1. Mang e ma ngat boor e girdi’ ngay u nap’an ni yad ra un ko muulung rodad? (Kum guy e sasing.)

 MU SUSUNNAG ni ke yan i un ba wu’ e mabgol ko muulung u reb e Tagil’ e Liyor ko Pi Mich Rok Jehovah. Ra ngatgow nga rogon feni gol e pi walag u rom nge rogon ni yad ma t’ufeged yad. Nap’an ni yow be sul i yan nga tabinaw, me gaar fare pin ngak figirngin, ‘Bay ban’en ni yugu ba thil ko Pi Mich Rok Jehovah, machane ba manigil e re n’em.’

2. Mang fan ni bay boch e walag ni kar talgad ko pigpig ni yad be tay ngak Jehovah?

² Riyul’ nri yira ngat ko t’ufeg ni bay u thilin e pi walag u lan e ulung. Machane Pi Mich Rok Jehovah e dawor ra flontgad. (1 John 1:8) Ere ra yoor ban’en nda nanged u rarogon e pi walag u lan e ulung, ma aram e ba mom ni ngad guyed boch ban’en ni yad ba meewar riy. (Rom. 3:23) Machane ba gel e kireban’ riy, ya bay boch e walag ni kar paged e meewar rok boch e girdi’ ni nge talegrad ko pigpig ni yad be tay ngak Jehovah.

3. Mang e pow ko tin riyul’ i gachalpen Jesus? (John 13:34, 35)

³ Am yaliy bayay fare thin nu Bible ni fan ko re article ney. (Mu beeg e John 13:34, 35.) Mang e pow ko tin riyul’ i gachalpen Kristus? Aram e t’ufeg ni bay u thilrad, ma gathi rogon ndarur olobochgad. Kum tay fanam i yan riy nde gaar Jesus: ‘Faanra um pired nib t’uf bigimed rok bigimed, ma aram e gimed ra nang ni gimed pi gachalpeg.’ Ya gaar: “Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” Ere yog Jesus ni gathi yigoo pi gachalpen e yad ra nang ko mini’ rorad e tin riyul’ i gachalpen Jesus u daken e t’ufeg nra ur daged ngorad, ya kub muun e girdi’ u wuru’ e ulung ni Kristiano ngay.

4. Mang e sana ra adag boch e girdi’ ni ngar nanged u murung’agen e tin riyul’ e Kristiano?

⁴ Rayog ni nge lemnag boch e girdi’ ni gathi yad e Pi Mich Rok Jehovah ko: ‘Uw rogon nra ayuwegey e t’ufeg ni ngan nang ko mini’ e tin riyul’ i gachalpen Jesus? Uw rogon ni i t’ufeg Jesus e pi apostal rok? Ma uw rogon nrayog ni ngad folwokgad rok Jesus e ngiyal’ ney?’ Ba t’uf ni nge lemnag e Pi Mich e fulweg ko pi deer ney. Gad ra rin’ e re n’ey ma sana ra ayuwegdad ni ngad mon’oggad u rogon ni gad ma dag e t’ufeg, nib ga’ nu nap’an ni ke rin’ bagadad ban’en ndabun bagadad.​—Efe. 5:2.

5. Mu weliy fan fapi thin ni yog Jesus ni bay ko John 15:12, 13.

⁵ I tamilangnag Jesus ni bay reb e t’ufeg ni yugu ba thil nra m’ug rok pi gachalpen. (Mu beeg e John 15:12, 13.) Mu tay fanam i yan riy ni tay Jesus chilen ngorad ni gaar: “Nge bigimed me t’uf bigimed rok, ni bod rogon ni gimed ba t’uf rog.” Mang e be yip’ fan e re n’ey? I tamilangnag Jesus nre t’ufeg ney e ra k’aring reb e Kristiano ni nge pag fan e yafos rok ni fan ngak be’ ni taareb e michan’ rorow ni faanra ba t’uf ni nge rin’ e re n’ey. b

6. Uw rogon ni be tamilangnag e Thin rok Got feni ga’ fan e t’ufeg?

⁶ Be fil e Thin rok Got ngodad ni t’ufeg e ban’en nrib ga’ fan. Boor e girdi’ ni yad baadag e pi thin nu Bible ni baaray ni be gaar: “Got e ba t’uf e girdi’ rok.” (1 John 4:8) “Gin’en ni ga ba’ riy e thingari t’uf rom e en ni ir e mmigid ngom ni gowe gur.” (Matt. 22:39) “Rogon nib t’uf be’ rok be’ e ra upunguy boor e denen.” (1 Pet. 4:8) “Rogon ni gadad ba t’uf rok Got nge rogon nib t’uf Got rodad nge girdi’ e ban’en nra par ndariy n’umngin nap’an.” (1 Kor. 13:8) Be tamilangnag e pi thin ney nge yugu boch e thin nu Bible nrib ga’ fan ni ngaun dag e re fel’ngin ney nrib manigil.

7. Mang fan ndabiyog ni nge kunuy Satan e girdi’ nga taabang ngar pared ni bay e bin riyul’ e t’ufeg u thilrad?

 ⁷ Boor e girdi’ ni yad ma fith ni ma lungurad: ‘Uw rogon nrayog ni ngan nang e baan riyul’ e teliw? Gubin raba’ e teliw ni yad ma yog ni yad be fil e tin riyul’, machane ra barba’ mab thil e n’en yad ma fil ko girdi’ u murung’agen Got.’ Boor raba’ e teliw nde riyul’ ni ke sunmiy Satan, ma re n’ey e be mo’maw’nag ko girdi’ ni ngar nanged e baan riyul’ e teliw. Dabiyog ni nge kunuy Satan e girdi’ u ga’ngin yang e fayleng nga taabang ngar pared ni bay e t’ufeg u thilrad. Yigoo Jehovah e rayog ni nge rin’ e re n’ey. Ba puluw e re n’ey ni bochan e ke yib e bin riyul’ e t’ufeg rok Jehovah. Ere yigoo piin bay gelngin nib thothup rorad ma be tow’athnagrad e rayog ni ngar pared ni bay e bin riyul’ e t’ufeg u thilrad. (1 John 4:7) Aram fan ni yog Jesus ni kemus ni yigoo pi gachalpen e rayog ni ngar pared ni bay e bin riyul’ e t’ufeg u thilrad.

8-9. Uw rogon ni ke yib angin e t’ufeg ni ma dag e Pi Mich Rok Jehovah ngak boor e girdi’?

⁸ Boor e girdi’ ni kar nanged ko mini’ e tin riyul’ i gachalpen Jesus ni bochan e bay e bin riyul’ e t’ufeg u thilrad ni bod rogon ni yiiynag Jesus. Bay reb e walag ni pumoon ni ka nog Ian ngak ni yib ngan’ e bin som’on e convention ni un ngay nni tay u bangi ban’en ni tagil’ e gosgos nib chugur ko gin ma par riy. In e pul u m’on riy me yan Ian ko re tagil’ e gosgos nem ni nge yaliy ba gosgos ni yibe tay u rom. I gaar: “Rib thil e ngongol ko girdi’ nra bad ngaram ni ngar yaliyed e gosgos ko girdi’ nra uned ko fare convention nni tay u rom. Ya Pi Mich e yad ba gol, mab fel’ e munmad rorad, mab llowan’ pi fakrad.” Ki ulul ngay ni gaar: “Pi girdi’ ney e yira guyrad ma yad ba felfelan’ mab gapas lanin’rad. Ma ireray e n’en nug baadag ni nge yag ngog. Dakir yib ngan’ug e pi welthin nni pi’ e rofen nem, machane ka dawor gu pagtalin rogon e ngongol ni i dag e Pi Mich e rofen nem.” c Fan ni gad ma ngongol ni aray rogon e bochan e bin riyul’ e t’ufeg ni bay u thildad. Bochan nib t’uf pi walagdad rodad, ma aram fan ni gad ma gol ngorad ma gad be tay farad.

⁹ Bay reb e walag ni pumoon ni ka nog John ngak ni ku ireray e n’en ni guy u nap’an ni tabab ni nge un ko muulung. I gaar: “Rug ngat nga rogon feni gol . . . urngin e girdi’ u rom. Gu ra guyrad ma gowa yad boch e girdi’ ni kar flontgad. Bochan e bin riyul’ e t’ufeg ni bay u thilrad, ma aram me mich u wan’ug ni kug pirieg e baan riyul’ e teliw.” d N’en ni buch ko gal walag ney nge yugu boch e girdi’ e be micheg ni girdi’ rok Jehovah e aram e tin riyul’ e Kristiano.

10. Mingiyal’ e rayog ni ngad daged nriyul’ nib t’uf pi walagdad rodad? (Kum guy e footnote.)

¹⁰ Kad weliyed aram ko tabolngin ndawori flont pi walagdad. Ere yu ngiyal’ e rayog ni nga rogned ara rrin’ed boch ban’en nrayog ni nge kirebnag lanin’dad. e (Jas. 3:2) Nap’an nra buch e re n’ey, ma rayog ni ngad daged nriyul’ ni yad ba t’uf rodad u daken e thin nge ngongol rodad. Ere mang e rayog ni ngad filed rok Jesus ko re n’ey?​—John 13:15.

11. Mang l’agruw e lem nib kireb ni m’ug rok James nge John? (Kum guy e sasing.)

¹¹ De lemnag Jesus ndabi oloboch pi gachalpen. Ya ayuwegrad ni ngar gelgad ko pi meewar  rorad mar thilyeged e ngongol rorad ya nge yag nra fel’gad u wan’ Jehovah. Bay bayay ni yog James nge John ni l’agruw e apostal rok ngak e chitiningrow ni nge yog ngak ni nge pi’ l’agruw e tagil’ ngorow nib tolang u Gil’ilungun Got. (Matt. 20:20, 21) N’en nrin’ew e be m’ug riy ni ke tolang e lem rorow ma yow baadag ni nge ga’ farow ko tin ka bay i gachalpen Jesus.​—Prov. 16:18.

12. Yigoo James nge John e m’ug boch e lem nib kireb rorow, fa? Mu tamilangnag.

¹² Gathi yigoo James nge John e m’ug boch e lem nib kireb rorow e ngiyal’ nem, ya mu tay fanam i yan ko n’en ni rin’ e tin ka bay e apostal. Be gaar e Bible: “Faani rung’ag fa ragag nem i gachalpen Jesus murung’agen e re n’ey mi yad damumuw ngak fa gali walag.” (Matt. 20:24) Dabisiy ni luag James, nge John, nge tin ka bay e apostal e thin u murung’agen e re n’ey. Rayog ni gaar e tin ka bay e apostal: ‘Gimew be lemnag ni gimew ba fel’ ngomad ni ngam marow mu ningew l’agruw e tagil’ nib tolang u Gil’ilungun Got? Gathi yigoo gimew e ka um maruwelgad Jesus u taabang. Ku arrogomad ni bay rogon ni ngan pi’ boch e liw nib tolang ngomad!’ Demtrug rogon ma ke pag e pi apostal rok Jesus e re n’ey ni nge magawonnag e t’ufeg u thilrad.

13. Mang e rin’ Jesus u nap’an ni i oloboch e pi apostal rok? (Matthew 20:25-28)

¹³ Ere mang e rin’ Jesus? De damumuw ngorad. De yog ni nge yan i gay boch e girdi’ ni kab fel’ ni ngar manged apostal rok, ni kab sobut’an’rad ma gubin ngiyal’ nra ur daged e  t’ufeg ngorad. Ya n’en ni rin’ e non ngorad u fithik’ e gum’an’ ni bochan e manang ni yad baadag ni ngar rin’ed e n’en nib fel’. (Mu beeg e Matthew 20:25-28.) I ulul ni nge dag e t’ufeg ngorad ni yugu aram rogon ni gathi aram e som’on maku gathi aram e yay ni tomur nra luaged e thin ko mini’ rorad e ba tolang u fithik’rad.​—Mark 9:34; Luke 22:24.

14. Uw rogon e gin ni ilal e pi apostal rok Jesus riy?

¹⁴ Dariy e maruwar riy ni lemnag Jesus rogon e gin ni ilal e pi apostal rok riy. (John 2:24, 25) Ra ilalgad u bang ni ma fil e pi tayugang’ ko teliw riy nra ga’ fan be’ ni faanra bay u reb e liw nib tolang. (Matt. 23:6) Pi tayugang’ ko teliw rok e pi Jew e ku yad ma lemnag ni ka yad ba fel’ ko tin ka bay e girdi’. f (Luke 18:9-12) Manang Jesus ni mit ney e lem e rayog ni nge magawonnag rogon ni ma lemnag e pi apostal rarogorad nge rarogon yugu boch e girdi’. (Prov. 19:11) Da i lemnag ndariy ba ngiyal’ nra oloboch pi gachalpen, maku ma gum’an’ u puluwrad u nap’an ni yad ra oloboch. Manang nib fel’ gum’ircha’rad. Ere aram fan ni gum’an’nag ir nge ayuwegrad ni nge dabki tolangan’rad, ma dab kur lemnaged ni ka yad ba fel’ ko tin ka bay e girdi’, mar t’ufeged yad.

15. Mang e rayog ni ngad filed ko n’en ni buch rok James nge John?

¹⁵ Boor ban’en nrayog ni ngad filed ko n’en ni buch rok James nge John. Ba kireb e n’en nrin’ew nrognew ni ngan pi’ l’agruw e tagil’ ngorow nib tolang u Gil’ilungun Got. Machane kub kireb e n’en ni rin’ e tin ka bay e apostal nra paged e re n’ey ni nge magawonnag e taareban’ ni bay u thilrad. Yugu aram rogon, me dag Jesus e sumunguy nge t’ufeg ngak fa 12 i apostal rok. Ere mang e gad be fil riy? Gathi kemus ni yigoo n’en ke rin’ yugu boch e girdi’ e ir e ba ga’ fan ya kub ga’ fan e n’en gad ma rin’ u nap’an ni yad ra oloboch. Ere mang e rayog ni nge ayuwegdad? Nap’an nra rin’ reb e walag ban’en ni ke kirebnag lanin’dad, ma rayog ni ngad fithed gadad ni nge lungudad: ‘Mang fan ni kari kirebnag e re n’ey lanin’ug? Gur, re n’ey e be gagiyelnag ban’en ni gub meewar riy nib t’uf ni nggu gel ngay? Gur, bay e magawon ko fare walag ni ke kirebnag lanin’ug? Mus ni faanra gu be lemnag ni bay tapgin ni nggu damumuw ngak, machane gur, rayog ni nggu dag e t’ufeg mug n’ag fan u wan’ug e n’en ke rin’ ngog, fa?’ Faanra ud t’ufeged gadad, ma aram e gad be dag ni gadad e tin riyul’ i gachalpen Jesus.

16. Mang e ku rayog ni ngad filed ko n’en ni rin’ Jesus?

¹⁶ N’en ni rin’ Jesus e ku be fil ngodad nib t’uf ni ngad guyed rogon ni ngad nanged rarogon pi walagdad. (Prov. 20:5) Jesus e rayog ni nge guy e n’en bay u gum’irchaey, ma gadad e dabiyog. Machane rayog ni ngad gum’an’naged gadad u puluwon pi walagdad u nap’an ni kar rin’ed ban’en ndubdad. (Efe. 4:1, 2; 1 Pet. 3:8) Ra mom ngodad ni ngad rin’ed e re n’ey ni faan gad ra guy rogon ni ngkud nanged boch ban’en u rarogorad. Am lemnag e n’en ni buch rok be’.

17. Mang angin ni yib ngak reb e walag ni pumoon ni ma lekag e ulung ni bochan e guy rogon ni nge nang rarogon reb e walag nib fel’ rogon?

¹⁷ Bay reb e walag ni pumoon ni ma lekag e pi ulung u East Africa ni yib ngan’ reb e walag ni pumoon ni i lemnag ni ir be’ nde gol. Ere  mang e rin’ e re walag ney ni ma lekag e ulung? I gaar: “Gu dugliy ni ngguy rogon ni nggu nang rarogon nib fel’ rogon ko bin ni ngguy rogon ndab ug non ngak.” Nap’an ni rin’ e re n’ey, ma aram me yag ni nge nang boch ban’en u murung’agen rogon nni chuguliy fare walag nge n’en ke rin’ nga rogon e ngongol rok ko girdi’. Ki ulul ngay ni gaar: “Nap’an nug nang rogon feni mo’maw’ ngak e re walag ney ni nge thilyeg ir ya nge yag ni fel’ thilrad yugu boch e girdi’ nge urngin ban’en ni ke yag ni nge thilyeg u rarogon, ma aram me yag ni ngaug tayfan. Ri pach e thin romow.” Arrogon, nap’an ni gad ra guy rogon ni ngad nanged rarogon pi walagdad, mab ga’ nra mom ngodad ni ngad t’ufeged yad.

18. Faanra ke rin’ reb e walag ban’en ni ke kirebnag lanin’dad, ma mang boch e deer nrayog ni ngad fithed gadad riy? (Proverbs 26:20)

¹⁸ Yu ngiyal’ e rayog ni ngad lemnaged nib t’uf ni ngad nonad ngak reb e walag ni ke kirebnag lanin’dad. Machane u m’on ni ngad rin’ed e re n’ey, ma som’on e ba t’uf ni ngad fithed gadad ni nge lungudad: ‘Ri gu manang urngin ban’en u murung’agen e n’en ke buch, fa?’ (Prov. 18:13) ‘Gur, gathi rayog nder lemnag ni nge kirebnag lanin’ug?’ (Ekl. 7:20) ‘Bay bayay ni kug rin’ ban’en ni aray rogon, fa?’ (Ekl. 7:21, 22) ‘Faan gu ra yan gu non ngak, ma gu ra gelnag e ubchiya’ ko re magawon ney, fa?’ (Mu beeg e Proverbs 26:20.) Faan gad ra fal’eg i lemnag e pi deer ney, ma rayog ni ngad guyed ni t’ufeg rodad e rayog ni nge k’aringdad ni nge dab kud lemnaged e n’en ke buch.

19. Mang e kam dugliy u wan’um ni ngam rin’?

¹⁹ Be micheg e Pi Mich Rok Jehovah ni yad e tin riyul’ i gachalpen Jesus. Machane faanra bagadad me pag fan ir nga i t’ufeg e pi walag ni yugu aram rogon ndawor ra flontgad, ma aram e be dag ni ir reb e tin riyul’ i gachalpen Jesus. Faan gad ra rin’ e re n’ey, ma aram e rayog ni ngkud ayuweged yugu boch e girdi’ ni ngar nanged e baan riyul’ e teliw mar uned ngodad ko liyor ni gad be tay ngak Jehovah ni ir fare Got ko t’ufeg. Ere ngad dugliyed u wan’dad ni ngaud daged fare t’ufeg ni aram e pow ko tin riyul’ e Kristiano.