Mang fan ni yog fare pumoon ni pining Boaz e “fager rog” ngak nra “mul” e tirok e binaw u pa’ ni faanra leay Ruth? (Ruth 4:1, 6)

Kakrom e faanra yim’ reb e pumoon nib mabgol nde fakay e bitir, ma bay l’agruw e deer nib t’uf ni ngan nang e fulweg riy ni aram e: Mang e ra buch ko pi binaw ni tafen? Ma gur, ra math owchen e tabinaw rok ndariy n’umngin nap’an, fa? I pi’ fare Motochiyel rok Moses e fulweg ko gal deer ney.

Mang e ma buch ko binaw ni tafen be’ nib pumoon ni ke yim’ ara ke gafgow me pi’ tafen nchuway’? Rayog ni nge chuw’iy reb e pumoon ni walagen ara be’ ni girdien nth’abi chugur ngak fagi binaw nge sulweg, ya nge yag ni par fagi binaw ni kab milfan ko fare tabinaw.​—Lev. 25:23-28; Num. 27:8-11.

Mang e yima rin’ ya nge dabi math owchen e tabinaw rok fare pumoon ni ke yim’? Aram e yima fek reb e pumoon ni walagen ni nge leay leengin ni bod e n’en nrin’ ngak Ruth. Fare pumoon e ra leay fare pin ya nge yag nra fakayew reb e bitir nra par ni owchen fare pumoon me tafanay tafen. Re n’ey ni yima rin’ e ku ma ayuweg fare pin ni ke yim’ figirngin.​—Deut. 25:5-7; Matt. 22:23-28.

Am lemnag e n’en ni buch rok Naomi. Yow ba mabgol be’ nib pumoon ni ka nog Elimelek ngak. Nap’an ni yim’ Elimelek nge fa gal pagel ni fak, ma aram e dakuriy be’ nrayog ni nge ayuweg Naomi. (Ruth 1:1-5) Ere nap’an ni sul nga Judah me yog ngak Ruth ni leengin reb fa gal pagel ni fak ni nge yan i yog ngak Boaz ni nge mang ir e nge chuw’iy e binaw rorad nge sulweg, ya ir reb e girdi’ rok Elimelek nib chugur. (Ruth 2:1, 19, 20; 3:1-4) Machane manang Boaz ni ka bay yugu be’ ni girdi’ rok Elimelek ni faani yog ni ‘fager rok’ ni kab m’on rok. Ere susun ni ir e som’on nra dugliy ko nge chuw’iy e gi binaw nem nge sulweg fa danga’.​—Ruth 3:9, 12, 13.

Som’on e m’agan’ fare pumoon ngay ni nge chuw’iy fagi binaw nge sulweg. (Ruth 4:1-4) Yugu aram rogon ni manang ni boor e salpiy nra n’ag ko gi binaw nem, machane ku manang ndabkiyog ni nge fakay Naomi reb e bitir nra tafanay tafen Elimelek. Ere faanra chuw’iy e gi binaw nem ma ra fel’ rogon riy ya ku ra puthuy ko yungin ni baaram e binaw ni tafen.

Machane nap’an ni nang e re pumoon ney ni faanra nge chuw’iy e gi binaw nem maku ra leay Ruth, ma aram me thilyeg e lem rok. I gaar: “Faanra er rogon me ere dab kug maruwel nga mat’awug ni nggu chuw’iy e re gi binaw nem, ya ra mul u paag e tirog e binaw.” (Ruth 4:5, 6) Ere mang fan ni thilyeg e lem rok?

Faanra leay e re pumoon nem ara yugu be’ Ruth, ma nap’an ni yow ra fakay reb e bitir nib pagel ma ir e ra tafanay tafen Elimelek. Ere uw rogon nra “mul” u pa’ fare pumoon e tirok e “binaw”? Der yog e Bible, machane baaray boch e kanawo’ nrayog ni nge buch e re n’ey riy.

• Bin som’on e ra yan i aw ni ke n’ag e salpiy rok ndariy fan ya dabi tafanay fagi binaw ni tafen Elimelek, ya fare pagel ni ke diyennag Ruth e ir e ra tafanay.

• Bin l’agruw e ir e ra milfan ngak ni nga i pi’ e ggan ni nge kay Naomi nge Ruth, ma be ayuwegrow.

• Bin dalip e faanra fakay Ruth nge fare pumoon boch e bitir maku bay boch e bitir ni fak fare pumoon nge yugu be’, ma aram e yad ra kieg fapi binaw u dakenrad.

• Bin aningeg e faanra dariy e bitir ni fak fare pumoon nge yugu be’, ma faanra fakay Ruth reb e pagel ma ir e ra tafanay tafen Elimelek nge fare pumoon. Ere nap’an nra yim’ ma ra yan tafen ngak bbitir ni be fek fithingan Elimelek ma gathi fithingan. De m’agan’ e re pumoon nem ngay ni nge mul e tirok e binaw u pa’ ni fan e nge ayuweg Naomi. Ka baadag ni nge mang Boaz e ir e nge milfan e biney e maruwel ngak. Machane Boaz e rin’ e re n’ey ni bochan e baadag ni “nge par e binaw u lan e tabinaw rok e re moon ni baaram ni ke yim’, ni fan e nge dabi math fithingan.”​—Ruth 4:10.

Ere ba tamilang ni kab ga’ fan u wan’ fare pumoon ni nge par ndabi math owchen maku dabi mul e tirok e binaw u pa’. Yigoo ir e be lemnag ir. Yugu aram rogon ni guy rogon ni nge par ndabi math owchen, machane ke yib i taw ko ngiyal’ ney ma dad nanged ko ir mini’. Ku de yag fare tow’ath ngak nib manigil ni yag ngak Boaz ni aram e mang reb e ga’ rok fare Messiah ni aram Jesus Kristus. Ere rib gel e kireban’ ko n’en ni buch ko re pumoon nem ni bochan e de ayuweg be’ ni ke t’uf e ayuw rok!​—Matt. 1:5; Luke 3:23, 32.