1. Mang fan ni yog Jesus ngak Jehovah ni nge ayuweg pi gachalpen?

NAP’AN e bin tomur e nep’ ko yafos rok Jesus u fayleng, ma i lemnag urngin e magawon nra i mada’nag pi gachalpen. Bochan nib t’uf pi gachalpen rok, ma aram me yog ngak e Chitamangin ni nge “ayuwegrad rok Faanem nib Kireb.” (John 17:14, 15) Machane manang Jesus nu tomuren nra sul nga tharmiy, ma ra ulul Satan ni Moonyan’ ni nga i cham ngak e piin yad baadag ni ngar pigpiggad ngak Jehovah. Ere ba tamilang nib t’uf ni ngan ayuweg e girdi’ rok Jehovah.

2. Mang fan nrayog ni nge pagan’dad nra fulweg Jehovah taban e meybil rodad?

² I fulweg Jehovah taban e meybil rok Jesus ni bochan e ba t’uf Fak rok. Ere faan gad ra athamgil u rogon nrayog rodad ni ngad rin’ed e tin nib m’agan’ Jehovah ngay, maku ra t’ufegdad, ma ra motoyil ko meybil rodad u nap’an ni gad be meybil ngak ni nge ayuwegdad me yororiydad. Jehovah e ir reb e Matam ni ma t’ufeg pi fak. Ere ra ulul ni nga i ayuwegrad. Ya faanra dabi rin’, ma aram e be darifannag e ngachal rok, maku ra kireb thin riy!

3. Mang fan nib t’uf ni nge ayuwegdad Jehovah e ngiyal’ ney?

³ Chiney e ireray e ngiyal’ nrib t’uf ni nge ayuwegdad Jehovah. Ka nin’ Satan nga wuru’ e tharmiy ni “kari damumuw.” (Rev. 12:12) Ke yag rok ni nge micheg nga laniyan’ boch e girdi’ ni yad be gafgownagdad ni faan yad ra rin’ e pi n’em, ‘ma aram e yad be pigpig ngak Got.’ (John 16:2) Ku bay boch e girdi’ nde mich Got u wan’rad ni yad ma gafgownagdad ni bochan e gad ba thil ko girdi’ ko re fayleng ney. Machane demtrug rogon ma rayog ni nge pagan’dad. Mang fan? Bochan ni be gaar e Thin rok Got: “Somol e ba yul’yul’, ma bayi gelnagmed me ayuwegmed rok Faanem nib Kireb ndabi buch ban’en romed.” (2 Thess. 3:3) Uw rogon ni ma ayuwegdad Jehovah? Ngad weliyed l’agruw e kanawo’ ni ma rin’ e re n’ey riy.

4. Mang e ke pi’ Jehovah nrayog ni nge ayuwegdad nrogon ni bay ko Efesus 6:13-17?

⁴ Bay bogi talin e cham ni ke pi’ Jehovah nrayog ni nge ayuwegdad  ko cham ni be tay Satan ngodad. (Mu beeg e Efesus 6:13-17.) Pi talin e cham ney ni ke pi’ Got ngodad e ba gel ma rayog ni nge ayuwegdad! Machane, faanra nge yororiydad mab t’uf ni ngad ululgad ngad maruwelgad ngay ni gubin. Mang e be yip’ fan reb nge reb e pi talin e cham ney? Ngad weliyed nreb nge reb.

5. Mang e tin riyul’ ni ke mang leed rodad? Mang fan nthingar da m’aged nga lukngudad?

⁵ Tin riyul’ ni ke mang leed rodad e be yip’ fan e tin riyul’ ni bay ko Thin rok Got, ni aram e Bible. Mang fan nthingar da m’aged e gi leed ney nga lukngudad? Bochan ni Satan e “ir e chitamangin urngin e malulifith.” (John 8:44) Ke yan bokum biyu’ e duw ni be bannag e “girdi’ nu fayleng ni polo’”! (Rev. 12:9) Machane rayog ni nge ayuwegdad e tin riyul’ ni bay u Bible ndab ni bannagdad. Ere uw rogon ni ngad m’aged e gi leed ney nga lukngudad? Aram e ngad filed e tin riyul’ u murung’agen Jehovah, ma gad liyor ngak u daken gelngin nib thothup “ngu fithik’ e yul’yul’,” mu kud rin’ed urngin ban’en u fithik’ e yul’yul’.​—John 4:24; Efe. 4:25; Titus 2:10.

6. Mang e tin nib mat’aw ni kad inged nga daken ngorngordad? Mang fan nthingar da inged e re n’ey nga daken ngorngordad?

⁶ Tin nib mat’aw ni kad inged nga daken ngorngordad e be yip’ fan e pi motochiyel rok Jehovah nib mat’aw. Mang fan nthingar da inged e gin’ey nga daken ngorngordad? Fa gin’en ni ma ing e salthaw nga daken ngorongoren e ma ayuweg gum’irchaen. Ere tin nib mat’aw ni kad inged nga daken ngorngordad e ma yororiydad ya nge dabi kirebnag e tin nib kireb ban’en ko re fayleng ney fithik’ i lanin’dad. (Prov. 4:23) Baadag Jehovah ni ngad t’ufeged ma gad pigpig ngak u polo’ i gum’ircha’dad. (Matt. 22:36, 37) Ere ma guy Satan rogon ni nge talegdad ndab kud pigpiggad ngak Jehovah u polo’ i gum’ircha’dad ni aram e ma k’aringdad ni ngad adaged e tin bay ko re fayleng ney nge pi n’en ma fanenikan Jehovah. (Jas. 4:4; 1 John 2:15, 16) Ma faanra dabiyog ni nge bannagdad ko biney e kanawo’, ma aram e ma guy rogon ni nge k’aring e marus ngodad ya nge yag nda togopuluwgad ko pi motochiyel rok Jehovah.

7. Uw rogon ni gad ma ing e tin nib mat’aw nga daken ngorngordad?

⁷ Gad ma ing e tin nib mat’aw nga daken ngorngordad ni aram e ma m’agan’dad ko pi motochiyel rok Jehovah u murung’agen e tin nib fel’ nge tin nib kireb ma gad fol riy. (Ps. 97:10) Sana rayog ni nge lemnag boch e girdi’ ni pi motochiyel rok Jehovah e be talegrad u boch ban’en. Machane faan gad ra tal ndab kud folgad ko pi kenggin e motochiyel u Bible, ma kad boded reb e salthaw ni ke luf fa gin’en ni ma ing e salthaw nga daken ngorongoren u nap’an ni yibe mahl ni bochan e be lemnag ni kaygi tomal. Ra rin’ e re n’ey ma de gonop! Machane, piin nib t’uf Jehovah rorad e gathi kaygi “mo’maw’” e pi motochiyel rok u wan’rad, ya bin riyul’ riy e yad manang nra ayuweg e yafos rorad.​—1 John 5:3.

8. Mang e be yip’ fan ni ngad pared nrogon ni kad fal’eged rogodad ni ngad weliyed fare thin nib fel’ e ke mang sus rodad?

⁸ Ki pi’ Paul e athamgil nga lanin’dad ni ngad pared nrogon ni kad fal’eged rogodad ni ngad weliyed fare thin nib fel’ ni murung’agen e gapas e ke mang sus rodad. Re n’ey e be yip’ fan nsusun e gubin ngiyal’ ni kad pared ni kad fal’eged rogodad ni ngad weliyed fare thin nib fel’ ni murung’agen Gil’ilungun Got. Nap’an ni gad ra weliy e tin riyul’ u Bible ko girdi’, ma aram e ku gad be gelnag e michan’ rodad. Ma yib e athamgil nga lanin’dad u nap’an ni gad ra guy rogon ni be maruwel e girdi’ rok Jehovah u ga’ngin yang e fayleng nga urngin e kanawo’ ni ke mab ngorad ya nge yag nra machibgad. Bod ni, yad ma machib u tabon e maruwel, ngu skul, ngu mit e tabinaw i yan, nge yungi n’en ni yima siyobay riy, ngu nap’an ni ka ranod nga kantin ko chuway’, ara ka ranod ni ngar guyed e girdi’ rorad ni gathi yad boch e Pi Mich, ara nap’an ni yad be non boch e girdi’ ni yad manang. Faanra ngad paged e marus ni nge talegdad ndab kud machibgad, ma aram e kad boded reb e salthaw ni ke luf e sus rok u nap’an ni yibe mahl. Ra rin’ e re n’ey mab mom nra maad’ad e rifrif u ay, ma n’en nra buch e  aram e ra mo’maw’ ngak ni nge ayuweg ir ko cham ni yibe tay ngak, maku dabiyog ni nge rin’ e n’en be yog e en nib ga’ ko salthaw.

9. Mang fan nib t’uf ni ngaud feked fa gin’en nib ga’ yang ni gad ma mith nga fon ni be yip’ fan e michan’ rodad?

⁹ Fa gin’en nib ga’ yang ni gad ma mith nga fon e be yip’ fan e michan’ rodad ngak Jehovah. Ba mich u wan’dad nra lebguy urngin e tin ke micheg. Re michan’ ney e ra ayuwegdad ni ngad ‘piliged urngin gan e gat’ing ni be yik’ ni be pag Faanem nib Kireb ngodad.’ Mang fan nib t’uf ni ngad feked e gin’ey nib ga’ yang ni gad ma mith nga fon? Bochan nrayog ni nge yororiydad ko pi machib ni ma wereg e piin kar digeyed e tin riyul’ ma kar chelgad kar togopuluwgad ngay, miki ayuwegdad ndabi mulan’dad u nap’an ni be moningnagdad e girdi’ ni bochan e michan’ rodad. Faanra dariy e michan’ rodad, ma dariy gelngidad ni ngad folgad rok Jehovah u nap’an nra guy e girdi’ rogon ni ngar towasariyed gadad ni nge dab kud folgad rok. Machane, gubin yay ni gad ra siyeg ndab da rin’ed ban’en u tabon e maruwel ara skul nde m’agan’ Jehovah ngay, ma aram e be yororiydad e michan’ rodad. (1 Pet. 3:15) Ma gubin yay ni gad ra siyeg reb e maruwel nib tolang puluwon nra talegdad ndabkiyog ni ngad pied e tin th’abi fel’ rodad ni fan ko pigpig rodad ngak Jehovah, ma aram e be yororiydad e michan’ rodad. (Heb. 13:5, 6) Ma gubin yay ni gad ra ulul ni ngad pigpiggad ngak Jehovah ni yugu aram rogon ni yibe togopuluw ngodad, ma aram e be yororiydad e michan’ rodad.​—1 Thess. 2:2.

10. Mang kanawoen ni ma thap e girdi’ ngak Got ni ke mang urwach rodad? Mang fan nthingar da ted e re urwach ney nga lolugdad?

 ¹⁰ Kanawoen ni ma thap e girdi’ ngak Got ni ke mang urwach rodad e be yip’ fan e athap rodad ni ke pi’ Jehovah. Aram e athap rodad nra tow’athnag Jehovah e piin yad be rin’ e tin nib m’agan’ ngay, nge athap rodad ni faan gad ra yim’ ma ra fasegdad ko yam’. (1 Thess. 5:8; 1 Tim. 4:10; Titus 1:1, 2) Athap rodad ni ke mang urwach rodad e ma ayuweg rogon e lem ni gad ma tay ni bod rogon e urwach ni ma tay e salthaw nga lolugen ni ma ayuweg lolugen ndabi maad’ad. Ni uw rogon? Re athap ney ni bay rodad e ma ayuwegdad ni ngad pared ni gad be tedan’dad ko tin ke micheg Got ma dab da lemnaged e pi magawon rodad nge pag rogon. Uw rogon ni gad ma tay e re urwach ney nga lolugdad? Aram e ngaud guyed rogon ni ngaud lemnaged boch ban’en ni bod rogon ni ma lemnag Got. Bod ni, gad ma par ni ke l’agan’dad ngak Got ma gathi pi flaab nu fayleng.​—Ps. 19:14; 26:2; 1 Tim. 6:17.

11. Mang fare sayden ni ke pi’ gelngin Got nib thothup ngodad? Mang fan nthingar da fanayed e gi sayden ney?

¹¹ Fare sayden ni ke pi’ gelngin Got nib thothup ngodad e aram e Thin rok Got ni bay u Bible. Gi sayden ney e bay gelngin ni nge gagiyelnag urngin mit e ban me ayuweg e girdi’ ni nge dab kur manged sib u boch e machib ni googsur nge boch e ngongol nib kireb ni yima mecham ngay. (2 Kor. 10:4, 5; 2 Tim. 3:16, 17; Heb. 4:12) Gad ma fil rogon ni ngad fanayed e re sayden ney nib fel’ rogon u daken e fol Bible ni gad ma tay ni goo gadad nge pi skul ni ma tay e ulung rok Got ngodad. (2 Tim. 2:15) Machane gathi kemus ni yigoo fapi talin e cham ni ke pi’ Jehovah ngodad e ma ayuwegdad, ya ku bay ban’en nib gel gelngin ni ke pi’ nrayog ni nge yororiydad. Mang e re n’em?

12. Mang e ka bay nib t’uf rodad, ma mang fan?

¹² Reb e salthaw ni ke n’uw nap’an ni ke un ko salthaw e manang ndabiyog ni nge cham nga ba ulung i salthaw nib ga’ nge gel ngorad ni goo ir, ya ba t’uf ni nge ayuweg e tin ka bay e salthaw ni yad ba mang nga bang. Ku arrogodad ndabiyog ni ngad gelgad ko cham ni gad be tay ngak Satan nge piin yad ba mang ngak ni goo gadad, ya ba t’uf ni nge ayuwegdad pi walagdad. Ke pi’ Jehovah boch e girdi’ ‘ni gadad ni ke mich Got u wun’rad’ ni yad bay u ga’ngin yang e fayleng ni yad pi walagdad nrayog ni ngar ayuweged gadad.​—1 Pet. 2:17.

13. Uw rogon ni ma ayuwegdad e pi muulung rodad nrogon ni bay ko Hebrews 10:24, 25?

¹³ Reb e kanawo’ nrayog ni ngan ayuwegdad riy e aram e ngaud uned ko muulung. (Mu beeg e Hebrews 10:24, 25.) Gad gubin ni ma mulan’dad yu ngiyal’. Nap’an nra buch e re n’ey rodad, ma muulung e rayog ni nge pi’ e athamgil nga lanin’dad. Pi fulweg ni ma pi’ e pi walagdad ni keb u gum’ircha’rad e ma pi’ e athamgil nga lanin’dad. Pi welthin ni yima pi’ nib puluw e thin riy ko Bible nge boch ban’en ni yima yan u yaan e ma pi’ e athamgil nga lanin’dad ni ngad pigpiggad ngak Jehovah. Ma nap’an ni gad ra sabethin pi walagdad u m’on ngu tomuren e muulung maku ma pi’ e athamgil nga lanin’dad. (1 Thess. 5:14) Maku reb e, pi muulung rodad e ma bing e kanawo’ ngodad ni ngad ayuweged yugu boch e girdi’, ma re n’ey e ma k’aring e felfelan’ ngodad. (Acts 20:35; Rom. 1:11, 12) Ku bay boch e kanawo’ ni ma ayuwegdad e muulung riy. Ma ayuwegdad ni ngad manged boch e tamachib nge sensey nib manigil. Bod ni, ma ayuwegdad ni ngad filed rogon ni ngad fanayed e pi n’en ni bay ko fare Tafen Talin e Maruwel ni Yima Fil Ban’en Riy ko Girdi’ nib fel’ rogon. Ere mu fal’eg rogom nib fel’ rogon ni fan ko pi muulung ni gad ma tay. Ma nap’an ni yibe muulung, mag motoyil nib fel’ rogon. Ma tomuren e muulung, mag fol ko pi n’en ni kan skulnagem riy. Faan ga ra rin’ ni aray rogon, ma aram e rayog ni “ngam par ni gur reb e salthaw rok [Kristus Jesus] nib yul’yul’ ngak.”​—2 Tim. 2:3.

14. Ku mang reb e ban’en ni bay nrayog ni nge ayuwegdad?

¹⁴ Ku bokum milyon e engel nib gel gelngirad ni yad be ayuwegdad. Am lemnag e n’en nrayog ni nge rin’ taareb e engel! (Isa. 37:36) Ere mu lemnag  e n’en nrayog ni nge rin’ ba ulung i engel nib gel gelngirad. Dariy reb e girdi’ ara kan nib kireb nrayog ni nge gel ko pi salthaw rok Jehovah nib gel gelngirad. Jehovah e ir e en th’abi gel gelngin. Ere faanra bay ni be ayuwegdad, ma gubin ngiyal’ ni gad ra gel ko pi toogor rodad ndemtrug urngirad u gubin. (Judg. 6:16) Rriyul’ e re n’ey! Ere nap’an nra mulan’um ni bochan ban’en ni ke yog ara ke rin’ be’ ni gimew nga maruwel, ara skul, ara reb e girdi’ rom nde nang e tin riyul’, mag lemnag urngin e piin yad bay nrayog ni ngar ayuweged gur. Dab mu pagtalin ni gathi goo gur ni ga be un ko re cham ney. Ya ga be fol u rogon ni be pow’iyem Jehovah.

15. Mang fan ndariy be’ nrayog ni nge taleg e machib ni be tay e girdi’ rok Got nrogon ni bay ko Isaiah 54:15, 17?

¹⁵ Boor fan ni be fanenikaydad e girdi’ ko re fayleng ney ni be gagiyegnag Satan. Darud uned nga ngongolen e am, maku darud uned ko mahl. Gad ma machibnag fithingan Got, ma gad ma machibnag ni kemus ni yigoo Gil’ilungun e rayog ni nge fek e gapas i yib, maku gad ma fol ko pi motochiyel rok nib mat’aw. Gad ma micheg ko girdi’ ni en be gagiyegnag e re fayleng ney e ir be’ nib malulfith l’igin mab kireb maku ma thang e fan ko girdi’. (John 8:44) Ku gad ma weliy i yan ni bay ni thang e re fayleng rok Satan ney. Machane, Satan nge piin yad ba muun ngak e dabiyog ni ngar taleged fare maruwel ni machib ni gad ma tay. Ya gad ra ulul i pining e sorok ngak Jehovah u gubin e kanawo’ nrayog ni ngad rin’ed riy! Yugu aram rogon nrib gel gelngin Satan, machane dawori yag rok ni nge taleg fare thin ni murung’agen Gil’ilungun Got ndabi taw ko girdi’ u ga’ngin yang e fayleng. Fan ni be yag ni nge buch e re n’ey e bochan ni bay Jehovah ni be ayuwegdad.​—Mu beeg e Isaiah 54:15, 17.

16. Uw rogon nra ayuweg Jehovah e yafos ko girdi’ rok u nap’an fare gafgow nib ga’?

¹⁶ Mang e bay nga m’on? Nap’an fare gafgow nib ga’, ma bay l’agruw e kanawo’ nra ayuweg Jehovah e yafos rodad riy ni yira ngat ngay. Som’on e, ra ayuweg e yafos rok e pi tapigpig rok ni yad ba yul’yul’ ngak u nap’an nra k’aring e pi pilung nu fayleng ni ngar thanged fare Babylon nib Gilbuguwan ni be yip’ fan e pi yurba’ i teliw ni googsur. (Rev. 17:16-18; 18:2, 4) Tomuren, ma aram e ra ayuweg e yafos ko girdi’ rok u nap’an nra thang e gin ka bay ko re fayleng rok Satan ney u nap’an e Armageddon.​—Rev. 7:9, 10; 16:14, 16.

17. Mang angin nra yib ngodad ni faan gad ra par ni gad ba chugur ngak Jehovah?

¹⁷ Nap’an ni gad ra par ni gad ba chugur ngak Jehovah, ma dariy ban’en nrayog ni nge rin’ Satan nra par wenegan rodad ndariy n’umngin nap’an. Bin riyul’ riy e, ir e en yira thang ndariy n’umngin nap’an. (Rom. 16:20) Ere mon’ fapi talin e cham nga dakenam, ma dab mu luf! Dab mu guy rogon ni ngam un ko re cham ney ni goo gur. Mu ayuweg pi walagem. Mag fol u rogon ni be pow’iyem Jehovah. Faan ga ra rin’ ni aray rogon, ma rayog ni nge pagan’um ngay nra pi’ e Chitamangidad ni bay u tharmiy gelngim me yororiyem.​—Isa. 41:10.