1-2. (a) Mang fan nsusun e nge taga’ e piin ka fin ra uned ko mabgol ngak Jehovah? (Psalm 37:3, 4) (b) Mang e gad ra weliy ko re article ney?

GA BE n’en ni ngam un ko mabgol, ara gur be’ ni ka fin mu un ko mabgol, fa? Faanra arrogon, ma dabisiy ni ga be athapeg ni ngam parew e en ngam mabgolgow ara en mabgol rom nrib t’uf rom u fithik’ e felfelan’. Bin riyul’ riy e, boor e magawon ni ma mada’nag e piin mabgol. Ku boor ban’en nib ga’ fan nthingar ra dugliyed. N’en ni gimew ra rin’ u nap’an ni kam mada’nagew e magawon nge pi n’en ni gimew ra mel’eg e ra dugliy rogon e felfelan’ ni gimew ra tay u lan e pi duw nga tomuren ni kam mabgolgow. Faan gimew ra taga’ ngak Jehovah, ma aram e gimew ra dugliy boch ban’en u fithik’ e gonop, me gel e tha’ u thilin e mabgol romew, nge felfelan’ romew. Ma faanra danga’, ma dabisiy ni gimew ra mada’nag e magawon u lan e mabgol romew, ma dabiyog ni ngam parew ni gimew ba felfelan’.​—Mu beeg e Psalm 37:3, 4.

² Yugu aram rogon nre article ney e fan ngak e piin ka fin ra uned ko mabgol, machane yira weliy boch e magawon riy ni ma mada’nag urngin e mabgol. Ra tamilangnag e n’en nrayog ni ngad filed rok boch e girdi’ ni yad ba yul’yul’ ni bay murung’agrad u Bible. Pi n’ey e be fil ngodad boch ban’en nrayog ni ngad folgad riy ni kub muun e mabgol rodad ngay. Ku gad ra weliy e n’en nrayog ni ngad filed rok yu wu’ e mabgol e ngiyal’ ney.

3-4. Mang boch e magawon nrayog ni nge mada’nag e piin ka fin ra uned ko mabgol?

³ Sana rayog ni nge yog boch e girdi’ ngak l’agruw ni’ ni ka fin ra mabgolgow ni ngar rin’ew boch ban’en ni be rin’ yooren e girdi’ e ngiyal’ ney. Bod nrayog ni nge towasariyrow e gallabthir ara girdi’ rorow ni ngar tababgow i fakay e bitir ni ka chingiyal’ nem. Fa reb e rayog ni nge yog e pi fager nge girdien e tabinaw rorow ngorow ni ngar chuw’iyew reb e naun ni ngar parew riy nge boch e chugum ni boor ya nge yag ni fel’ e par rorow.

⁴ Ere faanra dabi kol ayuw ba wu’ e mabgol, ma rayog ni ngar dugliyew boch ban’en nra k’aringrow ni ngar awgow nga tabon e malfith, ma sana ra t’uf ni ngar maruwelgow u lan boor e awa ya nge yag nra thangew e pi malfith nem. Bochan e re n’ey, ma rayog ndakuriy e tayim rorow ni fan ko fol Bible ni yigoo yow, nge fol Bible ni tabinaw, nge machib. Ku rayog ni ngaur pagew e muulung ni bochan e ngar yoornagew e awa ni yow be maruwel riy ya nge gaman e salpiy ni be yag ngorow ara nge yag ndabin n’agrow ko maruwel. Bochan e re n’ey, ma dabiyog ni ngar unew i rin’ boch ban’en ni fan ko pigpig rorow ngak Jehovah nra yibnag e felfelan’ ngorow.

5. Mang e kam fil ko n’en ni buch rok Klaus nge Marisa?

⁵ N’en ke buch rok boor e girdi’ e be micheg ni faanra chugum e aram e n’en nth’abi m’on u wan’dad, ma dabi yibnag e felfelan’ ngodad. Am lemnag e n’en ni fil ba wu’ i mabgol ni ka nog Klaus nge Marisa ngorow u murung’agen e re n’ey. * Nap’an ni ka fin ra unew ko mabgol, ma yow l’agruw ni yow ma maruwel u polo’ e tayim rorow ya nge yag ni fel’ e par rorow. Machane dar piriegew e felfelan’. I gaar Klaus: “Ba gaman nge aw e tin nib t’uf ko par romow, machane da gur lemnagew ni nggu yoornagew e tin gamow be rin’ ni fan ko pigpig romow ngak Jehovah. Bin riyul’ riy e, rib mo’maw’ rogon e par romow ma ri gamow ma mochuch.” Sana ku rayog ni kam guy nder yag ni ngam pirieg e felfelan’ ni bochan e ga be m’oneg e chugum u wan’um. Faanra arrogon, ma dabi mulan’um. Ga ra lemnag e n’en nib manigil ni ke rin’ boch e girdi’ ma rayog ni nge ayuwegem. Ere som’on e ngad weliyed e n’en nrayog ni nge fil e piin figirngiy rok Jehoshafat ni Pilung.

6. Uw rogon ni fol Jehoshafat ni Pilung ko fare fonow ni bay ko Proverbs 3:5, 6 u nap’an ni yib ba ulung i salthaw nib ga’ ni ngar chamgad ko girdi’ rok?

⁶ Piin figirngiy, bay yu ngiyal’ ni ma aw parowmed ni bochan e maruwel nib milfan ngomed ni ngam rin’ed, fa? Faanra arrogon, ma rayog ni nge yib angin ngomed e n’en ni rin’ Jehoshafat ni Pilung. Bochan ni ir e pilung, mab milfan ngak ni nge ayuweg e nam rok ko pi toogor rorad! Ere uw rogon ni lebguy e re maruwel ney nib milfan ngak nib mo’maw’? I rin’ e tin nrayog rok ni nge ayuweg e girdi’ ni bay u tan e gagiyeg rok. I ubung e  yoror ko pi binaw u lan yu Judah me kunuy e salthaw rok ni yad ba pag 1,160,000 u gubin. (2 Kron. 17:12-19) Boch nga tomuren me mada’nag Jehoshafat reb e magawon nib ga’. I yib e salthaw nu Ammon, nge Moab, nge boch e pumoon nu Seir ra m’aged e mahl ngak, nge chon e tabinaw rok, nge girdi’ rok. (2 Kron. 20:1, 2) Ere mang e rin’? I ning e ayuw ngak Jehovah miki wenig ngak ni nge pi’ gelngin. N’en ni rin’ e ba puluw ko fare fonow ni bay ko Proverbs 3:5, 6. (Mu beeg.) Meybil ni tay u fithik’ e sobut’an’ ni bay ko 2 Kronicles 20:5-12 e be dag gelngin e pagan’ rok ngak e Chitamangin ni bay u tharmiy. Ere uw rogon ni fulweg Jehovah taban e meybil rok Jehoshafat?

7. Uw rogon ni fulweg Jehovah taban e meybil rok Jehoshafat?

⁷ I non Jehovah ngak Jehoshafat u daken Jahaziel ni ir reb e Levite. I gaar: “Ngam fal’eged rogomed nga tagil’med mi gimed son; bay mu guyed ni Somol e nge gelnagmed.” (2 Kron. 20:13-17, BT) Gathi aray rogon ni yima cham u nap’an e mahl! Machane pi thin ney e gathi ke yib rok be’ nib girdi’, ya ke yib rok Jehovah. Ere bochan ni be pagan’ Jehoshafat ngak Got, ma aram me rin’ e n’en ke yog ngak. Nap’an nranod e pi salthaw rok ni ngar mada’gad e pi toogor rorad, ma girdien e musik ndariy talin e cham rorad e tayrad nga m’on ma gathi pi salthaw rok ni yad ba falu’. I tay Jehovah u gil’ e n’en ni micheg ngak Jehoshafat, me ayuweg ni nge gel ko pi toogor rok.​—2 Kron. 20:18-23.

8. Mang e rayog ni nge fil e piin figirngiy rok Jehoshafat?

⁸ Gimed e piin figirngiy e rayog ni ngam filed ban’en rok Jehoshafat. Ba milfan ngomed ni ngam ayuweged e tabinaw romed, ere ba gel e maruwel ni gimed ma tay ni ngam ayuweged yad. Nap’an ni gimed ra mada’nag e magawon, ma sana rayog ni ngam lemnaged nrayog ni ngam pithiged ni yigoo gimed. Machane dab mu taga’gad nga gelngimed. Mmeybilgad ngak Jehovah u nap’an ni yigoo gimed ngam ninged e ayuw ngak. Maku reb e, ngam meybilgad pi leengimed u taabang ni ke yib u gum’ircha’med. Um filed e Bible romed nge pi babyor ni be ngongliy e ulung rok Got ya nge yag nim nanged e n’en baadag Jehovah ni ngam rin’ed mi gimed fol riy. Sana bay boch e girdi’ ndabi m’agan’rad ko n’en kam dugliyed nib puluw ko Bible, ma sana yad ra yog ngomed ni gimed bbalyang ko n’en kam dugliyed. Sana yad ra yog ni salpiy nge n’en nra yag riy e aram e n’en nth’abi fel’ nra ayuweg e tabinaw romed. Machane dab mu paged talin e n’en ni rin’ Jehoshafat. I pagan’ ngak Jehovah me dag e re n’ey ko ngongol rok. De pag Jehovah e re moon nem nib yul’yul’, maku dabi pagmed. (Ps. 37:28; Heb. 13:5) Mang e ku rayog ni nge rin’ e piin mabgol ya nge yag nra pared ni yad ba felfelan’?

9. Mang e rayog ni nga dogned u murung’agen Isaiah ni profet nge leengin?

⁹ N’en nth’abi ga’ fan u wan’ Isaiah ni profet nge leengin e aram e ngar pigpiggow ngak Jehovah. Isaiah e ir reb e profet, ma leengin e sana ku ma rin’ boch e maruwel ko profet ya be yog e Bible ni “ir reb e profet nib pin.” (Isa. 8:1-4, NW) Ba tamilang ni i m’oneg Isaiah nge leengin e pigpig ni ur tew ngak Jehovah u wan’row. Rib manigil e kanawo’ ni kar dagew nrayog ni nge folwok e piin mabgol riy e ngiyal’ ney!

10. Faanra i fil ba wu’ e mabgol e pi yiiy u Bible, ma uw rogon nra ayuwegrow ni ngar adagew ni ngar rin’ew urngin e tin nrayog rorow ni fan ngak Jehovah?

¹⁰ Piin mabgol e ngiyal’ ney e rayog ni ngar m’oneged e pigpig rorad ngak Jehovah ni aram e ngar rin’ed urngin e tin nrayog rorad ni fan ko pigpig ni yad be tay ngak. Rayog ni ngar gelnaged e pagan’ rorad ngak Jehovah ni aram  e ngar filed e pi yiiy u Bible u taabang mar guyed rogon ni ma lebug. * (Titus 1:2) Rayog ni ngar lemnaged rogon nrayog ni ngar uned i lebguy boch e yiiy u Bible. Bod nrayog ni ngar uned i lebguy fare yiiy rok Jesus ni be yog ni yira machibnag fare thin nib fel’ u ga’ngin yang e fayleng u m’on ni nge yib e tomur. (Matt. 24:14) Rra mich u wan’ ba wu’ e mabgol ni be lebug e pi yiiy u Bible, ma aram e ri yow ra adag ni ngar rin’ew urngin e tin nrayog rorow ni fan ngak Jehovah.

11. Mang e yag ni nge rin’ Priscilla nge Aquila, ma mang fan?

¹¹ Piin mabgol ni kab fel’ yangarrad e rayog ni ngar filed ban’en rok Priscilla nge Aquila nib wu’ i mabgol ni yow ba Jew ni yow ma par u Roma. Kar rung’agew fare thin nib fel’ ni murung’agen Jesus ma kar mangew l’agruw e Kristiano. Dariy e maruwar riy nib fel’ u wan’row rogon e par rorow. Machane, nap’an ni yog Klaudius ni Pilung ni nge chuw urngin e Jew u Roma, ma aram mi ri thil e par rorow nib tomgin. Am lemnag e n’en nib t’uf ni ngar rin’ew. Thingar ra chuwgow ko gin yow ba mecham ko par riy, mar gayew bang nib beech ni ngar parew riy, mu kur tababnagew bayay e siyobay rorow ni yow ma mangongol tent. Ere gur, ra pagew e re n’ey ni nge talegrow ndab kur rin’ew urngin e tin nrayog rorow ni fan ngak Jehovah, fa? Dabisiy ni ga manang e fulweg ko re deer ney. Nap’an ranow ra parew nga Korinth, mar tababgow i ayuweg e ulung u rom mar maruwelgad apostal Paul u taabang ni ngar pied e athamgil nga laniyan’ e pi walag u rom. Boch nga tomuren, ma ranow ra parew nga boch e binaw nib t’uf boch e tamachib riy. (Acts 18:18-21; Rom. 16:3-5) Dariy e maruwar riy ni boor ban’en ni ur rin’ew u taabang ma kub gel e felfelan’ ni ur tew!

12. Mang fan nsusun e nge nameg e piin mabgol boch ban’en ni fan ko pigpig rorad ngak Jehovah?

¹² Rayog ni nge folwok e piin mabgol e ngiyal’ ney rok Priscilla nge Aquila ni aram e ngar m’oneged Gil’ilungun Got u wan’rad. U m’on ni nge mabgol l’agruw ni’ e aram e ngiyal’ nib  fel’ ni ngar weliyew murung’agen e pi n’en yow be nameg. Nap’an ni yow ra nameg boch ban’en u taabang ni fan ko pigpig rorow ngak Jehovah mar rin’ew e pi n’em, ma aram e boor e kanawo’ nrayog ni ngar guyew rogon ni be ayuwegrow Jehovah riy. (Ekl. 4:9, 12) Am lemnag e n’en ni rin’ Russell nge Elizabeth. I gaar Russell, “U m’on ni nggu mabgolgow, ma gamow weliy u taabang e n’en ni gamow baadag ni nggu rin’ew ni fan ngak Jehovah.” Me Elizabeth e gaar, “Fan nug weliyew e pi n’ey u taabang e bochan e nge boch ngaram nib t’uf ni nggu dugliyew boch ban’en ma dabi magawonnag rogon e pi n’en gamow be nameg.” Rogon e par rok Russell nge Elizabeth e bing e kanawo’ ngorow nrayog ni nga ranow ra parew nga Micronesia ni ngar piew e ayuw ko gin nib t’uf boch e tamachib riy.

13. Mang e ra buch ni faanra pagan’dad ngak Jehovah nrogon ni be yog e Psalm 28:7?

¹³ Boor wu’ e mabgol ni kar dugliyed ni ngar momnaged rogon e par rorad ya nge yag nra yoornaged e tayim rorad ni fan ko fare maruwel ni machib nge ngan fil e tin riyul’ ko girdi’ ni bod Russell nge Elizabeth. Nap’an nra nameg ba wu’ e mabgol boch ban’en u taabang ni fan ko pigpig rorow ngak Jehovah mar rin’ew e pi n’em, ma ra yib angin ngorow. Yow ra guy rogon ni be ayuwegrow Jehovah, me gel e pagan’ rorow ngak, mar felfelan’gow.​—Mu beeg e Psalm 28:7.

14. Uw rogon ni dag apostal Peter nge leengin ni be pagan’row ko fapi thin ni bay ko Matthew 6:25, 31-34?

¹⁴ Ku rayog ni nge fil e piin mabgol ban’en rok apostal Peter nge leengin. Sogonap’an nel’ e pul i yan ko reb e duw ni ka fini mada’nag apostal Peter Jesus, ma thingari dugliy ban’en nib ga’ fan. Ma maruwel ni ir reb e tafita’ ni nge yognag e tin nib t’uf ko tabinaw rok. Ere nap’an ni pining Jesus ni nge un ngak u polo’ e tayim rok, ma thingari lemnag e n’en nra buch ko tabinaw rok. (Luke 5:1-11) I dugliy Peter ni nge un ngak Jesus ko machib, mab fel’ e n’en ni mel’eg! Ere bay rogon ni nge mich u wan’dad ni m’agan’ leengin ko n’en ni dugliy. Be yog e Bible nu tomuren nni faseg Jesus ko yam’, ma immoy yu ngiyal’ ni i un leengin Peter ngak ko milekag ni i tay. (1 Kor. 9:5) Dariy e maruwar riy ni bochan e ir reb i leengiy ni Kristiano nib manigil, ma aram fan nib puf rogon Peter nrayog ni nge fonownag e piin figirngiy nge piin leengiy ni Kristiano. (1 Pet. 3:1-7) Ba tamilang nib pagan’ Peter nge leengin ko n’en ke micheg Jehovah ni aram e ra pi’ e tin nib t’uf rorow ni faan yow ra m’oneg Gil’ilungun u lan e yafos rorow.​—Mu beeg e Matthew 6:25, 31-34.

15. Mang e kam fil ko n’en ni buch rok Tiago nge Esther?

¹⁵ Faanra ke yan in e duw ni kam un ko mabgol, ma uw rogon nrayog ni ngam adag ni ngkum yoornag boch e tin ga be rin’ ni fan ngak Jehovah? Reb e kanawo’ e aram e ngam fil murung’agen yu wu’ e mabgol. Rayog ni ngam pirieg murung’agen boch e pi girdi’ ney u lan e pi babyor rodad. Aram e n’en ni ayuweg Tiago nge Esther nib wu’ i mabgol ni yow ma par u Brazil ni ngar adagew ni ngar pigpiggow u bang nib t’uf boch e tamachib riy. I weliy Tiago ni gaar: “Nap’an nug beegew rogon ni be ayuweg Jehovah e pi tapigpig rok e ngiyal’ ney, mu kug adagew ni nggu folgow ko fonow rok Jehovah mu kug guyew rogon ni be ayuwegmow.” Munmun ma ranow ra parew nga Paraguay ngaur machibnagew e girdi’ ni yad ma non ko thin ni Portuguese ni ka nap’an e duw ni 2014. I gaar Esther: “Reb e thin nu Bible nri gamow baadag e bay ko Efesus 3:20. Boor yay ni kug guyew ni ke riyul’ e pi thin ney u nap’an ni gamow be pigpig ngak Jehovah.” U lan e gi babyor nem ni pi’ Paul ngak piyu Efesus, me  micheg nra pi’ Jehovah e tin nib t’uf rodad nge pag e fol riy. Boor yay ni ke riyul’ e re n’ey!

16. Mini’ e rayog ni nge ning e piin mabgol ni kab fel’ yangarrad e fonow ngorad u nap’an ni yad be lemnag rogon e pi n’en yad be nameg?

¹⁶ Piin mabgol ni kab fel’ yangarrad e rayog ni nge yib angin ngorad e n’en ke buch rok boch e girdi’ ni kar taga’gad ngak Jehovah. Bay boch e mabgol nrayog ni ke yoor e duw ni kar machibgad riy u polo’ e tayim rorad. Faanra ga be lemnag rogon e pi n’en ga be nameg, ma rayog ni nga mog ngorad ngar pied boch e fonow ngom nra ayuwegem. Ku ireray reb e kanawo’ nrayog ni ngam dag riy ni be pagan’um ngak Jehovah. (Prov. 22:17, 19) Ku rayog ni nge ayuweg e piin piilal e piin mabgol ni kab fel’ yangarrad ni ngar nameged boch ban’en ni fan ko pigpig rorad ngak Jehovah mar rin’ed.

17. Mang e buch rok Klaus nge Marisa, ma mang e gad be fil riy?

¹⁷ Yu ngiyal’ e rayog ni gad baadag ni ngad yoornaged e tin gad be rin’ ni fan ngak Jehovah u reb e kanawo’, machane me fanaydad ni ngad pigpiggad ngak u yugu reb e kanawo’. Ireray e n’en ni buch rok Klaus nge Marisa ni faan kan weliy murung’agrow. Tomuren dalip e duw ni kar mabgolgow, mar chuwgow ko gin yow ma par riy nga ranow ra piew e ayuw ko dimow naun ni yibe tay ko branch u Finland. Machane, ra nangew ndabiyog ni ngar parew u rom nge pag nel’ e pul. Som’on e ri kireban’row. Machane de n’uw nap’an nga tomuren, mi nog ngorow ni ngar unew i fil e thin ni Arabic, ma chiney e yow bay u yugu reb e nam ni yow be machibnag e girdi’ ni ma non ko thin ni Arabic. Nap’an ni lemnag Marisa e n’en ke buch rorow me yog ni gaar: “Ug rus ni nggu rin’ ban’en ndawor gu rin’ bayay, ere rib t’uf ni ngari pagan’ug ngak Jehovah. Machane gubin ngiyal’ ni gamow be guy rogon ni be ayuwegmow u boch e kanawo’ ndag lemnagew nra rin’ riy. Tomuren ni ke buch e re n’ey romow, ma kari gel boch e pagan’ rog ngak Jehovah.” Ba tamilang ko n’en ke buch ko gali cha’ney ni faanra pagan’um ngak Jehovah, ma rayog ni ngari mich u wan’um ni gubin ngiyal’ nra tow’athnagem.

18. Mang e rayog ni nge rin’ e piin mabgol ya nge yag nra pared ni be pagan’rad ngak Jehovah?

¹⁸ Mabgol e aram reb e tow’ath ni ke yib rok Jehovah. (Matt. 19:5, 6) Baadag ni nge felfelan’ e piin mabgol ko re tow’ath ney. (Prov. 5:18) Gimed e piin mabgol ni kab fel’ yangarmed e ngam fal’eged i lemnag e n’en gimed be rin’. Gimed be rin’ e tin nrayog romed ya nge yag nim daged ngak Jehovah nib ga’ fan u wan’med e tow’ath ni ke pi’ ngomed, fa? Mmeybilgad ngak Jehovah, mi gimed gay boch i kenggin e motochiyel u lan e Thin rok nib m’ag ngomed, mi gimed fol ko fonow ni ke pi’ ngomed. Rayog ni nge pagan’med ngay ni faan gimed ra m’oneg u wan’med e pigpig ni gimed be tay ngak Jehovah ma gimed ra felfelan’ me tow’athnagmed!