1-2. Ra uw rogon ma aram e ra m’agan’ Got ko liyor ni gad be tay ngak?

 MANG e ma yib ngan’um u nap’an ni ga ra rung’ag fare bugithin ni “liyor”? Sana ga ra lemnag reb e walag ni pumoon nib ragbug u tooben e bet rok ni be weliy laniyan’ ngak Jehovah u daken e meybil. Fa reb e sana ga ra lemnag ba tabinaw nib felfelan’ e girdi’ riy ni yad be fol Bible nib fel’ rogon.

² Gad ra lemnag e pi girdi’ ney, ma yad gubin ni yad be rin’ boch ban’en ni fan ko liyor rorad ngak Got. Ere gur, ra m’agan’ Jehovah ko liyor ni yad be tay, fa? Ra m’agan’ ngay ni faanra ba puluw ko n’en baadag maku yad be t’ufeg ma yad be tayfan. Rib t’uf Jehovah rodad. Gad manang ni bay rogon ni ngan liyor ngak, ma gad baadag ni ngad rin’ed e re n’ey u rogon feni fel’ nrayog rodad.

3. Mang e gad ra weliy ko re article ney?

³ U lan e re article ney e gad ra weliy riy murung’agen e re miti liyor ni i m’agan’ Jehovah ngay kakrom, nge meruk e kanawo’ ni baadag ni ngad liyorgad riy ngak e ngiyal’ ney. Nap’an ni gad be weliy e pi n’ey, ma rayog ni nge bagadad me lemnag rogon ni nge mon’ognag e liyor ni be tay ngak. Ku gad ra weliy fan nra yibnag e bin riyul’ e liyor e felfelan’ ngodad.

4. Uw rogon ni dag boch e girdi’ ni ur liyorgad ngak Jehovah u m’on ni nge yib Jesus nga fayleng ni yad be tayfan mab t’uf rorad?

⁴ Immoy boch e pumoon kakrom ni yad ba yul’yul’ ni bod Abel, nge Noah, nge Abraham, nge Job nra daged ni yad be tayfan Jehovah mab t’uf rorad. Ni uw rogon? Ur rin’ed u daken e fol ni ur ted, nge michan’ rorad, nge maligach ni ur pied ngak. Der tamilangnag e Bible urngin ban’en nib t’uf ni ngar rin’ed ni fan ko liyor rorad. Machane ba tamilang nra athamgilgad u rogon  nrayog rorad ni ngar ted fan Jehovah mab m’agan’ ko liyor ni ur ted ngak. Boch nga tomuren me pi’ Jehovah fare Motochiyel rok Moses ngak e piin owchen Abraham. Pi motochiyel ney e ba muun ngay boch ban’en ni be weliy rogon ni baadag Jehovah ni ngan liyor ngak.

5. Mang e thil ko bin riyul’ e liyor u tomuren ni yim’ Jesus min faseg ko yam’?

⁵ Tomuren ni yim’ Jesus min faseg ko yam’, ma daki t’uf ni nge fol e girdi’ ko fare Motochiyel rok Moses. (Rom. 10:4) Ngiyal’ nem e ba t’uf ni nge fol e piin Kristiano u reb e motochiyel nib beech ni aram “fare motochiyel ni pi’ Kristus.” (Gal. 6:2) Rayog ni ngar folgad ko re “motochiyel” ney ni aram e ngar folwokgad rok Jesus ma yad be fol ko pi n’en i fil, ma gathi ngar filed nge mit ngorad maku yad be fol u boch e motochiyel ni boor ni be yog e n’en ngan rin’ nge n’en ndabin rin’. Pi Kristiano e ngiyal’ ney e ku yad ma athamgil u rogon nrayog rorad ni ngar leked Kristus ya nge yag nra felfelan’naged Jehovah mar ‘pirieged e toffan.’​—Matt. 11:29.

6. Uw rogon nrayog ni nge yib angin e re article ney ngodad?

⁶ Nap’an ni gad be weliy rogon kanawoen e liyor ni gad ma tay, mag fithem ni nge lungum, ‘Uw rogon ni kug mon’og ko re n’ey?’ Ku rayog ni ngam fithem ni nge lungum, ‘Rayog ni nggu mon’ognag rogon e liyor ni gu be tay, fa?’ Susun e ngam felfelan’ ko mon’og ni kam tay, machane kub t’uf ni nga mog ngak Jehovah ni nge ayuwegem ngam nang boch ban’en ni kub t’uf ni ngam mon’og riy.

7. Uw rogon u wan’ Jehovah e meybil ni ke yib u gum’ircha’dad?

⁷ Nap’an ni gad ra meybil ngak Jehovah, ma aram e gad be liyor ngak. Be taarebrogonnag e Bible e meybil ni gad ma tay ko incense ni kan fal’eg nrib fel’ rogon ni ngan ognag u tabernacle me boch nga tomuren mu un ognag u tempel. (Ps. 141:2, BT) Re incense nem e bay bon nib fel’ u wan’ Got. Ere ku arrogon e meybil ni ke yib u gum’ircha’dad nib “fel’ u wan’” ni yugu aram rogon nda ru dogned yu bugithin riy nib gagang’. (Prov. 15:8; Deut. 33:10) Bay fan ni nge mich u wan’dad ni ma felfelan’ Jehovah ni nge motoyil ngodad u nap’an ni gad be weliy ngak gelngin nib t’uf rodad ma gad be pining e magar ngak. Baadag ni ngad weliyed ngak e pi n’en be magafan’dad ngay, nge pi n’en gad be athapeg, nge pi n’en gad baadag. Ere mang ndab mu fal’eg i lemnag e n’en nga mog ngak Jehovah u m’on ni ngam meybil ngak? Faan ga ra rin’ e re n’ey, ma aram e rayog ni ngam ognag e bin th’abi fel’ e “incense” ngak e Chitamam ni bay u tharmiy.

8. Mingiyal’ e ba fel’ ni ngad pininged e sorok ngak Got?

⁸ Nap’an ni gad ra pining e sorok ngak Jehovah, ma aram e gad be liyor ngak. (Ps. 34:1) Gad ma pining e sorok ngak u nap’an ni gad ra weliy ko girdi’ feni ga’ fan u wan’dad pi fel’ngin nrib manigil nge pi n’en ke rin’. Ra ba ga’ fan u wan’um e pi n’en ke rin’ Jehovah, ma aram e ga ra pining e sorok ngak. Gad ra tay e tayim ni ngad fal’eged i lemnag urngin ban’en ni ke rin’ ni fan ngodad, ma aram e gad ra guy ni boor fan ni ngad pininged e sorok ngak. Nap’an ni gad ra un ko machib, ma aram e ngiyal’ nib fel’ ni ngad “pininged e magar ngak Got ni . . . nge mang maligach rodad ngak u daken Jesus; ni aram e . . . [ngad] pininged e magar nga fithingan u lungudad.” (Heb. 13:15) Ba t’uf ni ngad fal’eged i lemnag e n’en nga dogned ko girdi’ u nap’an e machib ni bod rogon nsusun e ngad fal’eged i lemnag e n’en nga dogned ngak Jehovah u m’on ni ngad meybilgad ngak. Gad baadag ni ngad pied e bin th’abi fel’ e “maligach” rodad ngak Got ni gad be pining e sorok ngak. Aram fan ni gad ma machib u fithik’ e pasig.

9. Uw rogon ni ma yib angin ngodad e muulung ni gad ma un ngay ni bod piyu Israel kakrom? Mu weliy reb e kanawo’ ni ke ayuwegem e muulung riy.

 ⁹ Nap’an ni gad ra un ko muulung, ma aram e gad be liyor ngak Jehovah. Nog ngak piyu Israel nni gaar: “Urngin e pumoon u lan e nam romed ma ngar bad ko fa ta’ gin’en ni tagil’ e liyor, ngar liyorgad ngak Somol ni dalip yay u reb e duw.” (Deut. 16:16, BT) Nap’an ni yad ra yan ngaram, ma dariy be’ nra matanagiy e naun nge woldug rorad. Machane i micheg Jehovah ni gaar: “Dariy be’ nra guy rogon ni nge yib i mahl ngom nge fek e but’ rom ko ngiyal’ ni baaram . . . ni nga mub nga p’eowcheg i gag Somol ni Got rom.” (Ex. 34:24) Bochan nrib mich Jehovah u wan’rad, ma aram fan ni yad ma un ko pi madnom ney u gubin e duw. Ma boor angin ni ma yib ngorad. Ya aram e ngiyal’ ni ku yad ma fil boch ban’en u murung’agen e Motochiyel rok Got, mar fal’eged i lemnag rogon feni manigil Jehovah ngorad, mar felfelan’gad ni yad be chag e piin taareb e michan’ rorad u taabang. (Deut. 16:15) Ku ireray boch i angin nra yib ngodad u nap’an ni gad ra rin’ urngin e tin nrayog rodad ni ngad uned ko muulung. Kum lemnag gelngin e felfelan’ nra tay Jehovah u nap’an ni ga ra yib ko muulung ni kam fal’eg rogom ni ngam pi’ boch e fulweg nib ngoch mab tamilang.

10. Mang fan ni tang ni gad ma tay e aram bang ko liyor rodad nib ga’ fan?

¹⁰ Nap’an ni gad ra tang, ma aram e gad be liyor ngak Jehovah. (Ps. 28:7) Ma tay piyu Israel ni tang e aram bang ko liyor rorad nib ga’ fan. I mel’eg David ni Pilung 288 e Levite ni ngaur tanggad u tempel. (1 Kron. 25:1, 6-8) Ngiyal’ ney e gad ma dag nib t’uf Got rodad u nap’an ni gad ra tang ni gad be pining e sorok ngak. De t’uf ni nge fel’ lamdad ko tang ya nge yag nda rin’ed e re n’ey. Am lemnag e re n’ey: Nap’an ni gad ra non ma “ba ga’ ni gadad ma oloboch,” machane der talegdad e re n’ey ndab kud nonad u nap’an e muulung nge machib. (Jas. 3:2) Ere ku arrogon nrayog ni ngad tanggad ni gad be pining e sorok ngak Jehovah ni yugu aram rogon ni gad be lemnag nde fel’ lamdad ko tang.

11. Mang fan nsusun e ngad ted e tayim ni ngad filed chon e tabinaw rodad e Bible u taabang nrogon ni be yog e Psalm 48:13?

¹¹ Nap’an ni gad ra fil e Thin rok Jehovah ma gad fil murung’agen ngak pi fakdad, ma aram e gad be liyor ngak. Der ma maruwel piyu Israel ko rofen ni Sabbath, ya yad ma fanay e re rran nem ni ngar gelnaged e tha’ u thilrad Jehovah. (Ex. 31:16, 17) Piin nib yul’yul’ u Israel e yad ma fil murung’agen Jehovah ngak pi fakrad nge rogon feni manigil. Ngiyal’ ney e thingar kud ted e tayim ni ngad beeged ma gad be fil e Thin rok Got. Ireray bang ko liyor rodad ngak Jehovah nra ayuwegdad ni ngad chugurgad ngak. (Ps. 73:28) Ma nap’an ni gad ra fil chon e tabinaw rodad e Bible u taabang, ma aram e gad be ayuweg pi fakdad ni yad e bin migid e mfen ni ngari chugur thilrad e Chitamangidad ni bay u tharmiy.​—Mu beeg e Psalm 48:13.

12. Mang e gad be fil u rogon ni i lemnag Jehovah e maruwel ni i tay e piin ur ngongliyed e pi n’en bay u lan e tabernacle?

¹² Nap’an ni gad ra toy e pi tagil’ e liyor rodad ma gad be ayuweg, ma aram e gad be liyor ngak Jehovah. I tay Jehovah ni maruwel ni un tay ni fan ko fare tabernacle nge pi n’en bay u langgin e ba maruwel nib thothup ni bochan e fan ko fare “Tent nib thothup.” (Ex. 36:1, 4, BT) Ngiyal’ ney e ku ma tay Jehovah ni pi Tagil’ e Liyor nge boch e naun rodad ni yima toy e aram bang ko liyor rodad. Boor e tayim ni ma tay boch e walag ni fan ko pi maruwel ney. Ere ba ga’ fan u wan’dad e pi maruwel ney ni yad ma rin’ ni fan ko fare maruwel ni machib. Machane ku yad ma un ko machib. Bay boch i yad nsana baadag ni nge un ko pioneer. Ere rayog ni nge  dag e piin piilal ni yad be ayuweg e pi maruwel ney ko dimow naun ni yima tay ni aram e ngar paged e pi walag ney ni ngar uned ko pioneer u nap’an nra bung rogorad. Demtrug ko bay e salap rodad ko dimow naun fa dariy, ma gad gubin nrayog ni ngad ayuweged e pi naun ney ni nga i par nib beech mab fel’ gubin ban’en riy.

13. Susun nge uw rogon u wan’dad e salpiy ni ayuw ni gad ma pi’ ni fan ko fare maruwel ni machib?

¹³ Nap’an ni gad ra pi’ e salpiy ni ayuw ni fan ko fare maruwel ni machib, ma aram e gad be liyor ngak Jehovah. Nap’an nra yan piyu Israel ko pi madnom ni yad ma tay, ma thingar ra feked ba tow’ath ni ngar pied ngak Jehovah. (Deut. 16:16) Re tow’ath nem e be yan u rogon e n’en nrayog ni ngar pied. Aram rogon ni yad ma dag ni yad be pining e magar ngak Jehovah ko pi n’en be rin’ ni fan ngorad. Ere uw rogon ni ngad daged nib t’uf Jehovah rodad mab ga’ fan u wan’dad e pi n’en be rin’ ni fan ngodad? Reb e kanawo’ e aram e ngad pied e salpiy ni ayuw ni fan ko re ulung ni gad ma un ngay nge fare maruwel ni machib ni yima tay u ga’ngin yang e fayleng u rogon nrayog rodad. I weliy apostal Paul murung’agen e re n’ey ni gaar: “Faanra ba pasigan’med ngay ni ngam pied ban’en, ma ra fek Got e tin ni kam pied nib tow’ath nrogon e tin nrayog ni ngam pied, ma gathi tin ndariy romed.” (2 Kor. 8:4, 12) Ba ga’ fan u wan’ Jehovah e salpiy ni ayuw ni gad ma pi’ ni yugu demtrug feni achig.​—Mark 12:42-44; 2 Kor. 9:7.

14. Uw rogon u wan’ Jehovah e ayuw ni gad ma pi’ ko pi walag ni ke t’uf e ayuw rorad nrogon ni be yog e Proverbs 19:17?

¹⁴ Nap’an ni gad ra ayuweg e pi walag ni Kristiano ni ke t’uf e ayuw rorad, ma aram e gad be liyor ngak Jehovah. I micheg Jehovah nra tow’athnag e girdi’ nu Israel ni yad be gol ngak e piin gafgow. (Deut. 15:7, 10) Arrogon, urngin yay ni gad ra ayuweg reb e walag ni ke t’uf e ayuw rok, ma ra tay Jehovah ni aram e tow’ath rodad ngak. (Mu beeg e Proverbs 19:17.) Bod nnap’an ni pi’ e pi Kristiano nu Filippi ba tow’ath nge yan ngak Paul u nap’an ni bay u kalbus, me yog nre tow’ath nem e “ba maligach ni ba adag Got ma ba fel’ u wan’.” (Fil. 4:18) Ere mu lemnag e pi walag u lan e ulung rom, mag fithem ni nge lungum, ‘Bay bagayad nrayog ni nggu ayuweg, fa?’ Ma felfelan’ Jehovah u nap’an nra guy ni gad be fanay e tayim rodad, nge gelngidad, nge pi salap rodad, nge chugum ni bay rodad ni ngad ayuweged e piin ke t’uf e ayuw rorad. Ma tay ni aram bang ko liyor rodad.​—Jas. 1:27.

15. Yugu aram rogon nib t’uf e tayim nge athamgil ni ngad ted ni fan ko bin riyul’ e liyor, machane mang fan ni gathi kaygi mo’maw’ e re n’ey?

¹⁵ Ba t’uf e tayim nge athamgil ni ngad ted ni fan ko bin riyul’ e liyor, machane re n’ey e gathi kaygi mo’maw’. (1 John 5:3) Mang fan? Ya gad ma liyor ngak Jehovah ni bochan e ba t’uf rodad. Am lemnag reb e bitir ni baadag ni nge pi’ ban’en ngak e chitamangin. Rayog ni boor e awa ni ke fanay ni nge yoloy yaan ban’en ni nge pi’ ko chitamangin. Machane der lemnag ni ke adbey e tayim rok ko re n’ey. Ya ba t’uf e chitamangin rok, mab felfelan’ ngay ni nge pi’ e re tow’ath nem ngak. Ere ku arrogodad ni gad ba felfelan’ ni ngad fanayed e tayim rodad nge gelngidad ni fan ko bin riyul’ e liyor ni bochan e ba t’uf Jehovah rodad.

16. Uw rogon u wan’ Jehovah e tin be rin’ bagadad nge bagadad ni nge felfelan’nag nrogon ni be yog e Hebrews 6:10?

¹⁶ Piin gallabthir nib t’uf pi fakrad rorad e darur lemnaged ni gubin pi fakrad ni nge taareb rogon e tow’ath ni ngar pied ngorad. Yad manang nib thilthil rarogon pi fakrad nge n’en nrayog rok bagayad nge bagayad. Ku arrogon e  Chitamangidad ni bay u tharmiy ni manang e tin rayog rok bagadad nge bagadad. Sana boor e tin rayog ni ngam rin’ ko tin rayog ni nge rin’ boor e piin ga manangrad ma yad ba t’uf rom. Fa reb e sana dabiyog ni ngam rin’ boch ban’en ni bod urngin e tin be yag rok yugu boch e girdi’ ni bochan yangarem, ara bochan ni kam m’ar, ara bochan boch ban’en nib milfan ngom u lan e tabinaw rom. Machane dabi mulan’um. (Gal. 6:4) Ya dabi pag Jehovah talin e maruwel ni ga be rin’. Faanra ga be pi’ e tin nth’abi fel’ rom ngak ma kub puluw fan ni ga be rin’, ma aram e ra felfelan’ ngay. (Mu beeg e Hebrews 6:10.) Ku manang Jehovah e n’en ni ga baadag ni ngam rin’. Baadag ni ngam felfelan’ ko tin be yag ni ngam rin’ ni fan ngak.

17. (a) Mang e rayog ni ngad rin’ed ni faanra ba mo’maw’ ngodad ni ngad rin’ed boch ko fapi n’em ni kad weliyed? (b) Uw rogon ni ke ayuwegem reb fapi n’em ni bay ko fare kahol ni “ Mu Gelnag e Felfelan’ Rom”?

¹⁷ Uw rogon ni faanra ba mo’maw’ ngodad ni ngad rin’ed boch ko fapi n’em ni kad weliyed ni bod e fol Bible ni yigoo gadad ara machib? Nap’an ni gad ra rin’ e pi n’ey ma dabisiy ni gad ra adag ni ngaud rin’ed miki yib angin ngodad. Rayog ni ngad taareb rogonnaged e liyor ni gad ma tay nga boch ban’en ni gad ma rin’ ni bod ni ngad rin’ed ban’en nib chamag ngodad, ara ngad filed rogon ni ngad salapgad i chubeg ba mit e talin e musik. Faanra fin munmun ma gad rin’ e gali n’ey, ma aram e dab da mon’oggad. Machane mang e ra buch ni faan gad ra dugliy ni ngaud rin’ed ni gubin e rran? Som’on e sana rayog ni ngad rin’ed ndabi n’uw nap’an, me munmun ma gad rin’ ni ke n’uw boch nap’an. Nap’an ni gad ra guy angin e athamgil ni gad be tay, ma aram e gad ra athapeg ni nge taw ngay ma gad adag ni ngad rin’ed. Ere ku arrogon e liyor ni gad ma tay.

18. Mang e n’en nth’abi ga’ fan nrayog ni ngad rin’ed, ma mang angin nra yib ngodad?

¹⁸ N’en nth’abi ga’ fan nrayog ni ngad rin’ed e aram e ngad pied e tin nth’abi fel’ rodad ni fan ko liyor rodad ngak Jehovah. Angin nra yib ngodad e aram e gad ra felfelan’, me yib fan e yafos rodad, miki yag e athap ngodad ni ngad liyorgad ngak Jehovah ndariy n’umngin nap’an. (Prov. 10:22) Ke gapas lanin’dad ni bochan e gad manang ni ma ayuweg Jehovah e pi tapigpig rok u nap’an ni yad ra mada’nag e magawon. (Isa. 41:9, 10) Ere bay fan ni ngad felfelan’gad u nap’an ni gad be liyor ngak e Chitamangidad ni gad ba t’uf rok ni ir e bay rogon ni nge pining e tin ke sunmiy e ‘sorok ngak mar ted fan’!​—Rev. 4:11.