1. Mang e be yip’ fan ni ngad pared nib tamilangan’dad? (2 Timothy 4:5)

 NAP’AN ni gad ra mada’nag e magawon, ma rayog ni nge skengnag rogon e yul’yul’ rodad ngak Jehovah nge ulung rok. Ere uw rogon nrayog ni ngad gelgad ko pi magawon ney? Ba t’uf ni ngad pared nib tamilangan’dad, ma gad ba od, ma gad ba mudugil u fithik’ e michan’ rodad. (Mu beeg e 2 Timothy 4:5. b) Rogon ni ngad pared nib tamilangan’dad e aram e ngad pared nib gapas lanin’dad, ma gad be lem nib fel’ rogon, ma gad be guy rogon ni ngaud lemnaged boch ban’en ni bod rogon ni ma lemnag Jehovah. Faan gad ra rin’ e re n’ey, ma aram e dab da paged e n’en ni bay u lanin’dad ni nge gagiyegnag rogon ni gad be lem.

2. Mang e gad ra weliy ko re article ney?

² Fa binem e article e da weliyed riy dalip e magawon nrayog ni nge yib ngodad u wuru’ e ulung. Ma biney e article e gad ra weliy riy dalip e magawon ni gad ma mada’nag u lan e ulung nrayog ni nge skengnag e yul’yul’ rodad ngak Jehovah. Pi n’ey e aram e (1) nap’an ni gad ra lemnag ni ke rin’ reb e walag ban’en nib kireb ngodad, (2) nap’an ni yira fonownagdad, nge (3) nap’an ni be mo’maw’ ngodad ni ngad mechamgad nga boch ban’en ni be thil u lan e ulung. Ere uw rogon nrayog ni ngad pared nib tamilangan’dad ma gad ba yul’yul’ ngak Jehovah nge ulung rok u nap’an ni gad ra mada’nag e pi magawon ney?

3. Mang e rayog ni ngad rin’ed ni faanra gad be lemnag ni ke rin’ reb e walag ban’en nib kireb ngodad?

³ Bay ba ngiyal’ ni kam lemnag ni bay ban’en nib kireb ni ke rin’ reb e walag ngom, nrayog nsana reb e walag ni ma yog e thin u lan  e ulung, fa? Dabisiy ni gathi lem rok ni nge rin’ e re n’ey. (Rom. 3:23; Jas. 3:2) Yugu aram rogon, ma rayog ni ke kireban’um ko n’en ke rin’. Rayog ndakir fel’ rogon e mol rom ni bochan e yig ga be lemnag e re n’em ni ke buch. Sana ku rayog ni nge lungum u wan’um, ‘Faanra rayog rok reb e walag ni nga i ngongol ni aray rogon, me ere gur, riyul’ ni ulung rok Got e ray?’ Ireray e n’en ni baadag Satan ni ngad lemnaged. (2 Kor. 2:11) Mit ney e lem e rayog ni nge palognagdad rok Jehovah nge ulung rok. Ere faanra gad be lemnag ni ke rin’ reb e walag ban’en nib kireb ngodad, ma uw rogon ni ngad pared nib tamilangan’dad ma gad siyeg ndab da lemgad ni bod rogon ni baadag Satan?

4. Uw rogon ni par Josef nib tamilangan’ u nap’an nrin’ boch ban’en nib kireb ngak? Mang e rayog ni ngad filed ko n’en ni rin’? (Genesis 50:19-21)

⁴ Dab mu damumuw. Nap’an ni kab fel’ yangaren Josef, mab kireb e n’en ni rin’ pi walagen ni yad ba ilal ngak. Ur fanenikayed, maku bay boch i yad ni baadag ni nge thang e fan rok. (Gen. 37:4, 18-22) Boch nga tomuren, mar pied nchuway’ ni nge mang sib. Bochan e re n’ey, ma boor e magawon nib gel ni mada’nag Josef u lan sogonap’an 13 e duw. Ere rayog ni nge maruwar u wan’ ko rriyul’ nib t’uf rok Jehovah fa danga’. Ku rayog ni nge lemnag ko ke digey Jehovah ko re ngiyal’ i n’em ni ke t’uf e ayuw rok fa danga’. Yugu aram rogon ma de damumuw Josef, ya par nib tamilangan’ ni aram e par nib gapas laniyan’. Nap’an ni mab e kanawo’ ngak ni nge sulweg taban e kireb ni ke rin’ pi walagen ngak ma gathi aram e n’en ni rin’, ya dag e t’ufeg ngorad miki n’ag fan e kireb rorad. (Gen. 45:4, 5) Fan ni yag ni nge ngongol Josef ni aray rogon e bochan ni be lem nib fel’ rogon. Gathi yigoo magawon rok e par ni be lemnag, ya i par ni be lemnag e n’en nib m’agan’ Jehovah ngay. (Mu beeg e Genesis 50:19-21.) Mang e gad be fil ko re n’ey? Faanra kan rin’ ban’en nib kireb ngom, ma dab mu damumuw ngak Jehovah ara mu lemnag ni ke digeyem. Ya ngam fal’eg i lemnag rogon ni be ayuwegem u fithik’ e magawon rom. Maku reb e, nap’an nra rin’ boch e girdi’ ban’en ngom nib kireb mag n’ag fan u wan’um ma dab mu pagtalin ni “rogon nib t’uf be’ rok be’ e ra upunguy boor e denen.”​—1 Pet. 4:8.

5. Uw rogon ni par Miqueas nib tamilangan’ u nap’an ni lemnag ni kan rin’ boch ban’en nib kireb ngak?

⁵ Mu lemnag e n’en ni buch rok reb e piilal u South America ni ka nog Miqueas ngak. c I yib ngan’ ba ngiyal’ ni i lemnag nde fel’ e n’en ni rin’ boch e walag ni pumoon ngak ni yad ma yog e thin u lan e ulung. I gaar: “Dariy bayay ni kug mochuch ni aram gelngin. I magafan’ug, ma der yag ni ngaug mol nnep’, ma ug yor ni bochan e gu be lemnag ndariy be’ nrayog ni nge ayuwegeg.” Yugu aram rogon, me par Miqueas nib tamilangan’ me guy rogon ni nge gagiyegnag rogon e lem ni be tay. Boor yay ni i meybil ngak Jehovah ni be wenig ngak ni nge pi’ gelngin nib thothup ngak miki pi’ gelngin ya nge yag ni athamgil. Ku bay boch ban’en ni i gay murung’agen u lan e pi babyor rodad nrayog ni nge ayuweg. Ere mang e gad be fil ko re n’ey? Faanra ga be lemnag ni ke rin’ reb e walag ban’en nib kireb ngom, ma aram e ngam par nib gapas lanin’um mag guy rogon ni ngam gagiyegnag boch ban’en nde puluw nrayog ni ngaum lemnag. Sana rayog ndam nang e n’en ke k’aring facha’ ni nge non ara ngongol ni aram rogon. Ere mu non ngak Jehovah u daken e meybil, ma gog ngak ni nge ayuwegem ya nge yag nim lemnag fare magawon ni bod rogon ni be lemnag facha’. Ga ra rin’ e re n’ey, ma aram e rayog ni nge ayuwegem ni nge pagan’um ngay ni gathi lem rok fare walag ni nge rin’ ban’en nib kireb ngom, miki yag ni ngam n’ag fan rok. (Prov. 19:11) Dab pagtalin ni manang Jehovah e n’en be buch rom, ma ra pi’ gelngim ni ngam athamgil u fithik’.​—2 Kron. 16:9; Ekl. 5:8.

6. Mang nib ga’ fan ni nge tamilang u wan’dad ni fan ni ma fonownagdad Jehovah e bochan ni gad ba t’uf rok? (Hebrews 12:5, 6, 11)

⁶ Nap’an ni yira fonownagdad, ma rayog ni nge  kireban’dad. Machane faanra kemus ni yigoo kireban’ rodad e gad be lemnag, ma aram e rayog ni ngad tababgad ni ngad lemnaged nde puluw rogon ni kan fonownagdad maku dariy rogon fare fonow ngodad, ara da lemnaged ni kaygi gel e fonow ni kan pi’ ngodad. Re n’ey e rayog ni nge talegdad ndabi tamilang ban’en nib ga’ fan u wan’dad, ni aram e ngad guyed ni fan ni be fonownagdad Jehovah e bochan ni gad ba t’uf rok. (Mu beeg e Hebrews 12:5, 6, 11.) Ma faanra ud pared ni be kireban’dad ni bochan e kan fonownagdad, ma aram e gad be bing e kanawo’ ngak Satan ni nge cham ngodad. Baadag ni ngad siyeged e fonow ni yibe pi’ ngodad, mu kud paloggad rok Jehovah nge ulung rodad. Ere faanra kan fonownagem, ma uw rogon nrayog ni ngam par nib tamilangan’um?

7. (a) Uw rogon ni fanay Jehovah Peter u tomuren ni m’agan’ ko fonow ni kan pi’ ngak nrogon ni be m’ug ko sasing? (b) Mang e ga be fil ko n’en ni rin’ Peter?

⁷ Nge m’agan’um ko fonow ni kan pi’ ngom, mag thilyeg e n’en nib t’uf ni ngam thilyeg u rarogom. Boor yay ni fonownag Jesus Peter u p’eowchen e tin ka bay e apostal. (Mark 8:33; Luke 22:31-34) Rayog nri tamra’ Peter ko re n’ey! Yugu aram rogon me par nib yul’yul’ ngak Jesus. I m’agan’ ko fonow ni kan pi’ ngak miki fil ban’en ko oloboch rok. Aram fan ni tow’athnag Jehovah Peter ko yul’yul’ ni tay miki pi’ boch e maruwel ngak nib ga’ fan ni nge rin’ u lan e ulung. (John 21:15-17; Acts 10:24-33; 1 Pet. 1:1) Ere mang e rayog ni ngad filed ko n’en ni rin’ Peter? Faanra dab da pared ni gad be lemnag gelngin e tamra’ ni kad ted, me m’agan’dad ko fonow ni kan pi’ ngodad, ma gad thilyeg e n’en nib t’uf ni ngad thilyeged u rarogodad, ma aram e rayog ni nge yib angin ngodad nge yugu boch e girdi’. Gad ra rin’ e re n’ey, ma aram e rayog ni ngki fanaydad Jehovah ni ngad rin’ed yugu boch e maruwel ma gad ayuweg pi walagdad.

8-9. Tomuren nni fonownag Bernardo, ma uw rogon u wan’ ko som’on? Mang e ayuweg ni nge thilyeg rogon e lem rok?

⁸ Mu lemnag e n’en ni buch rok Bernardo nreb e walag ni pumoon u Mozambique. Nni chuweg e maruwel rok ni ir reb e piilal. Uw rogon e re n’ey u wan’ Bernardo ko som’on? I gaar, “Gu damumuw ni bochan e dabug e fonow ni kan pi’ ngog.” I magafan’ ko n’en nra lemnag e girdi’ u lan e ulung u murung’agen. I gaar, “Ba pag in e pul mfini yag ni nge puluw u wan’ug e fonow ni kan pi’ ngog miki pagan’ug ngak Jehovah nge ulung rok bayay.” Ere mang e ayuweg Bernardo ni nge thilyeg rogon e lem rok?

⁹ I yal’uweg rogon e lem rok. I weliy ni gaar: “Nap’an ni ug pigpig ni gag reb e piilal, ma gu ma  fanay fare thin ko Hebrews 12:7 ni nggu ayuweg e girdi’ ni nge puluw u wan’rad e fonow rok Jehovah. Ere gu fitheg ni lungug, ‘Mini’ e ba t’uf ni nge fol ko re thin nu Bible ney?’ Gubin e pi tapigpig rok Jehovah ni ku gub muun ngay.” Tomuren me rin’ Bernardo boch ban’en ya nge yag ni pagan’ ngak Jehovah nge ulung rok bayay. I yoornag e tayim rok ni fan ko beeg Bible ma be fal’eg i lemnag e pi n’en be beeg. Yugu aram rogon ni ka be magafan’ ko n’en nra i lemnag e pi walag u murung’agen, machane me un ngorad ko machib maku be un ko n’en yibe rin’ u nap’an e muulung. Munmun ma aram mu kun dugliy Bernardo ni ngki mang reb e piilal bayay. Faanra kan fonownagem ni bod Bernardo, mag guy rogon ni nge dab mu par ni ga be lemnag gelngin e tamra’ ni kam tay, me m’agan’um ko fonow ni kan pi’ ngom, mag thilyeg e n’en nib t’uf ni ngam thilyeg u rarogom. d (Prov. 8:33; 22:4) Faan ga ra rin’ e re n’ey, ma aram e rayog ni nge pagan’um ngay nra tow’athnagem Jehovah ni ga be par ni gab yul’yul’ ngak nge ulung rok.

10. Mang reb e ban’en ni thil nrayog ni skengnag rogon e yul’yul’ rok boch e pumoon nu Israel?

¹⁰ Nap’an nra thil boch ban’en u lan e ulung ma rayog ni nge skengnag rogon e yul’yul’ rodad. Ma faanra dab da kol ayuwgad ma rayog ni ngad paged e pi n’ey ni nge palognagdad rok Jehovah. Am lemnag rogon ni i thil boch ban’en u nap’an piyu Israel. U m’on ni nge pi’ Jehovah fare Motochiyel ngorad, ma piin lolugen e tabinaw e yad e yad ma rin’ e maruwel ko prist. Yad ma ngongliy e altar mar ognaged e maligach ngak Jehovah ni fan ko tabinaw rorad. (Gen. 8:20, 21; 12:7; 26:25; 35:1, 6, 7; Job 1:5) Machane nap’an nni pi’ fare Motochiyel, ma aram e daki rin’ e piin lolugen e tabinaw e biney e maruwel. Ya dugliy Jehovah boch e girdi’ ko tabinaw rok Aron ni ngar manged prist ni yad e ngaur ognaged e maligach ngak. Tomuren, ma faanra tabab reb i lolugen e tabinaw ni gathi ir bang ko tabinaw rok Aron ni nge rin’ e maruwel ko prist, ma aram e rayog ni ngan thang e fan rok. e (Lev. 17:3-6, 8, 9) Gur, rayog ni aram reb i fan ni togopuluw Korah, nge Dathan, nge Abiram, nge 250 e tayugang’ nu Israel ngak Moses nge Aron? (Num. 16:1-3) Dabiyog ni ngar dogned. Machane n’en gad manang e de yag ni nge par Korah nge fapi pumoon ni yad ba yul’yul’ ngak Jehovah. Ere mang e rayog ni ngam rin’ ni faanra bay boch ban’en ni kan thilyeg u lan e ulung ni be skengnag rogon e yul’yul’ rom?

11. Mang e gad be fil ko n’en ni rin’ boch i girdien fare ganong rok Kohath?

¹¹ Mu fol ko n’en ni yibe thilyeg u lan e ulung. Nap’an ni i milekag piyu Israel u daken e ted, ma bay reb e maruwel nib ga’ fan ni ma rin’ fare ganong rok Kohath. Gubin yay nra chuw piyu Israel u bang ni nga ranod nga bang, ma bay boch i yad ni ma m’on ni ke fek fare kahol ko m’ag. (Num. 3:29, 31; 10:33; Josh. 3:2-4) Rib manigil e biney e tow’ath! Machane nap’an ni yan i par piyu Israel nga lan fare Nam ni Kan Micheg, ma bay boch ban’en ni thil ko maruwel rok girdien e ganong rok Kohath. Daki t’uf ni ngaun par ma yibe fek fare kahol ko m’ag u bang nga bang. Ere nap’an ni pilung Solomon, ma bay boch i yad nni tay ni nge mang girdien e tang, ma boch i yad e ma matanagiy e garog, ma boch i yad e ma ayuweg e gin yima chaar riy. (1 Kron. 6:31-33; 26:1, 24) Der yog e Bible ni i gun’gun’ girdien e ganong rok Kohath ara rogned ni ngan pi’ reb e maruwel ngorad ni kab tolang boch ni bochan e maruwel ni ur rin’ed u m’on riy. Ere mang e rayog ni ngad filed ko re  n’ey? Mu fol ko n’en ni be thilyeg e ulung rok Jehovah u polo’ i gum’irchaem, nib muun ngay e tin yibe thilyeg ni bay rogon ko maruwel ni ga ma rin’. Demtrug e re maruwel ni yira pi’ ngom ma ngam felfelan’ ngay. Dab mu pagtalin ni maruwel ni kan pi’ ngom e gathi aram e n’en ni be ga’nag fam u wan’ Jehovah. Ya kab ga’ fan u wan’ e fol ni ga be tay ko maruwel ni ga be rin’.​—1 Sam. 15:22.

12. Mang e lemnag Zaina u nap’an nog ngak ni nge chuw u Bethel nge sul nga i machib?

¹² Mu lemnag e n’en ni rin’ Zaina nreb e walag nib pin u Middle East nni thilyeg e maruwel rok miki mul reb e tow’ath u pa’ nrib ga’ fan u wan’. Tomuren ni pigpig u Bethel nib pag 23 e duw, mi nog ngak ni nge sul nga i machib. I gaar: “Rug gin u nap’an nni thilyeg e maruwel rog. Gu lemnag ndakuriy ban’en ni gub fel’ ngay mu kug par nug be lemnag ko, ‘Mang e kug rin’ nib kireb?’” Ba gel e kireban’ riy, ya bay boch e walag u lan e ulung ni ku ron’ed daken e amith ni be tay laniyan’ ya lungurad ngak: “Faan gomanga gab fel’ ko binem e maruwel, ma dabi yog e ulung ngom ni ngam chuw u Bethel.” Ba n’uw nap’an ni par Zaina nrib kireban’ ma gubin e nep’ ni ma yor. Machane i yog ni gaar: “Dariy ba ngiyal’ ndaki pagan’ug ko ulung ara rogon ni be dag Jehovah e t’ufeg ngog.” Ere uw rogon ni yag ni nge par Zaina nib tamilangan’?

13. Mang e rin’ Zaina ya nge dabki par ni be lemnag boch ban’en nde puluw?

¹³ I yag ni nge tal Zaina ndab ki par ni be lemnag boch ban’en nde puluw. Ni uw rogon? Ma beeg boch e article u lan e pi babyor rodad nib puluw ko magawon rok. Rib gel e ayuw ni pi’ fare article ngak ni bay ko Fare Wulyang ko Damit ko February 1, 2001 ni thin ni Meriken ni kenggin e “Rayog ni Ngam Athamgil u Fithik’ e Pi N’en Ma Muleg Lanin’um!” Re article nem e be weliy ni mus ngak Mark ni ir be’ ni yoloy reb e babyor ko Bible miki lem ni aray rogon u nap’an nni thilyeg e maruwel rok. I gaar Zaina, “N’en ni rin’ Mark e ayuwegeg ni nge dabki mulan’ug.” Ku de palognag Zaina ir ko pi fager rok. De tal ndaki chag ko pi walag ara par ni yigoo kireban’ rok e be lemnag. I nang ni gelngin Jehovah nib thothup e aram e n’en be maruwel u daken e ulung rok ma pi walag ni pumoon ni yad ma yog e thin e ri yad ma lemnag. Machane ki nang nthingari rin’ e ulung rok Got e n’en nib t’uf ni ngar rin’ed ya nge yag nni lebguy e maruwel rok Jehovah.

14. Mang reb e ban’en ni thil u lan e ulung ni mo’maw’ ngak Vlado ni nge mecham ngay, ma mang e ayuweg?

¹⁴ Vlado nreb e piilal u Slovenia ni ke gaman 73 e duw rok e mo’maw’ ngak ni nge m’agan’ ngay ni ke peth e ulung rok nga yugu reb e ulung ma kan ning e bin baaram e Tagil’ e Liyor ni ma un ngay.  I gaar: “Da gur nang fan ni ngan ning e binem e Tagil’ e Liyor nrib manigil. I kireban’ug ni bochan e kafin ni mu’ i ngongliy yu yang riy ni ke kireb. I gag reb e daiksang, ma bay e chiya nge boch ban’en u lan e re Tagil’ e Liyor nem ni kab beech ni gag e gu ngongliy. Maku reb e, re n’ey ni nge peth l’agruw e ulung nga taabang e boor ban’en nib t’uf ni ngan rin’ riy nib mo’maw’ ngomad e pi walag ni kug pilibthirgad.” Ere mang e ayuweg Vlado ni nge fol ko n’en ka nog ni ngan rin’? I weliy ni gaar: “Gad ra guy rogon ni ngad mechamgad ko pi n’en ni be thilyeg e ulung rok Jehovah, ma gubin ngiyal’ ni yira tow’athnagdad. Pi n’ey ni yibe thilyeg e be fal’eg rogodad ni fan ko pi n’en ni ku ra thil boch nga m’on.” Gur, be mo’maw’ ngom ni ngam mecham ko pi n’en ni be thil u nap’an nra peth e ulung rom nga yugu reb e ulung ara nap’an ni yira thilyeg e maruwel rom, fa? Nge pagan’um ngay ni manang Jehovah rogon lanin’um. Faan ga ra fol ko pi n’ey ni yibe thilyeg mag par ni gab yul’yul’ ngak Jehovah nge re ulung ni ir e be fanay, ma aram e yira tow’athnagem.​—Ps. 18:25.

15. Uw rogon nrayog ni ngad pared nib tamilangan’dad u nap’an ni gad ra mada’nag e magawon u lan e ulung?

¹⁵ Nap’an ni gad be chugur i yan nga tungun e re m’ag ney, ma gad manang nra ud mada’naged e magawon u lan e ulung. Pi magawon ney e rayog ni nge skengnag e yul’yul’ rodad ngak Jehovah. Ere thingar da pared nib tamilangan’dad. Faanra ga be lemnag ni ke rin’ reb e walag ban’en nib kireb ngom, ma dab mu pag e re n’ey ni nge k’aringem ni ngam par ni gab damumuw. Ma faanra kan fonownagem, ma dab mu par ni ga be lemnag gelngin e tamra’ ni kam tay, ma nge m’agan’um ko fonow ni kan pi’ ngom, mag thilyeg e n’en nib t’uf ni ngam thilyeg u rarogom. Ma nap’an nra thilyeg e ulung rok Jehovah boch ban’en nrayog ni nge thilyeg rogon e par rom, ma nge m’agan’um ngay u polo’ i gum’irchaem mag fol riy.

16. Uw rogon nrayog ni ngaum par ni be pagan’um ngak Jehovah nge ulung rok?

¹⁶ Rayog ni ngam par ni be pagan’um ngak Jehovah nge ulung rok u nap’an ni yira skengnag e yul’yul’ rom. Machane faanra ngam rin’ e re n’ey, mab t’uf ni ngam par nib tamilangan’um ni aram e be yip’ fan ni nge gapas lanin’um, mag lem nib fel’ rogon, mag guy rogon ni ngaum lemnag boch ban’en ni bod rogon ni ma lemnag Jehovah. Mu dugliy u wan’um ni ngam fil murung’agen boch e girdi’ u Bible ni taareb rogon e magawon ni yag ni ngar gelgad ngay mag fal’eg i lemnag e n’en nrin’ed. Mmeybil ngak Jehovah ni nge ayuwegem, ma dab mu palognagem ko ulung. Faan ga ra rin’ e pi n’ey, ma demtrug e n’en nra buch ma dabiyog ni nge palognagem Satan rok Jehovah nge ulung rok.​—Jas. 4:7.