1. Mang deer e rayog ni ngad fithed gadad riy?

BAY yu ngiyal’ ni ma magafan’um u nap’an ni ga ra lemnag e pi n’en bayi buch ndab ki n’uw nap’an ni bod e ngiyal’ ni yira thang e pi yurba’ i teliw ni googsur, nge cham nra tay Gog nu Magog, nge fare mahl ni Armageddon, fa? Ga ma fithem ni ma lungum, ‘Gur, rayog ni nggu par ni gub yul’yul’ u nap’an nra buch e pi n’ey nib gel e marus ni yira tay riy, fa?’ Faanra bay ba ngiyal’ ni kam lem ni aray rogon, ma ra ayuwegem fapi thin ni yog Jesus ni aram kenggin e thin nu Bible ni fan ko re article ney. I gaar ngak pi gachalpen: “Dabi magafan’med ma dabi wagagey lanin’med. Mpagedan’med [“Mmaruweliyed e michan’ romed,” NW].” (John 14:1) Ra ba gel e michan’ rodad ma ra ayuwegdad ni ngad pared ndab da rusgad ni yugu demtrug e pi n’en nra buch boch nga m’on.

2. Uw rogon ni ngad gelnaged e michan’ rodad? Mang e gad ra weliy ko re article ney?

² Faan gad ra lemnag e n’en gad ma rin’ u nap’an ni gad ra mada’nag boch ban’en ni ma skengnag e michan’ rodad e ngiyal’ ney, ma aram e gad ra nang rogon ni ngad gelnaged e michan’ rodad. Re n’ey e ra ayuwegdad ni ngad nanged boch ban’en nib t’uf ni ngad rin’ed ya nge yag ni gel e michan’ rodad. Urngin yay ni gad ra athamgil u fithik’ reb e skeng, ma aram e be gel boch e michan’ rodad. Re n’ey e ra ayuwegdad ni ngad athamgilgad u fithik’ e pi skeng ni gad ra mada’nag boch nga m’on. Gad ra weliy ko re article ney aningeg ban’en ni buch rok pi gachalpen Jesus ni be dag nib t’uf ni ngki gel boch e michan’ rorad. Ngemu’ ma gad weliy rogon nrayog ni ngad mada’naged boch e magawon e ngiyal’ ney ni aray rogon, nge rogon nra ayuwegdad e pi n’ey ko pi n’en nra buch boch nga m’on.

3. Mang e tamilangnag Jesus u murung’agen e michan’ nrogon ni bay ko Matthew 6:30, 33?

³ En lolugen e tabinaw e ba ga’ ni baadag ni nge gaman e ggan, nge mad ni nge pi’ ni fan ko tabinaw rok, nge bang ni ngar pared  riy. Re n’ey e de mom ni ngan rin’ e ngiyal’ ney ni ke mo’maw’ e par. Bay boch e walag ni kan talegrad ko maruwel rorad mab mo’maw’ ni ngar pirieged yugu reb e maruwel. Ma boch e walag e thingar ra siyeged boch e maruwel nde fel’ ni nge un e piin Kristiano ngay. Nap’an nra buch boch ban’en ni aray rogon, mab t’uf ni ngari mich u wan’dad nra pi’ Jehovah e tin nib t’uf ko tabinaw rodad. Ireray e n’en ni tamilangnag Jesus ko fare Welthin ni Pi’ u Daken e Burey. (Mu beeg e Matthew 6:30, 33.) Faanra rib mich u wan’dad ndabi pagdad Jehovah, ma aram e rayog ni ngad tedan’dad ko pigpig ni gad be tay ngak. Nap’an ni gad ra guy rogon ni be pi’ e tin nib t’uf ko par rodad, ma aram e ra gel e chugur ko tha’ u thildad miki gel boch e michan’ rodad.

4-5. Mang e ayuweg reb e tabinaw u nap’an ni be magafan’rad nga rogon ni ngar yognaged e tin nib t’uf ko par rorad?

⁴ Am lemnag rogon ni ayuweg Jehovah ba tabinaw u Venezuela u nap’an ni be magafan’rad nga rogon ni ngar yognaged e tin nib t’uf ko par rorad. Kafram e immoy e milay’ rok Miguel Castro nge chon e tabinaw rok, ere ba gaman e salpiy ni be yag ngorad ni fan ko tin nib t’uf rorad. Machane me yan i reb e rran, me yib ba ulung i girdi’ ni bay e boyoch rorad ngar bad ra tulufed yad u daken taferad. I yog Miguel ni gaar: “Chiney e gamad ma woldug u daken boch yang i binaw ni kug ninged ngak be’. Gubin e rran nug ma wenig ngak Jehovah ni nge pi’ e tin nib t’uf ko par romad ko re rran nem.” Yugu aram rogon nib mo’maw’ e par rorad, machane gubin ngiyal’ ni yad ma un ko muulung nge machib mab mich u wan’rad nra pi’ e Chitamangidad ni bay u tharmiy e tin nib t’uf ko par rorad. Bochan nib m’on u wan’rad e pigpig rorad ngak Jehovah, ma aram fan ni be pi’ e tin nib t’uf rorad.

⁵ I tiyan’ Miguel nge Yurai ni leengin nga rogon ni i ayuweg Jehovah e tabinaw rorow u nap’an ni mo’maw’ e par rorad. Bay yu ngiyal’ ni i fanay Jehovah boch e walag ni ngar pied e tin nib t’uf rorad ara ngar ayuweged Miguel ni nge pirieg reb e maruwel nrayog ni nge un ngay. Ku bay yu ngiyal’ ni i fanay Jehovah e branch ofis ni nge pi’ boch ban’en nib t’uf rorad. Dariy ba ngiyal’ ni ke pagrad Jehovah. Bochan e re n’ey, ma ke yag ni nge gel e michan’ rorad. Tomuren ni weliy Yoselin ni bin nth’abi ilal e ppin ni fakrow murung’agen ba ngiyal’ ni ayuwegrad Jehovah, me yog ni gaar: “Gu ra lemnag rogon ni ke ayuwegmad Jehovah, ma ri ma pi’ e athamgil nga lanin’ug. Gu ma tay ni ir e fager rog ni gubin ngiyal’ nra ayuwegeg.” Ki ulul ngay ni gaar: “Pi skeng ni kug warod e tabinaw rog u fithik’ e ra ayuwegmad ko pi skeng ni bay nga m’on nib gel boch e mo’maw’ riy.”

6. Uw rogon nrayog ni ngam gelnag e michan’ rom u nap’an ni ga be magawon ko salpiy?

⁶ Ga be magawon ko salpiy, fa? Faanra arrogon, mab mudugil ni be mo’maw’ rogon e par rom. Yugu aram rogon, ma ireray e ngiyal’ nrayog ni ngam gelnag e michan’ rom. Mmeybil, mag beeg fapi thin ni yog Jesus ni bay ko Matthew 6:25-34, mag fal’eg i lemnag. Mu lemnag e n’en ke buch rok boch e walag e ngiyal’ ney ni be micheg ni faan gad ra mon’eg e pigpig rodad ngak Jehovah, ma ra pi’ e tin nib t’uf rodad. (1 Kor. 15:58) Faan ga ra rin’ e re n’ey, ma rra mich u wan’um nra ayuwegem Jehovah ni bod  rogon ni ke ayuweg yugu boch e walag ni taareb rogon e magawon romed. Manang e n’en nib t’uf rom, nge rogon ni nge pi’. Ere ga ra guy rogon ni be ayuwegem Jehovah, ma ra gel boch e michan’ rom me yag nim athamgil u fithik’ e pi skeng ni kab gel boch e mo’maw’ riy ni ga ra mada’nag boch nga m’on.—Hab. 3:17, 18.

7. Uw rogon ni skengnag bangi “nifeng nrib gel” e michan’ rok pi gachalpen Jesus nrogon ni be yog e Matthew 8:23-26?

⁷ Nap’an ni yib bangi lang ngak Jesus nge pi gachalpen u nap’an ni yad bay u maday, me fanay Jesus e re n’em ni nge ayuwegrad ni ngar nanged nib t’uf ni ngar gelnaged e michan’ rorad. (Mu beeg e Matthew 8:23-26.) Nap’an nri be gel e nifeng ma aram mi i t’ar e n’ew nga lan fare bowoch, machane be mol Jesus. Ere nap’an ni yib pi gachalpen ra puged ni nge ayuwegrad, me fithrad ni gaar: “Mang ni kari mu rusgad? Rib achig e michan’ romed ngak Got!” Susun e manang pi gachalpen nrayog rok Jehovah ni nge ayuweg Jesus nge piin yad be un ngak ndabi buch ban’en rorad. Ere mang e gad be fil ko re n’ey? Faanra ba gel e michan’ rodad, ma rayog ni ngad pared ni gad ba mudugil u nap’an nra yib e yoko’ nib gel, ara nap’an ni kad mada’naged boch e magawon nib mo’maw’ ni kan taarebrogonnag ko yoko’.

8-9. Mang e buch rok Anel ni skengnag e michan’ rok, ma mang e ayuweg?

⁸ Mu lemnag rogon ni gel e michan’ rok reb e walag nib pin nib muchugbil u Puerto Rico ni ka nog Anel ngak ni bochan e athamgil u fithik’ reb e skeng ni yib ngak nib mo’maw’. Bay ba yoko’ ni aw ko gin ma par riy ko duw ni 2017 ni ka nog e Hurricane Maria ngay ni kirebnag e naun rok me skengnag e michan’ rok. Bochan e re yoko’ nem, ma aram me par ndakuriy e maruwel rok. I yog ni gaar: “Ba gel e magafan’ nug tay u lan e pi rran nem. Machane gu fil rogon ni nge pagan’ug ngak Jehovah u daken e meybil, ma dab gu pag e magafan’ rog ni nge talegeg ndab kug rin’ e n’en nib t’uf ni nggu rin’.”

⁹ Ki yog Anel ni fol ni tay e ku aram e n’en ni ayuweg ni nge athamgil u fithik’ e skeng ni yib ngak. I gaar: “Bochan nug fol ko yaram ko ulung, ma aram e n’en ni ayuwegeg ni nggu par nib gapas lanin’ug. I ayuwegeg Jehovah u daken e pi walag nra pied e athamgil nga lanin’ug nge tin nib t’uf ko par rog.” Ki ulul ngay ni gaar: “I pi’ Jehovah e tin nib t’uf rog nge pag e fol riy, mi ri gel e michan’ rog.”

10. Mang e rayog ni ngam rin’ ni faanra ga be mada’nag reb e magawon u lan e yafos rom nrayog ni ngan taarebrogonnag ko yoko’?

¹⁰ Bay reb e magawon ni ga be mada’nag u lan e yafos rom nrayog ni ngan taarebrogonnag ko yoko’, fa? Rayog ni ga be gafgow ni bochan e yoko’ ara durru’ ni ke aw ko gin ga ma par riy. Fa reb e rayog ni ke yib ba mit e m’ar ngom nib ubchiya’ ma kari mulan’um, ma da kum nang e n’en ngam rin’. Sana bay yu ngiyal’ nra i magafan’um, machane dab mu pag e magafan’ rom ni nge talegem ndab ki pagan’um ngak Jehovah. Mu chugurnagem ngak u daken e meybil, mag fal’eg i lemnag rogon ni ke ayuwegem kafram, ya nge yag ni gel e michan’ rom. (Ps. 77:11, 12) Rayog ni nge pagan’um ngay ndariy ba ngiyal’ nra pagem.

11. Mang fan nsusun e ngad dugliyed u wan’dad ni ngad folgad ko piin yad ma yog e thin rodad?

 ¹¹ Mang e ku ra ayuwegem ni ngam athamgil u fithik’ e magawon ni ga be mada’nag? Fol ni ga ra tay e aram e n’en nra ayuwegem ni bod rogon ni yog Anel. Mu fil rogon ni nge pagan’um ngak e piin be pagan’ Jehovah nge Jesus ngorad. Bay yu ngiyal’ nrayog ni nge yog e pi walag ney boch ban’en ni ngad rin’ed nder puluw u wan’dad. Machane ma tow’athnag Jehovah e piin ma fol. Kad filed ko Thin rok nge n’en ke buch rok boch e tapigpig rok ni yad ba yul’yul’ ni faan gad ra fol ma ra ayuweg e yafos rodad. (Ex. 14:1-4; 2 Kron. 20:17) Mu fal’eg i lemnag e pi n’ey, ya aram e n’en nra ayuwegem ni ngam adag ni ngam fol ko yaram ni yibe pi’ u daken e ulung rok Jehovah e chiney i yan nga m’on. (Heb. 13:17) Ga ra rin’ e re n’ey, ma aram e ga ra par ndab mu rus ko fare gafgow nib ga’ ni bay yib.​—Prov. 3:25.

12. Mang rogon e michan’ ko athamgil ni gad ma tay u nap’an ni ke buch boch ban’en rodad nde mat’aw nrogon ni be yog e Luke 18:1-8?

¹² Manang Jesus ni pi n’en nde mat’aw nra i buch rok pi gachalpen e ra skengnag e michan’ rorad. Ere weliy ba fanathin ngorad ni bay ko fare babyor rok Luke ni nge ayuwegrad. I weliy murung’agen be’ nib pin ni ke yim’ figirngin ni yig i sul ngak ba tapuf oloboch nga i wenignag mat’awun ngak. Manang ni faanra dabi tal i ning e n’en nib t’uf rok, ma ra munmun ma yira ayuweg. Ere munmun ma aram me rin’ fare tapuf oloboch e n’en be wenignag fare pin. Mang e gad be fil ko re n’ey? Jehovah e ir reb e Got nib mat’aw. Aram fan ni gaar Jesus: “Gimed be finey ma dabi turguy Got e tin ni ir e mmat’aw nra fel’ rogon e tirok e girdi’ riy ni piin ni yad be wenig ngak ni rran nge nep’ ni nge ayuwegrad?” (Mu beeg e Luke 18:1-8.) Ngemu’ miki gaar: “Ra sul e en ni Fak e Girdi’ ma gur ra pirieg e girdi’ nu fayleng ni yad be par ni kab michan’rad ngak?” Nap’an nra buch boch ban’en nde mat’aw rodad, mab t’uf ni ngad daged u daken e gum’an’ nge athamgil ni gad be tay nib gel e michan’ rodad ni bod rogon fare pin ni ke yim’ figirngin. Faanra ba gel e michan’ rodad ni aray rogon, ma aram e rayog ni nge pagan’dad nra ayuwegdad Jehovah. Kub t’uf ni nge mich u wan’dad nib ga’ angin e meybil. Bay yu ngiyal’ nrayog ni ngan fulweg taban e meybil rodad u reb e kanawo’ ndad lemnaged ni yira rin’ riy.

13. Uw rogon ni ayuweg e meybil reb e tabinaw ni buch ban’en rorad nde mat’aw?

¹³ Am lemnag e n’en ni buch rok reb e walag nib pin ni ka nog Vero ngak ni ma par u Democratic Republic of the Congo. Thingari chuw Vero, nge pumoon rok nder ma pigpig ngak Jehovah, nge ba rugod ni fakrow ni 15 e duw rok u nap’an ni yib bogi salthaw ra chamgad ko binaw rorad. Nap’an ni yad be yan u kanawo’ mar bad nga bang ni kan ning e kanawo’ riy, ma aram me talegrad e salthaw ni bay u rom ma rogned ni ngar thanged e fan rorad. Nap’an ni tabab Vero ko meyor, ma aram me meybil fare rugod ni fak nib ga’ laman ma be sul u daken fithingan Jehovah ni boor yay ni bochan e nge fal’eg laniyan’. Nap’an ni mu’ ko meybil, ma aram me gaar faen nib ga’ ko salthaw ngak, “Mini’ e ke fil rogon e  meybil ngom?” Me fulweg ni gaar, “Nina’ rog e ke fil ngog ni be fanay fare kenggin e meybil ni bay ko Matthew 6:9-13.” Me gaar fare ga’ ko salthaw ngak, “Mmarod e gallabthir rom u fithik’ e gapas, ma manga yigi ayuwegmed Jehovah ni Got romed!”

14. Mang e rayog ni nge skengnag e michan’ rodad, ma mang e ra ayuwegdad ni ngad athamgilgad?

¹⁴ Pi n’ey ni ma buch e be fil ngodad nthingar dab da paged talin feni ga’ fan e meybil. Machane uw rogon ni faanra dan fulweg taban e meybil rom nib papey ara u reb e kanawo’ ni ga ra ngat ngay? Dab mu tal ko meybil ma nge pagan’um ngay ndabi pagem Got, ma dabisiy nra munmun ma bay rogon nra fulweg taban e meybil rom, ni bod fare pin ni ke yim’ figirngin ni weliy Jesus murung’agen ko fanathin rok. Mu ulul ngam ning gelngin Jehovah nib thothup. (2 Kor. 4:7) Dab mu pagtalin ndab ki n’uw nap’an mab ga’ e tow’ath nra pi’ Jehovah ngom me yag nim pagtalin e gafgow ni ka um man u fithik’. Nap’an nra ayuwegem Jehovah ni ngam athamgil u fithik’ e pi skeng ni ga be mada’nag, ma aram e ra yib gelngim ni ngam man u fithik’ e pi skeng ni ga ra mada’nag boch nga m’on.​—1 Pet. 1:6, 7.

15. Mang e magawon ni mada’nag pi gachalpen Jesus nrogon ni bay ko Matthew 17:19, 20?

¹⁵ I fil Jesus ngak pi gachalpen ni michan’ e aram e n’en nra ayuwegrad ni ngar athamgilgad u fithik’ e pi magawon rorad. (Mu beeg e Matthew 17:19, 20.) Bay bayay nde yag ni ngar tulufed e moonyan’ ni ke yib i ying ngak be’ ni yugu aram rogon ni immoy yu ngiyal’ u m’on riy ni yag ni ngar rin’ed e re n’ey. Mang e magawon rorad? I yog Jesus nib t’uf ni ngki gel boch e michan’ rorad. I yog ngorad ni faanra ba gel e michan’ rorad ma rayog ni ngar athamgilgad u fithik’ boch e magawon nib ga’ nrayog ni ngan taarebrogonnag ko burey nib tolang! Ku arrogodad e ngiyal’ ney nrayog ni ngad mada’naged boch e magawon nib mo’maw’ ni ngad athamgilgad u fithik’.

16. Uw rogon ni yag ni nge athamgil Geydi u tomuren nni li’ e pumoon rok nge yim’ ni bochan e michan’ rok?

¹⁶ Am lemnag e n’en ni buch rok Geydi nreb e walag nib pin ni ma par u Guatemala. Nni li’ Edi ni pumoon rok nge yim’ u nap’an ni yow be sul nga taferow u tomuren e muulung. Ere uw rogon ni ayuweg e michan’ rok ni nge athamgil ni yugu aram rogon nrib gel e kireban’ ni tay? I yog ni gaar: “Meybil e aram e n’en ma ayuwegeg ni nggu pag fan e magawon rog ngak Jehovah me gapas lanin’ug. Gu be guy rogon ni be ayuwegeg Jehovah u daken girdien e tabinaw rog nge pi fager rog u lan e ulung. Bochan ni boor ban’en nug be rin’ ni fan ko pigpig rog ngak Jehovah, ma aram e n’en ni ke warnag boch e kireban’ rog ma ke yag ni nggu athamgil u reb e rran ngu reb ndab ki magafan’ug ko n’en nra buch ko bin migid e rran. Kug fil ko n’en ni ke buch rog ndemtrug e re miti skeng nug ra mada’nag boch nga m’on, ma ra ayuwegeg Jehovah, nge Jesus, nge ulung rodad ni nggu athamgil u fithik’.”

17. Mang e rayog ni ngad rin’ed u nap’an ni kad mada’naged reb e magawon nib ga’ nrayog ni ngan taarebrogonnag ko burey nib tolang?

¹⁷ Be kireban’um ni bochan e ke yim’ be’ nib t’uf rom, fa? Mu beeg murung’agen boch e girdi’  u Bible nni fasegrad ko yam’, ya nge yag ni ngari mich u wan’um e athap ko fos ko yam’. Be kireban’um ni bochan e kan tharbog reb i girdien e tabinaw rom, fa? Mu fil e Bible ya nge yag ni ngarim micheg nga lanin’um ni birok Got e kanawo’ u rogon ni ma yal’uwegey e aram e bin nth’abi fel’. Demtrug e re miti magawon ni ga be mada’nag, mag fanay e binem e kanawo’ ni ke mab ngom ni ngam gelnag e michan’ rom riy. Mu weliy gubin ban’en ni bay u lanin’um ngak Jehovah. Dab mu palognagem ko pi walag, ya ngam chugurnagem ngorad. (Prov. 18:1) Yugu aram rogon ni ga ma yor u nap’an ni ga ra lemnag e n’en ke buch rom, machane mu rin’ boch ban’en nra ayuwegem ni ngam athamgil u fithik’ e magawon rom. (Ps. 126:5, 6) Mu ulul ni ngam un ko muulung, nge machib, ma ga be beeg e Bible rom, mu um lemnag e pi tow’ath ni ke micheg Jehovah nra pi’ ngom boch nga m’on. Ga ra guy rogon ni be ayuwegem Jehovah, ma aram e rra gel boch e michan’ rom ngak.

18. Mang e rayog ni ngam rin’ ni faanra ga be guy nib t’uf ni ngam gelnag boch e michan’ rom?

¹⁸ Dabi mulan’um ni faanra pi skeng ni um mada’nag kafram nge tin ga be mada’nag e chiney e be m’ug riy nib t’uf ni ngam gelnag boch e michan’ rom. Mu fanay e biney e kanawo’ ni ke mab ngom ni ngam gelnag e michan’ rom riy. Mog fapi thin ni yog e pi apostal rok Jesus ni faani lungurad: “Mu gelnag e michan’ romad ngak Got.” (Luke 17:5) Kum lemnag murung’agen e pi walag ni kan weliy ko re article ney. Mu lemnag urngin yay ni ke ayuwegem Jehovah ni bod Miguel nge Yurai. Mu par ni ga be meybil ngak Jehovah nib ga’ nu nap’an ni kam mada’nag reb e magawon nib ga’ ni bod e n’en ni rin’ Anel nge fare rugod ni fak Vero. Ma ngkum nang nrayog ni nge fanay Jehovah e girdi’ u lan e tabinaw rom ara pi fager rom ni nge ayuwegem ni bod Geydi. Ga ra pag Jehovah ni nge ayuwegem u fithik’ e pi magawon ni ga be mada’nag, ma aram e rayog ni nge pagan’um ngay nra ayuwegem u fithik’ boch e magawon nrayog ni ngam mada’nag boch nga m’on.

19. Mang e ba pagan’ Jesus ngay, ma mang e rayog ni nge pagan’um ngay?

¹⁹ I ayuweg Jesus pi gachalpen ni ngar nanged ni kab t’uf ni nge gel boch e michan’ rorad. Machane ba pagan’ ngay nra ayuwegrad Jehovah ni ngar athamgilgad u fithik’ e pi magawon ni yad ra mada’nag boch nga m’on. (John 14:1; 16:33) Ba pagan’ ngay ni bay ba ulung nib ga’ ni yad ra magey ni yad ba fos u tomuren fare gafgow nib ga’ ni bochan e ba gel e michan’ rorad. (Rev. 7:9, 14) Ga ra moy u fithik’ e pi girdi’ nem, fa? Faan ga ra rin’ urngin e tin rayog rom ni ngam gelnag e michan’ rom e chiney, ma aram e ra ayuwegem Jehovah ni ngam thap ngaram!​—Heb. 10:39.