1. Mang e ma yog Jehovah ngak e pi tapigpig rok ni ngar rin’ed? (Kum guy e sasing.)

 MINI’ e rayog ni ngad ninged e ayuw ngak u nap’an ni ke t’uf ni ngan fal’eg lanin’dad min pow’iydad? Gad manang e fulweg ko re deer ney. Rayog ni ngad ninged e ayuw ngak Jehovah Got, ma aram e n’en ma yog ngodad ni ngad rin’ed. Baadag ni ngaud “meybilgad ni gubin ngiyal’.” (1 Thess. 5:17) Demtrug e ngiyal’ nrayog ni ngad meybilgad ngak ma gad wenig ngak ni nge pow’iydad u gubin ban’en ni gad ma rin’ u lan e yafos rodad. (Prov. 3:5, 6) Bochan ni Jehovah e ir reb e Got nib gol, ma dawori dugliy urngin yay nrayog ni ngad meybilgad ngak.

2. Mang e gad ra weliy ko re article ney?

² Ba ga’ fan u wan’dad e biney e tow’ath nrayog ni ngaud meybilgad. Machane bochan ni boor ban’en nib t’uf ni ngad rin’ed, ma rayog nib mo’maw’ ni ngad pirieged e tayim ni ngaud meybilgad. Ku rayog ni gad be guy nib t’uf ni ngad mon’oggad u rogon e meybil ni gad ma tay. Machane ba fel’ ya boor ban’en u Bible nrayog ni nge pi’ e athamgil nga lanin’dad me pow’iydad. Gad ra weliy ko re article ney e n’en gad ra fil rok Jesus u murung’agen rogon ni ngad ted e tayim ni fan ko meybil. Ku gad ra weliy lal ban’en nib ga’ fan ni ngad uneged nga lan e meybil rodad ya nge yag nda mon’oggad u rogon e meybil ni gad ma tay.

3. Mang e nang Jesus u murung’agen e meybil?

³ I nang Jesus nrib ga’ fan e meybil rodad u wan’ Jehovah. Ba n’uw nap’an u m’on ni nge yib nga fayleng, ma i guy e Chitamangin ni i fulweg taban e meybil rok boch e pumoon nge ppin ni yad ba yul’yul’. Immoy u tooben e Chitamangin u nap’an ni fulweg taban e meybil rok Hannah, nge David, nge Elijah,  nge yugu boch e girdi’ ni yad ba yul’yul’. (1 Sam. 1:10, 11, 20; 1 Ki. 19:4-6; Ps. 32:5) Aram fan ni fil ngak pi gachalpen ni ngaur meybilgad ni gubin ngiyal’ u fithik’ e pagan’!​—Matt. 7:7-11.

4. Mang e gad be fil ko meybil ni i tay Jesus?

⁴ I dag Jesus e kanawo’ nrayog ni nge folwok pi gachalpen riy u rogon e meybil ni i tay ngak Jehovah. Boor yay ni i meybil u nap’an ni i machib. Ba t’uf ni nge tay e tayim ni fan ko meybil ni bochan e ba ga’ ni boor pa’ u puluwon maku boor e girdi’ ko gin bay riy. (Mark 6:31, 45, 46) Ma od nri kab kakadbul ya nge yag ni meybil ni yigoo ir. (Mark 1:35) Bay bayay ni meybil nib polo’ reb e nep’ u m’on ni nge dugliy ban’en nib ga’ fan. (Luke 6:12, 13) Ma fare nep’ u m’on ni nge yim’, ma boor yay ni i meybil u nap’an ni be lemnag rogon ni nge mu’nag e gin th’abi mo’maw’ ko maruwel rok nni pi’ ni nge rin’ u fayleng.​—Matt. 26:39, 42, 44.

5. Uw rogon nrayog ni ngad folwokgad rok Jesus u nap’an ni gad be meybil?

⁵ Gad be fil ko n’en ni rin’ Jesus ndemtrug feni yoor pa’ nga puluwdad, mab t’uf ni ngad ted e tayim ni fan ko meybil. Sana rayog ni ngad odgad nri kab kakadbul ara da odgad nge n’uw boch e nep’ ni bochan e ngad meybilgad ni bod ni i rin’ Jesus. Faan gad ra rin’ e re n’ey, ma aram e gad be dag ngak Jehovah nib ga’ fan u wan’dad e re tow’ath ney nib ga’ fan. Bay reb e walag nib pin ni ka nog Lynne ngak ni yib ngan’ rogon ni yib e athamgil nga laniyan’ u nap’an ni nang murung’agen e meybil. I yog ni gaar, “Nap’an nug nang ndemtrug e ngiyal’ nrayog ni nggu non riy ngak Jehovah, me ayuwegeg ni nggu tay ni ir reb e Fager rog nib chugur thilmow mu kug adag ni nggu mon’og u rogon e meybil nug ma tay.” Dariy e maruwar riy ni boor i gadad e ku aray rogon e lem rok. Ere chiney e ngad weliyed lal ban’en nib ga’ fan nrayog ni ngad uneged nga lan e meybil rodad.

6. Mang e bay rogon ni ngan rin’ ni fan ngak Jehovah nrogon ni be yog e Revelation 4:10, 11?

⁶ Mu pining e sorok ngak Jehovah. Nap’an nni pilyeg e changar rok apostal John me guy 24 i piilal ni yad bay u tharmiy ni yad be liyor ngak Jehovah. Ur n’ufed Got ma yad be yog ni bay rogon ni ‘nga nog e sorok ngak, min ta’ fan, ma ba’ rogon ni nge mil suwon urngin ban’en ngak.’ (Mu beeg e Revelation 4:10, 11.)  Ku boor fan ni nge pining e pi engel ni yad ba yul’yul’ e sorok ngak Jehovah mar ted fan. Yad bay rok u tharmiy ma kar nanged rarogon nib fel’ rogon. Yad ma guy pi fel’ngin ni ma m’ug ko pi n’en ma rin’. Nap’an ni yad ra guy rogon ni ma rin’ Jehovah ban’en, ma ma k’aringrad e re n’ey ni ngar pininged e sorok ngak.​—Job 38:4-7.

7. Mang e rayog ni ngad pininged e sorok riy ngak Jehovah?

⁷ Susun e ngkud pininged e sorok ngak Jehovah u lan e meybil rodad ma gad yog ngak e pi n’en nri gad baadag u rarogon. Nap’an ni ga be beeg ma ga be fil e Bible, mag gay boch i fel’ngin Jehovah riy nri ga baadag. (Job 37:23; Rom. 11:33) Ngemu’ mag weliy ngak rogon e pi fel’ngin nem u wan’um. Ku rayog ni ngad pininged e sorok ngak ko pi n’en ke rin’ ni fan ngodad nge pi walagdad ni Kristiano. Gubin ngiyal’ ni be ayuwegdad ma be yororiydad.​—1 Sam. 1:27; 2:1, 2.

8. Mang boch i fan ni ngad pininged e magar ngak Jehovah? (1 Thessalonika 5:18)

⁸ Mu pining e magar ngak Jehovah. Boor fan ni ngad pininged e magar ngak Jehovah u daken e meybil. (Mu beeg e 1 Thessalonika 5:18.) Rayog ni ngad pininged e magar ngak ko pi n’en nib fel’ ni bay rodad. Ya bin riyul’ riy e, urngin e tow’ath nib manigil ma ir e ke yib rok. (Jas. 1:17) Bod nrayog ni ngad pininged e magar ngak ko fayleng ni ke ngongliy nib fel’ yaan nge pi n’en ke sunmiy ni yira ngat ngay. Ku rayog ni ngad pininged e magar ngak ko yafos rodad, nge tabinaw rodad, nge pi fager rodad, nge athap rodad ni ke pi’. Ku gad baadag ni ngad pininged e magar ngak ni ke pagdad ni ngad manged fager rok.

9. Mang fan nrayog nib t’uf ni ngaud pininged e magar ngak Jehovah?

⁹ Sana rayog nib t’uf ni ngad athamgilgad ni ngad lemnaged boch i fan ni bay rogon ni ngad pininged e magar ngak Jehovah. Gad be par u ba fayleng ni girdi’ riy e darur pininged e magar. Girdi’ e ba ga’ ni yad ma lemnag e n’en yad baadag ni nge yag ngorad ko bin ngar lemnaged rogon ni ngar daged ni yad be pining e magar ni fan ko pi n’en bay rorad. Faanra af e re lem ney ngodad, ma rayog ni nge par ni yigoo pi n’en nge yag ngodad e ir e gad ma ning u lan e meybil rodad. Ra dubdad ni nge buch e re n’ey, mab t’uf ni ngad ululgad i pining e magar ngak Jehovah ko pi n’en ma rin’ ni fan ngodad.​—Luke 6:45.

10. Uw rogon ni yag ni nge athamgil reb e walag nib pin u fithik’ e magawon rok ni bochan e ma pining e magar? (Kum guy e sasing.)

¹⁰ Faanra gubin ngiyal’ ni gad ma pining e magar, ma rayog ni nge ayuwegdad e re n’ey ni ngad athamgilgad u fithik’ e magawon. Am lemnag e n’en ni buch rok Kyung-sook ni bay murung’agen u lan Fare Wulyang ko Damit ko January 1, 2015. Ni pirieg ni ke cancer e worrum rok. I gaar: “Rib gel e gafgow ni kug tay u fithik’ e biney e magawon. Ya ug lemnag ni ke mul urngin ban’en u paag, ma rib gel e marus ni ug tay.” Ere mang e ayuweg ni nge athamgil? I yog ni gubin e nep’ u m’on ni nge  mol, ma ma yan nga bangi ban’en u daken e chig ko naun rok ni yima yan ngay nge meybil nib ga’ laman ni be pining e magar ngak Got u lal ban’en ni ke rin’ ni fan ngak ko re rran nem. Re n’ey e ma warnag e magafan’ rok ma ma k’aring ni nge weliy ngak Jehovah gelngin feni rib t’uf rok. I guy rogon ni ma ayuweg Jehovah e pi tapigpig rok ni yad ba yul’yul’ u nap’an ni ke yib e magawon ngorad, miki nang ni ka boor e tow’ath ni ma yag ngodad ko pi magawon ni gad ma mada’nag. Boor fan ni ngad pininged e magar ngak Jehovah ngki mada’ ko ngiyal’ ni gad be mada’nag e magawon ni bod ni rin’ Kyung-sook. Ra ud pininged e magar ngak u daken e meybil, ma rayog ni nge ayuwegdad e re n’ey ni ngad athamgilgad mad pared ni gad ba felfelan’.

11. Mang fan nib t’uf ndabi rus pi gachalpen Jesus u tomuren ni sul nga tharmiy?

¹¹ Mog ngak Jehovah ni nge ayuwegem ni nge dab mu rus u nap’an ni ga be machib. De n’uw nap’an u m’on ni nge sul Jesus nga tharmiy, me puguran ngak pi gachalpen e maruwel ni ke pi’ ngorad ni aram e ngar machibnaged murung’agen “u lan yu Jerusalem, ngu lan yu Judea ni polo’, ngu lan yu Samaria, nge yan i mada’ ko yungi n’en ni yan i mus e fayleng ngay.” (Acts 1:8; Luke 24:46-48) De n’uw nap’an nga tomuren, me kol e pi tayugang’ ko teliw rok e pi Jew apostal Peter nge John mar feked yow nga lan e muulung ko Sanhedrin ma rogned ngorow ndab kur machibgow, mu kun motochiyel ngorow ni ke elmerin. (Acts 4:18, 21) Ere mang e rin’ Peter nge John?

12. Mang e rin’ pi gachalpen Jesus nrogon ni be yog e Acts 4:29, 31?

¹² Nap’an ni motochiyel e pi tayugang’ ko teliw rok e pi Jew ngak Peter nge John ni ke elmerin, mar fulwegew ni lungurow: “Gimed e ngam turguyed ko bin ngan e mmat’aw u p’eowchen Got, ko ngan fol romed ara ngan fol rok Got. Ya dabiyog ni nge dab kug weliyew e n’en ni kug guyew nge n’en ni kug rung’agew.” (Acts 4:19, 20) Nap’an nni pag Peter nge John, ma aram me meybil pi gachalpen Jesus ngak Jehovah ni yad be weliy murung’agen e n’en nib m’agan’ ngay. Ra meybilgad ni lungurad: “[Mu] ayuwegmad e pi tapigpig rom nggu weliyed e thin rom ndab kug rusgad.” I fulweg Jehovah taban e meybil rorad.​—Mu beeg e Acts 4:29, 31.

13. Mang e rayog ni ngad filed ko n’en ni rin’ Jin-hyuk?

¹³ Rayog ni ngad folwokgad ko n’en ni rin’ pi gachalpen Jesus ni aram e ngad ululgad ko machib ngki mada’ ko ngiyal’ ni ke yog girdien e am ni ngad talgad ko machib. Am lemnag e n’en ni rin’ reb e walag ni pumoon ni ka nog Jin-hyuk ngak nni kalbusnag ni bochan e i par u mathilin ngongolen e am. Nap’an ni immoy u kalbus min tay ni nga i ayuweg boch e kalbus ni kan tayrad nga lan reb e singgil ni yigoo yad, machane dabiyog ni nge weliy murung’agen ban’en ngorad ndariy rogon ko maruwel rok ni kub muun murung’agen e Bible ngay. Ere meybil ni ngan ayuweg ndabi rus me machib u fithik’ e gonop u nap’an nra mab e kanawo’ ngak. (Acts 5:29) I yog ni gaar: “I fulweg Jehovah taban e meybil rog ni aram e ayuwegeg ndab gu rus miki pi’ e gonop ngog ni nggu tababnag e fol Bible ngak boor e kalbus u lan lal e minit u nap’an nug bay u langan e mab ko singgil rorad. Ma ra nep’ mug yoloy boch e babyor ni nggu pi’ ngorad ko bin migid e rran riy.” Ku arrogodad nrayog ni nge pagan’dad nra ayuwegdad Jehovah ni ngad machibgad. Rayog ni ngad meybilgad ni ngan ayuwegdad ndab da rusgad mu kun pi’ e gonop ngodad ni bod e n’en ni rin’ Jin-hyuk.

14. Mang e rayog ni nge ayuwegdad u nap’an ni gad be mada’nag e magawon? (Psalm 37:3, 5)

¹⁴ Mog ngak Jehovah ni nge ayuwegem ni  ngam athamgil u fithik’ e pi magawon rom. Boor i gadad e be gafgow ni bochan ba mit e m’ar ni ke yib ngak, ara bay e magawon rok u rogon ni ma lem, ara ke yim’ be’ nib t’uf rok, ara be mada’nag e magawon u lan e tabinaw, ara yibe gafgownag, ara be mada’nag yugu boch e magawon. Ku bay boch ban’en ni bod ba mit e m’ar ni ke garer nge mahl ni be mo’maw’nag ni ngan athamgil u fithik’ boor e pi magawon ney. Ere mu weliy urngin ban’en ni bay u lanin’um ngak Jehovah. Mu weliy ngak e n’en be buch rom ni bod ni ga ra weliy ngak reb e fager rom nib chugur thilmew. Nge pagan’um ngay nra “ayuwegem” Jehovah.​—Mu beeg e Psalm 37:3, 5.

15. Uw rogon nrayog ni nge ayuwegdad e meybil ni ngad ‘pired nib gum’an’dad u fithik’ e tin ni be yib ngodad ni gadad be gafgow riy’? Mu weliy ban’en ni ke buch.

¹⁵ Faanra ud meybilgad ni gubin ngiyal’ ma ra ayuwegdad ni ngad ‘pired nib gum’an’dad u fithik’ e tin ni be yib ngodad ni gadad be gafgow riy.’ (Rom. 12:12) Manang Jehovah e magawon ni be yan e pi tapigpig rok u fithik’, ma “ma rung’ag e tin ni yad ma wenignag ngak.” (Ps. 145:18, 19) Ireray e n’en ni nang reb e pioneer ni 29 e duw rok ni ka nog Kristie ngak. Ba tomgin ni yib boch e m’ar nib ubchiya’ ngak. Bochan e re n’ey, ma aram mi i kireban’ nib pag rogon. Tomuren me nang ni ke yib ba mit e m’ar ngak e chitiningin nra yim’ riy. I gaar: “Gu meybil ngak Jehovah nib gel ni nge pi’ gelngig ni nggu athamgil u reb e rran ngu reb. Gguy rogon ni ngaug un ko muulung ma gu be tay e fol Bible ni yigoo gag ni gubin ngiyal’.” Ki ulul ngay ni gaar: “Meybil e ayuwegeg ni nggu athamgil u fithik’ e pi magawon rog. Gu manang ni gubin ngiyal’ ni bay Jehovah ni nge ayuwegeg, ma re n’ey e ri fal’eg lanin’ug. Yugu aram rogon nde chuw e m’ar rog ni ka chingiyal’ nem, machane i fulweg Jehovah taban e meybil rog ni aram e ayuwegeg ni nge gapas lanin’ug.” Dariy ba ngiyal’ ni ngad paged talin ni manang Jehovah “rogon ni nge ayuweg e piin ni yad ma fol rok ko gafgow ni ma yib ngorad.”​—2 Pet. 2:9. 

16. Mang fan nib t’uf ni nge ayuwegdad Jehovah ni ngad siyeged e pi lumel ni ma yib ngodad?

 ¹⁶ Mog ngak Jehovah ni nge ayuwegem ni ngam siyeg e pi lumel ni ma yib ngom. Bochan ndawor da flontgad, ma aram fan ni gubin ngiyal’ nib t’uf ni ngaud chamgad ko ar’ar ni bay rodad ni ngad rin’ed e tin nib kireb ban’en. Be rin’ Satan urngin e tin rayog rok ni nge mo’maw’nag e re n’ey ngodad. Reb e kanawo’ ni ma guy rogon ni nge kirebnag rogon e lem ni gad ma tay riy e u daken e pi n’en yima chuweg e chalban ngay nib kireb. Pi n’ey e rayog ni nge suguy lanin’dad nga boch e lem nib alit nrayog ni nge alitnagdad u p’eowchen Jehovah me k’aringdad ni ngad rin’ed reb e denen nib ubchiya’.​—Mark 7:21-23; Jas. 1:14, 15.

17. Tomuren ni kad yibilayed e ayuw, ma mang e thingar da rin’ed ya nge yag nda siyeged e pi lumel ni ma yib ngodad? (Kum guy e sasing.)

¹⁷ Faanra gad baadag ni ngad chamgad ko ar’ar ni bay rodad ni ngad rin’ed e tin nib kireb ban’en, mab t’uf ni nge ayuwegdad Jehovah. I uneg Jesus e pi thin ni baaray nga lan fare kenggin e meybil ni fil ngak pi gachalpen ni be gaar: “Dab mfekmad i yan ko sikeng nib mo’maw’, machane ngam ayuwegmad rok Faanem nib Kireb.” (Matt. 6:13) Baadag Jehovah ni nge ayuwegdad, machane thingar da ninged e ayuw ngak. Thingar kud ngongolgad nib puluw ko n’en gad be yibilay. Bay boch ban’en nrayog ni ngad rin’ed ya nge yag nda siyeged e pi lem nib kireb ni ke garer u lan e re m’ag rok Satan ney. (Ps. 97:10) Rayog ni ngad suguyed boch ban’en nib fel’ nga lanin’dad u daken e beeg Bible nge fol Bible ni gad ma tay. Ku ra ud uned ko muulung nge machib maku ra yororiy e lem rodad. Faan gad ra rin’ e pi n’ey, ma ke micheg Jehovah ndabi pag boch e lumel nge yib ngodad ndabiyog ni ngad athamgilgad u fithik’.​—1 Kor. 10:12, 13.

18. Mang e ba t’uf ni ngad rin’ed ni bay rogon ko meybil ni gad ma tay?

¹⁸ Ngiyal’ ney ko tin tomuren e rran ni ke mo’maw’ e par riy e gad gubin nrib t’uf ni ngaud meybilgad ya nge yag nda pared ni gad ba yul’yul’ ngak Jehovah. Mu tay e tayim u gubin e rran ni ngam meybil ni ke yib u gum’irchaem. Baadag Jehovah ni ngad ‘weliyed ngak urngin e magafan’ rodad’ u daken e meybil. (Ps. 62:8) Mu pining e sorok nge magar ngak Jehovah ni fan nga urngin ban’en ni ma rin’. Mog ngak ni nge ayuwegem ni nge dab mu rus u nap’an ni ga be machib. Mu wenig ngak ni nge ayuwegem ni ngam athamgil u fithik’ e pi magawon rom, mag siyeg e pi lumel ni be yib ngom. Dab mu pag ban’en ara be’ ni nge talegem ndab kum meybil ngak Jehovah ni gubin ngiyal’. Machane uw rogon ni ma fulweg Jehovah taban e meybil rodad? Gad ra weliy e re deer ney nib ga’ fan ko bin migid e article.