1. Mang e rayog ni nga i maruwar u wan’ boch e tapigpig rok Jehovah ni yad ba yul’yul’?

 RI GAD ba felfelan’ ni kad nanged ni gubin e girdi’ rok Jehovah ni yad ba fel’ u wan’! Be gaar e Bible: “I Somol e ba felfelan’ ngak e girdi’ rok.” (Ps. 149:​4, BT) Machane bay yu ngiyal’ ni ma mulan’ boch e tapigpig rok mi i lungurad u wan’rad, ‘Gur, gub fel’ u wan’ Jehovah, fa?’ Boor e tapigpig rok Jehovah kakrom ni immoy yu ngiyal’ ni ur lemgad ni aray rogon.​—1 Sam. 1:​6-10; Job 29:​2, 4; Ps. 51:11.

2. Mini’ e piin yad ba fel’ u wan’ Jehovah?

² Be tamilangnag e Bible ni girdi’ ndawor ra flontgad e rayog ni ngar fel’gad u wan’ Jehovah. Ni uw rogon? Thingar da daged ko ngongol rodad nriyul’ ni ke mich Jesus Kristus u wan’dad ma gad un ko taufe. (John 3:16) Aray rogon ni gad ra dag ko girdi’ ni kad kalgadngan’dad ko denen rodad ma kad micheged ngak Got ni ngad rin’ed e n’en nib m’agan’ ngay. (Acts 2:38; 3:19) Ma felfelan’ Jehovah u nap’an ni gad ra rin’ e pi n’ey ya nge yag ni fel’ e tha’ u thildad. Ere faan gad ra athamgil u rogon nrayog rodad ni ngad ted u gil’ e n’en kad micheged u nap’an nda ognaged gadad ngak, ma aram e gad ra fel’ u wan’ mi i taydad ni gadad boch e fager rok nib chugur thildad.​—Ps. 25:14.

3. Mang e ngad weliyed?

³ Machane mang fan ni bay boch e tapigpig rok Got nrayog ni ngaur lemnaged yu ngiyal’ ndar fel’gad u wan’ Got? Uw rogon ni ma dag Jehovah ngodad ni gad ba fel’ u wan’? Ma uw rogon nrayog ni ngari pagan’ reb e Kristiano ngay nriyul’ nib fel’ u wan’ Got?

FAN NRAYOG NI NGA I LEMNAG BOCH I GADAD NDAR FEL’GAD U WAN’ JEHOVAH

4-5. Mang e rayog ni nge pagan’dad ngay ni yugu aram rogon ni gad be lemnag ndariy fadad?

⁴ Boor i gadad e ka nap’an ni kab bitir keb i mada’ ko chiney ni ma lemnag ndariy fan. (Ps. 88:15) Bay reb e walag ni pumoon ni ka nog Adrián ngak ni yog ni gaar: “Kab kafram i yib nug ma lemnag ndariy fag. Ka be yib ngan’ug nnap’an ni ku gub bitir ma gu ma yibilay chon e tabinaw rog ni ngar uned nga Paradis, me gag e gu ma lemnag ndabiyog ni nggu un e ngaram.” Tony ni ilal u reb e tabinaw  ni gathi yad boch e Pi Mich e yog ni gaar: “Dariy ba ngiyal’ ni yog e gallabthir rog ngog ni gub t’uf rorow ara yow ba felfelan’ ngog. Re n’ey e ma k’aringeg ni nggu lemnag ni ka bay ban’en nib fel’ nder yag ni nggu rin’.”

⁵ Faanra bay yu ngiyal’ ni gad ma lemnag ndariy fadad, ma dab da paged talin ni Jehovah e ir e pow’iydad ngak. (John 6:44) Manang e bin riyul’ i rarogodad ni kab gel e thil riy nga rogon ni gad manang. (1 Sam. 16:7; 2 Kron. 6:30) Ere nap’an nra yog nib ga’ fadad, ma rayog ni nge pagan’dad ko re n’ey.​—1 John 3:​19, 20.

6. Uw rogon u wan’ apostal Paul e denen ni i rin’ kafram?

⁶ Bay boch i gadad ni i rin’ boch ban’en u m’on ni nge fil e tin riyul’ ni ka ma magawonnag laniyan’ e chiney. (1 Pet. 4:3) Mus ko pi Kristiano ni yad ba yul’yul’ ni bay e meewar rorad. Me gur, bay yu ngiyal’ ni ga ma lemnag ndabiyog ni nge n’ag Jehovah fan e kireb rom? Faanra bay, ma ngam nang ni bay boch e tapigpig rok ni yad ba yul’yul’ ni ur lemgad ni aray rogon. Bod ni apostal Paul e ri ma kireban’ u nap’an nra lemnag e pi meewar rok. (Rom. 7:24) Bin riyul’ riy e ke kal Paul ngan’ ko denen rok ma ke un ko taufe. Machane yugu aram rogon, ma ka ma yog ni ir e “th’abi sobut’ u fithik’ urngin e apostel” ma ir e “th’abi kireb” u fithik’ gubin e tadenen.​—1 Kor. 15:9; 1 Tim. 1:15.

7. Mang e susun ndab da paged talin u murung’agen e denen ni ud rin’ed kafram?

⁷ Ke micheg e Chitamangidad ni bay u tharmiy nra n’ag fan e kireb rodad ni faanra kad kalgadngan’dad. (Ps. 86:5) Ere faanra rriyul’ ni kad kalgadngan’dad ko denen rodad, ma rayog ni nge pagan’dad nriyul’ e n’en ke yog Jehovah ma kki n’ag fan e denen rodad.​—Kol. 2:13.

8-9. Ere uw rogon nrayog ni ngad gelgad ko fare lem ndariy ba ngiyal’ nra gaman e tin nrayog ni ngad rin’ed ni ngad fel’gad u wan’ Jehovah?

⁸ Gad gubin ni gad baadag ni ngad rin’ed urngin e tin nrayog rodad ni fan ko pigpig rodad ngak Jehovah. Machane rayog ni nga i lemnag boch i gadad ndariy ba ngiyal’ nra gaman e tin nrayog ni ngar rin’ed ni ngar fel’gad u wan’ Jehovah. Bay reb e walag nib pin ni ka nog Amanda ngak ni yog ni gaar: “Ba ga’ nug ma lemnag ni faanra nggu pi’ e tin th’abi fel’ rog ngak Jehovah, ma aram e be yip’ fan ni gubin ngiyal’ nib t’uf ni nggu yoornag e tin nug be rin’. Ere ba ga’ nug ma lemnag ni nggu rin’ boch ban’en nge pag nga urngin e tin nrayog rog. Ma faanra de yag ni nggu rin’ fapi n’em, ma aram mug lemnag ni kug kirebnag laniyan’ Jehovah ni bod rogon ni ke kireban’ug ya de yag fapi n’em rog.”

⁹ Ere uw rogon nrayog ni ngad gelgad ko fare lem ndariy ba ngiyal’ nra gaman e tin nrayog ni ngad rin’ed ni ngad fel’gad u wan’ Jehovah? Dab mu pagtalin ni Jehovah e der ma lemnag ni ngad rin’ed boch ban’en ndabiyog rodad. Maku der ma lemnag ni ngad rin’ed boch ban’en nge pag nga urngin e tin nrayog rodad. Faanra gad be pi’ e tin th’abi fel’ rodad ngak, mab ga’ fan u wan’ e tin kad rin’ed. Maku reb e ngkum lemnag boch e girdi’ ni bay murung’agrad u Bible ni ur pigpiggad ngak Jehovah u polo’ i gum’ircha’rad. Am lemnag Paul. Boor e duw ni i maruwel nib gel, ma be milekag u lan bokum biyu’ e mayel maku be tababnag boor e ulung nib beech. Machane nap’an ndaki yag ni nge machib ni bod ni i rin’ kafram ni bochan boch ban’en ni ke thil ko par rok, ma gur, daki par nib fel’ u wan’ Got? Danga’, ya ulul ni nge rin’ e tin nrayog rok me tow’athnag Jehovah. (Acts 28:​30, 31) Ku arrogodad nrayog ni nge thilthil urngin e tin nrayog ni ngad rin’ed ni fan ngak Jehovah. Machane fan ni gad be rin’ fapi n’em e aram e n’en nib ga’ fan u wan’. Ere chiney e ngad weliyed boch e kanawo’ ni ma dag Jehovah riy ni gad ba fel’ u wan’.

UW ROGON NI MA DAG JEHOVAH NI GAD BA FEL’ U WAN’?

10. Uw rogon nrayog ni ngad “rung’aged” laman Jehovah ni be yog ni gad ba fel’ u wan’? (John 16:27)

¹⁰ U daken e Bible. Ri baadag Jehovah ni ma dag ngak e piin yad ba t’uf rok ni yad ba fel’ u  wan’. Be weliy e Bible murung’agen l’agruw yay ni yog ngak Jesus ni ir Fak nrib t’uf rok ni kari felan’ ngak. (Matt. 3:17; 17:5) Ga baadag ni ngam rung’ag ni ke yog Jehovah ni gab fel’ u wan’, fa? Der ma non Jehovah ngodad u tharmiy, machane ma non ngodad u daken e Thin rok. Ere nap’an ni gad ra beeg e thin rok Jesus u lan e pi Gospel, ma gowa gad be “rung’ag” laman Jehovah ni be yog ni gad ba fel’ u wan’. (Mu beeg e John 16:27.) Jesus e rib fel’ rogon ni i m’ug rarogon e Chitamangin rok. Ere nap’an ni gad ra beeg rogon ni i yog ngak pi gachalpen ni yad ba yul’yul’ ni yad ba fel’ u wan’ ni yugu aram rogon ndawor ra flontgad, ma rayog ni ngad susunnaged u lanin’dad ni Jehovah e be yog e pi thin nem ngodad.​—John 15:​9, 15.

11. Mang fan ni faanra gad be mada’nag e magawon ma gathi aram e be yip’ fan nda kud fel’gad u wan’ Jehovah? (James 1:12)

¹¹ U daken e ngongol rok. Ri baadag Jehovah ni nge ayuwegdad ni bod rogon ni nge pi’ e tin nib t’uf ko par rodad. Machane bay yu ngiyal’ nrayog ni nge pagdad ni nga darod u fithik’ boch e magawon ni bod e n’en ni buch rok Job. (Job 1:​8-11) Machane nap’an ni gad ra mada’nag e magawon ma aram e der yip’ fan nda kud fel’gad u wan’ Got. Ya aram e kanawo’ ni ke mab ngodad ni ngad daged gelngin feni t’uf Got rodad ma be pagan’dad ngak. (Mu beeg e James 1:12.) Ma nap’an ni gad be mada’nag e pi magawon nem, ma rayog ni ngad guyed rogon ni be t’ufegdad ma be ayuwegdad.

12. Mang e rayog ni ngad filed ko n’en ni buch rok Dmitrii?

¹² Am lemnag e n’en ni buch rok reb e walag ni pumoon u Asia ni ka nog Dmitrii ngak. I tal ko maruwel ma boor e pul ni i par nder yag ni nge pirieg e maruwel. Ere dugliy ni nge dag ngak Jehovah ni be pagan’ ngak ni aram e yoornag e tayim rok ni fan ko machib. Boor e pul ni yan nde yag ni nge pirieg e maruwel. Ngemu’ miki m’ar nib gel nga i par u bet ndabkiyog ni nge un ko yan. Ere tabab ni nga i lemnag ni gathi ka ir reb i figirngiy nge reb e matam nib manigil, miki lemnag nsana daki fel’ u wan’ Jehovah. Machane yan i reb e blayal’ me printnag bochi pin ni fak fapi thin ni bay ko Isaiah 30:15 nga daken bangi babyor ni be gaar: “Ngam pagedan’med ngog mi gimed par ndakir wagageyan’med.” Ngemu’ me fek i yan ngak me gaar, “Papa’, nap’an nra kireban’um ma rayog ni ngam lemnag e re thin nu Bible ney.” I nang Dmitrii ni bochan Jehovah ma aram fan ni bay e ggan ni nge kay chon e tabinaw rok, nge mad ni ngar chuwgad ngay, nge gin ngar pared riy. I yog ni gaar, “N’en nib t’uf ni nggu rin’ e ngguy rogon ndab ki wagagey lanin’ug mug ulul ni nge pagan’ug ngak e Got rog.”  Faanra ga be mada’nag reb e magawon ni aray rogon, ma rayog ni nge pagan’um ngay ni ma lemnagem Jehovah ma ra ayuwegem ni ngam athamgil.

13. Mini’ e rayog ni nge fanay Jehovah ni nge dag ngodad ni gad ba fel’ u wan’, ma uw rogon ni ma rin’ e re n’ey?

¹³ U daken e pi walag. Ma fanay Jehovah e pi walag ni nge dag ngodad ni gad ba fel’ u wan’. Bod nrayog ni nge k’aring boch e walag ni nga rogned boch e thin nra pi’ e athamgil nga lanin’dad ko ngiyal’ ni kari t’uf rodad. Ireray e n’en ni buch rok reb e walag nib pin u Asia u nap’an ba ngiyal’ nrib gel e mochuch ni i tay. I tal ko maruwel miki yib ba mit e m’ar ngak nib ubchiya’. Ngemu’ me rin’ figirngin reb e denen nib ubchiya’ ma aram e daki mang reb e piilal. I yog ni gaar: “De yag ni nggu nang fan ni be buch e pi n’em rog. Ug lemnag nsana rayog ni bay ban’en nib kireb ni kug rin’ ma da kug fel’ u wan’ Jehovah.” Ere wenig e re walag ney ngak Jehovah ni nge dag ngak ni kab fel’ u wan’. Uw rogon ni rin’ Jehovah e re n’ey? I yog e re walag nem ni gaar, “I non e piin piilal ngog ma rogned ngog ni gub t’uf rok Jehovah.” Machane boch nga tomuren miki ning bayay e ayuw ngak Jehovah. I gaar: “Rofen nem e pi’ boch e walag u lan e ulung bangi babyor ngog ni kar yoloyed. Nap’an nug be beeg e thin ni bay riy, ma aram mug nang ni ke rung’ag Jehovah e meybil rog.” Arrogon, ba ga’ ni ma dag Jehovah ngodad ni gad ba fel’ u wan’ u daken e thin ni ma yog e pi walag ngodad u fithik’ e sumunguy.​—Ps. 10:17.

14. Ku mang reb e kanawo’ ni ma dag Jehovah riy ngodad ni gad ba fel’ u wan’?

¹⁴ Ku ma dag Jehovah ngodad ni gad ba fel’ u wan’ ni aram e ma fanay e pi walag ni ngar fonownaged gadad ko ngiyal’ ni ke t’uf ni ngan rin’ riy. Bod nnap’an e bin som’on e chibog me thagthagnag Jehovah nga laniyan’ apostal Paul ni nge yoloy 14 yang e babyor nge pi’ nge yan ko pi walag e ngiyal’ nem. Bay yu yang e pi babyor nem ni yoloy boch e fonow nib gel ngay,  machane i rin’ u fithik’ e t’ufeg. Mang fan ni thagthagnag Jehovah nga laniyan’ Paul ni nge yoloy e pi fonow nem nga lan e yungi babyor nem? Ya Jehovah e ir reb e Matam nib manigil, ma ma yal’uweg pi fak “ni ba felfelan’” ngorad. (Prov. 3:​11, 12) Ere nap’an nra fanay be’ e thin nu Bible ni nge fonownagdad, ma ngad sapgad ngay ni aram e mich riy ni gad ba fel’ u wan’ Got ma gathi aram e ke damumuw ngodad. (Heb. 12:6) Ku mang boch ban’en ni be micheg ni gad ba fel’ u wan’ Jehovah?

YUGU BOCH E MICH RIY NI GAD BA FEL’ U WAN’ JEHOVAH

15. Mini’ e ma pi’ Jehovah gelngin nib thothup ngak, ma mang fan nrayog ni nge pagan’dad ko re n’ey?

¹⁵ Ma pi’ Jehovah gelngin nib thothup ngak e piin yad ba fel’ u wan’. (Matt. 12:18) Ere rayog ni ngad fithed gadad ni nge lungudad, ‘Ke yag ni nge m’ug boch i wom’engin gelngin Got nib thothup rog, fa?’ Kam guy ni ke yag ni ngaum gum’an’ u puluwon yugu boch e girdi’ ni ke thil ko ngiyal’ ni baaram ndawor mu nang Jehovah riy, fa? Bin riyul’ riy e faanra um guy rogon ni nga i m’ug wom’engin gelngin Got nib thothup rom, ma aram e rayog ni nge pagan’um ngay ni gab fel’ u wan’ Jehovah!​—Mu guy fare kahol ni kenggin e “ Wom’engin Gelngin Got nib Thothup e . . .”

16. Mini’ e piin ma fanayrad Jehovah ni ngar machibnaged fare thin nib fel’? Uw rogon e re n’ey u wan’um? (1 Thessalonika 2:4)

¹⁶ Ba felfelan’ Jehovah ngay ni nge pag fan fare thin nib fel’ ngak e piin yad ba fel’ u wan’ ni ngar machibnaged. (Mu beeg e 1 Thessalonika 2:4.) Mu tay fanam i yan u rogon ni riyul’ e re n’ey u wan’ reb e walag nib pin ni ka nog Jocelyn ngak u nap’an ni weliy fare thin nib fel’ ko girdi’. Bay borran ni od Jocelyn ni kakadbul ma rib kireban’. I yog ni gaar: “Gu lemnag ndariy ban’en nib fel’ nrayog ni nggu rin’ e rofen nem. Machane gu be pioneer ma aram e rofen nug ma yan ko machib. Ere gu meybil ma aram mug wan ko machib.” Rofen nem ni kadbul me mada’nag Jocelyn be’ nib pin nib gol ni ka nog Mary ngak me m’agan’ ngay ni nge un ko fol Bible. Boch e pul nga tomuren me yog Mary ni ka i meybil ngak Got ni nge ayuweg u m’on ni nge yan Jocelyn i tugtuguy e mab rok. Nap’an ni sul Jocelyn nge lemnag e re n’ey ni buch me yog ni gaar, “Gu lemnag ni gowa be gaar Jehovah ngog, ‘Gab fel’ u wan’ug.’” Riyul’ ni gathi gubin e girdi’ ni yad ra motoyil ko thin ni gad be machibnag. Machane rayog ni nge pagan’dad ngay ni ma felfelan’ Jehovah u nap’an ni gad ra athamgil u rogon nrayog rodad ni ngad weliyed fare thin nib fel’ ko girdi’.

17. Mang e kam fil ko n’en ni yog Vicky u murung’agen fare biyul? (Psalm 5:12)

 ¹⁷ Ma yibnag Jehovah fel’ngin fare biyul ngak e piin yad ba fel’ u wan’. (1 Tim. 2:​5, 6) Machane uw rogon ni faanra ka gad be lemnag ndad fel’gad u wan’ Jehovah ni yugu aram rogon ni ke mich fare biyul u wan’dad ma kad uned ko taufe? Dab mu pagtalin ni gathi gubin ngiyal’ nrayog ni nge pagan’dad nga rogon e lem ni gad ma tay, machane rayog ni nge pagan’dad ngak Jehovah. Ma tay e piin ke mich fare biyul u wan’rad ni yad ba mat’aw u p’eowchen ma ke micheg nra tow’athnagrad. (Mu beeg e Psalm 5:12; Rom. 3:26) Bay reb e walag nib pin ni ka nog Vicky ngak ni fal’eg i lemnag fare biyul me yib angin ngak. Bay borran nu tomuren ni fal’eg i lemnag murung’agen e re biyul nem me gaar u wan’: “Ke n’uw nap’an ni be gum’an’ Jehovah u puluwog. . . . Yugu aram rogon, ma gowa be lungug ngak: ‘Dariy e n’en nra rin’ mug t’uf rom. Ma maligach ni pi’ Fakam e de gaman ni nge upunguy e denen rog.’” Ere bochan ni fal’eg i lemnag fare biyul nni pi’ nib tow’ath, ma aram me tabab ni nge nang nib t’uf rok Jehovah. Ku arrogodad ni faanra ud lemnaged fare biyul ma rayog ni ngad nanged ni gad ba t’uf rok Jehovah ma gad ba fel’ u wan’.

18. Mang e rayog ni nge pagan’dad ngay ni faan gad ra ulul ni ngaud t’ufeged e Chitamangidad ni bay u tharmiy?

¹⁸ Yugu aram rogon nsana gad be athamgil u rogon nrayog rodad ni ngad folgad ko n’en kad weliyed, machane ku bay yu ngiyal’ nrayog ni nga i mulan’dad miki maruwar u wan’dad ko rriyul’ ni gad ba fel’ u wan’ Jehovah fa danga’. Faanra buch e re n’em rom, ma dab mu pagtalin nib fel’ u wan’ e “piin nib t’uf Got rorad.” (Jas. 1:12) Ere mu ulul ni ngam chugurnag e tha’ u thilmew mag tiyan’um nga rogon ni ma dag ngom ni gab fel’ u wan’. Ma dariy ba ngiyal’ ni ngam pagtalin ni “dariy bagadad nib mal’af [Jehovah] rok nga orel.”​—Acts 17:27.