1. Mang e be pi’ Jehovah e athamgil ngodad ni ngad rin’ed?

T’UFEG u fithik’ e yul’yul’ e aram ban’en nib ga’ fan u wan’ Jehovah. (Hos. 6:6) Ku baadag ni nge ga’ fan e re n’ey u wan’ e pi tapigpig rok. Ke pi’ e athamgil ngodad u daken Mikah ni profet ni ngad ‘pired nib t’uf Got rodad nge girdi’,’ ara ngad daged e t’ufeg u fithik’ e yul’yul’. (Mik. 6:8) Machane ra nge yag ni ngad rin’ed e re n’ey, mab t’uf ni ngad nanged ko mang e t’ufeg u fithik’ e yul’yul’.

2. Mang e t’ufeg u fithik’ e yul’yul’?

² Mang e t’ufeg u fithik’ e yul’yul’? Fare thin ni “t’ufeg u fithik’ e yul’yul’” e sogonap’an 230 yay ni bay ko fare Bible ni New World Translation of the Holy Scriptures. Mang fan e re thin ney? Faanra dag be’ e t’ufeg u fithik’ e yul’yul’ ngak be’, ma aram e rib t’uf facha’ rok ma ra ulul ni nge dag e t’ufeg ngak ma dariy ba ngiyal’ nra pag. Ba ga’ ni yima fanay e re thin ney u nap’an ni yibe weliy murung’agen e t’ufeg rok Got ko girdi’, machane ku rayog ni nge yip’ fan e t’ufeg u thilin e girdi’. Jehovah e ir e en nth’abi fel’ rogon ni ma dag e re t’ufeg ney. Ere gad ra weliy ko re article ney rogon ni ma t’ufeg Jehovah e girdi’ u fithik’ e yul’yul’. Ma bin migid e article e gad ra weliy riy rogon ni ngad folwokgad rok Jehovah u rogon ni ngad t’ufeged pi walagdad u fithik’ e yul’yul’.

3. Mang ban’en u rarogon Jehovah ni tamilangnag ngak Moses?

³ De n’uw nap’an nga tomuren ni chuw piyu Israel u Egypt, me yog Jehovah ban’en u murung’agen e ngachal rok nge pi fel’ngin ngak Moses. I gaar: “I Somol, i Somol e ir fare Got nri ma runguy e girdi’ ma ma kireban’ ngorad, ni gathi mmachreg  ni ma yib e puwan’ ngak, ma ma t’ufeg e girdi’ ma ma yul’yul’ ngorad. Tin ni ke yog ngak boor i biyu’ e girdi’ ni bay rin’ ngorad e dabi thil, ma n’ag fan u wan’ e tin ni kan rin’ nde mat’aw, nge tin nib kireb, nge denen.” (Ex. 34:6, 7) Nap’an ni yog Jehovah e pi thin ney ngak Moses, ma aram me tamilangnag ban’en ni yugu ba thil u rarogon e t’ufeg ni ma dag u fithik’ e yul’yul’. Mang e re n’em?

4-5. (a) Mang e ke tamilangnag Jehovah u rarogon? (b) Mang deer e gad ra weliy e fulweg riy?

⁴ Gathi kemus ni ke yog Jehovah ni ma dag e t’ufeg u fithik’ e yul’yul’, ya ki tamilangnag ni ir e en nth’abi fel’ rogon ni ma dag e t’ufeg u fithik’ e yul’yul’. Boor yay ni kan weliy e re n’ey u lan e Bible. (Num. 14:18; Neh. 9:17; Ps. 86:15; 103:8; Joel 2:13; Jonah 4:2) Ma urngin yay ni yira weliy, ma yigoo Jehovah e fan ngak ma gathi girdi’. Riyul’ ni yira ngat nga rogon ni ma weliy Jehovah rarogon ko biney e kanawo’ u lan e Bible. Ere dariy e maruwar riy ni t’ufeg u fithik’ e yul’yul’ e aram ban’en nib ga’ fan u wan’. Aram fan ni yog David ni Pilung ni gaar: “Somol, t’ufeg rom ni dabi mus e ke taw ko pi tharmiy . . . A Got, rib th’ab feni fel’ e t’ufeg rom ni dabi mus! Gamad be naf e girdi’ nga tan e tagalul’ u pom.” (Ps. 36:5, 7, BT) Ma uw rogodad, ba ga’ fan e t’ufeg ni ma dag Got u fithik’ e yul’yul’ u wan’dad ni bod David, fa?

⁵ Ra ngari tamilang u wan’dad fan e t’ufeg u fithik’ e yul’yul’, mab t’uf ni ngad weliyed e fulweg ko gal deer ni baaray ni be gaar: Mini’ e piin ma t’ufegrad Jehovah u fithik’ e yul’yul’? Ma uw rogon ni ma yib angin ngodad rogon ni ma t’ufegdad Jehovah u fithik’ e yul’yul’?

6. Mini’ e piin ma t’ufegrad Jehovah u fithik’ e yul’yul’?

⁶ Mini’ e piin ma t’ufegrad Jehovah u fithik’ e yul’yul’? Kemus ni yigoo girdi’ e yima dag e t’ufeg ngorad u fithik’ e yul’yul’. Machane gathi yugu demtrug be’ ni ma dag Jehovah e t’ufeg ngak u fithik’ e yul’yul’. Ya kemus ni yigoo piin nib chugur e tha’ u thilrad e ma dag e re t’ufeg ney ngorad. Got rodad e ba yul’yul’ ko pi fager rok. Bay ban’en nib manigil nib m’agan’ ngay ni fan ngorad, ma dariy ba ngiyal’ nra tal ndab ki t’ufegrad.

7. Uw rogon ni ke dag Jehovah nib t’uf gubin e girdi’ rok?

⁷ Ke dag Jehovah nib t’uf gubin e girdi’ rok. I yog Jesus ngak be’ nib moon ni ka nog Nikodemus ngak ni gaar: “Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.”​—John 3:1, 16; Matt. 5:44, 45.

8-9. (a) Mang fan ni ma t’ufeg Jehovah e pi tapigpig rok u fithik’ e yul’yul’? (b) Mang e bin migid ni ngad weliyed?

 ⁸ Kad weliyed faram ni kemus ni yigoo pi tapigpig rok Jehovah ara piin nib chugur e tha’ u thilrad e ma dag e t’ufeg ngorad u fithik’ e yul’yul’. Rayog ni ngad guyed e re n’ey ko n’en ni yog David ni Pilung nge Daniel ni profet. David e yog ni gaar: “Mu ulul ko t’ufeg rom ngak e piin yad manangem.” “Piin ni yad be tay fan Somol e bay ur pired ni yad ba t’uf rok Somol ni dariy n’umngin nap’an.” Ma Daniel e yog ni gaar: “Somol ni Got . . . ga be par nib t’uf rom e piin ni gab t’uf rorad ma yad be rin’ e tin ni ka mog.” (Ps. 36:10, BT; 103:17; Dan. 9:4) Ba tamilang ko pi thin ney ni fan ni ma t’ufeg Jehovah e pi tapigpig rok u fithik’ e yul’yul’ e bochan ni yad manang, ma yad ma tayfan, mab t’uf rorad, ma yad ma rin’ e tin ke yog. Kemus ni yigoo piin yad ma liyor ngak u rogon nib m’agan’ ngay e ma dag e t’ufeg ngorad u fithik’ e yul’yul’.

⁹ U m’on ni ngad manged boch e tapigpig rok Jehovah, ma ma t’ufegdad ni bod rogon ni ma t’ufeg e tin ka bay e girdi’. (Ps. 104:14) Machane chiney ni kad manged boch e tapigpig rok e ma t’ufegdad u fithik’ e yul’yul’. Bin riyul’ riy e, ke micheg ngak e pi tapigpig rok ni ke gaar: “Rogon nri gab t’uf rog e dariy e rofen nra mus.” (Isa. 54:10) Arrogon, “ra ayuweg Jehovah e en nib yul’yul’ ngak u reb e kanawo’ ni yugu ba thil” ni bod rogon ni rin’ ngak David. (Ps. 4:3, NW) Ere mang e susun ni nge k’aringdad e re n’ey ni ngad rin’ed? I yog e en ni yoloy e Psalm ni gaar: “Piin yad ba gonop e manga yu gur lemnaged e pi n’ey; manga yu gur tafnayniged fare t’ufeg rok Somol ndabi mus.” (Ps. 107:43, BT) Re fonow ney nib manigil e ke yib rok Jehovah. Ere ngad weliyed dalip e kanawo’ ni ma t’ufeg Jehovah e pi tapigpig rok riy u fithik’ e yul’yul’ nge angin ni ma yib ngorad.

10. Mang angin nra yib ngodad ni faanra gad manang ni t’ufeg rok Jehovah e ra par ni manemus? (Psalm 31:7)

¹⁰ T’ufeg ni ma dag Got u fithik’ e yul’yul’ e ra par ni manemus. Reliw’ nge nel’ yay ni kan weliy murung’agen e re t’ufeg ney ko Psalm 136. Bin som’on e verse e be gaar: “Ngan pining e  magar ngak Somol, ni bochan e ba manigil; t’ufeg rok e ba manemus.” (Ps. 136:1, BT) Verse 2 nge mada’ ko verse 26 e bay riy fapi thin ni be gaar “t’ufeg rok e ba manemus.” Gad ra beeg e pi verse ney ma gad ra ngat nga urngin e kanawo’ ni ma ulul Jehovah ni nge dag e t’ufeg riy u fithik’ e yul’yul’. Fapi thin ni “t’ufeg rok e ba manemus” e be micheg nder ma thil rogon ni ma t’ufeg Got e pi tapigpig rok. Gad ra lemnag rogon nder ma gur Jehovah nge mulan’ u puluwon e pi tapigpig rok, ma ri ma pi’ e athamgil nga lanin’dad! Ya der ma pag e piin yad ma pigpig ngak nib ga’ nu nap’an ni ke yib e gafgow ngorad. Rogon angin ngodad: Bochan ni gad manang ndabi pagdad Jehovah, ma aram e n’en ma yibnag e felfelan’ ngodad miki pi’ gelngidad ni ngad athamgilgad u fithik’ e pi magawon rodad mad ululgad ko pigpig ni gad be tay ngak.​—Mu beeg e Psalm 31:7.

11. Mang e ma k’aring Jehovah ni nge n’ag fan e kireb nrogon ni bay ko Psalm 86:5?

¹¹ T’ufeg ni ma dag Got u fithik’ e yul’yul’ e ir e ma k’aring ni nge n’ag fan e kireb. Nap’an nra guy Jehovah reb e tadenen ni ke kalngan’ me tal ko kireb ni be rin’, ma t’ufeg ni ma dag u fithik’ e yul’yul’ e ir e ma k’aring ni nge n’ag fan e kireb rok. David ni fare psalmist e weliy murung’agen Jehovah ni gaar: “Der ma gechignagdad nrogon ni ba’ rogon ni nge gechignagdad, ara pi’ ngodad wenegan e denen rodad nge kireb rodad nrogon.” (Ps. 103:8-11) Manang David gelngin e kireban’ nrayog ni nge tay be’ ni faanra be magawon e nangan’ rok. Machane ki nang ni Jehovah e “ma n’ag fan” e kireb u wan’. Mang e ma k’aring Jehovah ni nge rin’ e re n’ey? Bay e fulweg riy ko Psalm 86:5, BT. (Mu beeg.) Arrogon, ma n’ag Jehovah fan e kireb ni bochan e rib t’uf rok urngin e piin yad ma wenig ngak ni nge n’ag fan e kireb rorad ni bod ni yog David u lan e meybil rok.

12-13. Mang e ra ayuwegdad ni faanra be magawon lanin’dad ni bochan e kireb ni ud rin’ed kafram?

¹² Nap’an ni gad ra denen mab puluw ma kub fel’ ni nge kireban’dad ko n’en kad rin’ed. Re n’ey e rayog ni nge k’aringdad ni ngad kalgadngan’dad ma gad thilyeg e ngongol rodad. Machane ka bay boch e tapigpig rok Got ni yugu yad ma lemnag e kireb ni ur rin’ed  kafram. Yugu aram rogon ni kar weniggad ni ngan n’ag fan e kireb rorad ma kar talgad i rin’ e pi kireb nem, machane ka yad ma lemnag ndabi n’ag Jehovah fan e kireb rorad. Faanra tamilang u wan’um nriyul’ ni baadag Jehovah ni nge dag e t’ufeg ngom u fithik’ e yul’yul’ ma ra ayuwegem ni nge dab kum lem ni aray rogon.

¹³ Rogon angin ngodad: Yugu aram rogon ndawor da flontgad, ma rayog ni ngad pigpiggad ngak Jehovah u fithik’ e felfelan’ nib beech e nangan’ rodad. Rayog ni ngad rin’ed e re n’ey ni bochan e “rachaen Jesus ni Fak e ir e be beechnagdad u urngin e denen rodad.” (1 John 1:7) Nap’an nra mulan’um ni bochan boch e meewar rom, ma dab mu pagtalin ni faanra kam kalngan’um ma ri baadag Jehovah ni nge n’ag fan e kireb rom. Mu tay fanam i yan u rogon ni weliy David e n’en nib peth u thilin e t’ufeg u fithik’ e yul’yul’ nge ngan n’ag fan e kireb. I yoloy ni gaar: “Rogon feni ga’ thilin e fayleng nge lan e lang, e aram ga’ngin nrib t’uf rok Somol e piin ni yad be par ni bay madgun Somol u wun’rad. Rogon feni mal’af thilin e ngek nge ngal, e aram rogon nra chuweg e denen rodad nge mal’afnag rodad.” (Ps. 103:11, 12) Arrogon, ba m’agan’ Jehovah ngay ni ngari “n’ag fan ban’en u wan’.”​—Isa. 55:7.

14. Uw rogon ni weliy David rogon ni ma yororiydad e t’ufeg ni ma dag Got u fithik’ e yul’yul’?

¹⁴ T’ufeg ni ma dag Got u fithik’ e yul’yul’ e ma yororiydad u boch ban’en nra kirebnag e tha’ u thildad Jehovah. Nap’an ni meybil David ngak Jehovah me yog ni gaar: “I gur e gu ma mith nga fom; bay mu chuwegneg u fithik’ e oloboch. Gu be tangnag nib ga’ lamag rogon ni ga ma ayuwegney, ni bochan e gur e kam yororiyeg. . . . Piin nib pagan’rad ngak Somol e be yororiyrad ko t’ufeg rok ni dabi mus.” (Ps. 32:7, 10, BT) Yoror nib liyeg reb e mach kakrom e ir e ma ayuweg e girdi’ ko fare mach ko pi toogor rorad. Ere t’ufeg ni ma dag Jehovah u fithik’ e yul’yul’ e bod ba yoror ni be ayuwegdad u boch ban’en nra kirebnag e tha’ u thildad Jehovah. Ku aram e n’en ni ma chugurnagdad ngak.​—Jer. 31:3.

15. Uw rogon ni t’ufeg ni ma dag Jehovah u fithik’ e yul’yul’ e taareb rogon ko rungrung nge manaf?

¹⁵ Ku bay ban’en ni weliy David u murung’agen rogon ni ma yororiy Jehovah e girdi’ rok. I yoloy ni gaar: “Got e yoror rog, fare Got ni gub t’uf rok.” Ki weliy David murung’agen Jehovah ni gaar: “Ir e ma yororiyeg ma ma rungrung rog, manaf rog nge taayuw rog, ir e ma pagan’ug ngak ni dabi buch ban’en rog.” (Ps. 59:17, BT; 144:2, BT) Mang fan ni taarebrogonnag David e t’ufeg ni ma dag Jehovah u fithik’ e yul’yul’ ko rungrung nge manaf? Faanra gad be pigpig ngak Jehovah ma demtrug e gin gad bay riy u fayleng, ma ra ayuwegdad ko n’en nib t’uf rodad ya nge yag ni par e tha’ u thildad nib manigil. Ku aram e n’en be yog e Psalm 91. I yog e en ni yoloy e pi thin ney ni gaar: “Rayog ni nge gaar ngak Somol, ‘I gur e ga be yoror rog me gur e gu be naf ngom!’” (Ps. 91:1-3, 9, 14) Ku taab n’en e yog Moses u murung’agen e manaf. (Ps. 90:1) De n’uw nap’an u m’on ni nge yim’, miki weliy murung’agen e re n’ey u yugu reb e kanawo’. I yoloy ni gaar: “Ka faram i yib ni be par Got ni ir e yoror romed, pa’ ni bay i par ni manemus e be ayuwegmed ngay.” (Deut. 33:27) Mang e be yog fare thin ngodad ni “pa’ ni bay i par ni manemus e be ayuwegmed ngay” u murung’agen Jehovah?

16. Mang l’agruw e kanawo’ ni ma ayuwegdad Jehovah riy? (Psalm 136:23)

¹⁶ Ra pagan’dad ni faanra gad manang ni Jehovah e ir e Manaf rodad. Machane bay yu ngiyal’ nrayog ni nge mulan’dad ni ke mo’maw’ ni nge fel’ lanin’dad. Nap’an nra buch e  re n’ey, ma mang e ra rin’ Jehovah ni fan ngodad? (Mu beeg e Psalm 136:23.) Ra bod ni ke kol pa’dad ke sak’iynagdad bayay nga lang. (Ps. 28:9; 94:18) Rogon angin ngodad: Gad manang ni gubin ngiyal’ nrayog ni ngad taga’gad ngak Got. L’agruw e kanawo’ ni be ayuwegdad e re n’ey riy. Bin som’on e, demtrug e gin gad be par riy ma gad manang ni gubin ngiyal’ nra ayuwegdad Jehovah. Ma bin migid e, ri gad ba t’uf rok e Chitamangidad ni bay u tharmiy.

17. Mang e rayog ni nge pagan’dad ngay ni bochan e t’ufeg ni ma dag Got u fithik’ e yul’yul’? (Psalm 33:18-22)

¹⁷ Ere kad filed nnap’an ni gad ra mada’nag e magawon, ma rayog ni nge pagan’dad nra ulul Jehovah ni nge ayuwegdad ni ngad pared ni gad ba yul’yul’. (2 Kor. 4:7-9) I yog Jeremiah ni profet ni gaar: “Fare t’ufeg rok Somol ni dabi m’ay nge marunguy rok e ku be ulul i yan.” (Lam. 3:22, BT) Rayog ni nge pagan’dad nra ulul Jehovah ni nge t’ufegdad u fithik’ e yul’yul’ ni bochan e be yog e Bible ni “Somol e ma yaliy e piin bay madgun u wan’rad, ni piin ke pagan’rad ko t’ufeg rok ni dabi mus.”​—Mu beeg e Psalm 33:18-22, BT.

18-19. (a) Mang e dab da paged talin? (b) Mang e gad ra weliy ko bin migid e article?

¹⁸ Mang e dab da paged talin? U m’on ni ngad pigpiggad ngak Jehovah ma i t’ufegdad ni bod rogon e tin ka bay e girdi’. Machane nap’an nda manged boch e tapigpig rok ma aram e ma t’ufegdad u fithik’ e yul’yul’. Bochan ni gad ba t’uf rok Jehovah, ma ma yororiydad nga pa’ nib gel. Gubin ngiyal’ nra taydad ni gad ba chugur ngak, me lebguy e n’en nib m’agan’ ngay ni fan ngodad. Baadag ni ngad manged e pi fager rok ndariy n’umngin nap’an! (Ps. 46:1, 2, 7) Aram fan ndemtrug e re miti skeng ni gad ra mada’nag, ma ra pi’ gelngidad ya nge yag nda pared ni gad ba yul’yul’ ngak.

¹⁹ Ere kad guyed rogon ni ma t’ufeg Jehovah e pi tapigpig rok u fithik’ e yul’yul’. Ma baadag ni ngkud t’ufeged pi walagdad u fithik’ e yul’yul’. Uw rogon nrayog ni ngad rin’ed e re n’ey? Bin migid e article e ra weliy rogon.