1. Mang boch e magawon nrayog ni nga i mada’nag e girdi’ rok Jehovah?

GA BE mada’nag reb e magawon nib mo’maw’, fa? Sana rayog ni bay be’ u lan e ulung ni ke rin’ ban’en ni ke kirebnag lanin’um. (Jas. 3:2) Fa reb e sana be moningnagem e piin gimed nga maruwel ara skul ni bochan e ga be pigpig ngak Jehovah. (1 Pet. 4:3, 4) Fa reb e ku rayog ni be guy girdien e tabinaw rom rogon ni ngar taleged gur ko muulung, ara ngar taleged gur ndab kum weliy e michan’ rom ngak yugu boch e girdi’. (Matt. 10:35, 36) Faanra ga be mada’nag reb e magawon nib mo’maw’, ma rayog ni ngam lemnag ni kab fel’ ni ngam tal ndab kum pigpig ngak Jehovah. Machane rayog ni nge pagan’um ngay ndemtrug e ri miti magawon ni ga ra mada’nag, ma ra pi’ Jehovah e gonop ngom ya nge yag nim dugliy e n’en nib fel’ ni ngam rin’. Ku ra pi’ gelngim ni ngam athamgil u fithik’ e magawon ni ga be mada’nag.

2. Faan gad ra beeg e Thin rok Got, ma mang angin nra yib ngodad nrogon ni bay ko Roma 15:4?

² Ke tay Jehovah murung’agen boch e girdi’ ndawor ra flontgad nga lan e Bible ni be dag rogon ni ur athamgilgad u fithik’ boch e magawon nib mo’maw’ ni ur mada’naged. Mang fan? Bochan e ngad filed ban’en riy. Aram e n’en ni thagthagnag Jehovah nga laniyan’ apostal Paul ni nge yoloy ko Roma 15:4. (Mu beeg.) Nap’an ni gad ra beeg e pi n’ey, ma rayog ni nge fal’eg lanin’dad miki pi’ e l’agan’ ngodad. Machane de gaman ni kemus ni ngaud beeged e Bible rodad. Ba t’uf ni ngad paged e thin riy ni nge yal’uweg lanin’dad. Ere mang e rayog ni ngad rin’ed ni faanra gad be gay e fonow nrayog ni nge ayuwegdad ni ngad athamgilgad u fithik’ reb e magawon ni gad be mada’nag? Baaray aningeg ban’en nrayog ni ngad rin’ed: (1) Mmeybil, (2) Mu susunnag boch ban’en u lanin’um, (3) Mu fal’eg i lemnag, nge (4) Mu fol riy. Chiney e ngad weliyed rogon ni ngad rin’ed e re aningeg i n’ey nreb nge reb. * Ngemu’ ma gad  fanay e pi n’ey u nap’an ni gad ra weliy boch ban’en ni buch rok David ni Pilung nge apostal Paul.

3. Mang e susun ni ngam rin’ u m’on ni ngam beeg Bible rom, ma mang fan?

³ (1) Mmeybil. U m’on ni ngam beeg e Bible rom, mag wenig ngak Jehovah ni nge ayuwegem ni ngam nang rogon nrayog ni nge yib angin ngom e pi n’en ga be beeg. Bod nrayog ni ngam wenig ngak ni nge ayuwegem ni ngam pirieg boch i kenggin e motochiyel u Bible nrayog ni nge ayuwegem ni ngam nang e n’en ngam rin’.​—Fil. 4:6, 7; Jas. 1:5.

4. Mang e rayog ni nge ayuwegem ni nge riyul’ u wan’um e pi n’en ga be beeg u Bible?

⁴ (2) Mu susunnag boch ban’en u lanin’um. Ke sunmiydad Jehovah nrayog ni ngaud susunnaged boch ban’en u lanin’dad. Ere nap’an ni ga be beeg e Bible rom mag guy rogon ni ngam susunnag e pi n’en be buch, mu kum susunnag ni gur e en yibe weliy murung’agem ya nge yag ni riyul’ u wan’um e n’en ga be beeg. Mu susunnag ni ga be guy e n’en be guy faen ga be beeg murung’agen nge pi n’en nsana be lemnag.

5. Mang e thingari mu fal’eg i lemnag, ma uw rogon nrayog ni ngam rin’ e re n’ey?

⁵ (3) Mu fal’eg i lemnag. Re n’ey e be yip’ fan ni ngam fal’eg i lemnag e pi n’en ga be beeg nge rogon nib l’ag ngom. Ga ra rin’ e re n’ey, ma ra ayuwegem ni ngam puthuy u lanin’um e pi n’en ga be beeg, miki yag ni ngam nang fan nib fel’ rogon. Faan ga ra beeg e Bible rom ndab mu fal’eg i lemnag, ma bod ni ga be yaliy bogi floras ni kan t’ar ni ngan ngongliy e nunuw riy ni yugu ba wer u daken ba tebel. Machane nap’an ni ga ra fal’eg i lemnag e pi n’en ga be beeg, ma bod ni kam kunuy fapi floras nga taabang ga be firgiy ya nge yib e nunuw riy. Baaray boch e deer nrayog ni ngam fithem riy ya nge yag nim fal’eg i lemnag boch ban’en. Pi deer ney e: ‘Mang e rin’ faen yibe weliy murung’agen ya nge yag ni pithig e magawon rok? Uw rogon ni ayuweg Jehovah? Uw rogon ni nggu fanay e pi n’en kug fil riy ni nge ayuwegeg ni nggu athamgil u fithik’ e pi magawon rog?’

6. Mang fan nthingar da folgad ko pi n’en gad be fil?

⁶ (4) Mu fol riy. I yog Jesus ni faanra dab da folgad ko pi n’en gad be fil, ma gad bod be’ nib moon ni toy e naun rok nga daken e yan’. Yugu aram rogon nib gel e maruwel ni tay riy, machane ke yan i aw nib m’ay fan. Mang fan? Ya nap’an nra yib e nifeng nib gel me sugubur e lul’ nge yib e ran riy nga daken e binaw, ma ra puth e naun rok. (Matt. 7:24-27) Ere ku arrogodad ni faanra gad be meybil, ma gad be susunnag boch ban’en u lanin’dad, ma gad be fal’eg i lemnag e pi n’en gad be beeg machane darud folgad riy, ma ra yan i aw nib m’ay fan e n’en gad be rin’. Ma nap’an ni gad ra mada’nag e magawon ara ni gafgownagdad, ma de gel e michan’ rodad ni ngad athamgilgad u fithik’. Machane faan gad ra fol ko pi n’en gad be fil, ma aram e rayog ni ngad dugliyed e n’en nib fel’ ni ngad rin’ed, me gapas lanin’dad, miki gel e michan’ rodad. (Isa. 48:17, 18) Ere ngad weliyed e n’en nrayog ni ngad filed ko n’en ni buch rok David ni Pilung ni gad be fanay fare aningeg i n’em ni kad weliyed murung’agen.

7. Mang ban’en ni bay murung’agen u Bible ni ngad weliyed e chiney?

⁷ Bay reb e fager rom ara reb i girdien e tabinaw rom ni ke rin’ ban’en ni ke kirebnag lanin’um, fa? Faanra bay, ma rayog ni nge yib angin ngom e n’en ga ra fil u murung’agen David ni Pilung u nap’an ni rin’ Absalom ni fak ban’en ni kirebnag laniyan’, ngemu’ miki guy rogon ni ir e nge mang pilung.​—2 Sam. 15:5-14, 31; 18:6-14.

8. Mang e rayog ni ngam rin’ ya nge yag ni ayuwegem Jehovah?

⁸ (1) Mmeybil. Mu lemnag e n’en kam beeg ko fare thin nu Bible mag weliy ngak Jehovah rogon lanin’um ko n’en nib kireb ni kan rin’ ngom. (Ps. 6:6-9) Mu tamilangnag ngak e n’en bay u lanin’um. Tomuren mag wenig ngak ni nge  ayuwegem ni ngam pirieg boch i kenggin e motochiyel u Bible nrayog ni nge ayuwegem ni ngam nang ko mang e ngam rin’.

9. Mang e buch u thilin David nge Absalom?

⁹ (2) Mu susunnag boch ban’en u lanin’um. Mu lemnag e n’en ni buch, mag susunnag u lanin’um rogon e magawon ni mada’nag David ni Pilung. Boor e duw ni i guy Absalom ni fak rogon ni nge adag e girdi’ daken. (2 Sam. 15:7) Nap’an ni taw ko ngiyal’ nib puluw u wan’ Absalom, ma aram me l’og boch e girdi’ ni damit rok ni nga ranod ngak urngin e pi ganong nu Israel ni ngar pingeged laniyan’ e girdi’ ni nge m’agan’rad ngay ni ir e nge mang pilung rorad. Ki guy rogon ni nge thilyeg e lem rok Ahithofel nreb e fager rok David nge tafonow rok nrib chugur thilrow ya nge yag ni un ngak ngar togopuluwgow ngak David. I yog Absalom ni ir e ke mang pilung, ma aram me guy rogon ni nge kol David ni nge li’ nge yim’, ma ngiyal’ nem e rayog nib m’ar David nib ubchiya’. (Ps. 41:1-9) I nang David e n’en be rin’ Absalom, ma aram me mil nge chuw u Jerusalem. Boch nga tomuren ma aram me cham e salthaw rok Absalom ngak e salthaw rok David. Machane me war e ba’ rok Absalom e salthaw, ma aram min li’ nge yim’.

10. Mang e rayog ni nge rin’ David ni Pilung?

¹⁰ Bin migid e mu susunnag u lanin’um e pi n’en nrayog ni i lemnag David u nap’an ni be buch e pi n’ey rok. Rib t’uf Absalom rok, ma ri ma pagan’ ngak Ahithofel. Machane ra chelgow ngar togopuluwgow ngak. Re n’ey e ri kirebnag laniyan’ David. Kur guyew rogon ni ngar liew nge yim’. Ere rayog ni nge lemnag David ni tin ka bay e fager rok e kar uned ko ba’ rok Absalom, ma dabkiyog ni nge pagan’ ngorad. Rayog ni nge lemnag ni nge ayuweg e yafos rok, me guy rogon ni nge mil ko re nam nem ndabi un be’ ngak. Fa reb e rayog ni nge pag ir nge mulan’ nib gel. Machane dariy reb ko pi n’ey ni rin’ David. Ya n’en ni rin’ e gel ko magawon nib mo’maw’ ni mada’nag. Mang fan ni yag ni nge rin’ e re n’ey?

11. Mang e rin’ David u nap’an ni mada’nag e biney e magawon nib mo’maw’?

¹¹ (3) Mu fal’eg i lemnag. Mang boch i kenggin e motochiyel nrayog ni ngam fil ko re n’ey? Mu pi’ e fulweg ko re deer ni baaray ni be gaar, “Mang e rin’ David ya nge yag ni pithig e magawon rok?” De wagagey laniyan’ me gurnag ir nge dugliy boch ban’en nde puluw. Ku de rus nib pag rogon ndabkiyog ni nge dugliy e n’en nge rin’. Ya n’en ni rin’ e meybil ngak Jehovah ni nge ayuweg. Ki ning e ayuw ko pi fager rok. Ngemu’ me gurnag ir nge rin’ e n’en ke dugliy. Yugu aram rogon nri kireban’ ko n’en ni buch, machane de pag e re n’ey ni nge k’aring ni nge dabki pagan’ ngak yugu boch e girdi’ ara par nib damumuw. Ya ulul ni nge pagan’ ngak Jehovah nge pi fager rok.

12. Mang e rin’ Jehovah ni nge ayuweg David?

¹² Uw rogon ni ayuweg Jehovah David? Faan ga ra fal’eg i gay murung’agen e re n’ey, ma ga ra fil riy ni pi’ Jehovah gelngin David ni nge athamgil u fithik’ e re magawon ney. (Ps. 3:1-8; footnote) I tow’athnag Jehovah David ko pi n’en ni dugliy. Miki ayuweg e pi fager rok ni yad ba yul’yul’ ngak u nap’an ni yad be cham ni ngar ayuweged e pilung rorad.

13. Uw rogon nrayog ni ngam folwok rok David u nap’an ni ke rin’ be’ ban’en ngom ni ke kirebnag lanin’um? (Matthew 18:15-17)

¹³ (4) Mu fol riy. Mu fithem ni nge lungum, ‘Uw rogon nrayog ni nggu folwok rok David?’ Nap’an ni ga ra mada’nag reb e magawon, mab t’uf ni ngam rin’ ban’en ngay ni ka chingiyal’ nem. Rayog ni ngam fol ko fonow rok Jesus ni bay ko Matthew ko guruy ni 18 nri bod rogon ni be yog e re guruy ney, ara ngam fol ko pi kenggin e motochiyel nib l’ag rogon ngay ni be yan u rogon e magawon ni ke sum. (Mu beeg e Matthew 18:15-17.) Machane susun e dab mu gur ngam dugliy ban’en u fithik’ e damumuw. Susun e ngam meybil ngak Jehovah ni nge pi’ e gapas nge gonop ngom, ya nge yag nim nang e n’en ngam rin’. Nge pagan’um ko pi fager rom, me m’agan’um ngay ni ngar ayuweged gur. (Prov. 17:17) Ma bin  th’abi ga’ fan riy e, ngam fol ko fonow ni ke pi’ Jehovah ngom ni bay u lan e Thin rok.​—Prov. 3:5, 6.

14. Mingiyal’ e rayog ni nge pi’ fapi thin ko 2 Timothy 1:12-16; 4:6-11, 17-22 e athamgil nga lanin’um?

¹⁴ Be togopuluw girdien e tabinaw rom ngom ni bochan e ga be pigpig ngak Jehovah, fa? Ga be par u reb e nam ni bay boch ban’en u rogon e maruwel ko girdi’ rok Jehovah ni kan taleg riy ara kan taleg ni gubin, fa? Faanra arrogon, ma aram e rayog ni nge yib e athamgil nga lanin’um u nap’an ni ga ra beeg fapi thin ni bay ko 2 Timothy 1:12-16 nge 4:6-11, 17-22. * I yoloy Paul e pi thin nu Bible ney u nap’an ni bay u kalbus.

15. Mang e rayog ni ngam wenignag ngak Jehovah?

¹⁵ (1) Mmeybil. U m’on ni ngam beeg fapi thin nu Bible, mag weliy e magawon rom ngak Jehovah nge rogon lanin’um riy. Mu weliy gubin ban’en nib tamilang. Tomuren mag wenig ngak ni nge ayuwegem ngam pirieg boch i kenggin e motochiyel ni bay ko fapi thin nu Bible ni be weliy murung’agen e n’en ni buch rok Paul nra ayuwegem ni ngam nang e n’en ngam rin’.

16. Mang e buch rok Paul?

¹⁶ (2) Mu susunnag boch ban’en u lanin’um. Mu susunnag ni gur Paul. Bay u kalbus u Roma ni kan chennag. Ka un kalbusnag kafram, machane yaney e ke mudugil ni ngan thang e fan rok. Bay boch e girdi’ ni ur uned ngak ni kar digeyed, ma kari aw parawon.​—2 Tim. 1:15.

17. Mang e rayog ni nge rin’ Paul?

¹⁷ Rayog ni nga i lemnag Paul e tin ke thumur ban’en. Rayog ni nge lemnag ni faan gomanga de mang reb e Kristiano nib pasig ko machib, ma rayog ni nge dab ni kalbusnag. Ku rayog ni nge damumuw ko fapi pumoon ko nug nu Asia ni kar digeyed. Ku rayog ni nge dabki pagan’ ko tin ka bay e fager rok. Machane dariy reb e pi n’ey ni rin’ Paul. Ere mang fan nib pagan’ ngay nra par e pi fager rok ni yad ba yul’yul’ ngak ma ra tow’athnag Jehovah?

18. Mang e rin’ Paul u nap’an ni mada’nag e re magawon ney nib mo’maw’?

¹⁸ (3) Mu fal’eg i lemnag. Mu pi’ e fulweg ko re deer ni baaray ni be gaar, “Mang e rin’ Paul ya nge yag ni pithig e magawon rok?” Yugu aram rogon ni manang ni bayi yim’, machane de pagtalin feni ga’ fan ni nge pining e sorok ngak Jehovah. Ki ulul ni nga i lemnag rogon nrayog ni nge pi’ e athamgil nga laniyan’ yugu boch e girdi’. I taga’ ngak Jehovah u daken e meybil ni i tay ni gubin ngiyal’. (2 Tim. 1:3) Ku de par ni be lemnag fapi walag ni pumoon ni kar digeyed. Ya i weliy feni ga’ fan u wan’ e ayuw ni i pi’ e pi fager rok ngak u fithik’ e t’ufeg. Maku reb e, ki ulul ni nga i fil e Thin rok Got. (2 Tim. 3:16, 17; 4:13) Bin th’abi ga’ fan riy e, ri pagan’ ngay nib t’uf rok Jehovah nge Jesus. Dawor ra digeyew, ma yow ra tow’athnag ko pigpig ni be tay u fithik’ e yul’yul’.

19. Uw rogon ni ayuweg Jehovah Paul?

¹⁹ I yog Jehovah ngak Paul u m’on riy ni yira gafgownag ni bochan e ir reb e Kristiano, ere ba t’uf ni nge athamgil u fithik’ e pi n’em. (Acts 21:11-13) Uw rogon ni ayuweg Jehovah Paul? I fulweg taban e meybil rok Paul, me munmun me pi’ gelngin. (2 Tim. 4:17) Ni micheg ngak Paul ni yira pi’ fare tow’ath ngak ni ke maruweliy nib gel ni nge yag ngak. Ki fanay Jehovah e pi fager rok Paul ni yad ba yul’yul’ ngak ni ngar ayuweged ko tin nib t’uf rok.

20. Uw rogon nrayog ni ngam folwok rok Paul nrogon ni bay ko Roma 8:38, 39?

²⁰ (4) Mu fol riy. Mu fithem ni nge lungum, ‘Uw rogon nrayog ni nggu folwok rok Paul?’ Gad manang ni yira gafgownagdad ni bochan e gad be pigpig ngak Jehovah ni bod Paul. (Mark 10:29, 30) Ere ba t’uf ni ngaud pared ni gad be meybil ngak Jehovah, ma gad be fil e Thin rok ni gubin e rran ya nge yag nda pared ni gad ba yul’yul’ u nap’an ni gad ra mada’nag e magawon. Thingar dab da paged talin ni n’en th’abi ga’ fan nrayog ni  ngad rin’ed e aram e ngad pininged e sorok ngak Jehovah. Rayog ni nge pagan’dad ndariy ba ngiyal’ nra digeydad Jehovah, ma dariy ban’en nrayog ni nge rin’ be’ ni nge taleg Jehovah ndab ki t’ufegdad.​—Mu beeg e Roma 8:38, 39; Heb. 13:5, 6.

21. Mang e ayuweg Aya nge Hector ni ngar gelgow ko magawon nra mada’nagew?

²¹ Piin bay murung’agrad u Bible e rayog ni nge ayuwegdad ni nge yib gelngidad ni ngad athamgilgad u fithik’ urngin mit e magawon ni ke yib ngodad. Bod ni, Aya nreb e pioneer u Sapan e yog ni fare chep u murung’agen Jonah e ayuweg ni nge dabki rus ni nge un ko machib ko yungi n’en ni ma muulung e girdi’ ni yoor ngay. Ku bay reb e fel’ yangaren ni ma par u Indonesia ni ka nog Hector ngak nder ma pigpig e gallabthir rok ngak Jehovah ni yog ni n’en ni fil u murung’agen Ruth e ayuweg ni nge adag ni nge nang murung’agen Jehovah me pigpig ngak.

22. Uw rogon nrayog ni ngari yib angin ngom boch ban’en ni kan ngongliy nib puluw nga boch e chep u Bible nge fapi article ni kenggin e “Mu Folwok ko Michan’ Rorad”?

²² Uw e gin nrayog ni ngam pirieg riy murung’agen e piin bay murung’agrad u Bible nrayog ni nge pi’ gelngim? Pi video rodad, nge boch ban’en ni kan ngongliy nrayog ni ngan motoyil ngay, nge fapi article ni kenggin e “Mu Folwok ko Michan’ Rorad” e rayog ni nge ayuwegdad ni nge riyul’ u wan’dad e pi n’en gad be beeg u Bible. * U m’on ni ngam yaliy, ara ngam motoyil, ara ngam beeg murung’agen reb e pi n’ey ni kan fal’eg i gay murung’agen, mag wenig ngak Jehovah ni nge ayuwegem ngam pirieg boch ban’en riy nib ga’ fan nrayog ni ngam fol riy. Mu susunnag ni gur e en yibe weliy murung’agem. Mu fal’eg i lemnag e n’en ni rin’ e pi tapigpig rok Jehovah ney ni yad ba yul’yul’, nge rogon ni ayuwegrad ni ngar gelgad ko magawon rorad. Tomuren ma aram mag fol ko pi n’en ni kam fil riy nrayog ni nge ayuwegem ko magawon rom. Ngemu’ mag pining e magar ngak Jehovah ko ayuw ni be pi’ ngom. Kum dag nib ga’ fan u wan’um rogon ni be ayuwegem Jehovah ni aram e ngam gay boch e kanawo’ nrayog ni ngam pi’ e athamgil riy nga laniyan’ yugu boch e girdi’ mag ayuwegrad.

23. Mang e ke micheg Jehovah nra rin’ ni fan ngodad nrogon ni be yog e Isaiah 41:10, 13?

²³ Ba mo’maw’ e par u lan e re fayleng ney ni be gagiyegnag Satan. Ere yu ngiyal’ e rayog ndab kud nanged e n’en ni ngad rin’ed. (2 Tim. 3:1) Machane dariy rogon ni nge magafan’dad ara ngad rusgad, ya manang Jehovah e pi magawon ni gad be mada’nag. Ke micheg nnap’an nra t’uf e ayuw e rodad ma ra ayuwegdad nga ba’ ni mat’aw i pa’ nib gel. (Mu beeg e Isaiah 41:10, 13.) Ba pagan’dad nra ayuwegdad Jehovah, ma rayog ni nge pi’ e thin nu Bible gelngidad ni ngad athamgilgad u fithik’ urngin mit e magawon ni ma yib ngodad.