad be par u ba fayleng ndakuriy e t’ufeg riy mab gel e mochuch ni yima tay riy. Ere nap’an nra un pi walagdad ko muulung ma gad baadag ni ngad pied e athamgil nga lanin’rad ma gad dag ni gad be t’ufegrad.

13. Uw rogon nrayog ni nge mang e piin piilal manaf ngak e pi walag? (Kum guy e sasing.)

¹³ Piin piilal e rayog ni ngar manged manaf ngak e pi walag u lan e ulung u nap’an ni yad be mada’nag boch e magawon. Nap’an nra buch ban’en ni kan gafgow riy ara ke m’ar be’ nib tomgin, ma ma gur e piin piilal ni ngar yarmiyed rogon ni ngan ayuweg e pi walag. Ku yad ma ayuwegrad ko tirok Got ban’en. Ra mom ko pi walag ni ngar ninged e ayuw ngak reb e piilal ni faanra ir be’ nib sumunguy, ma ma guy rogon ni nge nang rogon lanin’rad, mab m’agan’ ngay ni nge motoyil ngorad. Pi fel’ngin ney e ma ayuweg e pi walag ni ngar nanged ni yibe t’ufegrad, me  momnag ngorad ni ngar folgad ko fonow nib puluw ko Bible nrayog ni nge pi’ reb e piilal ngorad.​—1 Thess. 2:​7, 8, 11.

14. Uw rogon ni ngad daged nrayog ni ngan taga’ ngodad?

¹⁴ Mu dag nrayog ni ngan taga’ ngom. Gad baadag ni nge nang yugu boch e girdi’ nrayog ni ngar taga’gad ngodad nib ga’ nu nap’an ni kar mada’naged boch e magawon nib mo’maw’. (Prov. 17:17) Mang e rayog ni ngad rin’ed ya ngad manged boch e girdi’ nrayog ni ngaun taga’ ngodad? Rayog ni ngad guyed rogon ni nga i m’ug pi fel’ngin Got rodad ni gubin ngiyal’ ni bod ni ngaud ted u gil’ e tin kad micheged mad athamgilgad u rogon nrayog rodad ni ngad tawgad ko gin nsusun e nga darod ngay nib tayim. (Matt. 5:37) Ku rayog ni ngad ognaged e ayuw ngak be’ ko ngiyal’ ni ke t’uf e ayuw rok. Maku reb e ngad guyed rogon ni ngad mu’naged e maruwel ni kan pi’ ngodad nib puluw nga rogon ni ka nog ngodad ni ngad rin’ed.

15. Faanra rayog ni ngan taga’ ko piin piilal, ma uw rogon nra yib angin ko ulung?

¹⁵ Piin piilal nrayog ni ngan taga’ ngorad e bay angirad ko ulung. Ni uw rogon? Faanra manang e pi walag nrayog ni ngar nonad ko piin piilal u nap’an ni ke t’uf e ayuw rorad, ma aram e rayog ni nge war e magafan’ rorad. Ku yad ra nang ni yibe t’ufegrad ni faanra ba m’agan’ e piin piilal ngay ni ngar ayuweged yad. Maku reb e faanra guy e piin piilal rogon ni nge puluw e fonow ni yad be pi’ ko Bible nge pi babyor ni ke ngongliy fare tapigpig nib yul’yul’ ko bin ngar pied e fonow nrogon  ni yad be lemnag, ma aram e ra pagan’ e pi walag ngorad. Ku ma pagan’ e pi walag ngak reb e piilal ndabi weliy e magawon rorad ngak be’ maku ma tay u gil’ e n’en ke micheg.

16. Faanra gad be par ni gad ba mudugil, ma mang angin nra yib ngodad nge yugu boch e girdi’?

¹⁶ Mu par ni gab mudugil. Rayog ni ngad daged e kanawo’ nib manigil ni nge folwok yugu boch e girdi’ riy ni faanra ud pared ni gad ba mudugil ni fan ko tin nib fel’ ma gad be dugliy boch ban’en nib puluw ko pi kenggin e motochiyel u Bible. Nap’an nra gel e michan’ rodad me yoor ban’en nda nanged u lan e Thin rok Got, ma aram e rayog ni ngad pared ni gad ba mudugil ko tin riyul’. Gad ra nang boch e machib nde riyul’ nge boch ban’en ni yima weliy nde puluw ko lem rok Jehovah, ma dab da paged e pi n’ey ni nge suruydad. (Efe. 4:14; Jas. 1:​6-8) Michan’ rodad ngak Jehovah nge tin ke micheg e ra ayuwegdad ni ngad pared nib gapas lanin’dad u nap’an ni kad rung’aged murung’agen boch ban’en nib kireb. (Ps. 112:​7, 8) Ku rayog ni ngad ayuweged e piin nrayog ni yad be mada’nag boch e magawon.​—1 Thess. 3:​2, 3.

17. Mang e ma ayuweg e piin piilal ni ngar ayuweged yugu boch e girdi’ ni ngar pared ni yad ba gapas mab gel e michan’ rorad ngak Jehovah?

¹⁷ Piin piilal e dab ur rin’ed boch ban’en nge pag rogon, ma ngaur pared nib tamilangan’rad, ma yad ba yaram, mab puluw rogon ni yad ma lemnag boch ban’en. Pi pumoon ney e yad ma ayuweg yugu boch e girdi’ ni ngar pared ni yad ba gapas mab gel e michan’ rorad ngak Jehovah ma yad ma pi’ gelngin e ulung u rogon ‘ndarur paged e thin rok Got ni ir e nge pagan’uy ngay.’ (Titus 1:9; 1 Tim. 3:​1-3) Yad ma dag e kanawo’ nrayog ni nge folwok e pi walag riy maku yad ma pi’ e athamgil nga lanin’rad u rogon ni yad ma ayuwegrad ni ngaur uned ko muulung nge machib ni gubin ngiyal’, ma yad be fil e Bible rorad ni yigoo yad. Nap’an nra mada’nag e pi walag boch e magawon nra k’aring e magafan’ ngorad ma yad ma puguran ngorad ni ngar taga’gad ngak Jehovah mu ur lemnaged e tin ke micheg.

18. Mang fan ni gad baadag ni ngad pininged e sorok ngak Jehovah ma gad chugur ngak? (Kum guy fare kahol ni kenggin e “ Reb e Kanawo’ ni Ngan Chugur Riy Ngak Jehovah.”)

¹⁸ Tomuren ni kad weliyed murung’agen pi fel’ngin Jehovah nrib manigil, ma rayog ni nga dogned fapi thin ni yog David ni Pilung ni faani gaar: “Ke sorok Somol, ya ir e yoror rog [“bod bangi Malang u puluwog,” NW]!” (Ps. 144:​1, BT) Gubin ngiyal’ nrayog ni ngad taga’gad ngak Jehovah. Mus ni faanra kad pilibthirgad ma bay rogon ni nge lungudad: “Ke par ni bod bangi Malang u puluwog,” ya ba pagan’dad ni gubin ngiyal’ nra ayuwegdad ni ngad pared ni gad ba chugur ngak.​—Ps. 92:​14, 15, NW.