ARTICLE NI NGAN FIL 47
Dab Mu Pag Ban’en ni Nge Palognagem rok Jehovah
“Ba pagan’ug ngom, A Somol.”—PS. 31:14, BT.
TANG 122 Ngad Pired ni Gad Ba Mudugil!
TIN YIRA WELIY a
1. Uw rogon ni kad nanged ni baadag Jehovah ni ngad chugurgad ngak?
BE YOG Jehovah ngodad ni ngad chugurgad ngak. (Jas. 4:8) Baadag ni nge mang Got rodad, nge Chitamangidad, nge Fager rodad. Ma fulweg taban e meybil rodad, maku ma ayuwegdad u nap’an ni gad ra mada’nag e magawon. Ku ma fanay e ulung rok ni nge skulnagdad me ayuwegdad. Machane mang e thingar da rin’ed me yag nda chugurgad ngak Jehovah?
2. Uw rogon nrayog ni ngad chugurgad ngak Jehovah?
2 Rayog ni ngad chugurgad ngak Jehovah ni faanra ud meybilgad ngak, ma gad be beeg e Thin rok, ma gad be fal’eg i lemnag. Gad ra rin’ e re n’ey, ma aram e ra gel feni t’uf rodad miki ga’ fan u wan’dad e tin be rin’ ni fan ngodad. Ku ra k’aringdad e re n’ey ni ngad folgad rok ma gad pining e sorok ngak u rogon kanawoen nsusun e ngad rin’ed. (Rev. 4:11) Ra yoor ban’en nda nanged u murung’agen Jehovah, ma aram e ra gel e pagan’ rodad ngak nge ulung rok ni ke tay ni nge ayuwegdad.
3. Uw rogon ni ma guy Moonyan’ rogon ni nge palognagdad rok Jehovah? Mang e ra ayuwegdad ni nge dab da paged e Got rodad nge ulung rok? (Psalm 31:13, 14)
3 Machane ma guy Moonyan’ rogon ni nge palognagdad rok Jehovah nib ga’ nu nap’an ni gad ra mada’nag e magawon. Uw rogon ni ma rin’ e re n’ey? Ma guy rogon ni nge warnag e pagan’ rodad ngak Jehovah nge ulung rok ni buchuuw ma buchuuw. Machane rayog ni ngad ayuweged gadad ko pi ban rok. Faanra ba gel e michan’ nge pagan’ rodad ngak Jehovah, ma aram e dab da paged e Got rodad nge ulung rok.—Mu beeg e Psalm 31:13, 14.
4. Mang e gad ra weliy ko re article ney?
4 U lan e re article ney e gad ra weliy riy dalip e magawon nrayog ni nge yib ngodad u wuru’ e ulung. Pi magawon ney e rayog ni nge warnag e pagan’ rodad ngak Jehovah nge ulung rok. Uw rogon nrayog ni nge k’aringdad e pi magawon ney ni ngad paloggad rok Jehovah? Ma mang e rayog ni ngad rin’ed ya nge yag nda gelgad ko n’en be guy Satan rogon ni nge rin’ ngodad?
NAP’AN NI GAD RA MADA’NAG E MAGAWON
5. Nap’an ni gad ra mada’nag e magawon, ma uw rogon nrayog ni nge warnag e pagan’ rodad ngak Jehovah nge ulung rok?
5 Bay yu ngiyal’ ni gad ma mada’nag e magawon ni bod e togopuluw u lan e tabinaw ara kan talegdad ko maruwel rodad. Uw rogon nrayog ni nge k’aringdad e magawon ni aray rogon ni nge war e pagan’ rodad ko ulung rok Jehovah mu kud paloggad rok? Ra ke n’uw nap’an ni gad be mada’nag e magawon, ma rayog ni nge mulan’dad miki kireban’dad. Ireray boch ban’en ni ma fanay Satan ni nge k’aringdad ni ngad lemnaged nda kud t’ufgad rok Jehovah. Baadag Moonyan’ ni ngad lemnaged ni Jehovah ara ulung rok e ir tapgin e gafgow ni gad be mada’nag. Bay ban’en ni buch rok boch e girdi’ u Israel ni ur moyed u Egypt ni bod e re n’ey. Som’on e mich u wan’rad ni Jehovah e ir e ke mel’eg Moses nge Aron ni ngar chuwegew yad ko sib. (Ex. 4:29-31) Machane faani boch nga tomuren u nap’an ni gelnag Farao e gafgow ngorad, ma aram ma ron’ed e kireb nga daken Moses nge Aron, me lungurad ngorow: “Kam gagiyegnigew Farao nge girdi’ nib tolang ni bay u tan pa’ kar dabuyed gamad. Kam tiyew e sayden nga pa’rad ni ngar lied gamad nggu m’ad.” (Ex. 5:19-21) Ere ka ron’ed e kireb nga daken l’agruw e tapigpig rok Got ni yow ba yul’yul’. Rib gel e kireban’ ko re n’ey! Ra ke n’uw nap’an ni ga be mada’nag e magawon, ma uw rogon nrayog ni ngam par nrib pagan’um ngak Jehovah nge ulung rok?
6. Mang e kad filed rok Habakkuk ni profet u rogon ni ngad athamgilgad u fithik’ e pi magawon ni gad be mada’nag? (Habakkuk 3:17-19)
6 Mu weliy urngin ban’en ni bay u lanin’um ngak Jehovah u daken e meybil, mag sap ngak ni nge ayuwegem. Boor e magawon ni mada’nag Habakkuk ni profet. Bay ba ngiyal’ ni taw ngay me maruwar u wan’ ko riyul’ ni be lemnag Jehovah fa danga’. Ere weliy urngin ban’en ni bay u laniyan’ ngak Jehovah u daken e meybil ni gaar: “A Somol, uw n’umngin nap’an ni thingar gu ning e ayuw mfin mu rung’ag lungug? . . . Uw rogon ni ga be k’adan’um ga be guy e pi kireb ney ni yibe rin’?” (Hab. 1:2, 3, BT) I fulweg Jehovah taban e meybil rok e re tapigpig rok ney nib yul’yul’. (Hab. 2:2, 3) Ma tomuren ni fal’eg Habakkuk i lemnag rogon ni i ayuweg Jehovah e girdi’ rok, ma aram miki felfelan’ bayay. I mich u wan’ ni be lemnag Jehovah, ma demtrug e magawon nra mada’nag ma ra ayuweg ni nge athamgil u fithik’. (Mu beeg e Habakkuk 3:17-19.) Mang e gad be fil ko re n’ey? Nap’an ni ga ra mada’nag e magawon, mag meybil ngak Jehovah ngam weliy urngin ban’en ni bay u lanin’um. Ngemu’ mag sap ngak ni nge ayuwegem. Faan ga ra rin’ e re n’ey, ma aram e rayog ni nge pagan’um ngay nra pi’ Jehovah gelngim ni ngam athamgil u fithik’ e magawon rom. Ma nap’an ni ga ra guy rogon ni be ayuwegem, ma aram e ra gel boch e michan’ rom ngak.
7. Mang e guy e girdi’ rok Shirley rogon ni ngar k’aringed ni nge lemnag, ma mang e ayuweg nde war e michan’ rok ngak Jehovah?
7 Mu ulul i rin’ e pi n’en nra ayuwegem ni ngam par ni gab chugur ngak Jehovah. Ireray e n’en ni ayuweg Shirley nreb e walag nib pin ni ma par u Papua New Guinea u nap’an ni mada’nag boch e magawon. b Ba gafgow e tabinaw rok, ma yu ngiyal’ e ba mo’maw’ ni ngar yognaged e ggan nib gaman ni ngar ked. Bay reb e girdi’ rok ni guy rogon ni nge warnag e pagan’ rok ngak Jehovah. I gaar: “Ga be yog ni be ayuwegem gelngin Got nib thothup, machane uw rogon ni be ayuwegem? Ya ki gimed be gafgow e tabinaw rom. Ga be adbey e tayim rom ko machib ni ga be tay.” I yog Shirley ni gaar: “I lungug u wan’ug: ‘Gur, be lemnagmad Got fa danga’?’ Ere gu meybil ngak Jehovah ni ka chingiyal’ nem nggu weliy urngin ban’en ni bay u lanin’ug. Dag tal i beeg e Bible nge pi babyor rodad, mu kug ulul ni ngaug un ko machib nge muulung.” De n’uw nap’an nga tomuren me tabab ni nge nang ni be ayuweg Jehovah e tabinaw rok. Da ur m’ad ko bilig mu ur pared ni yad ba felfelan’. I gaar Shirley: “Gu nang ni be fulweg Jehovah taban e meybil rog.” (1 Tim. 6:6-8) Ere ku arrogom ni faan ga ra ulul i rin’ e pi n’en nra ayuwegem ni ngam par ni gab chugur ngak Jehovah, ma aram e dab mu pag e magawon ara boch ban’en ni ma maruwaran’um ngay ni nge palognagem rok.
NAP’AN NI YIRA GAFGOWNAG E PI WALAG NI PUMOON NI YAD MA YOG E THIN RODAD
8. Mang e rayog ni nge buch ko pi walag ni pumoon ni yad ma yog e thin u lan e ulung rok Jehovah?
8 Ma fanay e pi toogor rodad e news nge Internet ni ngar garereged boch ban’en nde riyul’ u murung’agen e pi walag ni pumoon ni yad ma yog e thin u lan e ulung rok Jehovah, ara ra k’aringed gadad ni nge maruwar boch ban’en u rarogorad u wan’dad. (Ps. 31:13) Bay boch e walag ni pumoon ni kan kolrad kan t’ar e thin nga dakenrad ni yibe yog ni kar th’abed e motochiyel. Ku ireray e n’en ni buch ko pi Kristiano ko bin som’on e chibog u nap’an nni t’ar e thin nga daken apostal Paul min kalbusnag. Mang e rrin’ed?
9. Mang e rin’ boch e Kristiano u nap’an nni kalbusnag apostal Paul?
9 Bay boch e Kristiano ko bin som’on e chibog nra talgad nda kur ayuweged apostal Paul u nap’an nni kalbusnag u Roma. (2 Tim. 1:8, 15) Mang fan? Gur, yad be tamra’ ngak Paul ni bochan e be lemnag e girdi’ ni ke th’ab e motochiyel? (2 Tim. 2:8, 9) Fa gur, yad be rus nri kun gafgownagrad? Demtrug fan nrin’ed e re n’ey, ma rayog ni ngad nanged rogon laniyan’ Paul ko re n’ey ni buch. Ya boor e gafgow ni ke yan u fithik’ ma kki tay e yafos rok nga thatharen e riya’ ni bochrad. (Acts 20:18-21; 2 Kor. 1:8) Manga yugu dab da boded e piin nra paged Paul u nap’an ni t’uf e ayuw rok! Ere mang e susun ndab da paged talin u nap’an ni yira gafgownag e pi walag ni pumoon ni yad ma yog e thin rodad?
10. Mang e susun ndab da paged talin u nap’an ni yira gafgownag e pi walag ni pumoon ni yad ma yog e thin rodad, ma mang fan?
10 Dab mu pagtalin fan ni yibe gafgownagdad nge en be k’aring. Be gaar e 2 Timothy 3:12: “Urngin e girdi’ ni yad ba adag ni ngar pired u reb e pangin nib m’agan’ Got ngay ma kar taab girdi’gad Kristus Jesus e bay ni gafgownagrad.” Ere susun e dab da gingad ngay ni be gafgownag Satan e pi walag ni pumoon ni yad ma yog e thin rodad. Fan ni be rin’ e pi n’ey e bochan ni baadag ni nge k’aring e pi walag ney ni nge dab kur pared ni yad ba yul’yul’, me k’aring e marus ngodad.—1 Pet. 5:8.
De rus Onesiforus ni nge ayuweg Paul ni yugu aram rogon ni bay u kalbus. Ngiyal’ ney e ma ayuweg pi walagdad yugu boch e walag ni yad bay u kalbus nrogon ni be m’ug ko re sasing ney (Mu guy e paragraph 11-12)
11. Mang e gad be fil ko n’en ni rin’ Onesiforus? (2 Timothy 1:16-18)
11 Mu ulul ngam ayuweg pi walagem ma dab mu pagrad. (Mu beeg e 2 Timothy 1:16-18.) Immoy reb e Kristiano ko bin som’on e chibog ni ka nog Onesiforus ngak nib thil e n’en ni rin’ u nap’an ni bay Paul u kalbus. ‘De tamra’ ngay ni bay Paul u kalbus.’ Ya par nga i gay, ma nap’an ni pirieg me guy rogon ni nge ayuweg ko n’en nib t’uf rok. Re n’ey ni rin’ Onesiforus e tay e yafos rok nga thatharen e riya’. Ere mang e gad be fil ko re n’ey? Thingar dab da paged e girdi’ ni ngar k’aringed e marus ngodad ara ra taleged gadad ndab kud ayuweged pi walagdad ni yibe gafgownagrad. Ya ngad rin’ed urngin e tin rayog rodad ni ngad ayuweged pi walagdad. (Prov. 17:17) Ba t’uf ni ngad t’ufeged yad ma gad ayuwegrad.
12. Mang e gad be fil ko pi walag u Russia?
12 Mu lemnag rogon ni be ayuweg e pi walag u Russia boch i walagdad ni kan kalbusnagrad u rom. Nap’an ni yira fek boch i yad nga tagil’ e puf oloboch, ma boor e walag ni ma yib ni ngar pied e athamgil nga lanin’rad. Mang e gad be fil ko re n’ey? Dab mu rus u nap’an ni yira t’ar e thin nga daken e pi walag ni pumoon ni yad ma yog e thin rodad, ara ni kalbusnagrad, ara ni gafgownagrad. Um pi’ e meybil ni fan ngorad, mag ayuweg chon e tabinaw rorad, mu kum gay boch e kanawo’ nrayog ni ngam ayuwegrad riy.—Acts 12:5; 2 Kor. 1:10, 11.
NAP’AN NI YIRA MONINGNAGDAD
13. Uw rogon nrayog ni nge war e pagan’ rodad ngak Jehovah nge ulung rok ni faanra yibe moningnagdad?
13 Rayog ni nga i moningnagdad e girdi’ rodad nde taareb e michan’ rodad, ara piin gad nga maruwel, ara skul ni bochan e machib ni gad ma tay ara bochan ni gad ma fol ko pi motochiyel rok Jehovah. (1 Pet. 4:4) Rayog ni nge lungurad: “Gu baadag dakenam, machane re raba’ i teliw rom nir e kaygi yoor ban’en ni be talegem riy ndabiyog ni ngam rin’ ma yad be fol u boch ban’en ni un rin’ kakrom.” Ku bay boch e girdi’ nrayog ni ngaur gathibthibnaged gadad ni bochan rogon e ngongol rodad ngak e piin kan tharbograd. Rayog ni nge lungurad: “Uw rogon ni ga be yog ni gur be’ ni ga ma dag e t’ufeg?” Thin ni aray rogon e rayog ni nge k’aringdad ni nge maruwar boch ban’en u wan’dad. Ere sana rayog ni nge lungudad u wan’dad: ‘Gur, kaygi pag urngin ban’en ni baadag Jehovah ni nggu rin’, fa? Ma gur, kaygi yoor ban’en ni be talegeg e ulung rok ndab gu rin’, fa?’ Uw rogon nrayog ni ngam par ni gab chugur ngak Jehovah nge ulung rok ni faanra ireray e magawon ni ga be mada’nag?
De motoyil Job ko pi ban rok e piin ur dake yad e fager rok ni ur moningnaged. Ya dugliy u wan’ ni nge par nib yul’yul’ ngak Jehovah (Mu guy e paragraph 14)
14. Mang e susun ni ngad rin’ed u nap’an nra moningnagdad e girdi’ ni bochan e gad be fol ko pi motochiyel rok Jehovah? (Psalm 119:50-52)
14 Mu dugliy u wan’um ni ngaum fol ko pi motochiyel rok Jehovah. Job e ir be’ ni i fol ko pi motochiyel rok Jehovah ni yugu aram rogon ni un moningnag. Bay bagayad fa piin ur dake yad e fager rok Job ni guy rogon ni nge k’aring Job ni nge lemnag ndariy fan u wan’ Got ko ra fol ko pi motochiyel rok fa danga’. (Job 4:17, 18; 22:3) Machane siyeg Job ni nge mich u wan’ e pi ban ney. Manang nib puluw e pi motochiyel rok Jehovah ni murung’agen e tin nib fel’ nge tin nib kireb, ma ke dugliy u wan’ ni nge fol riy. De pag yugu boch e girdi’ ni ngar k’aringed ni nge dabki par nib yul’yul’. (Job 27:5, 6) Mang e gad be fil ko re n’ey? Dab mu pag e moning ni yibe tay ngom ni nge k’aringem ni nge maruwar u wan’um ko ba puluw e pi motochiyel rok Jehovah fa danga’. Mu lemnag e n’en ni ka i buch u lan e yafos rom. Gathi boor yay ni kam guy nib puluw e pi motochiyel rok Jehovah mab ga’ angin ni ma yib ngom? Ere mu dugliy u wan’um ni ngaum ayuweg e re ulung ni yad ma fol ko pi motochiyel ney. Faan ga ra rin’ e re n’ey, ma demtrug gelngin e moning ni yibe tay ngom ma dabi k’aringem ni ngam palog rok Jehovah.—Mu beeg e Psalm 119:50-52.
15. Mang fan ni un moningnag Brizit?
15 Mu lemnag e n’en ni buch rok reb e walag nib pin u India ni ka nog Brizit ngak. I moningnag chon e tabinaw rok ni bochan e michan’ rok. De n’uw nap’an nga tomuren nni taufenag ko duw ni 1997, ma aram min taleg e pumoon rok ko maruwel. Ere dugliy e pumoon rok ni nga ranod pi fakrow ra pared ko gallabthir rok ni yow ma par u yugu reb e mach. Machane kab gel e magawon nra mada’nag Brizit. Bochan nder maruwel e pumoon rok, ma aram e ba t’uf ni nge maruwel u polo’ e tayim rok ni nge ayuweg e tabinaw rok. Maku reb e, bin th’abi chugur e ulung ngorad e sogonap’an 220 e mayel palogin ko gin yad bay riy. Ba gel e kireban’ riy ya chel chon e tabinaw ko pumoon rok ngar togopuluwgad ngak ni bochan e michan’ rok. Bochan gelngin e togopuluw nni tay ngak, ma aram miki t’uf ni ngku ranod ra pared nga yugu bang. Ngemu’ miki yim’ e pumoon rok nib tomgin. Boch nga tomuren miki yim’ bochi pin ni fak ko cancer ni ka fini gaman 12 e duw rok. Ere chel e girdi’ rok nga ron’ed e kireb nga daken ko pi n’ey ni ke buch. Rogned ni faan gomanga de mang reb e Pi Mich Rok Jehovah, ma dariy reb e pi n’ey nra buch. Yugu aram rogon, me ulul ni nge pagan’ ngak Jehovah me par nib chugur ko ulung rok.
16. Uw rogon ni kan tow’athnag Brizit ni bochan e par nib chugur ngak Jehovah nge ulung rok?
16 Bochan ni ma par Brizit nib palog ko gin bay e ulung riy, ma aram me yog reb e walag ni pumoon ngak ni ma lekag e ulung ni nga i machib ko gin ma par riy, ma be yarmiy e muulung u tabinaw rok. Som’on e lemnag ni kaygi mo’maw’ e re n’ey. Yugu aram rogon, me fol ko n’en ni yog e re walag nem ngak. I machib, ma be tay e muulung u tabinaw rok, maku ma tay e tayim ni ngar ted pi fak e fol Bible ni tabinaw. Ere mang angin ni yib riy? Boor e girdi’ ni yag ni nge fil e Bible ngorad, ma boor i yad e yag ni nge un ko taufe. Ma nap’an e duw ni 2005, me un ko regular pioneer. Bochan ni pagan’ ngak Jehovah me par nib yul’yul’ ko ulung rok, ma aram min tow’athnag. Gubin i pi fak ni yad be pigpig ngak Jehovah ni yad ba yul’yul’, ma l’agruw e ulung ni bay ko gin yad ma par riy e chiney! Ba mich u wan’ Brizit ni Jehovah e ir e ke pi’ gelngin ni nge athamgil u fithik’ e pi magawon ni be mada’nag nge moning ni be tay chon e tabinaw rok ngak.
MU PAR NI GAB YUL’YUL’ NGAK JEHOVAH NGE ULUNG ROK
17. Mang e susun ni ngad dugliyed ni ngad rin’ed?
17 Baadag Satan ni ngad lemnaged nra digeydad Jehovah u nap’an ni gad ra mada’nag e magawon, ma faan gad ra ayuweg e ulung rok ma ra mun daken e magawon rodad. Baadag Satan ni ngad rusgad u nap’an ni yira t’ar e thin nga daken e pi walag ni pumoon ni yad ma yog e thin rodad, ara ni gafgownagrad, ara ni kalbusnagrad. Machane ba tamilangan’dad ko pi ban rok, ma darud paged ni nge chafegdad nga bang. (2 Kor. 2:11) Ere mu dugliy u wan’um ni ngam siyeg e pi ban rok Satan, mag par ni gab yul’yul’ ngak Jehovah nge ulung rok. Dab mu pagtalin ndariy ba ngiyal’ nra digeyem Jehovah. (Ps. 28:7) Ere dab mu pag ban’en ni nge palognagem rok!—Rom. 8:35-39.
18. Mang e gad ra weliy ko bin migid e article?
18 Re article ney e kad weliyed riy murung’agen boch e magawon nrayog ni nge yib ngodad u wuru’ e ulung. Machane ka bay boch e magawon ni gad ma mada’nag u lan e ulung nrayog ni nge skengnag rogon e pagan’ rodad ngak Jehovah nge ulung rok. Uw rogon nrayog ni ngad gelgad ko pi magawon ney? Gad ra weliy e fulweg riy ko bin migid e article.
TANG 118 “Mu Gelnag e Michan’ Romad”
a Faanra nge yag nda athamgilgad u fithik’ e yul’yul’, ma thingar da ululgad ni nge pagan’dad ngak Jehovah nge ulung rok. Ma fanay Moonyan’ e pi magawon ni gad ma mada’nag ni nge guy rogon ni nge kirebnag e re pagan’ ney ni bay rodad. Re article ney e ra weliy murung’agen dalip e magawon ni ma fanay Moonyan’, nge n’en nrayog ni ngad rin’ed ya nge yag nda gelgad ko n’en be guy rogon ni nge rin’ ngodad.
b Kan thilyeg fithingan boch e girdi’ u roy.