1. Uw rogon e par rom u m’on ni ngam tabab ko fol Bible?

 UW ROGON e par rom u m’on ni ngam tababgad e Pi Mich Rok Jehovah ko fol Bible? Boor i gadad e dabun ni nge lemnag e re n’ey. N’en ni ma lemnag e re fayleng ney nib fel’ nge n’en ni ma lemnag nib kireb e dabisiy ni aram e n’en ni i gagiyegnag e lem rodad nge rarogodad. Ra aray rogon ma aram e ud pared ‘ndariy ban’en ni ke l’agan’dad ngay ma de moy Got rodad.’ (Efe. 2:12) Machane tomuren nda filed e Bible me thil e par rodad!

2. Mang e mu nang u tomuren nim un ko fol Bible?

² Tomuren nim un ko fol Bible, mag nang ni bay e Chitamam u tharmiy nri gab t’uf rok. Kum nang ni faanra ga baadag ni ngam felfelan’nag Jehovah mag mang reb e tapigpig rok, ma aram e boor ban’en nib t’uf ni ngam thilyeg u rogon e par rom nge lem rom. Ba t’uf ni ngam fil rogon ni ngam rin’ e n’en be yog Jehovah nib fel’ mag siyeg e n’en be yog nib kireb.​—Efe. 5:3-5.

3. Mang e baadag Jehovah ni ngad rin’ed nrogon ni bay ko Kolose 3:9, 10? Mang e gad ra weliy ko re article ney?

³ Jehovah ni Ir e Ke Sunmiydad ma ir e Chitamangidad ni bay u tharmiy e bay mat’awun ni nge dugliy rogon ni nga i ngongol e pi tapigpig rok. Ma baadag nu m’on ni ngad uned ko taufe, ma thingar da athamgilgad ngad n’aged e ‘bin kakrom i gadad nge tin ni ke mecham ngay.’ * (Mu beeg e Kolose 3:9, 10.) Re article ney e ra ayuweg e piin yad baadag ni ngar uned ko taufe ni ngar nanged e fulweg ko pi deer ni baaray: (1) Mang e ‘bin kakrom i gadad’? (2) Mang fan ni baadag Jehovah ni ngad n’aged e bin kakrom i pangidad? (3) Ma uw rogon ni ngad rin’ed e re n’ey? Gadad e piin kad uned ko taufe e ra ayuwegdad e re article ney ni nge dab kud sulod ko bin kakrom e pangin ni ud moyed riy.

4. Uw rogon be’ ni “bin kakrom” e pangin e ir e be gagiyegnag?

⁴ Be’ ni “bin kakrom” e pangin e be gagiyegnag e ba ga’ ni tin ma ar’arnag e ir e be gagiyegnag e lem nge ngongol rok. Rayog ni yigoo ir e ma lemnag ir, mab papey e damumuw ngak, ma der ma pining e magar, mab tolangan’. Ku rayog ni baadag ni ma yaliy yaan e ngongol ni puwlag, nge kachido ni bay yaan e ngongol ndarngal nge cham riy. Dariy e maruwar riy ni bay boch i fel’ngin nib manigil, maku rayog ni ma magawon laniyan’ ko pi n’en ma yog ara ma rin’ nib kireb. Yugu aram rogon ma der lemnag ni nge thilyeg e lem nge ngongol rok.​—Gal. 5:19-21; 2 Tim. 3:2-5.

5. Mang e ba puluw ni ngad lemnaged u murung’agen rogon ni ngad n’aged e bin kakrom i pangidad? (Acts 3:19)

⁵ Gad gubin ndawor da flontgad, ere dariy bagadad nrayog rok ni nge par ni gubin ngiyal’ ndabi lemnag ara ar’arnag boch ban’en nib kireb. Yu ngiyal’ e gad ra rin’ ara gad ra yog ban’en nra kalngan’dad riy. (Jer. 17:9; Jas. 3:2) Machane nap’an ni gad ra n’ag e bin kakrom i pangidad, ma aram e dabki gagiyegnagdad e lem nge ngongol nib kireb ni gad ma ar’arnag, me yag ni ngad thilgad.​—Isa. 55:7; mu beeg e Acts 3:19.

6. Mang fan ni baadag Jehovah ni ngad chuweged boch e lem nge ngongol nib kireb ni kad mechamgad ngay ni aram bang ko bin kakrom i pangidad?

⁶ Baadag Jehovah ni ngad chuweged boch e lem nge ngongol nib kireb ni kad mechamgad ngay ni bochan e ri gad ba t’uf rok ma baadag ni ngad felfelan’gad ko yafos rodad. (Isa. 48:17, 18) Manang ni piin yad ma paged yad ko tin nib kireb ni yad be ar’arnag e yad ma gafgownaged yad nge piin bay u toobrad. Dabun ni nge guydad ni gad be gafgownaged gadad nge yugu boch e girdi’.

7. Mang e ba t’uf ni ngad dugliyed nrogon nib puluw ko Roma 12:1, 2?

⁷ Rayog ni nge moningnagdad boch e fager rodad nge chon e tabinaw rodad ni bochan e gad be guy rogon ni ngad thilyeged pangidad. (1 Pet. 4:3, 4) Rayog ni nga rogned ni bay mat’awdad ni ngad rin’ed e n’en gad baadag ma susun e dab da paged boch e girdi’ ni nga rogned e n’en ngad rin’ed. Machane piin dubrad ni ngar folgad ko pi motochiyel rok Jehovah e gathi yad e yad be gagiyegnag rogon e n’en ngar rin’ed. Ya bin riyul’ riy e, yad be pag e re fayleng rok Satan ney ni nge gagiyegnagrad. (Mu beeg e Roma 12:1, 2.) Gad gubin nib t’uf ni ngad dugliyed ko ngad pared ko bin kakrom i  pangidad ni denen nge re fayleng rok Satan ney e be gagiyegnag, ara ngad paged Jehovah ni nge thilyeg rarogodad nge yan i par nga rogon nth’abi fel’ nrayog e chiney.​—Isa. 64:8.

8. Mang e ra ayuwegdad ni ngad digeyed boch e lem nge ngongol nib kireb ni kad mechamgad ngay?

⁸ Manang Jehovah nib t’uf e tayim nge athamgil ya nge yag ni ngad digeyed boch e lem nge ngongol nib kireb ni kad mechamgad ngay. (Ps. 103:13, 14) Machane ma fanay Jehovah e Thin rok, nge gelngin nib thothup, nge ulung rok ni nge pi’ e gonop ngodad, nge gelngidad, me ayuwegdad ni ngad thilyeged rarogodad. Dariy e maruwar riy ni ke ayuwegem. Chiney e ngad weliyed boch ban’en nrayog ni ngam rin’ ni ngarim n’ag e bin kakrom i pangim me bung rogom ni ngam un ko taufe.

9. Mang e ra ayuwegem e Thin rok Got ni ngam rin’?

⁹ Mu fanay e Bible ni ngam fal’eg i yaliy rarogom nib fel’ rogon. Thin rok Got e bod e therek nrayog ni nge ayuwegem ni ngam fal’eg i yaliy rogon ni ga ma lem, nge rogon ni ga ma non, nge ngongol rom. (Jas. 1:22-25) En ma fil e Bible ngom nge yugu boch e Kristiano ni kar ilalgad ko tirok Got ban’en e rayog ni ngar pied boch e fonow ni nge ayuwegem. Bod nrayog ni ngar fanayed e thin nu Bible ni ngar ayuweged gur ni ngam nang e pi n’en ni gab gel riy nge pi meewar rom. Rayog ni ngar filed ngom rogon ni ngam gay boch ban’en nib puluw ko Bible nra ayuwegem ni ngam digey boch e ngongol nib kireb ni kam mecham ngay. Ma gubin ngiyal’ ni bay Jehovah nra ayuwegem. Ir e en th’abi fel’ ni nge ayuwegem ya manang e n’en bay u gum’irchaem. (Prov. 14:10; 15:11) Ere mu guy rogon ni nge mecham ngom ni ngaum meybil ngak ma ga be beeg e Thin rok ni gubin e rran.

10. Mang e kam fil ko n’en ni buch rok Elie?

¹⁰ Mmicheg nga lanin’um ni pi motochiyel rok Jehovah e aram e n’en th’abi fel’ ni ngan fol riy. Gubin ban’en ni ma yog Jehovah ni ngad rin’ed nra yib angin ngodad. Piin yad ma fol ko pi motochiyel rok e ra yib farad u wan’rad, miki yib fan e yafos rorad, me yag e bin riyul’ e felfelan’ ngorad. (Ps. 19:7-11) Machane piin ndarur folgad ko pi motochiyel rok Jehovah e ma yib wenegan ngorad ni bochan e yad be rin’ e tin nib kireb ni yad be ar’arnag. Mu tay fanam i yan ko n’en ni yog be’ nib pumoon ni ka nog Elie ngak u murung’agen e n’en ni buch rok ni bochan e de fol ko pi motochiyel rok Got. Gallabthir rok e ba t’uf Jehovah rorow. Machane nap’an ni kab fel’ yangaren, me mel’eg ni nga i chag ngak boch e girdi’ nib kireb e ngongol rorad. Ere tabab ni nga i fanay e falay ni kireb, ma be un ko ngongol ndarngal, ma be moro’ro’. I yog nib papey ni ma damumuw maku ma cham. I gaar, “Gubin ban’en nni fil ngog ndabi rin’ e piin Kristiano e aram e tin ug rin’.” Yugu aram rogon ma de pagtalin e tin ni fil u nap’an ni kab bitir. Munmun miki tabab ko fol Bible bayay. Rib gel e athamgil ni tay ni nge digey e ngongol nib kireb ni ke mecham ngay, ma aram me un ko taufe ko duw ni 2000. Mang angin ni ke yib ngak ni bochan e be fol ko pi motochiyel rok Jehovah? I gaar: “Fin chiney e ke gapas lanin’ug ma ke beech e nangan’ rog.” * N’en ni buch rok Elie e be dag ni piin ndubrad ni ngar folgad ko pi motochiyel rok Jehovah e yad ma gafgownaged yad. Yugu aram rogon mab m’agan’ Jehovah ngay ni nge ayuwegrad ni ngar thilgad.

11. Mang boch ban’en nib fanenikan Jehovah?

¹¹ Mu fil rogon ni ngam fanenikay e n’en ma fanenikan Jehovah. (Ps. 97:10) Be yog e Bible nib fanenikan Jehovah e “changar ni ufanthin, ba yunmon ni ma lifith e thin, [nge] paef ni ma thang e pogofan rok e girdi’ ndawor ra bucheged  ban’en.” (Prov. 6:16, 17) Ku ‘dabun e piin ta cham, nge girdi’ ni sasalap.’ (Ps. 5:6) Bochan nrib fanenikan Jehovah e mit ney e lem nge ngongol, ma aram fan ni thang e piin nib kireb ni ur moyed u nap’an Noah ya kar suguyed e fayleng ko ngongol rorad nib kireb. (Gen. 6:13) Maku reb e, ki yog u daken Malaki ni profet nib fanenikan e piin yad ma chuw ko piin mabgol rorad ni yugu aram rogon ndariy tapgin ni ngar rin’ed. De m’agan’ ko liyor rorad ma ra pufthinnagrad ko ngongol ni yad be rin’.​—Mal. 2:13-16; Heb. 13:4.

12. Mang e be yip’ fan ni ngad “fanenikayed e tin nib kireb”?

¹² Baadag Jehovah ni ngad “fanenikayed e tin nib kireb.” (Rom. 12:9) Ra gad be fanenikay ban’en ma dubdad ni ngad sapgad ngay. Mu susunnag rogon e lem rom ni faanra ka nog ngom ni ngam kay ba plet i ggan ni ke kireb. Ga ra lemnag ma sana ra kirkireb ngorongorem ngay. Ere ku arrogon ni mus ni ngad lemnaged ni ngad rin’ed ban’en ni be yog Jehovah nib kireb, ma susun e ngar ddabuyed.

13. Mang fan nthingar da kol ayuwgad u rogon ni gad ma lem?

¹³ Mu kol ayuw u rogon ni ga ma lem. Lem rodad e ma gagiyegnag rogon e ngongol rodad. Aram fan ni yog Jesus ni ngad siyeged boch e lem nra k’aringdad ni ngad rin’ed reb e denen nib ubchiya’. (Matt. 5:21, 22, 28, 29) Ba mudugil ni gad baadag ni ngad felfelan’naged e Chitamangidad ni bay u tharmiy. Ere ba ga’ fan nnap’an ni gad ra lemnag boch ban’en nib kireb, ma ka chingiyal’ nem ma gad chuweg u lanin’dad!

14. Mang e ma m’ug u rogon e thin ni gad ma yog? Mang deer e ngad fithed gadad riy?

¹⁴ Mu gagiyegnag rogon e thin ni ga ma yog. I gaar Jesus: “Pi n’en nra yib u lan l’uguney nga but’ e yib u lanin’uy.” (Matt. 15:18) Arrogon, thin ni gad ma yog e be dag e n’en bay u lanin’dad. Ere mu fithem ni nge lungum: ‘Gu ma yog e tin riyul’ ni yugu aram rogon ni gu ra gafgow riy, fa? Faanra gub mabgol, ma gu ma kol ayuw ndab gu thin i golong ngak be’ ni gathi mabgol rog, fa? Gu ma siyeg e thin ni puwlag, fa? Nap’an nra k’aring be’ e damumuw ngog, ma gu ma fulweg u fithik’ e sumunguy, fa?’ Ga ra fal’eg i lemnag e pi deer ney ma ra ayuwegem. Thin ni ga ma yog e rayog ni ngan taarebrogonnag ngab mad ni kan labiynag. Yira luf e labiy ko fare mad, ma aram e ra mom ni ngan luf u dakenay. Ere ku arrogon ni faan ga ra athamgil u rogon nrayog rom ni ngam tal i yog e thin nib kireb nge thin ni puwlag, ma dab kum ban, ma ra mom ni ngam n’ag e bin kakrom i pangim.

15. Mang e be yip’ fan ni ngad richibiyed e bin kakrom i gadad ko “fare ley i gek’iy”?

 ¹⁵ Nge m’agan’um ngay ni ngam rin’ e n’en nib t’uf ni ngam rin’. I weliy apostal Paul ba fanathin ni nge fil ngodad feni ga’ fan ni ngad thilyeged rarogodad. I yoloy ni bin kakrom i gadad e thingar da lied ara da richibiyed ko “kuruth [“fare ley i gek’iy,” NW].” (Rom. 6:6) Ba m’agan’ Jesus ngay ni ngan richibiy ko fare ley i gek’iy ya nge rin’ e n’en nib m’agan’ Jehovah ngay. Ere ku arrogon ni faanra ngad rin’ed e n’en nib m’agan’ Jehovah ngay, ma susun e ngki m’agan’dad ngay ni ngad chuweged boch e lem nge ngongol ni bay rodad nib fanenikan. Fin ngiyal’ ni gad ra rin’ e pi n’ey e ra beech e nangan’ rodad me yag e athap ko yafos ndariy n’umngin nap’an ngodad. (John 17:3; 1 Pet. 3:21) Dab mu pagtalin ndabi thilyeg Jehovah e pi motochiyel rok ni bochan e nge m’ag ngodad. Ya gadad e ba t’uf ni ngad thilyeged rarogodad ma gad fol ko pi motochiyel rok.​—Isa. 1:16-18; 55:9.

16. Mang fan nthingar mu dugliy u wan’um ni ngam ulul ni ngam guy rogon ngam gel ko pi ar’ar nib kireb ni bay rom?

¹⁶ Mu ulul ni ngam guy rogon ngam gel ko pi ar’ar nib kireb ni bay rom. Mus nga tomuren ni kam un ko taufe, ma kab t’uf ni ngam ulul ngam guy rogon ni ngam gel ko pi ar’ar nib kireb ni bay rom. Am lemnag e n’en ni buch rok be’ nib pumoon ni ka nog Maurício ngak. Nap’an ni kab fel’ yangaren me tabab ni nga i un ko pumoon. Munmun me mada’nag e girdi’ rok Jehovah me tabab ni nge un ko fol Bible. Tomuren ni thilyeg boch ban’en u lan e yafos rok, ma aram me un ko taufe ko duw ni 2002. Yugu aram rogon ni ke yoor e duw ni ke pigpig ngak Jehovah, machane i yog ni gaar: “Bin riyul’ riy e bay yu ngiyal’ nthingar gguy rogon ni nggu gel ko pi ar’ar nib kireb ni bay rog.” Yugu aram rogon ma der pag e re n’ey ni nge muleg laniyan’. Ya gaar: “Der mulan’ug ya gu manang nnap’an nug ra mel’eg ni nggu siyeg e pi ar’ar nem, ma aram e gu be felfelan’nag Jehovah.” *

17. Mang e kam guy ko n’en ni buch rok Nabiha ni be pi’ e athamgil nga lanin’um?

¹⁷ Mmeybil ni nge ayuwegem Jehovah mag taga’ nga gelngin nib thothup ma gathi gelngim. (Gal. 5:22; Fil. 4:6) Ba gel e athamgil nib t’uf ni ngad ted ni faanra gad baadag ni ngad n’aged e bin kakrom i gadad ndab kud sulod ngay. Am lemnag e n’en ni buch rok be’ nib pin ni ka nog Nabiha ngak. Nap’an ni gaman nel’ e duw rok  me n’ag e chitamangin. I yog ni gaar, “Rib gel e amith ni tay lanin’ug.” Nap’an ni ilal mab papey ni ma yib e damumuw ngak. I tabab ni nga i pi’ boch e falay ni kireb ni chuway’, ma aram min kol ngan kalbusnag u lan in e duw. Pi Mich ni yad ma yan ko re kalbus ni baaram ni immoy riy e ra tababgad i fil e Bible ngak. Ere tabab Nabiha ni nge thilyeg e ngongol rok. I gaar: “Ba mom ni nggu taleg boch ban’en nib kireb ni kug mecham ngay. Machane rib mo’maw’ ni nggu taleg e mathoy tamagow.” Ba pag reb e duw ni guy Nabiha rogon ni nge taleg e tamagow, machane munmun me yag ni nge taleg. Uw rogon ni rin’ e re n’ey? I gaar, “Meybil ni ug tay ngak Jehovah e aram e n’en ni ayuwegeg ni nggu taleg e tamagow.” Chiney e ma gaar ngak boch e girdi’: “Ba pagan’ug ngay ni faanra rayog ni nggu thilyeg e ngongol rog ya nge yag ni nggu rin’ e n’en nib m’agan’ Jehovah ngay, ma demtrug be’ ni ku rayog rok!” *

18. Mang e ke yag ni nge rin’ boor e tapigpig rok Got nrogon ni be yog e 1 Korinth 6:9-11?

¹⁸ Bay boch e pumoon nge ppin u nap’an e bin som’on e chibog ni mel’egrad Jehovah ni ngar uned ngak Kristus ko gagiyeg ni ur rin’ed boch e ngongol nrib gel e kireb riy u m’on ni ngar manged Kristiano. Bod ni immoy boch i yad ni ur pared e piin gathi mabgol rorad, ara yad e pumoon ni ma darngalnag e pumoon ara ppin ni ma darngalnag e ppin, ma yad ma moro’ro’. Machane bochan ni ayuwegrad gelngin Got nib thothup, ma aram me yag ni ngar thilyeged pangirad. (Mu beeg e 1 Korinth 6:9-11.) Ku arrogon e ngiyal’ ney ni bokum milyon e girdi’ ni ke ayuwegrad e Bible ni ngar thilyeged boch ban’en u lan e yafos rorad. * Ke yag ni ngar talgad i rin’ boch e ngongol nib kireb nib mo’maw’ ni ngar digeyed. N’en ke buch rorad e be micheg nrayog ni ngkum thilyeg boch ban’en u rarogom mag digey boch e ngongol nib kireb ni kam mecham ngay ya nge yag ni bung rogom ni ngam un ko taufe.

19. Mang e yira weliy ko bin migid e article?

¹⁹ Piin yad baadag ni ngar uned ko taufe e gathi kemus nib t’uf ni ngar n’aged e bin kakrom i yad, ya kub t’uf ni nga ron’ed nga dakenrad e bin nib beech i yad. Bin migid e article e ra weliy rogon nrayog ni ngad rin’ed e re n’ey nge rogon nrayog ni nge ayuwegdad yugu boch e girdi’.