1-2. Mang fan nsusun e dabi mulan’um ni faanra dab kaa yag ni ngam un ko taufe? (Mu guy e sasing ni bay u wuru’ e re ke babyor ney.)

 FAANRA ga baadag ni ngam un ko taufe, ma rib manigil e n’en ga be nameg. Rayog ni ngam un ko taufe e chiney fa dabiyog? Faanra ga be lemnag nrayog maku arrogon ni be lemnag e piin piilal, ma dab mu tuntun ni ngam un ko taufe u nap’an nra mab e kanawo’ ngom. Ga ra rin’ e re n’ey, ma boor e tow’ath nra yag ngom ko pigpig ni ga ra tay ngak Jehovah.

² Machane uw rogon ni faanra ka nog ngom ni ka bay boch ban’en nib t’uf ni ngam mon’og riy u m’on ni ngam un ko taufe? Fa reb e gur rom e kam guy nib t’uf ni ngam rin’ e pi n’ey? Faanra aray rogon, ma aram e dabi mulan’um. Ya demtrug ko kab fel’ yangarem ara kam pilibthir, ma rayog ni ngam rin’ e re n’ey.

3. Mang e fith be’ nib moon nreb e tolang nu Ethiopia ngak Filip, ma mang deer e ke sum ni bochan e re n’ey? (Acts 8:36, 38)

³ Mu beeg e Acts 8:36, 38. I fith be’ nib moon nreb e tolang nu Ethiopia ngak Filip ni tamachib ni gaar: “Mang ndab ntaufenigeg?” Baadag fare moon nu Ethiopia ni nge un ko taufe, machane gur, ke bung rogon nrayog ni nge rin’ e re n’ey, fa?

4. Uw rogon ni dag fare moon nu Ethiopia ni baadag ni ngki fil boch ban’en?

⁴ Fare moon nu Ethiopia e ke yan “nga Jerusalem ni nge meybil ngak Got.” (Acts 8:27) Ere ba mudugil ni ir be’ ni ke pig ke un ko teliw rok e pi Jew. Maku dariy e maruwar riy ni ke fil murung’agen Jehovah ko Pi Babyor ko Bible nni Yoloy Nsom’on ni Thin ni Hebrew. Machane ku baadag ni ngki fil boch ban’en. Bin riyul’ riy e, mang e guy Filip ni be rin’ u nap’an nra mada’gow u kanawo’? I guy ni be beeg e thin ni bay ko fare babyor ni yoloy Isaiah ni profet. (Acts 8:28) Ireray boch e thin ni bay u Bible nib toar fan. Ere de gaman u wan’ e re moon nem ni nge fil in e machib u Bible, ya baadag ni ngki fil boch ban’en.

5. Mang e rin’ fare moon nu Ethiopia ko tin ni fil?

⁵ Re moon nem e be’ nib tolang nrib ga’ fan ya ma maruwel u tan pa’ Kandace ni Be’ nib Pin nib Pilung u Ethiopia, ma “ir e mmil fan ngak e salpiy rok” e re ppin nem. (Acts 8:27) Ere ba mudugil ni boor pa’ u puluwon maku boor e maruwel nib milfan ngak. Yugu aram rogon, ma ma tay e tayim ni nge liyor ngak Jehovah. De gaman u wan’ ni kemus ni nge fil e tin riyul’; ya kki fol ko tin ke fil. Ere milekag u Ethiopia nge mada’ nga Jerusalem ni nge liyor ngak Jehovah u tempel. Ba mudugil nthingari milekag nib n’uw nap’an maku boor e salpiy nib t’uf ni nge fanay ko milekag rok, machane yugu demtrug rogon ma baadag ni nge liyor ngak Jehovah.

6-7. Uw rogon ni gelnag fare moon nu Ethiopia e t’ufeg rok ngak Jehovah?

⁶ Bay boch ban’en nib riyul’ mab ga’ fan ni fini fil e re moon ney rok Filip nib muun ngay e en nra mang fare Messiah. (Acts 8:34, 35) Ba mudugil ni felfelan’ u nap’an ni fil murung’agen e n’en ke rin’ Jesus ni fan ngak. Ere mang e rin’ nga tomuren? Rayog ni ngki par ni ir reb i girdien e teliw rok e pi Jew. Machane ri gel feni t’uf Jehovah nge Fak rok, ma aram me dugliy ni nge un ko taufe nge mang reb i gachalpen Jesus Kristus. I guy Filip ni ke bung rogon nrayog ni nge un ko taufe, ma aram me taufenag.

⁷ Faan ga ra folwok ko n’en ni rin’ e re moon ney, ma aram e rayog ni nge bung rogom ni ngam un ko taufe. Ku rayog ni nge lungum, “Mang ndab ntaufenigeg?” Ere chiney e ngad weliyed rogon nrayog ni ngam rin’ e n’en ni rin’ e re moon nem ni aram e: De tal i fil e thin rok Got, me fol riy, miki ulul ni nge gelnag rogon nib t’uf Got rok.

8. Mang e be yog e John 17:3 nthingar mu rin’?

⁸ Mu beeg e John 17:3. Ireray e pi thin ni ayuwegem ni ngam dugliy ni ngam fil e Bible, fa? Boor i gadad e ireray e pi thin ni ayuweg. Machane gur, be yog e pi thin ney ni ngkud ululgad i fil e thin rok Got, fa? Arrogon, ya gubin ngiyal’ nib t’uf ni ngad guyed rogon ni ngad nanged “e bin riyul’ e Got.” (Ekl. 3:11) Dariy ba ngiyal’ ni gad ra tal i fil ban’en. Ra yoor ban’en nda filed u murung’agen Jehovah, ma aram e ra gel e chugur ko tha’ u thildad.​—Ps. 73:28.

9. Mang e ba t’uf ni ngad rin’ed u tomuren ni kad nanged e pi kenggin e machib u Bible?

⁹ Nap’an ni gad ra tabab ni ngad filed murung’agen Jehovah, ma kemus ni pi kenggin e machib u Bible e gad ma fil. U lan fagi babyor ni yoloy apostal Paul ngak e pi Hebrew e yog riy ni pi kenggin e machib u Bible e aram e “tin som’on e thin ni yima fil ko thin ni yib rok  Got.” Gathi be yog nde ga’ fan e “tin ni kaad filed” ara pi kenggin e machib u Bible; ya n’en be rin’ e be taarebrogonnag e pi kenggin e machib nem ko milik ni ma ayuweg reb e bitir ni nge ilal. (Heb. 5:12; 6:1) Machane ki yog ngak e pi Kristiano ni gathi kemus e n’en ni ngar filed, ya kub t’uf ni ngar filed e tin nib toar fan e machib u lan e Thin rok Got. Ere ga baadag ni ga ma fil e tin nib toar fan e machib u Bible, fa? Ga baadag ni ngam ulul i fil murung’agen Jehovah nge pi n’en nib m’agan’ ngay, fa?

10. Mang fan nib mo’maw’ ngak boch e girdi’ ni ngar filed ban’en?

¹⁰ Machane boor i gadad e ba mo’maw’ ngak ni nga i fil ban’en. Me gur e uw rogom? Nap’an ni um moy u skul, ma ga baadag ni ga ma beeg e babyor mu kum fil boch ban’en, fa? Ga ma felfelan’ ko pi n’en ni ga ma fil ma ka ga ma lemnag ni boor ban’en ni ke yag ni ngam fil? Fa kam guy ni gur be’ nib mo’maw’ ni nge mit ban’en ngom u babyor? Boor e girdi’ ni aram rogon. Machane rayog ni nge ayuwegem Jehovah, ya ba flont ma ir e bin th’abi fel’ e Sensey ni bay.

11. Uw rogon ni ke dag Jehovah ni ir e “sensey nth’abi ga’”?

¹¹ Be yog e Bible ni Jehovah e ir e “re sensey nth’abi ga’.” (Job 36:22, BT) Ir reb e Sensey nib gum’an’, mab sumunguy, ma manang rarogodad. Ma yaliy fel’ngin e piin ma skulnagrad. (Ps. 130:3) Ma der ma lemnag ni ngad rin’ed ban’en ndabiyog rodad. Dab mu pagtalin ni ir e ke sunmiy e man’ey rom ni aram reb e tow’ath nrib manigil. (Ps. 139:14) Nni sunmiydad ni gad baadag ni ngaud filed ban’en. Baadag e En Ke Sunmiydad ni ngad filed ban’en ndariy n’umngin nap’an, ma gad felfelan’ ko tin gad be fil. Ere ka chiney e ba fel’ ni ngad guyed rogon ni ngad adaged ni ngaud filed e tin riyul’ u Bible ni bod ban’en ni be “yib lamen” ngodad. (1 Pet. 2:2) Mu nameg boch ban’en nrayog ni ngam rin’, mu um beeg ma ga be fil e Bible rom ni gubin ngiyal’. (Josh. 1:8) Ra ayuwegem Jehovah ni ngam adag e beeg Bible mag ulul i fil murung’agen.

12. Mang fan nsusun e ngad filed murung’agen e pi n’en ni i rin’ Jesus nge machib ni i tay?

¹² Mu tay e tayim ni ngaum fal’eg i lemnag murung’agen e pi n’en ni i rin’ Jesus nge machib ni i tay ni gubin ngiyal’. Ngiyal’ ney ni ke mo’maw’ e par e rib ga’ fan ni ngad folwokgad rok Jesus ni faanra gad baadag ni ngad pigpiggad ngak Jehovah. (1 Pet. 2:21) I yog ngak pi gachalpen ni yad ra mada’nag e magawon. (Luke 14:27, 28) Yugu aram rogon, ma manang nrayog ni nge par e tin riyul’ i gachalpen ni yad ba yul’yul’ ngak Got ni bod ir. (John 16:33) Ere mu fil murung’agen e pi n’en ni i rin’ Jesus, mag nameg ni ngam folwok rok ko pi n’en ni ga ma rin’ u reb e rran ngu reb.

13. Mang e susun ni nga mog ngak Jehovah ni nge ayuwegem riy, ma mang fan?

¹³ De gaman ni kemus ni nge yag e tamilangan’ ngom. Fan nib t’uf ni nge yag e tamilangan’ ngom e bochan e nge yag nim nang boor ban’en u murung’agen Jehovah, me t’uf rom, miki mich u wan’um. (1 Kor. 8:1-3) Nap’an ni ga be ulul ni ngam fil murung’agen Jehovah, ma gog ngak ni nge ayuwegem ni nge gel e michan’ rom. (Luke 17:5) Ma fulweg taban e meybil ni aray rogon. Michan’ ni be tor nga daken e tin nib puluw ni kam fil u murung’agen e Got rodad e ra ayuwegem ni ngam mon’og.​—Jas. 2:26.

14. Uw rogon ni tamilangnag apostal Peter feni ga’ fan ni ngaud folgad ko n’en gad be fil? (Kum guy e sasing.)

¹⁴ I tamilangnag apostal Peter feni ga’ fan ni nga i fol pi gachalpen Kristus ko n’en yad be fil. I weliy murung’agen Noah. I yog Jehovah ngak Noah ni bayi pag e ran nge tharey e fayleng ya nge thang e piin nib kireb ni ur moyed  e ngiyal’ nem. Re n’ey ni ke nang Noah e de gaman ni nge yognag e yafos ngorad chon e tabinaw rok. Mu tay fanam i yan riy ni be weliy Peter murung’agen “fa ngiyal’ i n’em ni toy Noah fare ark riy” u m’on ni nge Tharey e Ran e Fayleng. (1 Pet. 3:20) Ere fol Noah nge chon e tabinaw rok ko n’en kar filed rok Got, ma aram mar ngongliyed ba arke nib ga’. (Heb. 11:7) Tomuren me taarebrogonnag Peter e n’en ni rin’ Noah ko taufe, ni aram e yoloy ni gaar: “Taufe ni be yip’ fan e re n’ey e ku aram e n’en ni be thapegmed e chiney.” (1 Pet. 3:21, NW) Ere n’en ga be rin’ e chiney ya nge bung rogom ni ngam un ko taufe e rayog ni ngad taareb rogonnaged ko maruwel ni i rin’ Noah nge chon e tabinaw rok u lan boor e duw u nap’an ni yad be ngongliy fare arke. Mang e ba t’uf ni ngam rin’ ya nge yag ni bung rogom ni ngam un ko taufe?

15. Uw rogon ni ngad daged nriyul’ ni kad kalgadngan’dad?

¹⁵ Reb e ban’en nthingar da rin’ed nsom’on e aram e ngad kalgadngan’dad ko denen rodad. (Acts 2:37, 38) Faanra riyul’ ni kad kalgadngan’dad, ma aram e gad ra thilyeg e ngongol rodad. Kam tal i rin’ boch e ngongol nde m’agan’ Jehovah ngay ni bod e ngongol ndarngal, ara mathoy tamagow, ara dakumur yog e thin nib kireb, fa? (1 Kor. 6:9, 10; 2 Kor. 7:1; Efe. 4:29) Faanra dawor, me ere mu guy rogon ni ngam thilyeg e pi n’ey u rarogom. Mog ngak e en be fil e Bible ngom ara piin piilal ni ngan ayuwegem min pow’iyem. Faanra ka gab bitir ni ka ga be par u tabinaw, ma gog ko gallabthir rom ni ngar ayuwegew gur ni ngam tal i rin’ boch e ngongol nib kireb ni kam mecham ngay nrayog ni be mo’maw’nag ngom ni ngam un ko taufe.

16. Mang e ba muun ko pi n’en ni ga ma rin’ nra gelnag e tha’ u thilmew Got?

¹⁶ Kub ga’ fan ni ngam ulul i rin’ e pi n’en nra gelnag e tha’ u thilmew Got ni bod ni ngaum un ko muulung ma ga be un ko pi n’en yibe rin’ riy. (Heb. 10:24, 25) Ma nap’an nra bung rogom ni ngam un ko machib, mag guy rogon ni ngaum un ngay ni gubin ngiyal’. Ra um un ko machib ma aram e ga ra adag. (2 Tim. 4:5) Faanra ka gab bitir ni ka ga be par u tabinaw, mag fithem ni nge lungum: ‘Ba t’uf ni nga i par e gallabthir rog ma yow be puguran ngog ni nggu un ko muulung ara machib? Fa gag rog e  gu ma rin’ e re n’ey?’ Ga ra rin’ e pi n’ey ni gur rom, ma aram e ga be dag ni bay e michan’ rom, mab t’uf Jehovah Got rom, ma ga be pining e magar ngak. Ireray boch e tow’ath ni ga ra pi’ ngak Jehovah nra m’ug riy ni ‘kam piem nga pa’.’ (2 Pet. 3:11; Heb. 13:15) Ma felfelan’ e Got rodad ko pi tow’ath ni gad ma ognag ngak nib m’agan’dad ngay. (Mu taarebrogonnag ko 2 Korinth 9:7.) Gad ma rin’ e pi n’ey ni bochan e gad ma felfelan’ ngay ni ngad pied e tin th’abi fel’ rodad ngak Jehovah.

17-18. Mang fel’ngin e ra ayuwegem ni ngam mon’og i yan ngam un ko taufe, ma uw rogon nra ayuwegem? (Proverbs 3:3-6)

¹⁷ Nap’an ni ga ra mon’og i yan ngam un ko taufe, ma ga ra mada’nag boch e magawon. Rayog ni nge moningnagem boch e girdi’ ni bochan e michan’ rom; maku rayog ni ngar togopuluwgad ngom ara ra gafgownaged gur. (2 Tim. 3:12) Nap’an ni ga be guy rogon ni ngam taleg reb e ngongol nib kireb ni kam mecham ngay, ma bay yu ngiyal’ nrayog ni ngkum sul ngay. Fa reb e rayog ni nge mo’maw’ ni ngam gum’an’nagem ara kankanan’um ni bochan e be mo’maw’ ni ngam rin’ e n’en ga be nameg. Ere mang e ra ayuwegem ni ngam athamgil? Aram e t’ufeg rom ngak Jehovah.

¹⁸ T’ufeg rom ngak Jehovah e aram e re fel’ngin nth’abi fel’ ni bay rom. (Mu beeg e Proverbs 3:3-6.) Faanra rib t’uf Got rom, ma aram e rayog ni ngam athamgil u fithik’ e pi magawon ni ga ma mada’nag u lan e yafos rom. Ba ga’ ni ma weliy e Bible murung’agen e t’ufeg ni ma dag Jehovah ko pi tapigpig rok u fithik’ e yul’yul’. Bochan ni ma t’ufeg e pi tapigpig rok u fithik’ e yul’yul’, ma aram e be yip’ fan ndariy ba ngiyal’ nra digeyrad ara tal ndab ki t’ufegrad. (Ps. 100:5) Kan sunmiyem ni ga bod yaan Got. (Gen. 1:26) Ere uw rogon nrayog ni ngam dag e mit ney e t’ufeg?

19. Uw rogon ni ngaum pining e magar ngak Jehovah ko urngin ban’en ni ke rin’ ni fan ngom? (Galatia 2:20)

¹⁹ Som’on e ngaum pining e magar. (1 Thess. 5:18) Gubin e rran ni ngaum fithem ni nge lungum, ‘Uw rogon ni ke dag Jehovah e t’ufeg ngog?’ Ngemu’ mag meybil ngam pining e magar ngak, mag weliy ngak boch ban’en ni ke rin’ ni fan ngom. Kum guy rogon ni nge tamilang u wan’um ni be rin’ boch ban’en nib manigil ni fan ngom ni bochan e gab t’uf rok ni bod rogon e n’en ni tamilang u wan’ apostal Paul. (Mu beeg e Galatia 2:20.) Mu fithem ni nge  lungum, ‘Gu baadag ni ngkug dag ngak Jehovah nib t’uf rog, fa?’ T’ufeg rom ngak Jehovah e ra ayuwegem ni ngam ulul i siyeg e pi lumel ni ma yib ngom mag athamgil u fithik’ e pi magawon ni ga ma mada’nag. Ra k’aringem ni ngam ulul ni ngam pigpig ngak Jehovah ni gubin ngiyal’, mag dag ngak ni gubin e rran nib t’uf rom.

20. Mang e thingar mu rin’ ya nge yag nim ognag e yafos rom ngak Jehovah, ma uw feni ga’ fan e re n’ey ni ga ra dugliy?

²⁰ Ra munmun ma t’ufeg rom ngak Jehovah e ra k’aringem ni ngam ognag e yafos rom ngak u daken e meybil. Dab mu pagtalin nnap’an ni ga ra ognag e yafos rom ngak Jehovah, ma aram e ke yag e athap ngom ni nge milfam ngak ndariy n’umngin nap’an. Nap’an ni ga ra ognagem ngak, ma aram e kam micheg ngak ni ga ra pigpig ngak ko ngiyal’ nib fel’ gubin ban’en u puluwom nge ngiyal’ ni ga be mada’nag e magawon. Dakuriy ba ngiyal’ nra t’uf ni ngkum micheg bayay e re n’ey. Riyul’ nnap’an ni gad ra ognag e yafos rodad ngak Got, ma aram e gad be dugliy ban’en nib ga’ fan. Machane am lemnag e re n’ey: Boor ban’en ni ga ra dugliy ni ngam rin’ u lan e yafos rom ni bay boch riy nrib manigil, machane re n’ey ni ngam ognag e yafos rom ngak Got e aram e n’en th’abi fel’ ni ga ra dugliy ni ngam rin’. (Ps. 50:14) Ra guy Satan rogon ni nge warnag e t’ufeg rom ngak e Chitamam, ya be athapeg ni nge dab kum yul’yul’ ngak. Machane dab mu pag ni nge gel ngom! (Job 27:5) T’ufeg rom ngak Jehovah e ra ayuwegem ni ngam tay u gil’ e n’en kam micheg ngak miki chugurnagem ngak e Chitamam ni bay u tharmiy.

21. Mang fan nrayog ni nga dogned nnap’an nra un be’ ko taufe ma gathi aram e ke mus u rom?

²¹ Tomuren ni kam ognagem ngak Jehovah, mag non ngak e piin piilal ko ulung rom ni ngam weliyed murung’agen e n’en nib ga’ fan ni ngam rin’ ni migid. Machane dab mu pagtalin nnap’an ni ga ra un ko taufe ma gathi aram e ke mus u rom, ya aram tabolngin e pigpig ni ga ra tay ngak Jehovah u n’umngin nap’an e yafos rom. Ere ka chiney e ngam gelnag e t’ufeg rom ngak e Chitamam. Mu nameg boch ban’en ya nge yag ni i gel e t’ufeg rom i yan ni gubin e rran. Ireray e n’en nra k’aringem ni ngam un ko taufe. Rib gel e felfelan’ ni ga ra tay e rofen nem. Machane gathi aram e ke mus u rom. Ere manga yugum ulul i gelnag e t’ufeg rom ngak Jehovah nge Fak ndariy n’umngin nap’an!