1. Mang e baadag e piin gallabthir ni fan ngak pi fakrad?

 PIIN gallabthir, gamad manang ni gimed baadag ni ngam ayuweged pi fakmed ni ngar nanged Jehovah me t’uf rorad. Machane dabiyog ni ngan guy Got. Ere uw rogon ni ngam ayuweged pi fakmed ni nge riyul’ Got u wan’rad mar chugurgad ngak?​—Jas. 4:8.

2. Uw rogon nrayog ni nge fil e piin gallabthir murung’agen pi fel’ngin Jehovah ngak pi fakrad?

² Reb e kanawo’ nib ga’ fan ni ngan ayuweg e bitir riy ni nge chugur thilrad Jehovah e aram e ngan fil e Bible ngorad. (2 Tim. 3:14-17) Machane ku bay reb e kanawo’ ni be yog e Bible nrayog ni ngar filed murung’agen Jehovah riy. I puguran reb e matam ngak ba pagel ni fak u lan fare babyor ni Proverbs ndabi pagtalin pi fel’ngin Jehovah ni be m’ug u daken e tin ke sunmiy. (Prov. 3:19-21) Ere gad ra weliy boch e kanawo’ nrayog ni nge fanay e piin gallabthir e tin kan sunmiy riy ni ngar ayuweged pi fakrad ni ngar filed murung’agen pi fel’ngin Jehovah.

3. Mang e susun ni nge ayuweg e piin gallabthir pi fakrad riy?

³ Be yog e Bible ni “ka nap’an ni sunumiy Got e fayleng, ma fel’ngin ndabiyog ni ngan guy . . . e kan guy nrib tamilang. Girdi’ e rayog ni nge nang fan e pi n’ey u fithik’ e pi n’en ni ke m’ay i sunumeg rok Got.” (Rom. 1:20) Gimed e piin gallabthir e ba mudugil ni gimed baadag ni gimed ma rin’ pi fakmed boch ban’en u wen. Mu fanayed e ngiyal’ nem ni ngam ayuweged yad ni ngar guyed pi fel’ngin Jehovah nrib manigil u daken e “pi n’en ni ke m’ay i sunumeg rok.” Ere chiney e ngad weliyed e n’en nrayog ni nge fil e piin gallabthir rok Jesus.

4. Uw rogon ni fanay Jesus e tin kan sunmiy ni nge fil ban’en ngak pi gachalpen? (Luke 12:24, 27-30)

 ⁴ Mu ted fanmed i yan u rogon ni fanay Jesus e tin kan sunmiy ni nge fil ban’en ko girdi’. Immoy bayay ni yog ngak pi gachalpen ni ngar fal’eged i yaliy e gap’luw nge pi floras u fithik’ e pan. (Mu beeg e Luke 12:24, 27-30.) Rayog ni nge weliy murung’agen yugu boch ban’en ni ke sunmiy Got, machane i mel’eg ni nge weliy murung’agen ba mit e arche’ nge boch e floras nib ga’ ni ma guy pi gachalpen. Rayog ni ka i guy pi gachalpen e gap’luw ni be yib i changeg u dakenrad nge floras ni be puf u fithik’ e pan. Rayog ni ngam susunnag yaan Jesus ni be yip’ pa’ ko gali n’ey u nap’an ni be welthin, fa? Ma mang e rin’ u tomuren ni weliy murung’agen e gali n’ey? I fil ngorad ban’en nrib ga’ fan u murung’agen e gol nge sumunguy ni ma dag e Chitamangirad ni bay u tharmiy: Ra pi’ Jehovah e ggan ni nge kay e pi tapigpig rok ni yad ba yul’yul’ nge mad ni ngar chuwgad ngay ni bod rogon ni ma ayuweg e gap’luw nge pi floras u fithik’ e pan.

5. Mang boch ban’en ni kan sunmiy nrayog ni nge fanay e piin gallabthir ni ngar filed murung’agen Jehovah riy ngak fakrad?

⁵ Piin gallabthir, gimed ra folwok rok Jesus u rogon ni ma fil ban’en ko girdi’, fa? Rayog ni ngam weliy ngak fakam murung’agen ban’en ni kan sunmiy nri ga baadag ni bod rogon ba mit e gamanman nge ba mit e woldug. Nap’an ni ga be weliy murung’agen e re n’ey mag guy rogon ni ngam tamilangnag e n’en be fil u murung’agen Jehovah. Tomuren ma rayog ni ngam fith ngak ko ba miti mang gamanman ara woldug e ri baadag. Faan ga ra mel’eg ban’en nri baadag, ma dabisiy nra fal’eg e motoyil u nap’an ni ga be weliy murung’agen pi fel’ngin Jehovah.

6. Mang e rayog ni ngad filed ko n’en ni rin’ e chitiningin Christopher?

⁶ Gur, rib t’uf ni nge fanay e piin gallabthir boor e tayim ni ngar fal’eged i gay murung’agen ba mit e gamanman ara woldug u m’on ni ngan weliy e n’en be tamilangnag u murung’agen Jehovah, fa? Gathi gubin ngiyal’ nib t’uf ni ngan rin’ e re n’ey. De yoor ban’en ni weliy Jesus u murung’agen rogon ni ma abich e gap’luw ara rogon ni ma tugul e pi floras u fithik’ e pan. Riyul’ nrayog ni bay yu ngiyal’ nra adag fakam ni ngam weliyew boor ban’en u murung’agen e tin kan sunmiy, machane yu ngiyal’ e ba gaman ni kemus ni nga mog taa ban’en ara ngam fith taareb e deer nib mom e fulweg riy. Mu tay fanam i yan ko n’en ni yog reb e walag ni pumoon ni ka nog Christopher ngak u murung’agen e ngiyal’ ni kab bitir. I gaar: “Bayi n’en me yog e nina’ romad boch ban’en nib mom ni nggu nanged fan ya nge ayuwegmad ni nge ga’ fan u wan’mad e tin kan sunmiy nib liyegmad. Bod ni faanra gamad bay u tooben e pi burey, me gaar: ‘Aygum guyed feni tolang nge feni fel’ yaan e pi burey ney! Riyul’ nri yira ngat nga feni manigil Jehovah!’ Fa reb e ra gamad bay u tooben e day, me gaar: ‘Aygum guyed feni gel gelngin e pi n’ew nem! Riyul’ nrib gel gelngin Got!’” I yog Christopher ni gaar: “Pi n’em ni ma yog nib ga’ fan mab mom ni ngan nang fan e ri ma k’aringmad ni nggu lemnaged boch ban’en.”

7. Uw rogon ni ngam fil ngak pi fakam rogon ni ngaur lemnaged e pi n’en kan sunmiy?

⁷ Nap’an nra ilal boch pi fakam, ma rayog ni ngam fil ngorad rogon ni ngar tababgad i lemnag e pi n’en kan sunmiy mu kur filed murung’agen pi fel’ngin Jehovah riy. Rayog ni ngam weliy murung’agen taa ban’en ni ke sunmiy Got, mag fith ngorad ni nge lungum, “Mang e be fil e re n’ey ngomed u murung’agen Jehovah?” Sana ga ra gin ko n’en yad ra yog.​—Matt. 21:16.

8. Mang e rayog ni nge rin’ e piin gallabthir u Israel u nap’an ni yad be “milekag” pi fakrad u kanawo’?

⁸ Nog ngak e piin gallabthir u Israel ni ngar filed ngak pi fakrad e pi motochiyel rok Jehovah u nap’an ni yad be “milekag” u kanawo’. (Deut. 11:19, BT) Boor yu pa’ i kanawo’ u wuru’ e binaw nu Israel. Ere boor mit e gamanman, nge arche’, nge floras nrayog ni ngaun guy u nap’an ni yibe yan ko yu pi’ i kanawo’ nem. Ra be milekag e pi tabinaw u Israel u kanawo’, ma rayog  ni nge weliy e piin gallabthir ngak pi fakrad murung’agen e tin ke sunmiy Jehovah. Ere gimed e piin gallabthir e ku rayog ni ngam fanayed e tin kan sunmiy ni ngam filed ban’en ngak pi fakmed u boch e kanawo’ ni aray rogon. Am lemnaged rogon ni ke rin’ boch e gallabthir e re n’ey.

9. Mang e rayog ni ngam fil rok Punitha nge Katya?

⁹ Bay reb e matin ni ka nog Punitha ngak ni ma par u reb e mach nib ga’ u India ni gaar: “Nap’an ni gamad ra yan ni ngguyed chon e tabinaw romad ni yad ma par ko gin ni buchuuw e naun riy u wuru’ e mach, ma gamow ma fanay e ngiyal’ nem ni nggu ayuwegew gal fakmow ni ngar filew murung’agen e tin ke sunmiy Jehovah nrib manigil. Gu ma lemnag ni kab mom ngak gal fakag ni ngar nangew rarogon e tin kan sunmiy ko ngiyal’ ni yow ba palog ko yu pa’ i kanawo’ ni boor e girdi’ nge karrow riy.” Gimed e piin gallabthir e dabisiy ndabi pagtalin pi fakmed e pi n’en um rin’ed u bang ni kam marod ngay nib fel’ yaan. Katya nreb e walag nib pin ni ma par u Moldova e yog ni gaar: “N’en da gur pagtalin ni buch rog u nap’an ni ku gub bitir e aram e pi n’en ni ug rin’ed e gallabthir rog u nap’an ni gamad ra yan ko gin ni buchuuw e naun riy u wuru’ e mach. Gu be pining e magar ngorow nra filew ngog u nap’an ni ku gub bitir ni ngaug tal nggu fal’eg i yaliy e tin ke sunmiy Jehovah mug guy pi fel’ngin riy.”

10. Mang e rayog ni nge rin’ e piin gallabthir ni faanra ba mo’maw’ ni ngar milekaggad ko gin ni buchuuw e naun riy u wuru’ e mach? (Mu guy fare kahol ni kenggin e “ N’en Nra Ayuweg e Gallabthir.”)

¹⁰ Uw rogon ni faanra dabiyog ni ngam milekaggad ko gin ni buchuuw e naun riy u wuru’ e mach? Amol ni ku ma par u India e yog ni gaar: “Pi gallabthir ko gin gu ma par riy e boor e awa nthingar ra maruwelgad riy, ma kub tolang puluwon ni ngan milekag ko gin ni buchuuw e naun riy u wuru’ e mach. Machane rayog ni ngan fal’eg i yaliy e tin kan sunmiy min weliy murung’agen pi fel’ngin Jehovah u nap’an ni kan yan nga bochi reb e park nib achichig ara nap’an ni yi bay ko gin yima par riy u daken e chig u reb e naun.” Ga ra fal’eg e sap u tooben e gin ga ma par riy, ma dabisiy ni ku boor ban’en ni ga ra guy ko tin kan sunmiy nrayog ni ngam dag ngak pi fakam. (Ps. 104:24) Dabisiy ni ga ra pirieg e arche’, nge chachangeg, nge boch e woldug, nge ku boch ban’en.  Karina ni ma par u Chiyamen e yog ni gaar: “Nina’ rog e ri baadag e floras. Ere nap’an ni ku gub bitir ma ma dag ngog e pi floras nib fel’ yaan ni bay ko yungi n’en ni gamow be yan riy.” Gimed e piin gallabthir e ku rayog ni ngam fanayed e pi video nge babyor ni murung’agen e tin kan sunmiy ni ke ngongliy e ulung rodad ni ngam filed ban’en ngak pi fakmed. Arrogon, demtrug e gin gimed ma par riy ma rayog ni ngam ayuweged pi fakmed ni ngar fal’eged i yaliy e tin ke sunmiy Got. Ere chiney e ngad weliyed boch i fel’ngin Jehovah nrayog ni ngam weliyed murung’agen ngak pi fakmed.

11. Uw rogon nrayog ni nge ayuweg e piin gallabthir pi fakrad ni ngar guyed e t’ufeg rok Jehovah?

¹¹ Rayog ni ngam weliy ngak pi fakam rogon ni ma ayuweg boor e gamanman pi fakrad, ya ngam ayuwegrad ni ngar guyed e t’ufeg rok Jehovah riy. (Matt. 23:37) Ku rayog ni ngam tamilangnag e pi n’en nrib manigil ma kub thilthil nri gad baadag ni gad ma guy ko pi n’en kan sunmiy. Karina ni faan kan weliy murung’agen e yog ni gaar: “Ra gamow be yan e nina’ rog u wen, ma ma yog ngog ni nggu tal nggu yaliy rogon nib thil reb e floras nga reb, nge rogon ni be m’ug e t’ufeg rok Jehovah u yaan fare floras. Boor e duw nga tomuren, ma kug ma fal’eg i yaliy e pi floras ni ngguy rogon nib thil reb nga reb, nge rogon yaan, nge ramaen. Ku ma puguran ngog gelngin nri gad ba t’uf rok Jehovah.”

12. Uw rogon nrayog ni nge ayuweg e piin gallabthir pi fakrad ni ngar guyed e gonop rok Got? (Psalm 139:13, 14) (Kum guy e sasing.)

¹² Mu ayuweg pi fakam ni ngar guyed e gonop rok Got. Kab ga’ e gonop rok Jehovah ko gonop rodad. (Rom. 11:33) Bod nrayog ni ngam weliy ngak fakam rogon ni ma sul e ran nga lan e lang me ngal’ ni manileng, nge rogon ni ma yan e yungi manileng nem u bang nga bang. (Job 38:36, 37) Ku rayog ni ngam tamilangnag feni manigil rogon ni kan ngongliy e dowef ko girdi’. (Mu beeg e Psalm 139:13, 14.) Am lemnag rogon ni rin’ reb e matam ni ka nog Vladimir ngak e re n’ey. I gaar: “Bay borran ni dol’ ba pagel ni fakmow u rat nge maad’ad bang u dow. In e rran nga tomuren, me gol fagi maad’ad rok. Ere gu weliyew leengig ngak rogon ni ke ngongliy Jehovah e pi cell u fithik’ i dowdad nrayog ni nge sul ngki fel’ rogon ni ir rok. Gognew ngak nder ma buch ban’en ni aray rogon ko pi n’en ke sunmiy e girdi’. Bod nnap’an nra chafin reb e karrow nga ban’en nge kireb, ma dabiyog ni nge sul ngki fel’ rogon ni ir rok. Re n’ey ni buch rok fakmow e ayuweg ni nge nang rogon feni gonop Jehovah.”

13. Uw rogon nrayog ni nge ayuweg e piin gallabthir pi fakrad ni ngar guyed gelngin Got? (Isaiah 40:26)

¹³ Be yog Jehovah ni ngad sapgad nga lan e lang, ma gad lemnag rogon ni be fanay gelngin ni yira ngat ngay ni nge tay e pi t’uf u tagil’ ndariy reb ni be yan nga bang. (Mu beeg e Isaiah 40:26.) Rayog ni ngam pi’ e athamgil nga laniyan’ pi fakam ni ngar sapgad nga lan e lang mar fal’eged i lemnag e n’en yad be guy. Mu tay fanam i yan ko n’en ni yog reb e walag nib pin ni ka nog Tingting ngak ni ma par u Taiwan u murung’agen e ngiyal’ ni kab bitir. I gaar: “Bay bayay u nap’an ni fekeg e nina’ rog nggu warow ko camp, ma boor e t’uf nug guyew u lan e lang nnep’ ni bochan e da kug moyew u lan e mach ko gin boor e magal riy. Gu rin’ew e re n’ey u ba ngiyal’ ni be magafan’ug nri de yag ni nggu par ni gub yul’yul’ ni bochan e be guy e piin gamad nga class rogon ni nge mo’maw’ ngog ni nggu fol rok Jehovah. I pi’ e nina’ rog e athamgil nga lanin’ug ni nggu lemnag rogon ni fanay Jehovah gelngin ni nge sunmiy urngin e pi t’uf nem, miki yog ngog ndab gu pagtalin nrayog ni ngki fanay e re gelngin nem ni nge ayuwegeg u fithik’ urngin mit e skeng nug ra mada’nag. Tomuren nug fal’eg i yaliy e tin kan sunmiy u nap’an e re milekag nem nug tew, ma aram mug adag ni ngkug nang boch ban’en u murung’agen Jehovah nib fel’ rogon mu kug dugliy u wan’ug ni nggu pigpig ngak.”

14. Uw rogon nrayog ni nge fanay e piin gallabthir e tin kan sunmiy ni ngar ayuweged pi fakrad ni ngar nanged ni Jehovah e ir reb e Got nib felfelan’?

¹⁴ Ma m’ug ko tin ke sunmiy Jehovah ni ir reb e Got nib felfelan’ ma baadag ni ngkud felfelan’gad. Ke guy e piin llowan’ ni yooren e gamanman e ma fafel nib muun ngay e pi arche’ nge nig. (Job 40:20) Bay ba ngiyal’ ni ke minmin pi fakam u nap’an ni yad be guy reb e gamanman ni be fafel, fa? Sana rayog ni kar guyed pi fak e kus ni yad be fathal. Ra yay ni migid nim guy pi fakam ni yad be minmin u nap’an ni yad be yaliy reb e gamanman ni be rin’ boch ban’en nib mak’ak’ar, mag puguran ngorad ni gad ma pigpig nga reb e Got nib felfelan’.

15. Mang e rayog ni nge ayuweg e piin gallabthir ni ngar nanged e n’en bay u laniyan’ pi fakrad? (Proverbs 20:5) (Kum guy e sasing.)

¹⁵ Bay yu ngiyal’ nrayog ni nge guy e piin gallabthir nib mo’maw’ ni nge weliy pi fakrad murung’agen e pi magawon ni yad be mada’nag. Faanra  ireray e magawon rom, ma rayog nib t’uf ni ngam guy rogon ni ngam nang e n’en bay u lanin’rad. (Mu beeg e Proverbs 20:5.) Bay boch e gallabthir ni kar guyed nib mom ni ngar rin’ed e re n’ey u nap’an ni yad bay pi fakrad u wen ni yad be yaliy boch ban’en ni kan sunmiy. Mang fan? Reb i fan e bochan ni buchuuw ban’en ni be magawonnag laniyan’ fapi bitir nge gallabthir rorad. Bay reb e matam u Taiwan ni ka nog Masahiko ngak ni ki weliy reb i fan e re n’ey ni gaar: “Nap’an ni gamad ra rin’ pi fakmow boch ban’en u taabang ni bod ni nggu warod nga daken e burey ara gamad be yan u dap’eyan’, mab ga’ nib gapas lanin’rad. Aram e ngiyal’ ni gamow ma guy nib mom ni nggu fithew boch ban’en ngorad mug nangew e n’en yad be lemnag.” Katya ni faan kan weliy murung’agen e yog ni gaar: “Nap’an nra m’ay e skul me fekeg e chitinag nga reb e park nib fel’ yaan. Bochan nib gapas e re gin’em, mab mom ngog ni nggu weliy ngak e n’en ke buch rog u skul ara n’en be magafan’ug ngay.”

16. Uw rogon nrayog ni nge felfelan’ chon e tabinaw u taabang u nap’an ni yad be yaliy e tin ke sunmiy Jehovah?

¹⁶ Rayog ni nge felfelan’ chon e tabinaw u taabang u nap’an ni yad be yaliy e tin ke sunmiy Jehovah me yag ni gel e t’ufeg u thilrad. Be yog e Bible ni bay “ngal’an ni nge felan’uy” nge “ngal’an e churu’.” (Ekl. 3:1, 4) Bay yu yang u roy u fayleng ni ke sunmiy Jehovah nrib fel’ yaan nrayog ni ngad rin’ed boch ban’en riy ni gad baadag. Boor e tabinaw ni yad baadag ni yad ma yan nga yungi ban’en ni kan ngongliy rogon ni boor e gek’iy riy nge woldug, ara yungin ni buchuuw e naun riy, ara daken e burey, ara dap’eyan’. Bay boch e bitir ni yad baadag ni yad ma milmil ma yad be fafel u park, ara ngar yaliyed boch e gamanman, ara ngar malukgad u lan e lul’, ara u maday. Boor e kanawo’ nrayog ni ngad felfelan’gad riy ko tin ke sunmiy Jehovah nib liyegdad!

17. Mang fan nsusun e nge ayuweg e piin gallabthir pi fakrad ni ngar felfelan’gad ko tin ke sunmiy Got?

¹⁷ U lan e bin nib beech e fayleng rok Got, ma ra felfelan’ e piin gallabthir nge pi fakrad ko tin ke sunmiy Jehovah u reb e kanawo’ ndabiyog ni ngar rin’ed riy e chiney. Ra taw ko ngiyal’ nem ma dakuriy rogon ni ngad rusgad ko gamanman, maku arrogorad ndab kur rusgad ngodad. (Isa. 11:6-9) Rayog ni ngad felfelan’gad ko tin ke sunmiy Jehovah ndariy n’umngin nap’an. (Ps. 22:26) Machane gimed e piin gallabthir e dab mu songad nge taw ko ngiyal’ nem ni ngam ayuweged pi fakmed ni ngar felfelan’gad ko tin kan sunmiy. Ya faan gimed ra fanay e tin kan sunmiy ni ngam filed murung’agen Jehovah ngorad, ma dabisiy nra puluw u wan’rad fapi thin ni yog David ni Pilung ni faani gaar: “A Somol, dariy reb e got ni bod gur, ma dariy reb ni ke rin’ e n’en ni kam rin’.”​—Ps. 86:8, BT.