Deer ko Piin Ma Beeg
Mang fan nrayog ni nge yog boch e girdi’ ni Psalm 12:7, 8 e be weliy murung’agen e “tin ma micheg Somol” (ni bay ko verse 6, BT), machane fare New World Translation e be weliy murung’agen e “piin ba t’uf e ayuw rorad” (ni bay ko verse 5, BT)?
Pi thin ni bay u m’on ko gal verse ney e be weliy murung’agen e girdi’.
Be yog e Psalm 12:1-4 (BT) ni “girdi’ nib yul’yul’ e dab kun piriegrad.” Ngemu’ me yog ko Psalm 12:5-8 (BT) ni gaar:
“Be gaar Somol, ‘Chiney e bay gub, ni bochan e piin ba t’uf e ayuw rorad e yibe gafgownagrad
ma piin yibe gafgownagrad e yad be gel’gel’ u fithik’ e amith.
Bay gu pi’ ngorad e re ayuw ni yad be yim’ ni bochan.’
Tin ma micheg Somol e rayog ni nge pagan’uy ngay;
bod feni fel’ e silber, ni kan urfiy ke beech u mit e nifiy ni medlip yay.
Piin kireb e lem rorad e yad bay u gubin yang,
ma gubin e girdi’ ni ma uf ko n’en nib kireb.
A Somol, mu ayuwegmad, u pa’ e miti girdi’ nem.”
Verse 5 e be weliy e n’en nra rin’ Got ni fan ko piin nib t’uf e ayuw rorad ni aram e ra ayuweg e yafos rorad.
Be yog e verse 6 ni “tin ma micheg Somol e rayog ni nge pagan’uy ngay” ni “bod feni fel’ e silber.” Re n’ey e be tamilangnag rogon e thin rok Jehovah u wan’dad.—Ps. 18:30; 119:140.
Be gaar e gal ni migid e verse ni aram e Psalm 12:7, 8: “Piin kireb e lem rorad e yad bay u gubin yang, ma gubin e girdi’ ni ma uf ko n’en nib kireb. A Somol, mu ayuwegmad, u pa’ e miti girdi’ nem.” Mang e be weliy e gal verse ney murung’agen?
Bochan nnog e thin ko verse 7 nge 8 u tomuren e thin nnog ko verse 6 ni be weliy murung’agen e “tin ma micheg Somol,” ma aram fan nrayog ni nge lemnag boch e girdi’ nre n’ey e be yip’ fan e thin ni ke yog Got. Ma gad manang ni ke ayuweg Got e Bible ni nge par ni ka rogon ni yugu aram rogon ni ke guy e pi tatogopuluw rogon ni ngar taleged ndab kun wereg mar kirebnaged.—Isa. 40:8; 1 Pet. 1:25.
Machane ku riyul’ e n’en be yog e verse 5. Ke ayuweg Jehovah e “piin ba t’uf e ayuw rorad” nge piin “yibe gafgownagrad” maku ra ulul ni nge rin’ e re n’ey.—Job 36:15; Ps. 6:4; 31:1, 2; 54:7; 145:20.
Ere mang e be weliy e verse 7 nge 8 murung’agen?
Ba tamilang ko thin ni bay ko re tang ney nre n’ey e be weliy murung’agen e girdi’.
Psalm 12:1 e be weliy murung’agen e “girdi’ nib yul’yul’” nrayog ni kan bannagrad. Ngemu’ me yog nra togopuluw Jehovah ngak e piin yad ma yog e thin nib kireb. Re tang ney e be micheg ngodad nrayog ni nge pagan’dad nra ayuweg Got e girdi’ rok ni bochan e rayog ni nge pagan’uy ko tin ma micheg.
Ere be yog e verse 7 ni Jehovah e ra yororiy me ayuweg e piin be gafgownagrad e piin nib kireb.
Bay yu yang e babyor ni un abweg e thin ko Pi Babyor ko Bible nni Yoloy Nsom’on ni Thin ni Hebrew nga langgin ni fanay bbugithin ko re verse ney ni be sor fan ko girdi’. Ma fare Greek Septuagint e l’agruw yay ni fanay fare bugithin ni “gamad” ko verse 7 ni be yip’ fan e piin yad ba yul’yul’ nib t’uf e ayuw rorad ma yibe gafgownagrad. Ma tomur riy e be yog e verse 7 ni “gubin” e piin yad ba yul’yul’ ni yira ayuwegrad ko re “miti girdi’” ney ara piin yad ba kireb ni yad ma uf ko n’en nib kireb. (Ps. 12:7, 8) Be gaar e verse 7 ko fare Aramaic Targums: “Gur SOMOL e ga ra ayuweg e piin nib mat’aw, mag yororiyrad ko re mfen ney nib kireb ndariy n’umngin nap’an.” Ku ireray ban’en ni be micheg ni Psalm 12:7, 8 e der weliy murung’agen e tin ma micheg Got.
Bochan e re n’ey, ma be pi’ e re verse ney e athap ko “girdi’ nib yul’yul’” ni aram e ra ayuwegrad Got.
